وجهات نظر ...

[Salwa]

وجهات نظر مختلفة .....

حلاوة شمسنا وخفة دمنا والجو عندنا ربيع طول السنة ....

جو ايه!!؟؟ ....ربيع؟؟ خفة دم مين ؟؟ هو فيه حد له نفس يضحك ؟؟...هى فين الحلاوة دى ؟؟

منهم لله سدوا نفسنا عن كل شئ...حتى الهواء النضيف تقولش هو كمان سرقوه ...والا غشوه ؟؟

لامؤاخذة ياجماعة انى بنتدخل فى حديثكم ...الناس على وشوشها الاكتئاب من اللى شايفاه ...الناس مطحونة والله ..هو برضه ساعات ينسوا الهم والغم ويضحكوا بس مش زى زمان ..وعايزنا نرجع زى زمان قول للزمان ارجع يازمان ..الضمير مات ياسادة ..مات هنا من زمان ...عمركش تخيلت انك تسمع ان الاخ يقتل اخوه هنا عندنا ؟؟

البانجو انتشر والمخدرات بكل انواعها وبقينا نسمع اسامى غريبة قوى قوى ....وبقينا نسمع عن حالات اغتصاب ومصايب سودة سودة بتحصل وكأننا فى كابوس ...

تلاقيك بيورد عليك من كل لون .....صح ؟؟

والناس تفضفض بقى معاك ....ماهى الناس غاوية تفضفض فى التاكسى وعند الحلاق ....صح ؟؟

صح يابيه ....

ده انا ياسعادة البيه كل ما يجينى مشوار للساحل الشمالى واختصر الطريق والف من سكة تانية اقرب واشوف الناس اللى عايشين جنب شركة الكيماويات والاسمنت واتخيل كل الاطفال دول لما يكبروا حاتبقى صدورهم متحجرة ازاى ؟؟ بيصعب عليا نفسى وحال البلد .....محدش عمره فكر ينقل الناس دى او ينقل الشركات !!!طيب لما هو صعب ينقل الشركات طيب ينقل الناس ..هو فيه ميزانية لكل شئ ومفيش للناس دى ...كل المنطقة دى بيعتبروها برة كردون التصليح ...مش باينة ...يبقى ملهاش لازمة تتعالج ...وحتى الراجل الجديد جاى عند بقى ...بيعاند ليه ؟؟...عاوز يثبتلهم انه اجدع من الراجل القديم وعمال بس يعلى فى الارصفة ...لاعامل حساب كبير ولا صغير يعنى عاوز اقول لسعادتك لاراجل كبير ولا عيل صغير ...تقدر تقوللى مين حايطلع على الرصيف ده ؟؟ ويقولك عملنا كدة علشان العربيات متطلعش على الرصيف ...

شايف يابيه ؟؟ شايف اللوحة الرخام اللى محطوطة جنب مستشفى الشاطبى ؟؟ آهو الدكاترة والاساتذة ربنا يحميهم هم اللى صلحوا المستشفى على حسابهم ...بيبطلوا لهم حجتهم ...وبرضه ...برضه ...بكرة تشوفوا حاينقلوها ازاى ؟؟

الناس بتشتم فى الشرطة ....طيب انا نحكى لك على حاجة حصلت فى البيت اللى قدامنا ....ضاع منهم جدع زى الورد الشتا اللى فات ...عارف ليه يابيه ؟؟ كان واقف تشريفة ....لطعوه من قبل الفجر على اساس ان التشريفة حاتعدى الساعة عشرة الصبح وعارف سيادتك عدت امتى ؟؟ الساعة حداشر بالليل ؟؟ واقف على لحم بطنه فى التلج على البحر ...ييجى عشرين ساعة يابيه وبعيد عنك لما روح جت له فزفزة وعاديك مقامش منها ...وكان بتلات نجوم فمابالك باللى بشريطين ؟؟ دول غلابة يابيه ...غلابة ..

كله بايظ كل حاجة بايظة واللى يجن انها بتقول انها عملت كل حاجة ...يعنى ايه عملت كل حاجة ؟؟ احنا بس عايزينها تشيلنا من دماغها ...دى حاطانا على دماغها وزاعقة ...آل ايه ؟؟ هى اللى عملتنا ...

تيجى بس تعطل مصالحنا واليوم يبقى اغبر من اوله ....

حتى الشباب ماشى يكلم نفسه ....انا اول مرة اكتشف ان حتى الشباب بيكلم نفسه ...

