ازاي اسافر لدبي

[mashakel]

ارجوكم ساعدوني دي اول مره اكتب موضوع بالمنتدى هنا لاني انا سالت ناس كتير في الموضوع ده ومحدش قالي اجابة مفيدة من الاخر علشان ماطولش عليكم ازاي ان انا اسافر لدبي انا عندي 18 سنه وامنية حياتي ان اسافر لدبي انا سافرت قبل كده للبيا بس اتبهدلت هناك فانا سمعت ان دبي دي احسن حاجة ممكن تسافرها علشان تشتغل .

المهم انا كنت عايز اعرف ايه هيا طرق السفر لدبي يعني مثلا ثمن التاشيره (تاشيره الاقامة طبعا) دلوقتي بكام او مثلا ممكن حد يبعنلي عقد عمل من هناك ويبقى كفيل ليا وايه الاوراق المطلوبه وايه النظام بالظبط وياريت الاجابة تكون واضحه وفيها كللللل حاجه عن الموضوع ده وكمان ايه رايكم في دبي كويسه ولا زي اي بلد تانيه هاتبهدل هناك يعني ولا هاتظبط هناك والمرتبات الشهرية هناك بتبدا من كام لحد كام وسعر الاكل غالي ولا رخيص والدرهم بكام وكل حاجة عنها .

اجو من اي حد يكون له خبره في الموضوع ده مايبخلش عليا بردو ارجوكم .

:sad:

تم تعديل 17 أغسطس 2007 بواسطة mashakel

[autoscriptor]

غلط.... انت لسة عندك 18 سنة. دبي غلط ... غلط .... غلط ... لو فعلاً عندك امكانيات تسافر روح أوروبا (هولندا - ألمانيا - النمسا - بلجيكا - بريطانيا... أو أحسن اطلع على كندا) ممكن تطبع بفيزا دراسة في كندا .. مايهمكش المصاريف المهم تطلع ... يعني تقعدلك 5 أو 6 سنين تحاول بأي طريقة تصرف على دراستك وتطلعلهم من تحت الأرض وتقدم على هجرة وتطلب تعديل وضع واقامة دائمة وجنسية كمان. تكون ضيعت 5 سنيت بس كسبت عمرك كله. تبتدي بعدها تكمل دراستك بتكاليف أقل بكتير وتدرس حاجة محترمة تريحك بعدين. ياريت انا عندي 18 سنة نطلع مع بعض. بس خلاص يا معلم فات الميعاد. وبعدين لازم تتبهدل ... لو انت ما تبهدلتش مين يتبهدل.

أوعى الخليج وانت لسة صغير كده أرجوك.

[mashakel]

شكرا على ردك بس هو الخليج وحش كده والغرب احسن منه بس يا سيدي على الاقل العرب هانقدر نتعامل معاهم لاكن الكنديين معقدين تاني حاجه انا مؤهلي الدراسي مش عالي علشان اسافر هناك

هى الحكاية معقده!

على العموم شكرا على ردك

[الحازم حسن]

غلط.... انت لسة عندك 18 سنة. دبي غلط ... غلط .... غلط ... لو فعلاً عندك امكانيات تسافر روح أوروبا (هولندا - ألمانيا - النمسا - بلجيكا - بريطانيا... أو أحسن اطلع على كندا) ممكن تطبع بفيزا دراسة في كندا .. مايهمكش المصاريف المهم تطلع ... يعني تقعدلك 5 أو 6 سنين تحاول بأي طريقة تصرف على دراستك وتطلعلهم من تحت الأرض وتقدم على هجرة وتطلب تعديل وضع واقامة دائمة وجنسية كمان. تكون ضيعت 5 سنيت بس كسبت عمرك كله. تبتدي بعدها تكمل دراستك بتكاليف أقل بكتير وتدرس حاجة محترمة تريحك بعدين. ياريت انا عندي 18 سنة نطلع مع بعض. بس خلاص يا معلم فات الميعاد. وبعدين لازم تتبهدل ... لو انت ما تبهدلتش مين يتبهدل.

