نداء عاجل لسي السيد او س س

[زهرة الجبل]

بسم الله الرحمن الرحيم

اولا بحييكم بجد عالمنتدي ده وترابطكم فيه زسرعة التجاوب

.... واخدين بالكم انتم من حكاية سرعة التجاوب دي ؟ ايوااااه علشان بس تاخدو بالكم يعني

لا بجد والله ما شاء الله شئ جميل خصوصا مجهودات الاخ الفاضل س س

والموضوع بإختصار عباره عن استفسار

او هو بصراحه عدة استفسارات متداخله و اتمنى تفيدني واسفه للإطاله مقدما

انا هرقم لك الاسئله علشان متبقاش تايهه واسهلهالك

القصه اني خارج مصر وعاوزه اعرف(1)ايه الخطوات اللي ممكن اتخذها علشان اقدم على قطعة ارض تبع الاسكان والتعمير في القرعه اللي جاري التقديم عليها حاليا

(2)وهل في فرصه كويسه لو قدمت على قطعه في الشيخ زايد ؟ ولا صعب؟

(3) يعني بصراحه كده انا سمعت ان الموضوع كوسه ولازم يكون في حد اعرفه وناس بتاخد فلوس من تحت الطربيزه علشان ترسي الموضوع على ناس هل ده صحيح وناخدها من قاصرها ونسكت ولا في امل والموضوع نضيف ونصيب وبتاع ربنا؟

من ناحيه تانيه بقى (4)هل لو مفيش امل او لو قدمت ومرستش عليا .. هل ممكن تفيدني في سعر متر الارض في الشيخ زايد؟

يعني (5)لو قطعة ارض في منطقة العمارات مساحة اقدر ابني منها 300 متر يبقى لازم تكون المساحه كم كلها اللي تتشرى مع اعتبار اني عاوزه جزء صغير في السرداب بتاع الفيلا اللي هو مفروض باقي المساحه يكون مزروع (6)وبكم تقريبا المتر؟ هل ممكن الاقي حاجه في منطقة العمارات في حدود 1200 الف ومئتين للمتر مثلا؟

طيب وكمان (7)هل في منطقة العمارات يجوز ليا اني ابني فيلا بالمساحه المفتوحه (التلتمية متر يعني ) في سرداب وارضي وبعدين فوق اربع ادوار شقق ؟ يبقو دور اول وتاني وتالت ورابع؟ينفع ولا لازم ميكونش في تحت فيلا؟

(8) وهل صحيح فكرة اني لو بنيت مبنى بالشكل ده يعني فيلا سرداب وارضي وبعدين فوق اربع ادوار شقق الدور على شقتين مثلا والشقه ميه وخمسين متر يعني-وبعدين جيت بعت الشقق دي ممكن تمن بيعها يغطي تكاليف البناء كلها ؟

الكلام كده منطقي ولا تخاريف وأضغاص احلام؟

معلش ذودتها انا عارفه لكن انا متأكده من كتر ما قرأت لك موضوعات وردود انك قدها وقدود

انتظر الرد سريعا من فضلك نظرا لضيق الوقت قبل اغلاق باب التقديم في القرعه ((ده ان كان في منها امل))

وشكراً جزيلاً مقدماً

تم تعديل 21 أغسطس 2007 بواسطة زهرة الجبل

[se_ Elsyed]

الأخت زهرة الجبل

- شروط التقديم لأراضي القرعة والتي سيتم غلق باب الحجز فيها يوم 12/9 موجودة على موقع هيئة امجتمعات العمرانية الجديدة

www.urban-comm.gov.eg

- بالننسبة للرشاوي والمحسوبيات في توزيع أراضي القرعة فأعتقد إنها لو موجودة فبتبقى في نطاق محدود جداً لإن القرعة بتتم بشكل علني .

- ولو تلاحظي إن هناك 2000 قطعة متاحه في 6 اكتوبر و 38 فقط في الشيخ زايد يعني في الأخيرة دي هايبقى في ضرب نار .

- سعر المتر في الشيخ زايد لا أعرفه بالتحديد لكن إذا كان في القرعة هايبقى في حدود 1500 ج .. يبقى السعر هايتباع بكام من الاهالي ؟ بالتأكيد هايبقى عالي جداً .

بالنسبة لإشتراطات البناء سواء للفيلات او للعماير فهي بتبقى تقريباً واحده أو متقاربة في المدن الجديدة وممكن تلاقي اختلافات بسيطة على أساس المحافظة على تلك المدن من وجود عشوائيات في البناء .. يعني بتلاقي العماير مسموح بالبناء على 60 % فقط من المساحة الكلية للأرض مع أرضي وثلاثة أدوار والبدروم ده شيء إختياري براحتك .. والعماير بيبقى مسموح بأرضي ودورين وبرضوا البدروم براحتك .

