حكايات عن الأراضي و العقارات

[se_ Elsyed]

ما حدث معي في إجازتي الأخيرة حيث أنني عُدت منذ ثلاثة ايام قد قلب رأسي رأساً على عقب .. يعني دلوقت ممكن تلاقيني لابس النضارة على بؤي وحاطط سماعة التليفون على عيني وبدل ما أروح للحلاق أقص شعري ممكن أحود على محل البيتزا عشان ياخد لي دقني .

فلإنني مهتم بموضوع العقارات والأراضي كهواية يعني مش متاجرة ولا حاجه .. فلحد وقت قريب يمكن فبراير من هذا العام يعني ما فيش 6 شهور .. كنت تلاقيني حافظ أسعار الشقق والأراضي في معظم مناطق محافظة القاهرة وبعون الله وأنا مغمض كنت أعرف الشمبانزي بيخبي إبنه فين .. وده لوجودي في مدينة من المدن الجديدة وكمان لإختلاطي بتجار عقارات وأراضي ومن عاشر القوم بقى

نرجع للشهر اللي قضيته في مصر واللي خلاني فعلاً على وشك الجنون مما حدث يعتبر في أيام أو أسابيع قليلة بمصر وجعلني أشفق على شباب المستقبل أو من هم مُقدمون على الزواج ويبحثون عن عشة حتى يتاووا فيها

المهم عشان ندخل في الموضوع على طول وبالأرقام المُحدده إنتو أحكموا هل هذا جنون ام شيء عادي ؟ ..

الأول عايز اشرح الفرق بين كلمة طفرة في الأسعار وبين كلمة جنون الأسعار

الطفرة ممكن نقول عليه مثلاً إن في قطعة أرض كانت سعرها 100 ج للمتر مثلاً .. وبعدين في أخبار قالت إن المرافق هاتوصلها وإن المترو هايعدي قريب منها فسعرها أرتفع وبقى 150 ج أو 200 جنيه ده عادي وحقها ولا مش حقها ؟

لكن الجنون بقى لما ألاقي نفس قطعة الأرض بقى المتر فيها بـ 1000ج في خلال فترة لا تتجاوز بضعة أسابيع بدون أسباب واضحه ...

هاتكلم دلوقت عن حالات واقعية وأنا عارف دلوقت أختي الكبيرة بنت الشاطيء هاتفنجل عنيها عشان الموضوع يهمها .. أما اخونا الباشا المصري فهايقوم مكسر شاشة الكمبيوتر ويدعي ويقول " اللهي يسد نفسك يا سين سين ياللي سببت لي حالات التهاب نفساوي حاد "

- محسوبكم متواجد في مدينة العبور منذ 20 شهر تقريباً ( شهر مش سنة ) يعني نقدر نقول إبن أول أمبارح هناك ... وقبل ما اشتري سألت 100 مره على أسعار الأراضي سواء فيلات أو عماير او حتى شقق جاهزة اللي هي منتشرة وبتتباع نص تشطيب وكانت تقريباً كالتالي :

- سعر المتر في أراضي الفيلات كان بيبدأ من 200 ج إلى 300 ج للقطعة المميزة ولو تفتكروا كلامي قلت قبل كده إن المضاربة أو الإستثمار في أراضي المُدن الجديدة حتى ذلك الوقت لم يكن ذو عائد مُغري .. يعني اللي كان بيبيع بهذا السعر في ذلك الوقت كان بقى له 5 أو 10 سنين شاري الأرض بـ 180 ج مثلاً فبعد 10 سنين لما يكسب 60 % في الأرض .. ده كلام فاضي وما تستاهلش ركنة الفلوس طوال هذه المُدة ...... الجنون هنا بقى إن في الأسابيع الماضية الاخيرة نفس الأرض في نفس الموقع وصل سعرها 1200 ج للمتر ...!!!!!!!!!!! تخيلوا سعر أرض يتضاعف 6 مرات في شهور قليلة جداً .. وإذا لقيتها كمان .... ولو تفتكروا برضوا إني كنت في مصر لمدة اسبوع في فبراير ولقيت واحد تاجر حديد تسليح أعرفه عارض فيلا دورين في الحي السادس ومشطبها كمان عالمفتاح وهي كانت مباني على 250 إلى 300 متر وباقي الأرض حديقة .. على كام يابا الحاج ؟ 750 ألف جنيه والراجل كان بانيها لنفسه ولأولاده ولكن العيال ما رضيوش يسيبوا مدينة نصر فالراجل أضطر يبيعها بدل ما هي مقفولة .. على نفس السعر .. وطبعاً زمان ولاده حجروا عليه لإن السعر ده ما يسيويش دلوقت الأرض وهي فاضية وأقل سعر ممكن كانت تجيبه دلوقت هو 3.5 أرنب مقفول وتبقى لُقطه كمان ...

- سعر متر الشقق وبتسهيلات في الدفع ومبخره هدية كمان كانوا بيبخروا بها الشقق عشان تتباع كان بيصل من 900 إلى 1200 للمتر في الشقة النص تشطيب دلوقت بتسمع كلمة 2000 ج للمتر أو نص مليون لشقة 200 متر وإنت زي الباشا .

- سعر متر أراضي العماير بقى .. ده دلوقت الحُب كله واللعب على أصولة واللي خلق طبقة جديدة من أثرياء الحرب في مصر وأنا شوفت بعيني الأجازة دي بعد أقاربي ومعارفي ممن فازوا بأراضي القرعة في العام الماضي وهما معديين وعملوا مبالغ محترمة لمجرد إنهم فازوا بقطعة أرض كانوا دافعين مقدمة لها تبلغ 13 ألف جنيه فقط من ثمن الأرض الإجمالي ولما فاز بقطعة تبلغ 600 متر مثلاً .. باعوها لتاجر أراضي وهم كُثر وبيجروا وراك بالشموار وده بحوالي 250 ألف جنيه فوق اللي هو دافعه أو كما يقولون بالمصطلح اللي منتشر الأن OVER اللي دفعه ... لأ وكمان إيه .. ده اللي عمل كده إنضحك عليه وباع في الأول بأستعجال .. إنما لو كان صبر أسابيع قليلة بس .. كان أخد في إيده 600 ألف وهو مستريح يعني 1000 ج over في المتر والبيع بيتم بتوكيل بالشهر العقاري وبعيد عن الجهاز ومشي حالك يابو اشرف وسلم لي عالمغربي اللي مطلع قرار مالي صفحة جرنان بيقول فيه ممنوع بيع أراضي القرعة بأي شكل من الأشكال أو إنه معطي مهلة لمن وقعت عليهم القُرعة 9 شهور لإستخراج التراخيص وسنة أساسات وهيكل مبنى خرساني وسنة أخرى للتشطيب ... وولا حاجه من دي بتتنفذ والناس دي عامله قوانين لنفسها وسلامات يا حكومة .

