أنسب سيارة لمصر

[مصري بالوراثة]

السلام عليكم ورحمة الله

بعد غربة سنين كل منا يود أن يكون لديه سيارة في مصر ، فماهي السيارة المناسبة في رأيك من حيث :

- المواصفات العالية

- توافر وسعر قطع غيارها في مصر

- سعر شراء السيارة

- جمركها

وأي عوامل أخرى تراها مهمة

راجياً التوفيق للجميع

[مصري بالوراثة]

السلام عليكم

بما أنه لم يرد احد ، فقد قررت أن أرد أنا !

وأرجو أن يكون رداً مفيداً

فمارأيكم دام فضلكم في السيارة الماليزية "بروتون" وخصوصاً "واجا" ، وهذه يوجد منها في مصر ثلاث فئات يتراوح السعر مابين 86 ألف حتى 103 ألف على حسب المواصفات . ووكيلها في مصر "عز العرب"

ومرفق بعض الصور لهذه السيارة ، فمارأيكم مبدأياً

[bentmasria]

اخى الفاضل

من تجربتى وتجارب اصدقائى اقترح سيارة مريحة واقتصادية فى آن واحد بمعنى

صديقتى اشترت الماتريكس وهى عائلية الشكل ومتسعة لكنها تشكو دائما من ضعف السحب اثناء تشغيل التكييف واشاركها الرأى كما ان شكلها ليس انسيابيا جدا ولا اخفيك سرا تصليحها بالتوكيلات مكلف ككل السيارات الجديدة ومن خلال عدة تجارب مع اصدقائى انصحك بالسيارة الهوندا الجديدة والتى لا يزيد سعرها عن اى سيارة كورى او سواها كتسعة ناعمة القيادة تكييفها متميز وخدمتها رائعة فمراكز صيانتها منتشرة وسعرها ايضا ليس مرعبا ولا اتحدث طبعا عن طراز الاكورد بل بالتحديد غن الموديلات الجديدة والتى تتراوح اسعارها بين الثمانين والتسعين الفا ومثلها التويوتا والميتسوبيشى وغيرها من الخيارات اليابانية كالنيسان ارجو لك التوفيق فى اختيارك ومبروك مقدما اخى الكريم

[احمد صبرى]

انا معايا ماتركس .. سحبها كويس ..

على ما اعتقد انتا بتتكلم عن عربيه اوتوماتك ..

لانى معايا مانويل .. اه السحب مع التكيب بيختلف بس مش للدرجة

اخى الفاضل

من تجربتى وتجارب اصدقائى اقترح سيارة مريحة واقتصادية فى آن واحد بمعنى

صديقتى اشترت الماتريكس وهى عائلية الشكل ومتسعة لكنها تشكو دائما من ضعف السحب اثناء تشغيل التكييف

عاوز تسأل عن العربيات .. اليك هذا المنتدى

http://www.nilemotors.com/Forum/

منتدى تحفه وفيه ناس فى قمة الاحترام .. ارجوا يكون ده مش ضد قوانين المنتدى

تم تعديل 24 يوليو 2007 بواسطة احمد صبرى

[afreet]

اخوانى الاعزاء

بصفتى من قدامى السائقين بمصرنا المحروسه ومن واقع خبرتى مع السيارات والميكانيكية والطرق اقترح الاقتراح التالى

المطلوب فى المركبه التى سيتم قيادتها فى القاهره ان تكون

قوية الصاج الخارجى فلا تتاثر باللطش والخدش والبطش

ذات شاسية قوى يتحمل الطرق المصرية

ذات مظهر مخيف يجبر سيارات الجيش والشرطه والسيرفيس للابتعاد عنها

عاليه عن الطريق حتى تصطدم اجزاؤها بما على وهبط من الاسفلت والبلاعات والحجارة المتناثره

