تساؤل حول المادة 80 من الدستور المصري . الخاصة بمرتب السيد الرئيس .

[badroora]

وانا بقرأ الدستور المصري المعدل لسنه 2007

وصلت للمادة 80 اللى بتتكلم على مرتب الرئيس

(المادة 80)

يحدد القانون مرتب رئيس الجمهورية. ولا يسرى تعديل المرتب أثناء مدة الرئاسة التي تقرر فيها التعديل.

ولا يجوز لرئيس الجمهورية أن يتقاضى أي مرتب أو مكافأة أخرى .

وبعدين اقعدت افكر واتسائل يا ترى مرتب الرئيس دا يطلع كام ؟

ويا ترى لما يسيب الرئاسة هيطلع كدا يا مولاى كما خلقتنى بما انه يعنى على حسب القانون لا من حقة لا يتاجر ولا يبيع ولا بيشترى

مش عرفة ليه صعب على اوى الرئيس لانه مقيد بقوانين وحد يحاسبه لو مليم دخل حسابه غير مرتبه

بعكسنا احنا اللى بنشتغل ونحوش ونهاجر ونروح ونيجي ومحدش يسالنا ولا قانون هيحسبنا

بالذمة مش الريس كدا يبضحى براحته وحقوقة فى سبيلنا كشعب

وكمان يا ترى لما بيزور اى مكان داخل او خارج مصر هل بياخد بدل سفر ولا بردة المرتب شامل كل شيء

انا جه فى دماغى انه بياخد 100 الف جنية مصري بالشهر

وموصلات وسكن ببلاش واكيد تليفونات ببلاش بردة

يبقي مش باقي غير الهدوم اكيد دى مصر اللى بتدفعله تمنها لزوم الوجاهه والشياكة

وطبعا فاتورة الكهرباء والزبالة بردة على مصر

يعنى مصر ادتله كل حاجة طب ليه بقي مش يتبرع بمرتبه دا للفقراء والمساكين واللى مش لاقين لا علاج ولا اكل طالما ربنا فاتحها علية ومصر مش مخلياه عاوز حاجة خالص .

انا لى عتاب على مصر وحسه انها بتعامل الناسDouble Standard بوشين ناس رفعاهم لسابع سما والنقيض تحت سابع ارض

.

طيب حد يقولى بقي مرتبه دا بيوديه فين ولا بيصرفه على ايه لما مصر موفراله كل حاجة

حد بقي يعرف رئيس الجمهورية بياخد كام فى الشهر ؟ :rolleyes:

تم تعديل 10 أغسطس 2007 بواسطة نجفة المغرورة

[tahereyad]

والله يا أختي نجفه أنا خايف عليكي من ساعة ماكتبتي أنك بتقري فالدستور المصري, وأنا حاطط ايدي علي قلبي,

مالنا احنا و مال الدستور المصري,, سيبيه لأصحابه الي بيظبّطوه و بيقيّفوه و يغيّروه

أنا خايف تشوفي الماده 25 و 30 بتوع الملكيه العامه و تتطلع في دماغك تبيعي الاملاك العامه انتي كمان زي "هاني رمزي"...

بس علي فكره هما قطعوا عليكي الطريق و شغالين فالبيع اليومين دول باديهم و سنانهم قبل ماحد يقرا الدستور و يعمل زي هاني في فيلم "عايز حقّي"

[Abofady]

انا اعرف الريس بياخد كام !!!!!!!

