إشاعات عن تعديل وزاري قريب .. ما هى رؤيتك ؟

[MOOOM]

السلام عليكم ورحمة الله وبركاته

باختصار شديد جداً جداً جداً

فيه إشاعة أو يمكن أخبار عن تعديل وزاري قادم في مصر

يارب وياريت وأرجوكم أن كل واحد يقرأ هذا الخبر أو يكون سمع عنه أن يدعو أن يتممه الله .. وأنا تصبح حقيقة وليست إشاعة ..

ياريت لو الناس تجتمع وتصلي مثل صلاة الاستسقاء طلباً لنزول المطر .. يمكن ده بردو يكون سبب لنزول الخير على مصر

نصلي وندعلي في الصلاة وجااااااااااايز ربنا يستجيب ويكرمنا بوزراء أو وزيرات ليسو رجال أعمال وأن يكون تفكيرهم في الشعب مش هنقول أكثر من تفكيرهم في مصالحهم .. لا يكون على الأصل واخد 10% بس من تفكيرهم يااااااااريت

[الطيار المصرى]

انا ادعو معاك يا اخ موم ان يكون هذا الخبر صحيحا.........وان يأتي من يراعي الله في عمله و في شعب مصر.........لا من يتشدق بالالفاظ و العبارات و الوعود التي بهتت من استخدامها المتكرر..

[mesryforever]

وأنا معاكم

أدعوا الله أن يولي علينا من يصلح

اللهم آمين اللهم آمين اللهم آمين

[se_ Elsyed]

ليس تشاؤماً على قدر ما هو قراءة للأحداث ...

مبارك لم يعُد له درو في تشكيل الوزارة ويادوب عنده 3 أو 4 حقائب بيتصرف فيهم وهي الدفاع والخارجية والداخلية

أما باقي الحقائب فيقوم بتوزيعها جمال مبارك ...

وبالتالي لا أمل في الإصلاح طالما رؤوس الفساد لسه موجوده ...

والوزراء إن هي أسماء يسموها ومافيش حد بينفذ حاجه من دماغه وكله توجيه يا إما من لجنة السياسات برئاسة الأخ جيمي .. يا إما من الراجل الكبير..

لكن ندعو الله أن يخلصنا مننهم جميعاً وياتي بمن هو أفضل

بس تصدقوا بالله

أنا مكسوف قوي من ربنا وأنا بأدعيه وفي نفس الوقت تمر امام عيني الأية التي تقول " إن الله لا يُغير ما بقومٍ حتى يُغيروا ما بأنفسهم "

وإذا كانت صلاة الأستسقاء الغرض منها طلب نزول المطر من الله كنعمه من نعمه .. فالتغيير السياسي لابد أن يأتي منا نحن أولاً وبعد ذلك نسأل الله التوفيق أما غير ذلك فيسمى تواكل وإتكاليه والجلوس تحت ظلال الزيزفون حتى يأتي الفرج ..

[Tafshan]

طيب ..

نركز في الدعوه و نقولها زي ما بتحصل :

يا رب حسنى مبارك يجيب لنا وزراء مش فاسدين بيخافوا على البلد و يصلحوها ..

ينفع نقول كده برضو ؟؟

يا جماعه الوزراء حسب الدستور معينين من قبل الرئيس اللى هو اساساً راكب رغماً عنا و ما فيش اي مصلحه تخليه يصلح اي حاجه ... يبقى ح يجيب وزراء كويسين ليه ؟؟

ممكن تدعوا ربنا يأخذ الراس الكبيره .. بس في الحاله دى الى ح يورثنا هو ابنه .. يبقى العيب فين ؟؟

العيب فينا يا حضرات ...

كل الناس زعلت من تعديل الدستور اللى خلى قانون الطوارئ احد بنود الدستور ..و محدش جاب سيرة تفرد رئيس الجمهوريه بحسب الدستور بالحكم كأنها عزبه موروثه عن والده ... كلنا مسكنا في البردعه و سيبنا ال ...ما علينا

[MOOOM]

يا جماعة .. أنا بقول ندعي إنه ييجي وزراء كويسين .. لأني عارف إنه مفيش أمل في إزاحة الغمة الكبرى إلا من الله سبحانة وتعالى .. ولا شيء يعظم على الله سبحانة وتعالى ..

