شقق فندقيه في القاهرة؟ كيفية البحث

[waelbaha]

السلام عليكم ورحمة الله وبركاته

اخواني الاعزاء - عندي مشكله تتكرر دائما عندما انزل مصر اجازة وهي الاقامه مع اهلي او اهل زوجتي طوال مدة الاجازة حيث اني لم استطع شراء شقه حتى الان

والان اصبح هناك شبه استحاله ان اقيم عند اهلي او اهل زوجتي نظرا لضيق الشقق و وجود ابنائي معي

ففكرت ان ابحث عن شقه مفروشه خلال فترة الاجازة ولكني فوجئت بالاسعار الغاليه جدا وفي نفس الوقت لا تكون الشقه نظيفه كما هو متوقع

وخطرت في بالي فكرة الشقق الفندقيه مثلما هو الحال هنا في دبي فتساءلت هل استطيع ان اجد في مصر شقق فندقيه وكيف استطيع البحث عنها وما هي الاسعار

ارجو من الاخوة الافاضل الا يبخلوا بمعلوماتهم علي لان اجازتي قربت ونفسي ارتاح من هذه المشكله

[Amenemhet]

اعتقادى الشخصى ان الشقه المفروشه ارخص بكثير ..... تستطيع ترتيب عاملة نظافة تساعد المدام ............. لا اعتقد ان موضوع الشقق الفندقيه موجود بمصر الا فى هيلتون مركز التجاره العالمى وده حكر على اغنى اغنياء العرب ...... الحق قبل ما الوقت يسرقك ..... ده موسم الشقق المفروشه ...... ولو المشكله فى السعر ...... ده ممكن تتحكم فيه بتغيير المنطقه.

[se_ Elsyed]

إذا كنت تقصد بالشقة الفندقية إن يبقى في ناس مسئولين عن النظافة .. فده صعب في مصر لإنه مش منتشر ..

وإذا كنت عايز شقة مفروشة فلازم تحدد المنطقة .. وممكن عن طريق سماسرة في المنطقة دي يجيبوا لك اللي عمرك ما حلمت به .

ولو كان بحثك بيدور في منطقة مدينة نصر فأنا ممكن أدلك على كام مكتب عقارات بيبقى عندهم شقق من هذا النوع لكن لازم أعرف إنت حكمت على الأسعار إنها عالية على أي أساس ؟

يعني ميزانيتك اللي بتدور بها كام سواء يومية أو شهرية عشان ما تتعبش في اللف والدوران وممكن تكون في المكان الخطأ

[waelbaha]

اشكركم على الردود السريعه والقيمه جدا

انا بحثت العام الماضي عن شقق مفروشه وبصراحه وجدت شقق تعبانه جدا والسعر وصل الى 3000 جنيه في الشهر

لذلك اعتقدت ان ممكن يكون في نظام شقق فندقيه زي الموجوده هنا في دبي ويكون سعرها ارخص شويه

لكن لم اقصد ان تكون شقق تابعه لفندق مثلما تفضل به اخي Amenemhet فانا اعرف ان ذلك مكلف جدا

اما بالنسبة لميزانيتي فالحقيقه ممكن تكون 2000 جنيه

وارجو من لديه ارقام سماسرة في اي منطقه في القاهرة الا يبخلوا بها علي

وشكرا

[se_ Elsyed]

اما بالنسبة لميزانيتي فالحقيقه ممكن تكون 2000 جنيه

2000 ج في الشهر .. يعني اليوم مش محصل 70 ج .... إنسى

عليك بقى وعلى المناطق الشعبية ودي مستحيل تلاقي فيها شقق مفروشة .

[Amenemhet]

الاخ س س خبرته فى مجال العقارات قويه وقد وعد بتوفير معلومات عن السماسره وكل ما آحب ان اضيفه انك يمكنك ايضا الاستعانه بالوسيط وانا شخصيا اجده مفيد للغايه واليك الرابط

http://ewaseet.com/newlook/en/index.php?country_id=ALL

ميزة الوسيط انه ممكن يوصلك بالمؤجر مباشرة.

لو انا مكانك كنت حاخلى اى حد من العيله يبص على الشقق المتاحه فى المنطقه التى تريدها ...... بحيث انك تيجى مصر على الشقه على طول ويا حبذا لو بعتولك صور للعفش والفيو والعماره ....... مجرد اقتراح لتوفير الوقت.

[waelbaha]

اشكركم على ردودكم واهتمامكم