طيب شفت حضرتك الحادثة بتاعة الشاب اللى انتحر ؟؟ آهو ده كان الاول على دفعته تقدر تقوللى انتحر ليه ؟؟ كله بالواسطة والمحسوبية ....وقبل كدة انتحر كذا واحد برضه ...وبس يقولك ملايين راحت على المطار وملايين راحت على تحسين صورتنا قدام السياح ؟؟ سياح مين ياعمنا ؟؟ واحنا ؟؟...طيب انا موظف ...انا معايا بكالوريوس زراعة ...اعمل بيه ايه ؟؟ الماهية ما بتكفيش يوم تلاتة منه بتكون اتفرقت خلاص غيرشى التاكسى السبوبة ده ...وصاحبه كل يوم والتانى يقول انا مسافر ...الكل طهق ...

تعالى شوف المستشفيات الحكومية ؟؟ تعالى اتفرج كل اربعة على مرتبة على الارض .بؤس بؤس كل حاجة بقت بؤس ...ده احنا حتى قيمتنا بقت اقل من قيمة كلاب الخواجات ...والبلد مليانة فلوس ..مليانة فلوس ..مين يصدق الشقق وصلت لتلاتة مليون واربعة مليون جنيه ...هو فيه ايه ؟؟ هى دى العروس ؟؟ بقت عروس حجرية ....اى والله ...عمركشى شفت سمكة بتعوم على الرمل ؟؟ لو شفتها بتتنطط على الرمل شوية فده من حلاوة الروح واكيد السمكة قربت تموت يابيه ...تعيش ازاى برة الميه ؟؟ ازاى بس ياعالم ؟؟

شفت الشباب عاملين شغل جامد ومروقين كل الحيطان وكل الميادين ....انت بس اديهم فرصة وشوف حايحصل ايه ؟؟ بس محدش بيدى حد فرصة ....كله بالواسطة والمحسوبية ...من كام يوم اشتريت علبة جبنة كيرى ولقيته مدينى العلبة من غير غطا ...معلقتش وقلت يمكن علشان غالية والناس غلابة بيبيعها بالواحدة وكان فاتح دى واداهالى كدة ....جانى مغص بعدها وتعبت ....لما رحت اسأله هى الصلاحية بتاعة الجبنة كانت منتهية ؟؟ اصلك عطيتهالى من غير غطا ؟؟ قاللى محصلش....قاللى محصلش ؟؟ طيب اعمل ايه ؟؟ اخلص عليه يعنى ؟؟ فهمت انها كانت منتهية الصلاحية بس انا اللى مغفل ..اللى رضيت وقلت تلاقيه كان فاتحها يبيعها بالواحدة ....يالله بس انا عاوز نعرفك ان الغش اصبح عند الكبير والصغير ...وتعالى بقى لاعلانات الانتخابات والمصايب اللى بتحصل فى الانتخابات ....دك النهار كان فيه ست منقبة واقفة من صباحة ربنا عاوزة تنتخب ...راح جه مخبر على الساعة حداشر كدة ولامؤاخذة مسكها من العباية وقال لها انتى ياولية انتى واقفة عندك بتعملى ايه ؟؟ امشى انجرى بعيد الا ( لامؤاخذة ) اخللى وشك زى اللى لابساه فى رجلك ده ...

مفيش اى احترام لآدمية المواطن ...

تصدق بالله يابيه ...لموا كل بتوع الاخوان فى بوكس واحد ...وفيهم شباب زى الفل ..ولموا السلفيين معاهم ...طيب ماهو معروف ان السلفيين مابيحبوش الاخوان ....طيب هم بيمسكوا الاتنين ليه ؟؟ هو اى ملتحى يمسكوه وخلاص ؟؟محدش بقى فاهم حاجة ...الكل هنا بيخاف من الكل والاب اصبح بيخاف من ابنه الا يفتن عليه ...لخبطوا كل حاجة وبقينا عايشين فى رعب ...ولا محاكم التفتيش ..وعلى ايه كل ده ؟؟

تعالى شوف الاحياء الشعبية ؟؟ الناس كلها مالية المساجد ....ده هروب يابيه ...هروب ...هو شوية متدينين وشوية بيهربوا من كل اللى احنا فيه ...

ولما بقابل اخوانى ونقعد نتكلم ويسألونى ؟؟ ايه اللى احنا فيه ده ؟؟ بقول لهم دول كتير مش شوية ..امال هو قاعد فى المنتجع ليه ؟؟ علشان لو حصل حاجة يحموه ...والكترة تغلب الشجاعة ...بس انا مش داخل مخى ان واحد وشلته يعملوا كل ده ؟؟

وكلهم عيال ....شوف اللى عنده تلاتة واربعين سنة وبيتحكم فى نصف اقتصادنا ؟؟

محدش فيهم عليه الهيبة كلهم عاوزين يخطفوا ويجروا ....

