قطر..قزم يريد ان يصبح عملاق

[Mohammad Abouzied]

يا اخوانا حد يقوله مايقولش ابن مصر والنبى ....

ابن مصر مين

هو قالك ابن البلد

يعني اي بلد ومش ضروري مصر

يعني ممكن تقول اسرائيل

وهو بيحب اسرائيل وبيكره دمنهور ومبيحبش عمرو موسى

راجل عاوز يخالف ويكتب كل ما هو غريب

زملكاوي وعاوز الزمالك يتغلب

وبيلعب طاولة مع الي عاوز يهد بيته ويشرد عياله

ولو اديته على وشه بالبوكس هيقولك كمان اديني اكتر وها يعزك قوي

هو كده عاوز يبقى كده حد شريكه

[Mohammad Abouzied]

المهم الراجل دقر يتوه موضوع قطر وشدنا لموضوع اخر

[Set_Amina]

وأيضا لم يكن هناك اسرئيل ولكن اجتهد اليهود واقاموا دولتهم في ارضهم التى ابتعدوا عنها لقرون طويله

هل تسمي الاعتداء على الحق والسلب والنهب اجتهاد؟ :?: اللهم احفظنا من زمن ضاعت فيه الحقوق وسمي المعتدي فيه مجتهدا :mad: :mad:

[EBN ELBLD]

يا سا تر كل هذا الهجوم عشان الواحدقال رأيه بصراحه؟ دا انا لو كنت معكم الان لضرتمونى بالنار

أيوه انا فى امريكا منذ العام 1971 وعدت الى مصر لتأديه الخدمه العسكريه مع انه كان بامكانى عدم العوده لكن أبيت عل خدمه بلدى ولم احاول ان اجيب واسطه عشان اكون فى اى منطقه مركزيه زى ما الاخوه فكهانيه البوء (الفم) بيعملوا وقد سرحت من الخدمه فى شهر مايو 1974 لأسباب صحيه

وانا اقحمت امريكا فى الموضوع لان طارح اقحم امريكا وطغيانها في الموضوع من اساسه راجع بدايه الحديث(مستعمرة امريكية و قاعدة إنطلاق للقوات الامريكية للعدوان على اى بلد عربى.) وكأن امريكا واسرائيل هما سبب البلاوى عندنا

اول سبب للبلاوى عندنا هو عدم احترامنا للرأى الاخر ونعت صاحبه

بأبشع االافاظ مش عارف امتى راح يكون صدرنا واسع لرأى الاخرين؟

على فكره دى اول خطوه فى الديموقراطيه

[Sayyeda Abouzied]

اول سبب للبلاوى عندنا هو عدم احترامنا للرأى الاخر ونعت صاحبه  

بأبشع االافاظ مش عارف امتى راح يكون صدرنا واسع لرأى الاخرين؟  

على فكره دى اول خطوه فى الديموقراطيه  

صحيح انت دمك خفيف وضحكتنا كتير

الا انت عاوز تغالط في التاريخ وعاوز تقنعنا بالغلط معتقد اننا لسه في سنة اولى اعدادي

لاء يا سيدي منا الدكتور ومنا المهندس والمحاسب وشهادتنا فوق البكلوريوس كمان وسننا اكثر بكتير من الخمسين وفوق الستين كمان

يعني ضروسنا اتخلعت

[EBN ELBLD]

ياسيده يا سيده يام الشموع الآيده يا بنت اطهر والده

يام العجايز

يام هاشم الموضوع مش موضوع مؤهلات كلنا راح نروح فى التراب الموضوع كله وجهه نظر انا لم اغصب عليكى ان تعتقدى ان وجهه نظرى صحيحه انا واحد عاوز الناس كلها تعرف انى ب احب اسرائيل انا حر قولى عليا اللى انت عايزاة ان شا الله تقولى ريانى يا فجل

[disappointed]

يعني ضروسنا اتخلعت

يامدام سيّده الله يخلّيكى بلاش موضوع الضروس المتخلّعه ده لأنه بيضايق "شعنونه" :D :D :oops: حتّى ابقى شوفى التوقيع الجديد بتاعها :D :D :D

[disappointed]

الموضوع كله وجهه نظر

عندما تتعلّق الأمور بمحاولة طمس حقائق التاريخ والتلاعب بها ولوى أعناقها من أجل الوصول لنتائج معدّه سلفا , وعندما تتعلّق الأمور بمغالطات تاريخيّه تنشد أساسا خاطئا تبنى عليه استدلالات خاطئه للوصول لنتائج خاطئه بهدف تسويقها ونشرها وكأنها الحق الذى لا يأتيه الباطل , وعندما تتعلّق الأمور بكتابات سياسيّه تستند الى معلومات جيو-ستراتيجيّه خاطئه ومضللّه"بكسر اللام الأولى" أو مضللّه"بفتح اللام الأولى",وعندما تتعلّق الأمور بقلب الباطل الى حق والباس الحق لباس الباطل.....فان الأمور تخرج من تحت تصنيف "وجهة النظر" خصوصا عندما يكون من يقرأون هذا الكلام "عندهم نظر"

