اخر اخبار قرعة الاراضى

[elemam]

إنشاء الله أنا نازل مصر بنفسي يوم الوقفة 18-12 ولمدة 18 يوم

وربنا يسهل وأقدر أخلص أكبر قدر من المطلوب تنفيذه خاصة إن مدينة العاشر من رمضان كل شئ بأمر الله جاهز

وإنشاء الله أي أخبار جديدة سأوافيكم بها

لكم جزيل الشكر والتقدير على تعاونكم الجميل والمفيد .....

دعواتكم لنا في هذه الأيام المباركة ..

لا تنسوا فضل عشر ذي الحجة .. ولا تفوتوا صيام يوم عرفة فإن فضله عظيم

وكل عام وحضراتكم جميعاً وأولادكم وأحبائكم وأصدقائكم بخير

أخوكم الإمام

[se_ Elsyed]

لكن قال ان الكلام لم يعجبه و أن الشخص الذي قابله أطلعه على الخريطه و أشار له على عدة قطع على انها غير مباعه ثم عاد و أشار على بعضها عهلى إنه مباع

و بالنسبه لمنطقه المركز الطبي العالمي بيشكر فيها جداً بيقول المكان هناك راقي جدا

وبيقول الشخص اللي قابله هناك قال له ان الأسعار بيبدء من 175 جنيه للمتر إلى 300 جنيه للمتر

و نظام الشراء خمسين بالمئه والباقي أقساط على 24 شهر أو 25 بالمئه كمقدم والباقي أقساط على 24 شهر أيضاً

لكن طبعا حضرتك أخبرتني أنه عندك تفاصيل عن إختلافات بين قطعة أرض و أخرى و أن هناك الغث والثمين

طيب يعني ما هي عناصر المفاضله و إزاي أعرف أن المكان ده غث والتاني ثمين؟

أنتظر توضيحك وتفسيرك ونورنا برأيك علشان تساعدنا في القرار لأننا تقريباً إستقرينا على الشراء هناك في هذه المنطقه

خاصة إنها ليست صحراء جرداء لا زرع بها ولا ماء

يعني معمره وبها بناء وناس و أقرب للتعمير منها لغيرها

أنتظر ردك و شكراً مقدماً و آسفه إن كنت أتعبك معي

تقبل تحياتي وشكري وتقديري

أختك أم كريم

بُصي يا أم كريم

من الأخر كده وعشان نختصر مجهود الراجل بتاعكم

خليه يتوجه للمركز الطبي العالمي ... ويبقى علي يمينه يعني كإنه متجه لمدينة العاشر ... وبالظبط يتخطى المركز بحوالي إتنين أو تلاتة كيلو ( دول على الطرق السريعة يعتبروا فركة كعب ... ولو نظر خلفه يحس إن المركز جنبه بالظبط ) ويتجه لمنطقة تقسيم أراضي إسمها ( الرابية ) على اليمين برضوا كل ده .. رابيه دي جايه من الروابي يعني ..... المنطقة دي كانت شكلها عزبة بتاعت حد من الكبار لإن تقسيمها قبل التعمير بيقول كده ... ما علينا ... هناك هايلاقي أراضي كثيرة جداً متقسمه ... حاجه تذهل فعلاً لإن ما حدش يتوقع إن العمران كان سيصل إلى تلك المناطق التي جعلت القاهرة ملتحمة بالعاشر تماماً وهناك وما لا يقل عن 5 شركات تقسيم أراضي شغالة في البيع بالمنظر دي ... وفي عدة فلل مبنية على مساحات كبيرة ومسكونة بالفعل وشكلهم كانوا شاريين الرض بملاليم لن ماحدش يبني على المساحة دي كلها وتكون الأرض مكلفاه غالي ، وهي من حيث الموقع تقريباً تعتبر الأرض الأخيرة في حدود محافظة القاهرة وبعدها بتبدأ مدينة العاشر ولكن يفصل بينها وبين العاشر كما قلت مساحة أرض كبيرة شارياها شركة " زيزينيا " اللي عندها مشاريع شهيرة في التجمع وأعتقد في 6 أكتوبر كمان وهي بصدد بناء مدينة سكنية راقية هناك وهاتسميها ( زيزينيا العاشر ) وعاملين بوابة فخمه هناك على حدود أراضيهم ، ومن هناك بتشوفي بقى بداية الصروح الصناعية لمدينة العاشر من رمضان وأولها مصنع سيراميكا كليوباترا بتاع أبو العنين لإنه اول مصنع على طريق العاشر ....

