مجرد سؤال؟؟

[hussaindoit]

انا قريبا سأبدأ السنه ال14 لي في الغربه واعلم انها ثقيله على الكثيرين ولكن أتمنى الرجوع لمصر بأي شكل وتنتابني من وقت لأخر أحاسيس كثيره بالأختناق واتخيل نفسي أهرب من مكاني واطلب جوازي وانزل مصر فورا - ولكن ما يجعلني اتردد كثيرا حتى الأن هو وضع مصر الذي مؤشره بيهبط يوم عن يوم - وعلى فكره احساسي بالرغبه في الهروب بدأت بشده تلك السنه الأخيره

هل انا فقط ما اتمنى الرجوع ومتردد كثيرا اما يشاركني حالي الكثيرين وهل مؤشرات الأختناق وتخيل الهروب هي مؤشر باطني ان مقاومتي النفسية للغربة بدأت تضعف بشده - اما ايضا هناك الكثيرين مثلي وهل من المناسب لي النزول فعلا تجنبا لمضاعفات صحية محتمله - أشكركم

[badroora]

السنه ال14 يا راجل ومستعجل ليه بس :rolleyes: استنى شوية بقيلك خدشة عالجنسية خدها وبعد كدا انزل مصر

لا طبعا باهزر جنسية عربية ايه بس !!

بص يا اخى العزيز كل واحد سافر حط لنفسة هدف ومدة لتحقيقة

يعنى انا مثلا قدامى كمان 4 سنوات واحقق هدفي وبعد كدا هانزل مصر باذن الله

لان سواء الظروف اتحسنت ام لا مسيرنا الرجوع لبلادنا اللى هى فى دمنا مهما احوالها خنقتنا

ومعتقدش ان مصر سيئه اوى مهما ان كانت احوالها بل هى احسن من غيرها وفيها خيرات كتيره والمفروض بعد ما نرتاح ونحوش خيرنا كلة نستثمرة فيها ونرجع نستقر .

نجع بقي لموضوع حضرتك

حضرتك الوحيد اللى تعرف ظروفك هل اكتفيت ولا لاء

هل حققت هدفك اللى سافرت من اجلة ام لاء

لو حسيت انك استكفيت وحققت هدفك يبقي عليك الرجوع والاستقرار فى بلدك لاننا سواء رضينا ام لن نرضا عن احوالها فاحنا ملناش غيرها

انا اتمنى هدفي يتحقق فى ااقل وقت عشان ارجع واستقر الغربة مهما اديتنا بس بتاخد مننا الاغلى وبدون مانشعر

فكر وقرر وشوف انت عاوز ايه والاصلح ليك فين

ولا تنسي سواء لاقيت زى حالتك او لم تجد هذا لا يعنى انك حالة خاصة او شاذة لاء

بس هناك فروق فردية وشخصية واجتماعية هى اللى بتحتم على كل شخص الاستمرار فى الغربة او الرجوع الى الوطن

[hussaindoit]

اشكرك جدا على سرعه ردك - وانتظر باقي الردود.............

[ahmedarab]

يا عزيزى 14 سنة ...ربنا يقويك ..انا عن نفسى بقالى سنتين بس ونفسى انزل النهاردة قبل بكرة .. بس طبعا مش قبل ما احقق هدفى والا اكون معملتش حاجة والسنتين دول ضاعوا على الفاضى

انا متفق تماما مع كل كلامة قالتها نجفة المغرورة واىء من لاايها 100 % لاننا هانرجع هانرجع لو مصر دى حتة من جهنم ...غيرى انى فعلا مش شايف مصر وحشة قوى كدة ..احنا بس اللى مش بنشوف غير الوحش وبنركز علية ..وكمان لو كلنا قولنا مصر حشة وهربنا برة ..امال مين اللى هايصلحها ويخليها احسن ؟؟؟!!!!

اما بالنسبة لك فلو فعلا انت حاسس بكل الخنقة دى فانا انصحك بالرجوع فورااااااااااااااااااااااااااااااااااااااا

[مصرية و مغتربة]

اخي حسين ليس احساسك غريبا يوجد الكثيرين من لديهم نفس الاحساس ولكن عزيزي الافضل ان تعجل بالعودة حتي لا يفوت عليك اكثر من هذا العمر بعيدا

[afreet]

تحياتى

ان الاشخاص الذين يقضون وقتا طويلا فى الغربه غالبا لا يصبح لهم اهداف محدده

اعتقد ان كل منا ذهب بمحض ارادته الى بلد اخر لتحقيق هدف معين وبعد فتره من الزمن يكتشف ان هذا الهدف لازال بعيدا او تولدت اهداف اخرى اكثر اهميه من الهدف الاساسى الذى جاء من اجله ثم مع مرور الحياة وزيادة المسئوليات يصبح من العسير التخلص من هذا الوضع لعدة اسباب من وجهة نظرى طبعا