ولو دعينا بكدة وربنا استجاب .. مهو فيه وريثه مستر جيمي .. يبقى ندعي على العيلة من جذورها .. ندعي وجايز ربنا يستجيب .. لأن الدعاء هوه أضعف الإيمان .. واحنا فعلاً ضعاف .. ولا نملك غير الدعاء .. فياريت يكون الدعاء بإخلاص

أنا مش عارف .. ماسك فيها بإيده وسنانه ليه .. مستني إيه تاني .. هيلحق يصرف المليارات دي إمتى .. حتى أحفاده .. هيلحقوا يصرفوا التلال دي إمتى ..

مفكرش في مرة إنه هيسأل عن كل إنسان أو كل بهيمة لم يوفر لها المأكل أو المشرب وإنه فيه يوم ولا هينفعه فيه جمال ولا نظيف ولا حتى العدلي ؟؟؟؟؟؟؟

يارتني جيت في زمن غير الزمن .. وربنا يستر من إلي جاي

الله يحرقهم جميعاً ومن على شاكلتهم

[د. السيد عمر سليم]

مع احترامى لآراء الجميع فإنه لا يعلوا صوت على صوت سى السيد.

هو ده الكلام وأى شيء آخر هو تضييع وقت.

ألف مليون تحية لسى السيد :rolleyes: :blink:

[tahereyad]

نعم الرأي ما قاله سي السيد,,, فعلا قال فأوجز "الوزراء ان هي أسماء يسمونها" لكن أنا عندي فكره ممكن متعجبكوش,, بس برضه أنا هاقولها, أهو احنا بدردش مع بعض.

مدام كده كده مبارك الأب راكب علي أنفاسنا رغما عنا و مش عارفين نعمل أي حاجه, ولا مقاطعة استفتاء نافعه و لا حركه كفايه شافعه, و عندي والله احساس قوي ان جيمي بيه خلاص استلم الرايه من والده, طيب ماتيجي نعرض عليه البلد ياخدها بنظام ملكي,, اصبرو بس لما أكمل كلامي و اقول وجهة نظري,,

تعالو نحسبها,, شكلها كده هايكون فيها توريث شئنا أم أبينا,, هانعمل ايه يعني,, هو يعني كان حد عرف يتعتع الراجل العجوز من مكانه, و مدام الموضوع كده بأه يبقي نديله البلد برضانا كده و ننصبه ملك علينا, يمكن لما يطمأن ان البلد خلاص بقت بتاعته و ملك له و لعياله من بعده, يبطل تخريب فالاقتصاد و بيع في أصول البلد و محاباه للحراميه الكبار و المحتكرين اللي بيجولوا عليهم "مستثمرين", ساعتها بقه لو شاف حد بيسرق ولا بيخرب في اقتصاد البلد هايحس أنه بيسرقه هو شخصيا, و طبعا في الحاله دي مش محتاج أقول هايعمل فيه ايه...

تاني حاجه كمان لما البلد تكون بتاعته و في وشه,, يمكن يغير من البلاد التانيه اللي سبقتنا و عدتنا بمراحل كتييير, و يبتدي يصلح و يعيد بناء البلد, بس المره دي بجد (مش كلام زي اللي بيقولوه في عيد الثوره و عيد العمال, و بعدها نلاقي الخراب المستعجل جاي)

حاجه تاني كمان, يمكن لما نديله البلد كده برضانا مش غصب عننا, يشيلها عنده جميله للشعب الغلبان و يعرف اننا خلاص سلّمنا, ممكن يبص للشعب بعدها بعين الرضا, أكيد ساعتها هايظبّطنا, هايشغل الشباب, و يعلّم الأطفال بالمجان و يحسن أوضاع الناس....

يعني معلش أعذروني,, أهو الواحد برضه بيفضفض معاكو شويه..

[الطيار المصرى]

يا سيدي الفاضل ..........مبارك مش مستني حد ينصبه ملك...........و مش هيهمه الشعب سواء رضينا ام لم نرضي.........

و مش هتهمه البلد..........ان ما قاله سي السيد لهو الرأي السديد......ان لم يأتي التغيير مننا فلن يحدث تغيير.........

