فكره ..... مجرد فكره ...... ليه لا ?

[Amenemhet]

انا جديد على المنتدى ..... وباتصفح المواضيع الموجوده لقيت كلام كتير وكبير عن موضوع الشقق والعقارات ..... وناس كتيره بتتكلم انها عايزه تشترى شقق ...... وفيه ناس نشاطها ملحوظ جدا فى المجال ده زى الاخ س س.

انا سؤالى هو ما المانع ...... ناس كتير عايزه شقق ...... ما المانع انكم تتلموا مع بعض وتشتروا ارض وتبنوها ...... ايه اليات الموضوع ..... اتحاد ملاك ..... شركه ..... انا معرفش ..... ياريت اللى يعرف يقول.

الموضوع مجرد خيال ...... مجرد موضوع حبيت اطرحه للمناقشه ...... ونعرف ايه ابعاده القانونيه وخلافه.

لو قلنا اننا عرفنا نجد 22 شخص عاوز يدوس فى الموضوع ..... واتفقنا على موقع معين ...... نقول مثلا المعادى الجديده ..... عشان بس عندى فكره عن اسعار الاراضى ...... نقول المتر ب 3000 جنيه والمساحه 600 متر ولو قلنا تكلفة المبانى زى تمن الارض ...... على 22 شقه فى 11 دور يعنى الشقه تدخلها فى 160,000 قول 200,000 بالتشطيب فى شقه 200 متر ??????? مش وحش ابدا ..... ده حتى لو 300,000 مش وحش..

انا عارف عارف ...... ده كله كلام عايم فى الفسحه ...... انا ماعرفش ابعاد الموضوع ..... ومستنى اللى يعرف يقولنا.

اكيد انك تضمن التزام 22 شخص بالمشروع صعب ...... اكيد ان البنا حاجه عايزه متابعه واشراف حتى لو فيه مهندس مشرف ..... اكيد فيه مشاكل كتير ...... احب اعرف لو فيه مشاكل تانيه او فيه حلول للمشاكل دى.

احب اعرف الوحش قبل الحلو وايه اللى ممكن يبوظ الموضوع.

الفكره بسيطه تقوم على نظرية ايد لوحدها ماتسقفش وعلى السؤال ليه ادفع لتاجر الجمله واكيد هى مش فكره جديده ..... بس ليه لا ?????

للنقاش يا هوانم ويا بهوات. :closedeyes:

_______________________________________________

اللسته

1- طفشان

تم تعديل 16 أغسطس 2007 بواسطة Amenemhet

[elneshawy]

السلام عليكم ورحمة الله و بركاته

فكرة حلوووة بس تكون أحلى لو كبرنا إتحاد الملاك ده و عملنا مدينة صغيرة يعنى نضيف للمباني السكنية كام مشروع إنتاجي بدل ما نحط المبالغ دى فى مباني سكنية و نعقد على الفلوس . نحطها فى مشاريع أى مشروع إنتاجي مهما كان صغير أهو على قد فلوسنا و إن شاء الله هيكبر . و المشروع هيجب دخل إن شاء الله نبني بقى المباني و نعمل كام إتحاد ملاك .

فيارب الفكرة تكبر و الأهم من إنها تكبر إنها تخرج للواقع و تنفذ

ياااااااااارب

[Tafshan]

و انا معكم ...

[MOOOM]

السلا ععليكم ورحمة الله وبركاته ..

يا ريت لو تشوفوا الوصلة دي والكلام المكتوب فيها وتعطونا رأيكم ومشاركتكم

وإيه رأيكم في المشورع

[MOOOM]

معلش .. نسيت أضع الوصلة ..

الوصلة للموضوع هنا ...

http://www.egyptiantalks.org/invb/index.ph...=35526&st=0

[أبو حميد]

طبعا فكرة جميلة وأنا شايف أنها سهلة التنفيذ لو توفرت النية والعزيمة.

