اخر اخبار قرعة الاراضى

[vipwithyou]

كنت عايز اعرف منك يا أستاذ هشام بما انك قرأت عن البناء بالطريقة دى

1 - هل يتم بناء الحوائط على طوبة ام على نصفة طوبة ؟

2 - كيف يتم عمل السقف ؟ هل هناك سقف خرسانى أم لا ؟ واذا لا فكيف يكون هناك سقف يحمل فوقتة ادوار اخرى ؟

لأنى بصراحة مش فاهم نظام البناء دة

شكرا

[هشام عباس]

تم حذف المشاركة لتكرارها فى موضوع "هل من الممكن الاستغناء عن حديد التسليح"

فى هذا الرابط........

http://www.egyptiantalks.org/invb/index.php?showtopic=47900

وبناءا على طلب الفاضل هشام عباس

الادارة

فلانة

[vipwithyou]

يا ريت يا أستاذ هشام تمسح البحث من المشاركة وتضع اللينك بتاعة مباشرة علشان نشوفة بتنسيقة من موقعة علشان الصور الغير موجودة به

او حتى اضف اللينك فى مشاركة تانية وخلاص

[هشام عباس]

والله انا معرفش امسح البحث ازاي؟؟؟؟؟؟ وبالنسبه للينك بتاعه

واسف ان كنت حطيته في غير محله

http://www.maimani.com/lbearingconsys/LD_REP.FIN.htm

[vipwithyou]

انا قصدى فعلا ان البحث لما يكون من اللينك مباشرة هيفرق كتير علشان الصور

وبخصوص تعديل المشاركة علشان تحزف النص منه فى موجود تحت مشاركتك كلمة تعديل اضغط عليها سيظهر لك النص كما كتبته وغير فيه زى ما انت عايز ثم اضغط اعتمد المشاركة

وشكرا على البحث لكن لم أقرأه حتى الآن لضيق الوقت ربما آخر الليل ان شاء الله وأرد عليك

شكرا

[elemam]

شكراً للاستاذ هشام على مشاركته الجميلة وعلى بحثه عن طريق تخلصنا من استغلال عز وأمثاله ..

أنا قرأت البحث وأعجبني ووصلت لغاية الجدول بتاع المقارنة ولقيت والله أعلم إن الفرق ساعة ما اتعمل البحث مش كبير للدرجة قهل هو ده الفرق حالياً برضة وكمان هناك عدة ملاحظات واستفسارات .

- هل الطوب الهوردي ده متوفر عندنا في مصر ؟!! ..

- وهل هناك عمال أو مهندسين حالياً يقدروا يبنوا بالطريقة دي ؟!! ولا كلهم هيقولوا لك الناس بتتقدم وكله بيعمل خرسانة ..

- وما تنساش هناك احتمالات إنهم يسمحوا في المدن الجديدة بتعلية دور كمان في مقابل رسوم ..

ادعوا ربنا يفتحوا باب استيراد حديد التسليح وهو هيرخص ويبقى فيه منافسة في الأسعار بدل ما هو في إيد واحد بس وعمال يتحكم في الحديد زي ما هو عايز .. المفروض يسموه عايز مش عز ..

أخوكم الإمام

[هشام عباس]

السلام عليكم اعزائي

انا سألت مهندس مختص عن موضوع البناء بطريقة الحوائط الحامله وقالي ان الطريقه ديه معروفه جدا في مصر ومتبعه في بعض الاماكن وان اجهزة المدن الجديده بتوافق عليها بشرط ان المكتب الاستشاري الهندسي والتنفيزي يكونو مقدمين رسومات مطابقه للمطلوب من جهة الجهاز

وان لو اردت التعليه في المستقبل لازم تكون عامل حسلبك على كده من الاول خالص اما الي مش مسموح به هو حزف او هدم حوائط او تغيير اماكن الشبابيك مثلا او البلكونات

اما موضوع السقف الهوري ده فأنا مش عارف لسه هو ايه؟ لكن هسأل واقولكم لكن هو موجود في مصر ويتم البناء به

وكان فيه ناس في منتدى اخر بيسألو ليه مش بنبني بيوتنا زي الامريكان بالخشب لكن المهندسين المختصين وضحولهم انه ليه مساوئ كتير جدا ولا يناسب مناخنا ولا بيئتنا

