الشخصية المصرية

[mamdowh]

كل شعب له مواصفات يتسم بها يعنى مثلا لمل نقول اليابانى نفتكر على طول المهارة والذكاء والصناعة, والايطالي نفتكر المكرونه, والانجليزى نفتكر الاستعمار, اللى نفسه أعرفه لما نقول مصرى نفتكر ايه؟ ياريت كل واحد يشارك ويقول مايعرفه عن المصرى

[قديم]

انا راي ان هذا الانطباع لا يكون من ابناء البلد الواحد .. فمثلا غير المصريين هم اللي يقولو انطباعاتهم عن المصريين

فهل الانجليزي يقول عن نفسه انه استعماري . وهل الايطالي يدرك انه الاسباكيتي ..

ما اريك في هذا العنوان ..

المصري بعيون الاخرين ..

[kokomen]

طبعا الفهلوة

والجدعنه

[badroora]

خفة الدم

ابن البلد

احفاد الفراعنه - فرعون

المصري يعنى الطيبة والشهامة والرجوله

الحريم بقي

ست بيت عياشة

ام الفراعنه

مصدر الحنية

مصريه يعنى النيل رواها والخير جواها

مصرية مين قدها

كفاية كدا اصل حد يحسدنا :wub:

[mamdowh]

انا راي ان هذا الانطباع لا يكون من ابناء البلد الواحد .. فمثلا غير المصريين هم اللي يقولو انطباعاتهم عن المصريين

فهل الانجليزي يقول عن نفسه انه استعماري . وهل الايطالي يدرك انه الاسباكيتي ..

ما اريك في هذا العنوان ..

المصري بعيون الاخرين ..

والله عنوان جميل ( المصرى بعيون الآخرين )

[زعلان]

الصوت العالي

[tahereyad]

الشخصيه المصريه دي قصه و حكايه كبيره,, يطول الحديث عنه,, و ممكن نلاقي فيه كتيييير جدا من المتناقضات الغريبه,, علي سبيل المثال لا الحصر,,

المصري شخص متدين "أيا كانت ديانته" و بيحافظ علي شعائر دينه,,,,, لكن للأسف تدينه مش بيصلّح من عيوب نفسه.

المصري شخص صاحب مبادئ و قيم عليا,,,,,,, لكن للأسف قيمه و مبادءه مش بتقوّم سلوكه تجاه نفسه و عمله و الأخرين.

المصري شخص كتوم جدا,,, مش بيحب ان الآخرين يعرفوا كتير عن حياته الشخصيه,,,,,,,, لكن نلاقيه للأسف بيحاول يتتبع حياة الآخرين.

المصري شخص جدع و شهم و بيساعد اللي بيحتاجله,,,,,, لكن للأسف جدعنته مش بتمنعه أنه يخدع الناس تحت مسمّي الفهلوه.

المصري بطبعه يحب يتعرّف دايما علي كل ما يحيط به من أحداث,,,,,,,, لكن للأسف بيتعامل معاها بسلبيه.

المصري عنده ذكاء كبير جدا يمكنه أنه يكون في المقدمه,,,,,, الا انه دايما بيفضّل انه يكون في المؤخّره

[badroora]

خلاص يا اخ طاهر انت شوهت المصري خالص

كدا منظرنا فى الميديا بقي صعب اوى

وكمان ليه حضرتك عممت المفروض تخصص يعنى تقول فيه وفيه

كدا انت حسستنى ان كلا واحد

[tahereyad]

يا نهار أبيض,,, معني كلام الاخت نجفه أننا عالهوي و بنصوّر,,, هو الواحد مايعرفش يتفك معاكو بكلمتين...

طبعا أنا ماجمعتش بكلامي كل المصريين,,, لكن التناقض ده فعلا موجود في السواد الأعظم من الناس,, لكن طبعا بتختلف في درجاتها في الاتجاهين السلبي و الايجابي من فرد لفرد,,, لكن,, هل نقدر ننكر وجودها بالكليه؟؟

[desert_eagle70]

استنوا لما اقول رأى انا كمان

صبور - غيور- إنتمائه عالى - نفسه تبقى كل حاجةحلوة تبقى مصر - وفى المصايب سايبها لله - رجالة - غلبان - برمجى - ساعات عفيجى _ بيتكلم فى اللى فاهم فيه واللى مش فاهم فيه يعنى معندوش حاجة اسمها معرفش ماشى بنظرية المحاولة والخطأ- لسانه حلو - عاطفى وبيجى بالكلمة وساعات بيجى بالعصاية ومحدش يفهمنى غلط - اه وشاطرين - متسامح - متكيف ( يعنى يقدر يتكيف على الوضع مش بالمعنى التانى ). كفاية سلام عليكم.