أوعى الخليج وانت لسة صغير كده أرجوك. :)

طيب ما تكمل جميلك يا عم أوتو وتقول لنا على ميزانية الليلة دي تطلع كام ؟؟؟؟

[autoscriptor]

:)

شوف يا معلم. انت الأول لازم تراسل جامعة وتبتدي تعمل اجراءات القبول ... ولازم تكون مستوفي الشروط. اجراءات القبول مختلفة لكل دولة وساعات لكل جامعة في الدولة الواحدة. لكن هناك أشياء ممكن نعممها.

المعادلة

غالبًا ما ستحتاج إلى معادلة شهادتك حتى تتمكن الجامعة من معرفة لأي مدى شهادتك الدارسة سوف تضعك على السلم التعليمي هناك. شهادة الثانوية العامة المصرية مثلاً سوف تعادل في أحيان كثيرة شهادة الهاي سكوول في أمريكا. معنديش خبرة كافية في التقديم لمرحلة البكالوريوس. خبرتي في مجال الدراسات العليا. إذا كنت تريد دراسة الماجيستير مثلاً، سيكون عليك أن تعادل شهادة بكالوريوسك حتى تمكن الجامعة من معرفة معدلك. أغلب الجامعات الأمريكية والكندية ستطلب ألا يكون معدلك أقل من 3 على سلم المعدل العام الذي يتكون من أربعة درجات، وهو مايساوي مثلاً 80%. قد تعتقد هنا أنك غير مؤهل لأنك لم تحصل على 80% في البكالوريوس. فكر مرة أخرى. أغلب الجامعات المصرية سوف تمنحك شهادة البكالوريوس إذا كان معدلك 50% أو أكثر، في حين تكون النهاية الصغرى في أمريكا وكندا 65%. وهنا الخدعة فـ 50% مصري يساوي 65% أمريكي. وبهذا إذا كانت نسبة درجاتك في البكالوريوس 73% فيمكنك أن تحصل بعد اجاء المعادلة على معدل عام أكبر من أو مساوي لـ 3

مرة أخرى إذا لم تتمكن من الحصول على معدل عام 3 في المعادلة، فأغلب الجامعات سوف تسمح لك بالتسجيل إذا كان معدلك العام بعد المعادلة أقل من 3 ولا يقل عن 2.5 ولكنك سوف تكون تحت المراقبة الأكاديمية لأول 3 مواد تقوم بدراستها ولابد لك من أن تحثل على معدل لا يقل عن 3 في هذه المواد بعدها يتم رفع هذه المراقبة الأكاديمية Propation. هناك جامعات تقوم بهذه المعادلة بنفسها أو تتعاقد مع هيئات مستقلة مثل WES

الاختبارات المؤهلة

اللغة: الأمريكيين عايزين TOEFL والكنديين عايزين IELTS. لو كانت لغتك الانجليزية مش ولابد ومفيش فايدة انك تجيب المعدل المطلوب، فممكن تتفاهم مع ادارة القبول ان يتم قبولك في برنامج تأهيلي للغى الانجليزية أولاً.

اختبارات حسب نوع الدراسة: بعض المسارات الدراسية العليا سوف تطلب منك اختبارات في مجالات أخرى غير اللغة. هناك اختبار مشهور لمن يريد أن يدرس بيزينس أو بالذات شهادة MBA الاختبار اسمه GMAT. وهذه قائمة بأغلب الامتحانات المطلوبة للدراسات العليا في مختلف الدول.

