عاجل الي الاخوه المغتربين بدولة الامارات

[tahereyad]

يا جماعه أنا آسف جدا للموضوع اللي هاحكيه ده, لكن أنا حسيت بمراره كبيره جدا لما شوفت الاعلان

الموضوع اني من 3 ايام ذهبت الي مارينا مول أبو ظبي, بعد مالفيت شويه فالمول جلست علي كافتيريا "جلوريا جينز", و هناك مر شخص علي كل رواد الكافتيريا و كان بيوزع جريده اعلانيه اسمها "الياسات" جريده أسبوعيه توزع مجانا, و لقيت اعلان في صفحه 14,, عن مكتب خدم اسمه "مؤسسة جبل لبنان للخدم" كاتبين فالاعلان "نؤمن لكم الخدم والعمال من جميع الجنسيات.... الهند بنجلاديش أثيوبيا نيبال سيريلانكا الفلبين أندونيسيا مصر",,, و السؤال دلوقتي:

هل الامارات فيها خدم مصريين؟؟ و هل قوانين الاقامه هنا تسمح بتأشيره خدم للدول العربيه؟؟ و هل الاعلانات ده شائع أن يكون في خدم مصريين؟؟؟ و اشمعنه في الاعلان ده مصر الوحيده في الدول العربيه كلها اللي كاتبينها؟؟؟؟

ماقدرش اقولكم علي كم المراره و الالم الي حاسس بيه من ساعة ما شوفت الاعلان ده, أنا كنت عاوز اتصل بيهم واسأل اذا كان فعلا عندهم خدم مصريين,, بس احسيت بخوف لو قالولي نعم.

هي مصر و المصريين ناقصين,, مش كفايه علينا فضيحة خادمات عيشه؟؟؟؟؟؟

[زعلان]

الي اعرفه ان القانون يمنع وجود خدم عرب في الامارات الا انه قد يتم التحايل في اسم الوظيفة و ربنا يخلي مبارك ويوزي و علاء و جيمي و صفوت و سرور ............ لمصر و المصرين

خد الاعلان و بلغ الشرطة

[عصام أبوالفتح]

نؤمن لكم الخدم والعمال من جميع الجنسيات.... الهند بنجلاديش أثيوبيا نيبال سيريلانكا الفلبين أندونيسيا مصر",,,

[desert_eagle70]

أخى الكريم هو من المعروف ان قانون العمل فى الإمارات بيمنع العرب من الشغلانة دى بس لو مصر بقى مصرة الناس مش هتقول لاء وخصوصاً بعد الحوادث اللى سببتها العمالة الأسيوية ومش هيلاقوا أحسن من المصريين خدامين واخدين دعم وتأييد من الحكومة بتاعتهم .. بس لو فعلاً لسه معاك الخبر ده أبعته يا أما فى رسالة أو على صندوق بريد الشرطة ومكتب العمل والعمال فى ابوظبى عشان ربنا يسمع مننا ويقفلوا المكتب ده أو يغرموه وحسبى الله ونعم الوكيل فيكى يا حكومة مصر .مفكيش راجل يعرف يعنى ايه غيرة.

[tahereyad]

أنا فكرت في نفس اللي انت فكرت فيه يا استاذ عصام,,, لكن, ايه هو نوع العمال اللي ممكن يقدمه مكتب خدم,,, أنا اللي مزعلني جدا و مخوفني في نفس الوقت انه يكون بيستقدم سيدات مصريات تحت أي مسمّي و يشغلّهم كخادمات في البيوت,,,, يعني في الحاله دي يبقي مش هانقدر نمسك عليهم أي حاجه,, وبالتالي برضه مش هاينفع نبلغ الشرطه بمجرد منطوق الاعلان زي ماقال الأخ زعلان......

حسبنا الله و نعم الوكيل فيمن ظلمنا و أفقرنا و حط من قيمتنا,,,

و برضه لسه بسأل تاني

اشمعني المصريين دونا عن كل الجنسيات العربيه.؟؟؟؟؟؟

[hussaindoit]

لا تعليق - اللي يتابع اخبار مصر من الجرايد ومن الميديا لا يفاجىء لو أبو الهول بقى حارس عقار

[عصام أبوالفتح]

و برضه لسه بسأل تاني

اشمعني المصريين دونا عن كل الجنسيات العربيه.؟؟؟؟؟؟

لانهم هما اللى هايرضوا بكده ... ببسااااااااااااااااطة

المصرى من كتر ما عاشر اللى بالى بالك بقى تقريبا زيه مش عارف ازاى

صبوووووووووووور .. طييييييييب ... يتحمل الجبال ولا يشكو ولا يتذمر

احنا كده .. ممكن جينات من ايام الفراعنه او حفر القناة بالسخرة او التعذيب .