ثانيا الاخ مبارك اجري عملية اخلاء دم من جميع مناظق جسمه ......بعني لا هيغير علي مصلحة البلدولا الشعب.......اخره هيعمل كباري و بنية تحتية......ثالثا ما الناس عمالة تجامله و نعمله في اغاني اخترناه و بايعناه و اخترنا ابنه وياه......وهو ولا هو هنا.......

احنا نبص لنفسينا الاول و التغيير هيجي مننا .......و اضم صوتي لصوت الدكتور السيد عمر ....الف تحية لسي السيد.......

و لكني احترم رأيك تماما سيدي...وزي ما انت قلت....ادينا بندردش

[Abofady]

يعنى زعيم عصابة ، هيجيب ناس محترمة منين ؟؟ هيجيب ناس طيبة منين ؟؟ الحل الوحيد هو تغيير الراس الكبيرة والراس الصغيرة يعنى النظام ( أبوراسيين ) ، ومادام صلاة استسقاء و مطر وزحاليق يبقى يتزحلق التالى :

حسنى مبارك ، زكريا عزمى ، صفوت الشريف ، فتحى سرور ، مفيد شهاب ، الشاذلى ، الفقى ، احمد عز ، جمال مبارك .

ومن الوزراء الذين اتمنى ان يغوروا فى ستين داهية او زحليقة :

العادلى (داخلية) ، ابوالغيط (الخارجية) ، بطرس غالى (المالية)، طنطاوى (الحربية)

انظر حتى فقط الى اسمائهم تجيب الغثيان لنا .

لن ينقذ مصر الا اناس جدد لم يلوثوا بالعمل مع النظام الفاسد الحالى ، الذى ضيع البلد بماضيها وحاضرها ومستقبلها ، نريد رجل اقتصاد مثل طلعت حرب يبنى مصر من جديد ، بدلا من الذى يبنى من 25 سنة بنية اساسية ، وصحينا من النوم لنجد القرى والمدن فى بلد النيل تبحث عن شربة مياه او كوب مياه نظيف حتى ان الدول الصحراوية التى ليس فيها نيل ترسل الينا بالمياه النقية ، وابو بنية اساسية نائم يحلم بالمهلبية فى الشارم والمنتجعات السياحية .

[tahereyad]

طيب ايه رأيكم نسمع رأي العبقري ابراهيم عيسى من جريدة الدستور,, علشان بس اللي عنده ذرة أمل في اختيار وزراء كويسين بيفكروا فالشعب....... ينسي:

عناد رئيس ! بقلم الأستاذ إبراهيم عيسى

31 / 07 / 2007

بما أن الجميع يعتقد راسخاً أن حكومة جمال مبارك بقيادة أحمد نظيف هى أفشل حكومة فى عصر مبارك ، وتفوقت على حكومة المبتسم دائماً عاطف عبيد فى الفشل ، لكن حكومة عبيد - شهادة لله - تفوقت عليها فى الفساد ...

وبما أن الرأى العام " اتخنق " من هذه الوجوه التى ابتلاه بها الرئيس مبارك مستجيباً لرغبات ابنه جمال ، وبما أن الغرق والحريق والعطش والحوادث والموت ارتبطت وثبقاً بهذه الحكومة التى اختارها ورعاها ودعمها جمال مبارك فى واحد من أكبر الدلائل على أنه حيودى البلد فى ستين داهية لو تسلمها إرثاً عن والده .

وبما أن الجميع بدا منتظراً ومتلهفاً إلى أن يغور هؤلاء الفشلة من مقاعد الحكم ، وإذا كان الرئيس مبارك قضاء وقدراً على هذا البلد .

فالحكاية مش ناقصة بقى حكومة كمان تفتخر بفشلها وتعتز جداً بانفصالها عن الواقع ، وبجهلها العميق بالسياسة ..

شلة جمال مبارك باتت مكروهة كلية من الشعب المصرى ، وجمال مبارك فقد ورقة التوت التى كان يتستر بها على تطلعاته وطموحاته فى التسلق إلى حكم مصر حين انكشف منهجه فى حكم البلد بشلة من رجال الأعمال والمليونيرات الذين لا يفهمون فى السياسة وليس لهم فى الثقافة ولا علاقة لهم بالشعب المصرى .