الفيزا

لا بد من اتمام اجراءات القبول لدى الجامعة والحصول على خطاب قبول مبدئي من الجامعة ليسهل حصولك على فيزا الدراسة. بعض الجامعات لديها مكاتب تسهل الحصول على الفيزا للطلاب. قبولك لدى الجامعة لا يعطيك الحق الأوتوماتيكي للحصول على الفيزا. سوف تخضع لإجراءات الحصول على الفيزا مثلك مثل أي شخص آخر ولابد من اثبات قدرتك المالية والاجتماعية قبل حصولك على الفيزا. القدرة المالية مفهومة ولكن ماهي الاجتماعية هذه. طبعًا البلاد هذه تعرف جيدًا أن الدراسة باب خلفي للهجرة. فتريدك أن تثبت أنك لازلت مرتبط بوطنك الأم. الارتباطات العائلية قوية. إذا كنت متزوج وسوف تترك زوجتك وأولادك في بلدك الأم فهذا سوف يسهل حصولك على الفيزا. وجود الأب والأم في البلد الأم كذلك. أن تكون لديك أملاك، عقار مثلاً، يسهل أيضًا كثيرًا حصولك على الفيزا.

التسجيل والمنح الدراسية

بمجرد قبولك وذهابك هناك سيتاح لك تسجيل مواد في البرنامج الذي اخترته. من الخطوات التي لابد أن تفكر فيها أن تتقدم بطلب للحصول على منحة دراسية كلية أو جزئية. أذا كنت متفوق في دراستك أو لديك تاريخ وظيفي به عدد من الانجازات فهناك فرصة جيدة للحصول على منحة دراسية توفر عليك الكثير من الالتزامات المالية. هناك أيضَا برامج لمساعدة الطلبة. حيث يمكنك العمل لعدد ساعات محددة كل أسبوع نظير تعويض مادي يساعدك في دفع مصاريفك الدراسية.

هل تريد الدراسة فعلاً أم الاقامة

أقصر الطرق للإقامة الدائمة برأيي ÷ي التفوق الدراسي هناك. البعض يصل إلى هناك ويسجل بعض المواد ثم ينقطع عن الدراسة ويعتقد ان بإمكانه المكوث هناك نهائيًا. أعتقد ان هذا تصرف غير صائب. أعتقد أن التفوق والتميرز هو المفتاح. لابد وأن تظهر اهتمامًا مجال دراستك. أعرف الكثير تلقوا عروض توظيف من الجامعات التي درسوا بها أو شركات تدربوا أو تعاونوا معها أثناء فترة دراستهم. والان هم إما لديهم حق الاقامة الدائمة أو حصلوا على الجنسية.

يعني حيكلف كام من الآخر

لا أعلم كم سيكلفك هذا. ولكن اجراءات القبول والمعادلة والفيزا من الممكن ألا تتعدى 750 دولار. برامج الماجيستير عادة ما تكون في حدود 46 ساعة معتمدة. الساعة المعتمدة في حدود 600 دولار. تكاليف المعيشة الشهرية بحدود 2000 دولار شهريًا. تكاليف السفر والاستقرار من الممكن أن تكون 3000 دولار. أضرب واجمع واطرح.

[pearl]

شوف ياسيدي انا مش بحبطك ولا حاجه لكن دبي والامارات عامة غاليههههههههههههههههههههه جدا جدا في حجات هنا بتاكل كل المرتب واولها السكن مثال بسيط شقتنا غرفتين وصاله وحمامين في ابوظبي بندفعلها 95 الف درهم كل سنه وعلى فكره دبي اغلى الا لو كنت ناوي تقعد مع 10 في اوضه والعلاج غالييييي الا لو هاتشتغل في مكان محترم هايعملك تامين صحي او لو كنت ناوي ماتعياش

طرق دخولك دبي اما عقد عمل وبيبعتلك صاحب العمل الفيزا اللي بتدخل بيها الامارات وساعتها انت مابتدفعش اي حاجه وهو او الشركه اللي هاتشتغل فيها هيا اللي بتدفع كل حاجه ودي اسلم طريقه و اكثرهم حفاظ على الادميه

او يكون معاك مبلغ محترم تدرس فيه وساعتها هاتكون فيزة طالب لحد ماتخلص الدراسه

او تدخل زياره بس لواحد مقيم ودي بتكون 3 شهور

او سياحه ودي ليها ناسها( كنت اعرف ان طيران الامارات بيوفر الفيزا السياحيه على التيكت بس مش متاكده من المعلومه دي)

