التخلف في جمارك السيارت

[etihad]

الى متى هذا التخلف الى متى هذا الذل والهوان الذي يتعرض له الشعب المصري على يد حكومتة كل حكومات العالم تتفنن في تيسير سبل العيش لمواطنيها اما حكومتنا فهي تتفنن في اذلال الشعب المصري الى متى ترزية القوانين الذين يصنعون القوانين على مقاسهم حتى تصب في النهاية في جيوبهم القاهرة التي كانت تضاهي اجمل عواصم العالم ايام الإحتلال الان من اسوا بلاد العالم على الإطلاق مصر التي كانت من اكبر الدول العربية علما وتقدما اصبحت من اسوأ البلاد العربية على الإطلاق ويأتي ترتيبها بعد الصومال اي أخر الدول العربية مصر قاهرة الهكسوس والتتار والصليبين تعيش الان على ذكرى الماضي هل تعقل هذه القوانين للجمارك وغير الا يستحوا على وجوههم حتى لو نظروا الى اصغر البلدان العربية بعدهم بدأت وكيف صارت

تم تعديل 31 يوليو 2007 بواسطة se_ Elsyed

[Advisor]

حقيقة لم أفهم محتوى موضوعك إلا أنك تتهم الحكومة بالتخلف !!

هل يرجع ذلك لمجرد وجود جمارك على السيارات ؟ أم أنك كنت تتوقع دفع مبلغ جمارك أقل على سيارتك ؟

ليتك تبذل جهدا فى عرض الموضوع حتى يمكننا التواصل معك فى موضوعك ... أنا على ثقة أنه لديك الكثير لتقوله.

[زعلان]

بيقول ايه ده يا مرسي

[se_ Elsyed]

يا أخي الكريم

قمت بتعديل العنوان وحذف الكلمات القاسية التي تصف شعب باكمله بالتخلف لمجرد وجود قانون لا يعجبك ... ولاحظ إن إنت مصري برضوا معانا في نفس المركب ، فياريت لما نناقش موضوع يهمنا جميعاً .. يبقى لازم نبعد عن التشنج والصفات القبيحة التي نُعممها على الشعب بأكمله .. هذا الشعب الذي يتكون مني ومنك ومن عائلتي وعائلتك .

[etihad]

اسف على الخطأ انني كنت اتصفح موضوع محاورات المصريين بشأن الجمارك على السيارات وكنت اعرف هناك جمارك كبيرة على السيارات وخصوصا المستعملة ولم اكن اتخيل ان تكون الجمارك الى هذه الدرجة من الضخم لم اصدق نفسي ولذلك كانت رسالتي ردا على موضوع الجمارك وبالخطا وضعتها تحت موضوع جديد

[badroora]

والله يا اخى العزيز انت فتحت موضوع بالغلط بس اهو كانت فتحتة خير

انا يوم مافكرت اشترى عربية قولت هاجيبها عالزيروا عشان اكون المالك الاول واقدر انزلها مصر

وبما انى كنت بدماغى ولا عمرى سألت ولا استاشرت حد المهم اشتريت العربية

وقولت كويس انزلها مصر وتبقي بتاعتى فى مصر وابقي اجيب واحدة صغنونة مستعمل خفيف اسبورت اقضي بها ايامى هنا

وصعقت لما بدأت اتسائل

طبعا انا عربيتى 1800 سي سي

وسمعت كلام غريب وعجيب

ان اى عربية فوق ال 1600 سي سي بتكون جماركها غالية

اللى يقولى ضرايب 300% وطبعا معرفش دى تطلع كام

واللى يقولى نزليها على بور سعيد فى المنطقة الحرة وهتبقي زيروا جمارك ولا ضرايب بس هتبقي الليافته عليها بور سعيد مش الجيزة مثلا محل سكنى

واللى يقولى ان مصر اشتركت فى اتفاقية الجادو وعلى سنه 2016 الله يدينا ويديكم طولة العمر

هتبقي العربيات معليهاش جمارك ولا ضرايب

بصراحة انصدمت قولت خير لما تبقي الجمارك زيروا ابقي انزل بهامر بقي بدل الكورلا .

