فرصة في المدن الجديدة

[Abo NooR]

السلام عليكم ورحمة الله وبركاته

أولا : هذه أول مشاركة لي في هذا المنتدى المحترم فعلا و إن كنت أشترك في كثير من المنتديات فلا أذكر أني شاركت برأيي في أي منها........لأسباب كثيرة ليس الآن معرض ذكرها .

قد يعلم كثير منكم بشأن القرعة الحالية الخاصة بأراضي المدن الجديدة ولكن لمن لا يعلم فهذا الرابط يوضح الموضوع.

http://www.urban-comm.gov.eg/alaan_a.asp

أما من يعلم فلي طلب بسيط من سيادتكم ألا و هو كيفية اختيار قطعة أرض في هذه المدن ؟؟؟

أعلم أن السؤال عام شويتين؟؟

أرجو من الأعضاء الكرام المفاضلة بين

أولا :المدن و بخاصة القريبة من القاهرة سواء في الشرق كالعبور والشروق مثلا أو الغرب كزايد أو أكتوبر في حالتي الرغبة في المعيشة أو الإستثمار

ثانيا: من حيث الأحياء و المجاورات في كل مدينة أيها راقي أو متوسط أو شعبي

ثالثا:من حيث نوعية الأراضي فلل أو عمارات أيهما أفضل عمليا سواء سكن أو استثمار

رابعا: أي المناطق فرص الحصول فيها على قطعة أرض أكبر في ظل الأعداد الغفيرة

خامسا: مراعاة اختلاف المتقدمين من واحد على أد حاله لواحد ربنا موسعها عليه

أرجو أن يتحول هذا الموضوع إلى حلقة نقاش موسعة في الأيام القليلة المقبلة و ذللك لتمكن الراغبين في هذه الأراضي من أخذ قرار لأن الحصول على المعلومات في هذا المجال حقا صعب لمن ليس له احتكاك بالمدن الجديدة مثلي

أخص بالشكر كل القائمين على هذا المنتدى و المشرفين عليه و أخص أيضا سي السيد المشارك العظيم بكثير الإعجاب و الشكر.

جعله الله في ميزان حسناتكم جميعا

هيئة المجتمعات العمرانية

[عبده بيه]

اهلا بيك نورتنا وان شاء الله تكون في وسط اخوانك و ونستفيد سويا

وياريت تشوف مقالات العزيز سي السيد وهو مدير عام المدن الجديدة وفقه الله وهتلاقيه ما تبحث عنه ان شاء الله

وتحياتي

[Abo NooR]

الله يكرمك يا عبده بيه النور نورك يا محترم

أنا فعلا معجب بخبرة سي السيد ولكن ارجو المزيد من المعلومات عن باقي المدن

وأود أن يكون هذا الموضوع شبه سجل خاص بالمدن الجديدة لكل الأعضاء

علاوة على المقصد الأساسي وهو اختيار قطعة أرض مناسبة في الوقت الحالي

شكرا على الرد

[عبده بيه]

اخي ابو نور

اخاف ان يكون فيها كوسة وربك يستر

[Abo NooR]

والله يا عبده بيه الدنيا كلها فيها كوسة بس عندنا مش كوسة دي كوسة مطبوخة على رأي أحد الصحفيين في برنامج العاشرة مساء.

بس أنا أظن أن في فرصة بردة لكتير من الناس و أولا و أخيرا دي أرزاق و ما علينا إلا السعي

و لكن ما دام الأخوة لم يدلوا بآرائهم بعد !!!!!!!!!!!!!!!!!!!

ما رأيك أنت في أي المدن أحجز و يا سلام لو قلتلي في أي مكان حتى تكون فرصة الحصول على الأرض كبيرة ؟؟

يعني أنا بدأت أستبعد الشيخ زايد و أكتوبر نظرا لقلة المعروض و ان كان في اكتوبر قطع كتير في المنطقة المحصورة بين الواحات و الفيوم و أنا معرفش عنها حاجة.

و بدأت أتجه ناحية العبور أو العاشر و بالأخص العاشر و ما عنديش معلومات عن الشروق خالص؟

إنت رأيك إيه و ناوي تقدم فين ؟؟؟

أي معلومة ممكن تنفع!!

