قرار عائشه كرتونه مشى ولا ايه ؟؟

[مومو الامور]

السلام عليكم ورحمه الله وبركاته

ياجدعان

حد من اللى متابع يقولى هل تم تنفيذ قرار عائشه ام كرتونه

قريت اعلان بيقول استقدام شغالات من مصر

والالتزام بالعقد الموحد

ارجو الرد من اللى عندة المعلومه الاكيدة

[شينكاوي]

السلام عليكم, انا اتكلم الان كمغترب مصري تهمه سمعة بلده وشرف وعرض بنات بلده اولا انا مش سامع حاجة عن الموضوع ده يمكن لانكم في السعودية واحنا بالكويت هذا القرار المهين لم يتم طرحه بالنسبة لدولة الكويت لكن تمت التجربة الاولية بالسعوديه واكيد ستعمم علي دول الخليج اللي انا اعرفه ولازم كلنا نعرفه ان الست الوزيرة -ام كرتونه علي فكرة انا لسه بضحك علي الاسم ده يجي من 2 دقيقة - هتعمم الموضوع وستنشط لتنفيذ اتفاقيات مع دول الخليج كلها .

انا طبعا مش متخيل اني اقوم الصبح الساعه 6 وانا طالع الشغل اشوف واحده مصريه في عز الشتاء والبرد بتغسل عربية مولاها وولي نعمتها-الكويتي او السعودي او الاماراتي - ومش عاوز حد يقولي هي اعمال منزليه لان كل الفليبينيات اللي بيعملوا كده برده اعمال منزليه مع الفرق ان الفلبين بتطالب بحقوق رعاياها والفليبنية تقدر تشتكي للسفارة اللي بتحاول تجيبلها حقها اوكي.

طبعا الممارسات كتيير واعتقد كل من ذهب للخليج عارفها كويس ده غير الاغتصاب وهتك العرض وقلة الادب والسفالة اللي بتسمعهم الخادمة انا لي اصحاب كويتين كتير جدا بنات ورجاله بحكم الشغل طبعا لما بسمعهم بيتكلموا عن الخدم نجد بقرف وبقول الحمد لله ان الخدم دول مش مصريين لكن لما دايما بعترض علي طريقتهم مع الخدم دايما اسمع هذول الخدم ملاعين انت ما تعرفهم وغيره يا معلمين.

انا ببقي متضايق جدا لما بشوف واحد مصري سايق ولا بواب الواحد بيكون في نص هدومه لان المصري المفروض مكانته اعي من كده بكتير اوكي .

هحكيلكم موقف حصل معاي شخصيا كنت بجد ممكن استقيل بسببه .

السنه اللي فاتت في شهر 8 كان في مدرسين ومدرسات جايين من مصر عددهم كبير قوي وفتحوا حسابات عندنا ومعظمهم اول مرة بالكويت اول ما طلعتلهم الكروت وجم يستلموها كانوا بييجوا 50 واحدة 50واحدة مع بعض والفرع صغير وزحمة والدنيا صيف وراكبين باصات ومشيوا علي رجليهم فترة طويلة المهم عملوا زحمة غير مسبوقة والعملاء الكويتين يسالو منو هذول تسمع دي مدرسات مصريات ليش يوبة ما يوظفون كويتين وريحتهم خايسة والمصريين كلهم ريحتهم خايسة واسمع بقي انا طبعا بيكلموني علي اني مش مصري وبجد بقولكم من الحر كانت ريحتهم تقرف الكلب وخلوا الريحة خايسة ده غير الهمجية وكانهم واقفين في طبور عيش والمسخرة اللي حصلت بجد مسخرة واسمع تعليقات من الموظفين اضحكوا لما تسمعوا مدرسة بتقول للفراش البنغالي يا استاذ يا استاذ انا كنت بموت من القهر والضحك ولا لما صورلهم البطاقات المدنية قاموا مطلعينلع ربع دينار ويتخانقوا معاه بهمجية غريبة ووصلة ردح انت ضيعتلي باسبوري باسبوري فين وكده يا معلمين .