الريس بيهبر هبرة كبيرة قوى قوى قووووووووووووووووووى ، والا كان سابها من زمان ، او عين نائبا له مثلا ، لكنه يخاف يقاسمة فى الهبرة ، يعنى حد غاوى قرف ووجع دماغ ، ما يروح يستريح بقى ؟ واحد يسالنى يا كابتن دا راجل وطنى ، صاحب الضربة الجوية ، والضربة المستحية ، وضربة الدم اللى تاخدهم بالحزب الفقرى بتاعهم ، اقوله بامارة ايه يابنى ؟ الوطنية لها رجالها ، وهذا رجل باع البلد للاجانب ، وعمل لنا توشكى وطلعت فوشكى ، وعمل شرق التفريعة اللى جيلنا مش هيشوفها ،وطلعت شرق التفريغة، راجل بيبيع كل حاجه ،راجل كل مشاريعه فاشلة ، طيب والفلوس فين ؟ لا أحد يعرف رجل كل خبرته خطوة تنظيم ،محللك سر ، ثم استرح ، وقف حال البلد اكثر من ربع قرن دا احنا مش لاقيين كوب مياه نظيف يا راجل يا طيب .ومحافظ الدقهلية يقولك اصل الرجالة بتتبسط بالليل ****وبيستحموا بالنهار لما خلصوا المياه ، الله يحصك يا محافظ زى ما اضحكتنا وابكيتنا فى نفس الوقت ، كنا زمان بنرمى نفسنا فى النيل ، لما وسخوه ورموا فيه اوحالهم مات السمك وماتت اكبادنا .

وبمناسبة السمك احب اهدى محافظ الدقهلية اغنية ( اتدلع يا سمك ..... وارقص بحنان )

[د. السيد عمر سليم]

لا ياجماعة . . عيب الكلام ده . . يعنى أنا لو مش عارف إن نيتكم سليمة كنت قلت عليكم حاقدين على حسنى أو إنكم غيرانين عشان مش عارفين توصلوا للى وصل له.

بس أنا لى ملاحظتين صغيرين. الأولى على كلام الأخت نجفة اللى تاعبة عنيها فى قراية دستور ماحدش بينفذه - دستور يا اسيادنا _ وبعدين طلعت بمبلغ 100 ألف جنيه كمرتب لرئيييييييييييييييييييييييييس الجمهورية وهو ما ينفعش ياكل بيه ترمس فى أى حتة فى أوروبا. ولإنه بيسافر على سطر وبيسيب سطر ( يعنى أسبوع فى مصر وأسبوع فى الخارج) فطبعا يلزم له ميزانية أكبر من ميزانية وزارة الخارجية.

واحد صاحبى قال لى إن كل سفريات حسنى هى عزومات على حساب اللصوص اللى برهه ماشى - طيب ماهو لازم حايرد العزومة بعزومة - منييييييييييييييييييييييييييييييين.

أنا أقول لكم منين - من خزنة الدولة ( يعنى فلوس الغلابة). هى دى الحقيقة وهو مش محتاج حتى يطلب لإن الشماشيرجية اللى حواليه هم اللى بيصرفوا وطبعا جنيه على حسنى وجنيه فى جيوبهم.

الملاحظة الثانية إن كل مصاريف حسنى بصفته رئيس الجمهورية هى على خساب المخل- وده معمول به فى كل دول العالم. وبرضه له بند مصاريف سرية لزوم رشوة وشراء بعض الأجانب. لكن إنتم ناسيين إنه ممكن يتقاضى عمولات من الشركات الكبيرة الحرامية بتوع العولمة أو المعلمة وتلك العمولات تدخل فى حساباته ( حساببببببببببببات مش حساب واحد)السرية فى الخارج من برة برة. هو ده اللى ممكن يخلى عنده ملياراااااااااااااااااات فى الخارج وبالدولار والإسترلينى مش اللحلوح المصرى اللى ما يشتريش ولا حتى كوباية شاى فى مالطا.

