لك يوم يا ظالم

[Abofady]

انتظرت طويلا حتى يعلق احد من الاخوة المتحاورين على افعال ظباط وامناء الشرطة المصرية على قتل المواطن المصرى نصر الصعيدى

ابن قرية تلبانة بمحافظة الدقهلية،والمواطن ناصر جاد الله فى القاهرة ، الاول قتلوه امام اهله وكل ذنبه انه ذهب يخلص بنت اخيه من انياب الامناء ولم يشفع لهم صراخ وعويل الحريم من اهل البيت وهم يضربون البنت المسكينه وهم يسألونها عن ابيها حتى حضر عمها لكى يلقى حتفه على ايدى زبانية الداخلية ، اما المواطن الاخر فى القاهرة قجاءت فرقة من خمسة عشر امينا لتاديبة وبعد ان اوسعوه ضربا وشجوا راسه اخذوه الى سطح البيت والقوا به من الدور الثالث فسقط ميتا وسط اهله وبكاء وعويل زوجته واهله ، امين شرطة اخر سرق موبايل و270جنيه من مواطن وعندما اشتكى المواطن امين الشرطة حضرت فرقة من زملائه لتاديب المواطن ، امين اخر عامل فردة على السائقين 25 جنيه يوميا ، واللى يعترض تحضر فرقة لتاديبه ...................... والسؤال ما هذا؟

هل ما تفعله الشرطة مقصود لتخويف الشعب ، بالا يرفع صوته ويعترض ، هل هناك توجيهات عليا لهم بان يفعلوا ذلك دون خوف من محاكمة او مسائلة ، ان هذه الافعال تزيد من كره الشعب لجهاز الشرطة ككل ، وقد عبر عن ذلك مواطنى قرية تلبانة الذين اتلفوا سيارة الشرطة بل ان احدهم جرى خلف الظابط وهو يهرول امامه واخذ منه سلاحة الميرى ، وحدث ذلك مع ظابط اخر وسلمت الاسلحة للمديرية فى المنصورة ، هل المطلوب ان تقوم حرب اهلية بين الشعب والشرطة ، ان الحكومة بغبائها تدفع الامور الى ذلك .

[mesryforever]

أخي العزيز أبو فادي

الخوف يعمل أكثر من كده - لو قامت البلد دي وكسرت قسم الشرطه وضربوا الضباط إللي فيه بالجزمه القديمة على مرأى ومسمع من الناس كان الوضع هيكون مختلف تماماً كان ضباط الشرطه فكروا مليون مرة قبل القيام بتعذيب أو قتل أي مواطن

وفي الأخر " والقصاص هو الحل "

[se_ Elsyed]

أخي العزيز أبو فادي

الخوف يعمل أكثر من كده - لو قامت البلد دي وكسرت قسم الشرطه وضربوا الضباط إللي فيه بالجزمه القديمة على مرأى ومسمع من الناس كان الوضع هيكون مختلف تماماً كان ضباط الشرطه فكروا مليون مرة قبل القيام بتعذيب أو قتل أي مواطن

وفي الأخر " والقصاص هو الحل "

إزاي بقى يا بو فادي .. بقى علشان هناك تجاوز غير مقبول من فئة ما في الشرطة يبقى نكسر وندمر ونضربهم .. مش هما دول اللي بيحموا الشعب ؟ مش هما دول اللي بسهروا 24 ساعة على أمن الوطن ؟

أي إهانة لإنسان سواء متهم أو بريء غير مقبولة بالمرة

واي تجاوز من الشُرطة غير مقبول

يبقى الحل هو إننا نُطالب بمحاسبة مثل هؤلاء .. ونطالب بتحديد سُلطة الشرطة وتحجيمها ووضعها في حجمها الطبيعي والصحيح كأحد أجهزة الدولة التي يُمكن حساب المنتمين لها بكل سهولة .

يعني في دول العالم المُحترمة نجد إن الشرطة زيها زي أي جهاز أخر .. ليست فوق القانون .. وقوتها التي تستمدها من اسلحتها وسلطاتها بتكون بحساب والمفروض هما اللي بيقوا في خدمة الشعب مش العكس ...

لكن عندنا الوضع مُختلف ..

عندنا الظباط بيتعلموا منذ نعومة اظفارهم في كلية الشرطة إنهم فوق الجميع .. وإنهم يعيشوا سفلقه على قفا الناس .. وتلاقي يا عيني واحد بياع جرانين غلبان فارش في الشارع بيكسب قرش وقرشين . نلاقي دول ييجوا يبلطجوا عليه وياخدوا منه جرايد ومجلات تُمثل مكسب إسبوع بالنسبة له .. ومنذ عدة شهور راح أمين شرطة ما يسواش تلاتة تعريفة يبلطج على واحد غليان زي ده ولما طالبه بالفلوس أخرج سلاحه الميري وقتله - اة والله ... تصور ؟ - وإذا أعطينا الظابط من دول بعض العذر في الإحساس بالأنا المتورمه عنده .. فما هو عُذر أمين الشرطة الجاهل ؟ .. بل إمتد هذا الإحساس إلى مندوبي الشرطة حامي الشهادة الإعدادية واللي هما لا محصلين عساكر ولا أمناء شُرطة ..

