اخر اخبار قرعة الاراضى

[tito]

اولا مش هتفرق كتير يا أستاذ هشام ان الـ 9 شهور يبدأوا من اليوم ام من بعد شهر

وبما انك دفعت يبقى اعتبر ان الـ 9 شهور تبدأ من يوم ان دفعت رغم ان المعلومة دى سهل الوصول لها عند استلام الأرض

لأننا دفعنا لكن لسة الاستلام اللى المفروض انه خلال الـ 10 أيام القادمة وابدأ فورا فى اجراءات الترخيص انه موال كبير

ورسومات هندسية ومكتب وكلام من دة يبقى احتياطى ابدأ الآن علشان ما تذنقش نفسك

وبعدين سؤال

احنا كنا قلنا لحضرتك ان آخر ميعاد 2 / 1 والنهاردة 3 / 1 يبقى اكيد فى تغيير

بس مدة الشهر دى ؟؟

غير انك ازاى خاطرت وخليت والدتك تروح بعد الميعاد ؟؟؟؟؟؟؟؟؟

صح ولا لا ؟؟؟؟؟؟؟؟؟

شكرا

يا أستاذ تامر بالنسبه لل9 شهور تبدأ من تاريخ استلام الارض اللي حدده الجهاز حتي اذا اتاخرت في الاستلام

د/خالد

[tito]

الف مبروك ياأستاذ عصام الإمام و ربنا يبارك لك و شكرا للتوضيحات

د/خالد

[tito]

:) :) بالنسبه للي فازو في بدر البنك بيتعامل مع اول 100 شخص فى اليوم و بيدلهم ارقام من 1-100 و اللي بعد كده بيروحوه - الارقام من1-60 بيخلصوهم من 8 ص الي 2 م و من 61-100 من 4 م الي 7 م

طبعا كده الاحسن اللي عاوز يروح يبقي من بدري قوى

د/خالد

[vipwithyou]

شكرا يا د / خالد على التوضيح

وألف مبرك يا أستاذ عصام استلامك الأرض

بالنسبة ليا انا على اتصال بالجهاز فى مدينة بدر بعد ما اخدوا منى الجواب بتاع البنك وقالوا اتصل بعد 10 ايام

ولسة امس بس قال ليا المهندس اللى هناك ان معظم الأرض لم يتم وضع زاويات حديد بها وقالوا اتصل كمان اسبوع تكون الأرض جاهزة دا بعد ما عرف ان ارضى فى الحى التانى - المجاورة الأولى يعنى فى فعلا اماكن جاهزة وانا فعلا شفت اراضى فيها زاويات حديد هناك وعرفت انها دى ارض القرعة

وانا متابع معاهم واذا حد استلم او عمل اى خطوة جديدة فى بدر ياريت يبلغنا

شكرا

اخوكم

تامر السيد

تم تعديل 4 يناير 2008 بواسطة vipwithyou

[wansawansa]

شكرا الأخ هشام للتوضيحات وفعلا والدي سأل في جهاز مدينة بدر قالوا نفس الكلام يوم 29/11 على الرغم من إن جواب التخصيص مبعوت من 11/12 كده الحمد لله الواحد إطمن شوية وربنا يكرم الجميع يا رب .

الأخ عصام ألف مبروك الإستلام وعقبال البناء إن شاء الله

[vipwithyou]

يا أستاذ wansawansa انا حاليا فى مصر وراجع ان شاء الله بعد 10 أيام وبأحاول فى الفترة دى أستلم الأرض قبل ما أسافر

لو عايز حاجة من بدر انا هأروح احتمال الإثنين أو الثلاثاء ان شاء الله حسب ما يقولوا ليا فى الجهاز

وانت عملت ايه فى الفيزا بتاعتك ؟

على فكرة لسة اليوزر بتاعك مبيستقبلش رسائل انا حاولت ورفض ياريت حد من المشرفين يشوفه

شكرا

[هشام عباس]

طيب فيه حد عنده فكره تطليع التراخيص بيتكلف كام تقريبا؟

وبعدين انا يا استاز تامر تفرق معايا اذا كانت ال9 شهور تبدأ من دلوقتي ولا كمان شهر لأني خارج مصر ومش هقدر ابدأ في التراخيص وانا هنا علشان اشوف موضوع التصميم بتاع البنا وانا اجازتي بتكون في شهر 7 واكيد كل واحد ظروفه مختلفه عن التاني علشان كده تفرق معايا جدا ال9 شهور ينتهو امتى