فعلا باحس ان بلدنا لا عاوزة الناس تعيش دايما تعجزنا وتكسر مجاديفنا وحسبي الله ونعم الوكيل

تم تعديل 31 يوليو 2007 بواسطة نجفة المغرورة

[عبده بيه]

الاخوة والاخوات اسعد الله مساؤكم

طالما فتحتم الموضوع يبقي اضطر اسف ان اسألكم ماذا يعني قانون الجمارك علي السيارات وهل موضوع الثلاث سنوات هذا مطبق بالفعل وما ذكرته الاخت نجفة عن موضوع السي سي هنا ارجوا الشرح حيث انني زيرو مكانيكة سيارات

ولكم التحية وهل فيه موانئ احسن من اخري كما ذكرت اختنا الفاضلة نجفة

تحياتي

[badroora]

هلا والله بالاخى عبده بيه

انا هاقولك على المعلومات اللى عرفتها لما فكرت انزل عربيتى مص

انا طبعا عربيتي كورولا 2005 و1800 سي سي

تمنها اللى جنبها به هنا وقتها كانت بحوالى 87 الف جنية مصري فحين ان تمنها فى مصر كان ب140 الف جنية

طبعا عربيتي انا بمواصفات خليجي واكيد احنا عارفين الفرق المهم

واحد قالى هما هيحسبولك الجمارك على التمن اللى موجود فى مصر يعنى هيحسبني على ال 140 الف مش ال87 الف

وراى اخر قالوا

ان اى عربية سعة متورها فوق ال 1600 سي سي بتبقي الجمارك بتاعتها غالية اوى فى حين ان ال 1300 سي سي وال 1600سي سي بتبقي جماركها عبارة عن 40 % من تمنها الاصلي فحين ان ال 1800 بتبقي جماركها 300 %

وان يشترط انك تكون المالك الاول للعربية

وكمان قالوا ان اى عربية جديدة بتقل نسبة الجمارك عليها بنسبة 5% على كل سنه عدت عليها

نظرا لان قيمة العربية طبعا بتقل تمنها كل سنه

موضوع بقي المنطقة الحرة فى بور سعيد

دا طبعا الطريقة اللى اتحكاتلى كانت عبارة عن تحايل وغير قانونية وعاوزة حد يكون حرك وشاطر ويقد يخاطر وبردة مش متاكدة من الكلام دا لانى زى مانت عارف الناس معظمها بيحب يفتى

وممكن لو حد من الاخوة المطلعين يفيدنا فى الموضوع دا

وكمان يؤكدونا هل فعلا سنه 2016 هنقدر ننزل اى عربيه بدون جمارك ولا ضرايب ان ادانا الله واياكم طولة العمر

وانا لاقيت السايت دا بردة يا عبدة به واعتقد ممكن يفيد فى الموضوع

وبكدا تبقي انتهت حصة الميكانيكة

واتك الميكروفون للمنجرز اللى هيعقموا عالموضوع

[etihad]

الى متى تظل القوانين في بلادنا عرضة للتأويل والفتوى من كل من هب ودب الى متى تطالعنا الصحف بقرارات وقوانين ثم نسال عنها يتضح انه كلام جرائد متى تصبح لنا قوانين صريحة ليس بها اي اعوجاج ولا تاويل ولا اي ثغرات الى متى ترزية القوانين في بلادنا يضعون قوانين مليئة بالثغرات حتى يؤلوها ويمشوها حسب اهواؤهم كيف يقسم قانون الجمارك على السارات الى 5 ملايين قانون فرعي واحد خاص بسنة الصنع والاخر خاص بنوع السيارة وسعة الموتور ولون السيارة ونوع العجلات ولون الكراسي مرة اخذت تليفزيون 29 بوصة panasonic ماليزي وذلك بعد ما سألت احد اقاربي عن الجمرك حيث انه نزل قبلي بيومين وكان معه ايضا tv واكدلي ان البوصة عليها 20 جنية وبعد حسبتي قررت اخذ الtv لأفاجأ في الجمرك ان البوصة عليها 100 جنية جمرك وعند سؤالي ان نسيبي لسة نازل من اسبوع ودافع 20 على البوصة قالو 20 على البوصة للتليفزيون حتي 21 بوصة و50 على الفئة من 21 ال 25 و100 على الفئة من 25 الى 29 اي المطلوب مني 2900 جنية مصري على تليفزيون انا شريه بما يعادل 1800 مصري لذلك يا اخواني اريد اسال سؤال واحد انا سالت وتاكدت هذه السنه من احد

