إحنا بنطلع قدام ولا بنرجع ورا؟

[Sherief AbdelWahab]

فيه حاجات كنا بننتقد فيها صفوت الشريف ، عمل أنس الفقي ما هو أسوأ منها..

استبشرنا في فترة الانتخابات الرئاسية ببعض التغيير ، رجع الحال زي ما كان وأسوأ..

رجعنا للإعلانات الطويلة الموجهة ، والدراما الموجهة ، وكل ما هو موجه بشكل أكثر فجاجة وبدائية مهما لعبت التكنولوبيا لعبتها..

هل إحنا بنطلع قدام ولا بنرجع ورا؟ عايز إجابات عقلانية وليست عاطفية الله يخليكم ، جايز أكون ظالم ومفتري أو بيستهيألي أو مش غاسل النظارة كويس؟

خلص الكلام

[عبده بيه]

الاخ الفاضل شريف اسعد الله مساؤك

اخي الفاضل انت فعلا نظارتك نظيفة وزي الفل وانا فعلا مش بيستهيألي زيك لكن هوده الاعلام الموجه لفرض فكر وصورةمعينه والشعب كله بيستأيله وممكن مش واخد باله فقط انس الفقي والاعلاميين المقربين هم من ييرسمون الفكر للقرن الواحد والعشرون والسيد مبارك هو سيد الناس وكايدهم وعمهم وحابس دمهم واللي مش عاجبه زيي انا مثلا يشربلما يشبع من اي ترعة

تحياتي اخي المناضل من اجل اعلام محترم

[Ghost]

هل إحنا بنطلع قدام ولا بنرجع ورا؟

احنا في مكانا من زمن بعيد , اوعى تفكر اننا في يوم من الايام طلعنا لقدام علشان تقول ان في انتكاسة حصلت في الاعلام , لا , الموضوع ما هو الا اعادته ترتيب و انتشار , كدة زي اسرائيل لما بتعيد انتشارها و هي ما زالت تحتل تغتصب الناس و الارض

انت نظرك سليم , و مش محتاج نظارة

[أبو حميد]

الإعلام المصري أداة من أدوات الحكم مثله مثل الأمن المركزي وامن الدولة. فلا تتوقع تقدم في مجال الإعلام إلا عندما يحدث تغيير شامل لمصر.

[Tafshan]

عندى رأي غريب شويه ..

مثلاً ..

دائماً باسمع ان زمان كان ممكن الست تلبس مينى جوب و ما حدش يبص لها و لا يضايقها .. و كنا بنقول ان ده سلوك ايجابي من الرجال في هذا الوقت ..

انا عن نفس لا اعتبر انه من الايجابيه في شئ انى اسمح لزوجتى او ابنتى ان تفعل نفس الشئ .. ..

بالمثل ..

زمان كان الباشا باشا و الغلبان غلبان و لا تعلو العين عن الحاجب ..

الان تساوت الرؤوس في عقولنا على الاقل فلم تعد هناك عصمه لاحد ..

يمكن صحيح لسه شويه عقبال ما تتساوى بجد .. لكن انا شايف ان ده تقدم ..

اما الاعلام ..

مقارنه بين اعلام النكسه و اعلام اليوم تحسم المقارنه ..

يا شريف في تقدم بطئ جداً لكن راسخ جداً جداً .. اهم حاجه نبطل رياده و نشتغل من غير ما نسأل مين الاول .. المهم اننا ما نكنش الاخير ..

[Sherief AbdelWahab]

فيه شواهد بتأكد لي إننا راجعين ورا وبقوة ..

1-لسان الصحافة الحكومية طِوِل مؤخراً ، لدرجة تتنافى مع الرصانة المصطنعة اللي كانت عايشة فيها طوال عقود من الزمن ، مثلاً النهاردة دة عنوان في الجمهورية :" أهالي سيناء ضربوا مثالاً في الوطنية" فقط لأنهم "طردوا أعضاء مركز ابن خلدون وحركة كفاية"..

إذا كان التكفير السياسي والتخوين والاتهام بالعمالة ظل قاصراً على اتجاهات سياسية معارضة بعينها ، اللي شايفه إن صحف الوطني انحطت لدرجة غير متوقعة في الممارسة دي..

2-حترجع نغمة تصنيف الناس حسب انتماءاتهم ومعاملتهم داخل الميديا الحكومية على هذا الأساس بشكل فيه قلة أدب أكثر ، قارنوا بين موقف الصحف دي من أسماء زي "يحيى الجمل" و "عبد الوهاب المسيري" قبل "البتاع السياسي" المسمى زوراً بالحراك السياسي وبعده..دول ناقص يعتبروهم من كفار قريش!.. رغم إنهم مارسوا الحق اللي بيقول الجرنالجية الوطنجية إنه منحة من النظام!

3-حملة "مصر بتتقدم بينا" .. شفتوها فين قبل كدة؟

4-كانت الأغاني الوطنية إياها مبتظهرش إلا في المناسبتين التلاتة اللي نعرفهم ، والكلام دة كان حسنة في عهد صفوت الشريف ما حسيناش بيها.. دلوقتي بقت الأغاني الوطنية الجديدة (تماشياً مع الفقر الجديد) بتتذاع في كل وقت ، طبعاً مع مستوى كلام يقطر سذاجة وطفولية!

خلص الكلام