أعلان حديث نسبيا ولكنه منتهي عن قطع أراضي متاحة

الأعلان يوضح أن هيئة المجتمعات العمرانية تعلن عن قطع أراضي متنوعة تصلح لإنشاء مشروعي سكاني والشروط تصر على مساحات معقولة 150 م2 بحد أقصى ونصف المشروع للمساحات أقل من 100 م2 بذلك نخدم شريحة أكبر من المحاورين. حتى من يريد شقق 300 م2 يمكنه حجز شقتين 150 م2 وفتحهم لاحقا.

الميزة في هذه الأراضي ان الدفع يكون 10 % مقدم وفترة سماح 3 سنين ثم تقسيط على 7 سنوات والبناء خلال 3 سنوات وهذه الشروط تسمح لمن لا يملك ثمن شقة حاليا أن يحلم بتملكها والدفع على مدار 10 سنوات والإستلام والسكن خلال 3 سنوات.

الإعلان رغم مرور مدته لكنه متكرر وكل ما علينا هو انتظار الفرصة التالية أو إنشاء جمعية أسكان والتقدم بطلب بتخصيص قطعة أرض.

المطلوب هو التوصل للشكل القانوني للتجمع وتجهيز العقود حتى يتحول الأمر من مشاركة في موضوع لعقد يتم توقيعه ومبالغ تجمع.

[abo_sameer]

الفكره جميله . وهو حنا دايم نفكر كويس . وما ينقصنا تفكير . ينقصنا فقط العزيمه والتنفيذ. اهو احنا كذا نبقي زي اجتماعات القمم العربيــه . من غير تنفيذ تصبح الفكره ما لهاش قيمه .

يا اخوانا في القمه . المشكله وعرفينها كل واحد فينا عايز شقه . طل الحل ايه اهو في حل الاستاذ Amenemhet

فكره جميله لوحصل واتنفذت . ممكن اضيف ونطور الفكره . مش نطورها للاكبر انا اقول عشان نبسطها اكثر ويكون التشطيب ع المحاره او التقسيم . لانو في المباني اكثر حاجه تعب علينا ثمن الارض والاسسات .

ولما المبني يتبني .. ندخل مرحله تانيه وهي انو كل واحد يشطب الوحده بطريقته الخاصه . دا اسهل وايسر للاتحاد. وعشان المبلغ ما يكون كبيير .

تم تعديل 16 أغسطس 2007 بواسطة abo_sameer

[Amenemhet]

طيب خطوه كمان .... حاضيف فى اول تعليق لسته بالاسماء اللى تحب انها تدخل فى الموضوع. ومش حاوقف اللسته عند 22 .... واول واحد فى اللسته ... طفشان ... واللى عايز يدخل ... بس يقول حطنى فى اللسته.... وخلينا نشوف حنروح فين.

انا مش قد الكلام على مشاريع قوميه .... ووجهة نظرى ان ده برضه مشروع انتاجى مش استهلاكى لاننا حننتج وحدات سكنيه ... تنفعنا وتنفع عيالنا لما نحب نستقر فى مصر ... وطول ما احنا بره مصر ممكن نآجرها فنحل مشكة واحد عايز يتجوز ويبنى حياه ... يبقى ازاى مش مشروع انتاجى.

بلاش نوسع الحلم وخلينا نبتدى بعماره .... وبعدين نبقى نشوف. تانى ... كلامنا نظرى ... يعنى خلى دفتر الشيكات فى جيبك ... عايزين نشوف صوره شبه واضحه الاول وبعد كده نتكلم فى تنفيذ الصوره الافتراضيه دى.

ممكن اضيف ونطور الفكره . مش نطورها للاكبر انا اقول عشان نبسطها اكثر ويكون التشطيب ع المحاره او التقسيم . لانو في المباني اكثر حاجه تعب علينا ثمن الارض والاسسات .

ولما المبني يتبني .. ندخل مرحله تانيه وهي انو كل واحد يشطب الوحده بطريقته الخاصه . دا اسهل وايسر للاتحاد. وعشان المبلغ ما يكون كبيير .

يا استاذ ابو سمير ... اضافه جميله وياريت تكون فيه اضافات تانيه زيها.

ولا زلنا جميعا بانتظار من يدلنا على اليات الموضوع وابعاده القانونيه وخلافه وكذلك افكار عن مشاكله وحلولها.