ملحوظة احنا في مصر ما عندناش ثقافة البرفان يعني العطر انا ما بقولشي الواحد اللي راتبه 120 دينا يشتري جوتشي ولا اسكادا ولاحتي هيوجو ب 20 ولا 30 دينار بس في حاجة في الجمعية اسمها اكس ولا مزيل عرق لاني لاحظت كل ما يدخل مصري ما كتبي محتاج ارش برفان لان ريحت المكتب بقت تقرف وعيوني بدات تتعبني طبعا وغيره وغيره وغيره نفسي نبقي شعب نضيف وراقي زي بقيت شعوب الارض وبكده سعرك يزيد ومرتبك يبقي قوي لان اهم حاجة طبعا ريحتك و PERFORMANCE ده بيحصل مع الرجالة تخيلوا انتو يحصل ايه مع الحريم وشغالان كمان ولا خدم زي ما بيقولوا لك الله يا مصر.

[أبو حميد]

وريحتهم خايسة والمصريين كلهم ريحتهم خايسة واسمع بقي انا طبعا بيكلموني علي اني مش مصري وبجد بقولكم من الحر كانت ريحتهم تقرف الكلب وخلوا الريحة خايسة ده غير الهمجية

ملحوظة احنا في مصر ما عندناش ثقافة البرفان يعني العطر

لاني لاحظت كل ما يدخل مصري ما كتبي محتاج ارش برفان لان ريحت المكتب بقت تقرف وعيوني بدات تتعبني طبعا وغيره

أخي الفاضل

مش عارف أيه حكايتك مع الريحة الخايسة؟ دي تاني مشاركة ليك عن نفس الموضوع وكلامك أسمحلي كله تعميم زي ما يكون مكتبك تخصص مصريين خايسين فقط وكأن كل المصريين اللي بيدخلوه ريحتهم خايسة أنا أول مرة أسمع الكلام ده المصريين بالكويت زي ما فيهم عمال فيهم مستشارين ودكاترة جامعة ومديري شركات ومهندسين وأطباء ومحاسبين.

لعلمك أنا مهندس مصري وبيشتغل معايا عمال وسواقين مصريين والفراش مصري وكلهم بيدخلوا مكتبي لو عاوزين حاجة ومبشمش ريحة خايسة ولا أي ريحة. غالبا المشكلة عندك يمكن يكون عندك حساسية من الخياسة شوف مستشفى الراشد للحساسية أنا أعرف دكتور مصري هناك لو عاوز واسطة.

عموما متبقاش تقول لحد أنك مصري علشان متبقاش في نص هدومك لو شفت واحد مصري بيشتغل بواب أو سائق.

أسف لخروجي عن الموضوع

[badroora]

ماكنت ماشي كويس يا شنكاوى وكنت موافقة على كل كلامك لحد ما بدات تحكى الموقف اللى حصل معاك

بجد يا ريت تحذف الجزء الاخير من مشاركتك لانها لا تليق بانسان مصري شهم بينتقد اولاد بلدة بالطريقة دى

وطبعاء دا رجاء وليس امر

ثانيا بواب ولا سواق مش عيب عشان لما تشوف مصري تنكسف

كونا معترضين او متضايقين على موضوع خدم مصري مش عشان الشغل عيب ولا عشان بريستيجنا

لا طبعا اكيد عشان الحاجات اللى حضرتك كتر خيرك

ذكرتها

لكن اى شغلانه شريفة مش عيب والمكسب الحلال بردة مش عيب

انت ظروفك كانت كويسة وقدرت تتعلم وتاخد شهادة وتقعد فى مكتب بتكييف غيرك بقي ربنا مساوهمش بك

عشان كل زى نعمة يتعظ ويحمدربنا

[شينكاوي]

السلام عليكم ورحمة الله وبركاته, اولا اخي ابو حميد شاكر لك علي ملاحظتك عن التعميم التي سوف اخذها في الاعتبار ان شاء الله ولكن ان كان مناقشة واقعنا كمصريين يثير حفيظتنا فصدقني لن نصلح حالنا لان من بديهيات حل المشكلة ان تطرح اساس المشكلة .

وانا احترم وجهة نظرك اكيد لكن انا اعترض علي اسلوب دفن الراس في الرمال لان هذا هو واقع العمالة المصرية وطبعا اقصد الهامشية وانا عارف ان في مستشارين ودكاترة زي ما انا عارف ان المصريين في منهم كمان دلوقتي امتهن التسول بالكويت وغسل السيارت هتقولي مهنة شريفة هقولك عارف انها مهنة شريفة- طبعا غسيل السيارات مش الشحاتة-وتاني وتالت ورابع حاجة انا بتكلم عن اننا لازم تكون هناك نهضة تثقيفية للشعب المصري عموما في حاجات كتير منها المظهر وكيف تقدم نفسك كعامل مدرب يتم احترامك من رب العمل وتقديرك بالشكل المناسب .

