حاله غريبه تنتابني-2

[hussaindoit]

بعد النجاح الباهر -للموضوع الأول - وعدم رد اي حد عليا - أليكم بجد ومش بتهريج حاله أخرى تنتابني كثيرا

أولا انا في غربه وللأسف غربة كارهها جدا جدا ولكن ظروف مصر برضه مش مشجعاني - المهم انا أحيانا وانا نايم اصحى فجأه وأجد نفسي مخنوق وكأني مش قادر اخد نفسي - والأهم ان عايز اهرب من المكان اللي انا فيا وأجري للمطار أو اصحي أي حد من اللي حواليا وأقولهم انا ماشي مش قادر قعد ولو ثانية هنا و في نفس اللحظه أتخيل نفسي انهم وضعوني في سجن على شكل حجره ضيقه وانا قاعد أخبط في جدرانها واستغيث بيهم خرجوني خرجوني حتخنق مش وكأني عندي فوبيا من الأماكن الضيقه ولكن الفوبيا تأتي ليا وتخيلتها مع الأحساس بالغربه دائما و اني أود ان أهرب من غربتي واشعر ان اكبر عذاب بالنسبة لي هو وجودي في مكان ضيق محبوس فيه ودائما كما قولت يأتي التخيل بهذا مع التخيل بهروبي من مكاني - أشكركم على ردودكم مقدما

[badroora]

الحلم بيسفر انك اكيد فى السعودية :rolleyes:

اخى العزيز انا بصراحة قرت موضوع الاولانى وكنت هاد عليه بس مش عرفة شيء اوقفنى

المهم

شكلك بقالك كتير منزلتش اجازة

الحل الوحيد انك تنزل اجازة منها تزور مصر وتغير مكان وقيم الحالة بنفسك لا تعتمد على الميديا او راى اصحابك فى احوال مصر كما كتبت لك فى الموضوع السابق ان كل واحد بيشوف الدنيا بمنظورة

انت محتاج اجازة تغير جو

وبصراحة الله يكون فى عونك كاره الغربة من 14 سنه ومع ذلك بتقاوم الاحساس الفظيع فى سيبل ان تستمر دون الرجوع الى مصر

والله انا لو حلمت حلم زى حلمك دا او قعدت 7 سنين مش 14 اول حاجة اعملها انزل مصر ارحم من الكوابيس دى

بس عموما اطمئن انت كويس بس محتاج تغير جو

يلا بقي خد اجازة وانزل مصر واكتبلنا من هناك حاجة مفرحة شوية

[hussaindoit]

كتر خيرك - واستاذه في كل كلمه واعذريني في كم الكأبه وتحليلك للمكان صح -لو عرفتي اني في صحراء من عشرة أشهر حتجيبي فريق موسوعه jennss

[ابو حلاوه]

استاذ حسين الحالة التي تعاني منها حضرتك اسمها نوبة فزع او Panic attack و الشكل اللي بتصفه حضرتك خصوصا الصحيان من النوم و الاحساس بالاختناق يكاد يكون كلاسيكي لتلك الحالة و ان كان من الممكن ان تظهر باشكال متعددة و مختلفة . ارجو منك القاء نظرة علي تلك الوصلة و البحث بالعربية و الانجليزية باستخدام المصطلح بالاعلي . العلاج الدوائي يفيد كثيرا في تلك الحالة http://ar.wikipedia.org/wiki/%D8%A7%D8%B6%...%81%D8%B2%D8%B9

[bentmasria]

الاخ الفاضل استاذ حسين يسعد صباحك يارب

انت موش محتاج جينيس ريكورد فى بعدك عن التواصل الانسانى انت يا اخى العزيز مع مساعدة طبية وايضا اجتماعية باذن الله يمكنك التغلب على الامر اعتقد انك تحتاج للتحدث مع صديق او طبيب نفسى حول مخاوفك التى قد تتغلب عليك احيانا وتصيبك بالاختناق فحسب وصفك كل ما حولك يثير مشاعر الاكتئاب ولا يدعو للتفاؤل حاول ان تحدث تغيير متميزا فى حياتك او مارس هواية او لعبة جديدة تشغل وقتك واهتمامك بشكل اكبر من التفكير المفرط فى الوحدة وما يقود اليه بالطبع انا لا اعلم ما يحيط بك ولكنى ساقترح اضافة صداقات جديدة ممن حولك وجوه جديدة وحكايات غير مكررة وربما مارست هواية تصلح لهذا المكان ربما تأتى بقطعة خشبية وبعض الادوات البسيطة لتشكل مثلا شجرة شىء سهل وبسيط ولا تدرى كم سيسعدك ما صنعته يداك وان كان بسيطا ربما احتفظت بالكاميرا فى جولاتك ومارست التصوير كهاو ولا تتخيل كم ستأخذك هذه الهواية بحثا عن كل جديد وجميل لتسجله بعدستك وان كنت لا تعرف فالمهارة تكتسب ولا نولد بها اليس كذلك يا اخى الكريم