ولا فيه طريقه اني اعرف اخلص موضوع التصاريح وانا هنا؟

لو حد عنده فكره لكده ياريت يقلها لأني اصلا معرفش الموضوع ده هيحصل ازاي ولا ايه خطواته

وسؤال تاني لو سمحتو هو ممكن اتحكم في التقسيم الداخلي براحتي يعني ممكن اطلب مثلا من المكتب الهندسي انه يعملي تقسيم معين ولا بيكون فيه حاجات بختار منها ؟

ياريت الي عنده فكره او خبره في الموضوع ده يفيدنا

[vipwithyou]

استاذ هشام

متهيألى لو حضرتك لاحظت ان معظم بل الكل تقريبا اللى فايزين فى القرعة شغالين خارج مصر

السعودية قطر الامارات الكويت وكدة

يعنى كلنا ظروف واحدة

ومحدش هيقدر ينزل اجازة تكفى استخراج التراخيص مهما كان لانها اكيد بتاخد وقت علشان كدة هما مديينا 9 شهور مهله

معنى كدة ان اذا لك حد فى مصر تعمله توكيل ويقوم بالتحرك فعلا فى اجراءات الرخصة من الآن ويتابعك واذا فى رسومات او حاجة محتاجة رأيك يبقى يبعتهالك اما انترنت او فاكس ودة بسهولة تقدر توصل للمعلومات من مصر

واذا معندكش حد فانت كدة كدة اجازتك فى شهر 7 يعنى بعد 7 شهور فلما تنزل خلص كل حاجة بنفسك

وبرضوا وقتها مش هتفرق معاك 9 شهور من الآن ولا بعد شهر لو حسبتها ؟؟؟ صح ولا لا ؟

واعتقد ان ارض حضرتك فيلا

بالتالى الشروط الخاصة بك افضل من العمارات من حيث البناء بدروم ام لا والتصميم الداخلى لأى شخص الحرية فيه

هما لهم الخارج فقط

والمفروض ان حد تبعك هيستلم الأرض ؟؟

والمفروض ان الارض دى حاجة لها اهميتها اللى تخلينا نتعب لها شوية

واللى بيستلم دة هيعرف التفاصيل الخاصة بقطعتك

وأعتق الأستاذ عصام ممكن يفيدنا أكتر لأنه بدأ فعلا فى الاجراءات الترخيص

انما انا حتى لسة ما استملتش الأرض

شكرا ويارب ما أكونش تأخرت عليك فى الرد

تامر السيد

[هشام عباس]

يعني انت شايف يا استاز تامر اني انشاء الله اقدر اطلع التلااخيص في شهرين؟ يارب يكون كلامك صح

[vipwithyou]

الأفضل يا أستاذ هشام ان حد يبدأ لك من الآن فى الإجراءات دا هيسهل عليك كتير

انا ما قلتش انك تقدر تخلص فى شهرين

انا قلت ان اكيد التراخيص بتاخد وقت كتير علشان كدة هما مديينا مهله 9 شهور

يبقى لازم حد يبدا لك فيها وفور استلام الأرض أفضل تحسبا ً لأى أعطال حكومية

وانت عارف الورق فى مصر بيمشى ازاى

زى السلحفاء بالظبط

شكرا

تم تعديل 4 يناير 2008 بواسطة vipwithyou

[د محمد على]

الأفضل يا أستاذ هشام ان حد يبدأ لك من الآن فى الإجراءات دا هيسهل عليك كتير

انا ما قلتش انك تقدر تخلص فى شهرين

انا قلت ان اكيد التراخيص بتاخد وقت كتير علشان كدة هما مديينا مهله 9 شهور

يبقى لازم حد يبدا لك فيها وفور استلام الأرض أفضل تحسبا ً لأى أعطال حكومية

وانت عارف الورق فى مصر بيمشى ازاى

زى السلحفاء بالظبط

شكرا

يا جماعه ليس من الشروط انهاء الرخصة و استلامها خلال 9 اشهر و لكن المهم ان تتقدم باوراق الرخصة خلال 9 اشهر حتى و ان لم تنتهى الاجراءات

يعنى امامك 9 اشهر كامله لتجهيز الرسومات و التقدم الى الجهاز لاستخراج الرخصة و بذلك تكون قد نفذت المطلوب اما موعد استخراجها فهذا يتوقف على الجهاز نفسه و على الاجراءات الداخلية لان الرخصة يمكن ان تستغرق 6 او 7 اشهر كامله

