حفلات الزفاف

[واحد تاني]

حفلات الزفاف

حضرت أمس حفل زفاف أحد الأقارب ليت نا نستكمل موضوعاتنا عن الزواج و أعباؤه و التى تكلمنا فيها عن الشبكة و فى موضوع آخر عن جهاز العروس المصرية و لم نتكلم بعد عن حفلة الزفاف و أشكالها و محتوياتها و الخيارات المتاحة و التكاليف.

حفلة الأمس كانت فى نادى كبير و كانت ثلاثة فى واحد - التعبير من عندى - لإنها كانت عبارة عن كتب كتاب و شبكة و زفاف فى حفل واحد.

ده كان رأس الموضوع اللي كتبه عادل بيه في موضوع (موضوعات تبحث عن كاتب, موضوعات تلح علينا للكتابة فيها و لا نجد الوقت أو الجهد)

ونظرا للأهمية فكرت افتح الموضوع ده باستخدام ما تقدم ...

ولبدء النقاش في الموضوع ...هطرح سؤال ... ازاي ممكن تعمل فرح شيك ... ستايل ... جديد ... مش قالب محفوظ ونسخة مقلدة من مليون فرح حضرناهم قبل منه ... تخرج منه الناس مبسوطة لانها حضرت شيئ غير معتاد ... بالاضافة وفي مقدمة كل ذلك يكون حلال ويرضى ربنا

ياللا بقى قولوا كل الكلام ... بس بسرعة ... بسرعة ... بسرعة ...

احسن مفيش وقت ... مفيش وقت ... مفيش وقت ...

:sad: (واحد فرحه قرب ... وبيفكر في مليون فكرة في نفس الوقت)

[محاور مصرى]

مبروك ياواحد تاني...الزواج القريب انشاء الله...

انا ليا واحد صاحبي عمل خطوبته السنة اللي فاتت في ال jungle ( طبعا لا اقصد المكان بذاته و لكن خذ من المثل... الفكرة )

الjungle دي لو انت مش من اسكندرية....:

هي ممكن تقول عليها كافيتريا بس جو تاني شوية ...المكان جميل جدا و فيه شلالات مائية و كام طائر حلوين كده في الميه و صخور ...و حركات يعني ... ( الكلام ده بقاله سنه و نص وكانت تعتبر جديدة ..مش عارف الوضع دلوقتي ايه)...

المهم...

كان حاجز الكافيتريا كلها في الوقت ده و كانت الخطوبة شيك جدا و هادية و جوها حلو بسبب طبيعة المكان ...

و مافيهاش بقه تامر يجي يغني و لا سعد الصغير و لا قشطه تيجي ترقص (دي رقاصة شهيرة في اسكندرية )...ولا اي دوشة و لا قرف.

بالاضافة وفي مقدمة كل ذلك يكون حلال ويرضى ربنا

" ماشاء الله لا قوة الا بالله "ربنا يباركلك والله .

هو الصراحة في الخطوبة كانو مشغلين موسيقى...لكن في هذه الحالة بصراحة مش عارف ايه تاني ممكن يكون , كبديل شرعي...

:sad:

...و الف مبروك للمرة التانية...

[واحد تاني]

شكرا عزيزي معمارجي وربنا يبارك في عمرك ...

بداية جميلة للدخول في الموضوع وطرح افكار واراء جديدة ... طيب نحاول ندخل في الموضوع اكتر ...

الموضوع : حفل زفاف وليس خطوبة

المكان : قاعة بأحد الفنادق

المطلوب : أفكار بديلة لفقرات السيرك القومي المعلبة المحفوظة من ترقيص العروسين ثم تنطيط اصدقاء العروسين ثم ترقيص العروسين بعد الفاصل وهكذا ... بحيث نكتشف في الآخر ان العروسين والمعازيم هما اللي قاموا بدور المطرب والراقصة والسياسي وما الى ذلك ...

ما البدائل المقترحة

كذلك شكل الطاولات (الترابيزات يعني) يكون ازاي ... استقبال المدعوين يكون ازاي ...

يعني انا فكرت مثلا يكون في بنوتتين صغيرين على باب القاعة تدي كل واحد وردة وهو داخل ...

وكل ترابيزة يكون عليها كارت لطيف قدام كل كرسي عليه اسم الشخص المخصص له هذا الكرسي

وهكذا ... ياللا بقى قولوا معايا :sad:

[بنت الشاطئ1]

الف الف مبروك للعروسين

اولا لابد ان تكون الأفراح ترضى الله عز وجل كما قلت حضرتك

المفروض انه ميكنش فى اختلاط يعنى النساء فى قاعة والرجال فى قاعة اخرى

لكن لو الحكايه ديه غير مضمونه يعنى بمعنى انك تلاقى بعض الاطراف غير مؤيدة وممكن موضوع الفصل بين الرجال والنساء مش اكيد..فى هذه الحالة لابد ان تكون العروسة محجبة..ده اضمن شئ

ممكن كأفكار تجيب دى جى لأغانى اسلامية وممكن تعمل مسابقة ..اسئله بسيطه للأطفال وتوزع كتيبات صغيرة كجوائز يعنى

حاجة كمان مكان الفرح نفسه ممكن يكون جديد..مثلا مكان يكون فيه حمام سباحة فى احدى الجوانب وطبعا مزين ببعض الزينه والبالونات

طفلة مثلا تغنى انشودة جميلة

العروسة نفسها ممكن تغنى ..ده فى حالة عدم الاختلاط..تغنى حاجة بسيطه مقطعين ثلاثة بس

ممكن حاجة كمان ممكن تصوروا شقة العروسين بالفيديو ويكون تليفزيون شغال يعرض الشقة ..بس ميكنش شغال من اول الفرح لأخره..حتى لا ينشغل الناس بالشريط وينسوا الفرح..