اقاربي ان السيارة الخضرا اللي نزل بيها كانت الجمارك عليها 40 % السؤال اللي محيرني هل ستكون نفس الجمارك على سيارة من نفس الموديل والمواصفات بس لونها احمر .....................؟

تم تعديل 2 أغسطس 2007 بواسطة etihad

[tahereyad]

الأخت العزيزه نجفه,, معقول اشتريتي سياره بغرض انك تنزليها مصر بدون معرفة قوانين الجمارك؟؟؟,,

أنا بدأت أسأل علي جمارك السيارات بمجرد ما قدمت عالوظيفه بتاعت الامارات, يعني قبل ماسيب مصر,, و أوّل ماوصلت الامارات قمت اشتريت لانسر 1.6 2007... كان في ماركات تانيه هاموت عليها بس للأسف كانت 1.8 زي مثلا السيفيك 2007

بالنسبه للكلام الأكيد في موضوع جمارك السيارات موجود علي الموقع الرسمي للجمارك: http://www.customs.gov.eg/index/cars.html

و كمان في شوية اسئله و أجوبه مفيده : http://www.customs.gov.eg/questions/questions.html

بالنسبه لخبرتي الصغيره في عالم السيارات في مصر, لما تيجي تشتري سياره من الخليج لازم نتأكد ان السياره دي ماشيه في مصر و ليها سوق و ليها انتشار كويس,, و طبعا ده لعدّة اسباب:

- لو أحتاجنا نبيعها تتباع علطول و ماتاخدش وقت,, لأن كلما طالت مدة العرض كلما نزل السعر

- يكون ليها قطع غيار و بدايل كتير مش التوكيل بس لأن التوكيلات في مصر غاليه جدا جدا.

- لما تكون السياره منتشره في مصر سهل تلاقي الورش اللي بتصلحها بكفاءه عاليه و تكون اتحفظت بالنسبه للميكانيكيه و غيرهم, مثال علي كده البيجو القديم,, بيقدروا فعلا يرجعوها بحالة الزيرو..

[badroora]

الأخت العزيزه نجفه,, معقول اشتريتي سياره بغرض انك تنزليها مصر بدون معرفة قوانين الجمارك؟؟؟,,

انا للاسف كنت لوحدى وكمان مكنتش بفكر فى ابعاد الموضوع كنت مفكراها سهلة وكمان مكنتش لسه اشتركت فى المنتدى ولا فى اى مكان اقدر اسال واستشير

بص الشيء اللى الوحيد اللى اللهمنى به الله هو انى وقعت فى حب الكورولا من اول ماشفتها

وعجبتنى اوى وكمان سالت قالولى اى حاجة تيويوتا هتلاقيى قطع غيارها بسهولة وهتلاقي ورش كتير تصلحها فى مكان

وفعلا جبتها ومبسوطة بها اوى بس انصدمت لما فكرت انزلها ولاقيت الكلام الغريب اللى سمعته

والنبي يا اخ اتحاد سؤال مع سؤال

كورولا 2005 دهبي موتور 1.8 سي سي جماركها تبقي كام ؟ :blush2:

تم تعديل 2 أغسطس 2007 بواسطة نجفة المغرورة

[afreet]

اخوانى كلكم

انا عن نفسى لقيت تنزيل سيارة من احد دول الخليج مشروع فاشل وكل زمايلى الى هنا واشترو سيارات وحاولوا يجمركوها رجعوا بيها تانى وقالوا ان سعرها فى مصر ارخص

وعرفت ان المستورد المصرى له حصة تقدر 10% خصم على الجمارك بصفته مستورد لا يحصل عليها مالك السيارة عند محاولته جمركتها وبالتالى ضريبة المبيعات بتقل بخلاف المشكله الرئيسية وهى ان ربح تاجر السيارات فى الخليج فى حدود 20% على السياره وتكون فى حدود 5% فى مصر

ولما حاولت احسب تكلفة جمارك سيارة من الخليج وجدت ان فى مصر ارخص بكتير بخلاف ان الموضوع مش جمارك وضرائب مبيعات وبس فهناك مصاريف لاحصر لها من نقل و رسوم موانىء ومفرقعات وتراخيص والتىى تمثل مبلغ لا يستهان به

