قطر..قزم يريد ان يصبح عملاق

[إبن مصر]

ياريت يا عم حسن انت وابو زيد تتعلموا التاريخ وتعرفوا مين الرساله الولى اليهوديه ام المسيحيه ام الاسلام وفين كانت دوله بنى اسرائيل

ودستور اسرائيل ينص على انها دوله يهوديه زى ما مصر دوله اسلاميه ولبنان دوله مسيحيه

وهل تعلم ان بالكنيست الاسرائيلى اعضاء مسلمين؟

وانا ابن مصر بس الفرق بينى وبينك انا واقعى وانت خيالى

لا انت لا ابنها ولا تعرف عنها وعن ولادها حاجه وطبقا لقواعد هذا المكان لن أزيد فى الرد عليك واتركك مع الصابرين الذين يسحاولون ان يعرفوك ما انت به عالم ولكن أشم رائحه غير جيده ....

يا اخ ابن بلاد الله كلها ..... رجاء تخير الدقه فى من تريد ان تغيير مفاهيمه .... ما تتحدث عنه تفترض انك تتحدث مع سذج ام جاهلين .... لا حول ولا قوه الا بالله ...

واوعى حد يقولى اهدا وتناقش مع الاخر ....

وانت يا ابن العالم كلخ ماتتعبش نفسك وترد ...

انــــا ابن مصر

[disappointed]

بس جاوب على سؤالى

الصومال والبوسنه فيهم أيه من خيرات اومواقع استرتيجيه يا حسره؟ عشان امريكا تطمع فيها؟

لا......لا....لاااااااا

فى دى عندك حق

فعلا

الصومال والبوسنه ليسا موقعين استراتيجين أبدا علشان أمريكا تطمع فيهما

يعنى....مثلا...مثلا.... الصومال دى ولا هيّه الدوله المفصليّه فى القرن الأفريقى ولا حاجه

والقرن الأفريقى ده ولا استراتيجى ولا له أى لازمه غيرش بس انّه خبط لزق محوّط على مضيق باب المندب

ومضيق باب المندب ده مالوش لازمه من أساسه....ده حتّى حتّه مضيق لو اتقفل أو اتلغّم او حصل فيه مشاكل يادوب كل خطوط التجاره والشحن البحريّه حتقف بين جنوب شرق آسيا والشرق الأقصى من ناحيه وبين أوروبا من ناحيه ثانيه

ده حتّى مضيق باب المندب مالوش علاقه ولا أهميّه خالص بقطع الأسطول الحربى الأمريكانى اللى مرشّقه حواليه (بأمارة المدمّره كول :wink: ) , طيب...ده حتّى أمريكا مش مهتمّه بالمنطقه دى خالص بأمارة ماهى مش مكدّسه طرّادات ومدمّرات وحاملات طائرات قبل منّه وبعد منّه علشان تبقى واقفه زى القضاء المستعجل وزى بلطجى ناصية الشارع وهجّامة العزب وتقوم ايييييه....تقوووووم ناططططططه وهاجمه على أى حركة نقل بحرى مش عاجباها ومثبّتاها ومفتّشاها (بأمارة شحنات البترول العراقى اللى كانت بتمنع مرورها وبأمارة شحنة السلاح الكورى الشمالى اللى كانت رايحه لليمن ...قوووم ايييييه....قووووم الأسطول الأمريكى فى المنطقه اللى مالهاش لازمه دى راح مثبّت المركب وفتّشها وعلشان يعدّيها لليمن طلب منها طلبات أمنيه واستراتيجيّه وافقت اليمن عليها فراحت أمريكا مفوّته المركب وشحنة السلاح والصواريخ الكوريه الشماليه لليمن وبعديها طلع "آرى فليتشر" المتحدّث الررسمى باسم البيت الأبيض علشان يعلن الخبر ويضيف ان أمريكا قالت لليمن ان دى آخر مرّه -أصل كان فيه مرّه قبل دى وكانت برضه صواريخ كورى شمالى لليمن بس أمريكا عدّيتها مقابل التسهيلات اليمنيه لعمليّات أمريكيّه فى أرضها بأمارة الزوووو زوووو بتاع الطيّارات الأباتشى الأمريكانى على سيّارة من يشتبه فى أنهم تبع تنظيم القاعده على أرض اليمن- وطبعا دى آخر مرّه لأن اليمن خلاص مابقاش عندها تسهيلات أو تنازلات أكثر من كده تقدّمها لأمريكا :wink: )