مدينة العاشر يا جماعة ستشهد في الشهور القليلة المقبلة طفرة غير مسبوقة من حيث العمران ومن حيث زيادة عدد المُدن الصناعية كما تم الإعلان عنه قريباً حوالي 210 مصنع جداد هايتبنوا ، كم أن هناك دراسة جادة الأن لمد خط مترو الانفاق إلى العاشر والخط موجود بالفعل على فكرة وهو خط قطار سكة حديد السويس وهايحولوه لمترو أنفاق وممكن يأخروا شوية القطار إلى الخلف على ان تكون محطته النهائية ليست في منطقة عين شمس ولكن تبقى ممكن في بداية العاشر او أي منطقة أخرى ..

وبالتالي اتوقع إن العاشر هاتنافس مدينة 6 أكتوبر قريباً جداً ..

خلي بالك .. الأراضي اللي موجوده هناك في المنطقة دي وتُطل على طريق مصر الإسماعيلية مباشرة غالية شوية وما بتقلش عن 800 ج المتر ده لو لقتيها لإن تقريباً كلها متباعة .. لكن تدخلي في العمق شوية ممكن تلاقي الأسعار اللي تبدأ من 250 وإنتي طالعه وبرضوا 50 % كاش والباقي على سنتين ..

ولازم ولابد تشتري تقسيط عشان تبقي في الامان ويبقى إبنك في حُضنك زي ما بنقول .. والواحد ما يرميش فلوسه مره واحده .

وفي الأخر لو الواحد أشترى 400 متر هناك مثلاً وكلفوه 100 ألف ودي مساحة تطلع مبنى على شقتين الدور مرتاح قوي قوي .. يعني على ما يخلص أقساطهم يبقى قيمة المبلغ ده بعد سنتين تساوي حوالي 60 ألف لإن الفلوس قيمتها بتقل مع مرور الوقت .. ولا قدر الله لو حصل في الأمور أمور ... فأعتقد إنه ليس بالمبلغ المهول اللي الواحد ممكن يندم عليه ... ولو إن الخسارة في الأراضي هاتيجي منين ؟

ومثلما اعلنت للأخوة قبل ذلك المكتب الإستشاري الذي اتعامل معه في البناء .. فانا اتحفظ في الإعلان عن مكتب تقسيم الاراضي اللي أنا شاري منه أرض بالفعل في العاشر .. لا لشيء إلا إن البيع والشرا بالذات الواحد فيه بيبقى مش مغسل و ضامن جنه ، ولا قدر الله لو حصلت حاجه بعد كده يقولك فلان نصب علينا أو شارك في النصب علينا ...

وأساساً الواحد لو اشترى من الشيطان نفسه فلازم ياخد إحتياطاته ويخلي معاه محامي يقوم بالاطلاع على أوراق الأرض وموقفها القانوني قبل ما يدفع مليم في حاجه ...

ونصيحة للي بيحب يشتري أرض عشان يركنها شوية ويكسب فيها إنه ما يستخسرش ويخليها أرض مميزة وبالتالي جه ممكن يكلفه زيادة شويه عن الأراضي العادية ..

وتميز الأرض له عده عوامل :

1- إنها تكون على قدر الأمكان بحرية ... يعني مش الشمس ضاربة في وشها طول اليوم لإن ده بيزعج ناس كتير وكمان بيخلي الشقق مولعة وحر .