وربنا يتمم على خير

[بنت الشاطئ1]

فى اغانى اطفال بالدف جميله مخصصة للأفراح

ممكن على فكرة تنتقى الاغانى اللى عجباكوا وتسجلوها على شريط واحد لأن الشريط ممكن ميكنش كله جميل

[Folana]

السلام عليكم ورحمة الله.....

واحد بيه تانى افنظم حيتجوز؟؟....الف مبروك... :happy: ..فين الفرقة...يافرررقة...يافرررررقة....ابو محمد جادليو..ابن الفرقة حيتجوز ياجدعان...لازم كله يبقى تمام...

اكيد طبعا حتشغل اغانى منير طول الفرح ..والعروسة مش حتعترض..دلوقت على الاقل...ربنا يتتم لك بخير يارب ويبارك لك فى زوجتك ويرزقك الذرية الصالحة ان شاء الله....

نرجع لموضوعنا....

حفلات الزفاف تختلف طبعا تبعا لظروف كتير....لكن انا حاشارك مشاركة سريعة دلوقت ...يعنى موجز كده وبعدين نقول تفاصيل النشرة...

اولا لازم تتفق مع عروستك على الخطوط الرئيسية لتنسيق حفل الزفاف..

ثانيا..القاعة اللى حضرتك حجزت فيها...لازم تراجع معاهم كل التفاصيل ..من اضاءة الى مؤثرات صوتية ودخان وحركات كده...والكوشة حتكون ازاى..ولو لك افكار تطلب منهم انهم ينفذوها لك...

مفارش الترابيزات تطلب تغيير لونها لو حبيت يكون لها لون تانى غير الابيض... وده طبعا لازم يكون متناسق مع الوان الكوشة والورود

بالنسبة للكوشة يفضل انها تزين بالورود لاضفاء فخامة عليها ..ولكن تذكر انها بتكون خلفية لكم فقط ..يعنى انتم الاهم ..مش عايزة اقول العروسة علشان انت ابننا ولازم نفرح بك انت bv:-...المهم نوع الزهور يكون معبر زى الزنبق والجاردينيا والاوركيدا

الزفة ..انا شخصيا لا افضل الطبل والزفة اللى فيها ضجيج ..وقولوا لابوها ان كان جعان يتعشى والحاجات دى...ممكن الزفة تكون بالكمنجات ..يعنى ست او ثمان عازفين كمنجات يتقدموا الزفة...بتكون شيك جدا..ورومانسية

الترابيزات.....مهم جدا توزيع الضيوف بطريقة تتناسب مع اختلاف طبيعتهم ...وانسجامهم مع بعض....

بتزين الترابيزات بشموع وفضيات ..وورود طبعا..وفيه محلات بتأجر اكسسوار الترابيزات وبيتم اعادته مرة اخرى....وكل ترابيزة بيكون عليها طبق فضة او اى نوع عليه مكسرات..فستق وكاجو...ده بيدى شياكة وانطباع جيد لدى المعازيم.....

البوفيه طبعا بيكون بالاتفاق مع الفندق...وتتفق برضه على شاى وقهوة ده ضرورى جدا لان فيه ناس بتحب تشرب شاى او قهوة بعد العشا..يمكن ده شىء جانبى ومش مهم لكن بيدل على انك بتسعى لراحة ضيوفك ..

انت طبعا بتكون محدد ميزانية للموضوع ده ....وهم طبيعى بيعرضوا عليك بدائل بتختار منها الانسب...

دلوقت فيه شركات بتقوم بتجهيز ليلة الزفاف ...وتصميم الديكورات الخاصة بها...وتتولى الاشراف على الحفل من اوله لاخره ...

كمان ممكن يأجروا المكان ...حتى لو جنينة فيلا بها حمام سباحة.....لكن بيأجروا الجنينة بس من اصحاب المكان ويرتبوا فيه الحفل....

او قاعة فى فندق..او لو انت حاجز بالفعل قاعة ممكن هم يكملوا الترتيبات دى....

وعندهم بدائل كتير تناسب امكانياتك....انا حاحاول ادور لك على ارقام تليفوناتهم عندى وارسلها لك ...اهو تاخد فكرة برضه...

بالنسبة لفستان الزفاف...فيه اماكن ممكن العروسة تختار القماش وموديل الفستان ويتفصل لها مخصوص وتدفع نصف الثمن فقط......ولكن هناك مشكلة نونو خالص..انها بترجع الفستان تانى... :sad:

يعنى بدل ما تأجر واحد وبدل ماتشترى واحد..بتبقى حاجة بين البينين كده...كأنه تأجير لكن بيتفصل لها مخصوص على ذوقها ومقاسها...

اختى الغالية بنت الشاطىء...فعلا فيه ناس بتفضل انها تفصل بين النساء والرجال...بس دى بتكون مكلفة حبتين يعنى بيحجزوا قاعة للسيدات واخرى للرجال...وبوفيه منفصل ايضا...وبتكون الاغانى دينية وبيوزعوا ادعية مطبوعة للعروسين مع سبح وهدية كريستال او فضة...انا حضرت افراح كده...بس فعلا بتكون مكلفة جدا...