[disappointed]

انا واحد عاوز الناس كلها تعرف انى ب احب اسرائيل انا حر

آهى دى بقى معاك حق فيها....دى وجهة نظر

وانت حر فيها

حتّى علشان ماتقولشى ان احنا مش عايزينك تقول وجهة نظرك فأنا يا سيدى بأهديك كلمات هذه الأغنيه علشان تسجّلها فى أستوديو أمريكى/يهودى وتنزل بيها السوق ترد على أغنية شعبان عبد الرحيم بتاعة"أنا بأكره اسرائيل"....وطبعا حيدّوك عليها فى أمريكا الأسطوانه البلاتينيّه وحتهديك عليها الجمعيّات المحبّه للصهيونيّه وشاح "أحبّاء صهيون" من الدرجة الأولى ووسام "هاشومير -يعنى بالعربى الحارس الأمين-" من الطبقة الأولى , ومش بعيد تكون أول واحد من الــ"جوييم" يأخذ عضويّه فخريّه فى الكنيست والهستيدروت,وده طبعا غير جايزة "نوبل" للسلام اللى "معاريف" و"هاآرتس" و "هاتسوفيه" و"يديعوت أحرونوت" حيعملوا حمله مشتركه مع اخواتهم الحلوين فى الصحافه الأمريكيّه علشان يرشّحوك ليها :

أنا بأعشق اسرائيل

أنا بأعشق اسرائيل

مع انّى ابن النيل

باعشقها ولو قالوا لى

باين عليك عميل

أنا أصلى مش هاممنى

وناوى أموت قتيل

ونعشى لو فى مصر

مافيش حد حيشيل

أصله وهوّه ماشى

حيكون فى تقل الفيل

فأمانه عليكو ابقوا

ودّوه على اسرائيل

وهناك حيكرّمونى

تكريم من نوع تقيل

نجمة داوود حتبقى

ع النعش وع الفتيل

واييييييييييييييييييييييه

[disappointed]

ياسيده يا سيده يام الشموع الآيده يا بنت اطهر والده

يام العجايز

يام هاشم

ان شا الله تقولى ريانى يا فجل

دى بقى أنا سايب الرد عليها للأستاذ محمد ابو زيد

:roll: :roll:

(خللى بالك....ده مدرّب كاراتيه و فنون قتاليّه... :shock: :shock:

وحاصل على كل ألوان الأحزمه... :D :D ماعدا الحزام "الأبيض فى أزرق"...لأنه طبعا ده ماحدّش بيحصل عليه غير اللى بيحبّوا اسرائيل) :wink:

[إبن مصر]

يا نـــــارى.....يا نــــارى ...

ابن مصر وبيحب اسرائيل!!!!! وماله ما هو كل شىء جايز ...وبعدين....

سافرت 71 ورجعت امتى ؟؟؟ معلش ماخدتش بالى ؟؟؟؟أه بس سافرت أمريكا تانى فى 74 أممممممم مفيش مشاكل .

الحقنى يا محبـــــــــط

هايجننى......الصبر يا رب ...

[EBN ELBLD]

يا عم خايب الامل او

disappointed

ايه الاشعار الجميله والمواهب دى

يا عم انا لا بتاع خناق ولا ضرب ولا احزمه انا راجل عجوز الله يرحم والديك

[disappointed]

يا عم خايب الامل او

disappointed

ايه الاشعار الجميله والمواهب دى

أى خدمه

:wink: :wink:

[disappointed]

الحقنى يا محبـــــــــط

هايجننى... ...

ألحقك ازّاى اذا أنا نفسى خلاص اتجنّنت

:shock: :shock: :shock:

[اللمبى]

:roll:

بيحب اسرائيل !!! وبيحب امريكا !!! وراجل عجوز !!! وحارب فى اكتوبر !!!

عروستى؟؟؟

ممكن تسهلها شويه يا محبط :D

[disappointed]

:roll: 

بيحب اسرائيل !!! وبيحب امريكا !!! وراجل عجوز !!! وحارب فى اكتوبر !!!