2- تكون على ناصية ويا سلام لو ناصيتين .... أي نعم ده بيخليك تُهدر أرض كتير في مساحة الشارع ... لإن الأرض يا حلو ما بتشتريهاش صافيه مصفية ... فعلى قدر المساحة العرضية لأرضك بتسيب في الشارع ... هاضرب مثل ... لو عندي حتة أرض مساحتها 300 م مربع ... وهي بعرض 12 متر وطول 25 متر ... وتطل على شارع عرضه 6 امتار ... يبقى لازم أسيب 3 متر وجاري اللي قادمي يسيب 3 متر عشان الشارع يبقى ستة ... وحيث إني عرض أرضي هو 12 .. يبقى 12 * 3 = 36 متر رايحين في الكازوزة ... ما بالك بقى لو ارضي دي على ناصية تانية وشارع برضوا 6 متر يبقى 25 * 3 = 75 متر .... يعني تقريباً 100 متر راحوا في الباي باي والمساحة ام 300 بقت 200 بقدرة قادر .. لكن ده في الدور الأرضي بس .. وبما إن الدور الأول بيبقى فيه بلكونات أو حتى لو مش عايز بلكونات فبيُسمح ببروز حوالي متر ... يعني هاسترد من المساحة تاني حوالي 40 متر بداً من الدور الأول ....

لكن ده بيفيد في تميز الأرض لإن الأرض اللي على ناصية تقريباً بتجمع بين الهواء البحري والقبلي .. كما إنها بتبقى فرصة جيدة لعمل مشاريع تجارية ومحلات اللي بتتعمل في الدور الأرضي .. وكمان بتبقى سهله في بيعها والناس بتتهافت على الأراضي المميزة خصوصاً للي بيفهموا في البيع والشرا

فتخيلوا أرض واجهتها 12 متر فقط عرض ، والطول جانبي جار لازق في بيتي ... يبقى كده هايبقى عندي محلين تجاريين فقط عرض كل منهما 6 امتار ... طب لو كانت عى ناصية ... يبقى كده عندي محلين كل واحد 6 متر ... والناحية التانية مساحة 25 متر أقسمهم زي مانا عايز محلات او مستودعات او جراج عربيات حتى ...

3- تكون قريبة من أي شارع او طريق عام ... مش مدفوسه جوه والواحد يوصل لها بصعوبة ...

------------------------

المعلومات دي بفلوس ياخواننا فلموا لي حاجه من بعضكم كده إن شالله لو إتنين كيلو لحمه لزوم العيد :blink:

[elemam]

الأخ سي السيد

كلامك جميل ومفيد بالنسبة لمدينة العاشر والمعلومات دي أنا كنت سمعت بها من ناس في العاشر

وهو ده اللي خلاني اختار مدينة العاشر وأنا بأقدم في القرعة والحمد لله حصل وطلع اسمي

وإن كان الواحد فعلاً استفاد جداً من كلامك وتوقعاتك الواضح إنها مدروسة بعناية

أحب أضيف معلومة إن كارفور أخد قطعة أرض كبيرة جداً عند سوق العبور وده كمان هينعش المنطقة أكتر ما هي

وإن كان الواحد فعلاً استفاد جداً من كلامك وتوقعاتك الواضح إنها مدروسة بعناية

بس انا من سنتين اتنين كنت سألت عن الأرض بتاعة المركز الطبي دي وكانت سبحان الله أقل من كده بكتير في السعر

وفعلاً اتصلت بشركات والغريب انهم من سنتين كانوا بيقولوا إن مفيش عندهم أراضي مميز كلها داخلي

ومش عارف إذا كان الكلام ده ساعتها صحيح ولا شايلينها هما علشان يلعبوا بها بعدين في السوق

وهو ده اللي مش خلاني أكمل في الموضوع

كل شئ نصيب و اللي له نصيب في حاجة بتجيله بأمر الله وإذنه ...