بالنسبة لفيلم الفيديو...زى ما تكرمت بنت الشاطىء بيتم فيه عرض صور العروسين فى مراحل عمرهم المختلفة وصور الخطوبة وصور شقة الزوجية ...بتكون جميلة...برضه ممكن تتفق على الحاجات دى كلها مع مصور الحفل..

اهم حاجة ان عروستك لازم تشاركك الرأى طبعا..وتكون موافقة وتقول امنيتها الخاصة لانها ليلتها اولا ..ولازم هى اللى تكون سعيدة مش المعازيم...

ولى عودة اخرة لان ادرك شهرزاد الصباح فسكتت عن الكلام المباح

كووكووكووو

الف مبروك ...ربنا يسعدك ويبارك لك ويوفقك يارب ........

[إبن مصر]

الف الف مبروك للابن الغالى واحد تانى ..

ونخش علطول فى الموضوع ..

ببساطه اعمل سيناريو بسيط لليوم ده من اوله وحدد قبل كل حاجه الميزانيه الى هاتتحرك فيها .

بالنسبه للعروسين فيه حاجه جديده ظهرت من كام سنه وهى عمل سيناريو حقيقى يتم تصويره للعروسين ازاى اتعرفوا واتكلموا واتمشوا فين وصورهم مع بعض والخطوبه وصورهم برضه بيبقى فيلم محترف يتم عرضه قبل دخولكم القاعه وينتهى بوقوفكم ورا باب القاعه ....

طبعا مدام فولانه ما سابتلناش حاجه الله اكبر عليها بس على مين ... برضه هانبدع..

انا فى رأى ان القاعه لازم تكون عدد عمدانها قليل علشان تبقى كاشفه لكل المدعويين الكوشه والعروسين .. وبعيدا عن الاشكال التقليديه والكراسى والكنب والذى منه ممكن ببساطه الكوشه تبقى عباره عن اتنين اوبيسون او اجرادالديه بسيط جدا وخلفهم بوكيه ورد واحد لون واحد وهو الابيض هايعمل كونستراكت مع البدله ويزود كمان نور فستان الفرح فتبقوا عاملين زى وردتين وسط بوكيه كبير ..

الزفه كل ما كانت بسيطه تدى فرصه اكبر للاستمتاع .. بعض الحالات بيحكمنا العادات والتقاليد ولو كان الاختيار مفتوح ففعلا زفه الكمانجات من ارق الزفات الرومانسيه خصوصا لو كان الفرح فى مكان مفتوح...

طبعا المغنى زى الدى جى كلها زيطه يبقى الدى جى المحترف احسن وخصوصا لو اصحابكم كتير لان هما دول الى فعليا هايحيوا الفرح..

الترابيزات حاول تخليها دائريه وكبيره وبلاش الطريقه التقليديه فى فصل معازيم العريس عن العروسه دوبوا الجميع فى بعض تبقى الفرحه حلوه .

اما البوفيه فاقترح الست مينيو علشان محدش يتعب نفسه وطبعا تقدر تختار الى انت عايزه حسب المكان بدل البوفيه المفتوح وبرضه ممكن الست مينيو يتضمن حاجات كتير الرك على السرفيس الى فى الفندق او شركه الكاترينج الى هاتتفق معاها .

وحاول تبقى بسيط بلا ترف او تفريط.. يعنى الليله دى من المفترض انها فرحه جماعيه واشهار للزواج يبقى بلاش المبالغه فى اى بند من البنود ..

ده كده علشان انا بنص تفكير دلوقتى الصبح انشاء الله اركز كده واجيلك فكورتين تانين ..

والف الف مبروك

[أبو محمد]

يا ألف نهار ابيض .. يا ألف نهار مبروك ..

صلاة النبى .. ترضى النبى .. ملحة ف عينك ياللى .. ما تصلى عالنبى

حبيبنا "واحد تانى" .. ربنا يتمم بخير وتجيب لنا كذا واحد تانى

خد عندك شوية الأفكار دى من عمك جادليو .. إللى يعجبك منهم ، إتوكل على الله ونفذ .. على فكرة كل الأفكار الخاصة بالحفلة دى ممكن ينفذها لك المكان إللى حتتعاقد معاه سواء فندق أو نادى أو قاعة من الجداد اللى اتعملوا للمناسبات دى

- الزفة : زى ما قالت أبلة فولانة عازفى الكمنجات بيبقوا شيك جدا بشرط إنك تكون واثق من أداءهم وياريت تحضر لهم زفة قبل ما تتعاقد معاهم .. لأن لو كانوا "مش ولا بد" ممكن بيبقوا "أذية" لأصحاب الأذن الموسيقية مع إن أصحاب الأذن "الكنكة" بيبقوا فرحانين بيهم .. ممكن كمان أطفال "6 أو 8 بنوتات" صغيرين على الصفين بيقدموا عرض باليه بيبقى رائع .. برضو لازم تشوفهم فى حفلة وتشوف لبسهم وأداءهم وإلا فرقة حسب الله بتاعتنا تبقى أولى بالسبوبة .. أنا باتكلم بجد لو الكمنجات والباليه مش عشرة على عشرة يبقى الزفة البلدى بتاعة ذوى الأصوات المزعجة أحسن .. وممكن زفة نوبى بتبقى ظريفة جدا ودمها خفيف قوى تغنى عن كل ده .. الزفة فى العادة بتبقى خارج القاعة (حديقة أم مدخل أو خلافه) .. ممكن بقى أول العروسين ما يوصلوا لباب القاعة ال دى جى يشغل

نشيد الزفاف - ماجدة الرومى

يدخل عليها العروسين من باب القاعة إلى الكوشة ..