عروستى؟؟؟

ممكن تسهلها شويه يا محبط  :D

أنا لسّه ياعزيزى اللمبى كنت حأقول له هوّه نفس الكلمتين دول وحأطلب منه نفس الطلب

:wink:

[Mohammad Abouzied]

يجماعة موضعنا عن قطر ودورها

الاخ ابن البلد خلانا انحرفنا بالموضوع الى حب وكره اسرائيل

ودا مش موضعنا ابدا

المشكلة هنا هل امير قطر هو الاخر بيحب اسرائيل ؟؟؟؟

امال قناة الجزيرة نازلة وطالعة سب في كل الزعماء العرب وسياستهم وعمالتهم لامريكا وبيعهم للقضية الفلسطينية ( هل هي قناة مش قطرية )

[ezz_y2k]

الزميل ابن البلد، هل تعتقد ان حرية الراى ان تقول كل ما تريد. فمثلا افترض فرضا اني احب هتلر و بن لادن واعلنت هذا علي الملأ في اوروبا او "امركا" تعتقد ان ذلك سيقبل هناك ام ان قوانين الوطنيه Patriotism ومكافحة الارهاب ستجعلني ربما نزيل جونتينامو.

بلاش اذا عبرت عن راي بحريه في بلاد الحريه بان Holocaust مبالغ فيها ، تعتقد انه سيحترم راي ويقبل بصدر رحب (لا حاجه لذكر امثله فالموضوع واضح).

اذا ما تطالب به سيادتك الزملآء ان يتقبلوه بصدر رحب حتى يكونوا ديمقراطين هو شيء غير طبيعى.

مع كل اسف يبدو انك عندك خلط في مفهومك للديمقراطيه وحرية الراي برغم مرور هذه السنوات عليك في بلاد الحريه.

كل امه لها ثوابثها التى اتفقت عليها الاغلبيه الساحقه ويجب على من يعارض احد هذه الثوابث ان يحتفظ برايه لنفسه ولا يجادل به.

فالديمقراطيه الموجوده في العالم الحر اليوم لا توافقك ولا حتي تمنحك فرصة التعبير عن راي مخالف لثوابت الامه(راي 99% من الامه بدون مبالغه).

يا زميل، الاعتراف بالحق فضيله وليس عيبا.

انا اعتقد انك قد جرحت مشاعر الغالبيه هنا ليس باعتناقك لراي مخالف ولكن لمجاهرتك به وهو مخالف لاحد توابتنا(وهو اقرار الحق و رفض الظلم و الأعتداء) ولذلك ارجوك ان يكون عندك الشجاعه الكافيه وتعتذر اعتذار غير مشروط. وتقبل تمنياتي.

[ezz_y2k]

برجاء اذا امكن تغير عنوان الموضوع ليكون معبر عن المحتوى إإإ

[إبن مصر]

عوده للموضوع الاصلى.....

ان ما قامت به قطر على المستوى الاقليمى لهو بحق قلب لكل الاعراف والموازين التى كانت سائده حتى وقت قريب .

فليس الخوف من انطلاق القوات باتجاه الشرق او الغرب !! شمالا وجنوبا ولكن الموضوع هو وجود هذه القوات من الاساس .

ما لابد أن يفقه له الجميع ان هناك فرق كبير بين الاتفاقيات العسكريه وانشاء قواعد للانتشار السرع فى أى بلد .

ان ما قامت به قطر على حساب المصالح العربيه الاخرى وان كان ضد كل هذه المصالح انما له ما يبرره من وجهه النظر القطريه والتى لن تستطيع عابدا أن تفصح عنها .

لذلك فأن المنطقه الان تشهد وجودا امريكيا قريبا بما حدث فى قاعده سايجون اثناء الحرب الفيتناميه .

بل نستطيع القول ان قطر فقط قامت بتقنين هذا التواجد عن طريق الافصاح العلنى عن اتفاقيه عسكريه بينها وبين الولايات المتحده ، فى حين قامت الكويت يذلك دون أى مصداقيه الا الاعتماد على الاتفاقيه القديمه والتى تعود الى عام 1990 معطيه الحق لتلك القوات فى الانطلاق البر ى على مساحه واسعه من الجنوب العراقى فى منطقه عمليات لن تجد أمريكا أى صعوبه فى أجتيازها وهى المنطقه الاهم لديها حيث تستطيع ان تقوم بتأمين أبار البترول فى كل من الكويت والعراق .

اذا فليس مهما بمكان ما قامت به قطر فى حق نفسها ولكن المهم هى السابقه التى لن تتوانى بعض الدول الاخرى لحزو حزو قطر فى اتفاقيات رسميه وليس تعاون على المستوى اللوجستى والمخابراتى فقط وليس هناك اكبر مثلا من موقف اليمن لذلك .

والان وبعد كل ذلك نستطيع أن نقول انها مسأله وقت حتى تتغير الخريطه العامه للشرق الاوسط بالصوره القديمه التى نعرفها .

اما عن قطر فقد تكون واهمه اذا اعتقدت ان مثل هذا الاتفاق قد يكسبها اى من الحظوة او التايد لدى أى من الاتحاد الاوروبى أو اغلدول العربيه لان الخلاف القادم ( وهو على المصالح طبعا ) سيكون اكثر وضوحا بين الولايات المتحده والاتحاد الاوروبى .

والله من وراء القصد

ابن مصر