والاهم من ذلك فان الوكيل بمصر يكون مسئولا عن السيارات المباعه بمعرفته وغير مسئول عن اى سياره من الخارج بمعنى امكانية عدم وجود قطع غيار لها حتى وان كانت مثيلتها بمصر متوفره نتيجة اختلاف بعض المواصفات ولى تجربة مريره مع كيا فى هذا الموضوع

مايعرف بالمواصفات الخليجية ليس معناها ان السيارة افضل من المواصفات المصرية وذلك بالنسبة للسيارات المستوردة فاغلب مصانع السيارات محترمه ولن تبيع سيارات بها عيوب او اقل فى الجودة لمجرد البيع وتحقيق عائد سريع ما فهمته ان اجهزة التعليق بالسيارات بالمواصفات المصرية تكون اكثر جودة من الخليجية وان كانت اجهزة التبريد والمكيفات اقل ويوجد عادة لدى الوكيل امكانية الحصول على اجهزة اقوى وكله بحسابه

[tahereyad]

الأخ عفريت:

كلامك فعلا مظبوط و عين العقل لو هانشتري السياره جديده و ننزلها مصر,,

لكن لو حسبناها باسلوب تاني ممكن الحسبه تكون أحسن شويه: أنا قصدي أنك لما تشتري سياره جديده و تستخدمها في دول الخليج و تستفيد بكل مميزات الضمان و التأمين أفضل من أنك تشتري حته مستعمله ((و تضطر تتعامل مع جراجات الاصلاح و يمكن تسببلك مشاكل اثناء السير,, غير انك لما هاتبيعها هاتخسرفيها كتيييير)),, و غالبا كمان لما تقسط الجديده مش هاتحس أوي بقسطها,,, وبعد ما تقوم بواجبها معاك بره, و تخلص قسطها,, ممكن تنزلها مصر و تبيعها بسعر هلامي و تستفيد بفارق السعر....

يعني,, ده بصراحه كان تفكيري أول ماوصلت الامارات

من الموقع الرسمي للجمارك المصريه: http://www.customs.gov.eg

فئات الرسوم الجمركية وضريبة المبيعات علي سيارات الركوب العادية

(باقي انواع السيارات بالموسوعة الجمركية بالموقع)

سعة محرك السيارة/// فئة الرسوم الجمركية/// فئة ضريبة المبيعات من(القيمة +الرسوم الجمركية)/// اجمالي الرسوم وضريبة المبيعات

حتى 1600 /////////////// 40% ///////////// 15% //////////////// 61%

اكثر من 1600 //////////////// 135% //////////////// 30% /////////////// 205.5%

حتى 2000 cc

اكثر من 2000 //////////////// 135% /////////////////// 45% /////////////////// 247.5%

مثال

قيمة السيارة 1000 جنيه سعة المحرك 1600 cc الرسوم الجمركية وضريبة المبيعات= 610 جنيه

قيمة السيارة 1000 جنيه سعة المحرك اكثر من 1600 حتى 2000 cc =الرسوم الجمركية وضريبة المبيعات =2055 جنيها

قيمة السيارة 1000 جنيه سعة المحرك اكثر من 2000 cc =الرسوم الجمركية وضريبة المبيعات =2407.5 جنيها

(وذلك بعد استنزال نسبة الخصم من القيمة طبقا لسنوات الاستعمال)

الخصومات المسموح بها للمصريين المقيمين بالخارج على سيارات الركوب الواردة معهم. ( مثال )

سيارة بصحبة مصرى مقيم بالخارج مشتراه فى سنة الموديل (سنة 2002) واردة فى شهر 8 / 2005 . يتم احتساب الخصومات كالاتى:

خصم موديل عام 2002 لورودها بعد 1 / 10 / 2002 10%

خصم موديل عام 2003 لورودها بعد 1 / 10 / 2003 5%

خصم موديل عام 2004 لورودها بعد 1 / 10 / 2004 5%

اجمالى الخصومات 20%

قيمة السيارة 1000 جنيه مصرى

القيمة بعد الخصم والتى تحسب عليها الرسوم الجمركية 800 جنيه

[afreet]