هو فيه سؤال محيرنى ونفسى اسأل اى حد من اللى بيسافروا ؟؟ هو صحيح لو حد اشترى حاجة تمليك فى انجلترا مش من حقه يمتلكها اكتر من خمسين سنة ؟؟ طيب ليه بيشترى فى انجلترا ؟؟ انا سمعت ان ابنه عنده اكبر مكتب فى لندن ....طيب مش الفلوس دى حاتروح عليه بقى والا هو حايبيعه قبل ما يعدوا الخمسين سنة ؟؟

ياعم خليك فى حالك ؟؟ انت عندك عيال ؟؟ خليك فى حالك ...اروح افتن عليك !!!... انا بنضحك ...ده انت بلدياتى وواضح انك مجدع ...بس انصحك بلاش تتكلم كتير ....بيبان التاكسى لها ودان ...

عندى بنت فى الثانوية العامة ...شاطرة قوى لكنها مشيبانى من الدروس الخصوصية ....ده الزام يعنى المدرس يجبر الطلبة على انهم ياخدوا دروس عنده ....طيب نقول لحضرتك على حاجة ...فيه عندنا مدرس مشهور بيقبض يعنى ييجى فى الشهر كدة يعمل له مليون ونصف مرتاح ....عارف بيدى الدرس فين ؟؟

فى الفيللا بتاعته ....لالالالالالا....مش فى اوضة الضيوف لالالا ولا فى اوضة السفرة لالالالا ولا فى اوضة المكتب ...ده بيدى الدرس فى الجنينة ....عامل لهم كراسى ولا كراسى المسرح الصيفى وشغال عليهم بالميكروفون ...وعامل لهم شاشة ولا شاشة السينما ...

هى الحكومة فين ؟؟ بس نرجع ونقول كله بياكل ....كله بيأكل كله ....لافيه رابط ولا فيه نظام ...قول ياباسط ..

تلاقيها هاصت ...

ماهى هاصت من زمان ....من زمان قوى ...

وبلدنا على الترعة بتغسل شعرها .....

والميه فيها بلهارسيا ونترات ومبيدات وفضلات وبلاوى وبقايا حيوانات نافقة ...

جانا نهار مقدرش يدفع مهرها .....

حايدفعه منين ياحسرة ؟؟ .......ممعهوش ورفضوه......خليها فى ليلها ...

خليها فى ليلها ....

بكرة يتقل جيبه وييجى ...

امتى حاتيجى يابكرة ...

امتى حاتيجى يابكرة ...

امتى حاتيجى ....يابكرة ...

[badroora]

المفروض الشعب كلة يعمل بنصيحة الطبيب دي ونريح دمغنا ونبطل نفكر

بصراحة يا ماما سلوي لاقيت الصور خير معبر عن الكلام وعن الاحوال المحزنة التى يعانى منها كل مصري

[kokomen]

ياعم خليك فى حالك ؟؟ انت عندك عيال ؟؟ خليك فى حالك ...اروح افتن عليك !!!... انا بنضحك ...ده انت بلدياتى وواضح انك مجدع ...بس انصحك بلاش تتكلم كتير ....بيبان التاكسى لها ودان ...

عندى بنت فى الثانوية العامة ...شاطرة قوى لكنها مشيبانى من الدروس الخصوصية ....ده الزام يعنى المدرس يجبر الطلبة على انهم ياخدوا دروس عنده ....طيب نقول لحضرتك على حاجة ...فيه عندنا مدرس مشهور بيقبض يعنى ييجى فى الشهر كدة يعمل له مليون ونصف مرتاح ....عارف بيدى الدرس فين ؟؟

فى الفيللا بتاعته ....لالالالالالا....مش فى اوضة الضيوف لالالا ولا فى اوضة السفرة لالالالا ولا فى اوضة المكتب ...ده بيدى الدرس فى الجنينة ....عامل لهم كراسى ولا كراسى المسرح الصيفى وشغال عليهم بالميكروفون ...وعامل لهم شاشة ولا شاشة السينما ...

هى الحكومة فين ؟؟ بس نرجع ونقول كله بياكل ....كله بيأكل كله ....لافيه رابط ولا فيه نظام ...قول ياباسط ..

تلاقيها هاصت ...

ماهى هاصت من زمان ....من زمان قوى ...

وبلدنا على الترعة بتغسل شعرها .....