والله أنا النهاردة بكيت لما سمعت بلدياتى إبن بورسعيد الصحفى محمد مصطفى شردى ونائب حى المناخ على قناة النيل بيقول إن فى ناس فى بورسعيد عايشة فى بيوت طفحت فيها المجارى حتى فى غرف النوم. صحيح إن أيامى فى الخمسينيات والستينات كان فيه فقر فى حى المناخ- لكن ليس بهذا المستوى الضحل ونحن فى سنة 2007 ، و"مصر بتتقدم كل يوم" حسب كلام أنس الفقى . وعندما قرأت كلام نجفة والزملاء الآخرين قلت لنفسى والله أنا لو كنت لسه فى بورسعيد وحصل لى الكلام ده لكنت جمعت اصحابى وهم كثيرين جدا وأغلقنا مدخلى بورسعيد الجنوبى والغربى وأعلنا استقلال البلد على الطريقة العراقية - والبورسعيدية قدها وقدود - إن الموت أرحم بكثير من العيش فى المجارى.[/font]

[se_ Elsyed]

أنا سايبك بقى لي كام يوم يا نجفه قلت يمكن تشيل الموضوع من نفسها

بقى بتسألي عن مرتب الكبير يا نجفه ؟

مرتب إيه يا ماما ؟ على رأي عادل إمام .. الناس دي مش بتبلع .. دي بتظلُط ..

خدي الحتتين دول يا نجفه عشان تعرفي كبير الراحمية جِبلي بياخد كام :

1- بالأوراق والمستندات فإن مرتب يوسف عبد الرحمن رجل السرطان الأول والذراع اليمين ليوشع بن والي وزير الزراعة كان يصل مرتبه إلى 400 ألف جنيه شهرياً في الأوراق بس ده غير الرشاوي والهبابير .. يبقى يوشع بياخد كام ... ورئيس يوشع بياخد كام ؟

2- من بؤ وزير الثقافة في برنامج البيت بيتك من يومين .... أيمن عبد المنعم موظف الوزارة اللي إتقبض عليه الإسبوع الماضي بتهمة الرشوة من شركات المقاولات المشرفة على مشروع القاهرة الفاطمية ومشروع النوبة الجديدة ... بدلاته وحوافزة فقط حوالي 30 ألف جنيه ... ده غير المرتب ... اعرف ناس تانيه كتير غلابه قضوا 25 سنة في العمل بالحكومة ومعاشهم 250 جنيه شهرياً وتخيلي إنهم يرفضون الإحسان او إن حد يعطف عليهم والراجل ده يخلي إبنه اللي في خامسة إبتدائي يشتغل في فصل الصيف عشان يجيب بضعة دراهم معدودة يساعد في مصاريف البيت عشان هو كبر وبقى مريض ومش قادر يشتغل ... وفي الأخير إتوفى ولسه الـ 250 ج زي ما هما .. ولسه الولد بيشتغل عشان يساعد والدته وإخواته البنات ... شوفتي بلدنا فيها إيه يا نجفه ؟

لكن لو كل واحد فينا فكر ولو لخمسة دقائق .... طب مبارك عنده 80 سنة دلوقت .... وهايعيش نقول 20 لحد ما يوصل 100 ... طب وفي الأخر .. مش هايموت برضوا زيينا ويقف قدام ربنا يسأله عن كل مليك من اين أكتسبه وفيما أنفقه ؟ وكذلك الباقيين الكبار الشايبيين العايبين

يا ماما .. مصر دي سبوبه وهبره كبيرة فوق ما تتخيلي .. ولا حد بيحاسب ح ولا حد بيقول لحد تلت التلاته كام ... تعرفي إن ثروة أحمد عز أمين الحزب الوطني وصلت دلوقت 60 مليار جنيه ..... يبقى جمال ثروته كام وأبو جمال ثروته كام لما دي ثروة بليه الصبي بتاعهم في العزبة ؟

تعرفي إنهم قبضوا إمبارح على رئيس مجلس إدارة شركة سيدي كرير للبترول بتهمة الرشوة بالصوت والصورة ... لحد هنا وعادي ما هو المهندس عبد الوهاب الحباك الذى كان عضو بمجلس الشعب والذى شغل مناصب رفيعة فى قطاع الصناعات الهندسية التابع لوزارة الصناعة إتقبض عليه من 10 سنين وعنده ثروة جامده ورصيد كوكتيل من العملات الأجنبية المتنوعة - لزوم التمويه -

