قبل ما يبدأ مولد الدوري ... ممكن نشجع فرقنا بأدب ؟

[se_ Elsyed]

قبل يومين من بداية الموسم الكروي الجديد ، أراني مطالباً بالتحدث عن الجو الفاسد للعبة كرة القدم في مصر واللي بيشارك فيه العديد من الاطراف منها :

1- إتحاد كُره : ضعيف والأندية أقوى منه ودائماً ما تفرض عليه كلمتها واللي بتقوله هو اللي بيتنفذ وخصوصاً الاندية الكبيرة طبعاً لإن البلد دي ما فيش للصغير فيها عيش .. والإتحاد الحالي بقى له سنتين مُنتخب وكل همه تنمية الموارد المالية وهو ما لا يعني الجمهور ولا يفيد فنيات كرة القدم كثيراً .. وفي نفس الوقت سايب الدنيا تضرب تقلب ومنتخباتنا بكل أشكالها عماله تخرج قفاها يقمر عيش وأخرهم منتخبنا الأولمبي اللي أخد كحكه قد كده الشهر الماضي في دورة الألعاب الاولمبية بالجزائر وجاب صفر بجدارة ... وها هو بطل أبطال افريقيا وزعيمها منتخبنا الأول على شفا الخروج من التصفيات ومن مين ؟ من موريتانيا ومورشيوس وبورندي وحاجه تكسف .. يعني لا قلنا الكاميرون ولا نيجريا ولو حصل وإتغلبنا او إتعادلنا مع منتخب بوروندي في المباراة القادمة على ارضه هانخرج بفضيحة بجلاجل واللي ما هايشتري هايتفرج علينا .

2- أندية وإدارتها الخايبة .. واللي لا هم لها إلا الولوله ورمي فشلها على شماعات الأخرين ... ومنها على سبيل المثال إدارة نادي الزمالك اللي شاغله جماهيرها بصفقات بملايين وناسية ان العملية مش بالكيلو ولكنها بالإدارة .. وأدينا شوفنا ريال مدريد أخد الدوري السنة اللي فاتت بطلوع الروح بعد عناء عدة سنوات أنفق فيها مليارات على شراء زبدة الزبدة من لاعبي العالم وجاب مدربين بعدد شعر راسه .. لكن لاعبي الفريق كانوا عاملين زي الخيول الجامحة اللي كل واحد بيجري في حتة على مزاجه وليس بينهم ما يجمعهم ... وكل شوية يصرح مسئولي النادي بإنه أعطى صفعه قوية للنادي الأهلي بالتعاقد مع اللاعب الفلاني او اللاعب العلاني وكأن التعاقد هو بطولة في حد ذاتها ؟ ولكنها لعبة معروفة للتغطية على الإخفاقات المتتالية لمجلس الإدارة وللأسف الجماهير بتسقف وتهيص بغض النظر عن النتيجة هاتبقى إيه .... نقول الاهلي او الزمالك لما يصرفوا ملايين أهي اندية عندها فلوس وفيها رجال اعمال بيبعتروا فلوسهم .. لكن تيجي تبص على نادي زي المصري البورسعيدي كل سنة رئيس العزبة قصدي النادي اللي ما بيتغيرش وهو الحاج سيد أبو متولي يصرف مش أقل من 20 مليون جنيه على شراء اللعيبة ومع ذلك كل موسم ينجو من الهبوط بأعجوبه ؟ تخيلوا السنة دي المصري أستغنى مش هانقول باع .. أستغنى عن 20 لاعب يعني فريقين إلا إتنين لعيبه وأشترى فريق تاني بـ 20 مليون جنيه ؟ وبرضوا النتيجة معروفة لان ما فيهوش إستقرار وبيدوب المدربين زي الشرابات والحاج أبو السيد هو المتصرف وصاحب الكلمة الأولى والاخيرة ويوم ما يقفل الحنفية النادي يموت من الجوع

3- الصحافة والإعلام ... وأنا بأسميه " إعلام التهييج " يعني في الفترة اللي ما بين الموسمين بييقى في كوتا مطلوبه من الجرايد والبرامج الإعلامية لازم يحققوها في فترة الركود .. وبالتالي لا مانع من تهييج الجماهير وشحنها وتقليبها على بعضها زي برنامج الأتجاه المُعاكس بتاع قناة الجزيرة .. وبيع يا عم الحاج وإن شالله تولع ...

4- الجماهير ..... اللي لازم يبقى عندها عقل ومش كل حاجه تصدقها .. واللي مش لازم تحرق دمها عشان لعبة بنشجعها عشان نفك عن نفسنا شويه بدل الكبت وبدل أمراض ضغط الدم ما تصيبنا ... يبقى ليه نحول هذه اللعبة إلى وسيلة لزيادة الكراهية والحقد بين الناس ؟ وليه خلينا موضوع مشاهدة المباريات في الملعب وكإننا رايحين نتفرج على ماتش مصارعة من اللي كان بيتلعب أيام الرومان وكان بينتهي بقتل أحد الطرفين ... وبقينا قاعدين في بيوتنا وجنب عيالنا امام شاشات التليفزيون ولا تخلو مباراة من ألفاظ قذرة يندى لها الجبين ويعاقب عليها القانون وكإن التشجيع ما ينفعش إلا بقلة الأدب وياريت حتى الجمهور بقى يروح بذلك الزخم والكثرة زي زمان .. إلا إن الإستاد تلاقي ربعه بس اللي مليان لكن في ناس ألسنتهم عامله زي المبرد في الشتيمة ...

فياريت كلامي ده يوصل لك مشجعي أو المهتمين بكرة القدم .. وكل نادي يخليه في حاله .. والجمهور يشجع ناديه ويقف جنبه في الحلوه والمُره ... وكل ادارة نادي تهتم بفريقها فقط وتواجه نفسها وتصحح أخطاءها ولا ترميها على الأخرين ....

ممكن ولا مش ممكن ؟

[شينكاوي]

يا سي السيد يا حبيب الشعب لماذا تحكم علي تجربة الزمالك بالفشل قبل ان تبدا هو نفس المبدا اهلنة مصر والسلام ولا ايه يا حبيب الشعب

احنا الزملكاوية راضيين وان شاء الله خير يا ابو السيد يا ملك