واخيرا قد يكون خانني التعبير في بعض الالفاظ ولكني اعتذر فهدفي ما هو الا الاصلاحويا ريت يكون لدينا نفس ثقافة الشعب اللبناني مع اعتراضي علي بعض تصرفاتهم .

واخيرا شكرا يا اخوي ابو حميد انا مش محتاج وسايط ويا ريت توفر واسطتك لحد محتاجها بالفعل من اولاد بلدك العمال اللي مش لاقيين حتي الشغل في المعمار وبيشتغلوا اليومية في الحر من الصبح ب 2.5 دينار كويتي وشكراواسف ان خانتني الالفاظ.

[شينكاوي]

السلام عليكمورحمة الله , الاخت نجفة العزيزة والاخوة جميعا انا لا اهدف الي النقض لوجه النقض انا واحد مصري بتهمه مصلحة بلده اما الموقف اللي حصل معاي ده حصل فعلا وانا تغاضيت عن بعض او معظم التفاصيل والتعليقات التي سمعتها حتي من الفراش البنجلاديش لاني لو قلت جزء منها ممكن تولعوا في المشاركة بتاعتي من اساسه .

وبعدين يا اخت نجفة انا ساظل انتقض واقعنا الاليم الي ان اموت اعرف ان ذلك سيعرضني لكثير من النقض ولكني ساراجع نفسي لاري الصواب من الخطا وما هو صواب ساصر عليه .

وقبل ما تهاجموني انزلوا الشارع المصري وشوفوا شوفوا شباب زي الورد جامعيين بيشتغلوا في الامن لمدة 16 ساعة يوميا مقابل 80 دينار يقوم مسؤولهم المصري بخصم 10 او 20 عقابا علي اي تصرف يحدث منهم ول بالخطا .

#شوفوا العمال المصريين الي بيدفعوا 1200 دينار كويتي مقابل اقامة سنتين وبعدين يدور علي شغل لا يجد ويضطر يستلف ويسرق ويتصرف تصرفات مسيءة لسمعة بلده وابناء بلده ووحش حولي ليس ببعيد.

#شوفوا المصري الذي لا زلت اصر علي ان الصفة التي يلصقونها بالمصري هنا انه اولا حرامي وريحته خايسة ويقوم اهل البلد بالتعميم الي ان يثبت العكس وقد تختلف نظرة المواطنين الخليجين من بلد لاخر لكن هذا ما رايته علي الاقل في البلد الذي اعمل به.

واخيرا انا احترم وبشده هذا المنتدي لاني اعتقد اني ساجد هنا من يهمه بالفعل مصلحة بلده والغيرة علي كرامة المواطن المصري ورحم الله جمال عبدالناصر .

واخيرا لو انني مسؤول في مصر لن اسمح للعمال بالسفر خارج مصر الا بعد اعطاء دورات تثقيفية ومهنية علي يد خبراء مجانا وكيفية ان انمي العزة والكرامة لدي المواطن المصري خارج مصر .

واخيرا ان اسف علي الاطالةولكن اقصد التوضيح فقط.

[أبو حميد]

أخي الفاضل

نعرف جيدا أنك تقصد المصلحة العامة وأن حميتك لبلدك وليس لنفسك فأنت كأنسان بالتأكيد محترم في عملك ومقدر بين اقرانك.

ونحن لا نضع رؤوسنا بالرمال وبالفعل نناقش هنا كل المشاكل ولكن أسلوب مناقشة مشاكل الناس لا يكون بهذا الأسلوب وهذا فقط ما أردت توضيحه.

مثلك أنا كنت اتمنى ألا يضطر موظف الأمن الذي يقف على بوابة شركتي أن يدفع 12000 جنيه ليحصل على عقد ب 70 دينار شهريا كفرد أمن وهو خريج تجارة. ولكنها أحوال البلد الذي ننتمي جميعا له هي التي أضطرته لذلك. ولا أطلب منه أن يقتطع دينار من راتبه ليشتري بارفان ولكني ألوم كل من ساهم في وصوله لهذا المكان وكل من قلل الرواتب وفرص العمل بمصر حتى يغترب هذا الشاب ويدفع مبالغ طائلة ليحصل على فقط حق الإقامة ببلد كانت تعرض الجنسية على المصريين العاملين بها بالسابق فيرفضون لكون الجنسية المصرية لا تقدر بثمن ولا تقارن بأخرى.