نطلع شوية من العبور وناخد ميكروباظ للنزهة الجديدة وهاكمل على مدينة نصر وأدخل أريح شوية وأضرب لي طبق كشري عند كشري التحرير وبعدين أستعين بالله وأخد مواصلة تاني للتجمع ..

فاصل ونواصل

[MOOOM]

السلام عليكم

أولاً حمد الله على السلامة يا سي السيد .. ونورت المنتدى تاني

بس شكلك راجع من الإجازة دي منحرف شوية ومعتش ملتزم بدخول المنتدى يومياً .. ياريت متحرمناش من كتاباتك الرائعة

وأقترح عليك عمل مذكرات .. وأنا هتكفل بطباعتها .. طبعاً مش لله فلله .. دي علشان يبقالي جميلة عليك طبعاً ..

المهم .. ألف حمد الله على السلامة ونورت المنتدى تاني

وياريت تتحفنا بالأخبار عن الأراضي في مصر لأني قربت أنزل إجازة .. وشكلي كدة هلغي السفر أو أأجله ليوم 35/14/2010

لغاية لما استلم الجمعية إلي عاملها ويكون فيه شوية فلوس أروح آخد كام سنتيمتر في العبور أو أكتوبر .. ولو مكفتش .. يبقى هطلع توشكى وأمري لله .. او أسمع كلام صاحبي إلي بيقول ليا تعالى خد أرض في السودان لأن الأرض بسعر التراب .. مهي أصلاً تراب صح .. بس بيقولوا خصبة جداً جداً جداً لدرجة لو حطيت فيها صباع عيل صغير .. ممكن بعد كام شهر ترجع تلاقيه نبت راجل

المهم .. بلاش أطول

بس ياريت ياسي السيد تبشرنا بأخبار أراضي الحزام الأخضر في 6 أكتوبر - وصل سعرها كام - لو كان عندك فكرة وأيضاً مزارع عرابي في العبور وصلت كام - وأيهما أفضل [ مزارع عرابي بالعبور ولا الحزام الأخضر بأكتوبر ] لأن فيه واحد صاحبي قاعد يلعب في دماغي في الموضوع ده - وبقوله ياابني انت عبيط تروح تشتري بالأسعار دي - قاللي - هوه شرط في عقد الشراء إني أكون عبيط .. يبقى ممكن أكتب الأرض باسم واحد جاري

ومعلش لو طلب أخير ورخم .. وشكلك هتقضي الليلة ترد على أسئلتي .. ده لو عبرتني أصلاً ..

فين التوسعات الشمالية بتاعة 6 أكتوبر دي - هيا جنب الحزام الأخضر ولا بعيد عنها ؟

و.. ولا كفاية كدة

وألف شكر مقدماً على الرد

[se_ Elsyed]

بس ياريت ياسي السيد تبشرنا بأخبار أراضي الحزام الأخضر في 6 أكتوبر - وصل سعرها كام - لو كان عندك فكرة وأيضاً مزارع عرابي في العبور وصلت كام - وأيهما أفضل [ مزارع عرابي بالعبور ولا الحزام الأخضر بأكتوبر ] لأن فيه واحد صاحبي قاعد يلعب في دماغي في الموضوع ده - وبقوله ياابني انت عبيط تروح تشتري بالأسعار دي - قاللي - هوه شرط في عقد الشراء إني أكون عبيط .. يبقى ممكن أكتب الأرض باسم واحد جاري

ومعلش لو طلب أخير ورخم .. وشكلك هتقضي الليلة ترد على أسئلتي .. ده لو عبرتني أصلاً ..

فين التوسعات الشمالية بتاعة 6 أكتوبر دي - هيا جنب الحزام الأخضر ولا بعيد عنها ؟

و.. ولا كفاية كدة

وألف شكر مقدماً على الرد

الله يسلمك يا موووم

حقيقة لا أعرف الأسعار عن 6 أكتوبر لإنها بعيد عني جداص وخارج دائرة إهتمامي اللهم إلا إني بازورها من حين لأخر فقط ..

مزارع عرابي ما حاولتش أقرب حتى من السور بتاعها لإني عارف إنهم بيتكملوا في ملايين ؟؟؟ لكن المرة دي أخدت جولة كده ومشيت بالعربية بعد العبور متجهاً إلى الشروق ثم العاشر من رمضان ولفت نظري إن بعد الشروق بحاجات بسيطة في أربع قُرى سكنية على اليسار وقبل المركز الطبي العالمي تُمسى قرية الطلائع 1 و 2 و 3 و4 .. وحاجه كده زي الكمبوند وقصور ومزارع تُحفه .. فلت علي الطلائع لأدخل أسأل عن الأسعار ... وياريتني ما سألت يا موومو يابني ... القُرى دي طلعت ملك لجهاز المخابرات ... ما تتخضش يا رأفت أنما جايلك في الكلام .. ومتباعه كلها للأفراد عادي يعني ... وقطعة الأرض فيها عبارة عن 9 فدان لوكشه واحده .. مسموح لك تبني على فدان يعني بالصلاتو عالنبي تبني لك فيلا أو قصر على 4200 متر والثمان فدادين الباقيين تزرعهم .. زيتون فقط نظراً لطبيعة التُربة ولقلة المياة طبعاً .... من الاخر يعني التسع فدادين رمله صفرا دول داخل القرية سعرهم أرنب ونص ... وعلينا الرملة وعليك التعمير ... طب إنت راجل عندك مزرعة أرانب وربنا فاتحها عليك .. يبقى ممكن تشتري حاجه من الحاجات المعروضة للبيع وجاهزة ومزروعة وقصر منيف مبني وكل ده بيبدأ من 3 أرانب ونص ..... هـــــ نقرا الفاتحة واجهز الورق على ماتروح تجهز الأرانب ؟

------------------

نسيت أقول إن الأرض بتاعت القُرعة المتر فيها بـ 300 ج لكنها مُغريه للمشتري لإن اللي بيستلم الأرض بيدفع 10 % من قيمتها فقط وبيقعد 3 سنين فترة سماح ما بيدفعش مليم وبعد كده بيدفع الت 90 % على 7 سنين أقساط .