و التقدم لاستخراج الرخصة يحتاج الى توكيل ذلك لاى شخص تعرفة و يكون توكيل خاص باستخراج الرخصة فقط و ليس توكيل ادارة و يكون باسم مهندس الذى سيقوم بعمل الرسومات

هذه المعلومات من واقع تجربتءيي الشخصيه حيث انى تقدمت لاستخراج الرخصة في القرعة الاخيرةة بعد الاستلام و عملت توكيل بذلك للمهندس

و تمنياتي بالتوفيق

[vipwithyou]

طيب يا دكتور محمد

هما فى الشروط بتاعتهم لازم استخراج الرخصة فى الفترة المحددة 9 شهور لأنهم ايضاص محددين بعد كدة برضوا فترة 12 شهر اساسات واخرى 12 شهر تشطيبات معنى كلامهم انك لازم تبدأ بعد الـ 9 شهور ومينفعش تبدأ أكيد وانت ممعكش رخصة

عموما انا اول مرة اعرف ان الرخصة بتاخد الوقت اللى حضرتك قلت عليه دة كله ودى حاجة مهمه كدة لازم الكل ياخد باله منها

ويتابع كويس

لأنى كنت فاكر انى بمجرد ما اخلص كل الأوراق والرسومات الهندسية وخلافة وأقدمها للجهاز أقصاها يكون اسبوع لإستخراج الرخصة

لكن كلام حضرتك يخلينا نخاف ونركز وتابع الموضوع جامد

وشكرا لاضافتك الكريمة

أخوك

تامر السيد

[هشام عباس]

بيقولو المازوت غلي 100% وده هيغلي الطوب والاسمنت والحديد بقى ب4000 جنيه الطن

ربنا يستر علينا لما نيجي نبني انشاء الله

يا جماعه اي حد يعمل التصميمات الهندسيه يبقى يدينا فكره عن الخطوات المتبعه والتكاليف كمان

انا كنت سامع ان التراخيص بتتكلف حوالي 15000 لكن الكلام ده مش اكيد ياريت الي عنده معلومات مؤكده يبقى يقلنا عليها

[elemam]

الإخوان الأعزاء جميعاً

السلام عليكم

أنا رجعت من مصرلا خلاص والحمد لله إطمئنيت على كل حاجة

وحاياً أنا في شغلي

اسمحوا لي تأخرت يومين عن الدخول للموضوع لظروف التحضير للسفر والسفر نفسه

رداً على استفسارات الأستاذ هشام

بداية الكلام انت حر في أرضك ارسم اللي انت عاوزه بشرط عدم تجاوز نسبة البناء حسب المدينة اللي حضرتك فيها

فأنا بالنسبة لي وأعتقد كتبت الكلام ده قبل كده ..

المهم مساحتي 500 متر في مدينة العاشر مجاورة 26 ودي طلعت مرحلة أولى في البناء بمعنى أبني على 40 % من مساحة الأرض وتزيد 10% في الدور العلوي مفتوحة يعني بلكونات يعني الدور العلوي على 250 متر والأرضي على 200 متر

بعد كده تقعد مع أهلك وأولادك وتفكر عايز تعمل المساحة دي أيه شقة واحدة ولا اتنين واتقدم باسشاراتكم في هذا الخصوص !!

مع العلم إن مجاورة 26 في العاشر مشهورة بإنها راقية وكلها ناس واصلة وفلل وحمامات سباحة أنا ماليش دعوة ده كلام الناس اللي في العاشر ..

المهم وصلت لأكثر من مكتب هندسي بعد اللف على العاشر ورؤية وتصوير مباني على الواقع اللي عجبتني طبعاً فقط

بحيث نستفيد من الأخرين .. وكل اللي اتفرجت عليه تبع نفس المرحلة في البناء ..

وعرض عليا المهندس بعض التصميمات واخذتهم معايا ولسه هأدرسهم بعناية أنا وأولادي

بس اللي محتار فيه كل العهمارة شقة واحدة ولا الدور الأول شقة واحدة والأدوار التي تليه شقتين

المهندس اقترح عليا واحدة علشان المستويات اللي حوالينا .. مش عارف لسه .. المهم طولت عليكم

بالنسبة للاتفاق مع المهندس

هو قال إن الملف اللي بيتقدم للتراخيص يحتوي شيئين (( جزء فني بمعنى الرسومات الخاصة بالمبنى وده شغل المهندس والجزء التاني وهو الأوراق الإدارية وهي تشمل اعتماد من استشاري على الرسومات ومجسات التربة وأوراق أخرى ))

