اخر اخبار قرعة الاراضى

[ام طارق]

الف مبروك يا دكتور انا ظروفى مثلك تقريبا انا فى الامارات والحمد لله برضه طلع اسمى فى 6 اكتوبر اول يوم بس انا اتصلت بالبنك وقالولى المطلوب

خلال شهر تكمله ال 10% + 1 % امناء وبعد كده ننتظر حتى وصول خطاب من البنك للتخصيص واعتقد انه هيكون بعد العيد على

العموم انا ان شاء الله هنزل برضه قبل العيد بفتره قصيره ولو عندك فكره عن التكالف بالنسبه للمراحل الثلاثه التراخيص والاساسات والبناء ياريت تدينى فكره ولك كثير الشكر

[عادل شحاتة]

ياجماعة يوم الإثنين الموافق 19/11/2007م كان لقاء مع وزير الإسكان من خلال برنامج - نأسف للإزعاج - على قناة دريم هل من أحد لديه فكرة عن ما قاله الوزير في هذا البرنامج

[se_ Elsyed]

أنا لحد دلوقت ساكت ومش عايز أتكلم .. بس كل اللي أنا شايفه مع كامل إحترامي للجميع هو كلام عاطفي ناتج عن الإنفعال وإحساس بالإحباط مع إن هناك عشرات البدائل المتاحه ... وأسمحوا لي اتكلم في نقاط محددة وإشتروا مني كلام وأرموه وراء ظهوركم إن لم يعجبكم :

1- موضوع إلغاء التوكيلات لن يحدث والحكومة هاتضرب دماغها في الحيط لإنه إجراء قانوني 100 % بغض النظر عن كلام قرأته هنا بيقول إن اللي بيعارض ده لازمن ولابد وحتمن يبقى تاجر أراضي .. والحمد لله أنا لا تاجر أراضي ولا تاجر مخدرات ولكن كل ما في الموضوع إني أمتلك أرض في العبور وباني عليها بيت محندق ...

2- لكن ممكن بقى ننادي او نطالب الدولة بإنها تمنع بيع أراضي القُرعة أو التنازل عنها خلال فترة معينة على الأقل خلال تسديد أقساطها .. لكن توكيل الإدارة واكررها تاني الإدارة لا يُمكن ... وخلينا نقول حل لم يتطرق عليه أحد ... يُمكن أن يكون هذا التوكيل مقبول لدى أجهزة الدولة لمدة محدده .... يعني 1+1 = 2 ... مثلاً يعني أنا راجل رسيت عليه قرعة حته أرض في مدينة جديدة ... ومُطالب أبني خلال 3 سنوات من تاريخ إستلام الأرض رسمياً .. يبقى ممكن أوكل حد يبني لي ويدير لي العملية دي خلال 3 سنوات بتوكيل يُلغى بشكل تلقائي وبعد كده اعتقد إني حُر أبيعها أولع فيها انا حُر طالما سددت حق الدولة اللي بيُسدد على 10 سنوات يبقى نضيف فقرة أخرى إن البيع لا يتم إلا بعد 10 سنوات ...

3- إحنا عمالين ندور ونلف حوالين نفسنا وتوكيلات وتفويضات وسايبين اهم نقطة انا بأراها كل يوم في مدن الشروق والعبور رأي العين وهي كمية الأراضي المتسقعة منذ ما يقرب من 10 سنوات ... والدولة مطرمخه وسايبه الناس في التلاجه بالرغم من إن العقد شريعة المتعاقدين والعقد اللي بين أي حد شاري حته أرض من الدولة بيقول إنه لازم يبني ويشطب خلال مده أقصاها 3 سنوات .... وكل سنة وإنت طيب .. يبقى مش منع التوكيلات هو اللي هايمنع الموضوع ده .

