اعلام البزنس ...الي أين يأخذنا ؟؟

[احمد هادي]

لعلكم تذكرون انني دعوت الي حملة لمقاطعة التليفزيون من عام أو اكثر

وبما انني عدت في الشهور الأخيرة لمشاهدة التلفزيون- بل وارتكبت جريمة بشراء تليفزيون جديد 29 بوصة -عشان ما بعرفش اتفرج علي كورة في اقل من كده ....وال26 اختفي من السوق هنا في الامارات ...المهم اني قمت و كالعاده بحذف قنوات العري الغنائية التي تجاوزت الاربعين حاليا - بدات انظر الي قنوات التليفزيون الاخري بعين جديده ومختلفة لم تألف ما يقدم ولم تعتاد علية لاحظت المتناقضات التالية

برنامج اسمه صبايا علي قناة المحور ...وحلقة تناقش الازياء الفاضحة للفتيات والمعاكسات وبعدها بيومين اجد صورة مقدمة البرنامج في احدي الجرائد بفستان(سورايه)عاري الصدر والاكمام (حمالات) اقل ما يقال عنه انه فاضح خاصة مع بدانة المذيعة

نفس البرنامج يقدم حلقة عن التخسيس وتتصل نفس مذيعة الحشمة بالراقصة المحترمة المحتشمة هياتم لتحكي عن الانجاز التاريخي الذي حققتها في خفض وزنها

نفس القناه-المحور- تتحول كل ليليه الي كبارية في ساعات الليل الاخيرة - مطرب يغني وحوله مجموعة من البنات علي كل شكل ولون منهم المحليات ومنهم المستوردات وما يجمعهم ان الكل شبه عرايا ......................وبعدها بدقائق برنامج ديني للشيخ الجليل محمد حسان

يناقش الكرة مع دريم مشكلة التعصب ويتحدث حسن المستكاوي وفتحي سند عن كل اسباب التعصب ما عدا الرسائل التي

تظهر علي الشاشة اثناء كلامهم ومعظمها تعصب وسخرية وشتائم وقلة أدب احيانا وقله ذوق غالبا

اما برنامج جمال المرأة والموضة فتقدمة امرأة-يقال انها كانت ملكة جمال مصر - والواضح ان لو كان هذا صحيح فذلك يعني اما ان اللجنة كانت من المكفوفين او انهم كانوا شاربين حاجة قبل التحكيم - المهم انها نموذج حي ومجسم للدمامة وحاشا لله ان اعيب علي خلقه - لكن ما تفعلة المساحيق التي تضعها بكثافة غير طبيعيه علي وجهها والملابس العارية التي تكشف عن جلد علي جلد علي شوية عظم يجعلني اسرح في نظرية داروين

علي نفس القناة مذيعة تعتقد ان الرقص مع المطرب أو بجانبة أو امامه هو سر نجاح البرنامج وشعبيته واعتقد انها بذلك اكتشفت دور جديد للمذيعة وهو ان تكون رقاصة وبترقص عشان البرنامج ينور

اما رسائل تسهيل الدعارة من نوعية -رجل يبحث عن امرأة والعكس - وفتاه 14 سنه تبحث عن الحب الحقيقي- وفسل يبحث عن أمورة للصداقة- وشبيه احمد السقا يبحث عن شبيهة انجلينا جولي - فقد اصبحت شيء عادي خالص لا احد يشعر انها تستمطر غصب السماء علينا جميعا ولا يعترض عليه ولا يتمعر وجه المشاهدين غضبا له

انا أعرف ان المسألة سبوبه وبزنس في الاساس لذلك لا ألوم محطات اخري لا تري اي مشكلة في اذاعة الفحش والعري 24/7 وتعلن ذلك وتفتخر به مثل ميلودي واخواتها ....فهي واضحة من البداية ولذلك احذفها هي ونحو 40 قناه مثلها

ولكني الوم من يقدم برامج دينيه وسياسية ويحاول ان يبدو كما لو كان اعلاما محترما حتي لو كان في الحقيقة غير ذلك

والحقيقة انني افكر جديا الان في حذف دريم والمحور حتي لو حرمت من مشاهده بعض البرامج كالعاشرة مساء وفي الممنوع وبرنامج الصحافة الجديد للرائع احمد المسلماني وحلقات الشعرواي القديمة جدا وغيرها

تقول متطرف ...ارهابي ...منغلق أقولك القاعده الفقهيه اللي بتقول دفع الضرر مقدم علي جلب المنفعة

مش كده ولا ايه ؟

ولا أروح ارجع التليفزيون وآخد فلوسي ؟

تحياتي

تم تعديل 21 أغسطس 2007 بواسطة احمد هادي

[زهرة الجبل]