اولا ارتفاع مستوى معيشته وبالتالى زيادة مسئولياته ونوع الحياة التى يحياها وبرجوعه لابد ان تهتز معيشته

ثانيا قضاؤه اغلب العام بالخارج وتخصيص مبلغ كبير للاجازه السنوية القصيره والذى عادة ينفق ضعف ماخصصه ويعتقد ان هذا لزوم الحياة فى مصر ولا يعرف ان هذا مصروف عام كامل وليس فتره الاجازة القصيره حيث انه فى فترة الاجازة مطلوب منه كافة الالتزامات الاجتماعية والاصلاح والصيانه عن العام كامل بالاضافة لمحاولة استغلاله كل ثانية من اجازته ومحاولة استغلال الاخرين له بصفته جاهلا باحوال مصر واسعارها

ثالثا ابتعاده عن مصر فى مجال عمله وتغير القوانين والظروف مما يجعل عودته لممارسة عمله فى منتى الصعوبه ويقارب اى مبتدىء يجهل القوانين والانظمه وطرق التحايل عليها ناهيك عن معاملة البشر

رابعا ابتعاده عن اصدقاؤه ومعارفه وانشغالهم بحياتهم الخاصه بصفته غير موجود اغلب الوقت ابعدك عمن سيقدمون لك الدعم وقت الحاجه ومن سيقفون بجوارك

خامسا الاستماع الى المقيمين بمصر بان الحاله فى منتهى السوء ولا يمكنهم العيش وكل مصر تبحث عن عمل بالخارج لتستطيع الحياة وتصديقهم لان هذا غالبا ماسيكون اجماع الاراء

سادسا مقارنة الدخل والنفقات فى بلد الغربة مع الدخل والنفقات فى مصر مما يسبب احباطا

سابعا رؤية الوضع السياسى والامنى والاقتصادى والدينى المتردى فى مصر ومقارنته ببلد الغربة غالبا مايسبب حاله من التردد وعدم القدرة على اتخاذ قرار العودة

الحل من وجهة نظرى طبعا

اولا : محاولة تخفيض مستوى المعيشه بالتدريج للوصول الى المستوى الذى يمكن الحياة به فى مصر لنفسك ولاسرتك والمحيطين بك ابتداءا من اللبس والهدايا فى الاجازات وطرق الانفاق كلها وتخصيص حد معين للانفاق لاتتجاوزه

ثانيا محاولة زيادة الوقت فى مصر اذا كان عملك يسمح بذلك عن طريق زيادة عدد الاجازات او طولها مع الالتزام بحد الانفاق الموضوع اما اذا كان عملك لا يسمح فتجاوز هذه النقطه

ثالثا بدء دراسة الاحوال فى مصر بصورة واقعيه بمحاولة عمل مشروع ما او استثمار مدخرات حسب وضعك دون سؤال الناس فالجميع سيعطى صورة سوداء فانظر بعينيك واعمل عقلك مع البدء فى دراسة المتغيرات التى حدثت خلال الاعوام السابقة فى القوانين والانظمه فى مصر ومحاولة مواكبتها

رابعا محاولة اعادة العلاقات الاجتماعية المقطوعة وصلة الرحم دون اسراف وببطء وتكوين صداقات جديدة فى مصر وفى وسط المقيمين حولك فى بلد غربتك من المصريين

خامسا رؤية الحقيقه الواقعه فى مصر بان كل الناس يشتكون من غلو الحياة وعدم قدرتهم على مجاراتها وفى نفس الوقت رؤية سيارات جديدة اسفل منازلهم واطباق دش اعلاه ومناظر الاسراف من كل حدب وصوب

سادسا لاتقارن ابدا بين وضعك الحالى ووضعك المستقبلى فى مصر ولكن قارن بين وضعك السابق فى مصر قبل الغربة ووضعك بها بعد عودتك وطرق تحسين هذا الوضع

سابعا الاوضاع فى مصر السياسية والدينية والامنيه والاقتصادية تنقل لك عن طريق الاعلام وحوارات المعارف والطرفين غير عادلين فى نقلهم فاولهم ينقل وجهة نظر الحكومه او المعارضه او اخرون لهم مصالح والطرف الثانى ينقل وجهة نظره وليس وقائع او وقائع مع تحليله لها فاين وجهة نظرك انت

وكما تعرف تماما هذه بلدنا ولابد العوده اليها فى وقت ما فابدأ فى اتخاذ اجراءات العودة حتى لاتصطدم بالعودة حتى لاتعود مطرودا او مقهورا او مريضا او محمولا

اسف على الاطاله و عذرى انى كنت اشرح الوضع لنفسى

[hussaindoit]