طبعاً موومو وقف الميكروباظ وأنا ماشي وعطلنا وياريته أشترى حتى قابل طوب ...

كانت عاجبني - ومازلت بصراحة - منطقة النزهة الجديدة .. لها ستايل خاص كده وهادية وبتفكرني بالمعادي زمان وتحس إنها مقفولة على نفسها يعني ما تلاقيش عربيات أو اتويسات بتلغوص في قلب المنطقة والطرق كلها من بره بالإضافة إلى إنها قريبة من المطار ومن الكلية الحربية والناس اللي ساكنين فيها ستايل برضوا ..

نزلت سألت من سنتين لقيت متر بيتباع بـ 2000 ج حد أقصى وده الحاجه الشيك قوي .. دلوقت طبعاً كل سنة وإنت طيب بتتكلم عن 3500 وإنت طالع ده لو لقيت .

فاصل و نواصل

[بنت الشاطئ1]

السلام عليكم

اهلا بك يا سى السيد وحمدا لله على سلامتك

انا فعلا الموضوع من اسمه شدنى ..مع انى عارفة ومتوقعة ايه اللى مكتوب

لكن مفيش فايدة لازم اقرأ واعقد نفسى..

ان شاء الله تفرج

ياريت يا جماعة حد يقولنا اسعار الشقق ايه فى الاسماعيليه مثلا

مش لازم القاهرة ديه

[hooba]

:)

[hooba]

يعني يا جماعة الواحد يعمل ايييه ؟؟!!!

يشتري و يلحق نفسه لو معاه فلوس و لا يستني الاسعار تستقر و ممكن تنزل .....بس بتهيئلي عمر الاراضي و العقار ينزل ابدا .....

لنا الله .............

[se_ Elsyed]

أختي العزيزة بنت الشاطيء ... كنت عارف إنك هاتزعلي .. لكن نعمل إيه هي دي الحقيقة المُره

هوبا العزيز

تعالى كده وبالورقه والقلم نحسبها ونرجع لأيام طفولتنا ... هاتلي مثال على مر التاريخ أرض إنخفضت قيمتها أو شقة كان ثمنها 100 ألف مثلاً وفجاة أتخسف بها الأرض وبقت بنص الثمن

أنا قرأت بعض الأراء لصديقي العزيز المهندس عصام أبو الفتوح زميل المحاورات القديم اللي شايف من وجهة نظرة إن الإرتفاع لن يستمر وبالتالي الواحد يتريث في الشراء ..

وانا هنا أختلف معه

فعلاً مستحيل الإرتفاع يستمر إلى ما لا نهاية

لكن في نفس الوقت .. يا فرحتي بإستقرار الأسعار عند معدلات عاليه يعجز الواحد إنه يعدي من جنب العمارة اللي عايز يشتري فيها

يعني من سنتين بالظبط لم أكن أسمع أو أرى متر شقة بـ 3000 ج ... أنا هنا بأتكلم عن متوسطات وأسعار عامة ... ممكن كنا نلاقي شقة عالنيل مترها بيعدي 10 آلاف .. لكن مرة أخرى أنا باتكلم عن مستوانا إحنا ولنكن المغتربين او لنكن شخص في مصر عايز شقة تمليك محترمة ليست فاخرة قوي ولا في منطقة شعبية قوي...

لكن دلوقت وبعد تلك القفزات التي حدثت بقت كلمة مليون في شقة 250 متر أو 3 آلاف متر بتتقال زي سلامو عليكم كده

للي دايسين القاهرة وعارفين شوارعها ومعاملها المشهورة هاحيكلو دلوقت عن أمثلة مازالت قائمة وممكن النهاردة أي حد يروح يسأل :

1- ستاتنا الفاضلات عارفين إنها عشان تدور على ملابس محجبات بتبقى حاجه صعبة وبتقعد تلف وتدور على محل تجيب منه ملابس شيك ومحتشمة ... فانا قريب من السلام شوبنج سنتر اللي في ميدان الإسماعيلية ... المهم نزلت أنا وام العيال وقلنا نضرب لها كام طقم وإدفع يا سين سين مانت طول عمرك بتدفع ... فبحاستي العقارية كنت عمال أشمشم على أي عماير بتتبني أو شقق للبيع في المنطقة - غلاسه وحب إستطلاع كده يعني - فلقيت على الجهة المقابلة مباشرة عمارة تحت الإنشاء بينها وبين المحل ييجي 20 متر ... العمارة 11 دور والدور 4 شقق والشقة 275 متر يعني مساحة محترمة قوي قوي وتقترب من مساحة فيلا ... سألت يا سادة يا كرام لقيت العمارة متباعه كلها وما فيش غير الدور الـ 10 والـ 11 فقط وبعض الشقق كمان مش كلها ... بالصلاتو عالحبيب المتر بـ 3 آلاف يعني بتتكلم حضرتك في 825 ألف جنيه ... تدفع النص ويعملو معاك واجب ويقسط لك الباقي على سنة أو سنة ونص يعني بتتكلم في حوالي 30 ألف جنيه قسط شهري .

2- طب خلصنا السلام شوبنج سنتر طلعنا شمال على شارع المحكمة وفي هناك محل ملابس مشهور برضوا إسمه " كابيللو كابيللو " لقيت عمارة بعده بشارعين وشيك قوي وشارع هادي ... برضوا 11 دور بس الدور شقتين مساحة الشقة 240 متر والسعر من غير فصال 900 ألف يعني قول مليون برضوا تدفع النص كاش والباقي على سنة .