ده طبعا غير ان القرن الأفريقى ده حتّة أرض أمريكا مش عايزه تنطط فيه الاسرائيليين ولاحاجه (بأمارة المهندسن والخبراء وبتوع الموساد اللى أمريكا سهّلت دخولهم لاريتريا ومنها الى أثيوبيا :wink: وبأمارة مهندسى السدود الاسرائيليين اللى مرشّقين بمساعدة أمريكا فى أثيوبيا علشان تنفيذ مشاريع السدود اللى حتقريف دولة مصب زى مصر :wink: وبأمارة الفريق الاسرائيلى الأمريكى المشترك اللى ضرب الحفّار والمعدّات المصريه فى السودان واللى كانت بتعد لمشروع مائى وزراعى مشترك لم يتم الاعلان عنه :wink: وبأمارة كمّاشة الجنوب التى تريد أمريكا بمساعدة اسرائيل عملها على مصر :wink: )

طيب ده حتّى أمريكا مش حتموت ولاحاجه على انها تدخل القرن الأفريقى من بوّابة الصومال (بأمارة مااضطرت انها تحدف مراكز تجسسها ومخابراتها فى آخر الدنيا فى كينيا بعد فشلها فى السيطره على الصومال :wink: وبرضه ساحبه فى ديلها اسرائيل بأمارة حادثتى مومباسا :wink: )

طيب ده حتّى القرن الأفريقى وباب المندب مالهومش عازه فى تأمين ظهر وامداد قواعد أمريكا فى الخليج وقطع الميّه والنور على مجرّد تفكير مصر فى تنويع مصادر سلاحها بعيدا عن أمريكا والتعامل مع الصين وكوريا الشماليّه باعتبار التزام أمريكا بالتفوّق العسكرى الاسرائيلى حقيقة معلنة بدون مواربه , وايّاكى يامصر تفكّرى انك تقدرى تأخذى صواريخ او طائرات أو دبابات من الصين وكوريا الشماليّه...ما احنا حنوقّفها ومش بس حنمنعها...لأ...ده احنا حنصادرها ولو كويّسه حلال عليكى يا اسرائيل (حكم -زى ما انت راسى -القطع الحربيّه مابتتنقلش ولا جوّى ولا برّى ومالهاش سكّه غير بحرى نظرا لحجم الحاويات الكبير :wink: )

فالصومال والقرن الأفريقى وباب المندب دول مالهومش لازمه ولاليهم أى أهميه استراتيجيّه لأمريكا من أساسه(حتى ابقى بالأماره اقرأ عن البنود السرّيه اللى اتسرّبت عن الاتّفاق بين اليمن واريتيريا فى النزاع على جزر حنيش-تحت وصاية ورعاية أمريكا-)

:) :) :)

أمّا بقى البوسنه والهرسك و صربيا والجبل الاسود دول كلّهم فهل هناك من يجرأ على أن يقول أو يدّعى أنهم مناطق استراتيجيّه؟؟؟

طب دى منطقة البلقان دى كلّها مالهاش أى لازمه (بأمارة ما بيسمّوها الخرّاج المتقيّح فى الجسد الأوروبى :wink: وبأمارة ما شرارة الحربين العالميتين ما انطلقت من منطقة البلقان بصوره مباشره فى الحرب الأولى وغير مباشره فى الثانيه :wink: وبأمارة ماكل المحللين الجيو-ستراتيجيين ما بيقولوا عليها بؤرة القلاقل وعدم الاستقرار فى أوروبا :wink: )

وبعدين هيّه أساسا البوسنه والهرسك و صربيا والجبل الاسود وكرواتيا دول كانوا حاجه غير يوجوسلافيا اللى كانت أساسا دولة غير موجوده حتى منتصف القرن العشرين وبعدين تم تأسيسها بدمج هذه العرقيّات فى اطار يوجوسلافيا فى اطار تقسيم أوروبا بين أمريكا والاتحاد السوفييتى بعد الحرب العالميّ‍ه الثانيه بحيث أصبحت محسوبه على الاتحاد السوفييتى وتمثل صمام أمان له أمام مد حلف الناتو :wink:

طيب ده اكبر دليل على ان المنطقه دى كلها ملهاش عازه ان أمريكا لمّا كانت بتضرب فى صربيا كانت بتضرب فى الحقيقه فى حليف أساسى لروسيا(بأمارة موقف روسيا المتصلّب أياميها وبأمارة العلاقات الروسيه الصربيه النعروفه للقاصى والدانى :wink: وبأمارة انهيار آخر حاجز أمام اكتساح حلف الناتو لوسط وشرق أوروبا :wink: )

لا...لا...لاااااااا

عندك حق

لا الصومال ولا صربيا والبوسنه وكرواتيا دول فيهم أى فائده أو أهميه استراتيجيه لأمريكا علشان تنخور وتنخرب فيهم زى ماعملت

واحنا آسفين على معلوماتنا الضحله...متآخذناش :oops: :oops:

[disappointed]

موقع امريكا الجغرافى ومساحتها الشاسعه ومناخها المتعدد يسمح لها بزراعه كافه المحاصيل سواء حضروات وفواكه وحبوب وبكميات وفيره يفيض عن حاجتها واكثر

يعنى بالبلدى كده مش محتاجين لشويه الفجل والكرنب اللى عندنا ال شيء الوحيد اللى مش موجود بامريكا هو الشيء الذى لم يخلقه الله بعد

طيّب ماتقولّهم الكلام ده بدل ما همّه عاملين زى القط "الدنى" اللى مابيعتقش حتّى الفار "المسورق"

اللى بتقوله ده أكبر دليل على دناوتهم.... يعن لمّا واحد يكون بيأكل كافيار ويبص لطبق الكشرى اللى فى ايد غيره أو بيركب مرسيدس وبيبص للــ"فيسبا" اللى بتاع الجرايد راكبها...تبقى دى ايه غير دناوه؟؟

ولمّا هيّه أمريكا يعنى من ذوات الأملاك وعندها البلاوى المتلتله دى و"فيّيسه"قوى كده تقدر تقول لينا حاطّه عينها على سلّة غذاء جنوب السودان وعايزه تلهطها بمساعدة الأخ جارانج لييييييه؟؟؟؟

ومسيطره بوضع اليد والبلطجه على مزارع المطّاط فى جنوب شرق آسيا الاستوائى لييييييه؟؟؟؟

وبمناسبة الكرنب والفجل بتوعنا.....أحب أذكّر معاليك ان أمريكا طلبت من مصر (أيام العز بتاعنا بقى) سنة 1953 اننا نبعت شحنة قمح هديّه لكوريا الجنوبيّه بعد انفصال الكوريتين ....تقدر تقول لى ليييييه؟؟؟؟

واللى أرضه الحاجه الوحيده اللى ما اتوجدتش فيها غير الحاجه اللى ربنا ماخلقهاش لسه : تقدر تقول لنا معاليك بيضرب أسعار منتجات المناطق الحارّه الغذائيّه لييييييه؟؟؟ والاّ بيعرقل تمويل المشاريع الزراعيّه عن طريق الضغط على البنك الدولى فى مفاوضاته مع سوريا ليييييه؟؟؟

[اللمبى]

السلام عليكم

فيه ايه يا جماعه كلكم على الراجل والا ايه؟؟؟؟ ايه يا محبط يا خويا .. الراجل ما غلطش !!!!

هو انت تسمح لأى حد انه يتكلم أو يقلل من شأن بلدك ؟؟؟ أو يتهمها بأى مغالطات تاريخيه ؟

دا ان دل على شىء انما يدل على منتهى الوطنيه من الاخ ابن البلد ؟؟؟

رحبوا معى بالاخ أبن البلد المناضل العصامى !! انا كانت الدمعه هاتفر من عينى وانا بقرأ تاريخه فى مداخله تانيه.

قول كمان يا ابن البلد وعلمنا التاريخ الحديث !!!

سترك يا رب ...