هذا النشيد بديل مناسب جدا لمارش الزفاف التقليدى إللى بيفكرنى بعبد الفتاح القصرى وهو بيقول "مشيناها خطى ومن كتبت عليه خطى مشاها"

فقرات الحفل بقى دى أذواق .. يعنى ممكن عمك جادوليو مثلا ما يطلعش من كل الحفلة غير بوصلة عواد يغنى قديم .. أغانى مفرحة برضو بس قديم .. إحنا كمان كنا بنسمع حاجات تفرح .. عشان كده المفروض تكون الأغانى متنوعة .. أنا حضرت حفلة مؤخرا كانت بالنسبة لى ممتازة .. كلها موسيقى Light والسماعات مش عالية .. وبعدين عواد يغنى شرقى (برضه بدون تعلية صوت السماعات)

فكرة عرض صور العروسين فى مراحل السن المختلفة وأثناء فترة الخطوبة فكرة جميلة .. ممكن كمان تنقى صورة للعروسين من فترة الخطوبة تكون خلفيتها مش غامقة وتكبرها وتحطها على ستاند فى مدخل القاعة علشان الأصدقاء يكتبولهم عليها عبارات التهنئة (بيكون فيها عبارات دمها خفيف جدا) .. بعد كده الصورة تتبروز وتتحط فى غرفة المعيشة بشقة العروسين .. بتكون ذكرى جميلة ..

ممكن كمان المصور اللى تتفق معاه يعمل كليب للعروسين فى نزهات خارجية قبل الفرح ويُعرض الكليب فى بداية الحفل .. بعد الزفة والذى منه

فكرة ثورية بقى

تعمل فرح فى أضيق الحدود .. والميزانية اللى كنت راصدها للفرح تعمل بيها أى حاجة تانية (رحلة شهر عسل مفتكسة ، أو تعمل بيهم شهادات استثمار ، أو تجيبلك حاجة تاكلها :happy: :sad: )

وألف ألف مبروك مقدما

[Folana]

السلام عليكم ورحمة الله..........

صلاة النبى .. ترضى النبى .. ملحة ف عينك ياللى .. ما تصلى عالنبى

ازد ابو محمد جادليو...اسمح لى اشد على ايدك واشكرك جدا..كما اتقدم بالشكر لابننا البار واحد افندى تانى بيه لانه اتاح لى الفرصة انى اعرف معلومة كانت حتجننى على مدار سبعين سنة من عمرى....

ترضى النبى...ياسولالالالام...طول عمرى نفسى اعرف بيقولوا ..صلاة النبى ...ايه بعدها....دلوقت اقدر اتوكل وانا مرتاحة الضمير هانئة البال...

طب المقطع التانى بيقول ايه ...يعنى باسمعهم بيقولوا " يا اما انت صغير قوى ياعريس......وبعد كده ايه بقى ..هه..هه ايه. bv:- ..انا بتوصل لاذنى على انها طويل وقصير قوى يا عريس..هل هذا مظبوط...ولا بيقولوا حاجة تانية ؟؟؟.....ساعدونى ربنا يكرمكم ....

بالنسبة للبطاقات اللى حضرتك عايز توزعها على الموائد بالاسامى...فكرة مش بطالة ..بس اولا مكلفة بدون داعى ...ثانيا حتاخد وقت علشان تطبعها...ثالثا وهو الاهم ممكن ناس تزعل من توزيع الاماكن...لان كده بيكون فيه افضلية بين مين حيقعد فين...

ممكن بنات الشرف - ويفضل انهم يكونوا فى التين ادجز لان الاطفال بتتعب بسرعة وعايزة تلعب - هم اللى يتولوا ارشاد الضيوف للترابيزات ويقدموا لهم الوردة ...بس الورد يتقدم للسيدات فقط والانسات...(فكرة خبيثة : ممكن يلموا كمان فلوس من الازواج تمن الورد ده زى الافلام كده :lol: :happy: )

وحنكمل معاك تانى بس ادينا بنفكر ...

صباحكم جميل.......... :sad:

[واحد تاني]

ياااه ... كل الناس الجميلة دي جت تباركلي ... وأنا مش هنا

ربنا يعزكم ويكرمكم ويفرح قلوبكم باذن الله ...

شكرا جزيلا (بنت الشاطئ) هانم على الأفكار الجميلة دي ربنا يجازيكي كل الخير عنها ان شاء الله

هي العروسة الحمدلله محجبة والعائلتين نقدر نقول انهم Modern conservative muslims فلذلك عملية فصل القاعات ربما غير مطروح رغم ان الفندق عنده الامكانية دي اذا حبينا بس هما الناس اللي هتكون موجودة كلها اسر تعرف بعضها فا مفيش حد غريب في المغارة

فكرة حمام السباحة كانت مطروحة في فندق آخر غير اللى حجزت فيه بالفعل وكمان فكرة ال Open air party بالنهار كانت مطروحة في فندق تاني وكان فيه Garden روعة مع مبنى اسطوري في خلفيتها بس كل الناس خوفتني من حرارة الجو والرطوبة وغلاستها في الوقت ده من السنة ... لذلك كان القرار على القاعة اللي حجزناها بالفعل ...