3- نسيبي أخد شقة حوالي 120 متر لقطه بصراحة العام الماضي في ميدان تريومف جنب مؤمن بتاع الاكل ويادوب بقى له 10 شهور واخدها بـ 175 ألف كاش دلوقت محطوط له فيها 250 ألف ومش راضي يبيع .. ولأني نزلت أجازة قبله فقلت وأنا هناك أخد المفتاح واروح أطمئن على الشقة فقابلت البواب وقالي إن الشقة اللي جنب نسيبي على طول بتتباع فقلت أتفرج عليها وهي تزيد 20 متر في المساحة يعني نقول 140 أو 150 متر يعني غرفتين نوم وتراس كبير وحمامين ومطبخ ورسيبشن حلو ... أخينا صاحب الشقة طالب نص أرنب مقفول .... يا نهار مش فايت يا جدعان على الجنون .. طبعاً ما رضتش أمد إيدي عليه .

والله يا جماعة بأبص من البلكونة لقيت عمارة بتتبني قدامه على طول في تريومف برضوا روحت معدي على الناس .. بكام يابا بتبيعو ؟ .. فقالي الشقة 250 متر بأرنب مقفول والتسليم بعد سنة

كتاكيتو بُني والعملية في النملية ...

مش بأقولكو جنون

الغريب بقى إن لو اللي بيعرض مجنون فكنا ممكن نقوله إشرب الشقق اللي عندك .. إنما تلاقي ناس معاها فلوس بالهبل ونازلين شرا وتروح العمارة من دول ما تلاقيش إلا شقة واحده أو إتنين من ضمن 40 او 50 شقة هما اللي فاضيين ... فده شيء مُحير وبيجعل العارضين اشد شراسة في المغالاة في الأسعار .

- ماشي مروح وكنت في شارع النزهة وتحديداً قبل سيتي ستارز لقيت 3 عماير بتتبني ... واحده إسمها برج مينا على اليمين وانت رايح طريق النصر .. دي ان شاء الله المتر ما بين 3800 إلى 4000 ج حسب موقع الشقة من الشارع العم

عمارة أخرى إسمها برج الفيروز في نزلة كوبري النزهة وملاصقة للبنك العربي الأفريقي برضوا المتر بـ 3200 ج

يا نهار زي بعضه .... مبن طفا النور ... وبرضوا نس الأرقام الخزعبلية إدفع النص والنص على سنة او 18 شهر بالكتير

واحده تاني بعدهم بشوية المهندس اللي في الموقع يقولي بكل برود إن صاحب العمارة هايخلص بنى الاول وبعدين يبيع براحته لما الأسعار تكون ولعت طبعاً ويهبر الهبرة الكبيرة ...

حتى يا ربي المنطقة اللي خلف مدارس المنهل في مصطفى النحاس وكان أصحاب العماير بيجروا ورا الواحد بالمشوار عشان يبيعوا ولسه يادوب من سنة وكان المتر بـ 1100 إلى 1500 بالكتير قوي ... دلوقت برضوا بيتكلموا في 2000 ج ده لو لقيت حاجه مناسبة

أنا زهقت ورايح ادور على لقمه أكلها

[yasser6666]

عزيزي الاخ سيد..

ياتري عندك فكرة عن الاسعار بمدينة الاسكندرية والا دي بعيدة عن نشاطك العقاري

بصراحة القاهرة انا بمر عليها مرور الكرام اثناء السفر للمطار فقط

ولكن اريد الاستفسار عن اخر تطورات الاسعار في الاسكندرية

وهل اصابهم الجنون برضه والا نلحق نعمل حاجة قبل انتقال العدوي الي الاسكندرانية

وشكرا مقدما

[بنت الشاطئ1]

3- نسيبي أخد شقة حوالي 120 متر لقطه بصراحة العام الماضي في ميدان تريومف جنب مؤمن بتاع الاكل ويادوب بقى له 10 شهور واخدها بـ 175 ألف كاش دلوقت محطوط له فيها 250 ألف ومش راضي يبيع .. ولأني نزلت أجازة قبله فقلت وأنا هناك أخد المفتاح واروح أطمئن على الشقة فقابلت البواب وقالي إن الشقة اللي جنب نسيبي على طول بتتباع فقلت أتفرج عليها وهي تزيد 20 متر في المساحة يعني نقول 140 أو 150 متر يعني غرفتين نوم وتراس كبير وحمامين ومطبخ ورسيبشن حلو ... أخينا صاحب الشقة طالب نص أرنب مقفول .... يا نهار مش فايت يا جدعان على الجنون .. طبعاً ما رضتش أمد إيدي عليه .

الشقة ديه رخيصة جدا بالنسبة للأسعار الأخرى

طيب ما توصيه يشوف لنا شقة جنبه

ميدان التريومف فين بقى ..معلش بدأت الاسئلة الكتيرة

انا الحاجة اللى اعرفها فى القاهرة هى مصر الجديدة قولى تبعد كام ساعة من مصر الجديدة وانا هفهم

[se_ Elsyed]

عزيزي الاخ سيد..

ياتري عندك فكرة عن الاسعار بمدينة الاسكندرية والا دي بعيدة عن نشاطك العقاري

بصراحة القاهرة انا بمر عليها مرور الكرام اثناء السفر للمطار فقط

ولكن اريد الاستفسار عن اخر تطورات الاسعار في الاسكندرية

وهل اصابهم الجنون برضه والا نلحق نعمل حاجة قبل انتقال العدوي الي الاسكندرانية

وشكرا مقدما

للأسف يا ياسر كل علاقتي بالإسكندرية هي المصيف وأستئجار الشقق المفروشة عشان أقضي اليومين هناك .... بس أسكندرية مازالت في مصر .. وفي مصر مواد البناء تضاعفت بما يوازي 3 مرات خلال أقل من 4 أعوام .. وبالتالي اللي بيبني عمارة ماهوش عبيط وزي ما بيشتري غالي هايبيع غالي وبمكسب كبير ... وحتى اللي عنده حاجه مبنيه قبل الزيادة ولو هو حتى مش متعلم فبالتأكيد السوق بيعلمه مبدأ إقتصادي هامإسمه " تكلفة الفرصة البديلة " .

ميدان التريومف فين بقى ..معلش بدأت الاسئلة الكتيرة

انا الحاجة اللى اعرفها فى القاهرة هى مصر الجديدة قولى تبعد كام ساعة من مصر الجديدة وانا هفهم

ميدان تريومف في قلب مصر الجديدة يا بنت الشاطيء ...