والنبى ماتتعب نفسك تانى يا محبط علشان خاطرى يا خويا

السلام عليكم

[disappointed]

البترول والمعادن الطبيعيه

اذا كان حجتكم الحصول على البترول تعالى هنا يا جدع انت وهو نقعد نحسبها اولا كم عدد الشركات التى تعمل فى تجاره البترول؟ راح نلاقيها 5 او6 شركات وكلها امريكيه او مركزها فى امريكا

تبقى انت راح تبيع البترول بتاعك لمين؟ راح تشربه

( جميع الدول حتى روسيا أيام مجدها كانت تشتريه عن طريق هذه الشركات وبالدولار) بالعربى كده هم الزبون الوحيد عندك

طبعا طبعا

ماهى الشركات الفرنساويّه والنرويجيّه والانجليزيّه والصينيّه والروسيّه والأوكرانيّه واليابانيّه...الخ الخ الخ كلّها شركات أونطه وماعندهاش ولا تقنيه ولا مصادر تمويل.....طيب ده حتّى الشركات النرويجيّه والانجليزيّه اللى شغاله بقالها سنين وايام فى بحر الشمال مابتعرفش تصنّع حتّة برّيمه وشويّة مواسير صلب....وبعدين همّه اليابانيين دول عندهم تكنولوجيا حفر من أساسه...والاّ شركة "الف" الفرنساويه المتغلغله فى غرب أفريقيا دى بتفهم حاجه (بأمارة ضرب أمريكا ليها تحت الحزام فى غرب أفريقيا عن طريق اثارة تابعتها الأمينه "ليبيريا" لأعمال التخريب التخويفيّه فى غرب أفريقيا لتطفيش الشركه الفرنسيّه :wink: ) , والاّ "فوكس" الألمانيه دى عندها فكره عن البطاطا؟؟؟ والاّ قطاع النفط الروسى والأوكرانى الذى أعلن قدرته على استيعاب حجم التعامل مع النفط العراقى كاملا (وكذلك الصين) ده عنده قدرة على التنقيب والتعدين والاستخراج والتكرير؟؟؟؟؟ سيبك سيبك...هوّه فيه فى الدنيا حد بيفهم غير أمريكا؟؟؟؟

ياراجل ده فنزويلا اللى هيّه فنزويلا عندها شركتين تنقيب وتعدين وتكرير وبتصدّر لأمريكا 14% من احتياجاتها

ده احنا فى مصر عندنا شركه اسمها شركة الحفر المصريّه قدرت تصنّع أكبر حفّار فى التاريخ (بمساهمة فرنسيّه) وهو الحفّار اللى انضرب أيّام النكسه وكان حيشتغل فى منطقة توشكى الحاليه لأغراض استصلاح الأراضى وكان من السهل تعديل امكانيّاته للتنقيب عن النفط

وبعدين لمّا أمريكا "عفيفه" و"شريفه" قوى كده فى مجال النفط وعندها اللى مغطّيها وزياده كانت بتكسّر الدنيا علشان تبلع مصادر النفط العالميّه فى جوفها لوحدها لييييييه؟؟؟ (بأمارة لعبها من وراء الكواليس مع أذربيجان وكازاخستان وافسادها لمؤتمر تقسيم ثروات بحر قزوين :wink: وبأمارة عينها اللى "حتبظّ" على نفط آسيا الصغرى والولوج اليه من بوّابة أفغانستان والجمهوريات الروسيه التركمانيه ولعبها على المتغطّى مع جورجيا :wink: وبأمارة ماهى راقده على نفس دول الخليج وكاتماه وبالعه نفطهم فى عبّها :wink: ةبأمارة ماهى ناويه تكسّر أسعار البترول وتنزّلها فى الأرض بعد غزو العراق :wink: وبأمارة شركات البترول الأمريكيّه المتحالفه مع بوش"ما هى كلها أساسا فى تكساس" ماهى عايزه تكون الموزّع الوحيد والوكيل الحصرى لبترول الخليج بعد غزو العراق واللى عايز برميل منه يكلّمهم الأوّل :wink: وبأمارة مابتهيج وتميج أول ما دوله تعلن عن نيّتها للتعاقد مع شركات نفط غير أمريكيّه :wink: وبأمارة ماهى ضاغطه على السعوديّه ومبلطجه عليها علشان تنفّذ لها سياسة حفظ الأسعار فى الأوبك :wink: وبأمارة ماهى بتلمّح لرغبتها فى تدويل المنطقه الشرقيّه بالسعوديّه :wink: وبأمارة ماهى بتموّل وبتدعم شويّة رجال الأعمال الفنزويليين من أجل الاطاحة بالرئيس المنتخب"شافيز" وبتخطط لخلع رئيس جاء عن طريق صناديق الاقتراع (بدليل مظاهرات الفقراء الفنزويليين المؤيده له) لا لشيئ الاّ لأن سياسته النفطيّه مش ماشيه مع الاحتكار الأمريكى :wink: , وبأمارة ما أمريكا عايزه تتحكّم فى مصادر الطاقه للضغط على دول العالم زى ماهى قافله البترول على كوريا الشماليّه اللى مصانعها بتأن تحت وطأة نقص مصادر الطاقه مما دفع كوريا الشماليه لتشغيل أكبر محطتين نوويتين عندها هذا الأسبوع لتغطية حاجة مصانعها من الطاقه علما بأن هناك اتفاق فى 1994 يقضى بعدم تشغيل كوريا الشماليّه لمحطّاتها النوويه مقابل التزام أمريكا بعدم مضايقة كوريا الشماليه فى الحصول على النفط الذى تحتاجه وبأمدادها بمفاعلات الماء الخفيف الغير قادرة على تخصيب البلوتونيوم والتزمت كوريا الشماليه لمدة ثمانى سنوات بينما لم تلتزم أمريكا ببند واحد من الاتفاقيه بأسلوب العصا والعصا بدلا من العصا والجزره :wink: )