وانا من ساعة ما بدأت ابحث في الموضوع ده وانا عمال الاقي حاجات غريبه وعجيبه

بس اوك ادينا بنعرف معلومات جديده حتى لو لم تفيدنا في البناء على الاقل نبقى عرفنا معلومه

[هشام عباس]

الاستاز الفاضل عصام الامام

نسيت اقولك اني سألت عن موضوع فرق التكلفه وبين الطريقتين وقالولي ان البحث ده لما اتعمل كان الحديد بحوالي 2500ج لأنه معمول من فتره كبيره اما بالنسبه للأسعار دلوقتي فالوضع هيفرق كتير جدا صحيح بيقولو ان اسعار الطوب غليت علشان المازوت غلى لكن بالنسبه للحديد الزياده لا تزكر

ولكم تحياتي

[طه بدر]

جميل جدا ان نفكر فى وسائل لخفض تكاليف البناء ومحاربة احتكار الحديد ومواد البناء بوجه عام

ولكن اسمحوا لى هذه المرة جات اوت mfb:

ليه

استعمال الحديد فى المبنى يكون فى الاساسات ثم الاعمدة ثم السقف

الحوائط الحاملة تستبدل الاعمدة الخرسانية بحوائط طوب وطبعا يكون السمك كبير حتى يتناسب مع الاحمال

يعنى نحن نتعامل مع جزء واحد فى المبنى

بجانب ان هذه النظام يجعل من المستحيل تغير التصميم الداخلى وعمل تعديل فيما بعد لان الحوائط تكون حاملة اى انها تتحمل الاوزان التى فوقها وتغيرها بالتاكيد ممنوع

المعلومة الموكدة ان الاعمدة بالخرسانة لا تشكل اكثر من 10 فى المائة من خرسانة كل دور

يعنى اذا حسبنا تكاليف الاعمدة مقارنة مع زيادة كميات الطوب وبالتالى تكاليفها

والمساحة التى يتم اهدارها نظرا لزيادة سمك الحوائط

وانعدام المرونة فى التغيرات المستقبلية

تصبح الاعمدة الخرسانية اكثر اقتصادية مقارنة مع الحوائط الحاملة

لذلك انقرض هذه الاسلوب من البناء فى مصر

حد فاكر امتى شاف حد بيبنى حائط سمكه متر؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تم تعديل 9 يناير 2008 بواسطة طه بدر

[طه بدر]

اما موضوع السقف الهوري ده فأنا مش عارف لسه هو ايه؟ لكن هسأل واقولكم لكن هو موجود في مصر ويتم البناء به

عزيزى هشام

السقف الهوردى هو الاسم البلدى ( المتعارف عليه بين العمال) لنظام انشائى للاسقف هو Hollow blocks

والمقصود به استخدام الطوب المفرغ فى السقف لتقليل وزن السقف وتقليل كميات الخرسانة به

وغالبا ما يلجا المهندس الانشائى لهذا النظام عندما تزيد ابعاد الغرفة عن مسافة معينة (دون استشارة سعادتك لان دى اصول الشغل)

المشكلة ان الهوردى لانه مرتبط بالمساحات الواسعة (شوية) ولانه يلغى سقوط الكمرات فى الغرفة فيحسن من شكل السقف

لذلك تكون كمية الحديد فيه اكثر بنسبة كبيرة عن النظام المتعارف عليه ( سقف وكمرة ساقطة) والموجود فى كل البيوت

وغالبا ما يقوم الانشائى باستخدام هذا النظام فى صالات المعيشة الواسعة ويستكمل المبنى بالنظام العادى لتوفير التكاليف

[هشام عباس]

الأخ طه بدر شكرا جدا على معلوماتك واحنا مقلناش اننا هنبني بالطريقه ديه انما احنا بنفكر مع بعض بصوت عالي وموضوع ان الحائط بيكون سمكه متر؟ اعتقد انه بيكون كده لما يكون المبنى ادوار كتيره انما احنا بنتكلم على فلل وعمارات بحد اقصى ارضي واربع ادوار متكرره فلو كان الحائط سمكه متر اكيد هتكون فكره مرفوضه تماما البناء بهذه الطريقه انما البحث الي انا قرأته بيقول ان طالما المبنى في حدود الخمسة ادوار يبقى سمك الحوائط مش هيكون كبير!!!

