إديني الحرامي اللي جنبك لو سمحت!

[Sherief AbdelWahab]

هناك خاطرة جاءت في رأسي أطلب منكم التفكير فيها ، ربما قد تغير كثيراً من الطريقة التي نتعامل بها مع الفساد ونقرأه ونحلله..

أحياناً .. قد تفضل بعض الجهات التعامل مع الموظف الفاسد أو المرتشي أكثر من التعامل مع الموظف الشريف ، أو حتى العادي..

بل ووصل الأمر للناس أيضاً..

س من الناس العاديين يفضل التعامل مع فراش المدرسة "الحِرِك" "اللهلوبة" اللي بياخد المعلوم لما يجيب النتيجة من الكنترول (ومش خسارة فيه الحلاوة .. اللي الناس الرزلة بتقول عليها والعياذ بالله "رشوة")، مش مع ص زميله اللي يا عيب إلشوووم ملتزم بالتعليمات اللي اتقالتله ..

واللي بيتقال على الفراش بيتقال على موظف الحي ، ع الدكتور في المستشفى ، على عدد هائل من الفلانات والعلالين..

والكل بيصرخ من الفساد وسنينه في الآخر وبيقول إن مصر خربانة والدنيا خربانة (على رأي مطرب هابط) ..

الناس عايزة تقاوم الفساد ولا عايزاه هوة شخصياً؟ هل رغبة الناس في الفساد بس علشان هي مضطرة ليه ولا علشان بتستفيد منه؟

خلص الكلام

[mesryforever]

أخي العزيز

طبعاً هو كلامك صح مية في الميه

بس إذا صلح الراعي صلحت الرعية وبما أن الفساد يجئ من رأس الهرم أي من اللي ما يتسمى اللي بالي بالك هو وأبنه لازم يكون ده حال مصر

لو الموظف " اللهلوبه" دي بياخد مرتب يكفيه ويكفي بيته بيتهيئلي ممكن ما يبصش أنه ياخد ( رشوه إللي هي حسنه إللي هيه هديه إللي هي ليها كذا مسمى )

من الآخر أقصد أقولك إنه من حق الجهات الحكومية إنها تعاقب وبشده كل من أخذ رشوه أو مشى أية معامله بفلوس في حالة إنه بياخد مرتب معقول يكفيه هو وبيته وبعد كده ممكن نحاسبه وعلى طول يتم رفده ومحاكمته ويعاقب ذلك على إعتبار أنه من خيانة الأمانه حتى يكون عبرة لمن يعتبر

وقس على ذلك الموظفين الكبار اللي يدخل الوظيفه الكبيرة وهو "شحات" ويسبها وهو "مالتي ملياردير"

ده هيكون جاب الفلوس دي كلها منين أكيد بالعصى السحرية " الوظيفة "

فين التقارير السرية اللي عن كل موظف

طبعاً لازم بيتكتب فيها أن الموظفين الموجودين كويسين ومية مية ولا بخغدوش رشوه ولا حاجه دول مثال للنزاهه والشرف ده طبعاً على الموظف المرتشي أما إللي في حالة وبيعمل شغله كويسه دي يبقي إبن كلب ويستاهل الحرق لأنه بيعطل مصالح الناس ده طبعاً على حسب تفكيرهم هما

على رأي الممثل القدير "محمد صبحي" في مسرحية تخاريف "الموظف إللي هياخد رشوه وميقسمش معاي هيعرف شغله"

والمفروض أنه يكون هناك جهاز رقابة قوي زي "الرقابة الإدارية " إللي عملت شغل كويس من فترة وبعدين نامت

المفروض إنهم يبعتوا كل فترة وفترة ناس تابعين لأقوى جهة رقابية في مصر ويعملوا إنه عاوزين يعملوا حاجات معينه ويشوفوا ردود الموظف هيكون إزاي وتغير تكيكاتها كل فترة علشان على أن يكون هذا الموظف الرقابي عينه مليانه يعني بياخد مرتب كويس جداً علشان ميبصش هو التاني للفلوس ويبدأ ياخد رشوه ونكون زي اللي دايرين في دوارية مبتخلصش

وهؤلاء الموظفين لازم يكون على قدر كبير من المعرفة بكيفية إجراءات المعاملات في كل جهه حكومية أي يتم دراسة كيفية عمل الجهه الحكومية من كل شئ صغير وكبير وبعدين يبعتوا لها الموظفين دول

وتأخذ كل جهه حكومية فتره الرقابة عليها وأعتقد ذلك إنه ده هيكون الحل الأمثل لجميع مشكلات الجهات الحكومية إللي المفروض إنها بتدي خدمات مجانية في مصر

لكي الله يامصر

آسف على الإطاله

[Sherief AbdelWahab]

من الصعب علي أن أحمل نقص المرتبات فقط مسئولية الفساد..