وبالنسبة لسعر الشقة فهو رخيص جداً جداً ..وده بيبقى توفيق من عند ربنا وزي ما قلت لك لُقط ويا تلحقي يا ما تلحقيش ... وهو لم يكن له يد في ذلك ... لإن الموضوع بدأ عندما كان معي وكنا نجلس مع المحامي الخاص بي وهو صديق وجار لي برضوا ... فالكلام جاب بعضه وقال لنا إن أمامه شقة لُقطه للبيع في مصر الجديدة وما كدبناش خبر في ساعتها روحنا إتفرجنا عليها وخلصنا فيها على طول .. وهي لقطه لإن العمارة كانت مبنيه من حوالي 10 سنوات وصاحبها كان واخد قرض من البنك وباع الشقق وما سددش فالبنك حجز على العمارة واللي أشتروا لما شافوا المشاكل دي ما باقوش يسددوا أقساط الشقة .. فراح البنك عامل إتحاد مُلاك ومعين سكرتير مسئول عن التنيسق مع اللي أشتروا عشان يطمنهم ... فأبتدوا الناس يسددوا لكن بعد ما طلع عينهم فناس كتير ما صدقت خلصت أقساط وكانوا أتعقدوا خلاص من العمارة وكتير منهم لم يسكن في الشقة وباعها على طول .. فقمنا بإلتقاط شقه من هؤلاء ..

لكن بُصي أنا كاتب إيه فوق " تكلفة الفرصة البديلة " يعني جار اللي احنا أشترينا منه عمل ناصح وعايز يبيع الـ 150 متر على 500 ألف يعني على 3300 للمتر ... وللأسف هايلاقي اللي يشتري .

بالمناسبة برضوا . لمست على أرض الواقع إستفحال العرب في شراء العقارات .... على سبيل المثال العراقيين نزلوا 6 أكتوبر دمروها ورفعوا الأسعار بطريقة مش معقولة لإنهم بيشتروا بأسعار فلكية والناس فرحانه وبتبيع وبتكسب وبالتالي ما حدش عبيط هايكون معروض له في شقة من واحد مصري 300 ألف مثلاً .. وييجي واحد عراقي هابش فلوس النفط مقابل الغذاء أو كان شغال مع الرتزقة الأمريكان ويعرض مليون وصاحب العقار يقوم عامل فيها سعد زغلول ويقول لأ إبن بلدي أولى . .... بالمناسبة مجمعين بعض كام ألف واحد عراقي ومقدمين طلب للحكومة لتأسيس مسجد شيعي بـ 6 اكتوبر وهما يتكفلوا بالمصروفات من الألف إلى الياء .. وطبعاً الحكومة رفضت .. فالمشرحة مش ناقصه قُتلى ..

- قاعد مع واحد صاحبي شغال في بنك القاهرة .. فبيقولي إن زميلة في العمل عنده شقة في الرحاب وأخدها رخيصة أول ما أتبنت يعني نقول حد أقصى 200 ألف ... وإحنا عارفين إن اللي بياخد في مُدن زي دي بيبقى عنده شقة وإتنين وممكن يكون واخدها إستثمار أو لأولاده في المستقبل ... المهم عرضها للبيع فجه حظه في واحد عراقي .. فصاحبنا قال أما أضرب في العلالي على اساس لو فاصل معايا أبقى أنا لسه كسبان برضوا أكتر من 100 % .. فقاله بالصلاتو عالنبي أنا عايز أبيع 550 ألف ... والراج لم يكدب خبر ولم ينطق بكلمة .. ووافق ودفع له الفلوس عداص ونقداً ..في ذهول صاحبنا التاني صاحب الشقة .. وصديقي بيقولي بقى ماشي في البنك عامل زي سليمان نجيب في فيلم الأنسة حنفي لما كان طول الفيلم عمال يخرف ويقول " آه لو كنت خدت الوصل " وبقى عمال يقول " ماكنتش قلت له مليون وكان هايدفع ؟ "

نيجي بقى على بقيت العرب وخصوصاً أهل الخليج .... فدول نزلوا السنة ده على منطقة جاردن سيتي والزمالك وهاتك يا شرا ... وبعد ما كان متر الشقة الفخم بيتباع لحد الصيف اللي فات بـ 3000 ج ... أصبح هذا العام وبكل سهولة بـ 6000 ج ومازال بالنسبه لهم رخيص على أساس جمال وتميز المنطقة اللي كانت سكن الأستقراط والطبقة المميزة في الماضي ومزالت تحتفظ ببعض هذا التميز .

ولا عزاء لأصحاب البلد .

[بنت الشاطئ1]

وايه بقى اللى يخلى كل العالم ديه تسيب بلدها وتيجى تشترى فى مصر ايه الميزه يعنى..احنا كدا المتضررين

[se_ Elsyed]

وايه بقى اللى يخلى كل العالم ديه تسيب بلدها وتيجى تشترى فى مصر ايه الميزه يعنى..احنا كدا المتضررين

لإن أسعار العقارات رخيصة جداً في مصر مقارنة بأسعار بلدهم .. كما أن مصر من أكثر الدول إستقراراً وأماناً في المنطقة وهما كده كده بيروحوا مصر على طول فبدل بهدلة الفنادق فبيشتري له شقة تمليك وممكن كمان يستثمرها كمشروع يدر عليه عائد .

[عصام أبوالفتح]

حمدالله على السلامة يا س س ..

نفسى أخدك بالبوكس بدل الحضن على الاخبار المنيلة دى .. زودت اكتئابى يا شيخ

بس ولو ... مش شارى

على فكرة الشقق فى العجمى باسعار المبانى ويمكن اقل .. ياترى ليه زى مدينة الاشباح ؟

العجمى من فوق صورة مصغرة من القاهرة الكبرى

من سنتين قعدت احذر اصحابى من فقاعة البورصة وبعدين قولت يعنى كل الناس دى اغيياء وانت يا فكيك اللى ذكى .. وبعدين عملت اغبى حركة عملتها فى حياتى .. دخلت وقولت اكسب شوية واطلع .. ومتطلعتش الا بخسارة 83 الف ريال :)

فاللى اتلسع من البورصة ... ينفخ فى العماير .