نينة الحاجة ( folana ) الله يبارك في حضرتك وعقبال بناتك ان شاءالله قريبا

ايوة كده صحي لي الفرقة ... قولي لهم عندهم شغل ... ومش أي شغل ... ده شغل لابن الفرقة يعني ... وأنا الحمدلله شايف أهو المايسترو عمي الجميل (أبو محمد) جادوليو ظهر ومعاه بشاير الخيرات عقبال ظهور باقي افراد فرقة حسب الله ... ربنا يكرمكم يارب ويعزكم

والله زي ما تفضلتي أنا لو عليا أنا ممكن اخلي ال دي جي يلعب طول الوقت فري ميكس لمنير بس الانسان أكيد مش هيفرض ذوقه على الناس اللي موجودين :blink: ... بالنسبة لموضوع ال دي جي ده كمان أنا كنت بفكر كمان انه كنوع من التجديد والتغيير انه ميكونش أغاني انما يكون ريميكس للأغاني اللى أنا عايزها مع مساحات من Classics بس كمان متخوف من حتة فرض ذوق محدد على الناس دي فا في الغالب هيكون بالطريقة العادية وان كنت حابب لو حد يقدر يساعدني ينزل لي هنا توزيعات نادرة أقدر اديها لل دي جي يلعبها ...

وفي واتنين أصحابنا هنا من اعضاء الفرقة الموقرة محتاجين ايدهم معانا في الموضوع ده ... سامعني يا موديست ... سامعني يا زهيري :phar:

أما يا ( folana ) هانم فكرة زفة الكمانجات دي فكرة هايلة جدا وعجبتني اوي وان شاء الله هطلب من الفندق يعملها

باقي الترتيبات بتاعة الترابيزات والكراسي وخلافة ففي مكان الفندق بيتعامل معاه والعروسة راحت زارتهم عشان تختار هي التفاصيل دي... بس ده ما يمنعش ان لو في أفكار جديدة ممكن حضرتك او السادة المشاركين تطرحوها احنا نطلبها من المكان ده يعملها لنا زي فكرة اطباق الكاجو والفزدق دي عجبتني اوي ... يعني انا ممكن اسيب الكوشة وآخد العروسة وننزل نقعد على ترابيزة من ترابيزات المعازيم ونتسلى ونأزأز wst::

بالنسبة للفستان خلاص اخترناه وعلى وشك يخلص الحمدلله ... باقي البدلة بتاعتي كنت بفكر اشتريها من هنا ... بس قلت احسن

اشركها معايا في اختيارها لما انزل ...

فا ايه الجديد في دنيا بدل الفرح واستايلاتها يا أساتذة أفادكم الله

استاذي الفاضل احمد بك محمود ... اولا انا سعيد جدا بالموضوع ده اللي خلانا نشترك في الحوار يمكن للمرة الأولى

وشكرا على التهنئة والمشاركة القيمة ... بالنسبة لموضوع السيناريو ده أنا كنت لسه بتكلم فيه مع موديست بفكر اني اعمل حاجة كده على فيلم سينما من اخراجي (طبعا حاجة بسيطة جدا) بس مش عارف بقى الوقت هيسعفني والا لأ

فكرة الورد دي رائعة جدا وكمان موضوع ان الكوشة تكون اتنين اوبيسون دي حلوة حتى دا ممكن كمان اجيب أنا Love seat من عندي يكون هو الكوشة حتى تبقى حاجة مريحة في القعدة المدة الطويلة بتاعة الفرح والواحد يحس برضه انه البيت بيته :)

كمان ال ست مينيو اعتقد هتكون افضل واريح للناس وهتخلي الجو اهدى قبل ساعة العشا ... ونفسي والله الموضوع يكون في منتهى البساطة لاني من المعتقدين ان Less is more شكرا استاذي وفي انتظارك بعد الفاصل ...

حبيبي وأستاذي وكبير فرقتنا ابومحمد بك ... نورتنا بحضورك

اعمل ايه يا معنمي قول لي ... أنا عاوز عواد وهي مش عاوزة عواد ... نفسي والله في واحد كده بعد العشا ويقعد بقى يلعب أغاني الست زي انت عمري والروائع دي مع شوية حاجات لقنديل ومحمد فوزي والناس الجميلة دي ... ربنا يسهل بقى ونتوصل ل compromise سلمي :)

أنا كما بفكر في بنت كده تلعب فايولين ساعة العشا والناس بتاكل بس مش عارف هلاقي الناس دي فين ... دلني لو تعرف الله يكرمك

folana هانم كتبت

ممكن بنات الشرف - ويفضل انهم يكونوا فى التين ادجز لان الاطفال بتتعب بسرعة وعايزة تلعب - هم اللى يتولوا ارشاد الضيوف للترابيزات ويقدموا لهم الوردة ...بس الورد يتقدم للسيدات فقط والانسات...(فكرة خبيثة : ممكن يلموا كمان فلوس من الازواج تمن الورد ده زى الافلام كده )

وحنكمل معاك تانى بس ادينا بنفكر ...

كلام سليم بس قوليلي بقى موضوع لم الفلوس من الازواج ده اعمله ازاي :)

ياللا تعالي بقى كملي مستني حضرتك

[Folana]

السلام عليكم ورحمة الله....

ابننا البار واحد ...حاتكلم معاك انت دلوقت وخلى التانى يروح يجهز للفرح علشان ماتتعطلش...

