صفوت الشريف رئيسا للحزب الوطني ... حد يزغرد

[DARWEEN]

الجمهوريه .. 27 يوليه 2007

الإسكندرية مجدي زعتر:

أعلن صفوت الشريف الأمين العام للحزب الوطني أن المؤتمر العام التاسع للحزب المقرر عقده أوائل نوفمبر القادم سيشهد لأول مرة انتخاب رئيس الحزب وفقا للنظام الأساسي الجديد الذي أقره الحزب في المؤتمر العام الثامن عام 2002 ولم يتم تطبيقه علي مستوي الوحدات أو الأمناء أو قيادات الحزب.

جاء ذلك خلال لقاء الأمين العام للحزب أمس بأعضاء الفوج الرابع من أمانة العمال والفلاحين بحضور أمين الحزب بالإسكندرية د.محمد سعيد الدقاق. والمشرف العام علي المدينة الشبابية بشر حرب. وأمين العمال بالحزب أحمد عبدالحليم.

الرابط

http://www.algomhuria.net.eg/algomhuria/today/fpage/

[yasser6666]

الكلام ده من الأخر معناه ان جمال مبارك سيتولي حكم مصر رسميا وبالأنتخاب نوفمبر القادم

بعد انسحاب كافة المرشحين أو تزيين العملية الأنتخابية ببعض الأراجوزات للمنافسة غير الشريفة

وربما احد المرشحين سيكرر :( لو فزت سأتنازل عن فوزي لجمال مبارك) كما فعلها اراجوز أخر من قبل في انتخابات الرئاسة

....

كلام خطير فعلا وليه لأ طالما الناس في سبات عميق!!!

[الطيار المصرى]

الموضوع ده كان متوقع..........

والمشكلة ان الناس فاكرة ان ده كويس....و يفضلوا يقولوا انه الواد ده احسن من ابوه وانه متربي في بيت الرياسة وان السياسة لعبته......

وانه هيكون اول مدني يمسك الحكم يعني تجربة جديدة........و اكيد الكل سمع الكلمتين دول..........

الناس مغيبة مش نايمة..........

جمال هيكون مجرد امتداد لابوه.........

[Lembic]

دحنا حناكل ضرب يا جدعان لما البهلول الصغير يجى ... بس حاقول إيه ! إحنا اللى نستاهل!@

[الأفوكاتو]

واضح من صيغة نشر الخبر فى الأهرام اليوم أنه إعداد لمسرحية توريت جمال حكم المحروسة,

و إليكم الخبر كما نشر:

الصفحة الأولى

44062 ‏السنة 131-العدد 2007 يوليو 27 ‏13 من رجب 1428 هـ الجمعة

[

size="4"]صفوت الشريف لشباب العمال بمعسكر أبي قير‏

[

انتخابات مفتوحة لاختيار رئيس الحزب الوطني في نوفمبر

الحصول علي تأييد‏20%‏ من أعضاء المؤتمر التاسع شرط لخوض الانتخابات

الإسكندرية ـ من محمود عبدالمقصود ‏:‏

أكد السيد صفوت الشريف الأمين العام للحزب الوطني أن المؤتمر العام التاسع للحزب‏,‏ المقرر عقده في نوفمبر المقبل‏,‏ سيشهد لأول مرة انتخاب رئيس الحزب في انتخابات مفتوحة لجميع الأعضاء القادرين علي تحمل المسئولية‏,‏ بشرط الحصول علي نسبة تأييد‏20%‏ من أعضاء المؤتمر‏,‏ البالغ عددهم نحو‏5500‏ عضو‏,‏ وفقا للائحة النظام الأساسي للحزب‏,‏ التي اعتمدها المؤتمر العام في عام‏2002.‏

وأوضح أن انتخابات رئاسة الحزب ستجري بنظام الاقتراع السري‏,‏ وفي حالة حصول المرشح علي نسبة‏20%‏ دون منافس‏,‏ سيتم طرح المرشح نفسه للتصويت عليه من جانب الأعضاء‏,‏ مؤكدا أن الحزب يريد بذلك أن يعطي القدوة لجميع الأحزاب‏,‏ في ديمقراطية القرار والعمل المؤسسي للحزب‏.‏

وأضاف ـ خلال لقائه أمس مع شباب عمال الحزب بمعسكرات أبي قير بالإسكندرية ـ أن الحزب الوطني مقبل علي انتخابات جديدة‏,‏ تشمل مختلف الوحدات القاعدية والقيادية‏.‏

