خطاب سيف الاسلام القذافي ... وحسرة المصريين

[شينكاوي]

بالأمس اذاعت قناة الجزيرة مباشر امس خطابا لسيف الاسلام القذافي في مؤتمر جماهيري وكان يخطب فيه عن الاوضاع الداخلية الليبية ... طيب هتسألوني ايه علاقة ده بمصر هقول لأن اللي سمع حطاب القذافي امس كان سيتولد داخله احساس بالحسرة كيف ان من يحكموننا لا يفكرون في مصلحتنا كما يفكر القذافي في مصلحة شعبه وعلي فكرة سيف الاسلام القذافي هو الرئيس القادم لليبيا طبقا لمبدأ التوريث السائد ببلداننا العربية ولكني اقول انني ان كان ابن الحاكم في مصر يفكر فينا كما يفكر القذافي في شعبه فاقسم بالله انني ابايعه بل وسادعو لبيعته الي ان يتولي حكمنا.

كلام سيف الاسلام القذافي الذي جعلني اتحسر علي نوعية الحاكم المصري كان يتعلق بشؤوون الليبين اولا..

بدا الخطاب بتهنئة 1500 عريس وعروسة بحفل الزفاف الذي كان سيف الاسلام شاهدا عليه ثم بدا يتحدث عن امور داخلية ليبية منها الخطوط الحمراء في ليبيا واولها هو الشريعة الاسلامية وده شئ طيب ان يتحدث حاكم او ابنه عن الشريعة الاسلامية والحدود وتطبيقها واعلان تمسك بلاده بالشريعه ووجوب تطبيقها وان كان طبعا كالعادة ضمن الخطوط الحمراء والده معمر القذافي وانه خط احمر في ليبيا ... الي هنا ستقولون ان الامور لا تعنينا كمصريين اسمعوا الاتي :-

قام القذافي الابن عن دخول الشركات الاجنبية الي ليبيا وقال انه سوف ييسر جصول الشباب الليبي علي قروض موجهة مع فترة سماح لمدة خمسة سنوات طب ليه ؟؟

قال ان تلك الشركات التي ستعمل في ليبيا هي شركات اجنبية وسوف تحتاج الي معدات هم لن يسمحوا لتلك الشركات بأن تاتي بمعداتها معها وهذا اتفاق بين الحكومة الليبية والشركات فيقوم الشباب الليبي باخذ قروض من الحكومة لشراء تلك المعدات وتأجيرها للشركات الاجنبية وهذه فكرة جهنمية طبعا مش بقلكم بيدور علي مصلحة شعبه.

وبعدين تحدث القذافي الابن عن الخصخصة للشركات الحكومية وقال انها خصصخصت للمواطنيين الليبين الذين اصبحوا يمتلكون شركاتهم العامة وهو من حرض بني وطنه علي ذلك .... طيب قارنوا بين ده وبين بنك القاهرة اللي المصريين بيحاولوا يشتروه وبيلموا له فلوس ونقابة المحامين بتحاول لكن حكومتنا الرشيدة رافضة وشكلهم منشنين علي واحد اجنبي يشتري والعمولات تشتغل دا الرفق بين القذافي وبين حكومتنا.

تكلم القذافي عن انه ستتم انشاء مدينة صناعية بكل منطقة ليبية وستوفر لها الحكومة الليبية البنية التحتية والمساكن وكل شئ لخدمة هذه المدن الصناعية ... واحنا بنترجي الحكومة انها بس تدينا الاراضي باسعار مخفضة لان الحكومة تعاملنا معاملة الاجانب والمستثمرين بالاسعار النار بل انها تفضل الاجنبي عنا .

واخر شئ سمعته قبل ما انام ان الرجل اكد ان ليبل لليبين

يا رب حد يقول مصر للمصريين ولو هيقول كده انا هبايعه هبايغه هبايعه هبايعه

[se_ Elsyed]

صلي عالنبي في قلبك يا شنكاوي وإوعى حد يسمعك وإنت بتتكلم عن سيف الإسلام

كما سبق وأن ذكرت عدة مرات .. لما كنت أعوز أضحك من كل قلبي كنت دائماً ما أشاهد قنوات عراقية أو ليبية .. عراقية أيام صدام طبعاً

شي لا يصدقه عقل وكإننا رجعنا 500 سنة لورا ...