مش شارى يعنى مش شارى

[se_ Elsyed]

الله يسلمك يا عصام .. والنبي يابني مانا ناقص أبكاس - جمع بوكس - أنا راجع وارم لوحدي من اللي شفته

الشقق في العجمي والهانوفيل والبطاش رخيصة يا عصام لإن لها طبيعة خاصة ... يعني مقارنة بقلب الإسكندرية أبو قير وسيدي بشر وميامي والمنتزة والمعمورة فتعتبر هوووووو .. ويادوب المصيفين بيروحوا هناك في شهرين تلاته في السنة وما فيش كورنيش ولا خدمات زي قلب الإسكندرية .. يعني إنزل كده مثلاً ميامي أو أبو قير ولو في الشتا وشوف الجو والحركة عامله هناك إزاي ؟ أما حتى لو كنت في عز الصيف وروحت الهانوفيل مثلاً تحس إن إنت لوحدك ....

فالمسألة برضو عرض وطلب ... وماحدش بيتهافت قوي على المناطق دي فعشان كده أسعار الشقق رخيصة

[محمد عبدالعزيز]

لسه من كام يوم كنت فى فرح واحد صاحبى وكنا قاعدين أنا ومجموعة أصحابى تانيين منهم اللى جاى أجازة من السعودية ومنهم اللى مستقر فى مصر.

المهم الجماعة بتوع السعودية كانوا بيدوروا على شقق وعرفت منهم إن سعر المتر فى سموحة بيوصل ل 4000 جنيه وطبعاً الأسعار فى مناطق زى ميامى وسيدى بشر تقريباً فى نفس الحدود دى

يعنى اسكندرية بقت تقريباً زى القاهرة

[عصام أبوالفتح]

الشقة مش ارض ومبانى جميلة .. الشقة قبل كده طريق كويس يوصلها وخدمات جنبها ومرافق حالتها جيدة ...

قولى المنطقة اللى فى القاهرة ينطبق عليها هذا الكلام .. رغم ان دى اسباب انهيار اسعار العجمى .. مش عشان عرض وطلب ولا التصييف .. لا فى الاول حالة طرق زفت وبنية اساسية متهالكة وده منطبق على كل حتة فى القاهرة ..

طب دانت نفسك لما لفيت مغوطتش فى القاهرة يعنى انت اخدت الربع اللى على الشمال الشرقى من حدود القاهرة وده الحركة سهلة فيه .. ولم تأخذ فى نفس اللفة طريق المحور وتنزل غرب لأنك مش هاتعرف او هاتضطر تبات هناك .

مش كده برضو

بينما عندنا فى الرياض فى وقت الذروة تقدر تقطعها من شمالها لجنوبها ومن كذا طريق فى توقيت معقول وميطرش عليك اليوم فى مشوار واحد .. ده مقياس الطرق

اما البنية الاساسية فهى لا تحتاج لكلام .. واللى بيتابع اخبار المياه الملوثة وانقطاع الكهرباء وطفحان المجارى فى كل حتة وفوضى السفلتة واحنا فى القرن 21 هايقدر يحدد حجم المأزق اللى واقعة فيه القاهرة

الباشا سخر كل امكانات البلد فى اوائل الثمانينات لانشاء بنية اساسية .. حالتها لا تختلف كثيرا عن حالته الصحية .. مستنية امر الله

المهم ان الحل فعلا فى المدن الجديدة البعيدة عن القاهرة ( بنية اساسية جديدة )

تخيل ان حسن فتحى لما طور تقنية البناء الذاتى مكنش فى باله شئ اسمه ارض .. ماهى واسعة اهى .. زانقين نفسنا ليه .. كل التكلفة فى مبانى حسن فتحى هى الطين اللبن او المحروق او الحجر .. ممكن تبنى بكذا مادة طبيعية مرطرطة فى مصر وبدون عز ولا اسمنت ولا يحزنون ... لما بافكر فى الموضوع بالاقى الموضوع خباااااااااال وليس جنون فقط وملوش تفسير منطقى فى نظرى غير اللى قولته فى موضوع تانى ..

[Tafshan]

كشفت راسى و دعيت عليك يا س md2:

ايه الاخبار اللى انت جايبها دى

يعنى ما فيش فائده .. المتر بيبدأ من 3000 جنيه .. طب و انا اعمل ايه ده الوقت .. اجيب لي كام متر اعمل بيهم بنطلون و لا اتريث :)

ده انا كنت ناوى انزل الصيف اللى جاي عشان اشترى اي حاجه .. ده انا شكلى كده مش ح ينفع اجيب زريبه حتى

غطينى و صوتى ياما

[rar]

يا سي السيد انتا بتفكرني بالتفكير السائد في أمريكا سنة 2005 و 2006... لما وصلت فقاعة العقارات لقمتها... قبل ما تفرقع و تغرق الاقتصاد الأمريكي (و العالمي عن قريب)...

لي واحد صاحبي اشتري بيته في 2001 ب 450 ألف دولار... جاله عروض أوائل 2006 ب 1.3 مليون (ثلاثة أضعاف)... رفضها لأنه ما كانش محتاج يبيع... النهاردة البيت ما يجيبش مليون واحد... و الأسعار بتنهار...

مش صحيح ان أسعار العقارات عمرها ما نزلت... حمايا كان عنده شقة في اسكندرية في عمارات انتراكو اللي علي البحر في ميامي... جاله فيها عرض ب 600 ألف جني لما كان الدولار ب3.3 جنيه... قالك الشقق عمرها ما بترخص... باعها من أربع سنين ب 320 ألف جنيه لما كان الدولار بخمسة جنيه و شوية (أيام أزمة السيولة بتاعت الحكومة)... العقارات زي أي سوق تاني... بتطلع و تنزل... و بعد ما نخصم معدل التضخم... نعرف هي فعلا كسبت ولا خسرت...

