عوضين أبو حمدان هو اللي جتل أبوك يا سويلم

[se_ Elsyed]

بق لي فترة عندي حالة قرف مقرفة مخلياني قرفان من نفسي .. مش من حاجه مُعينه .. لكن السبب الرئيس إني قاعد لأخر الصيف أعزب لوحدي بين 4 جدران وعندي وقت فراغ وملل رهيب .. وكل ما ييجي وقت الغدا عليه بأحس بإكتئاب ... وعندي مواضيع كتيرة جداً عايز أتكلم فيها لكن كل ما ادخل عالمنتدى إيدي تتيبس ومايبقاش عندي نفس اكتب حاجه ..

حتى أعز اصدقائي .. هاندي كرافت واللي بيمر بنفس ظروفي وقاعد يغني ظلموه هو راخر .. أهو مشغول هو كمان ويادوب بنتقابل نتغدا أو نتعشا أو نضرب ماتش كره سوا .. وولا هو قادر يسلين وولا أنا قادر أسليه .

حتى الراجل اللي بأرمي راسي على صدره وأقعد افضفض له .. موديست .. قاعد مكتئب هو كمان وحابس نفسه في البيت وسايب دقنه وحالف ما يستحمى و مش عايز يكلم حد .. لأسباب صيفية زهقية .. واللي زاد وغطى موضوع هروب هنري ميشيل اللي خلاه يكلمني النهاردة في التليفون ويقولي إرحم دموعي أنا مش ناقصك وناقص إس إمساتك ..

المهم بقى أنا أخترت عنوان الموضوع ده وقلت أرجع بموضوع خفيف يمكن الحالة تروق .... وده بعد ما قرأت مقاله للكاتب الرياضي إبراهيم حجازي يوم الجمعة الماضي وتحدث فيها عن حالة الحقد والكُره الشديد من جانب جماهير الإسماعيلي تجاه النادي الاهلي .. واللي بقت عاملة زي التُراث بيتوارثوه من غير ما يفهموا معناه .. لكن بيورثوه بعبله كده ..

ومن اهم مكونات هذا الورث تلك الحكاية اللي ما سمعتهاش غير من زملكاوي أصيل .وهو أخونا كوكو إبن أبي واوا عن إن السبب الرئيسي لكره الأسماعلاويه للاهلاويه إنهم - الأهلاويه يعني - ما رضيوش يستضيفوا النادي الأسماعيلي اللي اتهجر بعد النكسة وساب بلده . فمارضيش الأهلاويه يخلوهم يتدربوا على ارض أستاذ مختار التتش .. وناس كتير صدقت الكلام ده .. لحد ما ابراهيم حجازي عمل لقاء مع أحد أبناء ذلك الجيل وهو فاكهة الكرة المصرية الكابتن علي أبو جريشه والراجل نفى هذا الكلام جُملة وتفصيلاً وقال إننا لم نذهب للنادي الاهلي من اساسه لإننا لما نزحنا إلى القاهرة كنا نبحث عن ملعب نتدرب عليه وفي نفس الوقت المكان ده يكون فيه إقامة اللعيبه .. وده لم يتوفر إلا في أستاد حلمي زامورا اللي هو ملعب نادي الزمالك اللي كان زمان في غرف إقامة تحت المدرجات فكان اللعيبة بيتدربوا وفي نفس الوقت يقيموا هناك .. وبالتالي هذه قصة مختلقة لا صحة لها ... وذكر الرجل وقفة النادي الأهلي بجانب النادي الإسماعيلي في منافساته على أول كاس أفريقيا إلى أن فاز بها .. وكذلك وقفت الأهلي بجانبه شخصياً حينما تعرض لإصابة خطيرة في الرُكبة وكانت تهدد مستقبله الرياضي والنادي الأهلي هو اللي ساعده عشان يسافر ألمانيا ويتعالج عند أحد خبراء الجراحة الألمان المتخصصين في هذا النوع من الجراحات والحمد لله رجع الراجل تاني للملاعب سليم معاف .