- لقد إستمعت لخطاب الأمس مثلك يا صديقي تماماً وتحسرت على وضعنا العربي وكيف أن التوريث بقى هو النيولوك او الموضه الحاضرة والقادمة ...

هاسألك سؤال واحد يا شنكو : هو سيف الإسلام لا مؤخذه القذافي صفته إيه عشان يخطب في آلاف الشباب دول ؟

قصدي يعني ماسك محافظ طرابلس ولا رئيس مجلس محلي مدينة بني غازي أو مأمور قسم مدينة سرت ؟

يا عزيزي الخطوط الحمرا التي تتحدث عنها تتم بالتنسيق مع السيد القائد الوالد على طريقة إضرب ولاقي وتصوير سيف على إنه المنقذ القادم ...

هل تتصور إنه من 10 أيام كان له حديث مطول مع قناة الجزيرة - سيف الإسلام يعني - وفي عز أزمة الممرضات البلغاريات اللي أفرجوا عنهم وراحت بلدهم برئتهم وعملتهم أبطال قوميين .. يقوم الأخ سيف يقول إنهم فعلاً أبرياء وإتعرضوا للتعذيب عشان يعترفوا وإن حالات الإيدز دي كانت عند الاطفال قبل موضوع الممرضات ...

يعني معنى ذلك إن الأطفال دول أصيبوا بالإيدز أيام ما كان أبوهم وأمهم لسه مخطوبين لإن الـ 450 طفل كانوا صغييرن جداً وبيبيهات لما المجرمين دول عملوا عملتهم .... في الوقت اللي الحكومة الليبية لا مؤخذه بتطلب من الحكومات العربية إعادا النظر في علاقاتها ببلغاريا بعد اللي عملته ...

- الأخ سيف بيتكلم إمبارح عن نظام الجماهيرية اللي والده عمله وبيطلب إعادة النظر فيه

وحاجات تانية كتير منها الإصلاحات زي مانت قلت وكذا وكذا وكيت وكيت ..

ونسي يوضح لنا .... هو من ساعة أبوه ما تولى الحكم في ليبيا في الستينات .. تريليونات الدولارات من عائدات النفط الذي تصدره ليبيا راحت فين ؟

عارف راحت فين يا شنكو ؟

راحت جيب القذافي والساعدي وسيف الإسلام ، والقذافي نفسه بيقول إن ما فيش حد له الحق إنه يسأله عن عائدات النفط ... آه والله ... يعني حرامي وبجح

والساعدي ده بالذات عمال يشتري لي في أندية أوروبية وكإنها فلوس اللي جابوه

والأخ سيف بدل ما يتكلم عن التنمية .. يروح يتكلم عن الموظفين الحكومين اللي بيقعدوا شهور لا يستملون رواتب لإن ما فيش فلوس في البلد

عارف ... شركتنا بتأسس فرع جديد لها في ليبيا لإنهم في مجال الإتصالات وتكنولوجيا المعلومات لسه متأخرين 100 سنة ورا العالم .. وبالتالي بعض زملائي راحوا هناك وبأنتظر بشغف يحكوا لي على " التجربة الليبية " وطبعاً بيشكروا لي في ليبيا وفي الأخ العقيد اللي مخلي البلد متأخره مئات السنين ورا أقل بلد في أفريقيا وشافط الفلوس في كرشه ومجوع ومشرد شعبه .

أما قيام الأخ سيف بدور المصلح والمعارض .. فدي حركات قرعه وكان غيره أشطر ..