الفقاعة اللي في مصر دلوقت هي نفس الفقاعة اللي في العالم كله... سببها خفض معدل الفائدة علي الدولار ل1% لما كان جورج بوش عايز يطلع البلد من الكساد... عشان يكيد العزال... و لأن القسط الشهري هنا في أمريكا هو كل اللي يهم المشتري... فأسعار البيوت طرقعت في السما... و بدأت حمي البيوت... كان فيه ناس بتشتري لمجرد انهم خايفين ان السنة الجاية السعر يطلع و ما يبقوش قادرين يشتروا حاجة خالص... ناس تانية بتشتري كاستثمار... ناس تالتة كانت بتشتري فوق حاجتها لمجرد انها قادرة تاخد قرض من البنك...

قوم ايه بقي... البنك المركزي خاف من ارتفاع معدل التضخم نتيجة القروض المهولة دي (فلوس من الهوا... مجرد وعود من غير أموال تسندها)... راح رافع سعر الفايدة... قوم سوق العقارات انهار!! و هيفضل ينهار كدة لغاية ما سعر العقارات يبقي مقارن بال"أساسيات" اللي هي متوسط معدل الدخول... و متوسط معدل الايجارات... هو ده الأساس اللي المفروض تحسب بيه... فوق كدة يبقي فقاعة... لو دخلتها بدري يبقي كنت مستثمر جرئ و هتعمل فلوس... لو دخلتها متأخر تبقي تاجر خايب و هيتخرب بيتك...

نفس القصة في مصر... ليه الهجوم علي الأراضي و حمي العقارات اللي في مصر... أسباب كتيرة... وفرة السيولة عند المستثمر الأجنبي(قروض)... هروب الأغنياء من العراق... و بعضهم من سوريا... ارتفاع أسعار البترول و حاجة رأس المال الخليجي لتصريف الفايض... ده غير احتمالات الحرب بين امريكا و ايران... معدل تضخم مخيف بيخلي اللي معاه فلوس عايز يحولها لمنتج أو عقار يحمي نقوده من التضخم... الخ

طيب ايه يا واد يا رار ايه اللي ممكن يفرقع البالونة (اللي هتفرقع صدقني)...

1- نهاية فقاعة التسليف الأجنبية مع رفع معدلات الفايدة...

2- نهاية الصراع الأمريكي الايراني اللي ممكن يرجع أسعار البترول لأصلها...

3- نهاية كارثة العراق بطريقة ما و عودة السلام للمنطقة...

4- الحكومة تقرر فرض ضريبة عقارات 1%... ساعتها صاحبك أبو فيلا تمنها 3.5 مليون اللي واخدها استثمار... هيبيع عشان ما يدفعش 35 ألف جنيه ضريبة سنوية... و ساعتها السوق هيغرق شقق و فيلات غير مسكونة... هتخلي الأسعار تنهار بسرعة مرعبة...

5- حدوث مشاكل سياسية في عملية التوريث بتاعت حسني... تخلي رأس المال يهرب من مصر... و يدور علي بلد تانية أكثر استقرار...

يوه... حاجات كتير قوي... و ساعتها اللي دخل السوق متأخر (دلوقت مثلا) هيضيع شقي عمره... و مش هينفعه قصة العقارات عمرها ما بترخص دي... لأنها بترخص... و بتنهار كمان

أقولك علي طريقة ما تخرش المية تعرف تحسب بيها السعر الحقيقي للشقة أو الأرض... لو كل هدفك هو انك تسكن بس مش تستثمر؟

اسأل عن متوسط ايجار الشقة دي لو هتأجرها ايجار جديد...

و الايجار ده يساوي سعر الشقة الحقيقي مضروب في نسبة الفايدة علي الودايع...

يعني حسب سعر الفايدة علي الودايع... بيتغير سعر الشقة...

أكتر من كدة تبقي بتستثمر في العقارات... و ده سوق ممكن تكسب منه كتير... و ممكن تخسر فيه كتير برضه...

الحقيقة هي انك بتدفع مقابل للسكن حتي لو البيت ملكك... لأنك بتدفع أرباح تمن السكن لو كنت حاطه في البنك... يعني كدة كدة هتدفع...

اللي عايز يحافظ علي فلوسه مش لازم يستثمر في العقارات... ممكن يستثمر في البورصة هنا أو بره... ممكن يشتري دهب... ممكن يحطها في ودائع(كاش يعني)... و ممكن يشارك بيها في مشروع... و اللي مش عايز يجازف لازم يعمل كل ده في نفس الوقت... عشان لما و احدة منهم بتعلي التانية بتنزل...

امسك نفسك يا عصام... انت بتفكر صح جدا... الأسعار دي هتنهار... عاجلا أم آجلا... و ترجع لمتوسط الأجور... و قدرة الشباب علي الدفع... البالونة دي منظر بس...

و لا دايم الا وجه الله :)

http://patrick.net/housing/crash.html

تم تعديل 25 يوليو 2007 بواسطة rar

[MOOOM]

السلام عليكم ورحمة الله وبركاته

كلامك سليم أستاذ رار بس بردو ممكن الفقاعة دي تاخذ وقت شوية ليه بقة ؟؟؟ لأنك لو أخذت مثلاً منطقة مثل الشروق او العبور إلي كان المتر فيها للأرض بـ200 أو 300 جنيه ودلوقتي وصل أكثر من 1000 جنيه - ده مش لجشع صاحب الأرض .. ولا لأنه مجنون - متهيألي السبب لأن الحكومة نفسها زودت سعر الأراضي .. يعني ممكن حضرتك تشوف بنفسك القرعة الجديدة سعر المتر فيها وصل كام من الحكومة يبقى صاحب الأرض هيبعها بكام ؟؟ لو واخدها بألف - هيبعها يعني بألف وواحد جنيه ؟؟ لا طبعاً

وبردو ترقب ظهور مناطق عمرانية عالية المستوى مثل مدينتي إلي وصلت فيها الشقة إلي نصف مليون .. متخيل الشقة في الشارع إلي أمامها هتتباع فيها الشقة بكام ؟؟؟

وطبعاً من رابع المستحيلات أن مدينة مثل مدينتي أو الرحاب مثلاً إنك تشتري فيها شقة بنصف مليون وتروح تبيعها بربع مليون لأن المستثمرين أصحاب المشروع قادرين على إيجاد المشتري بالسعر الذي يحددونه هم وليس على حسب قدرة الشباب في تلك البلد - ولو ملقاش المشتري في البلد دي .. هيجبلها مشتري من بلد تاني