فهم باشاوات وسوبر باشاوات تربوا ونشأوا وكبروا فى كنف القصور والثراء الفاحش والانعزال عن هموم وآلام الناس ، فكانوا خير صديق لجمال مبارك يفهمونه ويترابطون معاً فى طبقة الثروة والثراء ، لكنهم أثبتوا أنه لا يمكن لشلة من الأصدقاء المليونيرات أن يشغلوا وقت فراغهم بحكم مصر ومساعدة ومساندة صديقهم فى وراثة عرش أبيه ، بدلاً من أن يصيفوا معاً فى أسبانياً أو أن يستمتعوا بالشمس والبحر واليودعلى سطح يخوتهم فى الجونة ..

وبما أن قطاعات واسعة من الشعب المصرى تطلب التغيير فإننى أؤكد لكم أنه لن يحدث تغيير .. ليه ؟

أقولك ليه .. لأن الرئيس مبارك على مدى ستة وعشرين عاماً من حكمه أثبت :

1- أنه رئيس يعاند شعبه ، ويرفض الاستجابة للرأى العام تحت زعم أنه ما يحبش حد يلوى ذراعه حتى لو كان هذا الحد هو الشعب ( شعب إيه دا راخر ) .

2- أنه رئيس بطئ القرارات ، وكثيرة هى جداً الخسائر التى سقط فيها الوطن نتيجة بطء اتخاذ القرار والوله الرئاسى بتجميد المواقف وتثبيت الأمور تحت زعم أن هذا هو الاستقرار ، فنجح الاستقرار الفاشل فى أن يدفن مصر فى قبر الفساد والفشل نتيجة أن مبارك لا يريد تغيير الحكومات ، أو بمعنى أدق لا يريد التغيير أساساً .

3- أنه رئيس يحب أن يفاجئ الناس بقراراته ، فتأتى متأخرة وغير متوقعة وبعد يأس الناس منها ، فتكون النتيجة أنها تأتى بعد فوات الأوان وبشكل باهت ، ولا تستجيب لرغبة شعبية ولا تبعث على أمل جماهيرى .

4- أنه رئيس لا يريد أن يتصادم أو يصدم نجله لأسباب مفهومة ، ومن هنا فهو لا يستطيع رمى أصدقاء نجله ببساطة فى سلة مهملات الحكم إلا بعد أن يتأكد من أن خلفاءهم من حلفاء ابنه ويرضى عنهم النجل .. وهذا كأى قرار عائلى محل أخذ ورد وتفاهمات ووجبات عشاء ومآدب غداء ، فقد اختلطت شئون الحكم بشئون العائلة حتى بات يصعب عليك أن تفهم الفارق .. هذا إن وجد الفرق !

عناد الرئيس هو أول أسباب تأكيدىأنه لا تغيير قادماً أوقريباً .

أما شكل التغيير وحجمه فهو كلام مسل جداً لكنه لا يودى ولا يجيب ، فالجميع من نفس الكوتشينة وأوراق الكوتشينة لا تحمل أى مفاجآت حين توزعها .. المفاجأة فقط تظهر حين تلعب بها !

=============

نقلاً عن الدستور

[se_ Elsyed]

الله عليك وتسلم إيدي ياللي إسمك صعب إنت يا عسل tahereyad

إبراهيم عيسى يتحدث على نفس الخط وبنفس إسلوبنا .. ولو الدستور لها موقع على الإنترنت كنا قلنا إننا بنغش منه ... ولو هو بيدخل يقرأ مواضيعنا في المحاورات كنا قلنا ده بيغش مننا ..

لكن هذا هو تفكير كثير من أبناء الشعب المصري حتى البسطاء والغير متعلمين

إمبارح بالمناسبة كاميرة العاشرة مساءً نزلت تستطلع رأي الناس في الشارع عن مدى رضاهم عن حكومتهم بعد ما احد المؤسسات العالمية أظهرت إحصاشية وقالت إن المصريين هم أكثر شعوب العالم سخطاً على حكومتهم .. وبصراحة كان ناقص الناس تضرب المذيع اللي كان بيستطلع رأيهم من كتر الغيظ والحنق والغضب من هذه الحكومة الفاشلة .. ولا أعني هنا حكومة نظيف .. فنظيف إبن مبارك ومن قبله أيضاً كانوا تربية إيده يعني مبارك هو اللي فاشل بس ما حدش بيقدر يتكلم بالمفتشر طبعاً

طب واحد يسألني ويقولي : معقول يا كابتن سين سين المؤسسة دي لفت العالم كله وسألت الناس عن مدى رضاهم عن حكوماتهم وإحنا اللي أخدنا جائزة الريادة يعني معنى ذلك إن باقي العالم متستتين وراضيين عن حكوماتهم ؟

أقولك : لأ طبعاً في دِول في العالم حكوماتها أزبل من حكومتنا بل بالعكس إحنا بالنسبة لهم ملائكة ..

