الصعيد والحكومة المصرية

[ashrafabdaslam]

هل هناك عداء بين الصعيد والحكومة المصرية

نحن الصعايدة اليس مصريين

اليس لنا حق المواطنة --- اليس لنا حق الجنسية المصرية - اليس لنا الحق في الحصول علي فرصة عمل

لماذا لا تهتم الحكومة بمحافظات الصعيد - اليس من العدل ان تحتوي الحكومة علي وزير ولو 1 فقط من الصعيد

الا يوجد في الصعيد من هو جدير بالوزارة - واللة برحمك يا عبد الناصر

واللة لقد كرهتنا هذة الحكومة في جنسيتنا وانتمائنا واصبحنا ليس فخورين بأننا مصريين منهم للة

ولكن يبقي حب مصـــــــــر مسيطر علي قلوبنا مهما فعلو بنا

اشرف - بكالوريوس اقتصاديات التجارة الخارجية -

[tahereyad]

منه لله مينا موّحد القطرين,,, لولاه كان زمان الصعيد جمهوريه الصعيد الحره المستقله

[شينكاوي]

الحكومة والصعيد موضوع كبير موضوع عادات وتقاليد يجب ان تتغير ونظرة من الاخرين للصعايدة يجب ان تتغير ... اسف لا استطيع الاستمرار

تم تعديل 22 أغسطس 2007 بواسطة شينكاوي

[Sherief AbdelWahab]

يعيب السياسة الداخلية المصرية أنها مركزية للغاية .. فمنذ فترة طويلة وكل الوزارات في القاهرة وكل الاهتمام للقاهرة والقليل منه لباقي المحافظات ، وليس للصعيد فقط..

الصعيد ظل منذ فترة طويلة يعامل كـ"منفى" ناءٍ لصغار المرتشين واللصوص .. سياسة دفع الصعيد ، ودفعت مصر معه الثمن غالياً جداً..

للأسف نصيب الصعيد غير السعيد من الاهتمام الحكومي هو مسلسلات سطحية لا تعرف إلا "التار ولا العار يا جبيصي" ، وحملات دعائية زاعقة لا أكثر ولا أقل..

خلص الكلام

[Sherief AbdelWahab]

آخر تقليعة :

الحكومة تنوي عمل وزارة "خاصة" لشئون الصعيد..والمرشح لها بالمناسبة حسب صحف مصرية زياد بهاء الدين ابن الكاتب الصحفي الراحل أحمد بهاء الدين..

ألا يفترض لحكومة القاهرة أن تكون هي أيضاً حكومة الدلتا أن تكون هي أيضاً حكومة الصعيد؟

خلص الكلام

[mffaswan]

السلام عليكم و رحمة الله و بركاته

الأخ الكريم .. أشرف عبد السلام ..

موضوعك مهم جداً و حيوي .. لكن أسمحلي أرد عليك بهدوء ..

أنا من أسوان .. أقصى أقاصي الصعيد .. و أحب أعرفك إن اللي بيعاني منه الصعيد كله .. أسوان بتعاني منه .. و إن الهم طايلني و طايلك ..

لكن عاوز تعرف ليه الحكومة منفضالنا .. بكل بساطة عشان الصعايدة مالهمش صوت للأسف ساكتين .. و لازم الحكومة تفتكر أن السكوت علامة الرضى !!!!

مافيش نواب صعايدة محترمين .. يدورو على حقوقنا كمحافظات .. و يهاجمو الحكومة لما يشوفو التقصير .. للأسف أحنا ساكتين .. و اللي يسكت .. يستحمل !!

حدث منذ فترة .. أنتخابات لرئاسة نادي أسوان الرياضي .. و ياللهول على المعركة التي حدثت .. بسب إن المرشحين .. واحد نوبي .. و واحد من أهل أسوان .. و واحد من الجعافرة (شمال المحافظة) .. التعصب القبلي طفح على الأهتمام بدور رئيس النادي .. نسيوا إنهم مفروض يختارو الأكفأ .. مش اللي يمثل دايرته .. نسيو إن الأختيار يجب أن يقع على شخص يحقق إنجازات .. مش شخص يحقق مصالح ..

هي دي المشكلة .. سواء في إنتخابات أندية أو مجالس محلية أو مجلس شعب .. الصعايدة مش بيتكلموا عن مشاكلهم .. و لا عاوزين يشوفوها ..

و لو شافوها .. يشتموا في الحكومة .. و اللي ماسكينها .. و الحكومة مش هتدور على ناس ساكتين و راضين ..

ما ضاع حق ورائه مطالب .. دي القاعدة

أنا ما أعرفش أنت من أنهي محافظة .. لكن أنا شفت في أسيوط مهازل حصلت في آخر أنتخابات لمجلس الشعب ..و في دائرة الفتح بالتحديد ..

في المنيا .. في دائرة ملوي .. كان فيه تزوير عيني عينك .. و الناس شايفه و ساكته !!

في دائرة نجع حمادي .. محافظة قنا .. الناس تجمهرت أثناء آخر أنتخابات .. عشان يمنعوا التزوير .. و مع أول عسكري أمن مركزي .. أختفوا !!

في أسوان .. دائرة أسوان .. في الأنتخابات قبل الأخيرة .. لمجلس الشعب برضه .. قطعو النور على قسم شرطة بندر أسوان .. مكان تجميع الأصوات .. لمدة نصف ساعة كاملة .. لزوم التوضيب و التظبيط .. و ماحدش فتح بقو .. و كأن الناس خرس عمي بكم !!

المشكلة فينا .. مش في اللي بيحكمنا

قال يا فرعون مين فرعنك .. قال مالقتش اللي يلمني !!