تم تعديل 16 أغسطس 2007 بواسطة Amenemhet

[tahereyad]

والله يا جماعه فكره ممتازه جدا لأنها فعلا اذا تم انجازها بصوره سليمه هاتفيد كتير جدا بالذات الأخوه اللي بيحلموا بشقه بمساحه مناسبه في مكان متميز و كذلك بالنسبه للأخوه اللي بيفكروا في اسثمار فلوسهم بدلا من تركها في البنوك أو تحت البلاطه...

أحب أحكيلكم تجربتي بالنسبه لموضوع اتحاد الملاك,,, أنا الحمد لله ربنا وفقني و انضميت لمجموعه من الموظفين بشركات البترول بمصر, بالأضافه لبعض المهندسين و الدكاتره و الضباط, واجتمعنا كلنا بتنسيق أحد الأعضاء, و طرح فكرة شراء أرض من أراضي المزادات اللي بتعلن عنها المحافظه و روعي أن المكان يكون متميز و يحظي بقبول الأغلبيه علي الأقل,,

كان عدد الأعضاء 30 عضو,, جمعنا أول دفعه كانت عباره عن 2000 جنيه من كل فرد لتأمين المزاد و كراسة الشروط,, و دخل المنسق باسمنا المزاد "باسمه و شركاؤه", و تم والحمد لله رسو أرض المزاد علينا,, (ملحوظه هامه: المزادات في مصر محتاجه خبره و حد يكون فاهم ايه اللي بيحصل عشان مايغرقش الباقيين)

بعد رسوّ المزاد و استلام الأرض و عقود التمليك من المحافظه, توجهنا لمحامي للبدء في اجراءات اشهار اتحاد الملاك,,(لأن ماينفعش يكون فيه اتحاد ملاك بدون استلام الأرض بعقود موثقه),, وبالتالي اتنقلت ملكيه الأرض الي اتحاد الملاك,, و تم فتح حساب خاص بالبنك باسم اتحاد الملاك,, و تم جمع الدفعه الأولي من ثمن الأرض.

طبعا لابد من انعقاد جمعيه لاتحاد الملاك يتم فيها انتخاب رئيس اتحاد الملاك و من ينوب عنه و أمين صندوق,, و يتم التوقيع علي محضر الجمعيه و ارفاقه بأوراق الاتحاد,, و معرفه حدود اختصاص كل واحد و يتم ايضا الاتفاق علي مكافأه شامله للرئيس و النائب و أمين الصندوق نظرا لتحملهم المسؤليه و تفرغهم للعمل و التنسيق,,

بيتم دراسة المشروع من أكثر من جهة,, اذا كان سيتم اسناد العمل الي مقاول يكون مسؤل عن كل شيئ و يكون كل ما علينا سوي دفع الفلوس و الاستلام النهائي بدون الدخول في التفاصيل, أو الحل التاني و هو الاتفاق علي أثمان المون و الخامات و المصنعيات و كل المتطلبات الاخري بصوره منفصله وطرح الموضوع للمناقشه و جمع مجموعة عروض من شركات المقاولات للمناقشه أثناء الاجتماعات.

بيتم الاتفاق مع استشاريين البناء علي رسم نماذج و تصاميم للمبني و يتم أخذ الأصوات علي أفضل النماذج المقدمه,, و يتم أخذ الموافقات اللازمه و تراخيص البناء باسم اتحاد الملاك, و بعدها جمع ثاني دفعه و فيها يتم البدء في اجراءات البناء

طبعا بمجرد الموافقه علي أحد النماذج المعروضه و الحصول علي التراخيص يتم عمل قرعه بحضور الجميع و تخصيص شقه لكل عضو واذا كان في شقق باقيه يتم طرحها للبيع بسعر السوق,, وبالتالي الموضوع يكون جميل جدا لأن الشقه في الحاله دي هتكلف كل عضو أقل من سعر تكلفتها بعد توزيع مكسب الشقق الباقيه,, و يتم تحرير محضر لكل اجتماع و توثيقه و اضافته لأوراق الأتحاد...

الحقيقه أنا باعتمد علي الذاكره فقط و في حاجات مش فاكرها,, بس لو حد عنده سؤال ممكن يسأل و ربنا يسهل و افتكر الاجابه..