فالمشكلة اخي الفاضل هناك بمصر والرائحة الخايسة هي رائحة كل مسئول ساهم في الوصول بنا لهذا المستوى وليست رائحة المدرسة التي تقبض مبالغ تافهة بمصر وتأتيها فرصة للخروج من هناك فتأتي هنا لتلقى على قارعة الطريق فتضطر للمشي في الحر الشديد حتى مكتبك وتضايق الجميع برائحة عرقها. تأكد أنها قريبا ستعرف مكان بيع البرفانات ولن تضايق أحد مرة اخرى.

[شينكاوي]

السلام عليكم ورحمة الله وبركاته , اولا شاكر لك اخي الكريم ولكم جميعا يا اخ ابو حميد انا لن اجرؤ علي ان احرض اي مسلمة علي ان تضع البرفان وتحق عليها لعنة الله سبحانه وتعالي فالرسول الكريم يقول (ايما امراة استعطرت فمرت علي قوم ليجدوا ريحها فهي زانية ) صدق رسول الله صلي الله عليه وسلم والحديث صحيح يا اخي والله العظيم انا لا ارضي لزوجتي ان تفعل - ان شاء الله لما ربك يفرجها واتزوج من اساسه- فانا لا ارضي للمراه الخروج من البيت اساسا لكن انا كنت احكي واقعة حصلت انا بتكلم عن رجال الوطن فالرسول صلي الله عليه وسلم كان ريحه كانه المسك مع انهم كانوا بالصحراء .

وفي نفس الوقت هناك ناس رائحتهم ما شاء الله زكية وطيبة مع ان رواتبهم في نفس المستوي 120 الي 150 دينار واعتقدت لو قرات ما كتبت كنت ستلحظ انني كدت استقيل بسبب كثرة التصريحات التي كانت تلصق بنا كمصريين وبالجنسية الهندية ان رائحتهم ليست طيبة .

عفوا حتي الكويتين يصنفون المصريين نوعين : نوع يصفونه بانه مصري ابن ناس وده يستحق راتب اعلي ومعاملة حسنة لا تفرق عن معاملة الجنسيات الاوربية وهذا النوع واكرر من وجهة نظرهم هو النوع طيب الرائحة مرتب الملبس.

والنوع الثاني يطلقون عليه الصعايدة ويصفونه ويشبهونه بالهندي والبنغلاديش وهو ليس بالضرورة ان يكون صعيديا ولكنه اي مصري عكس النوع الاول ولو انه حاصل علي الدكتوراة في مجاله.

اكرر انني لا اتبني وجهة النظر هذه ولكن هذا هو الواقع بهذا البلد الذي اذا اراد المصري ان يكون من ذوي المناصب والرواتب العليا عليه وبشده الاهتمام بمظهره وان تكون لده الشهادات الكافي .

وحتي لا اهاجم مرة اخري اؤكد انني لا اتبني وجهة النظر هذه لاني اعرف قوله صلي الله عليه وسلم في الحديث الشريف (لربما اشعث اغبر لو اقسم علي الله لأبره) صدق رسول الله صلي الله عليه وسلم.

[abo_sameer]

حاجه غريبه النظره الفوقيــه للناس الغلابا . العامل لايعرف للبرفان طريق .

ودا شغله ودي ريحته الطبيعيــه البرئه والله انها اجمل من رائحه بعض السجائر . او رائحه الفساد التي تعج بها مكاتب بعض المسؤوليه . فمهما رشو برافان فاريحه ال(( الخايسه تفوح ) كلامي للعموم وليس موجه لاحد بذاته . ولكنها مداخله عامه ارجو ان لا يساء فهم ما اكتبته .

العامل . بريحه عرقه . والجزار بريحه الزفر . والسماك بريحه السمك .