جرب اخى العزيز ولا مانع من التحدث لاحد الاخصائيين فسوف يساعدك هذا كثيرا باذن الله

لا تنس فقط عد نفسك ان الامور ستتحول الى الافضل بامر الله وارادنك وسوف تجد خيرا كثيرا باذن الله تعالى

وثق فى رحمة الله وعدله وان احتجت الى هاتف احد الاخصائيين ارجو ارسل لى على الخاص وسأزودك به باذن الله تعالى

دمت بكل الخير والصحة والعافية :rolleyes:

[hussaindoit]

اشكر كل من كتب لي رد على موضوعي-جزاكم الله خير

تم تعديل 24 يوليو 2007 بواسطة hussaindoit

[somebody]

الاستاذ حسين واضح من كلامك انك محسود و يمكن الحسد جالك في انك سافرت عشان كده عايز ترجع كل شوية

واكيد طبعا- باين من لهجتك (مخنوق ومش عارفة ايه)- انك مبتقرأش المعوذات وسورة الاخلاص 3 مرات بعد الفجر و3 مرات بعد المغرب

بيتهيأ لي

وأكيد قراءة القران شفاء من أي داء

--------------------------------------------------

اللهم لا إله إلا أنت سبحانك إني كنت من الظالمين

[tahereyad]

الأخ حسين,,, أرجو من الله أن يساعدك علي تخطي مرحلة الهم و الكرب اللي انت حاسس بيها,,

أنا الحقيقه ليه رأي تاني مختلف شويه,, في سبب الحاله اللي عندك,, بص احنا كلنا عندنا احساس داخلي اننا مقصرين مع ربنا,, و كلنا نتمني ايضا اننا نتواصل مع ربنا و نقوي علاقتنا بيه,, و ساعات,, بقول ساعات,, بنحس اننا بعدنا شويه عن ربنا ولاهتنا الحياه,, بمسئوليتها و مشاكلها.... تسمحلي أقوللك حاجه بجد,,, حالة الهم و الكرب و الخنقه و الأحلام المزعجه دي ( لا علاقة لها بالسفر ولا الغربه), انما ممكن ده يكون عامل مساعد فقط,,, اما في الآخر دي ظروفنا و رزقنا و أكل عيشنا,,, و علي فكره,, انت سافرت عشان ربنا كاتبلك الرزق في المكان اللي انت فيه,, ومش هاتسيب مكانك الا لما رزقك في المكان ده ينقطع,,, الموضوع كلّه فالأول و فالآخر بايد ربنا,,,

نرجع لحالة الهم و الخنقه اللي انت حاسس بيها و اللي طول مانت سايب نفسك فريسه لها هاتفضل تزيد و تتضخم و تضغط علي أعصابك زياده الي ان يحدث لك ما لا يحمد عقباه,,, طيب و الحل,,

هاحكيلك علي تجربه مرّت بي علي مدار عام كامل فالكليه,, كنت دايما متضايق,, مخنوق ,, مش طايق اللي حواليه,, بدأت أخسر أصحابي و زمايلي لمجرد اني أصبحت لا أحب ان اكلمهم أو أحيانا كنت حتي لا أحييهم,, و بالتالي بدأ زمايلي يعاملوني بالمثل,, كنت خارج محافظتي و ماكنتش باحب أرجع لأهلي,, كان بيعدي عليّه أوقات كتير نفسي أهرب من كل حاجه,,كليتي, أهلي, حياتي,, و أروح مكان تاني جديد ماعرفش فيه حد,, وابدأ حياه تانيه جديده,,,, شوفت بأه حاله من الضيق و النكد و اليأس أكتر من كده؟؟؟؟

في يوم, سيبت الكليه و المحاضرات و رجعت الشقه مخنوق و يادوب بحاول أمنع الدموع من أن تخرج من عيني,,, تسألني ليه كل ده؟؟ والله ماعرف,, بجد مافيش أي سبب واضح,, عادي يعني كنت شاب زي كل الشباب,, لا أكثر ولا أقل,,,,

المهم,, في اليوم ده تقريبا كان أصعب يوم مرّ عليّه,,, روّحت ,, حاولت أنام,, طبعا مين اللي في الحاله دي و هايجيله نوم,,, 100.000 فكره فرأسي بتتزاحم و كلهم من عند الشيطان,,, لكن فجأه في فكره نوّرت في رأسي,, أوحي بها الله لي,, قمت, توضّأت و دخلت في صلاه طويله,, تركت نفسي فيها أبكي,, ووصلت من الخشوع أني احسست أنني أناجي رّبي,,, دعوت في السجود كثيرا, وأنا ساجد,, أتي الله بدعاء فك الكرب علي لساني,, و انطلق لساني به:

اللهم انّي أعوذ بك من الهم و الحزن,, و أعوذ بك من العجز و الكسل,, و أعوذ بك من الجبن و البخل,, و أعوذ بك من غلبة الدين و قهر الرجال...