4- كانت فين الناس دي كلها اللي من كلامهم تحس إنهم قاعدين في الشارع .. كانوا فين من سنة ونصف بالتمام والكمال عندما كانت الأرض ببلاش في المدن الجديدة وخصوصاً العبور والشروق ومش هاقول مدينة بدر لإن مدينة بدر دي من سنة واحده كانوا ناقص يوزعوا أراضيها مع كل علية سمنه تاخد لك 1000 متر من كتر ما هي مهجورة وما حدش معبرها ..... هاتكلم عن العبور زي ما اتكلمت قبل كده بالأرقام ... في نهاية 2005 وبداية 2006 كان متر الأرض في أرقى مناطق العبور حيث أوجد هناك سواء السابع أو السادس بيبدأ من 200 ج ولو معاك كاش جاهز ممكن تخلصها بـ 180 وأقل قطعة كانت 600 متر لإن نظام الفيلات كده ... ولما تبقى حتة مميزة من فوق القفص كانت بـ 300 وتخلص كاش بأقل من كده واللي كانوا بيبيعوا أفراد شارييناه بقى لهم سنين طويلة لإن ما فيش أراضي فيلات متاحه عند الجهاز وكله متباع ولسه عندنا أراضي حتى الان لم تستغل كتير جداً والدولة شايفة ده وساكته ... وكنت وقتها تشتري بتنازل رسمي من المالك للمشتري بجهاز المدينة مقابل حوالي 10 % رسوم تنازل من قيمة الأرض الأصلية للجهاز .. وبعدها بشهرين اي في مطلع 2006 احمد المغربي مسك الوزارة وعمل رسوم التنازل أي البيع بين الأفراد مجاناً

5- في نفس هذا التوقيت كان أي حد معدي جنب جهاز الشروق او العبور يلاقي الموظفين قاعدين قدام الجهاز يقولوا له " إتفضل نخصص لك حتة أرض " وتروح وتشيل زي ما أنت عايز المتر في العماير بـ 300 ج و 3 سنين سماح ما تدفعش ولا مليم وتسدد بعد كده على 7 سنوات ولي زمايل كتير اخدوا ساعتها ولسه ما حطوش شكارة أسمنت في الأرض وفي القطعة أم 300 متر جايلهم عالترابيزة 350 ألف جنيه أوفر ... وسلم لي عالتخصيص .

6- لما نزلت الصيف ده ولإن معظم مكاتب العقار هناك أصدقائي وجدت حاجه غريبة جداً وتحول أغرب حدث بعد نكسة فبراير 2007 - يعني لما الدولة باعت البلد للخليجيين - لقيت إن المكاتب دي هي نفسها اللي بقت تشتري وأبقى قاعد معاه ألاقيه ميل عالخزنة اللي جنبة وطلع ملايين لأي صاحب أرض جايه يبيعها .. يعني ده ما بقاش وسيط ده بقى يشتري هو وهو عارف هايبيع لمين وإمتى وبكام ... في حين قبلها بأسابيع قليلة كانت نفس الأرض دي مرطرطة وبتتباع برخص التراب ومع ذلك كان دورة هنا وساطة فقط وبياخد 2.5 % من البايع والمُشتري ... دلوقت نفس المكتب ده بيشتري الأرض اللي كانت من شويه بـ 200 ج زي ما قلت .. بقى يشتريها السمسار لنفسه بـ 1200 ج وعالترابيزة يعني بيميل كده عالخزنة ويطلع الملايين ويأبججك ...

7- الغريب إن كلهم بأقعد معاهم في المكتب بالاقيهم معلقين وراهم قرار أحمد مغربي من اول ما مسك الوزارة من سنيتن ونزل قرار بمنع بيع أراضي القرعة بتوكيلات - يعني هو قرار قديم جداً مش جديد زي مانتو فاكرين - ومع ذلك اهل مكه أدرى شعابها وهما عارفين بيعملوا إيه وبيجمد قلبه ويفوت في الحديد وبيشتري بتوكيل .