عموما واضح ان عندك معلومات عن هذه الطريقه وياريت تزودنا بيها للمعرفه

ولك شكري وتحياتي

[هشام عباس]

مساء الفل يا اعزائ جبت معلومه عن الهوردي وحبيت اشارك معكم بيها

الهــــوردي:- عبارة عن أعصاب "جسور صغيرة" ثانوية، سواء في اتجاه واحد أو اتجاهين تقسم بها البلاطة "السقف" إلى بلاطات صغيرة محملة على هذه الأعصاب وتنتقل الأحمال من البلاطات إلى الأعصاب ومن الأعصاب إلى الجسور رئيسية ومن ثم إلى الأعمدة.

يلجأ المصمم إلي استخدام الأسقف الهوردي في حال وجود بلاطات ذات أبعاد كبيرة أي في حال الاستغناء عن الأعمدة في وسط البحر" البحر هو البعد من الركيزة إلى الأخرى أو من عمود إلى عمود" وذلك في الصالات المفتوحة كالمساجد وصالات الأفراح وما شابه ذلك.ويستخدم الهوردي غالبا عندما يكون طول بحر البلاطة أكبر من 8م تقريبا في.

يعد نظام الهوردي مكلف جدا وربما يعادل أكثر من مرة ونص من تكلفة البلاطات العادية...وذلك بسبب زيادة كمية الخرسانات والتسليح.

انتهت المعلومه

ومش عارف ليه انا حاسس اني بدأت اتوه !!!!!!! ولا انا نمت ولا ايه مش عارف؟؟؟؟ اصل الكلام كله عكس بعضه

[vipwithyou]

يا أستاذ هشام انا عن نفسى هأعمل اعمدة وخرسانه عادية حتى لو التكلفة فى التانى اقل

ضمانا ً للجودة والأحمال وانى مأكونش خايف على بيتى لا قدر الله من هزة ولا حاجة وبرضوا امكانية التغيير بعد ذلك فى التصميم الداخلى او تعديل

مثال بسيط

لو انت بعد ما بنيت فعلا كدة وجيت تعمل اى تعديل فى الكهرباء او حتى تفتح باب او اى حاجة زى كدة

انت عارف بيحصل ايه

الراجل العامل بيمسك حاجة ضخمة كدة شاكوش كبيييييييييييير ويضرب فى الحيطة وتلاقى البيت كله بيترج

فتخيل بقى الوضع وقتها

وتخيل الفرق لما يكون البيت اساسة سليم وخرسانه

دا قرارى الشخصى النهائى

شكرا

تامر السيد

[هشام عباس]

وانا كمان مش مقتنع اوي بموضوع الحوائط الحامله ده وانشاء الله لما اجي ابني هبني بالمسلح والخرصانه لكن ادينا بنفكر زي ما قلت مع بعض بصوت عالي

وتحياتي لك استاز تامر

[vipwithyou]

متهيألى يا أستاذ هشام المفروض ما نهتمش بنشر حاجة مش مقتنعين بيها

[RefaatMazhar]

السلام عليكم جميعا

إسمحوا لي أن أشارك في مناقشتكم الممتعة .. و التي كنت متابعا صامتا لها منذ ثلاثة أشهر تقريبا

بداية أنا مثلكم جميعا .. مغترب .. و قدمت في القرعة الأخيرة .. إلا أنني لم يكن لي نصيب في هذه القرعة .. و أحمد الله على كل الأحوال

بالنسبة لمناقشتكم حول أرخص سبل البناء .. و المناقشة الخاصة بالحوائط الحاملة .. فأرجو أن أفيدكم في هذا الأمر

بالنسبة للبحث الذي ورد عن الحوائط الحاملة .. فاسمحوا لي أن أخبركم أنه ليس بحثا و لكنه إعلان

و هو بالنسبة لغير ذوي الاختصاص مقنع جدا .. بل أكثر من مقنع

في جمل قليلة سأحاول أن أقول لماذا .. و هذا لتعم الفائدة إن شاء الله

أولا .. المقارنة منذ البداية كانت غير منطقية حيث عمد البحث أو الإعلان إلى اختيار نموذج يتناسب مع إمكانات الحوائط الحاملة .. بمعنى أنه ذو مساحات مغلقة دائما بأربع حوائط .. و هي نمطية كعلب الكبريت المتراصة جنبا إلى جنب .. و هذا ليس وضعا عاما حتى يمكن المقارنة بناءا عليه.