موضوع لم الفلوس سهل جدا....دور لهم اغنية " مين يشترى الورد منى"...وهم حيفهموا المراد على طول...

موضوع الدى جى والعواد والكمنجات ..دى كلها فقرات ممكن تترتب مع الفندق ......ما انت مش عايز تنفع فرقة حسب الله للفنون المحاوارتية بقى....كانوا حيقوموا بالليلة كلها ...موديست يغنى ظلموه...وابو محمد يقود الفرقة وزهيرى يلقى عصيدة عصماء ..

يالا ...اهى ارزاق...بس عملت طيب...

لا فعلا ممكن ترتب الفقرات ويكون فيها عواد او عازف قانون ...واغانى منير...واغانى حديثة من بتاعة الافراح علشان الناس كلها تنبسط مع اختلاف اذواقهم...

موضوع بدل الفرح ..دى بقى يفيدك فيها الاخوة الرجال هنا.....لكن اللى اعرفه انهم بيرحوا بورسعيد يشتروها من هناك ..مش كده ياشباب ولا ايه؟

يبقى ممكن تستشير العروسة فى اللون وتجيبها من عندك......

وياسلام لو تعمل لعروستك مفاجأة...كأن تذيع لها اغنية بتحبها ..ولها ذكريات معكم....

المهم يعنى شوف انت عايز تعرف ايه واسأل ونحن نجيب......انت مش حتعزمنا ولا ايه؟؟؟؟؟؟ احنا ستة الالاف عضو ويزيد...ومصرين نفرح بك ونشاركك فرحتك...

ولا ايه ياجماعة.........(وش فاعل خير )

[Modest]

ابني الغالي واحد بيه تاني هايتجوز :cry: ... دي دموع الفرح يا واحد يا حبيبي :110:

صحيح دي الأيام بتجري ياولاد

فاكر يا واحد يا حبيبي لما كنت أوصلك المدرسة في أتوبيس النقل العام و أزوغ بيك من الكمساري؟

فاكر لما كنت ترفض تدخل المدرسة؟ .. من يومك مالكش في العلام .. حاجة تفرح صحيح يعني :wub:

فاكر لما كنت باعمل لك الساندويتشات اللي بتحبها؟

فاكر و انت في تالتة رابع لما وقعت اتعورت و انت بتزوغ من على سور المدرسة .. ساعتها أخدتك على المدرسة على طول و علّمتك إزاي تزوغ من غير ما تتعور

و لا فاكر يا واحد لما قفشوك و انت بـ ..... ياللا ما علينا wst::

مش عايز كمان أفكّرك ببلاويك مع بنت الجيران علشان يمكن المدام تقرأ و احنا مش عايزين مشاكل :D

بلاش كل ده .. طيب فاكر مظاهرات ثورة 19 لما رحت أجيبك من البلوكامين في أنصاص الليالي و انت مُصِر ما تطلعش إلا لما سعد باشا يرجع من المنفى؟

فاكر حرب 48 و انت بتضرب المدفع على العدو قامت الدانة فرقعت فيك؟

فاكر ثورة 23 يوليو لما استدعوك من على الجبهة علشان تنضم للضباط الأحرار و خلوك المسئول الأول عن مدفع رمضان؟

فاكر في بورسعيد سنة 56 لما كنت بتهرب الأسلحة للمقاومة و اتضرب عليك نار في بحيرة المنزلة؟

فاكر حرب اليمن لما القبائل كلها اتجمعت و اهدروا دمك و لحقتك في آخر لحظة و رجعت بيك من هناك؟

فاكر حرب 67 لما وعدتني تجيب لي صينية كنافة من تل أبيب و رجعت يومها من غير الكنافة؟

فاكر لما عبرت مع الأبطال في حرب 73 و عملت لك زفّة من أول الحارة لآخرها و غنينا لك "واحد تاني رفعنا العلم و طوّلت راسنا مابين الأمم"

ياااااااه .. كانت أيااااااام ... هافاكرك بإيه و لا إيه بس يا واحد تاني .... خليت الدمعة تفر من عيني :cry:

مبدئياً علشان انا عارف إنك بتحب ذوقي اتفضل بدلة و فستان آخر صيحة من تصميمي علشان اكون شاركت بجزء بسيط مع الجماعة اللي بيدبّسوك فوق دول :lol:

و لما أخلص تأثُّر هارجع نتكلم في تفاصيل الفرح .. أمّااال .. هو انا عندي كام واحد تاني :wub:

.

[واحد تاني]

ماشي يا موديست انت ونينة folana

حضرتك سايب المفيد وقاعد تفكرني بذكريات عبرت ... ونينة الحاجة بتدبسني في 6000 كارت دعوة

بالنسبة للسادة الاعضاء طبعا كلهم مدعويين وهما بكل تأكيد مش محتاجين عزومة لأنهم اصلا اصحاب بيت ...

الباصات والطائرات الخاصة والباخرة المحروسة هتنتظركم في ساعته وتاريخة عند جميع مداخل اسكندرية ... وعلى المقيمين خارجها مراعاة فرق التوقيت ...