وتحضير هذا الملف بعد الاتفاق معاك على الرسم

(( لينا قاعدة مع الرسم والملاحظات عليه ولا تستعجلوا في الرسم وخلونا برضه نستشير بعض بدل ما بعد ما تبني تلاقي حاجات مضايقاك ما أخدتش بالك منها على الرسم زي السلم والطرقات والمدخل واتجاه الهواء البحري وحاجات كده خلوها بعدين ))

أكمل بعد شوية عندي حصة دلوقتي

سلام

أخوكم عصام الإمام

[vipwithyou]

جميل كلامك يا أستاذ عصام ومستنيين التكملة وياريت لو فى تفاصيل عن التكلفة

أخوك

تامر السيد

[elemam]

السلام عليكم

في الحقيقة كانوا حصتين مش واحدة

أكمل الموضوع

وصلنا لغاية الاتفاق مع المهندس ما عدا الفلوس أنا بالنسبة لي اتفقت معاه والكلام كان قابل للفصال وصلت إلى .............................................................. تفتكروا كام !!!

1900 جنيه

الموضوع مش كبير والناس كويسة وفرجت المهندس على الأشياء اللي عجبتني وقال إنشاء الله نرسم لك أحلى منه ويعجبك أكتر من اللي شوفته وصورته ... وطبعاً فهمته إني مش هأوافق على الرسم إلا لما نسأل مهندسين وأهل خبرة في البناء ...

وعملت له توكيل يخلص الرخصة من الجهاز بس طبعاً بعد موافقتي أنا وأولادي على الرسم عن طريق المراسلة بالبريد الإلكتروني

وأي تكاليف في الجهاز بتكون عليا أنا ودي بتكون حوالي 1000 جنيه ..

أنا دفعت عربون 1000 جنيه وسبت له الباقي مع الأهل لما يخلص الرخصة ويعطيها لهم ..

وهو قال الرخصة بتاخد لها في الجهاز حوالي 3 أسابيع أو شهر ... فقط

وساعدوني في موضوع اختيار شقة واحدة ولا اتنين .. لأن لو شقة واحدة نقدر نلعب فيها براحتنا فاهمين طبعاً يعني نوسع الغرف ونوزعهم براحتنا ونعمل صالونات واسعة .. أما لو شقتين هنضطر إلى بعض اللعب في المساحات ..

مع العلم أن أي مخالفات لها سعر في الأجهزة

بمعني إني لو عايز أقفل جزء من البلكونات (( بعد استخراج التراخيص سليمة طبعاً )) وأضيفه للغرف بتدفع له غرامة بالمتر المربع حوالي 60 جنيه ..

ولو عايز ارتفاع البدروم يزيد عن الشروط له غرامة وكله بالمتر المربع بأسعار معروفة ..

وسألت طيب ممكن نحط اللي أنا عايزه على الرسومات وندفع المخالفات قالوا لأ لازم الرسومات تكون سليمة وبعدين اعمل اللي انت عايزه وتتخالف .... الكلام ده من المهندسين في الجهاز نفسه اللي بيوافقوا على الرسومات .. واللي بيطلعوا معاينة ...

المهم طولت عليكم

أرجو تكون الأمور واضحة وفي انتظار رأيكم في موضوع شقة ولا اتنين .. وما تنسوش إني ممكن أقفل جزء من البلكونات وأضيفه للغرف يعني لو على شقتين توصل الشقة إلى حوالي 115 متر غير البلكونات الباقية والواجهة أرجو تكون شرحي واضح ..

انتم عارفين أنا بأحب أستشير قبل ما أعمل حاجة .. وما خاب من استشار وما ندم من استخار ولا العكس الله أعلم ..

يالا سلام

نلتقي على خير ..

بالتوفيق يا استاذ تامر في مصر وربنا يوقف لك ولاد الحلال ..

أخوكم عصام الإمام

[elemam]

نسيت أقول لكم حاجة مهمة

التسع شهور تبدأ من تاريخ استلام الأرض وكتبت إقرار إني أستخرج التراخيص خلال وكتبت التاريخ من 1-1-2008 إلى 1-10-2008

لأني استلمت بتاريخ 1-1-2008 م

ده علشان لاحظت أسئلة كتير على الكلام ده ...

أخوكم عصام الإمام

سلام

[vipwithyou]

بجد معلومات قيمة جدا يا أستاذ عصام

شكرا فعلا عليها

[الحاج فوزى]

نقطة هامة أود مشاركة الأخوة فيها ومشاركتهم فى الود والوصال وتبادل الخبرات ...