أنا شخصياً كنت صدقت كلام كوكو وشركاءه الزملكاوية وقلت يمكن القصة دي تكون حقيقية والأهلي عملها مع الإسماعيلي .. لكن أتضح إن الموضوع عامل زي حكايات التار في الصعيد لما الأم تفضل ماسكه ودان إبنها من وهو صغير وتقوله " عوضين أبو حمدان هو اللي طخ أبوك وهو راجع من غيط البرسيم بالليل ولازم تاخد بالتار يا ولدي " .. ويتربى الولد على الحقد ويبقى متبرمج على هذه النغمة فقط بدون أن يسأل إزاي حصل ده وإمتى حصل أو غزاي اخد بالتار وانا بادوخ من الميه الساقعه ؟ .

كبر سويلم شويه وبقت أحواله ملطشه وما بقاش عارف لا ياخد بالتار ولا ياخد بخاطره حتى ... فإذا بأمه تتخن ودانه وتقعد تقوله " الاهلي هو اللي بيخطف منك اللعيبه عشان تبجى فاشل يا ولدي ... طخ الاهلي يا سويلم ... طخ الأهلي وأغسل عارك وعار جدودك يا ولدي "

وبالرغم من إن الأمور واضحه للكفيف وما فيهاش أي لبس .. إلا إن حمدان معموله غسيل ومكوة رِجل لمخه وما بقاش يفكر ولا يشوف إن لعيبة الأهلي اللي هما كانوا بيلعبوا للإسماعيلي كلهم كانوا متباعين لأندية تانية .. ونعيد كمان عشان الشطار يتعلموا :

- محمد بركات ... الإسماعيلي باعه لإتحاد جده وتألق هناك وكان حديث الوسط الرياضي هنا وأنا شخصياً كنت باتابع مبارياته بشغف .. ومن هناك راح العربي القطري وفشل فشل ذريع مع المدرب هنري ميشيل .. والأهلي أشتراه من قطر ... وهو في الأساس كان لاعب نادي السكة الحديد والإسماعيلي أشتراه .

- عماد النحاس .. الإسماعيلي برضوا باعه لفريق النصر السعودي والأهلي أشتراه من النصر . وهو في الأساس كان لاعب نادي أسوان والإسماعيلي أشتراه .

-

- إسلام الشاطر .. نفس الإسماعيلي باعه للزمالك والزمالك باعه أو أعاروا على ما أعتقد لإتحاد جده ومن هناك راح للاهلي ... وهو في الأساس كان لاعب نادي الأولمبي والإسماعيلي أشتراه .

- محمد عبد الله ... الصفقة الوحيده التي أشتراها الأهلي من الإسماعيلي بشكل رسمي بدون أي مشاكل وهو أساساً لاعب فاشل مزاجي اناني لا يحب إلا نفسه .

- حُسني عبد ربه .. باعه الإسماعيلي لنادي ستراسبورج الفرنسي عن طيب خاطر بـ 800 ألف يورو ثم استعاره منه مره أخرى بـ 300 ألف يورو لمدة موسم لما ستراسبورج نزل درجة ثانية الموسم الماضي .. وكان هناك شرط إن الإسماعيلي لو محتاجه بشكل نهائي يبقى يدفع 500 ألف يورو خلال عام ينتهي في 15/6/2007 م .. ولم يفعل ذلك الإسماعيلي لإنه رئيس النادي عامل نفيه حدق وفهلوي وكان الكومي عايز يطلشه ببلاش بحجة التجنيد والتنجيد والفهلوة .. فالأهلي دخل الصفقة زي الزمالك ما كان داخل أساساً مبكراً وعارض 700 ألف يورو لكن اللاعب لسه على قيد الحياه وهو اللي راح لستراسبورج وقال أنا مش عايز ألعب للزمالك وأرغب في الأنضمام للاهلي .