لكن اللي مش عادي يا نجوفه إن الراجل بتاع سيدي كرير كان طالع معاش بعد إسبوعين بالظبط ... يعني منصبه الرفيع ده بيخليه يحصل على مرتب وحوافز وعلاوات وبدلات تمثيل وأرباح تغرقه هو وولاده لحد ما يموتوا في الففلوس ومع ذلك برضوا ما هو شايف اللي فوقيه بيعملوا إيه .. فقالك ألحق اعهبر لي هبره جامده خلال الإسبوعين دول وأهو ماحدش شايف حاجه مع إنه بلغ من العمر أرذله والإنسان الطبيعي لو كان عايش عيشة أبو لهب في حياته فلما سنه بيكبر المفروض بيتقرب لربنا ويعمل حاجه حلوه في حياته لإنه بقى رجل بره ورجل جوه ...

يبقى السؤال برضوا .. أومال اللي فوق وبيبعوا البلد عيني عينك بيعمول إيه ؟

ولسه بتسألي عن مرتب الكبير يا نجفه ؟

الكبير اللي عمره ما قدم إقرار ذمة مالية ؟

الكبير اللي شايف بعينه عيال لسه ما طلعتش من البيضه زي احد عز ومع ذلك يملكوا مليارات لا حصر لها - طبعاً دول ستاير بس بتوضع في الواجهة لكن الأبطال الحقيقيين يختفون خلف الستار -

[شينكاوي]

رحم الله الخليفة العادل عمر بن الخطاب ....

بس خلص الكلام.....

[شينكاوي]

سي السيد يا جبيب الشعب والاخت العزيزة نجفة والدكتور العزيز وكل اللي كتبوا مش شايفين انكم غرزتم في العش اللي بيدخلوا مش بيتلسع دا بيتحرق المواضيع دي خطيرة لانها بتمس الكبار لا الكبار قوي وانا لو الريس بتاع البلد دي اولع في المنتدي بكبره وما حدش يقدر ولا يجرؤ يسالني انت بتاخد كام لان دولنا دي عزب كبيرة وكبير العزبة يتصرف فيها زي ما هو عاوز واللي يتكلم من العمال والفلاحين يولع فيه وفي اللي جابه ان كان حي او حتي ميت .

وانا كرئيس مرتبي هو كل دخل البلد واللي مش عاجبه يوريني نفسه

اوكي اعتقد كده وصلت ولا لسه يا حلوين واللي ما وصلتش له الفكرة عادي حبيب موجود وفي رمي من البلكونات دلوقتي وحرق عربيات للي بس يفكر يسال السؤال ده مره تانية بقول يفكر مين باه بيفكر .

فهمتوا ولا لأ

ايه ده دا انا صدقت انني الريس ههه ههه ههه انا الريس ههه ههه

[د. السيد عمر سليم]

يا شينكاوى يا أخويا إنت عارف مثلنا الشعبى اللى بيقول حايسخطوك ياقرد. يعنى حسنى ولا حبيب ولا عمر ولا طنطاوى حايعملوا إيه فى اللى زيى - حايستنحرونى؟ وإيه يعنى!!!!!!

لكن إنت ناسى حاجة مهمة. دول قاصدين يسيبوا المنتديات اللى زى دى والبلوجات والمواقع اللى أسوأ منها يقولوا اللى هم عايزينه عشان يوروا العالم إن فى حرية كلام ورأى فى مصر. وكمان هم عارفين إن الشعب المصرى خايف منهم لدرجة الرعب وماحدش حا يفتح بقه مهما قلنا ومهما عدنا. وكمان عارفين إن ربع الشعب مابيعرفش يقرا ونصف آخر يادوب عايشين تحت خط الفقر بمسافة والربع اللى فاضل قاعد يجرى ليل ونهار عشان ياكل بقايا أكل اصحاب البلد زى أحمر عز وغيره اللى لا يزيد عددهم عن 10 آلاف فى مصر كلها. طيب قوللى معاليك مين اللى بيقرا اللى احنا بنكتبه؟ بلاش نقول مين اللى حايتفاعل معاه ويثور!!!!!!!! .