بمناسبة موضوع الاتنين كيلو لحمة

يا عمي والله تستاهل دبح خروف

رجاء خاص منك وانت كنت نصحتني بالمكتب الهندسي

راجع مشاركتي الخاصة بموضوع أقساط فلوسي في الصفحة السابقة وقوللي رأيك الخاصحتي لو على بريدي الخاص

هذا طبعاً لاني واثق من رأيك وكلامك الخالص لوجه الله

أخوك الإمام

[مصري بالوراثة]

الأخ الكريم سي السيد

جزاكم الله خيراً على مشاركاتك الفعالة .. ولي عندك طلب :

ألاقيش عندك خريطة الحي السادس في العبور؟ :blink:

ويجعله عامر

[د محمد على]

يا جماعه

معلومة غير سارة لكن حبيت انبهكم علشان تعملوا حسابكم

البنك بيحصل واحج في المائة اضافية مصروفات ادارية بالاضافة الى الواحد في المائة مجلس امناء

يعنى المطلوب

1- استكمال نسبة العشرة بالمائة

2-1% مجلس امناء

3- 1 % مصاريف ادارية

و كمان لازم تخدوا معكم ضامن ببطاقته الشخصية عشان يوقع كضامن على ايصالات امانه للبنط بباقى المبلغ

[se_ Elsyed]

أحب أضيف معلومة إن كارفور أخد قطعة أرض كبيرة جداً عند سوق العبور وده كمان هينعش المنطقة أكتر ما هي

العبور مش محتاجه كارفور ( حلو السجع ده )

لإنها فعلاً مقفولة وما بقاش فيها حتة فاضية يعني كارفور مش هايضيف تميز اخر لها خصوصاً اته تقع الارض اللي المفروض كانت بتاعته تقع ملاصقة لملاهي جيرو لاند ونادي كايرو اي سي ميلان والجولف سيتي ..... التلاته مترصصين كده بالترتيب جنب بعض

للأسف المشروع كان مطروح وكارفور اشترى الارض لكن طلعت مياه جوفيه وهما بيحفروا هناك واتغلت الفكرة

بإذن الله هابص على موضوع التقسيط ولو اني بأرجح لان ماحدش ضامن بكره فيه ايه وبالتالي خليك في الامان

----------------

الاخ مصري ,,, للاسف ماعنديش خريطة للحي السادس لإني حافظة عن ظهر قلب عشان انا هناك جنب جراند مول فاسأل على اي حاجه وانا بإذن الله افيدك

[vipwithyou]

يا جماعه

معلومة غير سارة لكن حبيت انبهكم علشان تعملوا حسابكم

البنك بيحصل واحج في المائة اضافية مصروفات ادارية بالاضافة الى الواحد في المائة مجلس امناء

يعنى المطلوب

1- استكمال نسبة العشرة بالمائة

2-1% مجلس امناء

3- 1 % مصاريف ادارية

و كمان لازم تخدوا معكم ضامن ببطاقته الشخصية عشان يوقع كضامن على ايصالات امانه للبنط بباقى المبلغ

لقد ذكرت فى الصفحة السابقة انهم 2 % بدلا من 1 % ودا فعلا اللى وصلنى من صديقى ببنك التعمير

لكن حضرتك ما قلتش حضرتك حاجز فى بدر ولا فين علشان جالك الجواب بتاع دفع الـ 10 % لأنى حاجز فى بدر ولسة ماجاش حاجة

وهل الضامن لازم يكون موظف فى مصر ولا ايه وضعة وشروطه

شكرا

أخوك

تامر السيد

تم تعديل 13 ديسمبر 2007 بواسطة vipwithyou

[د محمد على]

لقد ذكرت فى الصفحة السابقة انهم 2 % بدلا من 1 % ودا فعلا اللى وصلنى من صديقى ببنك التعمير