فحالة الحقد والغل دي اللي شفتاها بعيني وربنا هايحسابني على ذلك لا أجد لها مبرر غير العجز وقلة الحيلة .... ففي هذا الصيف وفي مباراة الدور قبل النهائي لكأس مصر كنت مروح البيت بسرعة يوم المباراة قبلها بحوالي ساعتين ووصلت طريق النصر بمدينة نصر وإذا بالمرور موقف الطريق .. ليه يا جدعان .. قالوا عشان جمهور الإسماعيلي قادم من مدينته بإتجاه أستاد القاهرة وبالفعل شاهدت عدة اتوبيسات .... وإذ بمنظر لا ينم إلا عن همجية وغوغائية من فئة لا تعبر بأي حال من الأحوال عن شعب الإسماعيلية المحترم المضياف ... هذه الفئة كانوا راكبين فوق الأتوبيسات مش جواها وقالعين هدومهم ومعاهم كمية طوب وواخدين الطريق كله رشق السيارات المارة بالحجارة .. ودي سيارات ناس يا إما راجعه من شغلها يا إما ماشيه في امان الله ورايحه في حال سبيلها ده غير شتيمة بألفاظ قذرة طوال المباراة ..... وطبعاً الإسماعيلي إتظبط في هذه المباراة .

السؤال هنا بقى : ليه كمية الحقد دي على ناس ناجحه وأين مكان الحب في قلب هؤلاء؟

وليه النادي الاهلي لا هو ولا جمهوره ولا حد معدي جنب النادي قال إن محمد فضل هداف النادي الإسماعيلي الحالي واللي احرز 15 هدف في 11 مباراة هذا الموسم في سابقة لم تحدث من لاعب إسمعلاوي في الدوري أن أحرز في موسم هذا الكم من الأهداف .. ليه ما قالوش عليه أهلاوي وإبن الاهلي ومن ناشئيه ؟ .. مش هو بس ... ده في كمان هاني سعيد وأحمد سمير فرج ومن قبله محمد جوده وموجود شيكو في الموسمين الماضيين ؟

- والفيلم اللي عملوه الإسماعلاويه وخرجوا بنعش وجنازة في تمثيلية لمنع رحيل حسني عبد ربه لا مبرر لها .. فكانت فين الجنازة دي لما نفس اللاعب إتباع الموسم قبل الماضي لستراسبورج .. وليه ما عملوش جنازة لاحمد فتحي اللي باعوه في نص الموسم الحالي وفي عز المنافسة وباعوه لشيفيلد يونايتد الإنجليزي .... وليه ما عملوش جنازة لهروب مدربيهم الواحد تلو الأخر سواء في بداية الموسم ده وعملها فيهم " مارك فوتا " الهولندي الفاشل واللي كان في فقرة في عقده تخلي النادي اللي بيشتكي لطوب الأرض من قلة الموارد وكان في شرط جزائي يخليه ياخد من عينه 75 ألف دولار للإسماعيلي ومع ذلك الكومي قاله .. دول كادو مني يا مستر فوتا وكإنها فلوسه ورثها عن اباءه .. وكانت فين الجنازة لما العقد بتاع مارك فوتا أتنشر في الجرايد وفيه شرط مهزلة عالمية بكل المقاييس وكان مكتوب فيه " إن في حاله تمكُن مارك فوتا من الحصول على عقد إحتراف خارجي لأي لاعب إسماعلاوي فيحصل على 10 % عمولة من قيمة العقد الإجمالية " يا صلا النبي يا صلاة النبي ... هو انت يا كومي جايب مدرب محترم ولا سمسار مواشي ؟

- وكانت فين الجنازة لما بقى لهم شهر بيضحكوا على الخلق ويقولوا لهم إن باتريس نوفو المدرب الفرنسي الحالي سافر فرنسا عشان عنده واوا في رجله وهايعمل عمليه وييجي بسرعة .. والفريق في أمس الحاجه إليه وهو ينافس في الكأس الكونفدراليه .. وكانت النتيجة إنه إتعادل مع المريخ السوداني على أرضه وأتعادل امبارح مع فريق نيجيري تعبان برضوا .. وبكده نقدر نقول إن الإسماعيلي صيف ... والراجل ريحهم إمبارح وبعت لهم إستقالته في مسلسل خايب ممجوج .