يعني لسه شايف فيلم وثُاقي عن كوريا الشمالية يخلي الواحد يقول إن مصر دي جنة الخُلد .. لكن المشكلة بتكمن في إن تلك المنظمات لا تستطيع أن تذهب إلى مثل هذه الاماكن ..

لكن امصريين أصبح لديهم هامش من الحرية - خلو بالكم من كلمة هامش دي - واللي قاهرنا وغايظنا أكتر إن البلد فيها خير بالهبل ومع ذلك مواسير الخير دي بتوصل على بيوت مسئولي ومحاسيب الحزب الوطني فقط .. أما نحن فيبقى لنا خشاش الأرض فقط .

[الطيار المصرى]

اخشي يا سي السيد ان يأتي من لا يبقي لنا خشاش الارض..........

و نظل صامتين ..........قانعين.........

[tahereyad]

ربنا يخليك لينا يا سي السيد يا أحسن مشرف فالدنيا,,, بس علي فكره أنا اسمي مش صعب ولا حاجه,,, ده بس السهل الممتنع,,,, عامة الأخت نجفه فكّت الشفره..

بالنسبه لمقالات ابراهيم عيسي انا دايما بقرأها أوّل بأوّل و موضوعات غيرها رائعه من موقع نافذة مصر: www.egyptwindow.net

و بعدين يعني ماهو ابراهيم عيسي بيكتب, و احنا فالمنتدي بنتحاور و ندردش,, و الناس فالشارع بتشتكي و تبكي بمراره, و العاشره مساء بتنزل تستطلع الآراء,, و 90 دقيقه بتصور,, غير طبعا الجزيره اللي فاضحه كل حاجه,,, بس بأه هانعمل ايه للناس "التنحه" اللي مش هاتسيب البلد اللي بعد يتأكدوا تماما أن الأرض خليت حتي من الخشاش نفسه.....

أنا عندي أمثله عالكلام الي بقوله:

من حوال سنتين تشرفت بأن أكون ضمن أكثر من 15 ألف مهندس تجمعوا في مكان واحد ليطالبوا برفع الحراسه عن نقابتهم,, تخيّل,,, 15 ألف مهندس و مهندسه يتجمّعوا في قاعة المؤتمرات من أجل أن يقولوا كلمه واحده, وأن يهتفوا بهتاف واحد,,, من أجل أن يحرروا نقابتهم من احتلال الحراسه القضائيه والتي أتت منذ 12 عام لتقتل كل نشاط و دور ايجابي للنقابه,,, طبعا اللي حصل وقتها مجرد كلام و قرارات و لجان,, لم يطبّق منها شئ, و من ساعتها قضايا و دعاوي و محاكم, والأكثر من ذلك, أن الحارس لقضائي نفسه "توفاه الله" و مازالت النقابه تحت الحراسه,,,

طيب,, حد ممكن يقوللي,,, ايه تاني اللي ممكن يتعمل؟؟؟؟

[se_ Elsyed]

طيب,, حد ممكن يقوللي,,, ايه تاني اللي ممكن يتعمل؟؟؟؟

الحل بسيط جداً ويتخلص في : ضرورة الثبات على المطالبة بالحق ... يعني ما ينفعش يكون لي حق وأقول أنا عملت اللي عليه واتكلمت مره واحده .. لكن إذا تشبثت بحقي ودافعت عنه وطالبت به بكل السبُل فأكيد هأحصل عليه غصبٍ عن التخين ... قصدي غصبٍ عن العجوز .. فمبارك مش تخين قوي .

[New]

بعد غيبة طويلة مفيش احسن من موضوع زى ده اشارك فيه..