لكن حضرتك ما قلتش حضرتك حاجز فى بدر ولا فين علشان جالك الجواب بتاع دفع الـ 10 % لأنى حاجز فى بدر ولسة ماجاش حاجة

وهل الضامن لازم يكون موظف فى مصر ولا ايه وضعة وشروطه

شكرا

أخوك

تامر السيد

انا في العبور يا اخ تامر

بالنسبة للضامن اي شخص معاه بطاقة رثقم قومي ينفع حتى و لو مش موظف المهم انه يوقع على الايصالات

و على فكرة البنك بيخليك توقع على ايصالات على بياض دون تحديد المبلغ

و عشان كدة انا خفت شويه في الاول لكن لقيت دة بيتعمل مع كل الفائزين في القرعة الاخيرة

[vipwithyou]

اشكرك يا د محمد على على الرد

بخصوص الضامن كدة كويس انه اى شخص يعنى اكيد ينفع زوجتى ولا لازم حد يكون غريب عنى ؟؟

لكن موضوع الايصالات اللى على بياض دة مخوفنى برضوا لأن المفروض هما عارفين الباقى كام

فليه بيعملوا شيكات على بياض ؟ لكن حضرتك وافقت زى الكل ما مضطر يوافق

حاجة توغوش برضوا ربنا يستر

شكرا على ردك مرة تانية وعلى معلوماتك القيمة

أخوك

تامر السيد

[vipwithyou]

موضوع الشيكات اللى على بياض مخوفنى جدا جدا جدا وياريت حد يفهمنا الحكاية دى

بما ان المبلغ الجمالى معروف والمفروض انهم قايلين ان التقسيط على 7 سنوات بدون فوائد لما يأخذ المبنك الشيكات على بياض

ياررريت لو حد يعرف حد كان واخد فى قرعة قبل كدة وبدأ فعلا فى تسديد الأقساط يقول هل فى تغيير فى القسط الطبيعى والعادى ولا لا

انا خايف يحسبوا بعد كدة فائدة ومنقدرش وقتها نتكلم

شكرا

اخوكم

تامر السيد

[vipwithyou]

هل يا دكتور محمد اللى كان بيقسط على 3 سنوات برضوا هيمضى على شيكات على بياض ؟؟؟

[tawfeek]

undefinedالسلام عليكم ورحمة الله للجميع

أخوكم توفيق

معلشي ياجماعه أتحملوني شويه لأني اليوم فقط تم تفعيل حسابي بالموقع بعد محاولات عديده مع أني والله كان فيه حاجات كتيره عايز أرد عليها ،

بخصوص سداد قيمة الأرض كامله أو حتي علي ثلاث سنوات أنا مش مع ذلك لأن نسبة التضخم في مصر عاليه جدا يعني القسط الي هتدفعه بعد 3 سنين أو اربع سنين في وقتها هيكون أقل من قيمة 30 أو 40 %

طيب الي معاه فلوس وممكن يسدد نصيحتي له ممكن يشتري شقه أو شقتين بالمبلغ وومكن يشتريهم أقساط كمان وبعد كده يأجرها ومن الأيجار الشهري يسدد قسط القرض وفي النهايه الشقه قيمتها هتزيد وقيمة الأرض هتتسدد منها ولقد الله ممكن يبيع الشقه في أي وقت

تحياتي لجميع الأخوان وأحي ذوقهم وتفانيهم في الحوار المخلص لفائدة الجميع

أخوكم توفيق

[msmsmsms]

اخوانى اريد معرفة سعر الاراضى والشقق بمدينة بدر فمن لدية معلومات يايت يمدنى بيها

[vipwithyou]

الأراضى يا اخى تقريبا فى نظام شغال هناك دلوقتى البيع اوفر وتقريبا بيوصل 100000 دا الرقم اللى عرفتة من صديق بيحاول يشترى هناك