أرجو إن سويلم يرجع لعقله ويفكر في خيبته ويخطط لمستقبله وإزاي يبقى من الكبار .

[شينكاوي]

السلام عليكم , سي السيد حبيب الكل بما انك اثرت الموضوع ده فانا ارجو ان نكون منصفين في طرحنا للموضوع قول ليه كل جماهير الاندية_ الانديه مش السنيدة_ بتكره النادي الاهلي وهتبدا تكره الزمالك كمان بما انني زملكاوي فطبعا هكون متحامل علي الاهلي اكتر اكيد طبعا يا عم الحاج .

الاسماعلية وبورسعيد ليه بيكرهوا الاهلي لان الاهلي زي ما قلت قبل كده في موضوع العملاق الابيض الي اين ؟ان الاهلي نفس الحزب الوطني يسعي الي ( اهلنة) مصر وكان مصر لا يوجد بها نادي غير الاهلي دا غير الميديا الجبارة متمثلة في حجازي والزرقاني وسند و (داروين ) واهم واحد فيهم الحاج داروين .

المهم قصة النادي الاسماعيلي لما الاهلي رفض يدربهم علي ملعبه قصة احنا بنسمعها من زمان .

الاهلي لما بيروح بورسعيد بيوجبوا معاه هو والاتوبيسات احلي واجب ليه ؟؟؟

المهم ان الناس اتخنقت من سياسة القطب الواحد اللي ماشية في العالم امريكا - الحزب الوطني - النادي الاهلي طبعا والر يس .

شفت يا عم الحاج الموضوع دخل سياسة ازاي هيه كده ليه ما تسالنيش .

موضوع اللعيبة ده فيه كلام كتير قوي وانا مقتنع تماما ان كل اللعيبة دول دوروا علي مصلحتهم وراحوا الاهلي بس انت عارف لو ان ادارة الاهلي لا تتعامل بغطرسه -نفس الحكومة - كان ممكن تاخد اللعيب بالذوق وبالادب وغصب عن عين الاندية لان اللعيبة دول بيدوروا علي الفلوس مش انتماء واسال اسلام الشاطر نفسه اسلام طول عمره زملكاوي لكن راح الاهلي ليه ؟ اسمع اجابتك مدوية ملعلعة علشان الفلوس والشهرة ولو راحوا مثلا الزمالك هيبقوا لعيبة كسر زي محمود فتح الله واحمد مجدي لكن لو راحوا عم الكل الاهلي هيبقوا ايه ابطال ويستحقوا منتخب مصر حتي لو كانوا عبدالحميد حسن واكوتي وسماكه وغيره يا بوب شفت بقي الموضوع بقه ايه ميديا يا عم الكل وحجازي يمجد والزرقاني وسند يعظم وشوبير يهلل وعاش النادي الاهلي اسمع دي لما الاهلي ساب صديق ومشي امةتي وطرد سماكه ووقف ابراهيم سعيد وزمان طاهر ابوزيد واحمد صالح وعلاء ميهوب يبقي نادي قيم ومبادئ لما الزمالك يمشي القباني - سبب هزائم الزمالك من الاهلي - وشعبان الغلبان الطيب يبقي الزمالك ندل وبيمشي اللعيبة اللي قال ايه ساهموا في امجاده وكتييير وكتيير وللحديث بقية لاني عندي شوية شغل اخلصهم لحسن بكرة الصبح الرئيسي يعملوا لي فيها الديك الرومي وعلي فكرة انا برده نسيت اقولكم انني بكره الرئيسي عندنا في الشغل HEAD OFFICE مع الاهلي والحزب الوطني والريس - متقال طبعا - وسيكو سيكو حسني وكل الوزراء والمسؤولين هههههه شينكاوي