بس ادعولنا ربنا يتملنا الموضوع علي خير و نستلم الشقق في ميعادها..

[Amenemhet]

كلام جميل يا طاهر باشا .... بس انت جبته لنفسك .... مش حتخلص من الاسئله :

1- أراضي المزادات اللي بتعلن عنها المحافظه و روعي أن المكان يكون متميز ------------ لسه فيه اراضى بتبيعها المحافظات بالمزاد وبتكون فى مكان مميز ?? دى فى اى منطقه وكانت بكام ودلوقتى تجيلها بكام واخدتوا مساحه قد ايه .... يمكن ناخد جنبكوا علشان نبقى ماشيين على خطى ناس سبقونا مش حنبداء من الصفر وده احسن كتير.

2- كان عدد الأعضاء 30 عضو --------- ده انتوا ناويين على حاجه كبيره قوى بقى ... بالتوفيق انشاء الله. اكيد المنطقه مسموح فيها بارتفاعات جامده ... حيبان من ردك على السؤال السابق ... بس سؤالى هو انتوا فى اى مرحله الان ... وكلفت كل واحد كام حتى تاريخه.

3- و دخل المنسق باسمنا المزاد "باسمه و شركاؤه" ----------- اكيد كان فيه ولو ورقه بينكو قبل ما يدخل ?????

4- مكافأه شامله للرئيس و النائب و أمين الصندوق ------- اتفقتوا على كام لكل واحد ????

5- بيتم دراسة المشروع من أكثر من جهة,, اذا كان سيتم اسناد العمل الي مقاول أو الحل التاني و هو الاتفاق بصوره منفصله ------ وانتوا اخترتوا اى حل ???????

6- بس ادعولنا ربنا يتملنا الموضوع علي خير و نستلم الشقق في ميعادها-------------- ربنا يوفقكو .... انتوا بتبنو والبنا اصعب بكتير من الهد بس ربنا بيبارك .... ربنا معاكو ... وارجو انك تقولنا الاطار الزمنى للمشروع .... امتا عقدتوا اول اجتماع ... امتى دخلتوا المزاد .... المفروض تستلمو امتى ولك جزيل الشكر على المعلومات القيمه.

[tahereyad]

حلوه أوي طاهر باشا,,,, بتفكرني بفيلم "سيدة القصر" و طاهر باشا اللي مش بيغلط ابدا

المهم....

لسه فيه اراضى بتبيعها المحافظات بالمزاد وبتكون فى مكان مميز ?? دى فى اى منطقه وكانت بكام ودلوقتى تجيلها بكام واخدتوا مساحه قد ايه .... يمكن ناخد جنبكوا علشان نبقى ماشيين على خطى ناس سبقونا مش حنبداء من الصفر وده احسن كتير.

أولا أنا مش من القاهره,,, و بالتالي أنا بتكلم عن محافظتي "السويس الباسله",, لكن متهيّألي ان الفكر ده أصبح سائد دلوءتي في كل المحافظات نظرا للعائد المهول اللي بييجي للمحافظات من بيع الأراضي بالمزادات العلنيه,, بالنسبه للسويس المحافظه من فتره بتحصر كل أملاك الدوله اللي داخل المدينه و الكتله السكانيه و بتبيعها بعد تزويدها بالمرافق و الطرق و الاناره,, و طبعا أنا مش عارف اذا كنتوا فعلا عاوزين تاخدوا جنبنا فالسويس ولا لأ,,, لكن عاوز أقوللك أننا أخذنا 1100 متر و هانبني علي 60% بس حسب قوانين البنا و كلفتنا تقريبا 2,5 مليون جنيه علي 3 اقساط..