وبعدين عندك حق.....لو أمريكا ما أخذتش بترولنا حنشربه... ما هو أصل البترول طالع من الأرض مكتوب عليه " غير صالح لاستخدام المصانع والسيّارات الغير أمريكيّه"....وما هو أصل المصانع والسيّارات والطائرات و..و..و... فى أوروبا واليابان ونمور آسيا وكل دول العالم دى كلّها بتستعمل قشر اليوستفندى والـــ"جلّه" البلدى فى توليد الطاقه

فعلا.....عندك حق فى كل كلمه قلتها :wink: وأعذرنا لجهلنا :) :)

[disappointed]

ماشى الحال ما اوربا كلها وكوريا الجنوبيه واليابان فيها قواعد امريكيه الدول دى كلها لها ثقلها فى المجتمع الدولى ومواطنوها يعيشون فى رفاهيه ليه امريكا لم تسلبهم ارادتهم واستقلالهم وتسرق خيراتهم

فعلا.....لم تسلبهم ارادتهم واستقلالهم....ماهو أصل وجود قواعد عسكريّه وجنود أجانب فى دولة ما ليس احتلالا فعليّا على أرض الواقع...الظاهر ان المارينز الأمريكان رايحين بس يزوروهم ويودّوهم ويشربوا مع اليابانيين كأسين "ساكى" أو "سوتشى" أو رايحين بس كوريا الجنوبييه علشان الشعب الكورى عازم الجنود الأمريكان على بفتيك لحمة كلاب وسلطة جنسنج والقواعد اللى معموله ليهم هناك دى معموله بس لتنشيط السياحه :wink:

فعلا.....لم تسلبهم ارادتهم واستقلالهم....بدليل ان أمريكا "أمرت" اليابان من يومين انها ترسل وحدات كشف عن الصواريخ من النوع المتطوّر تقنيّا (اللى اليابانيين وصولوا ليه والأمريكان لأ) فوصلت هذه الوحدات بالأمر اليوم الى منطقة مضيق باب المندب "اللى معاليك قلت سابقا انها غير استراتيجيّه" فى اطار الاستعداد لغزو العراق :wink:

وبأمارة الكوريين الجنوبيين اللى متشحتفين على أهاليهم فى كوريا الشماليّه والرغبه العارمه عند الكوريتين للم الشمل والتى تجلّت فى المباحثات الأخيره والتى انضمّت لها اليابان الراغبه فى اصلاح ذات البين مع كوريا الشماليّه فزمجرت أمريكا وكشّرت عن أنيابها وأظهرت العين الحمراء فتراجعت اليابان وكوريا الجنوبيه فورا عن اكمال المباحثات :wink:

أول مرّه أشوف دوله ذات سياده واراده واستقلال يوجد على أرضها قواعد عسكريّه وآلاف الجنود التابعين لدوله أخرى.... انجليزى ده يا مرسى؟؟؟؟ :) :)

[disappointed]

القضيه الفلسطينيه

نحن نظر لتأيـيد امريكا لاسرائيل من وجهه نظرنا فقط كعرب ولهذا نعتبر امريكا دوله ظالمه

لا....العفو

هوّه فيه زى أمريكا الكمّله السكّره اللى العدل بيخر منها (حوشوا حوشوا لا العدل يغرّقنا :) :) )

أمريكا ظالمه؟؟؟

أمريكا؟؟؟؟؟

:shock: :shock: :shock:

يا ظلمه يا مفتريين :mad: :mad:

وبعدين فيها ايه يعنى لما أمريكا تعلن بصراحة انها ملتزمه بالتفوق النوعى والكمّى فى المجال العسكرى لاسرائيل على الدول العربيّه مجتمعه؟؟؟؟؟؟؟ :roll: هه....هه....فيه اييييييه؟؟؟ :roll:

وفيها ايه يعنى لما أمريكا تخلّى اسرائيل تمتلك ترسانه نوويه مالهاش حل وبعدين تقف بالمرصاد لأى دوله عربيّه ترغب فى عمل مشاريح لمحطّات توليد طاقه نوويه للمشاريع التنمويّه؟؟؟؟

هه؟؟؟فيها ايييييييه؟؟؟

طيب دى أمريكا من كثر ما المفروض نحبّها ونتأكد انها مش رايده لينا الاّ الخير ان الحرب الوحيده اللى كسبناها ضد اسرائيل وكانت ملحمة تاريخيّه يجب أن نفخر بها (الانتصار اليتيم الحيله) حوّلتها أمريكا الى انتصار جزئى بدئنا على أساسه تحويل النزاع مع اسرائيل من قضيّة وجود لقضيّة حدود :shock: :shock:

طيّب ده من كثر أمريكا ماهى بتحبّنا موووووووت والمفروض نبقى زى السمن على العسل معاها أثبتت لينا بتدخلها الــ"عينى عينك" وبكل ثقلها فى حرب أكتوبر أننا ترسّب بداخلنا قناعة "منطقيّة" بعدم امكانيّة انزال هزيمه فعليّه باسرائيل وباستحالة تحقيق انتصار عسكرى قاطع ضد اسرائيل مهما فعلنا وضحّينا وبذلنا من الدم والعرق لا لشيئ الاّ لأن أمريكا سترفض ذلك وتحول بيننا وبينه :( :( :(

أمريكا؟؟؟؟ ظالمه؟؟؟؟

لا...لآاااااااااااا

العفو والسماح

طيب دى أمريكا أحسن حد يسوق قطار مقدّراتنا...بس تقول ايه بقى... احنا اللى وش فقر ومش وش نعمه ومابنعرفش نركب :) :oops:

[disappointed]

اتركوا المسجد الاقصى وكنيسه القيامه وشانه الاقصى وكنيسه القيامه وصاحبهما بريء منكم انتم آخر من تتكلمون عن الاقصى

معلش بقى

سؤال بريئ

معاليك بتكلّمنا بصيغة "أنتم"!!!!!

:roll: :roll: :roll:

مممممممممم.......

الله....هوّه احنا حاجه وانت حاجه؟؟؟؟

يعنى مادام انت ابن البلد....واحنا أولا البلد برضه...يبقى تقول "احنا" مش "انتم"

مش كده برضه والاّ أنا غلطان؟؟؟

انتم ميييييييين؟؟؟

واحنا مييييييين؟؟؟؟

وانت مييييييين؟؟؟

:roll: :roll: :roll: :twisted: :twisted:

[disappointed]

وهل تعلم ان بالكنيست الاسرائيلى اعضاء مسلمين؟

مممممممم....