الاخ الفاضل سى السيد كتب :

الحل بسيط جداً ويتخلص في : ضرورة الثبات على المطالبة بالحق ... يعني ما ينفعش يكون لي حق وأقول أنا عملت اللي عليه واتكلمت مره واحده .. لكن إذا تشبثت بحقي ودافعت عنه وطالبت به بكل السبُل فأكيد هأحصل عليه غصبٍ عن التخين ...

انا معاك بس تعرف لسه بدرى علينا علشان نوصل لمرحلة الثبات على المطالبة بالحق... احنا عايزين نعرف ازاى نحفز الشعب على المشاركة فى الحياة العامة واولها المشاركة السياسية..

من ضمن المواضيع المتعلقة بالكلام بتاعنا ده موضوع كتاب عودة الوعى فى باب تاريخ مصر ... بغض النظر عن الكاتب فالكتاب يستحق القراءة وخاصة الجزء الاخير . الملاحظ انه مكتوب من اكتر من 30 سنة الا اننا بنعانى من نفس اسلوب الحكم تقريبا... ملخص ما اريده من الاشارة للكتاب ان النظام الجمهورى قام بتغييب الاحزاب السياسية واختزال كل القوى السياسية فى شخص السيد رئيس الجمهورية وبس...

الان الاحزاب السياسية اضعف ما يكون والشعب فاقد الوعى تماما ولا يملك حرية اختيار من يمثله فى مجلس الشعب او الشورى فما بالك باختيار من يحكمه... بل الاسوء من هذا ان الشعب لا يستطيع محاسبة مصاصى الدماء الذين بنوا قصورهم على جثث ابناء الشعب وجمعوا ثرواتهم من دماء الشعب وعرقه..

المشكلة الان كيف يتم اعادة الوعى لهذا الشعب وكيف يتم تحفيزه ليشارك فى الحياة؟؟

[ssmaly]

السلام عليكم ورحمة الله وبركاته

باختصار شديد جداً جداً جداً

فيه إشاعة أو يمكن أخبار عن تعديل وزاري قادم في مصر

يارب وياريت وأرجوكم أن كل واحد يقرأ هذا الخبر أو يكون سمع عنه أن يدعو أن يتممه الله .. وأنا تصبح حقيقة وليست إشاعة ..

ياريت لو الناس تجتمع وتصلي مثل صلاة الاستسقاء طلباً لنزول المطر .. يمكن ده بردو يكون سبب لنزول الخير على مصر

نصلي وندعلي في الصلاة وجااااااااااايز ربنا يستجيب ويكرمنا بوزراء أو وزيرات ليسو رجال أعمال وأن يكون تفكيرهم في الشعب مش هنقول أكثر من تفكيرهم في مصالحهم .. لا يكون على الأصل واخد 10% بس من تفكيرهم يااااااااريت

ياه من سنتين واحنا بنحلم بتغير وزارى و بندعى ربنا بالتغير

واضح كل من دعى ربنا مكانش متوضى علشان لم يستجب لدعواتهم حتى الان

تم تعديل 26 مايو 2009 بواسطة ssmaly

[yasser6666]

ان الله لا يساعد من لا يساعد نفسه

ونحن لا نستحق ان يستجيب الله لدعائنا الا لو كان فينا رجل صالح لو اقسم علي الله لأستجاب له

احنا وصلنا لمرحلة خطيرة من السلبية لدرجة اننا عاوزين كل حاجة تيجي من عند ربنا بدون تدخل مننا ولكن هيهات

[Abu Reem]

مفيش خلاف أن الإنسان لابد ان يطالب بحقوقه ويتمسك بها ،

بس اسمحوا لي ، في الحالة دي ،، أنتم جميعا تقولون لازم لا نكون سلببين ونطالب بحقوقنا ونعمل إللي علينا علشان التغيير يتم

ياريت واحد يقول لي : نطالب مين بحقوقنا ،

- كيف نغير الأوضاع بانفسنا ( ياريت تقولوا لي 1- 2- 3 ) وياريت الإجابة تكون واضحة ومحددة يعني ميجيش واحد يقول نعمل إللي علينا بأننا مثلا نشوف شغلنا صح والكلام ده ، لأن الكثير منا يقوم بعمله على أكمل وجه بنسة كبيرة ، وكثير منا لا يرضى بأن يدفع رشوة لموظف مستغل ، ولكن أحيانا بيضطر لأن الشكوى إما لا يهتم بها أو حتى تجد رئيس الموظف المرتشي بيقسم معاه الرشوة.