وفى الجرائد مكتوب هواتف مكاتب سماسرة بيبيعوا ويشتروا فى الأراضى لكن خلى بالك اذا كنت هتشترى علشان قرارات الجهاز والوزارة وهيئة المجتمعات العمرانية

[vipwithyou]

اولا ازيك ياستاذ تامر وانا مش اقولك اية على اهتمامك بالموضوع الارض ثانيا انا عايز اقول الأمضاء على الشيكات مش مخيف للدرجة وتاكدنا من الموضوع واهم حاجة ندفع المقدم بتاع تلات سنين وربنا يحلها انشاء لما تلات سنسن وياريت اسمع اخر اكبارك ياستاذ تامر

هذة مشاركة للأخ محمد عطيه ورأيك ان وضعها هنا افضل لأنها تهم موضوع الأرض

وهى عن توقيع الشيكات على بياض اللى قال عنها الدكتور محمد انه وقع فعلا على الشيكات على بياض وهو بيدفع الـ 12 %

شكرا يا محمد على الرد

اخوك

تامر السيد

[tawfeek]

ياجماعه ياتري الي ماحصلش له نصيب في 6 أكتوبر بالفلل الفلوس هترجع أمتي ، وياتري حد وصله خطاب البنك من بتوع عمارات 6 أكتوبر وياتري متي سوف يتم تسليم الأرض في 6 أكتوبر

[elemam]

الأخ توفيق

أهلاً وسهلاً بك في هذا المنتدى الرائع وده اللي حصل معايا وأنا بأسجل برضه

مش عارف ليه موضوعالتسجيل مش مضبوط هنا ...

أنا شايف إنك جالس دلوقتي ومتابع الموضوع

بالنسبة لموضوع الأقساط فأنا ///////// وبعد تفكير وتركيز واستخارة قررت أخلص نهائي وأخلص

والعملية مش مستاهلة ديون وشيكات وغيره ......

وربنا يوسع علينا ويكرمنا ويسهل لنا ... وما تنساش إن تعاملات البنوك أساساً مشبوهة شرعاً

أنا رأيي اللي يقدر يسدد يخلص لأنهم حاسبين حساباتهم صح أوي ومش عبط .. وعارفين التضخم وخلافه

دي بنوك يا عمنا

وبعدين الأرض تفضل كأنها مش بتاعتك ... وما تحسش بملكيتك لها

وزي ما قلت في مشاركة سابقة

كل لما تحب تعمل حاجة تخص بيتك يقولوا لك هات ورقة من البنك إنك مسدد لتاريخه وانت عارف بقى الناس عندنا بتحب تخدم ..

ده رأيي والله أعلم

أخوكم الإمام ....

[طه بدر]

الاخ عصام الامام

بداية تحية لك وعلى حماسك فى هذا المنتدى واسمح لى ان اوضح لك امور اعتقد انك لم تعرفها حتى تكون الرؤية واضحة

وربنا يوسع علينا ويكرمنا ويسهل لنا ... وما تنساش إن تعاملات البنوك أساساً مشبوهة شرعاً

اولا عزيزى عصام هذا ليس تعامل مع بنك

ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟

لان بنك الاسكان والتعمير الذى تقدمت له هو احد فروع الوزارة ( والا كنت من الاساس ابتعدت عن معاملات البنوك ولم تتقدم للقرعة) يعنى التعامل مع بنك الاسكان مثل التعامل مع صراف الجهاز الذى اخذت الارض منه فالحكومة بدلا من دفعك للفلوس للصراف الذى سينقلها بدورها للبنك اختصرت السكة وجعلتك تدفع فى البنك لحساب الجهاز

وسواء دفعت فورى او اقساط فانت تدفع للجهاز لذلك فانت لم تقدم طلب قرض ولم تبحث عن ربا والعياذ بالله

فالحكم هنا اخى العزيز هو الحكم الشرعى فى البيع العاجل او الموجل (البيع بالتقسيط) وهو ما لم يفكر احد فى مجرد وجود شبه عليه