وقال الشريف‏:‏ إن هيئة المكتب ستنتهي الإثنين المقبل من بلورة الملامح النهائية للانتخابات‏,‏ وإن الرئيس حسني مبارك سيصدر قرارا في أول أغسطس بدعوة ناخبي الحزب للمشاركة في الانتخابات‏.‏

بداية الصفحة

تم تعديل 27 يوليو 2007 بواسطة الأفوكاتو

[عصام أبوالفتح]

اكرر ... حزب للمغتربين وتمثيل نيابى لابناء مصر فى الخارج هو الحل للمهزلة دى

[se_ Elsyed]

داروين ... انت جبت منين ان اونكل سفوت هو اللي هايبقى رئيس الحزب الوطني ؟

اتفق مع الزملاء الاعزاء ... قطار التوريث سائر وماحدش هايقدر يوقفه - الا ما شاء الله وربنا ينفخ في صورة الشعب المصري اللي مسافر من زمان ومش موجود - وحتى في انتخابات 2011 - ده لو الراجل الكبير ما رحلش قبلها - الحزب الوطني هايفوز باكتساح .. ببساطة لانه هو الحزب الوحيد اللي بتنطبق عليه شروط الترشيح وحتى الحزبين تلاته اللي ممكن يخلوهم ينزلوا ويعملوا منظر هايبوا اراجوزات لا تسمن ولا تغني من جوع

[ناصر الملك و الملكية]

إن لم يكن جمال , فمن هو البديل ؟

جمال ليس فرد واحد , جمال يمثل القوات المسلحة و عصابة الوطنى الديموقراطى و البرطمان المصرى

فمن يحاربه يحارب كل هؤلاء , فمن هو ذلك الفرد أو الحزب أو الجماعة أو اياً كان الذى يستطيع محاربة كل

هؤلاء و إنتزاع الحكم منهم ؟

[se_ Elsyed]

إن لم يكن جمال , فمن هو البديل ؟

جمال ليس فرد واحد , جمال يمثل القوات المسلحة و عصابة الوطنى الديموقراطى و البرطمان المصرى

فمن يحاربه يحارب كل هؤلاء , فمن هو ذلك الفرد أو الحزب أو الجماعة أو اياً كان الذى يستطيع محاربة كل

هؤلاء و إنتزاع الحكم منهم ؟

إزيك يا ناصر ؟

البديل هو الـ 75 مليون مصري اللي موجودين ..

يا عزيزي مصر مليانه رجاله ... وسيبك بقى من اللي بيعمله الحزب الوطني من الخفس بكرامة اي شخصية محترمة تظهر على السطح أمثال عمرو موسى أو أحمد زويل أو أو أو ... فده المقصود منه هو حشو دماغتنا بإن مبارك وإبنه هما بس اللي يستطيعوا حكم مصر والباقي كُخ وما ينفعوش حتى يحكم ماتش كوره ...

مع إن في دول العالم كلها ممكن تلاقي الرئيس ده كان بدء حياته نجار مُسلح ومع ذلك ولإنه راجل كويس في الإدارة فإيه المانع إنه يحكم بلد وإيه مانع إنه يكون كومبارس يعني حتى مش ممثل درجه أولى ويحكم إمبراطورية تحكم العالم زي رونالد ريجان ؟

بالمناسبة ... حتى الأن لا يستطيع أي مصري أن يحكم عن موقف قوة مؤثرة صامتة - حتى الأن - تجاه مستقبل البلد ألا وهي " الجيش " وما حدش يستهر بالفكرة ... فإذا كان مبارك طاوي حسين طنطاوي تحت جناحه والاخير راضي وماشي جنب الحيط ... فلا نعرف بكل تأكيد موقف الجيش من قبول فكرة أن يكون قائده الأعلى .. ما دخلش الجيش ولا شافه فيديو حتى ؟

إنت مش واخد بالك إن الرئيس حسب مواد الدستور هو القائد الأعلى للقوات المُسلحه ... فإزاي جيمي هايحصل على اللقب ده وإزاي قيادات الجيش هايتقبلوها ويسكتوا ؟

إذا ماكانش كلنا نتحرك ونغير الوضع .. فقول على البلد يا رحمن يا رحيم ...