[Sharkiah]

بسم الله الرحمن الرحيم

وَأَيُّوبَ إِذْ نَادَى رَبَّهُ أَنِّي مَسَّنِيَ الضُّرُّ وَأَنْتَ أَرْحَمُ الرَّاحِمِينَ

صدق الله العظيم

[se_ Elsyed]

بسم الله الرحمن الرحيم

وَأَيُّوبَ إِذْ نَادَى رَبَّهُ أَنِّي مَسَّنِيَ الضُّرُّ وَأَنْتَ أَرْحَمُ الرَّاحِمِينَ

صدق الله العظيم

صدق الله العظيم

أولاً أنا مبسوط إني شوفتك بعد طول غياب

ولو كنت عارف إن كبير مشجعي الإساعيلي هاتبقى رجعته في موضوع من مواضيعي .. كنت خليت عوضين طخ سويلم من زمان ..

ثانياً : أنا مش فاهم إيه علاقة الأية بالموضوع يا كبير ؟

أما بخصوص العزيز شنكاوي ... فأهخلص حتتين الغسيل اللي في إيدي وأرجع أرد

[Sharkiah]

الله يكرمك ويحفظك وألف مليون شكر على كلامك

لو أذنت لى ها أرد على مداخلتك ، خاصه إنها جاءت كرأس موضوع منفصل ، بالتفصيل لاحقا

[Ahmad Farahat]

أولا أشكر الأخ العزيز جدا س.س على موضوعه القيم

ثانيا لابد من الرد على موضوع القطب الواحد والتي أثارها الأخ شينكاوي

يا أستاذ شينكاوي

ما هو الشيء الذي ينبغي أن يفعله الأهلي كي لا يكون قطبا واحدا؟

هل عليه أن يعلم ناديك وأندية الأقاليم كيف يكون التعامل وكيف تكون الإدارة؟

ما هو ده اللي ناقص

الإسماعيلي لم يهبط سوى مرة واحدة كانت على إيد الزمالك بينما حقق الزمالك الكثير من البطولات على حساب الإسماعيلي

الإسماعيلي لا يلعب أمام الأهلي لينتصر ولكنه يلعب من أجل ناد آخر

إن أندية الزمالك والمصري والإسماعيلي لابد وأن تقول شيئال مما قلت فهذه اللهجة أسمعها منذ وقت طويل ولكن ألا تعترف بأن مصيبة هذه الأندية في إدارتها وفي جماهيرها قبل إدارتها

لقد انتقد الأهلي في شراء عبد الحميد حسن وانتقد في رحيل الخمسة الكبار مطلع التسعينات

كما تنتقدون أيضا فما الفارق؟

الفارق أنكم تعانون عقدة اضطهاد سببها البحث عن مسوغات الفشل في الحياة وفي غيرها من الأمور

إن الذي أدى إلى هذه الحالة الأخيرة من الفشل هو شخص واحد صور لكم أنه يستطيع الفوز بالصوت العالي والمحاكم والدراع فاستبدلتم من هو أدنى بالذي هو خير

فهل هذه مسئولية الأهلي؟

أم مسئولية جمعية عمومية غير أمينة على نفسها وغير مسئولة أيضا أتت برئيس على قائمة لم يكن معها.........

هل هذه مسئولية الأهلي؟

إن كان الشاطر وبركات يشجعون الزمالك ويذهبون إلى الأهلي من أجل الشهرة والمال وإلى ما هنالك من هذا الكلام فما العيب في هذا؟

ألم يذهب حسام حسن إلى الزمالك رغم أهلاويته؟

ستقول لقد تركه الأهلي......وإن يكن

نحن نعيش عصر الإحتراف لكنكم لازلتم في غياهب الهواية

أنا لم أهاجم الزمالك لرحيل محمود والقباني رغم أن هناك في هذا الأمر عديد من الكوارث الإدارية بدءا من مدرب لا يعرف كي يبدأ ثم يرحل بعد ذلك تاركا النادي ثم يتوجه اللاعبان إلى فريق آخر ربما لم يذهبا إليه قط لولا قرار تعسفي كهذا لم يتخذ إلا بعد السفر.......