عارف مين اللى بيقرا كلامنا؟ . . مخابرات عمر سليمان وبعض "الصحفيين" بتوع الصحف اياها عشان يكتبوا عكسها مسحا لجزم اسيادهم.

ما تخافش علينا يا شينكاوى فقدرنا فى يد الخالق حتى لو قضينا على يد مخلوق.[/font]

[شينكاوي]

بسم الله و علي الله التكلي

يا دكتور من كلامك الواحد يأس يعني ايه الناس بتأذن في مالطة دا حتي مالطة بيقولوا انها اتملت مساجد

عليه العوض ومنه العوض

وخلي بالك هما دلوقتي بيجيبوا المشاركين عن طريق الاي بي ادريس بتاعنا ونتقابل في اي معتقل في مصر بس بلاش العقرب بلاش العقرب

يا رب .......

يا رب...............

يا رب .........................

[elneshawy]

يا جماعة طبعا إنتم عارفين الموقع إن الموقع محجوب فى مصر . فأكيد محدش بيقرأ و محدش هيتفاعل من اللى قرأ و اللى قرأ و يمكن يتفاعل هيتفاعل باللسان و الكلام إن لم يكن بالقلب . و طبعا السادة اللى حاكمين البلد عارف الكلام ده فمش هيفرق معاهم كلامكم و لا أرائكم .

مش كده و لا إيه

[etihad]

مهلا مهلا ايها السادة والاخت نجفة وسي السيد انتو كدة تعديتو كل الخطوط الحمرا ودخلتو منطقة تعتبرها الحكومة من المحرمات

كيف تصل بكم الجراة للتحدث في راتب الريس وكيف تصل بك الجراة يا اخت نجفة ان تطلعي حتى على نص الدستور المصري انت مش عارفة ان الدسنور ده ملكية خاصة ومن حق الحكومة حزف اي بند يتعارض مع مصلحتها ووضع اي بند يتلاءم معها يعني ممكن تصحي الصبح على نص صريح في الدستور المصري بمنع كل مغتربي الخليج من دخول البلاد ومصادرة جميع املاكهم لصالح الحكومة الا تتعظي بعد مما حدث لحمدي قنديل وهالة سرحان فقد طردوا طرد الكلاب من بلادهم ومنعوا من دخولها والله هذا الكلام يذكرني بايام الإحتلال البريطاني والفرنسي بل كان الإحتلال رحيم علينا اكثر من الحكومة

[badroora]

ماهى لازم الناس تفوق وتصحصح وتعرف ان فى شعب بيندهس تحت الرجلين وبيموت من الحر وهما طبعا فى برجهم العاجى المكيف مش حاسين بالشعب والله دا مش حقد عليهم ولا حسد لان دا خيرنا وشقي الشعب الغلبان اللى مش لاقي لا اكلة كويسة ولا همة عدلة يلبسها

انا من سنتين مدرب السياقة بتاعى بيقولى انتى مصرية وجاى تشتغلى هنا ليه ؟

فقولتله ودى فيها ايه قالى دا حسنى وولده ناهبين البلد بيقولى كان فى يوم مع حد من الشيوخ لزيارة فى مصر وكان موجود بالمكان دا علاء مبارك بيحلف انه صرف 3000الف جنية مصري فى سهرة

ممكن طبعا يكون الرجل دا بيكدب بس سبته وحسبت انا هاخد فى السنه كام مقارنه باللى بيصرفة بن حسنى فى سهره من دمنا كسرت اشارة ومفوقتش الا لما صرخ فيا ويقول ايش فيج ينحرق حسنى على ولده اللى خلاكى متركزيش فى اللى بتعملية

هو طبعا مفكرنى مش مصدئه اللى بيقوله انا كنت بفكر 3000 لو معايا مكنتش سبت بلدي

3000 الف دول ممكن يغيروا حيات كام حد فى بلدنا ممكن يجوزوا كام واحد مش لاقي شقة

وغير انهم ناهبين البلد بردة مزنقنها عالناس يعنى مش مقدمين تساهيل حتى للناس عشان تنسي بلاويهم شوية