للأستاذ / afreet

لا أعلم كيف اشكرك على مجهودك واطالتك المفيده وخصوصا في الجزء الأول الشديد القرب مني من حيث أسباب التردد في النزول

لا أعرف فعلا كيف اشكرك على ردك المفيد وبالطبع اشكر كل من شارك برأيه - وانا من ناحيتي ادعو لكم جميعا بأن يحقق كل منكم هدفه

[قاهرى]

الاستاذ/afret بجد كلمك مظبوط جدا جدا جدا وشكرا جزيلا على كل كلمة منك حيث لا اجد كلام اقولو بعد كلامك لانك عملت تغطية شاملة لكل ما يدور فى راس المغتربين المصرين . ربنا معانا كلنا بجد :blush2:

[رمضان]

افضل حل لك اخي الكريم انك تنزل اجازة طويلة وتعايش الواقع بنفسك

وافضل شخص ممكن يفيدك في القرار ده هو انت لان كل انسان اعلم بظروفه وكل واحد طبيب نفسه

[MOOOM]

أشكر اولاً السيد حسين على فتحه لهذا الموضوع ..

وكذلك كل من قام بالرد عليه .. لأن هذا السؤال يدور ببالي منذ فترة طويلة .. وكنت أيضاً محتار كثيراً لاتخاذ قرار فيه ..

لكن بعد المشورة وأخذ رأي الأهل والأصدقاء الثقات .. بدأت أتخذ القرار خطوة خطوة .. ولكن الشيء الذي جعلني أفصل في هذا الموضوع .. هوه صلاه الاستخارة .. وهي أهم وأجمل شيء ممكن الإنسان يعمله .. لأنه لا يوجد من هو أعلم من الله سبحانة وتعالى بغوائب الأمور .

بالنسبة لي في بداية السفر .. كان الهدف الأساسي بالنسبة لي بسيط جداًجداً .. وبعد تحقق الهدف ولد هدف جديد وبعديه ولد هدف أجدد .. وهكذا .. وكل ما يتحقق هدف .. يتولد حلم وهدف آخر .. فلو مشي الإنسان وراء أحلامة وأهدافه .. يبقى عمرو مهيستقر في بلده ..

ولما الواحد بيسمع من المقيمين في مصر عن الأوضاع السيئة .. يصرف نظر تماما عن الاستقرار .. بس لما ينزل في الشارع ومثل ما قال الأخ السابق .. ويشوف السيارات الفارهة ولا يطلع على المقطم ولا اي من المدن الجديدة او حتى القديمة ويشوف العماير ولا الفلل .. هيعرف إن الوضع مش سيء أوي مثل مبنسمع من الآخرين ..

وأيضاً نقطة مهمة نخليها في بالنا وأكيد كل الأخوة المغتربين عارفينها .. وهي .. كل مازادت المدة في السفر .. كل ما قل الارتباط بالوطن .. وأيضاً تقل معارفه وصداقاته وعلاقاته .. وهي شيء مهم جداً جداً جداً ودي من الحاجات إلي أنا شخصياً حطيتها في اعتباري لما أتخذت القرار .. نص أصدقائي تقريباً معدش ليا علاقة بيهم بسبب السفر والانشغال الشديد وقت لما بنزل إجازة .. فقلت ألحق على الأقل النص الباقي

المهم وأهم شيء تعمله أخي العزيز .. هو أن تصلي ركعتين استخارة لله . وشوف هوه هيوجهك لفين وهيكتبلك إيه

[hussaindoit]

جزاكم الله خير - ويسعدني تشريفكم جميعا لموضوعي

[abo_sameer]

موضوع جميل داعب مشاعري .

14 سنه في الغربه يا راجل معقول كدا يا استاذ حسين .

طب انا الي صار في الغربه مش هقول ..؟؟؟؟؟.يعني مواليد الكويت . وبين الكويت وابو ظبي واخيرا استقر الحال بالسعوديــه

صدقني كانت ايامي في مصـر سنوات قليله جدا نا هيك عن الاجازات . فقط كانت 3 سنوات لما تركنا الكويت وسافر والدي الي اميركا . فقط ثلاث سنوات وكنت لسا ما رحتش المدرسه .

من حسن حظي كنت هنا الرياض وكان نصيبي مع احد قريباتي. والحمد لله واصلت اكملت تعلمي وديني

وكل يوم احاول افكر ارجع لمصــر بصراحـه وعذرا على الكلام دا . اكون حاسس اننا هكون غريب في وطني

موقف مولم حصل لي :_

ف الجوزارا السعوديه بمطار الرياض هناك كاونتر للمواطنين ومواطني دول التعاول ..