الاستاذ طاهر

لى برضه بعض الزمايل فكروا بالطريقة دى صحيح العربية هاتبقى اغلى انما شراؤها على مراحل يعفيهم من التقسيط المصرى العجيب التى تصل فوائده احيانا الى 30% سنويا

ولى وجهة نظر فى الموضوع ده

انت متخيل وفاهم طبعا عربية فى الخليج تشتغل او حتى تتركن 3 سنوات بيبقى شكلها عامل ازاى نتيجة الظروف الجوية انا مش عايز افكرك ان الاجزاء البلاستيك واللدائن فى السيارة رغم انها مصنعة بمواصفات خليجية بيحصل فيها ايه واجزاء الموتور نفسة بيحصل فيها ايه

وللاسف كل زمايلنا الى كان عندهم نفس التفكير واشتروا عربيات وسجلوها بالسفارة وبعد سنتين تلاته تنازلوا عن الفكره لان العربية بقت ماتستاهلش تنزل رغم ان بعضهم الشركات صارفة لهم سيارات لاستعمالهم وعربياتهم كانت شبه مركونه

ودى تجربة الاخرين الى شفتها

[عبده بيه]

الاخوة الاعزاء

عايز اعرف سي سي يكثل كام من الحصان

بمعني السيارة اللي 9 حصان تساوي كام سي سي

مستني ردكم ولكم تحياتي

[badroora]

الاخوة الاعزاء

عايز اعرف سي سي يكثل كام من الحصان

بمعني السيارة اللي 9 حصان تساوي كام سي سي

مستني ردكم ولكم تحياتي

خير يا عبده بيه انت بتفكر تجيب كاروا ولا ايه ؟

يعتمد على نوع وقوة الحصان

عموما جرب الويب سايت دا

هنا على حسب نوع الموتور

HP = horse power . سرعة حصان

cc = طبعا معروفة

تم تعديل 2 أغسطس 2007 بواسطة نجفة المغرورة

[badroora]

بخصوص حسبة جمارك العربية

اخ طاهر معلش حسه انى مشوشه شوية فى موضوع 205 % دا

يعنى مثلا قولى لو عربتي تمنها 80 الف جنية مصري

لما تبقي جمركها 205% يبقي يعنى هادفع كام

للمبلغ النهائي اللى المفروض هادفعة

ساي مثلا انا عربيتي 2005 وهانزلها فى 2008

و1800 سي سي

يبقي هادفع كام بالتقريب

وفنتهاللى عشان افهم المبلغ جه ازاى ؟

معلش هاتعبك معايا

تم تعديل 2 أغسطس 2007 بواسطة نجفة المغرورة

[etihad]

الاخت نجفة لو تسمحي ارد على قدر معرفتي

205 % من 80000 يطلعوا بالضبط 166400 هو مبلغ زهيد جدا هذا بالإضافة لثمنها الاصلي 80000 يعني اصبحت واقفة عليكي ب 246400 دا غير المصاريف الاخري ويسلام ياأختي لما يعرفوا في الجمرك انك نازلة بسيارة يبقى موظفين الجمرك كلهم تجري وراك وتهنيك حمدلي على السلامة ياهانم ربنا يوسع عليك وغيره من الكلام اللي انت عرفاه بس النصيحة اسألي عن سعرها في مصر احسن حاتلاقي سعرها اقل بكتير لان في بعض رجال الاعمال اللي مامتهم دعيالهم يقدروا يخلصوا مثل هذه السيارات بدون ولا قرش واحد لذلك تقدري تشتريها من مصر باقل واخر سؤال اود ان اسالة انا سمعت ان الجمارك دي عملوها علشان حماية الصناعة الوطنية ........................؟

حد يدلني فين هي الصناعة الوطنية ..................؟

[عبده بيه]

الاخت نجفة المنورة انا مازالت مش فاهم اومش عايز افهم لكن عايز شويةشرح لان سيارتي عايز اعرفتقديرهاقبل الوقوع في المحذور

تحياتي

[badroora]

الاخت نجفة المنورة انا مازالت مش فاهم اومش عايز افهم لكن عايز شويةشرح لان سيارتي عايز اعرفتقديرهاقبل الوقوع في المحذور

تحياتي

طيب قولنا مواصفات سيارتك ايه واحنا نحاول نحلها او نوضحها اكتر