فهل هذه مسئولية الأهلي؟

ثم لماذا أصبحتم ناديا طاردا للاعبين لا يذهبون إليكم إلا بديلا للأهلي؟

لماذا أصبح الزمالك وكأنه ملهى كبير لا يضم سوى بعض المراهقين من اللاعبين الذين يلوون بأعناقهم على الخلق والبشر والمجتمع و الناس؟

الحل يا صديقي ليس في مسوغ تقدمه للآخرين بل في اعتراف صريح بالفشل........

فليس من واجب الأهلي أن يدير ناديكم وليس من شأنه أن يشتري اللاعبين لكم ولنفترض أن الزمالك حصل على خدمات حسني عبد ربه فهل سيغضب جمهور الإسماعيلية؟

وإذا ما أعاد الأهلي حسني إلى الإسماعيلي فهل سيرضى الجمهور الإسماعيلاوي.........

إنها حجة ليحصل الجزار على مزيد من النقود من زبونه وهو يعلم جيدا أن الزبون ليس سهلا........

عزيزي شينكاوي

قليل من الموضوعية تشفي المعدة

أخوك

أرسين لوبين

[شينكاوي]

الاخ العرزير ارسين لوبين

اولا اود ان اذكر نقطة قبل الدخول في لب الرد علي نا تفضلت به انفا وهذه النقطة تلخصها مقولة ( رمتني بدائها وانسلت) اولا يا عزيزي الفاضل هناك الكثر الذين لاموا مرتضي منصور علي اسلوب الصوت العالي وارهاب الاخرين وهم في نفس الوقت اكثر منصورية من مرتضي منصور نفسه اي انهم هم مبتكروا اسلوب الصوت العالي لارهاب من يخالفهم الراي وهم كثر في مجتمعنا المصري.

ندخل الي لب الموضوع يا سيد لوبين من قال لك اننا نطلب من النادي الاهلي ان يتكرم ويقود انديتنا فهذه الاندية بها جماهير محترمة جدا وتحب فرقها ولن تسمح للخصم بالتحكم في مصيرها وتسخير هذه الاندية لمصالحه فالاسماعيلي والزمالك والمصري والاتحاد وكل اندية مصر بها خبرات وكفاءات لا تقل عن الموجودة بالنادي الاهلي مع ملاحظة انك استخدمت نفس اسلوب رجالات الحزب الوطني في القول بانهم فقط في مصر هم الاكفأ وان احزاب المعارضة ما هم الا رجال الظل فقط الذين لا يصلحون للقيادة مما اوصلا سياسيا الي هذا الحال وكذلك رياضيا فللاسف نحن لم نصعد لكاس العالم منذ ان كنت انا طفلا اي منذ 17 عاما اي اربعة دورات يا عزيزي.

اتدري ما هو الفارق بين الزمالك والاندية الاخري والاهلي هو اتباع الاهلي لسياسة ( القديسين) وهو اسلوب اغريقي شهير اي ان تقوم بصنع اله وقديس حتي لا يتعرض للنقد كلما اقترفت يداه اثما لانه قديس وهذا اسلوب الاهلي مع اداراته المختلفة فياسيدي حينما اخطا مرتضي منصور الكل عارضه ووقفوا بوجهه لاننا مقتنعون بان الكل يخطا ولكن حينما يتهم رئيس نادي كبير بالفساد والاشتراك مع ابراهيم نافع في قضية وكالة الاهرام الشهيرة لم يجرؤ احد عن فتح فمه والحديث اتدري لماذا لانه قديس وحينما يمثل الخلوق محمد ابوتريكه للحصول علي ضربة جزاء اجمع الكل علي انها تمثيلية لا يجرؤ احد علي الحديث لماذا وبكل بساطه لانه قديس لا يخطأ.