ونتيجية ذلك كله وجدنا تلك الفئة الفاسدة والتي هي جزء من هذا الجهاز وليس الجهاز كله- لكي تكون كلمة حق - مازال منهم ولاد ناس ومتربيين وبيخافوا ربنا .. وجدنا فئة منهم تعيش عيشة كلها حرام في حرام .. وما فيش حد بيسألهم : من أين لك هذا ؟ مع إن مرتباتهم معروفة وليست هي المرتبات اللي الواحد يعمل منها ملايين حتى لو أفنى عمره في الشرطة

سبق أن حكيت عن أمين شُرطة أعرفه شخصياً جاء من بلدهم حافي القدمين لايمتلك من الدنيا شيئاً .. وعندما تم تعيينه في أحد أقسام الشرطة وجدناه أصبح من الطبقة الثرية ويمتلك الأن 3 اتوبيسات كبيرة تعمل كميكروباصات ... ملكيه خاصة له - كل ده في سنوات قليلة جداً لا تتعدى 3 سنوات - وطبعاً لا رُخص ولا أرقام وما حدش يقدر يقرب من أتوبيسات الباشا .. ويقوم بركن الأتوبيسات بالمقربة من بيته ليلاً في منتصف الشارع ليغلق الشارع تماماً وممنوع المرور ... المهم هذه الإجازة وجدت أخي بيقولي : شوفت فلان جاي يدردش معايا وبيقولي إيه ؟ .. ما قدامكش بيت كبير للبيع في حدودج نص مليون ؟ فقاله له ليه ؟ فقال : الناس في المنطقة اللي أنا ساكن فيها إبتدت تتكلم على إن اتوبيساتي سده الشارع .. وأنا عايز بيت يبقى كبير أعمل الدور الأرضي فيه جراج أركن فيه الاتوبيسات وأسكن أنا في الأدوار العُليا .. والله يا حاج قدامي بيت للبيع في جسر السويس مساحته جميلة لكن صاحبه متمسك بـ 560 ألف وأنا باحاول أنزل منه الـ 60 دي عشان ما معاييش غير نص مليون ...

لما أمين شرطة كان أغلب من الغلب ويادوب كان مقضيها عيش وجبنه بقت دي ثروته بعد أقل من 5 سنوات من العمل في جهاز الهبر .. يبقى الظباط بيعملوا إيه ؟

[شينكاوي]

العالم دي لازم تنعدم في ميدان عام للعبرة .

العجيب ان الشرطة في بلاد الخليج ناس عاديين جدا ومتواضعين يا جماعه انا بشوف ناس بتقف في الدور وفي واحد شخصيا والله مساعد وزير الداخلية للشؤون المالية وراجل محترم جدا وبيقف في الدور وممكن يكون في الدور قدامه هندي ولواءات وغيره بس ناس محترمه بس طبعا لما تيجي سيرة مصر بيستغربوا من اللي بتعملوا الشرطة في الشعب .

اما امين الشرطة فيا عم الكبار كده بيتاجروا في المخدرات والسلاح وتسهيل دعارة امال انت فاكر الموضوع ايه يبيعوا لب لا يا عم الحاج الموضوع اكبر من كده الفساد بقي عيني غينك

[Abofady]

ارجو النظر علىإزاي بقى يا بو فادي .. بقى علشان هناك تجاوز غير مقبول من فئة ما في الشرطة يبقى نكسر وندمر ونضربهم .. مش هما دول اللي بيحموا الشعب ؟ مش هما دول اللي بسهروا 24 ساعة على أمن الوطن ؟

ارجو النظر على الجانب الاخر من المشكلة: ما ذنب اولاد هذا القتيل ؟ من الذى سيربيهم ، من سيصرف على زوجته ويعوضها حرماتها من زوجها ؟ واذا كدت وعملت واشتغلت لتصرف على اولادها ، هتشتغل فين ؟ واين هذا الشغل ؟ من الذى سيعوض الام التى ظهرت فى قناة الجزيرة وقالت كنت اتمنى ان ياخذوا عيونى الاثنين ويتركوا لى ابنى اتعكز عليه فى حياتى ، كيف تعيش هذه الاسر بدون عائل

اذا كانت الدولة قد اخطات باختيار موظفيها ومنهم ظباطها وامناء شرطتها فعليها ان تتحمل نتيجة اخطائها بمعاقبة وفصل كل من فعل ذلك فى حق الشعب وان تقوم بتعويض اهل المتوفين وعمل معاشات لهم حتى يبلغ صغيرهم سن الرشد .

كما انصح الداخلية بان تتخلص من المخبر ابو لبدة والبالطو الكاكى والامناء الذين ليسوا امناء والظباط الذين لديهم عقد نفسية ويجب الكشف النفسى عليهم كل فترة ، كما انصحهم بعمل تدريبات رياضية يمكن يخدلوا شوية عن الشعب ويكفوه شرهم ، ظابط ايه هذا اللى واخد بكالوريوس علشان يقتل الشعب ، ما احنا معانا بكالوريوسات وبنخاف نقتل النملة ، علشان قلوبنا نظيفة وعندنا رحمة بالناس واهم من ذلك بنخاف ربنا .

يجب اعادة ئاهيل هذا الجهاز الفاشل من جديد ، لان السلة اللى فيها برتقالة معطبة هتخرب السلة كلها