فالله يكرمك ان كان ربنا وسع عليك وكرمك وسهل لك فلا تضع الريبة فى قلوب باقى اخوانك ممن سوف يضطرون الى الاخذ بنظام التقسيط

الحكومة حددت سعر البيع الحالى والحكومة ( وليس البنك) حددت سعر البيع بالتقسيط

وربنا يحفظنا جميع من الوقوع فى ما حرم الله

تم تعديل 16 ديسمبر 2007 بواسطة طه بدر

[طه بدر]

أنا رأيي اللي يقدر يسدد يخلص لأنهم حاسبين حساباتهم صح أوي ومش عبط .. وعارفين التضخم وخلافه

دي بنوك يا عمنا

وبعدين الأرض تفضل كأنها مش بتاعتك ... وما تحسش بملكيتك لها

كل لما تحب تعمل حاجة تخص بيتك يقولوا لك هات ورقة من البنك إنك مسدد لتاريخه وانت عارف بقى الناس عندنا بتحب تخدم ..

ده رأيي والله أعلم

أخوكم الإمام ....

ثانيا اخى العزيز لو دى فعلا ناس بتعرف تحسب هل سيكون متر ارض الفيلات فى مدينة بدر امام مدينتى وبجوار الشروق وهليوبوليس الجديدة 190 جنيه (زى متر اسيوط والصالحية)

بينما المتر فى العاشر من رمضان فى اخر الدنيا وبعيد عن عمران المدينة بخمسة سته كيلو اكثر من 450 جنيه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ياسيدى دو موظفين قاعدين على مكاتب وبتعـــــــــــــــــــــــــــــك :unsure:

وانت احسب ما فى مصلحتك

والفرق بين الدفع فورا والدفع على اقساط طويلة هو بالضبط لو حطيت المبلغ فى البنك فبعد سبع سنين سوف يصل الى قيمة القسط( بدون المصاريف الادارية)

اما معامل التضخم وانهيار العملة وغير ذلك فامور لايجرؤ موظف من ذكرها فى حساباته

واخير فالارض لن تكون لك بعد دفع قيمتها :blush2: :waving: :yahoo:

لان المفروض ان تقوم بالبناء وسداد الاقساط قبل ان تفكر فى طلب ملكية الارض

فدفع الفلوس وحده ليس كافيا حتى تبعد عنك الاجهزة

لازم تبنى الاول

وطلب موقفك من السداد سوف تقوم بتقديمه كل مرة فى الجهاز ( سواء سددت ام لم تسدد) لانه اساسى فى اى تعامل

وبعد البناء (ابشرك) :blink: ستقوم كل مرة تدخل فيه الجهاز بتقديم شهادة من ادارة الجهاز انك غير مخالف فى المبانى وليس عليك اى مخالفة نظافة للشارع او خلافه

يعنى احسبها من جميع الوجوه وشوف امكاناتك واحسب المطلوب للبناء فالموضوع مش سهل واذا كان هناك تسهيلات من الحكومة فلماذا لا تستفيد منها :oldman:

مع خالص دعائى للجميع

تم تعديل 16 ديسمبر 2007 بواسطة طه بدر

[msmsmsms]

الأراضى يا اخى تقريبا فى نظام شغال هناك دلوقتى البيع اوفر وتقريبا بيوصل 100000 دا الرقم اللى عرفتة من صديق بيحاول يشترى هناك

وفى الجرائد مكتوب هواتف مكاتب سماسرة بيبيعوا ويشتروا فى الأراضى لكن خلى بالك اذا كنت هتشترى علشان قرارات الجهاز والوزارة وهيئة المجتمعات العمرانية

اخى العزيز اشكرك جدا جدا لاهتمامك وسؤال لكل الاخوة هل سعر الارض +الاوفر +البناء يعطى شقق باسعار معقولة ام لا واطلب اى موقع يدلنى على اسعار الشقق والاراضى ببدر ولكم جزيل الشكر