وربنا يوفقنا إن شاء الله .

كان الله في عون العبد ما دام العبد في عون أخيه.

يا سي السيد يا كبير إنت فيييييييييييين؟؟؟؟؟؟؟؟؟؟؟؟؟؟؟

[بنت الشاطئ1]

بالنسبة للأستاذ ابو نور فعلا فى كوسة وفى ناس بتقدم باسماء اقاربها

انا طبعا اول ما الاقى اى موضوع عن العقارات

لازم اسألى سؤالين من اسئلتى الكتيرة

حد سمع عن صفوة سيتى وايه اسعارها لو سمحتم

حاجة كمان

اين يمكن ان اجد شقة فى القاهرة فى حدود 150 الف جنيه..او بالكتير 180 الف

ممكن نخليها 200 لو مفيش الاسعار ديه

انا ممكن اخذ شقة بعيدة عن العمران مش مشكلة المهم متكنش عمارة قديمة ايلة للسقوط..ياريت تجاوبونى

يا اعزائى

[بنت الشاطئ1]

بسمع عن احياء فى مدينة نصر..كالحى العاشر ومش عارفة ايه كمان

ممكن لو احد يفيدنى فى هذا الموضوع

[Abo NooR]

العزيزة بنت الشاطئ

معلوماتي عن الحي العاشر للأسف ضئيلة أكتر من عباس العقاد و محطة سيراميكا كليوباترا و بتاع الكشري

اللي هناك معرفش بس أظن أن المبلغ اللي بتتكلمي فيه معقول نسبيا و ممكن تلاقي بيه شقه في الهرم مثلا

و تكون جديدة لأني سكنت في الهرم .

أما عن رأيي بصراحة بعد المرمطة اللي شوفتها في الشقة الإيجار الجديد و كسر شقتي في غيابي وسرقتها

و الأقسام وما أدراك ما الأقسام و أمناء الشرطة وما أدراك ما أمناء الشرطة و اللي واللي ....................

والبهدلة اللي شايفها أصحابي أو المجاورين لي في السكن أصحاب الشقق التمليك , بدأت أفكر في كلام حمايه

الله يرحمه لما كان يقولي أنا مشتريش جدران في الهوا و أنت في بيتك سلطان زمانك

فكر قديم حبتين بس جديد لانج

الأرض أفضل ألف مرة من الشقة

وبعدين اللي بيشتري أرض علشان يبني عليها عايز يكسب

و المقاول عايز يكسب

واللي اشترى الشقة و بيبعها عايز فوق مكسبهم يكسب

وكل ده منين من الغلبان اللي شاري على الجاهز

أكيد شرا العبد و لا تربيته مثل محترم

والبناء عملية جدا شاقة

بس لو اللي بيستثمر بيراعي ربنا و ميكسبش على الجنيه جنيه كنا ريحنا نفسنا و اشترينا

وده برده عمره ما هيحل مسألة الخصوصية

أنا عاشق الخصوصية

[بنت الشاطئ1]

شكرا لك اخى ابو نور

اكيد طبعا الأرض افضل..لكن المشكلة فى مدة البناء المسموحة وخاصة بالنسبة للمغتربين

اكيد لو فى القاهرة اراضى غير محددة مدة للبناء ..اكيد سنشترى بدون تردد

ربنا ييسر الأحوال

[حلم بعيد]

السلام عليكم جميعا بالنسبه للاراضي انا اعتبرتها فرصه حلوه جدا و قررت اقدم في القرعه الي ان علمت ان الاعداد المتقدمه كبيره جدا يعني الفرصه ضئيله في الحصول علي ارض و عرفت ايضا ان سماسره الاراضي بيجمعوا ناس يدوهم قرشين علشان يقدموا باساميهم يعني السمسار بيقدم مثلا ب عشرين اسم علي قد الفلوس اللي يقدر يدفعها مقدمات و بكده تكون فرصته كبيره و طبعا احنا ندفع المقدم علشان القرعه و الفلوس تقعد مع الحكومه 3 شهور علي الاقل و نطلع من مولد بلا حمص علشان كده بصراحه صرفت نظر يعني هيه دي معلوماتي البسيطه عن الموضوع