او تشتري فيزا يعني تخلى اي واحد مواطن يكون كفيلك مقابل مبلغ في حدود من 5 الى 8 الاف درهم كل سنتين وده حسب ماتتفقوا

نصيحه لوجه الله من اخت بقالها هنا ست سنين والحمدلله شغاله مع شركه محترمه

لو مش جاي على وظيفه مضمونه ومرتبها محترم خليك في بلدك اكرملك

الهنود هنا واخدين الشغل كله ومرتبتهم بتوصل لي 600 درهم في الشهر وكل 10 بيعيشو في اوضه 4*4 مثلا لو تقدر تعمل زيهم تعالا

[desert_eagle70]

انا عايز اضيفلك حاجة أخى العزيز انتى سنك مناسب وقدامك تختار حاجة من اتنين يا اما تيجى هنا وتقعدلك كام سنة وبعدين تطلع على برة .. با إما تطلع على برة وبعدين تيجى هنا فى كلتا الحالتين دى مسألة نصيب وانت رحت ليبيا وانا عارف ظروف ليبيا .. يعنى مش هيحصلك فى دبى أكتر من اللى حصلك فى ليبيا .. المهم القرار فى ايدك انتى ورزقك ورزق هنا رزق هناك .. دبى مش وحشة ولا حاجة بس أنت ونصيبك يا ترفعك يا تنزلك بس نصحتى جهز نفسك قبل ما تيجى هنا المنافسة قوية واى شركة ملهاش عزيز اللى بيناسبها بتختاره وانا مش عارف مؤهلاتك بس هنا المنافسة قوية .. كمان فى حاجة فاز باللزات كل مغامر .. اتوكل على الله .

بس نصيحة خلى باللك من اللى بيعملوا فيز ومتلجأش للفيزا الزيارة إلا لما تفقد الأمل فى عقد عمل . يعنى دور .. وعلى ما تدور كام دورة كمبيوتر على أنجليزى verb to be و verb to have وتعالى.ربنا معاك

[زعلان]

يا سيدي على الاقل العرب هانقدر نتعامل معاهم لاكن الكنديين معقدين

دبي و الامارات عموما نسبة العرب فيها لا تتجاوز 10% يعني تعاملك حيكون مع اجانب من كل جنسيات الارض الهنود و الاسيوين هم السواد الاعظم من سكان الامارات ثم البريطانيين و الجنوب افريقيين و مورورا بجميع دول اروبا و دول الاتحاد السيوفيتي السابق و شمال اميركا و امريكا الجنوبية و اللغة المتعامل بها مع الجميع هي اللغة الانجليزية بكل لكناتها (هندي بريطاني ايرلندي كندي صعيدي) اما اللغة الأم لاغلب السكان فهي ( الهندي و الاردو) واللغة العربية هي اللغة الرسمية للبلاد وهي مطلوبة بجانب اللغة الانجليزية للوظائف التي تتعامل مع الحكومة و خدمة العملاء و التسويق

انت خبرتك ايه هل انت فني حاول تدرس او تعمل في مصر في مجال فني ميكانيكا تحديدا في مصانع او في مجالات التبريد المبردات الضخمة ...مضخات المياه ........ على الاقل لمدة سنتين عندها ستكون مطلوبا كفني متخصص وقد تجد راتب جيد ثانيا حاول تحسن لغتك الانجليزية وان تكون ملم بمباديء اللغة و ان تحصل على مستوى متوسط فيها وان تستخدم المسطلحات الفنية الانجليزية في مجال عملك بدلا من العربية و بالتوفيق

[mffaswan]

الأخ مشاكل

بص م الآخر

أنت بتشتغل ايه .. و مؤهلاتك ايه بالظبط عشان نعرف نرد عليك

و بعدين لازم تعرف إن الأمارات مش زي دبي .. دبي و ا لشارقة و أبو ظبي كوم .. و باقي الدولة كوم

انا مقيم بالعين .. و العين أرخص بمراحل من دبي .. بالنسبة للسكن (و ده أهم بند) .. و كذلك باقي الامارات .. ممكن تسكن في بيت وحدك بداية من 1000 درهم. إنما ف دبي و الشارقة .. الـ 1000 درهم يا دوب سرير في شقة معقولة ، فيه بـ 600 و فيه 700 ، و فيه بـ 300 على حسب وضع السرير و على حسب وضع الشقة و عدد السراير فيها ، و على حسب وضع المكان .