باقول ليه الجينات دى اللى بتحكم تصرفاتنا

ليه مش جينات احمس ولا عرابى ولا مصطفى كامل .. لانهم افراد

انما البلاء العام هو السائد وهو الخوووووووف على بكره والرزق

وده بيخلى المصرى يقبل المهانة داخل وخارج بلده

وهو نقص مرعب فى الايمان

الا اللى يدرك ان مصيره بيده هو فقط .. وقليل ماهم

ماهى ايران 70 مليون وعمالها وخدمها وعلمائها كلهم جواها .. محدش خرج

واللى بيخرج بيبقى ضابط مش عسكرى .. حصان مش اللى بالى بالك

من يهن يسهل الهوان عليه وما لجرح بميت ايلاما

[زعلان]

بمناسبة الجينات كانوا جايبين على الجزيرة ان الجينات بتنقل الظروف المحيطة زي الاحداث الزلالزل الكواراث المجاعات الذل المهانة السخرة مفش بعيد تكون جينات المصريين نحست و اتعودت على الذل مش بقالهم تحت مبارك 25 سنة و تحت ضباط العسكر 50 سنة ويزيد و تحت ضباط البوليس المغتصبين منتهكي الاعراض اكثر من خمسين سنة مش بعيد الجينات حملت صفات وراثية زي الزفت

[badroora]

عتاب صغير على عنوان الموضوع

هل تعتقد اخى الكريم ان الموضوع دا هيغضب مغتربي الامارات دون عن باقي المنتدى

احنا بردة خارج الامارات ونزل علينا الخبر كالصاعقة واكيد اغضابنا كما اغضب الاخوة بالامارات .

سورى انى دخلت بدون دعوة بما انى من مغتربي منطقة مجاورة

حبيت بس اقولكم انتوا مش لوحديكم وانا كمان مضيئين من الخبر داء

نجفة المغرورة عضو منتدب والمتحدث الرسمي باسم

مغتربي باقي الدول

[n3sa]

]دى الة ادب من الجريده

طبعا الله يرحمه الشيخ زايد مانع العرب من هذه الوظيفه طبعا" بلغ العمل والعمال .

مش عرفه حنفضل لحد امتى نتهان كده ؟

انتم عرفين ان المصرين هم من ارخص العماله العربيه طبعا" بتكلم عن العمال مش ذوى الشهدات العاليه

[tahereyad]

أولا أود أن أشكر جميع المشاركين جدا جدا لتأثرهم بالموضوع,

ثانيا: أقدم اعتذاري الرسمي للأخت نجفه باعتبارها المتحدثه الرسميه عن مغتربي باقي الدول,,, بس ممكن أوضح وجهة نظري:

أنا كتبت الموضوع لمغتربي الامارات لأني مش كاتبه علي سبيل الحوار فقط,,, بصراحه كده, أنا ماكملتش سنه في الامارات و في اجراءات كتير ماعنيدش علم بيها, و لو كنت أعرف ان الشرطه أو العمل هاتعمل حاجه بمجرد منطوق الاعلان كنت اكيد قدمته, لكن زي ماتفضل الأخ عصام و علّم علي كلمة "العمال" اللي تدل علي التحايل في الاجراءات,,, اللي محتاجه مساعده من أحد الموجودين هنا ازاي نقدر نتأكد أنهم بيستقدموا فعلا خدم مصريين و ازاي نثبت ده,, والأم هو ازاي نتخذ ضد "مكتب جبل لبنان ده الأجراءات الكافيه لردعه عن الاهانه دي...و علي فكره,,, أنا مصري ولا يمكن أقبل بالذل أو الهوان أو المساس بسمعة المصريين....

أرجو المساعده

[badroora]

أولا أود أن أشكر جميع المشاركين جدا جدا لتأثرهم بالموضوع,

ثانيا: أقدم اعتذاري الرسمي للأخت نجفه باعتبارها المتحدثه الرسميه عن مغتربي باقي الدول,,, بس ممكن أوضح وجهة نظري:

أنا كتبت الموضوع لمغتربي الامارات لأني مش كاتبه علي سبيل الحوار فقط,,, بصراحه كده, أنا ماكملتش سنه في الامارات و في اجراءات كتير ماعنيدش علم بيها, و لو كنت أعرف ان الشرطه أو العمل هاتعمل حاجه بمجرد منطوق الاعلان كنت اكيد قدمته, لكن زي ماتفضل الأخ عصام و علّم علي كلمة "العمال" اللي تدل علي التحايل في الاجراءات,,, اللي محتاجه مساعده من أحد الموجودين هنا ازاي نقدر نتأكد أنهم بيستقدموا فعلا خدم مصريين و ازاي نثبت ده,, والأم هو ازاي نتخذ ضد "مكتب جبل لبنان ده الأجراءات الكافيه لردعه عن الاهانه دي...و علي فكره,,, أنا مصري ولا يمكن أقبل بالذل أو الهوان أو المساس بسمعة المصريين....