ذات اكصدام امامى يرعب كل من يحاول الدخول امامك لمجرد انه راكب جيب

ذات اكصدام خلفى يسمح بتحمل صدمات سيارات النقل الخفيف الذى يحاول ان يزيحك من الطريق ليعبر

قليلة الاعطال متوفر قطع غيارها مع رخص ثمنها سهلة التصليح

سهلة المناورة على الطرق المصرية

وقبل كل ذلك معقولة الثمن

ولم اجد افضل من Caterpillar 950G

[otaka]

مصر مش محتاجه عربيه مصر محتاجه كراكه

بس الموجود حاليه ابعد عن اللانسر الجديده و العربيتين اللى ليهم قيمه و بياعيين لو العربيه مش عاجباك الصنى و الكرولا

انا شخصيا معنديش عربيه من اساسه و لو جبت هجيب 504

[سيد زيد]

اخى العزيز انا مصرى مقيم بالامارات يعنى باختصار التقدم والنظام اللى احنا دايما بنحلم بيه المهم قبل ما تشترى السياره ان شاء الله

حاجتين الاولى انك يكون معاك فوق ثمنها نفس ثمنها علشان تقدر تراضى امناء الشرطه فى الشارع وانت معدى

والحاجه التانيه ان لو ليك اخ صغير لالزم تدخلو معهد امناء الشرطه بسوهاج او القاهره علشان تعرف تخلص اوراق المرور والمخلفات المهم السياره المصريه هى التويوتا طبعا فى كل حاجه

[badroora]

نظرا للزحمة الشيديدة فى مصر

والوقوف ساعات وساعات فى الاشارات من كثرة الزحمة وعدم المقدرة لركن العربية فى اى مكان لو روحت سينيما ولا خرجت تعمل شوبنج

لاقيت انسب حاجة تستحمل المشي

تعدي بين العربيات والاشارات بدون مشاكل \

ممكن تتركن فى اى حته مش هتاخد مساحة \تصليحها مش مكلف

بس والله ما تهريج انا نفسي لاقتها فكرة عملية جدا جدا

انسب عربية لمصر

تم تعديل 20 أغسطس 2007 بواسطة نجفة المغرورة

[tahereyad]

نظرا للزحمة الشيديدة فى مصر

والوقوف ساعات وساعات فى الاشارات من كثرة الزحمة وعدم المقدرة لركن العربية فى اى مكان لو روحت سينيما ولا خرجت تعمل شوبنج

لاقيت انسب حاجة تستحمل المشي

تعدي بين العربيات والاشارات بدون مشاكل \

ممكن تتركن فى اى حته مش هتاخد مساحة \تصليحها مش مكلف

بس والله ما تهريج انا نفسي لاقتها فكرة عملية جدا جدا

أسمها توك توك يا أخت نجفه,, بأه دي برضه نصيحه,,,, معلش,, ربنا كبييير

الأخ مصر بالوراثه ,,,أتمني ان شاء الله ان ربنا يهديك للأفضل يا أخي و تجد السياره اللي تريحك من تعب المواصلات في مصر,,, عامة من رأييي ان مافيش حد هايقدر يديك بصوره محايده فكره عن جميع أنواع السيارات في مصر,, أنا هاحاول أديك بعض النصائح من واقع خبرتي بسوق السيارات في مصر لكن هاسيب أختيار السياره ليك انت لوحدك....

أولا: لو انت كنت ناوي تشتري سياره من الخارج و تنزلها مصر جديده,,,, بلاش أحسن,, قولّي ليه؟؟

قوليلي ليه؟؟ عشان الآتي:

1- مش هايكون فيها أي توفير مادي,, بل بالعكس مصاريف ادخالها البلد هاتزيد بمقدار المصاريف الغير رسميه,, وانت طبعا فاهمني,, و بالتالي مش هايكون فيها أي توفير.. وده علي فكره مش رأيي لوحدي, ده كان توبيك موجود هنا برضه و تفضل الأخ عفريت بالرأي ده..