8- نيجي لزبدة الموضوع - اللي عنده كليسترول ما يقرأش الحتتين دول :ninja: - ... إخواننا اللي بيذوبوا عشقاً في المدن الجديدة وعايزين يعيشوا في حماها ... يروحوا يشوفوا كمية الأراضي المحيطة بمدينة الشروق من أول بوابة المدينة لمسافة 20 ك متر بالتمام والكمال لحد يافطة بتقول " مرحباً بكم في مدينة العاشر من رمضان " وأراضي مُرخصة وبتتباع برخص التُراب ولكنها ليست في ذمام مدينة الشروق ولا تابعة للجهاز .. الغريب بقى إنها تابعة لمنطقة النُزهة الجديدة ... تخيلوا ؟ ولا فترة بُنا ولا دياولو وإعمل اللي إنت عايزه إن شالله تسقع ملايين الأمتار زي جمعية مصر الجديدة ما هي شاريه هناك وعامله كده وزي جمعية الأمل وجمعية الطلائع وزي جمعية القادسية وزي أفراد بالعبيط عاملين كده هناك ..

وهناك أراضي مميزة جداً جداً انا شوفتها وخصوصاً لو عايز برستيج بقى والناس تشاور عليك وتقول .. ده ساكن في حته مميزة بجوار المركز الطبي العالمي خبط لزق .... المتر هناك بيتبدي من 250 ج ده إن ماكانش عدا دلوقت لإن اخر أرض في الشروق خلاص بح واتباعت في القُرعة وبالتالي تجار أعرفهم نزلوا حتتك بتتك عالاراضي دي وأشتروا بالفدادين لإنها هي الإمتداد الطبيعي للشروق وبالتالي الدور جاي عليها عشان تولع ....

9- بالمناسبة في هناك مرافق وممكن تبني من بكره لو حبيت وجاد في البُنا والتعمير

إذن الزتونة بقى والخلاصة ... ما فيش حجه لإنك تجري وراء سراب القُرعة والبدائل موجوده ... أو زي ما قال عمو كمال الفولي في فيلم العمارة الخمس ادوار بتاعت يعقوبيان " الناس متشعلقة في ديل الحكومة كإنها مامتهم "

سيب يابني ديل جلابية الحكومة إنت وهو وإنزل أرض المعركة وحارب وأكتسب خبرات ...

أخوكم سين سين .. المتحدث الرسمي بإسم الحكومة .. ومُعارض بعد الضهر

[se_ Elsyed]

ياجماعة يوم الإثنين الموافق 19/11/2007م كان لقاء مع وزير الإسكان من خلال برنامج - نأسف للإزعاج - على قناة دريم هل من أحد لديه فكرة عن ما قاله الوزير في هذا البرنامج

شاهدته بالكامل لكن شويه وقت كده بس وأكتب الخطوط العريضة اللي إتكلم فيها وكانت كلها حول أراضي القرعة ومشروع إبني بيتك وتطريق لموضوع الاسكان التعاوني الفاشل واللي بدأ بمساكن صقر قريش ...

[طه بدر]

حمد الله على السلامة ياعم سين سين فينــــــــــــــــــــــــــــــــــــــك

الموضوع قراه 34 الف واحد حتى الان يعنى بقى مصدر خطير للمعلومات

همتك معانا علشان نفهم اللى عايز يفهم وارجوك ماتغبش قوى كده

لكن اسمح لى بقى ان اختلاف معاك مع كل تقدير لخبرتك ورايك الموضوعى الذى اتفق معه كثير لكن موضوع الاراضى حول الشروق ده لا

" وأراضي مُرخصة وبتتباع برخص التُراب ولكنها ليست في ذمام مدينة الشروق ولا تابعة للجهاز .. الغريب بقى إنها تابعة لمنطقة النُزهة الجديدة ... تخيلوا ؟ ولا فترة بُنا ولا دياولو وإعمل اللي إنت عايزه إن شالله تسقع ملايين الأمتار زي جمعية مصر الجديدة ما هي شاريه هناك وعامله كده وزي جمعية الأمل وجمعية الطلائع وزي جمعية القادسية وزي أفراد بالعبيط عاملين كده هناك ..