بعدين مهما نظرنا لفوق واننا كاشخاص نظيفين . ومرتبين ومعطرين . فثق ان هناك من طبقات البشــر من اعطاهم الله انهم يزدروون منك .. فانت بالنسبه لهم من الطبقه المنبوذه . فلاتستطيع الجلوس على طاولاتهم او في مقاعدهم او تمر امام طاولات بعض رجال الاعمال. وثق انهم ينظرون الى ملابسك والبذله اللي انت لابسها بــ 2000 جنيه وفرحان بيها انها حاجه قديمه ومهترئه . وعربيتك الي جايبها بــ 150 الف جنيه انها زوبه . وانها ارجوحه للاطفالهم .

العمل الشريف لا احد يخجل منه . والعامل في اي مكان محترم . اذا احترم نفسـه . يحدث بعض العبارات النابيه للعمال ولكن الله اعطاهم سعه الخلق , كما اعطاك الله سعه الخلق حين تتحدث او تطلب علاوه . او بدل من من يملك الصلاحيه في بلدك او بلد الغربـه .

مهما كانت رتبتك ووظيفتك فلا تنسي انك _اجيـــر _ عامل _ امام صاحب العمل اكان مصري اواجنبي . الخ ..

تم تعديل 7 أغسطس 2007 بواسطة abo_sameer

[شينكاوي]

السلام عليكم ورحمة الله وبركاته.

يا عم مين قالك انني لدي او غيري نظرة فوقية لاحد هذا انا لا جدي باشا ولا امير انا مواطن ابن مواطن عادي وربة منزل بسيطة زي ام اي حد العامل والنجار وحتي اللي بيلمع الجزم و يمكن زي ما قالت الاخت نجفة الله سبحانه وتعالي يسر لي تعليم كويس جدا في معظمه خاص لأني الابن الوحيد لأهلي والظروف خدمتني واشتغلت في مكان انا غير راضي عن العمل فيه من الناحية الشرعية لكن الحمد لله.

كل اللي كتبته اعتقد يوضح انني لا اتعالي علي الناس ولا انتقد احد بشخصه لكن واكرر واكرر ووضحت بما فيه الكفايه انني انتقد واقع المجتمع المصري بشقيه المقيمين بمصر والمقيمين خارجها ولدينا سلوكيات يجب ان تتغير لنستطيع ان نفتخر بمصريتنا .

عفوا انا من الممكن الا ارد علي كل مشاركة بهذا الموضوع لولا خوفي ان يعتبر المشارك هذا تجاهل مني او عدم اهتمام -وهي مش ناقصة- وسامحوني انني لن ارد علي هذه الجزئية التي اثارت حفيظة الجميع ولكن ساعود للمشاركة عن لب الموضوع فقط .

اسف مرة اخري لاني كتبت سيرتي الذاتية ولكن هذا السرد كان مطلوب للتوضيح فقط .

[tahereyad]

الأخ شينكاوي: كان من حظي انهارده الساعه 8 صباحا فالشغل أني اتشرف بقراءة مشاركتك الأولي,, و بصراحه كده كانت "الأصطباحه" اللي عكننت عليه باقي اليوم,,, و خلتني مليش نفس أفتح المنتدي طول اليوم,,, و كان كلي خوف اني ارد عالمشاركه باسلوب فظ زي اللي حضرتك استخدمته في كلامك عن المصريين, لكن أسعدني الحظ و قرأت الردود قبل مانام و الحمد لله وجدت ما أثلج قلبي,,,, أحيي جدا الاخوه أبو حميد وأبو سمير و الاخت نجفه علي الاسلوب الراقي جدا فالرد..

و أعذرني,, اذا كنا بنهاجم الواقع الاليم اللي بيحصل فالبلد و الفساد والاهمال اللي بيحصل,, فهذا ليس معناه أننا نهاجم ناسنا وأهلنا و شعبنا ونعيد و نكرر ما يقولونه ال.....مهذبون من الكويتيين.

[شينكاوي]

و أعذرني,, اذا كنا بنهاجم الواقع الاليم اللي بيحصل فالبلد و الفساد والاهمال اللي بيحصل,, فهذا ليس معناه أننا نهاجم ناسنا وأهلنا و شعبنا ونعيد و نكرر ما يقولونه ال.....مهذبون من الكويتيين