الاهلي وبدون منازع في العالم بأسره يمتلك ميديا قويه وشديدة التاثير تلكم الميديا ليس لها صاحب ولا صديق تنقلب علي اي احد يوجه ولو تلميح خفيف لنقد النادي العظيم واحيلك الي ما حدث مع احمد شوبير حينما كان يقدم برنامج علي دريم وانتقد مانويل جوزيه في واقعة البنطلون الشهيرة والتي التقطتها عدسات المصورين قامت الميديا الاهلوية بشن هجوم علي شوبير شديد اللهجة ادي الي ان يتجرا جوزيه علي طرده من غرفة اللبس وكذلك ما حدث ما مجدي عبدالغني حينما وقف الي جانب النادي الاسماعيلي في احدث قضية سرقة للاعبي الاسماعيلي شن عليه هجوم بجريدة الاهلي الرسمية ادي الي ان يقول عبدالغني في برنامج الكرة مع دريم انه ابن من ابناء الاهلي ولا مزايدة علي حبه للاهلي وكذلك الهجوم علي حسن شحاته لمجرد انه زملكاوي مع ان الرجل لا يضم منتخبه سوي لاعب او اتنين من لاعبي الابيض.

وكذلك الهجوم الشنيع علي شيكابالا وسلطان لمجرد انهم اعلنوا اصابتهم مع المنتخب او اي كان السبب دون حتي السماع لما حدث معهم والسماع فقط لمن جعلنا نتلقي ثلاثة هزائم في بطولة مجموعتنا فيها من اضعف المجموعات .

وانت تدعي يا لوبين باننا لانقبل الا بديل الاهلي واحيلك الي موقع في الجول اليوم لتقرأ تصريح القيعي بانه كان يتمني ضم جعفر وزكي وشيكابالا للاهلي فلماذا ذهبوا للزمالك هل لان الاهلي طردهم وكيف يطردهم وهو يتمني ضمهم علي لسان عدلي القيعي نفسه اذن فلماذا المغالطات هل لانهم اختاروا الزمالك فهم لاعبون كسر ولا يصلحون كما حدث مع فتح الله الذي كان يريد ان يلعب للاهلي لولا الفوقية واكرر الفوقية .

يا عزيزي سر انجازات الاهلي ميديا قوية تزرع في نفوس الخصوم الوهن بالحديث عن خناقات وخلافات لم تحدث او حدثت ويتم تضخيمها لخلق حالة من الوهن في صفوف الفريق وهو نفسه اسلوب الوطني مع احزاب المعارضة .

واخيرا وليس اخرا نحن لا نطلب من الاهلي ان يهدي البطولات للانديه الاخري فهذا حق له فقط ولكن نطلب من المجتمع الوعي وعدم ان تصبح مصرنا كلها حزب وطني ونادي اهلي بشخص واحد فقط قادر علي قيادة البلد فهذا الاسلوب مرفوض ولن نقبل به ابدا لاننا لا نحب الحزب الوطني وكذلك لسنا اهلوية يا عزيزي لوبين.

واخيرا هناك مقولة ( من اساس الديموقراطية ان تعطيني الفرصة فقط الفرصة لاختلف معك).

[Ahmad Farahat]

أولا أنا لست في الحزب الوطني ولن أنتمي إلى الحزب الوطني بل وآنف من هذا.......