فبعد ما مبارك قالك إما نعمل شو ديمقراطي ونفوت شوية إنتخابات بقليل من التزوير - القليل ده من وجهة نظر مبارك والحزب الحاكم يعني حاجه كده بتاع 90 % تزوير بس - بصوا لقوا العملية قلبت بغم وواحد زي أيمن نور وبالمستريح حصل على نص مليون صوت في الإنتخابات مع إن إمكانياته المادية والإعلامية لا تتعدى إمكانيات مرشح لمجلس الشعب عن دائرة كفر البلاص ومع ذلك أصبح له مؤيدين في كل محافظات مصر . ويادوب يا عيني مبارك ما فاقش من الصدمة إلا وطلع له عفريت العلبة المُسمى بالإخوان المسلمين اللي نازعوه على 125 مقعد من مقاعد البرلمان وبعد السلح والتعذيب والتزوير والتطبيخ - جايه من طبيخ - قدروا يفوزوا بـ 88 مقعد يعني بنسبة نجاح تُقدر بـ 70 % ... تخيل ؟

في حين الحزب الوطني وبملياراته اللي من فلوسنا ودمنا .. وبألته الإعلامية الجُهنمية وبإتغلاله جميع مراف الدولة من أل مواسبر المجاري لحد أجهزة اللابتوب اللي بالألاف اللي حطنها في مراكز طبخ الإنتخابات .. تخيل يفوزوا بـ 30 % فقط ومع ذلك بإضافة مزيج من الغش والتدليس مع قليل من التهليس والضحك على الدقون يصبحوا هما حزب الأغلبية ويحكموا البلد !!!!!!!

فبعد ده كله الراجل فاق ورجع لعقله وقالك دول شعب ما يستاهلش لا ديمقراطية ولا حتى ملوخيه .. وأصبحوا يمضون قُدماً في تنفيذ مخطط التوريث على الطريقة المصرية

وحيث إن كل شيخ وله طريقة .. يعني سوريا مثلاً صبحو الصبح لقوا بشار راكب ومدلدل رجليه وهو كده واللي مش عاجبه يشرب من البحر ..

في مصر بقى ما ينفعش .. لإن لسه باقي عندنا شوية دم .. فالتوريث بيتم بشياكه .. وعالبارد ... وكله حلمي نظمي فهمي رسمي شرعي .... يعني نظبط جيمي ونركبه حصان الحزب الوطني وده شأن داخلي بالحزب وماحدش له دعوه .. تيجي إنتجابات الرئاسة سنة 2011 وأبوه يكون عنده 83 سنة يعني دفعته راحوا من زمان ... نعمل إنتخابات نزيهة كريمة عفيفة شريفة أم الخلول - أهي كلها أسامي حريم - يفوز جيمي بإكتساح تحت شعار الدماء الشابة الجديدة وتحقيق قفزة نوعية بتولي شخص مدني حكم مصر ... وتوته توته وخلصت الحدوته والشعب المصري نايم ومستغطي وكل سنة وإحنا طيبين ... وتعالوا بقى نتكلم عن شكل مصر إيه سنة 2050 وازاي ساعتها نخلع جيمي ذو الثمانين خريفاً من كرسي الحُكم قبل ان يورثه لإبنه سوكومونس جمال مبارك .

[محمد عبدالعزيز]

إن لم يكن جمال , فمن هو البديل ؟

جمال ليس فرد واحد , جمال يمثل القوات المسلحة و عصابة الوطنى الديموقراطى و البرطمان المصرى

فمن يحاربه يحارب كل هؤلاء , فمن هو ذلك الفرد أو الحزب أو الجماعة أو اياً كان الذى يستطيع محاربة كل

هؤلاء و إنتزاع الحكم منهم ؟

بالمناسبة ... حتى الأن لا يستطيع أي مصري أن يحكم عن موقف قوة مؤثرة صامتة - حتى الأن - تجاه مستقبل البلد ألا وهي " الجيش " وما حدش يستهر بالفكرة ... فإذا كان مبارك طاوي حسين طنطاوي تحت جناحه والاخير راضي وماشي جنب الحيط ... فلا نعرف بكل تأكيد موقف الجيش من قبول فكرة أن يكون قائده الأعلى .. ما دخلش الجيش ولا شافه فيديو حتى ؟

إنت مش واخد بالك إن الرئيس حسب مواد الدستور هو القائد الأعلى للقوات المُسلحه ... فإزاي جيمي هايحصل على اللقب ده وإزاي قيادات الجيش هايتقبلوها ويسكتوا ؟