اولا لا استطيع ان افهم جملتك ثم انه كيف يمكن لي ان اقوم بنقد الواقع الاليم بدون ان يحمل ذلك في مجمله نقد للشخص الذي يقوم بالفعل اولا انني لا اعتقد اننا كمصريين لم نصل بعد الي الدرجة التي نقود فيها وطننا للتخلص من سلوكياته وتصرفاته السيئة لكن كل ما نحاول انتقاد سلوك معين داخل المجتمع المصري بشقيه داخل مصر او خارجها سوف نجد ونفاجئ ونصدم ان معظم الردود عاطفية في مجملها ونسمع ان هؤلاء غلابة وهؤلاء اهلنا ولا يجوز ان نتحدث عنهم بهذه الطريقة نعم هم اهلنا وغلابة هذا مما لا شك بهلكن هذه مبررات وليست حلولا بدليل ان معظم الردود حتي لم تتطرق للمشكلة ولكنها تطرقت لاسلوب السرد والاعتراض عليه وانني لا اشك ان الاخ الذي قام بطرح اساس الموضوع حانق علي وبشدة وذلك لانني قمت وبدون قصد طبعا بجعل الموضوع يخرج عن مجمله وتكون كل الردود فرعية لا علاقة لها باصل الموضوع الذي طرحه هو عن سفر الخادمات المصريات للسعودية واتعجب لماذا لم تعترضوا جميعا علي ربط لفظ خادمة الذي هو مهين في مجمله بالمصريات اتقد ان كل الامور التي ينظر لها بهذه الحساسية لن نقوم باصلاحها لانه ليس لدينا الجراة من الاساس لطرحها من اساسه لاننا نوجد لانفسنا مبررات لعدم الطرح .

والتحليل النفسي لهذ المبررات يقودنا الي ان هناك حالة حنق عام علي كل شئ لدينا هذا الحنق يقود الي الحساسية المفرطة التي بدورها تؤدي الي عدم الرضا عن مواجهة الواقع وان كان ظاهرا ظهور الشمس لمن لديه بصر .

وفي النهاية انا اكرر ان اوضاع المصريين بالخارج بحاجة ماسة الي اعادة النظر فيها من المغتربين اولا ثم من التشكيل الفاشل المسمي قصرا بالحكومة المصرية علي كافة الاصعدة .

[رمضان]

انا شايف ان شنكاوي خانه التعبير فقط واكرر خانه التعبير فقط فأحيانا نقول الفاظ في لحظة غضب او تسرع قد تفهم خطأ واعتقد ان شنكاوي سيقوم بحذف كلمة خايسة وبعض الالفاظ التي اعترض عليها الاخوة الاعضاء

على فكرة يا شنكاوي انا بالكويت برده وشايف حاجات كتير من اللي انت قلتها بس بدل ما انتقد حاولت انا وبعض الاصدقاء اننا نعدل شوية ياريت لو تقدر تعمل حاجة وتساعد اخوانك المصريين ومش عيب اننا نوجه النقد لبعض لكن العيب اننا نبص لبعض من فوق

وياسيدي طالما حضرتك واصل كده شوف لي شغلة معاك في البنك بتاعك ينوبك ثواب يا اخي اهو برده ناكل عيش ونشوف الناس اللي فوق عاملين ازاي وبالمرة نشوف شكل البنك من جوه عامل ايه

الا ايه البطاقات اللي المدرسين كانوا بيستلموها دي

[tahereyad]

كيف يمكن لي ان اقوم بنقد الواقع الاليم بدون ان يحمل ذلك في مجمله نقد للشخص الذي يقوم بالفعل اولا انني لا اعتقد اننا كمصريين لم نصل بعد الي الدرجة التي نقود فيها وطننا للتخلص من سلوكياته وتصرفاته السيئة

الواقع الأليم اللي بتكلم عنه و يحدث في مصر و كلنا نعرفه جيدا هو مظاهر الفساد,, الاهمال,, الرشوه,, الواسطه والمحسوبيه,, السرقه بكل أنواعها,, الاحتكار و بيع ثروات مصر...............

لكن ممكن تقوللي ايه من اللي فات ده عملته المدرسّه اللي قادتها ظروفها للسفر و المرمطه برّه البلد عشان ننقدها,,

ولا "العامل",, الي هو غالبا داخل البلد بيكون اسمه "عاطل",, و ربنا كرمه بعقد عمل بسيط,, يقدر ياكل منه و يعمله قرشين يساعدوه في بلده,, و ماعندوش الامكانيات اللي تخليه يركب سياره مكيفه عشان يتجنب العرق في مكتب سعادتك,,

و بعدين كتير من العمال,, اللي حضرتك بتتكلم عليهم,, و لظروف خارجه عن ارادتهم,, بيكونوا مؤهلات عليا,, يعني معاهم بكالوريوس زي اللي مع سعادتك,,, و نظرا لظروف البطاله و عدم التوفيق في الحصول علي عمل مناسب بيلجأ للعمل كعامل أو فرد أمن أو سوّاق..