[se_ Elsyed]

السلام عليكم جميعا بالنسبه للاراضي انا اعتبرتها فرصه حلوه جدا و قررت اقدم في القرعه الي ان علمت ان الاعداد المتقدمه كبيره جدا يعني الفرصه ضئيله في الحصول علي ارض و عرفت ايضا ان سماسره الاراضي بيجمعوا ناس يدوهم قرشين علشان يقدموا باساميهم يعني السمسار بيقدم مثلا ب عشرين اسم علي قد الفلوس اللي يقدر يدفعها مقدمات و بكده تكون فرصته كبيره و طبعا احنا ندفع المقدم علشان القرعه و الفلوس تقعد مع الحكومه 3 شهور علي الاقل و نطلع من مولد بلا حمص علشان كده بصراحه صرفت نظر يعني هيه دي معلوماتي البسيطه عن الموضوع

أولاً وأخيراً ده نصيب إن شالله يكون اللي متقدمن مليون واحد .

ثانياً : الموضوع مش زي مانتي متخيله .. يعني السماسرة أذكى من كده .. وهو مش هايعطل له ربع مليون مثلاً في مقدمات أرض ممكن نتيجتها تبان بعد 4 أو 5 شهور .. لإن أفيد له إنه يشغلهم في السوق وخصوصاً إن موسم الصيف هو ذروة شغلهم .

[طه بدر]

الموضوع الان تحول من رغبة البعض فى بناء مسكن الى نوع من اليانصيب القومى والردود من السادة الاعضاء اكبر دليل.

ولا احد الان يبحث عن المنطقة او الجيران او مستقبل السكن بها فالكل يبحث وبجد عن المبلغ الاوفر وهو لمن لا يعلم مقدار ما تاخذه للتنازل عن الارض لغيرك اذا حصل لك نصيب وقد وصل الان لحوالى 200 الف فى المتوسط ويبلغ احيانا ***** (ولا بلاش علشان ما حدش يتخض) يعنى الاستثمار الان ان تدفع مقدم 30 الى 40 الف لمدة شهرين واذا ظهر اسمك فى القرعة( او اليانصيب) تستلم 300 او 400 الف فورا وهو عائد لا اعتقد ان هناك مشروع فى البلد يستطيع تحقيقه.

يعنى العملية تستاهل

[طه بدر]

السوال الان وبجد حد حسب عدد المتقدمين للقرعة (اسف اليانصيب) وضربه فى مبلغ المقدم المطلوب؟ وياترى الناتج كام مليار؟؟؟؟؟

ولمن شاهد الزحام والطوابير على الحجز هل سال نفسه مثلى الناس دى كلها جايب الفلوس منيـــــــــــــــــــــــــــــــــــــن؟

واذا كان للاسرة ان تحجز قطعة واحدة فى كل المدن الجديدة، فبعد مئات الالاف من القطع فى اكتوبر والعاشر والقاهرة الجديدة والعبور والشروق وغيرهم، لسه فى اسر معاها عشرات الالاف تدخل بها اليانصيب؟

زمان سمعنا عن طوابير الجمعية وطوابير الفراخ والزيت او حتى طوابير العيش، الان نرى طوابير لناس تريد الدخول فى يانصيب مقدمه عشرات الالاف.

صحيح عمــــــــــــــــــــــــــــــــــــــــــــــــــــــــــــــــــــار يا مصـــــــــــــــــــــــــــــــــــــــــــــــــــــــــر

طب اذا كان البلد فيها كل الفلوس دى، احنــــــــــــــــــــــا متغربين ليـــــــــــــــــــــــــــــــــــــــــــــــــــــــــــه؟؟؟؟؟؟؟؟؟؟؟؟؟؟؟؟؟؟ارجو حد يفهمنى علشان خلص تهت

[MOOOM]

يا سيدي الفاضل [ طه ] باختصار شديد ..