إنت عارف يا شنكو إن ليبيا بتتعقب معارضيها حتى في أوروبا وبتحاول دوماً تصفيتهم جسدياً ودائماً ما يصفهم القذافي في خطاباته الثورية الرسمية بإنهم " كلاب تستحق القتل "

وبعد ده كله تقولي إن إبنه معارض له ولسياساته وناوي يصلح ؟

يا اخي ديهدا

[شينكاوي]

صباحو فل يا سي سي

بص والله العظيم عارف كل اللي بتقولوا وعارف ان القذافي مع كل السرقة اللي بيسرقها قال ايه حاطط نفسه انه من افقر العائلات في ليبيا ومستني اعانة من الحكومة

عارف كل ده وكل الناس عارفة

بس اللي خلاني اتحسر يا سي سي انه قال كلمة كان نفسي ابكي وانا بسمعها بس ما اقدرتش ابكي لان جمله كلها مش راكبة علي بعض الجمله هي : ليبيا لليبين

وانا نفسي الريس ولا ابنه يقولها بس يا اخي يقولها مش طمعان في اكتر من كده يحسسنا انه بيحكم بني ادمين ويقول مصر للمصريين يا سي سي ينصب علينا ويقولها بالكدب شوفت طموح اتفه من كده.

ليه كل العرب عندهم مصلحة مواطنيهم اهم من الاجانب ايوه بيسرقوهم ومطلعين عين ابوهم بس برده مواطنيهم عندهم اهم من الاجانب واحنا ليه لأ ليه الاجنبي اهم منك ليه يعني حضرتك لو حصلتلك مشكلة مع اي عربي في مصر ورحتوا قسم الشرطة واشتكيتوا هيروقوك في القسم لانك بتضرب السياحة و لو حصل الكلام ده في بلده هيرحلوك لانك مش ابن البلد طيب نروح فين يا سي سي

المهم ابن القذافي بيتكلم عن مصلحة بلده ممكن يكون بيهيس عليهم بس برده اتكلم عن مصلحة بلده ....

يا رب يكون كلامي مفهوم مش زي خطابه امبارح .... هي دي الفكرة يا ابوي الحاج سي سي

تم تعديل 21 أغسطس 2007 بواسطة شينكاوي

[se_ Elsyed]

أختلف معك يا شنكو

الموضوع مش كلام وبس

وإذا كان على الكلام .. فعايز أقولك إن كوكو القذافي واخد مثله الأعلى في الحياة الدنيا والأخرة الزعيم الملهم عبد الناصر أبو الكلام كله اللي ودا الوطن العربي كله في داهيه بالكلام ؟

وهل هاتفرح إنت لما يطلع علينا جمال مبارك ويقعد يديها كام بؤ حمضان من نوعية مصر للمصريين ومصر هي أمي ونموت نموت وتحيا مصر ونلاقي نفسنا متورثين بالحيا وصاحبك ناطط عالكرسي ؟

هناك مثل الإنجليزي شهير بيقول " الخرفان التي تصيح كثيراً .. تُعطي صوف قليلاً "

والخروف المحترم بيشتغل من سكات وما بيقعدش يقرفنا كل شيوه بخطب ثوريه حنجورية تهييجيه .

[se_ Elsyed]

إنت عشان حبيبي يا شنكو .. جبت لك حته طازه وسخنه ملهلبة

ألقف يا مان

وكالات الأنباء الليبية

سيف الإسلام يضع مشروع دستور ليبي يحترم "الإسلام ومعمر القذافي"

حدد النجل الاكبر للزعيم الليبي سيف الإسلام القذافي الخطوط العريضة لمشروع دستور في ليبيا, مع الإشارة إلى "خطوط حمراء" في هذا المجال يفترض احترامها ويندرج ضمنها والده معمر القذافي.

وقال سيف الإسلام في خطاب القاه في بنغازي، الاثنين 20-8-2007، على بعد ألف كيلومتر شرق طرابلس إن "التحدي القادم هو ان نضع حزمة من القوانين التي يمكن ان نسميها دستورا أو عقدا اجتماعيا أو غيرها. المهم هو عقد ينظم حياة الليبيين".