2 - كمان السوق المصري له أحكام غير أحكام أسواق الخليج,, زي مثلا مدي انتشار السياره في مصر,, و مدي توافر بدائل قطع الغيار و الاصلاح و تكون سهله فالبيع اذا احتجت تبيعها و ماتضطرش للتنازل فالسعر.

3 - تحملها للمطبات و الطرق المكسره اللي تقطم وسط أي سياره في مصر,, علي عكس دول الخليج اللي تتطلب سياره موتورها قوي عشان السرعات العاليه و الحراره العاليه و التكييف اللي شغال علطول.

4 - و دي كمان حاجه مهمه و هي انك لما تشتري السياره من الوكاله في مصر هاتقدر تستفيد من الصيانه المجانيه و الضمان أسهل بكتير من لو نزّلت سياره خليجيه و حملوك فواتير عاليه فالوكالات.

[badroora]

أسمها توك توك يا أخت نجفه,, بأه دي برضه نصيحه,,,, معلش,, ربنا كبييير

طب واطى صوتك لحد يسمع مانا عرفة ان اسمة توك توك بس مش

رضيت احط صورته ليفكرونى باهزر

الف الف مبروك شايفة صوة كدا منورة تحت اسمك

بارك الله فى اللى دلك عالطريقة :huh:

تم تعديل 20 أغسطس 2007 بواسطة نجفة المغرورة

[Amenemhet]

قمت بزيارة الموقع الذى افاد به الاخ احمد صبرى وهو بالفعل مفيد جدا ..... وجدت هذه المداخله عن السياره ماتريكس والتى نصحنى احد اصدقائى بشرائها ... المداخله من عضو يمتلك السياره ويوصى بها اكثر من اللانسر .....

الاخ العزيز بايو أشكرك جدا علي الرد ومعلش أرجو منك الاستفاضة أكثر في الفرق بين السياراتين غير السبب الذي ذكرته منحبث المواصفات وقطع الغيار وخدمة الصيانة والتسارع الخ وأنا آسف لتعبك معايا

شوف حضرتك قبل أي شيء أنا جايبلك معيا كليب صغير صورته أنهارده الصبح عشان أثبت لحضرتك وللمهندس "حازم حزه" وكل الأصدقاء إن الماتريكس ثابته جدا جدا على الطريق وأن من يقول أن هذه السياره غير ثابته فهو للأسف لا يعرف هذه السياره

[video width=400 height=350]http://www.BLOCKED35/video/matrix-stable-avi.html

[video width=400 height=350]matrix stable.avi - 11.81MB

وأنا هنا أردت أن أثبت لصديقي حازم حزه أن السياره ثابته جدا حتى عند سرعة الـ180كم

فقد كان بيني وبينه في آخر لقاء بيننا حوار حول ثبات المماتريكس وقال لي "أنك عندما تسير بالسياره بسرعة 180كم فليس هذا معناه أنها ثابته فمن الممكن أن تكون على هذه السرعه وغير ثابته"

لذلك تعمدت أن أترك يدي الأثنين (يد تحمل الكاميرا ويد خاليه) وأن يكون الخط المتقطع المرسوم على الطريق في منتصف السياره تقريبا لكي يلاحظ الجميع أن السياره لم تنحرف بالرغم من السرعه العاليه وعدم مسك الدريكسيون

----------------------------------------------------

ما فات كان بالنسبة للثبات

أما ما أريد أن أقوله لك عن مزايا الماتريكس أنها سياره عائليه من الدرجه الأولى وأتساعها من الداخل لا ينافسها أحد فيه أبدا (وبكل ثقه)

ثانيا:- أن قطع غيرها أرخص بكثير من الياباني ومـُعمره في نفس الوقت لان الكوريين يخطو إلى الأمام دائما

ثالثا:- أن السياره لها أستخدامت متعدده فهي من الممكن أن تتحول إلى سياره نصف نقل (بدون مبالغه)

