توم آند جيرى .. حكومة وشعب

[se_ Elsyed]

لو الحكومة فاكرة إنها ممكن تفترس الشعب بسهولة من غير ما يرد ... تبقى لا مؤاخذه حكومة عبيطة

ما فيش حد قليل الحيلة .. وخصوصاً لما يُمارس عليه مختلف انواع القهر والتضييق والنهب بشكل مُنظم

ما دفعني لكتابة هذه السطور هو كم الإعلانات .. بل سيل الإعلانات اللي قرأتها مؤخراً عن مشروع " إبني بيتك " وهو بإختصار مبادرة من السيد الرئيس القائد - وكإنه قاعد في عزبة أو طشت وبيوزع الأراضي دي من ملكه الخاص ... هذا المبادرة كانت في فبراير الماضي وهي عبارة عن تخصيص أراضي للبناء في المُدن الجديدة لمحدودي الدخل ومساحة الأرض 150 متر .. مسموح لك تبني بيت أرضي + دورين على 63 متر والدولة تساعدك بـ 15 ألف جنيه قرض لا يُرد والدولة بتبيع المتر بـ 70 ج والتسديد على 7 سنوات ... بصراحة يا بلاش وفرصة بجد للجادين

لكن فوجئت بإعلانات عن شراء إيصالات المشروع من الناس بأسعار تبدأ من 35 ألف جنيه ... بس الورقة بتاعت المشروع من غير ما تدفع ولا مليم ...... وطبعاً دول سماسرة أراضي

يا نهار مش فايت .. حتى المشروع اللي الدولة عاملاه للناس الغلابة محدودي الدخل اللي عايزة تبني حتت بيت على قدها برضوا بقى فيه لف ودوران ...

ومع إن الدولة واضعه قيود لضمان عدم التصرف في البيت بالبيع أو الإيجار ... إلا إن اللي يقدم السبت يلاقي الحد قدامه .. والدولة قدمت السبت وبهدلت الشعب ... خلاص بقى تشرب .. والناس هيوروها شغل حلق حوش .. وزي ما سبوبة بيع أراضي القُرعة في المدن الجديدة رفعت ناس وخليتهم مليونيرات .. فدي كمان هاترفع ناس وهايعملوا لهم قرشين حلوين ...

الأغرب برضوا إن في قانون من زمان في مصر بيعطي الحق للمعوقين إنهم يحصلوا على سيارة مُجهزة طبياً بإعفاء جمركي حوالي 20 ألف جنيه ويا إما يستوردها من بره يا إما يشريها من بروسعيد .. يعني لو العربية تسوا 70 ألف في مصر .. فمن بورسعيد بيجيبها المعوق بحوالي 30 ألف ... ومالوش حق يبيعها إلابعد 5 سنوات .. ومالوش حق يوكل حد يسوقها بدلاً منه ... ومع ذلك تجار السيارات عاملين لحد دلوقت احلى شُغل وما تقولش لعدوك ... بيجيبوا المعوقين الغلابة اللي لو شاف الواحد منهم ألف جنيه حته واحده ممكن يغمى عليه ... وبيظبطوا له أموره في القومسيون الطبي وبيشتروا بإسمه عربية من بورسعيد وعيش يا عم الحاج ويطلعوا هما بالهبرة وكل سنة وإنت طيب ..

الحالة دي بقى شوفت منها بعيني الإتنين ألاف الحالات وخصوصاً في المناطق العشوائية أو المناطق اللي كانت زراعية من زمان والدولة الزمن وقف عندها ولسه بتقول عليها أراضي زراعية مع إنها بقت في قلب القاهرة وما فيهاش عود أخضر .. فالدولة عشان تحافظ على تلك الثروة الزراعية البائدة منعت توصيل المرافق لهم مع إن تلك المناطق ومنها على سبيل المثال أراضي ومساحات مهولة في " مدينة السلام " وبها ألاف من البشر ساكنين ومترستأين ومخلفين صبيان وبنات ... ومع ذلك .. هاتمنعي يا دولة المرافق عننا ... حاضر ... فهناك تلاقي احلى سرقة تيار كهربائي .. وأحلى توصيل مياه وصرف صحي بلوشي ومن غير ولا مليم .. والدولة عارفه ومطرمخه وكل شوية بتوع الحي ينزلوا ياخدوا اللي فيه النصيب ويفضلوا ماشيين ... طب ما يا أغبياء ما توصلوا للناس دي وفي نفس الوقت تحافظوا على الأراضي الزراعية الحقيقية اللي في الأرياف اللي برضوا فيها تلاعب للصبح .. بدل ما تضيعوا على أنفسكم ملايين الجنيهات تحصلون عليها نتيجة توصيل تلكك المرافق لمثل هؤلاء ...

طب واحد يقولي طب ما هو العيب على الناس ...

أقول له أيوه ... بس ما تنساش إن رب البيت ماسك طبله قددددددددددددد كده عمال يطبل ... يبقى ليه بتطلب من باقي أفراد البيت إنهم يلتزمو الصمت ويقعدوا مؤدبين ...

وبعدين كل واحد يشوف رزقه ويشوف له سبوبه يطلع له منها بقرشين في الإيام السودا اللي الحكومة مورياها للناس ...

وطالما إنت بشر وبتضع قوانين وقيود .. لكنها مليئة بالثقوب والثغرات والإستثناءات وانت أول من يخرق تلك القوانين ... يبقى إستلم بقى وشوف الناس هاتعمل إيه ... ماهو ما تبقاش النهيبة موجودة قدام عنيهم والحكومة عماله تهبر والناس هاتقف ساكته ... او على رأي المثل الناس مش هايبقوا زي حمار الفكهاني .. اللي شايل الفاكهة إيشي عنب وتفاح وكانتلوب وحركات وهو محروم يذوقها وكل اكله برسيم ودره .. ده لو لقاهم أساساً

دي أمثلة بسيطة على لعبة القط والفار الازلية بين الحكومة والشعب او لنقل بعض الشعب .