وأضاف: "هناك خطوط حمراء لا بد أن نتفق عليها", معددا اياها وهي "الإسلام وتطبيق الشريعة الإسلامية (...) وأمن واستقرار ليبيا ووحدة التراب الليبي، ومعمر القذافي".

حبيبي يابو اشرف

[شينكاوي]

القف مين يا سي سي ده انا هشوط في الجماهير

الله يسامحك كان نفسي حد عندنا يعمل زيه ويقول مصر للمصريين والله كلمه كبيرة قوي يا ابو السيد

لكن علي رأيك ممكن يبقي كلام ونغرق .... يالله مالناش نصيب في الدنيا دي الحمد لله حتي لما نحلم يطلعلك هادم الاحلام عمنا سي سي

شوف يا بوب انا بدأت افكر في جنسية تانية يعني حاجة لزوم البرستيج وقدامي الكندية والاسترالية والهندية والبنجالية وممكن ربك يعدلها بالفليبينة لا لا كله الا

الفليبينية

بلاها يا ابو السيد الاحلام .... بس تصدق سيف الاسلام ييجي منه ونتمني ان يطبق ما يقول وبعدين يجي واحد في مصر يقول ويطبق يا رب..

اه لو يعملها جيمي يبقي تمام خالص .................................................................................... :fight:

[tahereyad]

الاخوه الأعزاء سي السيد و شينكو,,,, هيه دي والله المواضيع اللي تفتح النفس للكلام

أولا بصراحه أنا لا شوفت ولا سمعت خطاب كوكو القذافي,,,, لكن طبعا متخيّل العبارات الرنانه و الشعارات اللوزعيه التي بهرت الأخ شينكو و تلاعبت بمشاعره و داعبت وطنيته,,, أحب اقوللك يا أخ شينكو ده كله كلام فاضي, وزي مابيقولو في السوق,, تحلية بضاعه,, عاوز يعرض الرئيس الجديد عالناس بصورة الاصلاحي اللي هايرجعلهم كرامة المواطن و يعيد احياء الدين و يبني القوميه العربيه,,, و أظن خطب بوشي الأسد لسه في أذهاننا أوّل ما مسك الحكم و قام لاسع كام خطبه منهم واحده في القمه العربيه خلّت الحكام العرب قاعدين في نص هدومهم من الكسوف,,,, أسأل بأه سعادتك انهارده أي سوري و قولّه حكم ب وشي ولا أبوه,, هايقولّك: كيف ما بتحكون بالمصري بالمصري يا زلمه "ماسخن من سيدي الّا ستّي"

ثانيا بأه,,, هو سعادتك دخلوا عليك كلمتين كوكو القذّافي,,, طيب هو انت مابتسمعش خطابات و ندوات "جيمي فرأع ديجا" ولّا ايه,,, ده الراجل بيقول أحلي كلام,,,,, كلام يا عمّي,,, والله كلام,, زي ماقولتلك بالظبط,, تحلية بضاعه,, قال بيتكلم عن الأصلاح الاقتصادي في مصر,, اصلاح ايه؟؟,, شوف أنا متيقن ان قبل ماجمال يظهر فالصوره كان فشل الاقتصاد المصري نتيجه أخطاء غير مقصوده,, زي توشكي و حديد أسوان و سماد مش عارف ايه,,, تعالي بأه بعد ما جيمي دخل برجّالته و شوف و قارن,, الناس دي بتخطط و بترسم و بتّكتك تمام أوي عشان يخربوا و يهدّوا مصر سيبك بأه و خليني أرد علي حبيبي سي السيد,,

أي والله حبيبي,, شوف يا سي السيد,, أنا أعز جمال أبو الكلام اللي ودا مصر و الوطن العربي في داهيه بالكلام, و رجّع خير أجناد الأرض حافيين من سينا مع انه كان علم بسيناريو الحرب و تاريخها و ميعادها و أسماء الطيارين الاسرائليين اللي هايقومو بالطلعه الجويه, لكن معزّتي للراجل ده ماتتخيّرش عن معزّتك ليه تمام,,,,,,,, قول يا سي السيد وأحنا معاك........