اولا هذه الارض تابعة للزراعة وجميع الجمعيات التى ذكرتها كلها جمعيات استصلاح اراضى يعنى هذه الارض زراعية وغير مخصصة مبانى يعنى البيع فيها غير قانونى وليس لها تخطيط او اعتماد وبالتالى ليس هناك عقود او رخص او اى شى

يعنى وضع يد ياعم سيد وهذا ما يجب الاننصح به احد فيقع فى الخية ويتنصب عليه ويقول عم السيد قالى كده

طبعا بعضها مرخض فعلى علمى الطلائع مثلا تصدر لها التراخيص والمياه والكهرباء والتليفونات من حى النزاهة فعلا

لكن انت عارف الطلائع طبعا تبع مين ومين ساكن فيها يعنى رخصة و من غير رخصة محدش يقدر يتكلم معاهم وخلينا نربى العيال

دى غير ان سعرها اساسا اعلى بكثير من سعر اغلى قطعة فى مدينة الشروق علشان خاطر جيرانك ومين جاور السعيد يسعد

اما باقى المناطق بتاعة المتر بخمسين جنيه والا حتى ميتين اعتقد ان معظمهم كما قلت لك ان لم يكن نصب اصلا

هذ والله اعلم

تم تعديل 20 نوفمبر 2007 بواسطة طه بدر

[د محمد على]

الف مبروك يا اخت ام طارق

شكرا على المعلومات

و اتمنى ان يوفقنا الله خلال الاجازة القصيرة في انهاء الاجراءات

اما عن تكاليف البناء

فهناك منتدي خاص هنا في الموقع بعنون (تكلفة بناء فيلا) يمكنك ان تتصفحيه و هناك تفاصيل كثيرة و مفيده في هذا الموضوع

لكن اللى انا عارفه كويس ان الاسعار ترتفع يوم بعد يوم نتيجة لارتفاع اسعار العمالة و الحديد و الاسمنت

المهم ان تكلفة البناء يمكن ان تزيد عن سعر الارض

و هذا شئ مؤكد

و لذا انا افكر في الشراكة

بمعنى ل ان ا اشارك بقيمة الارض و هو يقوم بالبناء و نقتسم الوحدات و ربنا يبارك

و اتمنى لك التوفيق

و اذا وصلت لاى معلومه بخصوص الاستلام ارجو الا تبلى بها علينا

و شكرا

[se_ Elsyed]

منور يا حاج طه

هارد عليك في النقطة اللي ذكرتها وقلت إن الأراضي اللي هناك اراضي زراعية :

1- فعلاً كلامك صحيح ... لكن .... خد بالك الله يرضى عليك من لكن .... اللي زراعية فيها هي الأراضي المواجهة للشروق وماكانتش وضع يد دي كانت حق إنتفاع وكانوا زارعين فيها زيتون زمان وإتبورت وجاري إستخراج تصاريح المباني لها لكنهم بيعرضوا المخططات على محافظة القاهرة حالياً لإستخراج تلك التصاريح وفعلاً المتر هناك مابين 150 إلى 200 ده اللي قريب من طريق مصر اإسماعيلية اللي مطوح جوه شويه بيقل عن 100 ج ...

لكن أنا بأكلم حضرتك على الأراضي المتاخمة للمركز الطبي العالمي ودي حضرتك متوصل لها مرافق وبالصدفة شايفهم بيحفروا وبيمددوا هناك مواسير ضخمة للصرف الصحي والمياة قبل مدينة العاشر على طول ودي حضرتك أنا شايف تراخصيها بنفسي وممكن زي ما قلت لك تبني من الصبح وفي ناس بانيه فلل وقصور هناك ولو حد له رغبة يبقى يروح يتفرج على المنطقة وهايلاقي عشرات شركات تقسيم الأراضي مكن يسألهم ويطقس كويس ويشوف الورق والمستندات وبالمناسبة هما بيبعوا تقسيط كمان ....

-------------------------------------------------

2- عايز أنصح إخواني الشباب الصغنن اللي مُقبل على مرحلة البناء في أي حته وأقول له خلي بالك إنت نازل بحر غويط .. ويا تكون عويم يا ما تنزلش دلوقت ... البناء بيكلف كتير وكتير قوي كمان ومهما حطيت ميزانية لازم تلاقيها خرمت خصوصاً مع الإرتفاع الجنوني في أسعار البناء ... يعني معاك فلوس حلوه ومعاك كمان إحتياطي يبقى إتوكل على الله وكمل ... ما معكش يبقى إركن لحد ما تفرج خصوصاً كمان لو كنت محكوم بمدة عشان ما حدش هايرحمك ويقولك خد شوية أسمنت على كام سيخ حديد بالتقسيط ..