بمناسبة الحديث عن الجيش, قرأت مقالاً للمستشار طارق البشرى على ما أعتقد كان يتحدث فيه عن براعة وعبقرية مبارك فى الاستبداد

وكان ماجعل الرجل يصف بمبارك بالعبقرية فى الاستبداد هو تعديل القوانين المنظمة لقواعد الترقى فى الداخلية ومن بعدها الجيش بحيث لا يتم ترقى أى ضابط لرتبة عقيد فما فوق إلا بموافقة شخصيه منه على هذه الترقية وقد كانت فى السابق لا تنطبق إلا على عميد فما فوق, وكان تفسير المستشار طارق البشرى لضم رتبة العقيد إلى هذه الفئة هو أن معظم من قامواً بالثورات والانقلابات العسكرية على مستوى العالم كانوا فى هذه الرتبة!!!

بصراحة أعجبنى الأسلوب العلمى الذى اتبعه الرئيس مبارك فى الاستبداد حيث أنه درس الأمر بعناية ولعله قام ببعض الأبحاث العلمية والإحصائيات التى جعلته يأخذ هذا القرار المصيرى الهام والمؤثر فى مسيرة الحركة التوريثية الكبرى التى ينوى القيام بها لصالح المصر والمنطقة العربية بأسرها. ولعل الرئيس مبارك حصل على درجة الدكتوراه فى فلسفة الاستبداد بعد هذا البحث العلمى العظيم.

[MOOOM]

السلام عليكم ورحمة الله وبركاته

باختصار شديد جداً جداً جداً

فيه إشاعة أو يمكن أخبار عن تعديل وزاري قادم في مصر

يارب وياريت وأرجوكم أن كل واحد يقرأ هذا الخبر أو يكون سمع عنه أن يدعو أن يتممه الله .. وأنا تصبح حقيقة وليست إشاعة ..

ياريت لو الناس تجتمع وتصلي مثل صلاة الاستسقاء طلباً لنزول المطر .. يمكن ده بردو يكون سبب لنزول الخير على مصر

نصلي وندعلي في الصلاة وجااااااااااايز ربنا يستجيب ويكرمنا بوزراء أو وزيرات ليسو رجال أعمال وأن يكون تفكيرهم في الشعب مش هنقول أكثر من تفكيرهم في مصالحهم .. لا يكون على الأصل واخد 10% بس من تفكيرهم يااااااااريت

[الطيار المصرى]

بالنسبة لحكاية القائد الاعلي للقوات المسلحة.......مش بعيد جمال يدخل الجيش ست اشهر واهو يتقال عليه عسكري......

بحيث ان مصر ماتخرجش عن منظومة "الرياسة للجيش"..........و بذلك لن يستطيع طنطاوي انه يبق مع مبارك او جيمي....

مش فكرة حلوة و النبي

[ناصر الملك و الملكية]

هذا الكلام خطير فعلاً , لأن لو الجيش ممكن يرفض مبارك و يقوم جزء منه بحركة تهدف إلى خلع جمال - فى حال قفذه على الكرسى - فهذا يعنى مصر قد يهددها

خطر حرب أهلية فى المستقبل القريب , بين الحزب الوطنى برياسة جمال و المتمردين بقيادة اللواء أ.ح ؟؟؟؟؟ و حرب أهلية يعنى خراب و دمار نفس ما حدث فى 1882

عندما أشتعلت الحرب بين الخديو و عرابى باشا و أستغل الإنجليز هذه الحرب و دخلوها إلى جانب الخديو و أختلو مصر لمدة 72 عام بس دلوقتى مفيش إنجليز طبعاً

فيه أمريكان و إسرائيليين !!

تم تعديل 29 يوليو 2007 بواسطة ناصر الملك و الملكية

[se_ Elsyed]

بالنسبة لحكاية القائد الاعلي للقوات المسلحة.......مش بعيد جمال يدخل الجيش ست اشهر واهو يتقال عليه عسكري......

بحيث ان مصر ماتخرجش عن منظومة "الرياسة للجيش"..........و بذلك لن يستطيع طنطاوي انه يبق مع مبارك او جيمي....

مش فكرة حلوة و النبي

فكره حلوه بس على شرط .. يعملوا وحدات خاصة لمن هم فوق الأربعين عاماً ..