والميه فيها بلهارسيا ونترات ومبيدات وفضلات وبلاوى وبقايا حيوانات نافقة ...

جانا نهار مقدرش يدفع مهرها .....

حايدفعه منين ياحسرة ؟؟ .......ممعهوش ورفضوه......خليها فى ليلها ...

خليها فى ليلها ....

بكرة يتقل جيبه وييجى ...

امتى حاتيجى يابكرة ...

امتى حاتيجى يابكرة ...

امتى حاتيجى ....يابكرة ...

Salwa

مساء الخير : مدام سلوى

قرأت موضوعك بتمعن ... عندي إحباط شديد ... مش قادر أكمل ... أحاسيس متضاربة ... الدنيا سوده

حسبنا الله ونعم الوكيل .. ولا حول ولا قوة إلا بالله ... ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا مصر أمتى ينصلح حالك .... وألاقي الدنيا ضحكالك

الغش والفساد طال كل المجالات .. اللى بيسرق ليحصل على لقيمات بسيطة يسد بها جوعه

واللى بيسرق ليحول ملايين ومليارات ليزداد غنى من دم الشعب الغلبان ... اللى أستخسروا فيه كل حاجة

هل تذكروا القبر وظلمته .. وتذكروا العذاب وشدته.. ودعوة المظلوم التى تصعد الي السماء .. ويقول لها الرب

عزوجل .. وعزتي وجلالي لأنصرنك ولو بعد حين ..... اللهم أصلح نفوسنا .. وزكها أنت خير من زكاها أنت وليها ومولاها

اللهم أكتب الخير لمصر .. ولا تسلط علينا من لا يخافك فينا ولا يرحمنا ياكريم .. آمين .. آمين .. آمين

أبو أحمد الأسكندراني

[عبده بيه]

الفاضلة مدام سلوي الله يحفظك ويبارك فيكي ودايما منورة

موضوعك مؤلم لي ولعائلتي وسبب في شتاتان عقلي ان شاء الله لاني فعلا بتجنن لما بشوف الصور هذه علي الطبيعة

واليوم كنا في حديث عفوا يعني عربية الزبالة وعربية الزبالة في مصر بنشم ريحتها من اول الشارع كما قالت زوجتي فقلت لها لالالالا المشكلة في الرجل او الطفل اللي بيشيل الزبالة بدون حافظة يد او قمامة بمعني ماسك

المهم اني القمامة كلها بتروح مكان واسع وفيه اطفال تحت العشرة وكلهم بقومون بفرز كل الزبالة بايديهم الصغيرة ببرائتهم وبعيون بتألمني عندما اراها

امتي هيصلح حال بلدي للموضوع بقية لاني تعبت فقط من السيرة تحياتي سيدتي الفاضلة

[Salwa]

الافاضل / نجفة المغرورة ....kokomen ....عبده بيه ..

مساء الخير ياجماعة الخير ...

لاداعى للاحباط ولا للحزن ...هذا قليل من كثير ...

والحقيقة ان الآلام تمكنت من الاغلبية العظمى لهذا الشعب حتى اصبحت لاتشعر بأى الم جديد لاى سياط جديدة ... كل يوم مهزلة جديدة ..

وكما تعلمون وكما هو معروف....ان المظلوم لو ضربوه بالسوط الضربة الاولى فانه يتألم ...والثانية يصرخ والثالثة يستغيث ....ثم يتحشرج صوته فيصرخ ولا يسمعه احد....ثم يصمت ويعتقد الجناة انه استمرأ العذاب لشدة صمته ولكنه صمت من لا حيلة له ....وبالتأكيد عندما يتركوه ويفيق يصبح ...( حاجة من اتنين ) ....اما انه يرتب افكاره وينتقم من معذبيه ... ....او يلملم نفسه ويظل فى حالة صمت خائفا من تكرار المأساة مرة اخرى ....

وهكذا يفرز الظلم ......اما منتقم ....او جبان......(( والله اعلم )) ..ومن الممكن ايضا ان نطلق مسمى البطل على من ينتقم وهى ايضا ...(( وجهات نظر )) ...

تعالوا ....معا ....

نقضى وقتا جميلا ....نقرأ ...خطبة جميلة كلها آمال وشفافية ....خطبة قيلت عام 1983....وبالتحديد فى 19 يوليو

واليكم الرابط ....

http://www2.sis.gov.eg/Ar/Politics/PInstit...00000000246.htm

ارجو لكم قضاء وقتا طيبا ....

وبالطبع لنا حديث آخر ....بالتأكيد للحديث بقية ان كان فى العمر بقية ......