ثانيا .. لمحاولة زيادة كميات الخرسانة عند استخدام نظام الهيكل الخرساني .. إفترض أن الأساسات المستخدمة لبشة مسلحة .. و هي لا تستخدم أبدا بالنسبة لفيلا دورين إلا إذا كانت الأرض سيئة جدا و غير مناسبة للتأسيس من الأصل .. بل أمعن في ذلك بإضافة نهاية للبشة بسمك 70 سم و بميل 45 درجة حتى يزيد في كمية الخرسانة بأي شكل.

ثالثا .. أغفل فرق المصنعية بين نوعية البلاطات حيث أن البلاطات الهوردي إضافة لأنها مكلفة و لا تستخدم إلا في المساحات الكبيرة فإن تصميمها و هي ترتكز على حوائط حاملة مختلف عن تصميمها و هي ترتكز على كمرات .. و عموما فإن البلاطات الهوردي تحتسب بالمتر المكعب بما فيها الطوب المستخدم.

رابعا .. لا يمكن عمل أي تعديل على الحوائط بعد الانتهاء من صب الأسقف .. و أحيانا نضطر لإضافة بعض الكمرات لضمان توزيع الأحمال فوق الحوائط .. بمعنى أننا لم نوفر كثيرا في الكمرات.

خامسا .. لا يوجد أي رابط بين البناء بطريقة الحوائط الحاملة و بين عمل الأسقف هوردي .. إلا أن المصنع متخصص في إنتاج الطوب بأنواعه و يريد ترويج سلعته .. حيث كما ذكرت أن حل البلاطات بطريقة الهوردي غير وارد إلا إذا زاد أقل بعد في البلاطة عن سبعة أمتار تقريبا.

عفوا .. سأكمل لاحقا فيجب أن أؤدي بعض الأعمال الآن

[vipwithyou]

شكرا يا أستاذ RefaatMazhar على المعلومات القيمة دى وشكرا لمشاركتك معانا موضوعنا

أخوك

تامر السيد

[هشام عباس]

اولا يا استاز تامر انت الي طلبت اني اضع رابط الموضوع

ثانيا البعض من الاعضاء اثنو عليه

ثالثا انا قلت مرتين قبل كده اننا بنفكر مع بعض بصوت عالي

رابعا مش معنى اني اعرض فكره مختلفه اني لازم اقتنع بيها

لنا كنت مقتنع في البدايه ولكن بعد البحث تغير هذا الاقتناع ولا اعتقد ان ذلك فيه خطأ

والكلام الي مش عجبك تقدر ببساطه متضييعش وقتك وتقرأه

ولك تحياتي

[vipwithyou]

حاول يا أستاذ هشام تهدى نفسك

الموضوع مش مستاهل الزعل ، غير انى لما طلبت ان حضرتك تضع اللينك كان قصدى وانا وضحته فعلا ان الصور توضح الموضوع اكتر

ودا اللى حصل فعلا

الموضوع بسيط يا راجل

لك تحياتى

[هشام عباس]

انا مش زعلان ولا حاجه بالعكس تماما انا بس حبيت اوضح ليك وجهة نظري وكمان ارد على كلامك وعلى فكره انا كنت متابع الموضوع من بدري والي خلاني اسجل اصلا هنا واشترك معاكم تفتكر ايه؟

انت

لأني لاقيتك انسان خدوم جدا وبتجاوب على كل واحد وبسرعه وبتفاني كمان

وكنت عمال تحسب للأخوه تمن اراضيهم بالطرق التلاته وكمان بتدور لهم على اسمائهم وبتبعتهالهم على طول وقلت في نفسي والله المصريين لسه فيهم الخير طالما فيهم من هم مثلك

ووالله انا كنت فاكر انك بعت اميلك مره على الموقع ده لمساعدة احد ومن شويه كنت بدور عليه علشان اقولك انت مضايق مني ليه؟ وردك شويه هجومي لكن ملقيتهوش

عموما يا سيدي حصل خير وقلي بقى ايه اخر اخبار الارض وخصوصا اننا هنبقى جيران ان شاء الله

علشان بقالنا فتره مسمعناش جديد

وكمان اخو زوجتي طلعتله حته جنبك في الحي التاني المجاوره التالته ورقمها 65بأسم ايهاب احمد عبد الوهاب

يعني هنتقابل اكيد ان شاء الله وربنا يديم المحبه ولو عندك اخبار جديده ياريت تبلغنا بيها

ولك تحياتي