-----------------

بالنسبة لحلقة أحمد المغربي مع منى الحُسيني باالأمس كانت مفاجاة إن الرئيس القائد أدام الله ظله إتصل بالمذيعة إمبارح بعد الحلقة على طول يهنيها على الحوار المُثمر وإليكم الخبر كما جاء في جريدة المساء اليوم

مني الحسيني:

مكالمة الرئيس مبارك.. عقب حلقة "نأسف للإزعاج"

وسام علي صدر "الإعلام المصري"

إعادة الحلقة مع وزير الإسكان.. اليوم وغداً

كتب- أمين الرفاعي

أكدت المذيعة مني الحسيني أنها تلقت مكالمة تليفونية من الرئيس مبارك بعد انتهاء إذاعة حلقة برنامجها التليفزيوني "نأسف للإزعاج" وأن هذا الاتصال يعد وساماً علي صدرها وتتويجاً لمشوارها الإعلامي بعد "20" سنة من العمل به.

أضافت: قال لي الرئيس بالحرف الواحد "لقد شاهدت حلقة اليوم من البرنامج.. وأنا معجب بالبرنامج بشكل عام وحلقة اليوم بشكل خاص".

قالت مني الحسيني: عندما تأتي مكالمة تليفونية من رئيس الجمهورية فإن ذلك يعتبر شرفا للإعلام المصري.. ويدل علي متابعته لكل ما ينشر ويذاع.. ودعمه الدائم للإعلام.

أضافت: الحلقة كانت لقاء مع المهندس أحمد المغربي وزير الإسكان والمرافق والتنمية العمرانية وكانت اجاباته مقنعة للغاية فيما يتعلق بالأسئلة التي طرحت والتي كان معظمها يتناول القضايا التي تشغل بال المواطن المصري وما يتصل بتنفيذ برنامج الرئيس مبارك الانتخابي ومشروع "ابني بيتك" ونظام القرعة وتجريم البناء علي الأراضي الزراعية والإسكان التعاوني والفاخر والشعبي وإسكان الصفوة وارتفاع أسعار مزادات الأراضي.

قالت مني الحسيني: لقد تم تسجيل الحلقة منذ أيام وبرنامجي بشكل عام يناقش كل القضايا الساخنة علي الساحة والتي تهم الجماهير في المقام الأول والأخير بمصداقية وشفافية والبرنامج ليس موجها إلي فئة دون أخري ويحمل طابع المعارضة المسئولة وهذا واجب الإعلام الحقيقي لتوضيح الحقائق ووضع النقاط علي الحروف.

أكدت مني الحسيني أنها قالت في الحلقة للمهندس أحمد المغربي وزير الإسكان أنها غاضبة جدا من ارتفاع أسعار الأراضي والبناء ومن إجاباته علي الأسئلة قلت له لقد نجحت في إزالة حالة الغضب التي كنت عليها من خلال اجاباتك.

برنامج "نأسف للإزعاج" يعرض علي شاشة قناة "دريم" يوم الاثنين الساعة "7.30" مساء ويعاد يومي الثلاثاء الساعة "4" عصرا والأربعاء "2.30" فجراً ومن المقرر إعادة الحلقة اليوم وغداً.

من الأخر كده الدكاترة مانعين الواحد إنه ياكل من الأونطه لإنالرئيس إنشكح قوي لما لقى الوزير بيكرر كلمة " حسب توجيهات سيادة الرئيس ... وحسب برنامج سيادة الرئيس وحسب أضغاث أحلام سيادة الرئيس " ييجي 100 مرة

لدرجة إن كان بيتكلم عن مشروع إبني بيتك اللي بدأ من حوالي 9 شهور وهاتتسلم أول قطع فيه في 1/1/2008 وقال .. إن حسب برنامج سيادة الرئيس كان المشروع هايضم 20 ألف وحده تطرح لراغبي البناء والألتزام بالشروط المشروع .. فتقدم لنا أكثر من 100 ألف مواطن يرغبون في ذلك فالرئيس لما عرف إتصل بي بالتليفون وقالي : يا أحمد يا مغربي ما تزودوا القطع دي وخلوا الناس كلها تاكل ... فزودنا المشروع إلى 90 ألف قطعة ..