هنا مثلا تلاقي الفقير والغني كلة عايش وكلة عنده عربية طبعا بتفاوت بس عالاقل البلد مسهلاها عالكل تخيل مثلا لما تيجي تشترى بيت ولا تاخد قرض بياخد قرض بتساهيل 25 سنه معنى كدا انه فى الشهر مش هيدفع حاجة او ميلغ صغير لا يذكر

وبدون ضمانات كمان شايف قد ايه الدنيا سهلة

مش انا اللى جيت فى مصر اشترى عربية يقولى لازم حد يضمنك قولنا ماشي حقكم شوية لازم عقار يضمن طيب بيتنا باسم جدى مش باسم ابويا حتى والمبلغ اللى هتغده هترده اضعاف اضعاف

تحس ان البلد معمولة لناس معينه وبس وباقي الشعب ماله الميكروباص ولا التوتوك ولا الاتوبيس اللى تلاقي الناس براه متريين ومتشعبطين والله مانا عرفة لحد مايوصلوا الشغل بيقدروا يشتغلوا بعد المخمضة فى الاتوبيسات دى ازاى

يا ريت بجد حد يكون عنده ضمير يقرى كلمنا دا ويوصله لناس بتحس بهمونا ناس مشلاقية تاكل وناس فى مارينا ربنا طبعا يزيد ويبارك بس لازم يكونوا عادلين شوية

احنا مش بلد فقيرة زى ما هما واهمنا ومطلعنا شحاتين قدام الدول الاخرى احنا بس لو الصحراء اللى اخدناها بدمنا لو استغلوها وزرعوها بدل ماهى منسابه كدا للديابه اعتقد خيرها هيكفينا وزيادة والشباب هتلاقي شغل وسكن بدل البهدلة والتكدس فى القاهرة والبطالة

ولا حتى يضطروا للسفر للخارج كخادمات ولا اى شغلانه باي مبلغ

بلدنا محتاجة حد يكون عنده ضمير يكون متمرمط ويعرف معنى الشقي عشان يحس بكل الناس

ومعناه الشعب اللى لسه بيسمع عن شرم الشيخ والغردقة وكانها بلاد محتاجين فيزا لزيارتها ولا عمرهم شافوها ولا هايشفوها غير من خلف شاشات التلفاز فى ظل الاب الشيخ مبارك

وعظيمة يا مصر يا ارض اللواء من فيلم عسكر فى المعسكر

تم تعديل 13 أغسطس 2007 بواسطة نجفة المغرورة

[se_ Elsyed]

المنتدى مفتوح في مصر وزي الفُل بدليل إن معظم المشتركين من مصر

-----------

الأخت نجفه ... قولي لمدرب السياقة - حلوه السياق دي - بتاعك أياً كانت جنسيته " إتلهي على عينك وخليك في حالك " فكلنا في الهم عرب" .. يعني مش حُسني بيهبر لوحده وباقي الحُكام العرب بيصلوا عالسجادة .

أما مقارنتك يا نجفه أحوال بلد زي البحرين بمصر .. فأسمحي لي أقولك إنها في غير محلها ..

** البحرين كلها ما تجيش قد شُبرا .. وبالتالي الناتج القومي لو إتوزع بالعدل عليهم فهايكفي أهل البلد ويفيض كمان ، دي حاجه ... الحاجه التانية أنا اعرف طُرق الإقتراض في دول الخليج جيداً وإنتي بتقولي التسديد على 25 سنة وبدون ضمان .. يمكن سمعتي كده .. لكن العكس هو الصحيح .. فمعظم أهل الخليج موحولين لحد رُكبهم في الديون والقروض . تعرفي إن 90 % من شعب الإمارات مقترض من البنوك وده لأسباب ترفيهية كمالية .. يعني لو حنفية البترول إتقفلت فالبنوك هاتروح حاجزه على هدوم الناس دي ... وبعدين البنوك لا تعرف عائشة قصدي يعني ما تعرفش أبوها .. نسبة الفايدة بتبقى محدده ويفضلوا يزغللوا عين الناس لحد ما يجيبوا رجلهم وهاتك يا قص في مرتباتهم ودخولهم .. يعني العملية مش سهلة زي مانتي متخيلة .