أرجو المساعده

شكر يا اخ طاهر على زوقك وكرم اخلاقك ..

ثانيا للاسف يا اخى العزيز مش هتقدر تمسك حاجة على المكتب دا غير فى حالة واحدة بس لو مكتوب المهنة شيء وطبيعة العمل شيء اخر وفى الحالة دى يبقي لازم المتضرر هو اللى يشتكى ويقول انه بيشتغل مهنة غير اللى جاء عليها .

لان زى ماحنا عارفين ان حتى زوى الشهادرات العالية تلاقيهم مسافرين على فيز عمال على الرغم انهم شغالين مهن اخرى ودى كتيرة اوى فى السعودية اللى تلاقية مثلا شغال فى شركة اتصال ولا محاسب ولا ولا وتلاقي المهنة عامل مفروشات ولا اى شيء يرفض يشتغلة بن البلد فيجوز ادراج عمال لشغل هذه المناصب

واكيد الناس بتبقي عرفة ومغمضة عنيها

طالما صاحب المكتب موافق والموظف اللى هيشغل الوظيفة موافق يبقي خلاص محدش هيقدر يتدخل .

للاسف المفروض اننا نوقف ضد قرار الحكومة فى مصر اللى بتدى تصريح بكدا

مش المكتب اللى بيجبهم بس للاسف الحكومة بتاعتنا عملت اتفاقية بشحن خدم مصرى فرز اول للدول الشقيقة بمنتهى الفخر يعنى بقت رسمي

ومش بعيد اللى حابب يطلع من البلد يطلع بفيزا خدم بما انها مصرح بها والعكس

انا لا اقصد احبط من عزمتك فى محاولة الردع فى هذا الموضوع بس حبيت اوضح ان لازم ندور على راس الموضوع ونتعامل معاه

واتمنى ان الحكومة بتاعتنا وعلى راسم است عيشة رئيسة الخدم ان تحترمنا بقي وتحافظ على كرامتنا شوية

تم تعديل 1 أغسطس 2007 بواسطة نجفة المغرورة

[autoscriptor]

أنا مش فاهم أية حاجة. يعني إيه ذل وهوان لما يبقى فيه شغالة مصرية في الإمارات ولا في الهند. إيه إللي يمس كرامة سعادتك في الموضوع دة. ليا واحد صاحبي هنا في دبي بيبوس رجل الناس في الجنسية والاقامة يجيب شغالة من مصر علشان مش عايز ولاده يتكلموا انجليزي أو أوردو وهما صغيرين.

لأ بجد فيها إيه لما تبقى الشغالة مصرية. هل معنى ذلك أن مصر كلها شغالات؟ (مع احترامي لمهنة الشغالة) مالنا نحن والهبل والمعاتيه من جنسيات الدول الأخرى عندما يفكروا بهذه الطريقة.

أرى أن هذا الموضوع هو مجرد تطييب خاطر. زي مانقول كدة انو يعني احنا عندنا كرامة أصلاً والدليل اننا ما نرضاش على بناتنا يشتغلوا في بيوت الخليجين. جاتنا نيلة، طيب ما احنا أصلاً كرامتنا متنيلة بستين هباب في مصر. انت فاكر ان كرامتك مصانة في بلدك لما تحميها برة؟ لو كرامتك مصانة ماتخافش من الضابط ومعاه سلك كهربا أو عصاية غلية أو قرطاس ورق. كرامتنا مهانة يا سادة كل يوم وانت بتركب الأتوبس والمترو. كرامتك تهان لما تشوف أمين الشرطة بيضرب واحد لابس زيك بالظبط في ميدان التحرير وماتقدرش تقوله حاجة. كرامتك يا آنسة يا مصرية (أي واحدة مصرية بما فيهم أختي) مهانة لما حد يتحرش بيكي وماتقدريش تثتغيثي بالشرطة لأنهم ممكن يعملوا فيكي أكتر من المتحرش. كرامتنا كلنا بتتهان لما لما نشوف بعيونا استمارات الانتخاب وهما بيقفلوها زي ما يكونوا بيعملوا شيء عادي. فين الكرامة؟ حد كدة يشاورلي عليها. فين الكرامة لما الدولة تتوقع ان الموظف يامل ويشرب ويركب مواصلات ويدخل ولاده المدارس ويتعالج ويركب جلدة للحنفية اللي بتخر بالمرتب الحكومي. فين الكرامة عند شعب مش بيعرف يعيش إلا بالرشوة والمحسوبية والكوسة. فين الكرامة لما متفوق سياسة واقتصاد ينتحر من فوق كوبري على النيل لأنه غير لائق اجتماعياً في نظر وزارة الخارجية.