فببديهية منى الحسيني قالت له : يعني إنتوا كنتو مستنيين مكالمة الرئيس عشان تعلموا كده المشروع ؟

وعاش الرئيس القائد الحلو اللي بيفهم في كل حاجه وقاهد طول لايوم قدام التي في وماسك سماعة التليفون في إيده

[moaz]

شكراً لكم جميعاً

صراحة استفدت كثيراً من دخولي لهذا الموضوع . للأسف الغربة جعلتنا لانعرف في مصر أي شئ . وبننزل زي الضيوف . كلام الأخوين طه بدر وسي السيد .. كلام كله في الصميم لكن صراحة يغيب فعلاً عن الكثيرين خصوصاً ممن كانوا بعيداً عن مصر .

المهم إننا نتمنى الخير للجميع والمفروض الإنسان يصنع الفرصة ولاينتظرها حتى تأتي . هذا ماتعلمته من درس ارتفاع الأرض الحالي . سبحان الله تصديقاً لكلام الأخوين أعتقد أنه كان في يوم من الأيام المتر في 6 أكتوبر كان بيعرض بعشرة جنيهات مصرية .. وللأسف ماكان يطمع فيه الكثير لأنها كانت وقتها أرض لا يثق فيها أحد كثيراً لامرافق ولا خلافه .. هذا الكلام من فترة تزيد قليلاً أو تقل عن عشر سنوات . لكن الآن سبحان الله الآن كم سعر المتر ؟ ولماذا ؟وهل هو السعر العادل فعلاً ؟ أم ماذا حدث ؟ وإلى أين هذه الموجه ؟

عموماً .. المسلم ينبغي أن لايبكي على مافاته ولايفرح بما آتاه . فما فاتك لم يكن من نصيبك . وماكان لم يكن ليخطئك . فهو لحكمه يعلمها الله ولا ينبغي أن تفرح به كثيراً . فالعطاء والمنع من الله وحده . ويجب أن تسلم بذلك .

ماأود أن أقوله .. أن تسعى للفرصة ليس عيباً وهو طلب لرزق حلال واسع طيب .. ولكن بشرط أن تضع الله دائماً حولك وتشكره إن أُعطيت وتصبر إن مُنعت . وأن تجعل لله دائماً نصيباً فيما أخلفك عليه . فبالشكر تدوم النعم ..

شكر الله لكم جميعاً .. ورزقني وإياكم رزقاً واسعاً حلالاً طيباً مباركاً فيه . اللهم آمين

أخوكم أبو معاذ

[د محمد على]

الاخ ابو معاذ

اشكرك على كلماتك

و انت محق فيما قلت

و جزاك الله كل الخير

[طه بدر]

تمام ياعم ســــــــــــــــــيد

انا رفعت الراية البيضاء

فهذه المنطقة تحديدا لا اعرفها ولم اسعد بزيارتها وان كنت سمعت عنها انها اصبحت منطقة نشطة فى المبانى والبيع والشراء

ولكن على حد علمى انها اراضى استصلاح كما هو الحال فى الناحية الاخرى من طريق الاسماعيلية ولا اعلم لماذا ستعامل بنظام مختلف

وعموما هى ليست مساحة كبيرة لان بعد شريط القطار تبدا مدينة بدر والمنطقة الصناعية الجديدة بالعاشر

يعنى احنا بنتكلم فى مثلث راسه عند المركز الطبى وقاعدته عند امتداد مصانع العاشر وعرضه حوالى 2 كيلو بالكثير

وبرضه هاقول من قال لا ادرى فقد افتى

بس سوال اخير بصفتك من اهالى العبور القدماء

انا سمعت انا السعر هناك وصل 300 جنيه واكثر عند المركز الطبى طب فى العبور مثلا فى الحى الاول والثانى مفيش قطع 200 او 300 متر وبنفس السعر؟؟؟؟؟؟؟؟؟؟؟