احنا مسافرين علشان نكون الطبقة الوسطى إلي بتحاول تختفي شوية شوية ويكون فيه طبقتين بس [ غناء فاحش - فقر فاحش ]

احنا بقه الطبقة إلي بين البينين .. أو على الأقل علشان نكون كدة

وشوف حضرتك مثلاً لو مكنتش مسافر .. كنت هتكون أقرب إلى أنهي طبقة من الاثنين التانيين ؟؟؟

[طه بدر]

شكرا يا استاذ موم على الرد وان كنت اختلف معك.

فالبعض الان يخرج من مصر لمجرد الخروج منها او خلينى دقيق لا يريد العودة اليها رغم انه اصبح من الطبقة المتوسطة او فوق المتوسطة

لكن ده موضوع تانى ربما نناقشه فى وقت لاحق :)

سؤالى كان و مازال

اذا كانت البلد قادرة على جمع هذه المليارات من اهلها فقط (بل من بعض اهلها) فاين المشاريع الكبرى التى تستطيع توظيف هذه الاموال وايجاد فرص العمل لملايين العاطلين؟؟؟؟؟؟؟؟؟

واذا كان الناس مازالت تثق فى الحكومة (تصور :wub: ) وتوفر لها هذه المليارات فلماذا لاتقوم الحكومة بعمل اكتتاب او شى من هذا القبيل لتوظيف هذه الاموال بدلا من استجداء الاموال الاجنبية والمساعدات الخارجية؟؟؟؟؟؟؟؟؟؟؟

يعنى خلاص مفيش استثمار فى مصر غير فى الاراضى وتسقيعها؟

وليه دائما مشاريع البترول والغاز والفوسفات والسياحة وغيرهــــــــــــــــــــــــا وغيرهــــــــــــــــــــــــــــــا بنجرى وراء شريك اجنبى بدلا من مشاركة المصريين (بكل طبقاتهم) للمكاسب والارباح

ارجوكم حد يفهمنى علشان خلاص تهــــــــــــــــــت :wub:

[زهرة الجبل]

شكرا يا استاذ موم على الرد وان كنت اختلف معك.

فالبعض الان يخرج من مصر لمجرد الخروج منها او خلينى دقيق لا يريد العودة اليها رغم انه اصبح من الطبقة المتوسطة او فوق المتوسطة

لكن ده موضوع تانى ربما نناقشه فى وقت لاحق

الاخ الفاضل طه

اتفق معاك ان البعض الان يخرج من مصر لمجرد الخروج منها او لا يريد العوده اليها وكمان هقولك بغض النظر عن اذا كان من الطبقه المتوسطه او فوقها او حتى وصل لطبقة فاحشي الثراء

بس تعرف؟

يمكن لانهم خايفين على اولادهم من الخضار والفاكهه المتغمسين بالكيماوي

او لانهم مش بيحبو يشربوا الحليب ابو مواد مسرطنه ده حتى طعمه مش حلو يا أخي ... جربته؟

او يجوز برضه يكونوا مش مستسيغين طعم الميه المتحليه بالمجاري

عادي يعني

بزمتك في ظروف زي كده مش هتحاول تخلع بجلدك لو قدامك فرصه؟

عالاقل هتخرج منها وتتمنى تشوفها تاني زي زمان

تتمنى ترجع لها في يوم من الايام اه .... بس مش قبل ما ترجع هي زي ما كانت

مش كده ولا ايه؟

بصراحه انا مصدقه ان في ناس كده ... وبصراحه اكتر انا بلتمس ليهم العذر وبصراحه اكتر واكتر انا واحده من الناس دي

نفسي ارجع اشوفها تاني زي زمان ونفسي ارجعلها وانا حابه ارجع لها واشتاقلها وادخلها من غير مبقى خايفه فيها من اللقمه اللي داخله معدة ولادي

ومع ذلك مقدرش اخرج من جلدي...بمعنى..أنا مصريه احب مصر واحب يكون ليا مكان فيها ومبحبش اصدق اني برجع لها وانا خايفه منها

لكن دايما عندي امل انها سحابة غامقه وهتعدي والسما هترجع صافيه تاني زي زمان

قول يا رب

سلام