يعني عايز أقول إن كل بلد له ظروفه ...

[badroora]

صح كل كلامك بس احنا بنتكلم على المبدا

وموضع القروض دى مش الامارتيين بس والبحرنيين كمان نظرا للتساهيل اللى بتتقدم

وموضوع الضمان انا مو بحرنية ولما جيت اجيب عربيتيى طبعا انا جبتها بعد 5 شهور من سفرى مكنتش لسه حوشت تمنها

ومع ذلك مطلبوش منى ضامن واستلمت العربية خلال شهر من تقديم الطلب واستلمتها جاهزة

وخيرونى ما بين 5 سنوات او 7 سنوات والفايدة معقولة مش كتير ولا حاجة يعنى حوال 1000 دينار على 5 سنوات

يعنى الفكرة او المبدا واكيد كل شعب مش بيكون راضي عن الرئيس بتاعة بس احنا عدم راضانا غيرهم طبعا احنا معانا الحق تالت ومتلت

[شينكاوي]

اسمحولي انا لسه كان عندي عميل كويتي والله العظيم لسه النهارده الصبح الساعة 12 بيقولي انه اخذ قرض 64000 دينار علشان يشتري بيت شوية بشوية صرف المبلغ

مش كله حاطط منهم وديعة 12000 دينار ومحجوز علي حسابه علشان عليه تاخير بالقرض والفيزا والماستر ومحجوز ع الوديعه كمان وينزله فايده 36 دينار وبياخدوا منه فايده

220دينار احسبوها بقي .

يا جماعه الحل في ان مصر تتحول الي قلعه انتاجية عبر مشاريع قوميه -بس مش زي مشروع توشكي- البلد يملكها المصريين ولا تباع في سوق العبيد

ايوة مصر بقت اكبر سوق للنخاسة الاقتصادية في الشرق الاوسط انا سمعت ان البنك التجاري الكويتي هيشتري بنك مصر علي ما اعتقد ب 560 مليون دولار ههههه دول ما يعملوش شركة صرافة في الكويت .

وقبله بنك الاسكندرية عارفين القطاع ده علشان يتأمم مصر خسرت ايه ... دماء ابنائها .... هي دي تسوي عند مبارك .......لأما اعتقدش واسالوا اللي ماتوا من العساكر في

سيناء مش القدام لأ الجداد اللي قتلوهم ولا الكلب اليهود ...

عاوزين تعرفوا الريس بياخد كام... اسالوا الاخ اللي شافوا في الحلم مع نضيف ايوة نضيف بياكل قال ايه فول شوفتوا بياكلوا الفول بس فين في الحلم

[Amenemhet]

مرتب الرئيس الامريكى 400,0000 ونائبه 208,000 دولار سنويا .....

http://www.infoplease.com/ipa/A0875856.html

هل تعتقدى ان هذا هو راتب الرئيس الامريكى ونائبه

مرتب الرئيس الهندى 2,138 ونائبه 2,090 دولار شهريا

http://64.233.167.104/search?q=cache:zPmLH...t=clnk&cd=6

هل تعتقدى ان هذا هو راتب الرئيس الهندى ونائبه

مرتب الرئيس الكينى 27,600 دولار شهريا

http://www.afrol.com/articles/23226

هل تعتقدى ان هذا هو راتب الرئيس الكينى

هل يوجد اصلا معنى واقعى لهذا السؤال فى اى دوله بالعالم

مدرب السياقة بتاعى بيقولى انتى مصرية وجاى تشتغلى هنا ليه ؟

فقولتله ودى فيها ايه قالى دا حسنى وولده ناهبين البلد بيقولى كان فى يوم مع حد من الشيوخ لزيارة فى مصر وكان موجود بالمكان دا علاء مبارك بيحلف انه صرف 3000الف جنية مصري فى سهرة