تحضرني عبارة شهيرة في فيلم "المحفظة معايا" لشخصية "شكري" - سمير صبري في الفيلم - الفاسد الذي يشغل منصباً كبيراً في شركة قاف عين ، يسأل زملاءه الفاسدين الكبار : إذا كان "زكي" - عادل إمام - النشال بيسرق علشان مش لاقي ياكل ، احنا بنسرق ليه؟

الصغير بيسرق ، والكبير كمان بيسرق..

من اللي أنا شايفه إن كلمة فساد بقى ليها مفهوم إيجابي ، صدقوا أو لا تصدقوا ، فالشخص الفاسد ، أو الحرامي ، أو الفهلوي بيشار له إنه شخص "حِرِك" ولهلوبة بل وعبقري قادر على اللف على اللوائح ، أي لوائح حتى ولو ما كانتش معقدة أصلاً ولو ما كانش أصلاً فيه ضرورة للالتفاف عليها..

بقى الفاسد اليومين دول سوبرمان.. والكلام دة تحت وفوق على السواء..

برضه بأكرر السؤالين التلاتة اللي ختمت بيهم مداخلتي الأولانية..

خلص الكلام

[Mohammad Abouzied]

أخي العزيز

طبعاً هو كلامك صح مية في الميه

بس إذا صلح الراعي صلحت الرعية وبما أن الفساد يجئ من رأس الهرم أي من اللي ما يتسمى اللي بالي بالك هو وأبنه لازم يكون ده حال مصر

دي اصبحت الحجة الرسمية لتبرير الفساد حتى الموظف المرتشي بيأخد الرشوة ويبررها لنفسه ويقول اشمعنى مبارك مع ان مبارك لم يثبت عليه حتى الان انه استلم رشوة

لو الموظف " اللهلوبه" دي بياخد مرتب يكفيه ويكفي بيته بيتهيئلي ممكن ما يبصش أنه ياخد ( رشوه إللي هي حسنه إللي هيه هديه إللي هي ليها كذا مسمى )

من الآخر أقصد أقولك إنه من حق الجهات الحكومية إنها تعاقب وبشده كل من أخذ رشوه أو مشى أية معامله بفلوس في حالة إنه بياخد مرتب معقول يكفيه هو وبيته وبعد كده ممكن نحاسبه وعلى طول يتم رفده ومحاكمته ويعاقب ذلك على إعتبار أنه من خيانة الأمانه حتى يكون عبرة لمن يعتبر

المرتب المعقول دا مطاط يمكن الف او الفين او عشرة مع ان المتلبسين بالرشوة عادتا من اصحاب النفوذ واصحاب القرار ومراتباتهم كبيرة جدا ولكن لو كل موظف قال ان رزقه هو الى كتبه له ربنا ومش مفروض يبص للحرام وعليه يعمل الى يرضي ربنا بالطبع البركة هطرح على راتبه وهايكفيه وزيادة وفيه امثلة كثيرة شيفنها في الحياة بتوضح ذلك واذا بحثت انت بين جيرانك ها تعرف الى ربنا سترها معاه بالرغم من قلة راتبه والمديون وسيرته على كل لسان بالرغم من دخله الكبير

وقس على ذلك الموظفين الكبار اللي يدخل الوظيفه الكبيرة وهو "شحات" ويسبها وهو "مالتي ملياردير"

او في السجن ودا الى غالب

مع ان السجون اتملت

ده هيكون جاب الفلوس دي كلها منين أكيد بالعصى السحرية " الوظيفة "

بس فيه ناس وارثة عن ابوها او عنده حتة ارض دخلت كردون المدينة ولكن مش ضروري ان تكون وظيفته لان غالبا ما بينكش وينال جزاءه وحتى الى بيقدر يهرب بالفلوس الحرام اخرته عادتا بتكون سيئة للغاية