في مصـــر وعند الجوزات بوابه الدخول الاولي ..على الاقل حسسونا باننا اولادك يا مصر . فين كاونتر المصريين ..؟؟

كل ما افكر بالنزول لمصـر اطرد الفكره من بالي لاننا مش عارف اعمل ايه هناك .. كيف هيكون وضعي . اشتغل ولا لا اعمل بزنس ولا مش هقدر . اعرف اتعامل مع رجال الحكومه ولا مش هقدر ... اسئله كثيره . اجد نفسي غير قادر على الرد عليها . فاطردها . واقول الحمد لله انا عايش هنا ومبسوط والحياه هنا كويسه وما فيش اي مضايقات .

وقفه مع تعليق الاستاذ عفريت فقط لامس الجرح

ثانيا قضاؤه اغلب العام بالخارج وتخصيص مبلغ كبير للاجازه السنوية القصيره والذى عادة ينفق ضعف ماخصصه

والله هذه المصاريف عشان نعوض اللي فقدانه . . .وربك يفرجها . ماهي دي ضريبه الغربه . .

الف شكر على الموضوع ولف شكر للاخوه على مداخلاتهم ..

[شينكاوي]

يا عم ابو حسين الله يعينك ويصبرك ان شاء الله .

طبعا انا لي 3 سنين وكرهت اليوم اللي فكرت فيه اسافر مع اني حققت جزء بسيط من احلامي وحسنت وضعي المادي ولله الحمد ولكن لا احس اني ادمي الا في بلدي مصر صحيح احنا بنتعامل معاملة سيئة في كل حتة في مصر لكن هي دي مصر واحنا بنحبها كدة ونحب نغير بعض من سلوكياتنا الخاطئة بس برده لو لم تتغير هنفضل نحبها .

عندي لك مجموعة حلول :-

الاول : لو زوجة حضرتك في مصر احضرها الي البلد اللي انت موجود فيه .

الثاني : حاول تتعرف علي حد مصري يكون للك صاحب يخفف عنك

التالت : اذا للك حد من اصحابك هنا مع زوجته حاول تعملوا زيارات عائلية اسبوعية لكسر الملل .

الرابع : ان لم يكن لديك كل البدائل التلاته انصحك كل شهرين تنزلك 5 او 6 ايام لتجديد النشاط في مصر

الخامس: انزل اجازة دلوقتي وشوف الغلاء اللي حصل بمصر هتاحد بدلتك في اسنانك علي المطار علشان تعرف تعيش انت واولادك.

واخيرا هل قدرنا نحن المصريون ان نشتت في اصقاع الارض كغرباء.

منهم لله اللي كانوا السبب

الله يكون في عونا جميعا

[ahmedarab]

,الله كلام جميل يا استاذ شينكاوى

فعلا الواحد بالرغم من كل المشاكل اللى فى مصر الا ان الواحد مش بيحس انة بنى ادم الا لما بيكون هناك

وعموما الغلاء فى مصر دة عرض مستمر ..الواحد بس عشان برة لما بيرجع بيقارن بالاسعار اللى كان عارفها قبل ما يسافر اخر مرة.

وانا من وجة نظرى ان المصـــرى مش من النوع اللى ممكن يتاقلم مع الغربة بسهولة زى جنسيات تانية كتير تلاقية لسة جالى من كام شهر ..وخلاص ناوى يستقر ويجيب العيلة ويقولك انا مش راجع بلدى تانى ....المصرى غير كدة خالص .

كلمة اخيرة : منهــــــــــــــــــــــــــــــــــــــــــــم لله :rolleyes:

[المكافح]

بصراحة يا جماعة القرار دة بيبقى صعب جدا لعدم وضوح الرؤيا فى بلدنا واحنا بعيد عنها لكن اللى عاوز اقولة ان الواحد مش المفروض يحسبها كدة لأن الارزاق على الله وكل واحد لة رزق فى مكان لازم هايوصلة بكل تأكيد ولازم الواحد يعمل اللى علية يعنى لو خلاص الحال ضاقت بالواحد ومش قادر يكمل فى الغربة زيى انا كدة دلوقتى رغم عدم اكتمالى خمس سنوات فى الغربة لكن بحاول انى اشوف وابحث عن عمل فى مصر يحفظ لى الحد المعقول من الحياة العادية لكل المصريين وهاتوكل على الله فوراً ودون تفكير لأنى لو فكرت بنفس طريقة تفكير المصريين اللى فى الخارج او على الاقل اللى الواحد بيقابلهم فى البلد اللى انا فية مش هانزل مصر نهائيا لانى بصراحة مش عارف اعيش برة مصر تقولولى مصر فيها وفيها هى بلدى وماليش غيرها واللى يكون يكون

[MZohairy]

أصعب غربه هي غربة الانسان في وطنه و غربة الإنسان عن القرش