كان عدد الأعضاء 30 عضو --------- ده انتوا ناويين على حاجه كبيره قوى بقى ... بالتوفيق انشاء الله. اكيد المنطقه مسموح فيها بارتفاعات جامده ... حيبان من ردك على السؤال السابق ... بس سؤالى هو انتوا فى اى مرحله الان ... وكلفت كل واحد كام حتى تاريخه

أيوا احنا فعلا كنا ناويين علي حاجه كبيره,, و هيه عامة الموضه و الستايل فالسويس دلوقتي العمارات مش أقل من 12 دور,,, و التراخيص في المكان ده ثابته لكل الأراضي,, لكن طبعا في أماكن تانيه التراخيص فيها مش بتزيد عن 3 أو 4 أدوار,, و طبعا ده بيفرق في سعر الأرض,,, واحنا دلوقتي لسه في مرحله ابتدائيه جدا يادوب بنصب في تاني دور,, و التكلف لحد دلوقتي 75 ألف لكل واحد... و ده تقريبا نصف المبلغ التقديري للشقه,, علما أننا بعنا بعض الشقق الفايضه بأقل من سعر السوق اللي وصل ل 245 ألف,, سعرنا هو 225 ألف بس...

و دخل المنسق باسمنا المزاد "باسمه و شركاؤه" ----------- اكيد كان فيه ولو ورقه بينكو قبل ما يدخل

طبعا قبل تسجيل الأرض و بالتالي قبل اشهار اتحاد الملاك رسميا, كان المنسّق فاتح حساب مخصوص باسمه للمشروع,, و كان بيكتبلنا وصل أمانه و يكتب فيه الغرض و الحكايه كلها علي كل مبلغ بياخده مننا,, و بعد الاشهار,, أ صبح في حساب خاص و اسلوب رسمي زي أي شركه للتعامل مع الحساب و المصاريف...

مكافأه شامله للرئيس و النائب و أمين الصندوق ------- اتفقتوا على كام لكل واحد ????

بصراحه مش فاكر بالضبط,, يمكن 50 ألف للرئيس, و 50 ألف للنائب و أمين الصندوق,, وده طبعا مبلغ بسيط جدا بالنسبه لمشروع هايكلف مش أقل من 6 مليون جنيه,, و بالنسبه لمجهودهم و تفرغهم ولا حاجه وده خلال طول المده بتاعت المشروع..

بيتم دراسة المشروع من أكثر من جهة,, اذا كان سيتم اسناد العمل الي مقاول أو الحل التاني و هو الاتفاق بصوره منفصله ------ وانتوا اخترتوا اى حل

أنت فكرتني أسأل عن الموضوع ده لأني لما سافرت بعد قرعة أختيار الشقق, في تفاصيل كتير مش متابعها,, أنا دلوقتي متابع سرعة البناء و الدفعات المطلوبه و خلاص...

و أخيرا أتمنى التوفيق للجميع و اتمني أنّي أكون أفدت بالتجربه دي,, و ربنا يوفق و يتم الموضوع علي خير....

[قديم]

اشاطركم الرأي بان الفكره جميله . واقتصاديه من رويتي الخاصه . وما اعرف ليه التفاعل معاها قليل مع العلم ان الكل يبحث عن وحده سكنيه .

واضن عموما لوتيجي لاي انسان ما تلاقي في جيبه مليم واحد يعني الاغلبيه مننا تلاقيهم عليهم التزامااااااااااااااات كثيره .ولهم اهداف راسمينها لانفسهم. ويعملون على تحقيقها . ولهم الحريه في ذلك

ولكن اعتقد مثل ما قال الاستاذ ابو حميد

أنها سهلة التنفيذ لو توفرت النية والعزيمة.

واضيف لوتوافرت البنيه التحتيه بمعني هناك تفتصيل اكثر . وهي البنيه التحتبه للمشروع. مثل الموقع والمساحات والتكلفه التقديريه . ومن يتولى الاشراف والتنسيق .