الكرامة لا تتجزأ ولا يوجد شيء اسمه كرامة شعب بأكمله. الهند من أعظم البلاد على وجه الأرض فيها من أول العمالة غير الماهرة الرخيصة إلى علماء الذرة ومديروا الشركات الكبرى وأصحاب أعمال مليونيرات ولا تجدهم يتكلمون هذا الكلام الفارغ عن جرح كرامتهم لوجود عامل نظافة هندي. مالها الخدامة؟ تجرح مشاعرك في إيه لما يكون في خدامة مصرية؟ وانت مالك لو الخدامة مشيت مشي بطال، ولا هي عسل على قلبنا لما تمشي مشل بطال مع المصريين ومع الخليجيين لأ. كونوا واقعيين. أفيقوا أرجوكم.

[badroora]

الحقيقة كالنحلة فى فمها لسعه وفى بطنها عسل

[tahereyad]

الأخت نجفه,, شكرا,, ده بس من بعض ماعندكم

الأخ أوتو سكربتور,,

أحييك عالرد,, و أحب أقولك أني كتير بيكون عندي اعجاب بالهنود زيك بالضبط,, ناس مجتهده و بتاعت شغل و ميعرفوش غير كلمه, YES,,OK,, بس الحاجه اللي انت نسيتها ان مش كل ما يليق مع الشعوب الأخري يليق معنا, كمسلمين و كعرب و كمصريين كمان,, و لو هانتكلم عن علماء الذرّه و لا حتي الشعوب المتقدمه,في حاجات ماينفعش نكون زيهم ولا نفكر بأسلوبهم,,, بيكون الواحد راجل ملو هدومه و عالم أو رئيس شركه عالميه و بنته ليها بوي فريند بتدعيه فالبيت و ياكل و يشرب معاهم. والأمثله لا تحصي..

لمّا نتكلم عن مصر و المصريين يبقي نتكلم عن اللي يناسبنا احنا كشعب و بس..

اللي انت قلته محدش يقدر ينكره, و هي دي الحقيقه و هي دي جراحنا كلنا,, و برضه مافيش داعي نستخدم جراحنا في حل المسائل اللي بتواجهنا...

أنا ماعنديش مانع أن أي مصري يشتغل في بلده أو خارج بلده أي شغلانه شريفه حتي لو عامل نظافه أو حتي عامل حمامات مدام بيكسب قرش حلال بياكل منه و يأكل أسرته,,دي فالأول و الآخر أرزاق.

لكن أنا عندي ألف مانع و مانع أن أي سيده أو بنت مصريه تسوقها الظروف للعمل كخادمه خارج بلدها,,,,ربنا خلقنا كده,,, أنا كده,, و مش لوحدي,, كلنا كده و بنفكر كده و مش هاينفع نفكر غير كده,, و ما خالف ذلك فهو المخالف...

[autoscriptor]

ربنا خلقنا كده,,, أنا كده,, و مش لوحدي,, كلنا كده و بنفكر كده و مش هاينفع نفكر غير كده,, و ما خالف ذلك فهو المخالف...

أشكرك بشدة. فما ذكرته أنت عاليه لهو تلخيص سريع لأزمة الحوار بيننا. لن أكمل الرد هنا ولكن سوف أضعه في قسم شئون المحاورات.

تم تعديل 1 أغسطس 2007 بواسطة autoscriptor

[kokowawa1979]

جاء في الإعلان :

"نؤمن لكم الخدم والعمال

النقطة التي تخص مصر هنا هو نقطة العمال وليس الخدم - والعمال هنا مقصود بهم العمال الزراعيين حيث أن أغلب عمال المزارع في الإمارات من مصر وبنجلاديش - بل أغلب العمال من قرية ميت العامل المنصورة !!!!

لذا لزم التنويه