اعتقد اذا كان هذا صحيح يبقى نخلينا فى المضمون احسن

تم تعديل 21 نوفمبر 2007 بواسطة طه بدر

[عاشق]

الف مبروك للي فاز وهاردلك للي ما اسعده الحظ

في موضوع كنت اريد معرفته لو حد عنده فكرة

كان في كلام وتصريحات كثيرة بالاخبار على لسان المغربي والدمرداش

بوزارة الاسكان والتعمير

انه ممكن يكون هناك اراضي تكفى معظم الحاجزين بالقرعة الرابعة وخاصة مدينة 6 اكتوبر

وقالو انهم هيضمو بعض الاراضي لاكتوبر القريبة من مطار اكتوبر

وهيعطو للناس المتقدمين بالقرعة لان الاراضي بها وفرة بأكتوبر

مش عارف الكلام ده الايام ديه مفيش اي اخبار عنه

ولا هيرجعو فلوس الى مفزش بالقرعة ولا ايه

ولا ممكن يخلو الفلوس لحين ترسية باقي الاراضي

طبعا كلامى على 6 اكتوبر فقط

لو حد عنده اي فكرة يبلغنا

تحياتي للجميع

[se_ Elsyed]

بس سوال اخير بصفتك من اهالى العبور القدماء

انا سمعت انا السعر هناك وصل 300 جنيه واكثر عند المركز الطبى طب فى العبور مثلا فى الحى الاول والثانى مفيش قطع 200 او 300 متر وبنفس السعر؟؟؟؟؟؟؟؟؟؟؟

آه .. ده أنت داخل على طمع وعايز الكفته بالمتر زي زمان

يا عم روووووح

200 و 300 ج مين ؟ ناقص تقولي ما عندكمش أراضي بالكيلو ؟

إسمع بقى البؤين دول للي ما اتفرجش على حلقة العاشرة مساءً إمبارح اللي كانت صدمه شخصية بالنسبة لي لإن أول فقرة كانت تتعلق بمدينة العبور او بمعنى أصح بنصب الدولة على متقدمي القرعة الماضية في مدينة العبور

فعلموا روبورتاج مع مجموعة من الأفراد فازوا في القرعة الماضية وتحديداً في الحي الاول بمدينة العبور والذي يضم 79 قطعة مميزة جداً جداً وأنا شخصياً كل ما أعدي من هناك أنبهر بموقع القطع دي اللي يشبه منطقة الغرود المرتفعة بتاعت جمعية عرابي حيث يعيش عيلية القوم ويمتلكون ضيعات هناك وعلى رأسهم قائدنا وسيدنا علاء بك مبارك .. ما شاء الله شبه المقطم كده وعالية جداً وتطل على الحي الأول من الشرق وعلى الحي الخامس من الغرب وممكن تشوف معظم القاهرة من فوق لإن العبور أساساً عاليه وعشان كده الجو جميل جداً فيها ..

المهم أصحابنا فازوا وإتعاقدوا وقعدوا يستنوا حد ييجي يخبط عليهم عشان يسلمهم الأض او حتى يسلم عليهم ......أبداً ... فاتت سنة ودخلنا على التانية وتحديداً كمان شهرين هايكملوا سنيتن ... وما فيش فايدة ... راحوا أشتكوا لجهاز مدينة العبور .. يقومي قول إيه إمبارح بلسانه السيد اللواء رئيس الجهاز اللي إتعاملت معاه شخصياً وهو للأمانة إنسان محترم لكن أنا عارف إنه مغلوب على أمره والموضوع أكبر منه لإنه إتجاه وسلوك دولة بحالها :

- إن الجهاز إكتشف إن الأراضي دي مرتفعه وجيرية وهاتكلف كثير جداً في توصيل المرافق .. ( شوف إزاي ؟ يعني تسيب الأرض وهي مميزه بالليل ... تصبح الصبح بعد القُرعة تلاقي عليها كُخ وووحششششششه والدولة بقت خايفه عالناس احسن يتورطوا فيها )