رابعا:- وهو الأهم أن شكلها ليس له منافس (وهذا ليس معناه أنها الأجمل) لا أنا أقصد أنها ليست سياره صالون كل يوم الصبح تلاقي شكل أحسن من عربيتك إللي لسه مشتريها أمبارح شكله المختلف ده وتصنيفها على أنها سياره mpv وليست سياره صالون ولا هاتش باك ولا فان ولا 4*4 يجعلك تطم~ن لسنوات طويله أنك تمتلك سياره حديثه وليس هناك ماهو أحدث منها (وهذا سوف يكون مجرد أحساس) لانها كما قولنا خارج المنافسه بين سيارات الصالون لأنها ليست صالون

والماتريكس سياره بها تفاصيل كثيره جدا سوف تحبها إن كنت من النوع العائلي الذي يصحب الأسره كثيرا للرحلات

فمثلا الجالسون في السياره بالخلف يجدون أمامهم صينيتين في ظهر الكرسيين الأماميين قابلين للطي (زي الطياره أو القطار) الكنبه الخلفيه تجدها مثل الكرسي الأمامي بالظبط من حيث أنك تستطيع أن تسحبها إلى الأمام وإلى الخلف وأيضا تستطيع أن تثني الظهر وتفرده وكل هذا على جزئين منفصلين (كما الكرسيين الأماميين) هناك درج أسفل الكرسي الأمامي اليمين ويوجد أيضا أماكن للتخزين أسفل الكنبه الخلفيه ويوجد مخرج كهرباء بالشنطه (للتلاجه مثلا) ويوجد أماكن للأكواب والزجاجات كثيره جدا

ويوجد تفاصيل كثيره جدا جدا تجعلك تشعر أنك أمام سياره عائليه مخصصه للرحلات والسفر

أما الموتور والعفشه وخلافه فلا جدال على كفائتهم

وأدعو الله أن يوفقك فيما هو خير لك ولأسرتك الكريمه

تعديل بواسطتى سعيد

وصله للموضوع ...

http://www.nilemotors.com/Forum/viewtopic....%CA%D1%ED%DF%D3

برضه الموضوع يعتمد بالكامل على طبيعة استخدامك <سفر كتير - استخدام عائلى .....>.

بالتوفيق انشاء الله.

[tahereyad]

عاجل جداااااااا....

وأنا هنا أردت أن أثبت لصديقي حازم حزه أن السياره ثابته جدا حتى عند سرعة الـ180كم

فقد كان بيني وبينه في آخر لقاء بيننا حوار حول ثبات المماتريكس وقال لي "أنك عندما تسير بالسياره بسرعة 180كم فليس هذا معناه أنها ثابته فمن الممكن أن تكون على هذه السرعه وغير ثابته"

لذلك تعمدت أن أترك يدي الأثنين (يد تحمل الكاميرا ويد خاليه) وأن يكون الخط المتقطع المرسوم على الطريق في منتصف السياره تقريبا لكي يلاحظ الجميع أن السياره لم تنحرف بالرغم من السرعه العاليه وعدم مسك الدريكسيون

خطر جدا جدا ان الأخ يسير بسرعة 180 كمظ ساعه و يسيب الدريكسيون,, و كمان يكون مشغول بالتصوير و الكاميرا,, ربنا يبارك له في سيارته و في عمره,,, رجاء ماحدش يحاول المحاوله دي تاني,,, السيارات الجديده بتخدع جدا بنعومتها و بثباتها, لكن في جزء من الثانيه أبشع الحوادث ممكن تحدث

[tahereyad]

أسمها توك توك يا أخت نجفه,, بأه دي برضه نصيحه,,,, معلش,, ربنا كبييير

طب واطى صوتك لحد يسمع مانا عرفة ان اسمة توك توك بس مش

رضيت احط صورته ليفكرونى باهزر

الف الف مبروك شايفة صوة كدا منورة تحت اسمك

بارك الله فى اللى دلك عالطريقة :fight:

أوطّي صوتي ليه,, اذا كان التوك توك وصل للفضائيات,,, حضرتك ماشوفتيش اعلانات فيلم هنيدي الجديد و التوك توك منوّر فالأفيشات,, و الجديد بأه اعلانات غبّور اللي ماليه الدنيا و مصوّر 2 توك توك في مسيره وسط السيارات الأخري من انتاج غبّور...