اسمحلي أحكيلك عن موقف شهدته بعيني,, كنت باعمل في مصر في شركه فرنسيه,, و كان معي محاسب الشركه شاب في أول العقد الثالث,, واحنا داخلين من باب الشركه,, و جدته بيسلم بحفاوه شديده علي أحد أفراد الأمن المعينين حديثا و بياخده بالحضن كمان,, بعد ماتحركنا سوا عرفت منه أن فرد الأمن كان زميله في نفس الدفعه في الكلية........ أرزاق طبعا.

[شينكاوي]

شكرا للك يا ابو صيام يا عم دا انا كرهت كلمة خايسة اساسا ولو اني عارف ان الكلمة دي هتزعل حبايبنا مننا ولاني عضو جديد ومش عاوز اعطي انطباع سئ للاخوة الاعضاء ولكن يا اخي اعمل ايه عندي حساسية في عيني للريحة ايا كانت فاذا شميت ريحة مش ولابد اشوفلك عيني تدمع يا معلم ووالله العظيم وهذا ليس دفاعا عن نفسي هذه كانت اسوا ايام مرت علي بالكويت بسبب شدة التعليقات صحيح انني كنت ادافع وبشدة ولكن لاني شكلي شوية مش باين علي اني مصري فكانت معظم التعليقات تاتي من العملاء ويشهد الله اد ايه حاولت ان اساعدهم لدرجة اني اشتغلت شبه سواق تاكسي لهم لانهم كانوا بيجوا يوم الخميس واخر الدوام قمت بتوصيل مجموعة منهم اكتر من مرة لاماكن بعيدة مثل ابوحليفة والفنطاس وخيطان وكمان خدت مجموعة كروت سحب الي وكنت بروح لهم المدرسة علشان نسلمهم الكرت مع العلم ان هذا ليس داخل نطاق شغلي وكنت بحاول اساعدهم لكن واكررها حتي لو تعرضت للنقد كان السلوك الفردي فعلا لبعضهن مسئ لمصر من حيث التدافع واحيانا الخناق وسيبنا من موضوع الريحة يا عم .

مع العلم ان هناك كانت في مجموعات اخري من تونس وسوريا ومن هنا تمت المقارنة بين هؤلاء المدرسات والمدرسات المصريات وكانت المقارنة ليبست لصالحنا بالمرة .

ومين قالك انني واصل يا عم الله يكرمك بلاش تحرضهم علي ليقولوا انني قريب احمد نظيف ولا حاجة .

لو عاوز تشتغل في بنك لازم تكون بنكاوي اصيل وشغال في بنك هنا وعندك واسطة - مع ان الشغل في البنوك حرام_ عارف ليه لانك مصري في حين اضربلك مثل كانت هناك تعاقدات تتم في لبنان مع ناس ولا حتي عندهم خبرة وكانوا بييجوا ندربهم ونعلمهم يعني ايه شغل بنوك لكن لانهم لبنانيين فقط لاغير.

ودلوقتي يا عم الحاج التكويت علي ودنه لدرجة ان اخر سنة يعني من بداية 2007 وقفوا حتي طلعات لبنان وكل المتدربين اللي بيمروا علينا كويتين لكن لو عندك الخبرة اقابل حضرتك في اي حتة او تبعتلي اوراقك علي الايميل بتاعي ولو اقدر اساعدك ان شاء الله مش هتاخر .