نرجع بقى للجد شوية صغنتتين ... بالنسبة لزفة الكمانجات ... الاوتيل قال لي انها موجودة وبيعملوها ... وقالولي انها بتكون مكونة من 5 عازفين ... معرفش هل الرقم ده كفاية والا احسن يكونوا اكتر من كده؟ ولو اكتر يكون كام عشان تكون احلى؟

أما بالنسبة لحضرتك يا سي موديست أفندي سيب البدل والفساتين دلوقتي انا مش عاوز خبرتك كا ترزي في الوكت الراهن

سعادتك انا محتاج منك تساعدني في ال List اللى اخلي ال دي جي يلعبها

على ان تكون المقادير كالتاتي :

- 3 كوبايات كبيرة منير

- اتنين ونص وقة عمرو افندي دياب

-خليط من هشام وفؤاد والتهاب توفيق

- 3 معالق شاي ام كلثوم

-فصين وردة ونجاة وفيروز طبعا

-معلقتين حركات وكلام من الجديد بس رومانتيكي

-اضافاتك ولمساتك السحرية من كل ماهو تايم لس

على ان يقلب الخليط جيدا ويمزج على نار هادئة حتى تمام النضج

(على فكرة ساعتها كنت على الطيارة )

[se_ Elsyed]

اسمع كلام اخوك ابو ساميه يا واحد وخش على زفه بالحناطير من الانفوشي لابو قير انما تقولي 5 كمنجات وتورته دورين والحفلطه وشُرب النشا .. الكلام ده ما ياكولش معانا يابويا

وانتو مروحين بقى عدي انت والعروسه خدلك كيلو هريسة من عند احمد حسانين وكوبايتين خروب ساقع من محلات كلية الطب - ما تكترش عشان تبقى فايق - على نص كيلو ريش من بلبع

وادعي لاخوك سين سين

والف الف مبروك

بس ما تتقلش ودانك وتنسى اللي اتفقنا عليه ( سيكو بيكو ... يعني زيارة سرية انا وموديست للخُبر والسهر عالكورنيش حتى الصباح )

[عادل أبوزيد]

إختيارات جديدة و مبتكرة و أفكار حقيقة مدهشة ، و أعتقد أن هناك مزيد من الأفكار.

ما سبق كان إستهلالا لابد منه

لاحظت حتى الآن أن الحديث يدور بشكل "زغرطى يا إنتى مش غرمانة" بمعنى إن الأفكار ينقصها شيئ هام هو "إيه بكام"

للشبان - و الشابات - المقبلون على الزواج أو بمعنى أصح الذين قرروا الزواج و يقومون الآن بالتخطيط لحفل الزفاف يحتاجون بجانب الأفكار و الإقتراحات يردون معلومات عن المتاح و التكلفة المتوقعة.

و أقترح أيضا وضع عناوين و تليفونات المختصين بتقديم تلك الأفكار و محاورات المصريين لن تعتبرها إعلانات و تحذفها و ذلك بدلا من الإكتفاء بإرسالها إلى الفاضل "واحد تانى" فقط.

و ملاحظة أخرى بسيطة ليتنا أيضا نغطى عدة مستويات فى حفلات الزفاف بمعنى أن عندى إنطباع أن الحديث حتى الآن عن مستوى فوق المتوسط و هذ عن مستوى التكلفة فقط و ليس مستوى الرقى فى الحفل.

ليتنا نسمع عن خبرات فعلية و كذا عن أحلام الأمهات لبناتهم و أحلام الرجال لأبنائهم.

[Folana]

السلام عليكم ورحمة الله....

أستاذنا الفاضل عادل...انا فعلا ناوية اكتب عن مستويات حفلات الزفاف باختلاف الامكانيات ...لكن فضلت أأجل الموضوع شوية لحد ما ابننا واحد تانى يتزوج وبعد كده نتكلم فى الموضوع بشكل عام....لانه له طلبات خاصة فاحنا متفرغين له الاول ...

جميل جدا ان حضرتك اشارت الى موضوع التليفونات والعناوين انا كنت متردد ة بصراحة حتى لا يكون بمثابة اعلان ومداخلتى تتحذف ان شاء الله سادرج ارقام التليفونات

احنا بنقترح بس ...وواحد تانى غيرنا هو اللى حيحاسب ...مالناش دعوة....

وياريت فعلا الكل يشارك...يعنى الشباب يتكلموا عن احلامهم وامكانيتهم ونبدأ نضع بدائل عديدة تغطى جميع المستويات...وتحقق معظم الامنيات ان لم يكن جميعها..

اخى الفاضل واحد تانى....اذا خمس افراد كفاية يبقى كده كويس انت مش محتاج عدد كتير...المهم العزف يكون مسموع ...برضه افضل انك تقابل الفرقة وتفهم منه ايه برنامج العمل بتاعهم وتسمع عزفهم حتى يطمأن قلبك....

ماتخافش الست الالاف عضو حيدعوا لك بظهر الغيب ...وكفاية اننا نطمئن عليك ونفرح بك....وننام من غير عشا مش مشكلة احنا نستحمل .......

[Modest]

أما بالنسبة لحضرتك يا سي موديست أفندي سيب البدل والفساتين دلوقتي انا مش عاوز خبرتك كا ترزي في الوكت الراهن

سعادتك انا محتاج منك تساعدني في ال List اللى اخلي ال دي جي يلعبها

على ان تكون المقادير كالتاتي :

- 3 كوبايات كبيرة منير

- اتنين ونص وقة عمرو افندي دياب

-خليط من هشام وفؤاد والتهاب توفيق

- 3 معالق شاي ام كلثوم

-فصين وردة ونجاة وفيروز طبعا

-معلقتين حركات وكلام من الجديد بس رومانتيكي

-اضافاتك ولمساتك السحرية من كل ماهو تايم لس

على ان يقلب الخليط جيدا ويمزج على نار هادئة حتى تمام النضج

(على فكرة ساعتها كنت على الطيارة :) )

غُلُبت اتصل بك يا واحد بيه تاني لكن "إن فين" - تلات نقط على الفاء - :wub:

نخش في الموضوع و نحط البضاعة هنا يمكن حد يشوفها و يجري يجيبك من على القهوة تعاينها بنفسك .