فين التقارير السرية اللي عن كل موظف

موجودة ولكن فيه قوانين واجراءات من جهة اخرى بتبطل تنفيذها وعندك مثلا وزارة الزراعة يحكمها 3000 قرار وزاري

طبعاً لازم بيتكتب فيها أن الموظفين الموجودين كويسين ومية مية ولا بخغدوش رشوه ولا حاجه دول مثال للنزاهه والشرف ده طبعاً على الموظف المرتشي

الرشوة جريمة وتحتاج اثبات وصعب اثباتها خاصة لو ان الراشي والمرتشي متفقين

أما إللي في حالة وبيعمل شغله كويسه دي يبقي إبن كلب ويستاهل الحرق لأنه بيعطل مصالح الناس ده طبعاً على حسب تفكيرهم هما

ايضا تعطيل مصالح الناس جريمة وعاوزة اثبات وصعب اثباتها لو المتضرر تسامح ولم يشتكي

على رأي الممثل القدير "محمد صبحي" في مسرحية تخاريف "الموظف إللي هياخد رشوه وميقسمش معاي هيعرف شغله"

والمفروض أنه يكون هناك جهاز رقابة قوي زي "الرقابة الإدارية " إللي عملت شغل كويس من فترة وبعدين نامت

المفروض إنهم يبعتوا كل فترة وفترة ناس تابعين لأقوى جهة رقابية في مصر ويعملوا إنه عاوزين يعملوا حاجات معينه ويشوفوا ردود الموظف هيكون إزاي وتغير تكيكاتها كل فترة علشان على أن يكون هذا الموظف الرقابي عينه مليانه يعني بياخد مرتب كويس جداً علشان ميبصش هو التاني للفلوس ويبدأ ياخد رشوه ونكون زي اللي دايرين في دوارية مبتخلصش

بتفكرني بجمال عبد الناصر لما قال مرة في خطبه انا ناقص علي احط على كل موظف عسكري وعسكري اخر علشان يراقب العسكري الاولاني ما يقسمشي مع الموظف

المشكلة اصلا مشكلة اخلاق وتربية ودي لا حسني مبارك ولا غيره له دخل فيها ولكن الاسرة نفسها هي الى بتربي اولادها على الفهلوة وموت الضمير ودا من ضعف الايمان وقلة الوازع الديني لدى افراد الشعب

وهؤلاء الموظفين لازم يكون على قدر كبير من المعرفة بكيفية إجراءات المعاملات في كل جهه حكومية أي يتم دراسة كيفية عمل الجهه الحكومية من كل شئ صغير وكبير وبعدين يبعتوا لها الموظفين دول

وتأخذ كل جهه حكومية فتره الرقابة عليها وأعتقد ذلك إنه ده هيكون الحل الأمثل لجميع مشكلات الجهات الحكومية إللي المفروض إنها بتدي خدمات مجانية في مصر

لكي الله يامصر

آسف على الإطاله

يا ترى انت شفت فيلم الوزير جاي الى سبق انتجه التلفزيون :rolleyes:

تم تعديل 14 يوليو 2007 بواسطة Mohammad Abouzied

[blackdays]

السلام عليكم ورحمة الله وبركاته

الاخ الكريم انت ضربت على الأوتار السحاحة

((((((((((((( الناس عايزة تقاوم الفساد ولا عايزاه هوة شخصياً؟ هل رغبة الناس في الفساد بس علشان هي مضطرة ليه ولا علشان بتستفيد منه؟)))))))))))))))))))))

هي ده الحقيقة .............

احنا بنتكلم على الأمور اللي بتحصل ونسميها فساد لما تضر بمصالحنا أو تعوق أو تعطل أو تهدر مصالحنا

إنما المحسوبية في التعيين في الوظائف أو في تمشية الأمور في أي دوائر حكومية وغير حكومية (ده مش فساد)

كذلك المعلوم في تمشية الأمور ... لا تسمى رشوة ... إنما مشي الحال ...

وهلم جرة .. جرة ... جرة ... جرة ... جرة

هذه هي تناقض النفسية البشرية ....

ولا استثنى نفسي منها (:

[Sherief AbdelWahab]

للرفع للأهمية..

خلص الكلام