بعدين فيه نقطه يعني لو يتم شراء الارض من المستثمرين بسعر السوق الان

لو تمت الفكره اعتبروني اول المشتركين بالمشروع

ايه رايكم في مدينه نصــر مبدئيا

[أحمـ باشا ـد]

فكرة حلوووة بس تكون أحلى لو كبرنا إتحاد الملاك ده و عملنا مدينة صغيرة يعنى نضيف للمباني السكنية كام مشروع إنتاجي

فكرة مشروع أنتاجي دي عجبتني جدا لأنها حل عبقري لو أتنفذ صح

مشكلة الأخوة المغتربين أنهم بيشقوا و يضيعوا عمرهم و يحطوا تحويشة العمر في حوائط و أسقف ....يعني غير قابلة للصرف مستقبلا

الأدهى أن الأستثمار العقاري هو مضاربة لتسقيع العقار و زيادة ثمنه ثم بيعه و هذا لا يحقق ربحا أقتصاديا بل هو نوع مستتر من التضخم

الحل ألذي أقترحه يناسب المغتربون جدا و يحقق لهم عائد و أرباح و سكن و فرص عمل عند العودة و هو محمي بالقانون و آمن

الحل الأمثل هو تكوين شركة أو شركات مساهمة يكون لها نشاط في العقارات و الأنتاج الصناعي و الزراعي

و سأذكر لكم بعض مزايا شركات الأسهم ألتي لا يستغلها المصريون

# الشركات المساهمة تعتبر قانونا شركات مال عام و بذلك تخضع لرقابة الحكومة و تراجع ميزانياتها بواسطة جهاز المحاسبات

و هذا يناسب المغترب لأنه لن يستطيع ترك بلد أقامته لمتابعة مشروعه

# يمكن تأسيس شركة مساهمة بعدد 6 مؤسسين كحد أدنى و رأسمال مدفوع لا يقل عن 150 ألف جنيه ( حسب آخر معلومة لدي و ربما زاد قليلا)

و على ذلك فالشركة المساهمة ممكن أن تستوعب عدد لا نهائي من المساهمين كل حسب مقدرته المالية

# يمكن تسجيل أسهم الشركة عند بدء نشاطها الفعلي و طرح أسهمها في سوق المال ( البورصة ) و هذا أيضا شئ مفيد لمن يريد أسترداد رأسماله في أي وقت

فأنه بذلك سيسترد ما دفعه مضاعفا بعد زيادة قيمة الأسهم و ورود أرباح عليها

# الشركات المساهمة معفاة من بعض أنواع الضرائب و الجمارك و هي الشركات الوحيدة ألتي تستطيع شراء أراضي من الحكومة و بناء و بيع الوحدات السكنية

و أستصلاح الأراضي الزراعية و بناء مصانع بتسهيلات في المناطق الحرة أو الأستثمارية ألتي تنشأ بقانون خاص .......و غيرها كثير

# و لأن الشركات المساهمة مضمونة فأنها تستطيع الأقتراض من البنوك بما يوازي 80% أو 90% في بنوك أخرى من حجم أي مشروع تقيمه و بفائدة خاصة

بل أن البنوك تفضل أن تزيد من عدد أسهم الشركة و تصبح مساهمة في الشركة و ذلك في المشروعات الحيوية الطموحة لأن مساهمة البنك أربح له من القرض

الحكومة أيضا تدخل كمساهم في بعض المشروعات الهامة و ذلك لأستثمار أموال التأمينات و الأوقاف و غيرها

# عمليا و من واقع الخبرات فأن قيمة السهم عند الأكتتاب تتضاعف قيمته على الأقل 300% بعد مرور ثلاث سنوات و بدء صرف كوبونات أرباح على الأسهم

# سياسة الشركة و أعتماد الميزانية و تكوين مجلس الأدارة يتم عن طريق الجمعية العمومية ديموقراطيا لحاملي الأسهم

و هناك من مزايا الشركات المساهمة الكثير جدا جدا و أنا أرى أنها الحل الأقتصادي الأوحد للمصريين للنهوض أقتصاديا و بناء مشروعات عملاقة طموحة

و نصيحتي لكل مغترب بأن يحافظ على ثروته ألتي كسبها في غربته بدموعه و دمه بأن ينميها و يستثمرها و يصرف من أرباحها من فقط و سيجد نفسه مليونيرا عند عودته لمصر

مع تحياتي

[عبده بيه]

كلام جميل ولكن كيفية التنفيذ هي الاهم

يا ريت نستطيع ان ننفذ اي شيء من خلال المنتدي كتكوين اتحاد ملاك او جمعية او اي شيء نستطيعمن خلاله التواصل للافضل

تحياتي