فياريت حد من اللي بيقول لا يجب أن نكون سلبيين أن يخبرنا بالأشياء التي يجب أن نقوم بها بالتحديد وتكون في نطاق المستطاع علشان المسألة لا تظل كلام فقط نردده بنثبت به مواقف فقط لا غير .

[أحمد سيف]

مفيش خلاف أن الإنسان لابد ان يطالب بحقوقه ويتمسك بها ،

بس اسمحوا لي ، في الحالة دي ،، أنتم جميعا تقولون لازم لا نكون سلببين ونطالب بحقوقنا ونعمل إللي علينا علشان التغيير يتم

ياريت واحد يقول لي : نطالب مين بحقوقنا ،

- كيف نغير الأوضاع بانفسنا ( ياريت تقولوا لي 1- 2- 3 ) وياريت الإجابة تكون واضحة ومحددة يعني ميجيش واحد يقول نعمل إللي علينا بأننا مثلا نشوف شغلنا صح والكلام ده ، لأن الكثير منا يقوم بعمله على أكمل وجه بنسة كبيرة ، وكثير منا لا يرضى بأن يدفع رشوة لموظف مستغل ، ولكن أحيانا بيضطر لأن الشكوى إما لا يهتم بها أو حتى تجد رئيس الموظف المرتشي بيقسم معاه الرشوة.

فياريت حد من اللي بيقول لا يجب أن نكون سلبيين أن يخبرنا بالأشياء التي يجب أن نقوم بها بالتحديد وتكون في نطاق المستطاع علشان المسألة لا تظل كلام فقط نردده بنثبت به مواقف فقط لا غير .

أنا هاحكيلك تجربه حصلت معايا وبعدين هقولك فكرتي عن الحل ... قبل الانتخابات الرئاسية الأخيرة وبما أنني كنت من مؤيدي أيمن نور فقد قدمت مبلغ من المال لصالح حملته الانتخابية وحاولت إقناع أكبر عدد من زملائي في الغربة ليتبرعوا بأي مبلغ لنفس الغرض حتى لو كان بسيطا ... يعني حتى لو 100 جنيه... مع العلم أن معظمهم كان مؤيدا له في مواجهة الرئيس الحالي ... ولكن الرد كان سلبيا من الجميع ... طبعا كان كله بيشتم في الحكومة ونفسه يخلص منها لكن لم يكن أحدا منهم على استعداد للتضحية بعشاء ليلة من أجل تحقيق هذا الهدف ... عندها أيقنت أن أوان التغيير لم يأت بعد وأن جيلنا ليس هو الجيل الذي سيحققه ... وتأكدت قناعاتي بعدما رأيت مسار الأحداث بعد هذه التجربة التي كانت الأكثر طموحا والأقرب للنجاح والتي فشلت بسبب السلبية والأنامالية المستشرية في الشعب المصري.

أنا مقتنع أن الجيل القادم هو جيل التغيير ولذلك فإن همي الآكبر حاليا هو تجهيز ابنائي ليكونوا مستعدين للحظة التغيير ومشاركين بها ... وكما أقول دائما التغيير لن يحدث سوى بتوفر كتلة حرجة مقتنعة بضرورته وساعية اليه ومستعدة للتضحية من أجله وللأسف فإن هذه الكتلة لم تتكون بعد وللأسف لسنا حتى قريبين من تكوينها ... ورغبتي في تنشئة أبنائي بعيدا عن الجو العفن السائد في مصر هو أحد أسباب سعيي للاغتراب والهجرة.

للإجابة على سؤالك ، باستثناء ما ذكرته وأخذ موقف سلبي من الفساد لا يوجد ما تستطيع أن تفعله بمفردك سوى أن تربي أبناءك جيدا وتأمل فيهم خيرا. أما حكاية المطالبة بالحقوق وكشف السلبيات فمع كامل احترامي ده كلام لا بيودي ولا بيجيب ولا فارق مع النظام ... يعني زي ما بيقولوا اخوانا الشوام "طق حنك".

تم تعديل 27 مايو 2009 بواسطة أحمد سيف