وبصراحة لا أعلم الكثير عن أسعار الأراضي في 6 أكتوبر .

لكن عايز أقولك إن موضوع بناء عمارة حتى لو كانت في المدن الجديدة وبعدين أحتجزتي لنفسك دور وبعتي الباقي تمليك .. بالتأكيد هايغطي معاكي تكاليف البناء وتطلعي كسبانه كمان .. وممكن تبيعي الشقق والأرض لسه تحت الإنشاء .

[طه بدر]

الاخت زهرة الجبل

بالنسبة لموضوع المبانى وهل يمكن عمل فيلا فى الدور الارضى وباقى العمارة شقق فهذا الموضوع لا تتدخل فيه اجهزة المدن فهى تحدد لك الاشتراطات للبناء مثل:

الحد الاقصى لمساحة المبانى والمسافة مع الجار واقصى ارتفاع وطبعا عدد الادوار

ولكى ان تجعليهم كلهم فلل متكررة او شقق او غير ذلك يعنى الموضوع براحتك.

واعتقد ان بعض الاجهزة ترفض وجود نشاط سكنى فى البدروم يعنى يكون فقط جراج او خلافه ومع هذا يقوم الناس بالتعديل وضمه او جزء منه لزيادة مساحة الدور الارضى وتحويله لفيلا مستقلة.

بالنسبة لموضوع البيع وهل يحقق مكسب فالرد طبعا يجب ان يعتمد على المنطقة التى نتحدث عنها وان تعرفى اسعار البيع فيها كام تكاليف الارض والمبانى وخلافه.

وكلمة اخيرة لكى اختى العزيزة ولجميع من يفكر مثلك

ان البناء والاستثمار فى العقار مشــــــروع يتجاوز الان المليون (حتى لو مبنى صغير) ويجب ان يتم دراسته بعناية فائقة والاستعانة باهل الخبرة والثقة ( الاثنين مع بعض ومعمليش زى الحكومة) حتى ياتى بنتيجة جيدة ان شاء الله

المشكلة ان بعض الناس اذا اراد شراء الخضار اخذ يبحث عن احسن نوع وافضل سعر ................ اما اذا اراد بناء مبنى سيعيش العمر فيعتقد ان الموضوع ساعة ويخلص.

لا الموضوع اهم من كده

[زهرة الجبل]

ألف شكر للرد والاستجابه السريعه

بصراحه افدتوني كتير

بس ده سعر المتر في الشيخ زايد كده فوق اوي...للأسف كتير عليا اوي

الف شكر للفاضل س س

والف شكر للفاضل طه

ولو ممكن بس استفسارين تانيين

الأول والأهم علشان مش عاوزه اتورط هو :

هل صحيح موضوع القرعه ده لو مطلعتش التصريح في ميعاده او مش بنيت في الميعاد تتسحب مني الارض؟

يعني تروح عليا فلوسها ولا ازاي؟

يعني انا هل اقدر لو لقيت نفسي مش هلتزم بالمهله اني ابيعها قبل اول تسع شهور اللي هي مهلة التصريح البناء؟

انا سمعت ان ممكن اعمل توكيل بالبناء لشخص وابيعهاله هل ده صحيح؟ وفرض وجوده ايه يعني سهل الاقي حد ياخدها بالشكل ده ولا ايه؟

والتاني بقى: هل ممكن تنصحوني بأرض أعمل فيها مشروع زي كده بس مكونش مقيده بمهله زمنيه محدده؟لاني زي ماقلتلكم انا خارج مصر والامور دي اكيد هتاخد معايا وقت اطول..وفي نفس الوقت السعر يكون بالعقل؟

انا كل اللي انا عاوزاه في الارض انها تكون في مكان زي المدن الجديده ...يعني مكان نضيف ويكون فيه قانون ملزم بالنسبه لنسبة الاراضي الخضراء

انا امنية حياتي دوقت هي الاقامه في مكان في مصر هواه نضيف كده و فيه كمية الزراعه دي واللون الاخضر غالب عليه

وفي نفس الوقت وبسبب محدودية القدره الماليه فانا بفكر ابني بدل الشراء جاهز على اساس ان التكلفه تكون اقل ويمكن ربنا يكرمني ويكون في ربح كمان زي ما تفضلتم وقلتولي

طيب هل في مكان فيه المواصفات دي وسعر متر الارض فيه بسيط وميكونش بعيد اوي عن القاهره نفسها وكده؟ في امل يعني؟