أنا مش معترض على كلامك لأني نفسي فعلاً الأسعار تنزل - وأعرف أشتري حتة أرض أو بيت - خاصة وأن المستفيد الأساسي من تلك الطفرة أغلبهم للأسف غير مصريين أو لو كانوا مصريين .. فهم أصلاً مستواهم المادي مرتفع أصلاً

ربنا يبارك للجميع .. بس للأسف إن الغني بيزيد غنى والفقير أو المتوسط الحال بيزيد فقر أو انعدام - واحنا الناس المسافرين الخليج - من الناس إلي رقصوا على السلم - قصدي الناس متوسطي الحال تقريباً

طبعاً الناس هتقول دلوقتي .. إيه الحقد الطبقي ده ؟؟

وبالنسبة لسعر الفائدة على الودائع وارتباطه بمستوى الإيجارات وسعر العقارات .. فمتهيألي الكلام ده المفروض يكون سليم .. بس يمكن الواقع بيقول عكس كدة .. ليه ..؟؟ أقولك ليه .. ويارب أكون فاهم صح

لأنك مثلاً لو عندك 120 ألف وحطتهم في البنك .. هيطلعوا تقريباً 1200 فائدة شهرية - والمبلغ الأساسي 120 هتفضل زي مهيا علشان تطلعلك نفس الفائدة الشهر الجاي والسنة الجاية - مع الوضع في الاعتبار إن 120 ألف بعد خمس أو عشر سنين مش هيكون ليهم فايدة ولاتعرف تعمل بيهم حاجة وأيضاً 1200 الفائدة بتوع كل شهر بردو مش هيعملوا حاجة .

لكن لو أخذت شقة بالمبلغ ده [ 120 ألف ] وقمت بتأجيرها لو بـ500 جنيه شهرياً وبزيادة معينة سنوياً .. هيكون أفيد لأن قيمة الشقة لو مازادش فأكيد مش هيقل وكذلك الإيجار

وفي الأخر ... كل سلعة بيتحدد سعرها على حسب العرض والطلب .. والعقار والذهب والأسهم كذلك .. سلع تخضع للعرض والطلب

فالمستثمر أو التاجر الشاطر هوه إلي يعرف إمتى يشتري وإمتى يبيع .. والإنسان العادي أو غير المستثمر هوه إلي يشتري بس على قدر احتياجاته

ولي رأي في الأخر .. ياريت لو أجد من يشاركني فيه ..

ياريت لو تتجه الناس شوية للاستثمار في الانتاج وليس الاستثمار في الاستهلاك .. والناس طبيعي بتدور على المكسب السهل .. يعني واحد يكون عنده بيت بمية .. يروح يبيعه بألف علشان يشتري بيت تاني بألف ويبيعه بمليون ..

قليل جداً لو سمعت عن ناس بتفكر تشتري أرض استصلاح مثلاً أو زراعية .. وتزرع وتنتج وتبيع وتصدر - أو يربو [ أعزكم الله ] بهايم أو غنم أو طيور - ويكون تفكيرة لو مثلاً المعزة بتتباع ب500 جنيه .. ليه مبعهاش أنا 400 وأبيع كمية كبيرة هيكون مكسبي أكثر وبردو ممكن أدي فرصة لحد تاني يكسب المية دي ..

معلش أنا طولت أوي في الكلام .. بس ياريت ياريت لو الناس تتجه شوية للمشاريع الانتاجية مثل ما قلت وتبعد شوية عن تثليج الشقق أو الودائع أو غيرة أو المشاريع الاستهلاكية أو الحاجات إلي بتجيب فلوس بالسهل ومن غير تعب ساعات كثيرة .. لأن هوه ده المستقبل وهوه ده إلي عمر مهيحصل فيه طفرة ولا انحدار وأيضاً مننساش إن الحاجة إلي بتيجي سهلة .. بتروح بردو سهلة وده طبعاً كلنا شايفينه في الموبايلات إلي ملهاش لازمة وتلاقي العيل وهوه في حضانة ماسك موبايل لعبة علشان السنة الجاية أبوه هيجبله موبايل حقيقي .. وحاجات تانية كثيرة ملهاش لازمة بس بنجبها وبنشتريها وبنستهلكها - وده يمكن من عدم البركة .. ولو وفرنا فلوسها أكيد هتعمل حاجات كثيرة أهم وأفيد .. وبعيد تاني .. ياريت نفكر في الانتاج .. مش الاستهلاك

معلش أنا جبت من الشرق والغرب .. وياريت محدش يشتم بس

كفاية بقة .. صوابعي وجعتني .. بس الكلام مش هيخلص

[عصام أبوالفتح]

لا فض فوك يا رار يا اخويا .. ماشاء الله عليك جبتها من اعماق الحقيقة

كلامك ممتاز جدا وبـأكد على كلامك ومتخفش مش هاشترى .. مش عبيط عشان اتلدغ تانى نفس الجحر

علم البورصة بيقولك لا تلاحق السهم فى الارتفاع .. واللى بيلعب تنس ولا بنج بونج بيعرف انه لازم يضرب الكرة وهى نازلة

وعلى فكرة انت جبت كل الاسباب اللى فى بالى وخصوصا رقم خمية .. لان المسئلة دلوقتى ترقيع ورقة التوت الاخيرة لهذا النظام ..

والسؤال البسيط هو .. النظام ليه بيسلم الارض وما تحتها وما فوقها للشعب والاجانب ؟

والاجابة الابسط .. لانه عاجز حكمياً .. والكلام ده استفاض واجاد فيه الاخ معمارجى

http://www.egyptiantalks.org/invb/index.ph...6&st=0&

امسك نفسك يا عصام... انت بتفكر صح جدا... الأسعار دي هتنهار... عاجلا أم آجلا... و ترجع لمتوسط الأجور... و قدرة الشباب علي الدفع... البالونة دي منظر بس...

اطمن .. ماسك نفسى خالص اهو .. وانا بالذات معنديش حجة عشان اشترى .. ممكن ابنى بيت من الرمل .. بس .. ومش محتاج مية عليه حتى ,, وممكن فى اى مكان فى الدنيا .. وممكن ان شالله خيمة ..

ألم تكن ارض الله واسعة ؟!!!