[رمضان]

اشكرك ياشينكاوي على استعدادك للمساعدة بس للاسف انا مش بنكاوي ومش عندي واسطة الا ربنا الا هوه البنك اللي انت بتشتغل فيه بنك ايه بالظبط

بس اشمعنا الشغل في البنوك حرام للمصريين على العلم اني اعرف مصريين بيشتغلوا في أماكن ما تعرفش انت تدخلها بس مجرد انك تدخلها صعب بل مستحيل عليك

وعلى فكرة انك توصل ناس ده شيء يحسب لك مش تبقى سواق لهم ولا حاجة وخادم القوم سيدهم يا اخي

على فكرة برده اللبنانيين والتوانسة والاشكال دي مش زي ما انت فاكر يعني وكلنا عارفين بيشتغلوا ازاي وانت قلت فيهم معندوش خبرة

المهم شوف لي موضوع البنك ده

[badroora]

بليز يا جماعة يا ريت نرجع للموضوع الاصلي

احنا كدا خرجنا عن موضوع تساؤل الاخ موموالامور

ويا ريت اللى عنده اى اخبار جديدة تخص الموضوع يمدنا بها

سورى يا شنكاوى نسينا نرحب بك :P

اهلا وسهلا بك وفى انتظار مشاركاتك البنائه

ونود ان تشاركنا همومنا هموم ابناء وطن واحد

[رمضان]

اهلين نجفة منورة والله

بالنسبة للموضوع مفيش جديد وشكله كده اتدفن بسبب الضجة الاعلامية اللي حصلت عليه بس اعتقد انه هيطلع تاني بس في الخباثة المرة دي اصل الست الوزيرة كانت لسه جديدة وبتصيح في المواضيع دي واهل الخبرة من الوزراء التانيين نصحوها ان الحاجات دي تتم في الخفاء وبلاش تصيحي تاني

[شينكاوي]

يا سيدي انا لا اقصد ان المصريين هما بس اللي ممنوعين لكن الفترة دي فترة تكويت للمصارف الكويتية عموما اما من ناحية ان في مصريين شغالين في مناصب عليا لا احلم انا الغلبان بالدخول لها ده فعلا وامر واقع وحتي في شغلنا في ناس من TOP MANAGEMENT مصريين بل اكاد اجزم لك ان معظم الموارد البشرية مصريين ولكن انت عارف دي تعليمات البنك المركزي وزمان من كام سنة كنت لو دخلت لاي بنك ممكن تشوف مدير الفرع اجنبي دلوقتي لا لازم يكون كويتي والحالات الموجوده من الاجانب هي لافراد قدام او خبرتهم عالية جدا جدا جدا او لديهم واسطة قوية برده ودلوقتي لما انا اكون كفاءة في الفرع يدوني مساعد مدير وده الشخص او المنصب اللي بشيل الشغل كله علي دماغه وهو المسئول الاول عن كل شئ من البريد الصبح اللي التنسيق مع كل الادارات في البنك والصيانه واشياء اخري وده شغل متعب جدا لانك اول واحد تداوم واخر واحد تطلع بالليل واي مصيبة انت اللي في الوش بس انت عارف انا من فترة كنت في فرع زحمة جدا لم يكن لدي حتي الوقت لاعرف ان هناك انترنت بالجهاز لكن لما ربك كرم عدلها ورحت فرع جديد وبنش دبان اهوة, ايوة انا الوحيد فيهم اللي عندي شغل كتير بس مش ضغط اديني شاركت معاكم في المنتدي وبكتب وارد لما اكون فاضي وعلي فكرة انا الاجنبي الوحيد اللي بالفرع طبعا انا والفراش مع العلم بان العدد به 4 موظفين غيري و 11 موظفة وطبعا ال 15 كويتين ومعظمهم خريجين جدد بيفضلوا العمل بالبنوك لان رواتبهم اعلي من القطاع الحكومي وبياخدوا كمان حاجة اسمها دعم عمالة وطنية للعاملين بالقطاع الخاص فكل ده الموظف الجديد يعملوا بتاع 1000 دينار وده طبعا لاجل ان الحكومة تعمل توازن بين عدد الاجانب بالقطاع الخاص وكذلك ابناء الوطن وهذا ما يجعلني انا كمصري اتمني ان يكون لدينا ما لديهم ليس من امكانيات فهذه بيد الله سبحانه وتعالي ولكن ما لديهم من اناس يسعون لخدمة ابناء وطنهم لانهم يعتبرونهم مسؤوليتهم الاولي والاخيرة.

من ناحية اظبطك انا اديلك ايميلي ابعتلي ال C.V ,وانا لو اقدر اساعدك بجد مش هتأخر ان شاء الله.

[رمضان]

على فكرة كلامك منطقي وواقعي جدا

وربنا يوفقك للخير دايما يارب ومرسي على العرض بتاعك ويارب نشوفك كده زي دبدوب

حاول تنظر الى نصف الكوب الملأن