3000 الف دول ممكن يغيروا حيات كام حد فى بلدنا ممكن يجوزوا كام واحد مش لاقي شقة

عشت فى الكويت لفتره قصيره جدا من حياتى ....... وتصادف فى ليلة غبراء انى تآخرت بالعمل وكان المكان فى حته مقطوعه شويه ...... خرجت من مقر الشركه واوقفت سياره اشبه بسيارات الميكروباص فى مصر ولكنها بالواقع سياره نصف نقل دوبل كابينه يقودها احد الاشخاص الذين يسمون بالبدون ..... هم يعتبرون نفسهم كويتيون ..... ما علينا ..... فلقيت الاخ ده بيقولى بصيغة تهكم ...... يا آخى الصينيين دول اذكياء جدا ..... قلتله اشمعنى ..... فقالى بيجيبوا المساجين ليعملوا بالزراعه بالكويت ..... المسجون بيستفيد والكويت بتستفيد والحكومه الصينيه بتستفيد ..... غريبه ان المصريين ما فكروش فى حاجه زى دى ..... فما كان منى الا انى قلت له ان مصر بتصدر للكويت اطباء ومهندسين ومحاسبين ...... صحيح المسجون والحكومه الصينيه يستفيدون ولكن انت تفتح بيتك للصوص وقتله وهنا ادرك هذا الشخص خطآ تفكيره.

ما آريد قوله اننا طالما بالغربه فاننا سنسمع العديد من الخزعبلات من اللى يسوى واللى ما يسواش ...... انا احترم الكويتيين والعرب والعديد ممن قابلتهم يحملون شهادات عليا ولكن هذا لايمنع وجود نفوس مريضه ...... مصر عامللهم عقده نفسيه واتصور ان مدرب السياقه الذى قابلتيه من تلك النوعيه ....... انا بس نفسى اعرف موضوع ال3000 الف ده يطلع ايه بالظبط ........ هوه فيه ارقام جديده طلعت ...... يمكن قصدك 3 مليون ..... ماشى ...... صرفهم على ايه بقى ....... اكل وشرب وحراسه ...... احب اشوف الفاتوره ...... عقلى مش مستوعب موضوع التلاته مليون فى ليله ....... وبعدين لو ابن الريس حيصرف 3 مليون فى ليله ...... انا لا اتصور ان الباشا مدرب السياقه او اى شخص يمت له بصله من ابعد ابعد بعيد سيكون سفرجى بالسهره ناهيكى عن شخصيه معزومه وبتدردش مع ابن الريس وبيقوله حلوه قوى يا باشا السهره دى .... كلفتك كام ...... فيرد علاء ويقوله 3000 الف.

[شينكاوي]

كلامك منطقي يا سيدي من ناحية وضع عمنا مدرب السواقة انه مش ممكن يفكر يدخل مكان فيه حد من الاسرة الحاكمة في مصر لانه ببساطه جنبهم ولا يسوي بس عدي دي لاننا طول ما احنا في الغربة وتسمع من العرب اللي الريس صاحبة واللي رئيس الوزراء حبيب قلبه ولو سالته مين هو رئيس الوزراء مش هيعرف حتي اسمه

تاني حاجه يمكن هو بيتمنظر علي الاخت نجفة والسلام

بس الاكيد ان مبلغ المصروفات يمكن قصدها 30 الف جنيه ودي حضرتك في قعده ممكن توزعها بقشيش في نايت كلوب تعبان كمان- ربنا يعيذنا واياك- المشكله مش هنا المشكله اننا شعب يعشق الاشاعات ويصدقها لان هناك غياب للمعلومة وفي غياب المعلومة تكثر التكهنات والاشاعات.

وبعدين انا في شغلي لو حد سالني انت بتاخد كام بتضايق منه فما بالكم بالريس

وخلاص بقه خلوا الراجل ياكل عيش .