المواصلات و خصوصاً التاكسي غالي جداً جداً و المواصلات العامة .. مش بتخدم زي النقل العام ف مصر مثلاً ..

ميزانية المأكل .. من 600 إلى ما شاء الله .. لكن لو كنت شيف و ليك ف المطبخ .. هتقدر توفر

العلاج غالي جداً .. لكن فيه بعض الحاجات رخيصة نوعاً ما .. زي الملابس (أنواع و أنواع طبعاً)

هنا فيه شغل كتييييييييييييييييييييييير .. بس المطلوب .. ناس مؤهلين و عندهم خبرة .. و خلي بالك من موضوع مؤهلين و عندهم خبرة .. ها

[أبو مروان]

السلام عليكم و رحمة الله و بركاته...

شوف يا اخى الكريم اولا انت عرضت اسئلة كثيرة بتبحث لها عن اجابات و لكن فى نفس الوقت عرضت معلومات قليلة عن نفسك ... يعنى ايه مؤهلاتك و ايه خبراتك .. و لو عاوز نصيحتى بلاش تسافر دبى و انت فى السن الصغير ده (18 سنه) ... كمان احب اقولك ان دبى مش جنة زى ما ناس كتير فاكرين ... ولازم تعرف ان اى حد او شركة بتشغلك بتاخد حقها منك بكل درهم بتقبضه ... يكفى ان هنا فى شهر اغسطس مثلا درجة الحرارة بالنهار بتوصل 52 و نسبة الرطوبة 98% يعنى بنتنفس بالعافية .... ماتصدقيش اللى بتشوفه فى الفضائيات عن دبى ... دبى هى مكان للاغنياء فقط للمتعة ... اما للعمل فهم لا يقبلون اللى الخبرات الجيدة و النادرة والتى تكون مفيدة لهم ... ما تفكرش ان الناس دى هبل ولا ان الدولارات مرمية هنا فى الشارع منتظرة اى ذكى من مصر ياتى يعبيها فى شوال ... صدقنى حاول تركز و تكسب خبرة الاول فى بلدك و حاول تتعلم مهارات اكتر فى مجالك و ماتستعجلش الغربة ... الغربة مرة بمعنى الكلمة ... والله يوفقك

مهندس مصرى يعمل فى دبى منذ 4 سنوات

15 سنة خبرة + ماجيستير من الولايات المتحدة الامريكية

[mashakel]

انا مش عارف اقلوكم ايه يا جماعه لانكو اهتميتو جدا بالموضوع ده بدرجه ماكنتش متوقعها

وانا كنت عايز اقولكم ايه هى مؤهلاتي زي ما طلبطم

هو انا بالنسبه للتعليم فهو مش عالي خالص هو انا لسه في معهد فني تجاري

لاكن انا عندي خبره كويسه في الكمبيوتر والحمد لله كويسه جدا لاني عايش طول حياتي فيه بالنسبه للصيانه والكلام ده

فهل هناك المجال مفتوح لشغله زي دي وياريت توضحولي ازاي اعرف اي شركه من هناك علشان تبعتلي قيزه عمل ومعلش يا جماعه انا تقلت عليكم كتير

[زعلان]

يعني يا مشاكل لا لغة و لاخبرة و كل الي معاك ثانوية + المام بالكمبيوتر و الهارد وير ........... يبقى انت عايز ضربة حظ أو واسطة و العائد سيكون مش مغري وده ممكن يحصل وممكن لأ ......... ابدأ في اختيار مجال عمل فني هندسي ( ميكنيكا او كهرباء )في احد المصانع و خدلك دورة او دبلوم فني هندسي وادرس لغة ساعتها حتلاقي فرص جيدة سواء في مصر او خارج مصر لازم يكون عندك سيرة ذاتية و تخصص لسه امامك وقت ابدأ اعمل بجدية وانت تحقق هدفك بما انك شاب طموح و ربنا يوفقك