و بالنسبه للصوره,, بارك الله فيمن ساعدني و دلّني علي الطريقه,, الصوره نفسها تعبر عن مدي اعترافي بالجميل.....

[ابو ماجد]

بعد السلام والتحية

حد عنده معلومات عن سيارة جيلي سباركي وكام سعرها وهل فيها اوتوماتيك

لفيت المواقع وعرفت ان سعرها (51000) الف جنيه فهل هذا السعر النهائي او لسى فاضل الضرايب والرخص وغيره يعني فضلا كم يكون سعرها النهائي.

ياليت يكون فيه موضوع خاص بالسيارت في مصر من حيث الصنع والسعر وقطع الغيار والكماليات والجودة ويبين في الاعضاء متاعبهم مع كل سيارة

اللي بشوفه في المواقع فقط اسعار السيارات وفيه مواقع بتنقل تعريف عن السيارة منقولة من احدى المجلات التي غالبا ماتكون قابضه ثمن المقال.

فهل يكون للموقع الريادة في هذا الموضوع.

[memokokoo]

اخوانى الاعزاء بالمنتدى

الموضوع مثير جدا وانا سألت عن الموضوع كتير ووجد ان افضل سياره بالنسبه للسعر هذا بلإضافه لوجود جميع الكماليات بها العربيه دى نيسان صنى اعلى سعر ليها هو حوالى 106 الف جنيه وده للسوبر صالون اتوماتيك و جميع الكماليات طبعا فى عربيات كتير احسن منها بس دى سعرها منافس جدا

وهى بتتجمع فى مصر ولكن الماكينه بتاعتها بتيجى مقفوله من اليابان وارتفاعها عن كويس عن الارض وتصليحها سهل اسهل كتيير من الهوندا حتى لو فتيس اتوماتيك وسير الكاتينه بتاعها حديد و موتورها كويس

مع تحياتى

[hyoussif]

لى رأى متواضع بخصوص افضل سيارة لمصر ألا وهى ديهاتسو تريوس سيارة قوية واقتصادية ومرتفعة ويابانية ووكيلها عبد اللطيف جميل والاندونيسى منها 7مقاعد واسعارها مناسبة

[corbina]

النيسان صنى منصحش بيها فمصر

بجد عن تجربة

الشكمان فى جزء صديق للبيئة

عامل شغل جامد مع المطبات

و العربية بعد سنة واحدة

نزلت و بقت كأنها سجادة مش عربية

الدياهاتسو YRV

بجد بجد جميلة جدا فى القاهرة

مناسبة جدا جدا

و قوية التحمل و تكييفها جامد و سحبها مع التكييف مش بيقل

هى يمكن شنطتها صغيرة شوية على عيلة

بس كانت بتمشى

و حاليا بعنا النيسان و معانا بيجو 307 ستيشن واجن

[osaimi]

طيب إيه رأيكم فى التويوتا أفانزا ؟ هى سيارة ماليزى تحت إشراف شركة تويوتا اليابانية ، ياريت لو أي حد جربها يقولنا أخبارها إيه كسيارة عائلية وهى الأفضل ولا الماتريكس أو الدايهاتسو تريوس

ومشكووووورين

[SEMSEMS]

Nissan Sunny ,,

عن تجربة سيارة ممتازة تصلح لبالوعات ومطبات مصر وشوارعها المكسرة

[MZohairy]

بعد اللي شفته في مصر الاسبوعين اللي فاتوا

انسب سياره لمصر هي التاكسي