آآآآآآآه.....قصدك تقول أعضاء الكنيست الممثّلين لعرب 48 الذين تم اعطائهم الجنسيّه الاسرائيليّه والذين لا يوجد تناسب بين عدد نوابهم وتعدادهم أساسا؟؟؟؟

مش معاهم جنسيّه اسرائيليّه دول والاّ لأ؟؟

واللى معاه جنسية بلد مش من حقّه يكون ليه نوّاب فى البرلمان؟؟؟

واللى مش عايزهم كان بيدّيهم الجنسيّه لييييييه؟؟؟ والاّ هوّه التحايل باعطاء الجنسيه على عدم القدرة على قلعهم من أرضهم يحتّم ان تكون الجنسيّه صوريّه ودون تمثيل فى البرلمان؟؟؟؟

[disappointed]

سؤال آخر كم دوله تعترف بأسرائيل وكم دوله تعترف بفلسطين ؟

الدول التى تعترف بأسرائيل دى كلها ناس ما بتفهمش واحنا بس اللى فالحين أوى؟

أيوه...احنا اللى فالحين لأن معانا الحق

وسؤال أخير :

هل المقياس كم دوله تعترف باسرائيل وكم دوله تعترف بفلسطين لتحديد من هو صاحب الحق؟؟؟؟؟؟؟؟

ياعزيزى....ريّح نفسك

نحن ناس تؤمن بقوّة الحق ولن يجدى معنا تسويق مفهوم حق القوّه

وفكّر فى الجمله دى على مهلك وقلّبها فى دماغك

[disappointed]

والنبى ماتتعب نفسك تانى يا محبط علشان خاطرى يا خويا 

تعبكم راحه يا أخويا يا لمبى

أعمل ايه بس فى نفسى

أنا متعب وبأحب أتعب نفسى

[Mohammad Abouzied]

انت كده يا محبط مدتناش فرصة نكشف ستره امام أعضاء المنتدئ

الراجل جه في موضوع قطر ودافع فيه عن اسرائيل وامريكا علشان محدش يهاجمه منكم وقال في نفسه حسن وابوزيد مقدور عليهم

ام تطلع له انت كدا تبوظ عليه الموضوع كده

دا الراجل كان هيبحبح شوية ويطلع الي في قلبه

[EBN ELBLD]

الاخوه الافاضل

Sayyeda Abouzied / Mohammad Abouzied/حسن

/

لماذا لا نحترم

رأى الاخرين حتى لو كان مخالف لرأينا ونصف الطرف الاخر بالخيانه والعماله والتبعيه

هذا فلان نازل تريقه وبيسأل انت ابن اى بلد وانتمائى لمين شوفوا بقى انا راح احط ورقى كله على الترابيزه(لغه بتوع القمار ادينى قلتها قبل ما حد تانى يقولها ويقول انى امرتجى )

انا ابن مصر وانتمائى لمصر(للعلم انا من اوائل الذين كان لهم شرف عبور قناه السويس عام 73 والحمد لله ) وأيضاُ انتمائى لامريكا هذا البلد الذى اعطانى ما لم تعطيه لى بلدى(امريكا اعطتنى احساسى بأنى انسان وليس عبد لرئيسى بالعمل او لضابط شرطه او اى انسان له سلطه اعلى من سلطتى لا اكن كراهيه لى مخلوق اطلاقأ وليس لى اعداء وبصراحه كمان احترم واحب دوله اسرائيل وهذا من حقى ولا اكره الفلسطينيـين أيضاً واظن ان الله سبحانه وتعالى قد اوهبنا نعمه التعبير عن رأينا ولكن للاسف اغتصبها منا حكامنا

واذا كنت جاهل وخائن وعميل ويهودى(مع ان اليهودى انسان مثلنا) فى نظر البعض منكم فمن انا كى اسلبكم هذا الحق هذا رأيكم وانا احترمه

وكما يقال خلاف فى الرأى لايفسد للود قضيه (مع انه ليس بيننا ود على الاطلاق من ناحيتكمام من نا حيتى انا فهناك ود مع جميع البشر واحبهم جميعاً)

[EBN ELBLD]

وبالنسبه لشركات البترول انا بتكلم عن شركات التسويقOil Brokers مش شركات الانتاج كل حاره فى اى دوله فيها شركه حفر او تنقيب لكن هذه الشركات دى كله تسوق منتجاتها عن طرق الشركات الامريكيه

لذا لزم التنويه

[Sayyeda Abouzied]