[mamdowh]

الموضوع المطروح مش عايزين فيه نفاق ولا مداريه احنا عايزين نعرف احنا مين وليه فى ناس كتير بتحبنا كمصريين وبرضه ناس كتير بتكرهنا , فالعملية مش منظرنا وحش والا حلو كما قالت الاخت نجفة لا احنا عايزين صراحة زى ما قال الاخ قديم عايزين نشوف ( المصرى بعيون الآخرين ) مش بعيونا

[badroora]

الموضوع المطروح مش عايزين فيه نفاق ولا مداريه احنا عايزين نعرف احنا مين وليه فى ناس كتير بتحبنا كمصريين وبرضه ناس كتير بتكرهنا , فالعملية مش منظرنا وحش والا حلو كما قالت الاخت نجفة لا احنا عايزين صراحة زى ما قال الاخ قديم عايزين نشوف ( المصرى بعيون الآخرين ) مش بعيونا

واين هم الاخرين ؟

كل العيون اللى هنا مصرية

عموما يا رب يظهر لنا حد وتكون عنده الجراءة الكافية والوافية ويقدر يتكلم عن السمات الحلوة واللاحلوة

فى الشعب المصري الغلبان

المصري النيل رواه والهم وراه وراه :huh:

[mffaswan]

الموضوع شدني .. و على طول افتكرت رسالة جتني على الايميل .. بس قبل ما انقلهالكو .. ياريت نفتكر أنه فيه كويس و فيه مش كويس

يعني الكلام ده مش قاعدة .. و الغرض الأساسي من الرسالة دي .. هو الأبتسام على حالنا الواقعي جداً

المصري هو اللّي

بيفهم في الطب ويشخص المرض ويوصفلك الدوا وبيفهم في النقاشة والكهربا وتصليح العربيات والطبيخ والسياسة والكورة وهو أبيض ياورد

بيحط الريموت كونترول في كيس بلاستيك كعادة فرعونية

يقف يتكلم على الباب نص ساعة بعد إنتهاء الزيارة والسلام

لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد

ييجي بعد معاده بساعتين ويفتكر إن ده عادي

لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه

بيعتبر نفسه أفضل واحد في الشرا والفصال وبعد كده يكتشف إن الحاجة في المحل اللي جنبه أرخص من غير فصال

بيحتفظ بأكياس محلات اللبس والأحذية وورق الهدايا تحت مرتبة السرير لسنوات ومابيستخدمهاش

عنده صينية مكسرات متقسمة لتلات او أربع أقسام لزوم المزاج وعمره ما إستخدمها

ممكن يعدي التلاتين ولسه عايش مع أمه وأبوه وما عندهومش مشكلة

بيشتري قبل الفطار في رمضان مواد إستهلاكية أصلا موجود عنده في البيت و يمكن من رمضان اللي فات لسه ماستخدمهاش

بيكون عنده شواية لزوم الرحلات أقصى استخدام لها كان مرة واحدة في العيد

بيشيل طابع البريد من على الظرف لو الختم ماكانش عليه

بيفتكر إن أي حد بيشتغل في الخليج بيغرف فلوس من غير حساب

بيكون مشغول بقيمة التيبس أو البقشيش طول العشا ياترى ربع جنيه ولا نص جنيه

برده بيتخانق ساعة دفع الحساب بحرارة شديدة على إنه هو اللي لازم يدفع

بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا

والأهم إنه اللي بيحب يسخر من نفسه ومن بلده وحكامه بس مايطيقش حد تاني يسخر منهم ، وساعتها بيفرش له الملاية

أفتكرو .. لمجرد الأبتسام على حالنا !!! :rolleyes:

mffaswan

[عبده بيه]

المصري شخصية ممتازة او كانت ممتازة

بمعني انا شخصيا بعشق المصري كما عرفنا في محمد ابوسويلم في الارض

او في شخصية القصري في يا صفايح السمنة البلدي

او جراءة الجميل شكري سرحان في الريفي

وفي قومية سعد زغلول وعرابي وحرب ومصطفي كامل وناصر

وفي بلاغية الشيخ الشعراوي والشيخ كشك وعمر عبد الكافي

وفي تلقائية وحرفية الخطيب وابوتريكة

وهدوء الدكتورزوال والدكتور فاروق الباز

واكره فزلكة بلية وسفالة المكوجية الفنانين والحرمية اللي اصبحوا مطربين

والصوت العالي من الميكروباص والتاكسي لما يقلب الفلوس وش وضهر كأني سرقه وهو فاكر اني افندي والله هو اللي افندي

والتجار لما يكونوا جاشعين

ونزلة مطارالقاهرة وكأني كملوا انتم احسن

كفاية حرام صورتنا اصبحت تافه جدا الي كل من تسول له نفسه بالفزلكة والفهلوة

تحياتي

[عبده بيه]

المصري شخصية ممتازة او كانت ممتازة

بمعني انا شخصيا بعشق المصري كما عرفنا في محمد ابوسويلم في الارض

او في شخصية القصري في يا صفايح السمنة البلدي

او جراءة الجميل شكري سرحان في الريفي

وفي قومية سعد زغلول وعرابي وحرب ومصطفي كامل وناصر

وفي بلاغية الشيخ الشعراوي والشيخ كشك وعمر عبد الكافي

وفي تلقائية وحرفية الخطيب وابوتريكة

وهدوء الدكتورزوال والدكتور فاروق الباز

واكره فزلكة بلية وسفالة المكوجية الفنانين والحرمية اللي اصبحوا مطربين

والصوت العالي من الميكروباص والتاكسي لما يقلب الفلوس وش وضهر كأني سرقه وهو فاكر اني افندي والله هو اللي افندي

والتجار لما يكونوا جاشعين

ونزلة مطارالقاهرة وكأني كملوا انتم احسن

كفاية حرام صورتنا اصبحت تافه جدا الي كل من تسول له نفسه بالفزلكة والفهلوة

تحياتي