يابا الحاج طيار جيمي داخل على الـ 45 سنة .. يعني دفعته بقوا لواءات دلوقت

----------

أما فكرة الحرب الأهلية فهي مستبعده تماماً يا ناصر .. لإن الحزب الوطني الكبير فيهم ما معاهوش إلا طبنجه 9 مللي ... يبقى مين يقدر يقف قدام الجيش ؟

بالإضافة إلى إن تاريخ أعضاء الحزب الوطني بيقول إنهم يجيدوا لعب دور الأراجوز اللي بيتنطط على كل الحبال .. يعني إتحاد إشتراكي تلاقي .. حزب وطني تلاقي ... وحتى لو الإخوان كقوة سياسية لا يستهان بها وصلوا للحكم فهانلاقي نفس أعضاء الحزب الوطني ربوا دقونهم وكل واحد راح للحداد عشان يدق له زبيبة صلاة كل ده على جلابية وعباية وعيش يابا طالما ده اللي بيأكل عيش ...

لا تتووقع إعتراض او تمرد من جانب الحزب الوطني لإنهم ليسوا أصحاب فكر ووليسوا أصحاب مبدأ ليدافعوا عنه .. بل هم جميعهم منتفعين وأصحاب مصالح وشعارهم " اللي يتجوز امي .. أقول له يا عم اللي جابوني "

[ناصر الملك و الملكية]

الحرب الأهلية لن تكون بين كل الجيش و الوطنى فقط

لأن أكيد هتلاقى ضباط و موالين لمبارك و الوطنى

يعنى الخديو توفيق لما حارب عرابى , مكنش بيحاربه بالحرس الخديوى فقط , و لكن كان فيه عدد كبير من الجيش موالى له

و عندك مثلاً فى إنقلاب يوليو , سلاح البحرية كله أعلن ولائه للملك , نفس الحكاية فى حرب اليمن التى شاركت فيها مصر

ضباط موالين للإمام و ضباط موالين للثوار و كلهم يمنيين قي الأخر , هذا هو حال أى بلد

[kokowawa1979]

أنا حاسس إن احنا بننفخ في قربة مقطوعة - جمال مش مستني انتخابات أو غيره - ماهو الحاكم الفعلي الآن للبلد - بعيد عن مقابلات رئيس أوزبكستات - وتركمنستان - وأميتاب باتشان - هي دي الحقيقة اللي واضحة وضوح الشمس .

وصدقوني لن يعترض أحد إذا ماتم ترشيحه رئيسا للوطنى - فهو الوريث الشرعي لمنصب والده وفقا لمبدأ التوريث السائد في مصر - ولينظر كل منكم حوله :

إبن ضابط الشرطة ضابط شرطة- وكذلك الجيش-إبن المستشار وكيل نيابة وهذه أكبر فئة فيها الفساد بالتوريث!!- ابن لاعب الكرة لاعب كرة أيضا- وكذلك بنت المذيعة- ابن أستاذ الجامعة - وأعرف صديق لي أستاذ جامعي لم تلحق ابنته بقطاع كليات الطب على نصف درجة فحول اتجاهها إلى الزراعة وأصبحت معيدة !!!!!!

وهكذا كل المناصب أصبحت تورث للأبناء فهنيئا لجمال المنصب الكبير - ويجعله عامر !!!!!!

[Tafshan]

حرب اهليه

يا جماعه الموضوع ابسط من البساطه .. اي صراع بيبقى صراع من اجل مصالح .. تعالوا ندور مين الفرق اللى بيدوروا على المصالح ؟؟؟

الجيش : من ساعة ما مشى ابو غزاله و ماحدش في الجيش بيحب الوزير بالعكس الرجل اللى موجود مكروه جداً .. و بعدين تنقلات سريعه و تقاعد مبكر و المصانع الحربيه مشغوله في صنع الغسالات ... ما فيش 4 عساكر في الجيش يقدروا يكرروا حالة الضباط الاحرار لانهم برضوا ماعندهومش "مصالح" مشتركه ..

اما عن ولاء الجيش فهو بصفه فرديه الى الحزب الوطنى ... ازاي ؟؟ ح اقولك .. كل رؤساء الاحياء و رؤساء الاجهزه من الضباط المتقاعدين ... و طبعاً الثقه دى مش ببلاش .. يعنى ولاء الجيش بيبقى للحزب عشان ينالوا الرضا السامى ... مش لوزير كلهم بيكرهوه ..