ثانيا شوبير أو مجدي عبد الغني يفعلان ما يريدان لمصلحتهما أو لمصلحة الهيئة التي يمثلاها وهذا شأن خاص بهما

ثالثا لست من الذي يحاكمون الناس بلا دليل ومصطفى بكري ليس الشخص المناسب للتصديق دائما

أما عن مسألة الميديا القوية فأنت تعرف جيدا أن الأهلي لا يمتلك في الإعلام ما تمتلكونه أنتم وتعالى نعد قدام بعض

ولكن مسألة البنطلون أو غيره ليه مبيبقلهاش تأثير في الأهلي

ده السؤال؟

لأن ببساطة الإعلام لا يستطيع تغيير مدرب الأهلي

أما عن حكاية القديسين فعليك أن تعرف شيئا هاما

في الأمم القوية لا ينبغي أن يقطع أحد في سيرة من سبقه هذا ما تفعله كل دولة محترمة فلا تجد خلفا لفولان يسب سلفه وينعته بالسرقة والفجور أما بالنسبة لأبي تريكة فقد قام بالتمثيل مرة واحدة فقط واعتذر عنها أما لاعبي الزمالك مبتكري التمثيل فقد فعلوها مئات المرات دون أن يعتذروا بل ودون أن يطالبهم أحد بالإعتذار

أما عن مسألة احترام الإختلاف فأنا أحترم اختلافك معي ولكن هناك أشياء لابد وأن تعترف بها

الزمالك ينهزم أمام الأهلي لأنه سيء وينهزم في سائر البطولات لأنه سيء لا لأن الأهلي يتحايل أو يخطف أو يفعل ما تقول

الزمالك انهزم أما الفيصلي وأمام الهلال وأمام المحلة فأين كان الأهلي؟

والأهلي ليس سبب عدم صعود مصر إلى كأس العالم كما أن الزمالك لم يكن السبب في عنفوانه في خروج مصر من الدور الأول للبطولة الأفريقية

حتى عندما فاز المنتخب بالبطولة الأفريقية الأخيرة والتي ضم فيها معظم لاعبي الأهلي لن أقول أن الأهلي هو التي أحرزها

هناك هيكل إداري فاشل في مصر جعل الأهلي أشبه ما يكون بقصر منيف في شارع حقير

أما عن مسالة شيكا وجعفر وزكي فيمكنني شرح أبعاد كل صفقة ولماذا لم يتمها الأهلي؟

أما عن مسألة الميديا فحضرتك لو تابعت الميديا كلها كانت عايزة الزمالك يكسب بالكأس ثم متجيب الميديا تلعب بدل اللعيبة أحسن

للأسف الشديد في أوروبا لا ينظرون إلى بعضهم كثيرا كل ينظر إلى نفسه فقط أما هنا فكل شخص يضيع الوقت بالنظر إلى الآخر من دون النظر إلى نفسه

أرسين

[شينكاوي]

شكرا اخ لوبين لقد لخصت الموضوع في كلماتك الاخيرة انت تعرف ما هو اصل الموضوع فوق خالص الاخ الحبيب المؤدب سي السيد - اللي ليه كام يوم بيغسل وحسسني انه بيغسل هدوم الجيش الصيني وما ردش - اتهم الزملكاوية ضمنا بانهم هم سبب كره جماهير الاسماعيلي للاهلي ان طلبت ان تنظر الفرق والاندية لانفسها اولا ثم بعدين تهاجم الاهلي ان كان الاهلي مخطئا هذه وجهة نظرك وانا اقول لينظر الاهلي لتصرفاته التي جعلت معظم جماهير مصر تكرهه .

اما ابو تريكه فانا لا اتكلم عن الرجل ذاته انا اتكلم عن هالة القديسية التي تحاط حول الرجل هو والخطيب وحمدي وغيره .

يا سيدي انا لا اكره الاهلي لانه الاهلي انا فقط امقت المنظزمة الرياضية الفاشلة التي تجعل عضو مجلس ادارة لاتحاد الكره الذي قام بفك سوسته البنطلون وانت عارف الباقي .

وبعدين يا سيدي انت بتقول ضربات جزاء للزمالك كانت نفعتهم بايه وعلي فكرة الاهلي هو اول من هزم من الهلال السوداني بالقاهرة والبن الاثيوبي وفريق فلافيو الانجولي والاتحاد السعودي وغيره يعني مش بس الزمالك.

واخيرا انا اشبه الحزب الوطني بالاهلي الادارة وليس الجناهير يا عم لوبين

ويجعله عامر