الاخ ابن البلد

لما تطرح موضوع يجب ان يكون في مكانه ودا موضوع خاص بدولة قطر وانت جاي تدافع عن موقف امريكا وأسرائيل ما عندك باب القضية الفلسطينية أعمل توبيك وتكلم فيه زي ما انت عاوز وها تلاقي الي يرد عليك بالحجة والبينة

وأذا كنت من اول الناس الي عبرو القناة في 73 يبقى سنك عدا الخمسون وعندك خبرة كويسه في السياسة والتعاملات الدولية

يبقى الباقي انك تدرس التاريخ كويس وتعرف ان المشاكل التي تعاني منها مصر وباقي الدول العربية والتي خلتك تهاجر امريكا مثلك مثل كل العرب المهاجرين لها ، هي حالة الحرب التي فرضتها علينا امريكا وربيبتها اسرائيل ، وليس من حقك ان تعجب ابدا بالذين يصدرون الاسلحة الى اسرائيل ليقتلو بها اهلك في فلسطين وباقي الدول العربية ، فأذا كنت مسلم او مسيحي أكيد لك شهداء قتلو على ارض هذا الوطن وبسلاح امريكي وبجندي اسرائيلي

نرجو انك استوعبت ماذا نقصد ونشكرك على مشاركتك

[disappointed]

(للعلم انا من اوائل الذين كان لهم شرف عبور قناه السويس عام 73 والحمد لله )

بصراحه كمان احترم واحب دوله اسرائيل

:shock: :shock: :shock:

:roll: :roll: :roll:

وأنا كمان زملكاوى بس بأحب الأهلى يغلب الزمالك فى كل ماتش 6/1

:wink: :wink: :wink:

وأعرف واحد صاحبى بيحب عيلته وبيته قوى بس كل ليله بيلعب طاوله على القهوه مع الراجل اللى عايز يهدّ له بيته ويشرّد له عياله

:wink: :wink:

يامثبّت العقل يا رب

[disappointed]

كل حاره فى اى دوله فيها شركه حفر او تنقيب

لأ...مش قوى كده.... :wink:

[disappointed]

وبالنسبه لشركات البترول انا بتكلم عن شركات التسويقOil Brokers 

هذه الشركات دى كله  تسوق منتجاتها عن طرق الشركات الامريكيه

مش مظبوط

مزيج برنت وبترول بحر الشمال يتم تسويقه عن طريق شركات بريطانيّه

البترول الفنزويلى بالكامل يسوّق عن طريق شركاتها الوطنيّه (تمد فنزويلا أمريكا بــ14% من احتياجات السوق الأمريكيّه وتعمل شركات البترول الأمريكيّه فقط على نقله من منافذ دخوله الى المستهلكين لأنه يصل اليها مكّررا و مصنّفا حسب الشكل النفطى النهائى"بنزين,كيروسين,ديزل...الخ" وذلك فى مصافى ومعامل تكرير فنزويلا التى تمتلك أسطول النقل البحرى الخاص بها)

البترول الروسى والأوكرانى يتم تسويقه عن طريق شركات روسيّه وأوكرانيّه لامداد السوق المحلّى لأنهما لايقومان بالتصدير

يوجد فرق بين حجم تعاملات الوسطاء وطاقتهم الاستيعابيّه القادره على تحمّل مسئوليّات عقود كبيره (اذا سمح لها بأخذ هذه العقود

[Hassan]

انا ابن مصر وانتمائى لمصر(للعلم انا من اوائل الذين كان لهم شرف عبور قناه السويس عام 73 والحمد لله )

لا اعلم كيف اشتركت فى حرب اكتوبر وانت فى امريكا منذ 30 عام بينما بداء تسريح من اشترك فيها سنة 1975 ...يعنى حضرتك كنت فى امريكا عند نشوب الحرب :wink: الكدب مالوش رجلين..

انت كاتب الكلام الاتى فى باب المناقشات العامة فى موضوع "اسباب اختيارك للوجو و الاسم الحركى و التوقيع".

ورغم هذا فالحمد لله نحن ال 6 ابناء نعمل فى مراكز مرموقه بمصر وخارجها ورغم وجودى بأمريكا منذ 30 عام لا اتحدث الانجليزيه إلا فى عملى فقط

[إبن مصر]

يا اخوانا حد يقوله مايقولش ابن مصر والنبى ....