بخصوص التراخيص والرسومات الهندسة ....

النقطة هامة للغاية .. هامة جداً جداً جداً جداً

أتمنى عدم التسرع إطلاقاً فى إختيار المهندس أو الإتفاق على التراخيص أو تفضيل الأرخص مثل ابو 1900 جنيه ..

بالفعل الرسومات تعتبر منخفضة السعر مقارنةً بأى شىء أخر فى مراحل البناء .. إلا أنه أهم شىء فى البناء بالكامل ..

والفارق يكون ضخم جداً بين رسومات جيدة وأخرى "أى كلام "

والعبرة لا تكون فقط بشكل العمارة الخارجى ، أو تقسيم الشقق من الداخل .

ولا أبالغ إطلاقاً إن قلت أن جودة الرسوم قد تفرق فى إجمالى تكلفة البناء بما قد يصل إلى 20 أو 30 % توفيراً أو زيادة ..

تخير مهندس أو مكتب مشهود له بالكفاءة .. ويجب عليك الجلوس مع المعمارى والإنشائى بنفسك .. ورؤية سابقة الأعمال ..

ولا تفرح بكام ألف توفير فى تكلفة الرسومات .. حتى لا تدفع كام عشرة ألاف زيادة فى تكلفة الحديد أو الأسمنت ..

متوسط تكلفة الرخصة بالفعل حوالى 15 ألف .. ، وهناك تأمين يدفع أو يؤجل حتى البناء تكلفته حوالى 5 ألاف ..

وأنصح الجميع بقراءة بعض الكتب أو المقالات حول عملية البناء وإعداد الرسومات وخلافه حتى يكون على علم ولو يسير بما ستناقشه مع المهندسين ، المعمارى والإنشائى .

إياكم والنماذج المسبقة التحضير .. فهى توضع بفرض الحد الأقصى فى كل شىء لتحقيق عامل الأمان ، وعليه تكلفك أكثر فى البناء مما قد تحتاجه أرضك فعلياً .

وإن أعجبك نموذج منهما ، فأطلب من الإنشائى أن يقوم بعمل مجسات لأرضك وأن يعيد حساباته مرة أخرى ليسجل فعلياً ما تحتاج بالضبط لا أكثر .

عزيزى المعلم ،

أتمنى أن تعيد حساباتك وأن تبحث عن مكتب أخر جيد مشهود له أو عن طريق معرفة .. حتى لا تندم .

[elemam]

الاستاذ الفاضل

إنشاء الله أنا عملت بنصيحة حضرتك وفعلاً قابلت ناس من اللي عندها نماذج جاهزة وكانت أرخص من اللي أنا قلته

أصل الموضوع كله مش مستاهل أنا مش فاهم هو حضرتك بتتكلم على عمارة فين في المهندسين ولا في المدن الجديدة ولا كلامك ده في أي مدينة من المدن الجديدة ليه 15 ألف اللي حضرتك كاتبها دي .. هي برج دي كل الحكاية 4 أو 5 أدوار .. ممكن مقاول يبنيهم من غير مهندس ولا غيره ..صلوا على النبي وسهلوا الأمور خلوا الناس تقدر تبني بيوتها وبلاش تتعقد ..

والله ناس قالوا لي ممكن تتابع بنفسك وتجيب كل حاجة زي ما انت عايز وبلاش تسلمها لمقاول ولا مهندس كل الحكاية متابعتك بنفسك مع وجود مهندس مشرف من طرفك للإشراف على الفنيات في البناء ويكون برضه معروف وله خبرة ..

يا جماعة اللي أنا كتبته بعد سؤال عن المكاتب والمكتب معروف ومعتمد ومشهور وأنا وصلت له بعد سؤال الناس عنه

ولا هو علشان قريب في أسعاره يبقى نغيره .. وقابلت ناس من اللي أغلى وناس من اللي أقل ...

أنا رحت له في مكتبه مش قابلته على قهوة واسمه هو اللي بيكون على الرسومات مش اسم حد تاني زي ما مكاتب بتعمل

وموضوع المجسات وغيره فأنا كتبته إن المكتب مسؤؤل عنه ..

شكراً مرة أخرى على النصيحة وأنا فعلاً هأعمل بيها إذا حسيت إن فيه حاجة مش عاجباني (( شكل حضرتك مهندس من أبو 15 ألف )) .. بأهزر معاك أوعى تزعل مني خليك قريب ومن أبو ألفين ...

لكن لغاية دلوقتي كل شئ تمام والمهندس لم يقم بأي تقصير ..

شكراً لكم