والله يا اخي انت فعلا حطيت ايدك عالجرح

وخصوصا بقى لما البيت يبقى فيه اطفال

يعني المشكله اني مقدرش امنع التليفزيون من البيت

لانهم في وقت فراغهم اغلبه قاعدين قدام التليفزيون

طبعا مش قنوات الاغاني ولا كده لكن mbc3 &spasetoon &مثيلاتها من القنوات دي

لكن في اوقات بنتفرج على فيلم من هنا او من هناك

والمصيبه لما الاقي بنتي بنت الست سنوات جايه تسألني: يعني ايه كذا يا ماما وليه بيقولوا كذا

ولما تعلق على مصطلح معين وتفضل في الرايحه والجايه تقوله وهي مش فاهمه معناه

والله التليفزيون ده فعلا مفاسده اكتر من منافعه ..لكن للأسف الشديد لو اتكلمنا بطريقه عمليه و واقعيه تلاقي انه صعب جداً جداً الإستغناء عنه

[mesryforever]

أخي العزيز / احمد هادي

أنا من فترة وإتكلمت على برنامج "صبايا" ده والمذيعه الغير مؤهله لأن تتكلم وتعطي نصائح تخيل

مرة تحرض الزوجات بالطلاق من الأزواج

ومرة أخرى تتكلم في حلقة من حلقاتها عن ملكات جمال مصر (ظهروا على خشبة المسرح عاريات بالمايوهات البيكيني) إن ده مافيهوش حاجه ودا شئ عادي حتى إن أم إحدى الفتيات العارضات على خشبة المسرح تتكلم عن هذا الموضوع وكأنه شئ عادي خالص وكأن مصر بقة مرتع للدعارة

ومرات كثيرة تتكلم بدون دراية وتعمل على أنها ناصحة إجتماعية وكلاها لا يخرج إلا عن وحده ست جاية من الشارع وأسلوبها ليس فيه شئ من حنكة المذيع

بصراحة حتى القنوات الفضائية المصرية بقت أكثر وساخه من الغير مصرية

وحسبي الله ونعم الوكيل في كل من يساعد على نشر الرزيله في بلاد المسلمين

[Amenemhet]

تقول متطرف ...ارهابي ...منغلق أقولك القاعده الفقهيه اللي بتقول دفع الضرر مقدم علي جلب المنفعة

مين اللى يقدر يقول ان ده كلام واحد متطرف او ارهابى.

من حقك تحدد ايه اللى يدخل بيتك.... ده بالتآكيد حقك.

نقى القنوات اللى انت شايف انها محترمه ومفيده .... ودول كتير مش قليلين .... واقفل الباقى.

اما برنامج جمال المرأة والموضة فتقدمة امرأة-يقال انها كانت ملكة جمال مصر - والواضح ان لو كان هذا صحيح فذلك يعني اما ان اللجنة كانت من المكفوفين او انهم كانوا شاربين حاجة قبل التحكيم - المهم انها نموذج حي ومجسم للدمامة وحاشا لله ان اعيب علي خلقه - لكن ما تفعلة المساحيق التي تضعها بكثافة غير طبيعيه علي وجهها والملابس العارية التي تكشف عن جلد علي جلد علي شوية عظم يجعلني اسرح في نظرية داروين

اعتقد انك بتتكلم على امينه شلبايه .... هاهاهاها .... شخصيه بالفعل مزعجه .... واعتقد ان لجنة التحيكم بالفعل كانوا مش شايفيين قدامهم ... المصيبه الكبرى انها صدقت وخدت الموضوع جد.

اما رسائل تسهيل الدعارة من نوعية -رجل يبحث عن امرأة والعكس - وفتاه 14 سنه تبحث عن الحب الحقيقي- وفسل يبحث عن أمورة للصداقة- وشبيه احمد السقا يبحث عن شبيهة انجلينا جولي - فقد اصبحت شيء عادي خالص لا احد يشعر انها تستمطر غصب السماء علينا جميعا ولا يعترض عليه ولا يتمعر وجه المشاهدين غضبا له

دى حاجه عمرى ما شفتها فى اى قناه دوليه محترمه .... اختراعات مطينه بطين.

[Sherief AbdelWahab]

إنه التناقض بين ما يقله إعلام البيزنس وبين ما يفعله من أجل تمويل بيزنس القناة .. والمبرر جاهز : إحنا قناة تجارية وعايزة تكسب.. والغاية تبرر الوسيلة..

والأمثلة كثيرة ومعروفة ..

خلص الكلام