ولو في ....فين؟ وايه البدائل واقلها سعراً

مره تانيه الف شكر وآسفه للإطاله بس انا بعتبركم عيون في مصر خصوصا اني انا بعيده عن الصوره

شكرا

تم تعديل 21 أغسطس 2007 بواسطة زهرة الجبل

[زهرة الجبل]

فينكم يا جماعه من يومها

أنا ما زلت بإنتظار الرد

تحياتي

[زهرة الجبل]

هو في ايه؟ انتو روحتو فين

بقالي اربع ايام منتظره الرد

دلوقت يا جماعه ايه حكاية بيع اراضي القرعه بنظام الاوفر دي؟

انا قرْت مقال طويل عريض غريب عجيب عن الموضوع ده

مفاده ان اللي بترسى عليه الارض بيقدر يبيعها بموجب النظام ده

المقال اهوه

إضغط هنا..عن جريدة المصري اليوم

ادوني رأيكم هل ده صحيح فعلا وممكن يتم؟

[ZAG]

الى الاخ العزيز المحترم سي السيد بعد السلام والتحية

انا ابو ابراهيم عضو جديد في موقع محاورات المصريين - وانا بقالي كام شهر بتصفح بعض المواضيع التي تخص العقارات والاراضي وانا معجب ومحب لكتاباتك

ولردودك الجميلة والمفيدة والشاملة فهي تحتوي احيانا كثيرة على نقد مفيد وهادف صادر عن شخص ملم لدية الكثير من المعلومات تصدر الكلمات من فمة بشكل عفوي يتخللها روح من الدعابة وخفة الظل - وهذا ان دل على شىء انما يدل على شخصك الجميل المحب للتعاون ولاصداء النصائح للاخرين

اود من شخصك الكريم ان اتعرف وهنا اقتبس ما ورد اعلاة بداية من وهأقولك على خبر حلو .............على وضع المنطقة ومستقبلها هناك اي بعد جمعية مصر و الامل خصوصا من ناحية اليسار بعد المركز الطبي العالمي وبالتحديد بعد جمعية الطلائع - هناك جمعية تدعى القادسية - ويقولون حسب ما اسمع انة سيكون بها في المستقبل القريب مشاريع اسكانية لعدة شركات محلية في تلك المنطقة منها شركة مجموعة ابو سيف للاستثمار - وشركة العروبة وشركة النور مصر للاستثمار والتسويق الخ... من الشركات.......وستمتد هذة المشاريع لعدة كيلو مترات الى الداخل ( داخل جمعية القادسية )

هل هذة الاخبار ممكن ان تكون صحيحة ام هي عارية عن الصحة تماما وان الحكومة تمنع اي حد من عمل اي شىء هناك لانها فقط اراضي للاستخدام الزراعي مع العلم انة لم يزرع فيها اي شىء حتى الان ..........!!!!! - ولا اعتقد انة سيتم زرعها في المستقبل القريب او البعيد .........!!!! والبعض في تلك المنطقة بالتحديد ابتدو فعلا يقسمو الاراضي - للاستثمار السكني .... والى عدة كيلو مترات الى الداخل

ممكن الافادة حول هذا الموضوع من شخصك الكريم وخصوصا بانك ملم بتلك المناطق

ويا ريت وانا استسمحك عذرا لاني طولت عليك شوية ان نعرف عن وضع ومستقبل منطقة تدعى العدلية قريبة من بلبيس وهي بمحاذاة القادسية - لانهم ابتدو يعملو فيها مشاريع زراعية كويسة

وشكرا جزيلا

اخوك ابو ابراهيم

[se_ Elsyed]

الأخ أبو إبراهيم

أنا عارف مجموعة القادسية ... وهما لهم كذا قعة أرض بيقسموا فيها على طريق مصر الإسماعيلية من بعد الشروق إلى ما قبل العاشر وفي نفس الوقت عندهم كذا مشروع لتجارة مواد البناء .... ولا يعنيني هنا إسم الجميعة على قدر ما يعنيني صحة الأوراق اللي إنت بتشري بها

يعني الأول لازم تتأكد : هل الأرض دي صادر لها قرار إستشماري ( يعني أصبحت أرض يصلح البناء عليها ) أم لا ؟

ولا لسه زراعة ؟ وده طبعاً في الأحلام

لإن معظم الأراضي دي كانت مزارع زيتون وفجأة زحف العمران عليها وحاصرها من جميع الجهات وأصبح لا في هناك زيتون ولا ليمون ...

وبالتالي مُلاك أو مشتريين تلك الأراضي مازالوا في إنتظار قرار تحويلها من زراعة - على الورق - إلى بناء ... وهذا لن يستغرق كثيراً ... مسألة وقت بسيط يعني ... لكن الدولة لازم ينوبها من الحب جانب ..