- الـ 79 قطعة دول مميزين وليس لهم مثيل في مدينة العبور كها ... فعلاً عنده حق بصراحة عشان كده زغللت في عين المغربي

- فعلشان كده قررنا إننا ... خلوا بالكو معانا الله يكرمكم ... نطرحهم للبيع بالمزاد العلني ومتوقع يدخلوا لنا 2 مليار جنيه على الأقل .. اما أصحاب الأراضي فهاندور لهم على بديل إن شالله في أحياء الفيلات .... (وموت يا دونكي وإبقوا قابلوني )

شوفتوا النصب العلني .؟

شوفتوا إرهاب الدولة ؟

يعني بعد ما الأراضي إتخصصت للناس وكسبوا وربنا كرمهم تقوم الأرض تحلى في عين الحكومة وتسحبها من الناس عشان تبيعها بالشيء الفلاني ولا مؤخذه طظ في البشر

والبني ادم الغلبان اللي كان معاه كام ملطوش يبني بهم من سنيتن .. مش هايكفوا يشتروا شكارتين اسمنت دلوقت

وبعد ما كان معشم يبني عمارة.. بيفكروا وبيدرسوا إنهم ممكن يعطوا قطع في أراضي الفيلات .... ده لو اعطوهم أساساً

وبعدين أنا مقدم على أرض عمارة عشان أبني 4 أدوار لي ولعيالي او أاجرهم ويدخلوا لي دخل كويس ... ليه فجأة اتحول لفيلا دورين وأقل قطعة هناك بتبقى 600 متر وما ينفعش اعلى أكثر من دورين .... ونص الأرض رايحه في الجنينة ؟ بالإضافة بقى إلى تكاليف تشغيل الفيلا من حارس وجناين لكهرباء ل ل ل ل ل

وإنت يا با الحاج طه جاي تقولي المتر بـ 300 ج ؟

إذا كان اقل اوفر بيندفع هو 1000 ج في المتر وحضرتك تسدد الثمن الأصلي للجهاز يعني يقف عليك المتر مش أقل من 1400 ج

[wansawansa]

يا جماعة حد حضر قرعة بدر النهاردة يقولنا على أعداد الناس اللي قدموا في العمارات و الأخبار إيه ؟؟؟

[s s s]

يا جماعه حد عنده فكره عن نتيجه بدر طلعت ولا لسه ارجو الافاده

[wansawansa]

s_s_S

لسة لحد دلوقتي منزلتش على الموقع الرسمي ربنا يكرم يا رب

[s s s]

اشكر ردك واهتمامك يا اخ

wansawansa

[MinaAziz]

يا جماعة شكرآ علي المعلومات المفيدة اليبتقولوها. مبروك للي كسب و حظ أفضل للي مكسبش.

أنا الحمدلله كسبت قطعة في المنطقة الرابعة في 6 اكتوبر. و انا لم أكن حاضر القرعة.

عندي عدة أسئلة:

- هل يمكن أخذ قروض للبناء بضمان الأرض؟

- هل يوجد مرافق في طريق الواحات - ب؟ ان كانت الأجابة لا , هل يتم البناء و حساب مهلة الثلاث سنوات بداية من الآن, أم بداية من توصيل المرافق؟

- لأسوأ الظروف و الواحد ما قدرش يكمل بناء و تم سحب الأرض هل يتم رد الأقساط المدفوعة؟ هل يتم التعويض عن البناء الذي تم؟

ِشكرآ

[wansawansa]

د-محمد علي مفيش أخبار عن بدر ؟؟؟؟

[د محمد على]

يتم حساب السنوات الثلاث بعد استلام الارض

و الارض لا تسلم الا بالمرافق

لا يتم التعويض اذا سحبت الارض

لا ينمكن الحصول على القرض بضمان الارض لانها ليست ملكك بعد

ارجو من لديه معلومات عن بدر او العاشر من رمضان يمدنا بها

وشكرا

[vipwithyou]

انا مستنى معاكم أخبار بدر يا رجالة