[mffaswan]

يعني يا مشاكل لا لغة و لاخبرة و كل الي معاك ثانوية + المام بالكمبيوتر و الهارد وير ........... يبقى انت عايز ضربة حظ أو واسطة و العائد سيكون مش مغري وده ممكن يحصل وممكن لأ ......... ابدأ في اختيار مجال عمل فني هندسي ( ميكنيكا او كهرباء )في احد المصانع و خدلك دورة او دبلوم فني هندسي وادرس لغة ساعتها حتلاقي فرص جيدة سواء في مصر او خارج مصر لازم يكون عندك سيرة ذاتية و تخصص لسه امامك وقت ابدأ اعمل بجدية وانت تحقق هدفك بما انك شاب طموح و ربنا يوفقك

الكلام ده صح .. و أنا أؤيد الأخ زعلان على كلامه .. لإن الفرص هنا كتييييرة .. بس المطلوبين .. لازم يكونو مؤهلين (يعني عندهم خبرة كويسة) .. و لازم يكون عنده مميزات تميزه عن الهندي أبو تلاته درهم .. و إلا الغربة مالهاش لزوم

ياريت تاخد الكلام ده يا أخ مشاكل على أنه نصيحة لفعل الأفضل .. أنت ممكن تيجي بزيارة و بعدين تنزل اعلان ف الجرايد .. و يا لقيت شغل يا مالقتش .. لإن المطلوب حد يكون متميز .. و بما انك لسه بتدرس .. أنا أنصحك بحاجة :

ممكن تتدرب على تشغيل المعدات في مراكز متخصصة (فيه مركز ف القاهرة .. بس مش عارف عنه تفاصيل ممكن تسأل عنه ف الدليل) بيدربك على الرافعة و الونش و الشوكة .. و المعهد ده بيدي شهادة ..معترف بيها هنا .. و راتبك ف الحالة دي هايكون ف بدايته كويس .. أسأل ..

أما بالنسبة للكومبيوتر .. فأنا أعرف مصريين هنا ف دبي ( وخد بالك دبي بلد غالية جداً ) بيشتغلوا مدربين حاسب آلي .. و جامعيين .. و رواتبهم 1750 و 2000 درهم .. فماتغامرش إلا لما تحسبها كويس

و بنا يوفقك

[mohamedez]

انت لسه صغير

واضح من كلامك انك مخلص دراسة يعنى نقدر نقول انك معاك شهادة متوسطة ، الحقيقة ما انصحكش تجى دبي لان مرتبك هيبقى قليل جدا والوظيفة اللى ممكن تناسبك هتلاقى ميت الف هندى موجود علشانها

[freestyle]

طيب يا أخ autoscriptor طالما أنت كنت قولتة دة كان عن كندا طيب أزاي تدخل أوروبا و بالتحديد بريطانيا و بالتحديد أنجلترا ؟

مع العلم أني برضة مش كبير في السن (20 سنة )

ومن ناحية اللغة فأنا الحمد للة مستوايا advanced ومعايا شهادات بكدة

ومن ناحية التخصص فأنا في أخر سنة في كلية هندسة قسم ميكانيكا باور (تخصص تكنولوجي مطلوب زي ما كنت بتقول )

ومن ناحية الكمبيوتر (معايا أوتوكاد و ICDL دة غير بقى شغلى العادي على الكمبيوتر internet & windows )

فياريت تقول نفس الكلام اللي قولتة عن كندا بس يكون عن أنجلترا (و أديك عارف مؤهلاتي )

وجزاك الله كل خير

(أسف لكتابة الأستفسار هنا بس أنا كنت كتبتة في موضوع سابق بعنوان أنجلترا من جديد وللأسف بقالة أكتر من 3 شهور و لم يرد أحد )