بمعنى إن متر الأرض لو كان أصله زراعي فبيتاع في حدود الـ 150 ج .... ولو اتحولت إلى إستشماري الدولة هاتطلب في حدود 10 أو 20 ج فرق في كل متر ...

ومن حوالي 4 شهور محافظ القاهرة أصدر قرار بوقف العمران في الأراضي الواقعة بين مدينة العبور إلى مدينة العائر من رماضن لحين تقديم مخططات عمرانية لتلك الأراضي منعاص للعشوائيات ... وبالتالي قرار زي ده هو إعتراف بعدم صلاحية هذه الأراضي للزراعة .. وأعتراف بتحويلها إلى مباني ... ومحاولة لجعلها تتناسق وتتناغم مع النظام المعماري لمدينتي العبور والشروق ..

بصراحة ما أعرفش حاجه عن العدلية دي اللي في طريق بلبيس ...

--------------

الأخت زهرة الجبل : عذراً لعدم الإجابة على تسؤلاتك لإنها مكررة وجاوبت عليها في عدة مواضيع تتعلق بالبناء والأراضي .... لكن نظراً لضيق الوقت هاجاوبك بسرع

- طبعاً لو ما ألتزمتيش بمدة البناء فالأرض هاتتسحب منك وجهاز المدينة يرجع لك فلوسك الي دفعتيها .

وزي ماقلنا ممكن تبيعيها بنظام التوكيل وده اللي ساري في معظم أراضي المدن الجديدة .

أما لو قدراتك المالية محدودة ... فأنصحك بعدم البدء في البناء إلأ بعد الجلوس مع مهندس إستشاري كويس ويعملك حسبة البناء عشان البنا ده عبارة عن بحر ... لو نزلتيه يا تكملي يا إما مش هاتقدري ترجعي للشط تاني ..

[طه بدر]

الاخت زهرة الجبل :

عفوا للتاخير ولكن انت قلت ان الموضوع كده بعيد عليك

عموما

اذا ربنا كرمك وحد دعلك دعاء الصالحين وجاء اسمك فى القرعة فى منطقة مناسبة فامامك اكثر من خيار

اولهم طبعا البيع وانت فى الاستاد

لان هناك وسطاء يجرون عليك ويعرضون مبلغ اوفر يمكنك قبضه فى الحال و يادار ما دخلك شر ومبروك عليك وعلى السامعين كام ميت الف جنيه فورا wst::

ثانيا الاحتفاظ بالارض لفترة

وفى هذه الحالة يجب استخراج رخصة للبناء وهى فى عرف الوزارة اثبات للجدية يعنى كانك تشترى مدة اطول للمساومة ودراسة عروض البيع

وبعد استخراج الرخصة اذا كان هناك ضغط من الوزارة على البناء يمكنك حفر الارض فقط (مجرد حفر) وهذا فى عرف الوزارة شروع فى البناء ويجعل من الصعب سحب الارض

وعلى العموم فبالرغم من الكلام والتهديد بسحب الارض من غير الجادين فى البناء فان موقف الوزارة هنا ضعيف جدا لان الكثير من الاخوة المحامين يقولون ام هذا عقد اذعان من المواطن للدولة وليس من حقهم سحب الارض فعلا بدليل ان ذلك لم يتم الا فى حالات نادرة وفى المناطق التى تحت العين كما يقولون

اما الاف الاراضى غير المبنية فى العاشر والسادت واكتوبر وغيرها وغيرها التى تم شرائها من عشرات السنين فكما هى ولم يتم سحب اى منها (على حد علمى والله اعلم)

يعنى هذا الموضوع غير مؤثر بهذه الدرجة

[زهرة الجبل]

الاخ الفاضل طه بدر

الاخ الكريم س س

الف شكر للتوضيح وانا كنت عارفه انها ممكن تتباع بتوكيل لكن سألت مره أخرى لاننا لما جبنا كراسة الشروط من البنك لقيتهم بيشددوا على ان البيع والشراء في القرعه دي ممنووووووع قبل الثلاث سنوات الاولى يعني يا تبني يا تتسحب ارضك مفيش امكانية البيع

يعني بيقولوا ان القرعه دي مختلفه عن المرتين السابقتين تماما لان قبل كده كان البيع مسموح

وهو ده اللي كنت خايفه منه

لكن دلوقت الصوره وضحت انا هعتمد على الله وعلى كلامكم اللي مفاده اني اقدر ابيع بتوكيل

وقدمت بالفعل في الشروق

وربنا يكتب لنا الخير

الف شكر لمجهودكم واسفه للإطاله

اختكم ... زهرة الجبل