رجال الاعمال : كلهم (الكبار منهم ) في الحزب الوطنى و بالتالى من مصلحتهم ان يبقى الوضع على ما هو عليه .. و الحوافز هى الوعود البرلمانيه حيث الحصانه السحريه التى تحمى رؤوس اموالهم من الجياع و الحاقدين (احنا )

الشرطه : حادث الامن المركزى في الثمانينات اثبت ان الشرطه مصدر خطوره .. فاتبعت السياسات الحاكمه نفس الطريقه المتبعه مع الجيش .. برضوا معاشات مبكره + وزير مكروه + ضغط مادى متمثل في الغاء الجمعيات اللى كانوا بيأخذوا عن طريقها عقارات و اراضى و الاكتفاء بالمرتب الغير كافى .. فانشغلوا في البحث عن لقمة العيش عن طريق استغلال النفوذ مما ادى الى تقوقعهم الذى بدوره يمنع اي حالة تمرد في المستقبل ..

الشعب : احنا طبعاً مش في دماغ حد كبيرنا نكتب في المنتديات ..

السيناريو المرسوم على ما اعتقد هو ترسيم جمال رئيس للحزب بعد انتخابات داخليه نزيهه داخل الحزب ... ثم يتم تعيين وزاره من المقربين لجمال تستغل وفرة السيوله (محصلة الخصخصه ) لتصنع حالة انتعاشه وهميه متمثله في رصف بعض الطرق و اصلاح عدة عواميد نور و زرع الورد على الجانبين و الى آخر مظاهر الضحك على الذقون ... شويه شويه و يتنسي جمال كرئيس للحزب و يصبح امر واقع .. و لما تحصل الانتخابات .. ح يقولوا امريكا اللى هى امريكا بوش الابن رشح نفسه ... هى يعنى جت على جمال ؟؟

[الطيار المصرى]

انا اتفق مع الاخ كوكوواوا ان جمال يحكم مصر فعليا من ايام ما مسك امين سياسات.........

لكن هيبقي في كلام تاني بعد انتخابات الحزب اللي جاية .............و هنشوف الامور هتتجه لفين......

هل الجيش هيسكت علي ان القائد الاعلي يكون مدني ؟او انه هيبقي ليه رأي تاني؟

[se_ Elsyed]

هل الجيش هيسكت علي ان القائد الاعلي يكون مدني ؟او انه هيبقي ليه رأي تاني؟

إنت كده يا طيار ياخويا بترجعنا للمربع رقم صفر .... جيش ايه اللي منتظرينه يتكلم أو يسكت ؟

طب فرضاً المعلم فوت بريزه للجيش وشبرقهم وراحوا مبايعين إبنه و ساكتين ... يبقى هل نحن كشعب 75 مليون نوافق على ما وافق عليه الجيش ؟

مش قلت لك ... آفتنا كشعب مصري وأنا منكم أننا ننتظر السماء لتُمطر علينا ذهباً أو فضه ..... وهانفضل منتظرين كده لحد ما تمطر علينا حجارة من سجيل فتجعلنا كالعصف المأكول .. وعلى فكرة هي أبتدت تندع من ساعة ما جسوا نبضنا وباعوا البلد وإحنا لسه بنبص للسما ومستنين الذهب والفضة وهما ولا هاممهم ونازلين بيع في كل ما تقع عليه أيديهم .. واخر حاجه هايبيعوها هي هدومنا .

[الطيار المصرى]

انا متفق معاك يا سي السيد.........و الشعب حيفضل مستني.....لأن نص الشعب ده مايهموش اللي يحصل في البلد....... جه مبارك ..مشي مبارك..... جه جيمي..... ولع جيمي..

الناس دي ما بتدورش الا علي لقمة عيشها هي و عيالها

و ما يغركش كلام القهاوي......و حل المشاكل السياسية..........وكل واحد يعمل عرابي و مصطفي كامل و سعد في بعض..اول ماتقول لواحد نتحرك .......يقولك لا يا عم يفتح الله..........

احنا لو غيرنا مفهوم السلبية و التواكل ده اللي اتزرع فينا من ايام الثورة........و تقنع الناس دي انها هي اللي هتغير احوال البلد بدل ما تبص للسما .........هيبقي في امل ... "ان الله لا يغير ما بقوم حتي يغيروا ما بانفسهم"