لا اله الا انت اني كنت من الظالمين..

و أدعيه تانيه جرت وقتها علي لساني,,, أقسم بالله يا أخ حسين,, اني بمجرد ما سلّمت من الصلاه,,, وجدت عضلات وجهي بترسم ابتسامه عرييييضه علي وجهي,, غصب عني,, و بعد شويه,, لقيت نفسي باضحك,, والله كنت لوحدي و كنت باضحك من كل قلبي و كانني اسعد مخلوق فالدنيا,, كنت باضحك بصوت مسموع, و لو كان معايا أحد وقتها كان وصفني بالجنون,, "هوه مش الواد ده اللي كان علي وشه غضب ربنا من شويه؟؟؟,, ربنا يشفي"

أنا استمرت معايا حالة الهم و الكرب و الخنقه دي سنه كامله,,, و كانت نهايتها ركعتين صليتهم بخشوع و دعاء ربنا استجابه لي,,

أحب أقوللك أنني قسما بالله لم أشعر بما شعرت به هذه الأيام الخوالي من الضيق,, رغم مرور سنين طويله و ظروف كتير جدا,, لكن الحمد لله,, بعد اليوم ده,, لم اشعر أبدا بمثل هذا الاحساس القاتل....

آسف لأني طوّلت عليك,,, و دي قصتي بين يديك و أرجو أن يكون فيها افاده للجميع,, و لنعرف أن قلوبنا بيد اصبعين من أصابع الله,, يقلبها كيف يشاء...

[amrhoras]

أخي الحبيب أستاذ حسين

عاوز اقولك على حاجة انا بمر بنفس ظروفك واكتر من كدى عايش لوحدي وسط صحراء وكاره الناس والمكان والشغل وكل حاجة وفعلا بيجيلى نفس الاحساس وانا نايم لدرجة انى مبنمش لفترات طويلة وبالعكس بنام يوميا ساعتين بس او تلاته لانى ساعات بقوم مخنوق لدرجة في يوم شعرت انه طلوع روح واتشاهدت مكنتش حتى قارد اتصل على حد يجي يساعدنى لانى زى مانت عرفت انى عايش وسط صحرا مش معايا حد خالص بجد

بس الحل الوحيد انك تنزل اجازة وتدور على شغل جديد الرجوع لمصر فى الوقت الحاضر مستحيل خلاص انكتب علينا الان الغربة داخل وخارج بلدنا فلازم نستحمل عن نفسي بدور على عقد جديد وفيزا جديده مع انى معتقل فعلا مبنزلش اى حته سنه بحالها مشفتش بشر الا مجموعات من البدو اللى نسيو يركبو فى دماغهم مخ وحطوا فيها رمل بلاش حاجة تانية

استعيذ بالله وارجع لربنا لو قاعد لوحدك اقرى قرآن كتير صدقنى العيشة في الصحرا مريره جدا انا اتعودت على البعد عن الناس مع بعض تجاوزات بحس بيها لما بكون لوحدى ومش حخبي عليك بس مكبر دماغى ومش بخوفك بس ساعات بحس وانا نايم ان في حاجات غريبة بتحصل حوليا او اسمع اصوات تناديني في منتصف الليل يارب متكونش وصلت للدرجة دى لانك بعيد الشر حتتجنن زى مانا اتجننت هههه فعن نفسي فعلا بدور على عقود عمل جديدة وفيز خصوصا الناس اللى معاهم ماشا الله تبارك الله ميحبوش ان حد يستفاد بيكرهو الخير للناس

ربنا ينورلك بصيرتك وصدق كل كلمة قولتهالك بأمانة ربنا يعينك ويعين الجميع وانا معاهم انشاء الله

ارجو انى اسمع اخبار حلوه عنك قريبا ان شاء الله تعالى

اه كل سنه وانت طيب بمناسبة رمضان حاول تروح تعمل عمرة انشا الله

انا ساكن في الدمام جنب المقابر بتصبح وبتمسي بيها ربنا يفكها علينا جميعا ان شاء المولى

لو عاوز نكون على اتصال انا ان شاء بتمنى انى اتعرف على الناس حضرتك ابعتلى ايميل برقم جوالك لو مفيش مانع وانا حتصل بيك كلما امكن عشان أطمن عليك انشاء الله

تم تعديل 31 أغسطس 2007 بواسطة amrhoras

[نبض الابداع]

انك مبتقرأش المعوذات وسورة الاخلاص 3 مرات بعد الفجر و3 مرات بعد المغرب

بيتهيأ لي

وأكيد قراءة القران شفاء من أي داء

وسلامتك بعد الشر عليك