منير

صوتِك

لما النسيم

عينيك حلوين

عمرو دياب

الليلة دي (من الألبوم الجديد)

قمرين

الله لا يحرمني منك

محمد فؤاد

أحب إيه و لا إيه

الله عليك

ياللا هوا

هشام عباس ( مش سكّتي لا هو و لا التهاب توفيق) لكن خد الكام حته دول لهشام ممكن يعملوا جو

الله يسلم حالك

أد الدنيا

أحلى عيون

أم كلثوم!! عظَمَة على عَظَمة يا ست .. بس انتوا في فرح و هيصة و الست أم كلثوم عايزة تركيز زي ما اتعودنا نسمعها سوا على الجرامافون و نتسلطن يا واحد بيه :flr1:

لكن ممكن تاخد مقاطع من: "سيادتك عمري" و "حضرتك الحب" و "أمل حياتي" على سبيل التغيير و إرضاء محبي أم كلثوم

وردة .. لو عندك وقت و المعازيم ماوراهاش حاجة يبقى خش على "أوقاتي بتحلوّ .. تحلو معاك و انت معايا".

نجاة .. و بما إن الفرح في اسكندرية يبقى عليك بـ "أنا باعشق البحر" و "باحلم معاك" .. يا خبر يا جدعان على كلمات و لحن "باحلم معاك" و نجاة بتغنيها .. حاجة كده تخلي الواحد نفسه يتجوز تاني :unsure: .. أقصد يعني أحب أهديها لزوجتي الحبيبة

فيروز .. كل اغانيها تقريباً عندي لكن فيه شخص "عاشق فيروز" موجود عندك و ممكن يجيب من الآخر و يقول لك على المفيد ;) .. اللي يقترح عليك بيه قول لي بس و أنا أشحنهولك مع بقية البضاعة.

التايم لس نقيت لك منه:

Al Jolson - You Made Me Love You

Celine Dion - Because You Loved Me

Elvis Presley - I Cant Help Falling In Love With You

Sinead O'Connor - Nothing Compares To You

Marvin Gaye - How Sweet It Is To Be Loved By You

و دول مُصَنَّفين كـ Most Popular wedding songs

أنا جاهز بيهم كلهم يا معنمي .. يعني البضاعة حاضرة و التسليم فوري بس انت تؤمر يا واحد أفندي.

حدد الزمان و المكان و السلاح .. كلمة السر "بطن الزير" .. و الحساب يجمع :ninja:

.

[Tafshan]

الف مبروك يا باشا و عقبال ما تجوز اولادك باذن الله

بالنسبه للسيناريو المعلب فلا مناص من القيام به .. الزفه اياً كانت + المطرب و الراقصه و الخ .. او الDJ .. كلها سيناريوهات معروفع مسبقاً و تتميز بقدر كبير من ال "نشا" الذى لن تتمكن من اذابته لوجود اطراف عديده في الفرح لا يعرفون بعضهم البعض .. و ستقتصر الفرحه في قلبك انت و عروسك ... و ستشعر بال "قر " و الحقد في عيون قد تعرفها او لا تعرفها دون اسباب منطقيه .. و في النهايه تنتهى الحفله كما تنتهى سائر الحفلات المماثله و قد صرفت الكثير من الاموال دون فائده مباشره سواء لك او لعروسك ..

عن نفسي لو اتيحت لى الفرصه للغيت الحفله من الاساس ..

لكن هناك ضغوط تحديداً من قبل العروس التى تحلم بالفستان الابيض و الفرح و الخ ..

و لذلك انصحك ان تكون متفهم جداً لاحتياجات عروسك - و والدتك كمان :wub: - و فكر في البدائل لاستخدام نفس الاموال .. يعنى شهر عسل في اوروبا مثلاً ... او سياره للعروسه .. الحقيقه ان هناك الكثير من البدائل التى يدوم تأثيرها اكثر بكثير من الفرح ... و كى لا اكون متطرف .. ممكن تمسك العصا من النصف .. يعنى حفله معقوله + استخدام الفرق في شئ مفيد ..

و الف مبروك ...

_______________________________________

فكره بقى عمليه عموماً لاى عريس و عروس ... و تحديداً لاصحابهم و اقربائهم ... غالباً او عرفياً تعودنا ان الفرح على العريس و المعازيم يحضروا الفرح كمعازيم .. ليه لأ ما يكونش الفرح هدية المعازيم ؟؟؟ يعنى لو كل مدعو بدفع مبلغ محدد و قام متطوع او فريق من المتطوعين بتجميع المبالغ و تقديم حفلة العرس هديه للعروسين بدلاً من تقديم هدايا غير لازمه غالباً للعروسين .. ممكن طبعاً ان يكون هناك منسق يسال العروس عن تصورها للحفله ..و في النهايه الحفله ملك الجميع و سيكون شئ ايجابي ان يتشارك سائر الاصدقاء و الاقارب في تكلفة تلك الليله و تحمل هذا العبئ عن العروسين .. مش كده و لا ايه ؟؟