[قديم]

مساء الخــير مدام سلــوى

كانني بك تقرأين هموم المواطن العربــي وان اختلفت لهجاتـه ومتطلباته .

فالهم العربــي من المحيط للخليج هو نفس الهم في اي دوله عربيــه . المستشفي .. التعليم الوظيفه . المحسوبيــه ....حتي حجوزات

الوقوف بالطابور طغت عليــه المحسوبيات ..فهناك طوابير في الظل وطوابير في الشمس

لا اعلم متــي يصلح حال الشعب العربـــي وهل العيب فينا كشعوب هل يريدوننا ان نرحل ويستبدلوننا بشعب اخـــر من قاره اخــري

هل هذه ضريــبه حب الوطن والوفاء لــه .. ام ضريــبه طيبه القلوب .

[Salwa]

ياه..

الموضوع ده من 15 يونيو 2007.

كنا فاكرين انها بس (( حاطا اسكندرية ف دماغها ...عايزة ارض المستشفى وارض الجامعات ..وترمى كله برة البلد ...ده غير المكتبة بتاعتها ..!!!.وسبحان الله بدأت الشرارة من اسكندرية برضه...كان عندها حق تكرههم ..قلبها كان حاسس انهم شايلين كتيررر ف قلوبهم.....ههههه..غدارين بتوع اسكندرية دول وقلبهم اسود وكانوا بيضايقوهم باللبس الأسود كل جمعة وباتحادهم مسيحيين ومسلمين ))..ياما ظلمونا ...وآخرتها فجروا كنيسةالقديسين علشان يفرقونا برضه..

وسبحان الله ...فعلا اتكلمنا كتير قوى وكنا واثقين ان حاييجى يوم والكل حايعترض لكننا لم نتخيل ان يكون الأعتراض من الشباب ..(( الشعبان )) .

توقعنا ثورة الجوعى ..

كلنا توقعناها ...لكن؟؟

اعتراض الشباب المثقف؟؟؟ وانضمام جميع فئات الشعب ؟؟فئة فئة؟؟

لازلنا فى بداية طريق الاصلاح ..تقابلنا عقبات كثيرة جدا جدا جداااااا

لازلنا نجد من يطفئ مصابيح الانارة فى طريقنا لكننا بعون الله وبقدرته سوف نصل الى ساحة الحياة المليئة بالأمل ونبدأ العمل بلا كلل.

ليوفقنا الله ويهدينا للخير.

[ام محمد]

ياه..

الموضوع ده من 15 يونيو 2007.

كنا فاكرين انها بس (( حاطا اسكندرية ف دماغها ...عايزة ارض المستشفى وارض الجامعات ..وترمى كله برة البلد ...ده غير المكتبة بتاعتها ..!!!.وسبحان الله بدأت الشرارة من اسكندرية برضه...كان عندها حق تكرههم ..قلبها كان حاسس انهم شايلين كتيررر ف قلوبهم.....ههههه..غدارين بتوع اسكندرية دول وقلبهم اسود وكانوا بيضايقوهم باللبس الأسود كل جمعة وباتحادهم مسيحيين ومسلمين ))..ياما ظلمونا ...وآخرتها فجروا كنيسةالقديسين علشان يفرقونا برضه..

وسبحان الله ...فعلا اتكلمنا كتير قوى وكنا واثقين ان حاييجى يوم والكل حايعترض لكننا لم نتخيل ان يكون الأعتراض من الشباب ..(( الشعبان )) .

توقعنا ثورة الجوعى ..

كلنا توقعناها ...لكن؟؟

اعتراض الشباب المثقف؟؟؟ وانضمام جميع فئات الشعب ؟؟فئة فئة؟؟

لازلنا فى بداية طريق الاصلاح ..تقابلنا عقبات كثيرة جدا جدا جداااااا

لازلنا نجد من يطفئ مصابيح الانارة فى طريقنا لكننا بعون الله وبقدرته سوف نصل الى ساحة الحياة المليئة بالأمل ونبدأ العمل بلا كلل.

ليوفقنا الله ويهدينا للخير.

عزيزتي سلوى ..قرأت هذا التوبيك اليوم ...تألمت على الاوضاع السابقة ...ولكن سبحان الله مافي شئ يدوم ...التغيير سنة الله في الكون ..والحمدلله الف مرة ..وعسى الثورة تستطيع رد المظالم ..وطبعا ده عايز وقت وجهد ..مصر هي ثقل العالم العربي ولما تراجعت ..كل العرب تأخروا بس يارب يكون القادم افضل واحسن ...نهارك فل وعزة