الطائرة وحكاية السافون....

[mesryforever]

آسف يا جماعه على الموضوع بس أعتقد إنه مهم بخصوص توفير كمية كبيرة من مياه الشرب في بلدنا

ياجماعه أنا حبيت أطرح هذا الموضوع إللي جه في ذهني وهو عباره عن

ثلاثة أفكار مختلطه

1- ما هي ديناميكية عمل السافون الموجود بحمام اي طائرة وإللي أنا أعرفه أن السافون يقوم بشفط (المواد الموجود بيه) وإستخراجها بدون إستخدام مياه لذلك أو إستخدام كمية قليلة من المياه .

2- فكرة السافون في فيلم (الرجل الأبيض المتوسط) بتاع الممثل الكوميدي " أحمد آدم " وهي تحويل الفضلات إلى مواد صلبه يمكن الإستفاده منها .

3- من فترة شخص كان فكر إنه يستخدم يضع قاروره في السافونات علشان ترشيد المياه المستخدمه في تنزيل الفضلات بكمية قليلة من المياه ونامت الفكرة مع إنها المفروض إنها مطروحه من عشر سنوات وحتى الآن لم تنفذ .

طب ليه حكومتنا الرشيده متعملش فكرة إستخدام سافونات في البيوت مثل الموجوده في حمامات الطائرات بتقوم على شفط الفضلات وليس إستخراجها عن طريق الماء وحتى لو هتسخدم مياه بس هتكون كمية قليلة جداً من المياه وبالتالي يبقى عندنا كمية كبيرة من المياه الفائضة التي من الممكن الإستفادة منها في زراعة وري الأراضي وحتى على لأقل فواتير المياه تخف شويه .

وبكده ممكن نقضي على مشكلة نقص المياه في المرحلة الحالية والقادمه

برجاء أخذ الموضوع بجديه

لأننا فعلاً ممكن نكون داخلين في حرب مياه قادمه

وياريت لو إجتمعنا على أن هذا الموضوع مفيد

أرجو مننا جميعا العمل على توصيله إلى المسئولين بأي طريقة لأني أعتقد إن الموضوع ضروري ومش محتاج إلى تأجيل

وتحياتي لكم جميعاً

[tahereyad]

فكرة السيفون اللي بنشوفه في الطائره أو المركب أو حتي الأوتوبيس تعتمد أساسا علي تقنيه تسمي "EJECTOR" أو "الطارد" و هو عباره عن شكل يسمي "فينشوري" و هو عباره عن انبوبه بها اختناق من المنتصف يمر به هواء مضغوط من طرف الي الطرف الآخر,,, و عندما يمر الهواء في الاختناق تتزايد سرعته جدا و يتولد تفريغ هوائي أو تيار سحب في هذه النقطه,,, و بالتالي اذا فتحنا فتحه في هذه النقطه (الاختناق) و تكون هذه الفتحه هي قاع المرحاض,,, فعندما يمر الهواء المضغوط بين طرفي الانبوبه و يتكون التفريغ الهوائي عند قاع المرحاض يتم تفريغه عن طريق الشفط القوي و تتجه الفضلات مع اتجاه الهواء الي الطرف الثاني من الأنبوب ثم الي مكان تجميع الفضلات,,,

ما نقوم به في حمام الطائره للطرد أننا نغلق دائره كهربيه تقوم بفتح محبس كهربي و السماح للهواء المضغوط بالمرور بين طرفي الانبوب و بالتالي تتم عملية الطرد كما شرحت سالفا,,,

الطريقه دي مكلفه لأنها محتاجه مصدر للهواء المضغوط و هو أحد الأنظمه المساعده الموجوده فعلا في الطائره أو المركب أو الأتوبيس,, (مش ساعات لما الاتوبيس بيعدي من جنبنا بنسمع صوت "تشششششش" ده من ضاغط الهوا بتاعه. لكن طبعا صعب الحصول علي مصدر الهواء المضغوط فالبيت لأنه مكلف جدا,,

و كمان بالنسبه لدورة الصرف الصحي في الطائره أو المركب قصيره جدا و الهواء بيكون فعال,, لكن في حالة البيوت صعب جدا تحرك الفضلات و بالذات الصلبه بدون حامل زي الميه لمسافات طويله حتي وصولها لمحطات التنقيه و المعالجه,, واللي فيها بيتم تجميع و تجفيف و ضغط الفضلات و تحويلها الي مواد صلبه يتم الاستفاده منها في صناعه الاسمده العضويه,, و بيتم في نفس الوقت تصفيه و تنقيه المياه و استخدامها في الري و الزراعه,,,

بالنسبه لموضوع توفير المياه الزائده في صندوق الطرد,,, مش محتاجه حكومه ولا حد ييجي ينفذهالنا,, مش أكتر من كيس بلاستيك تملأه بكميه من الميّه و تضعها داخل صندوق الطرد بحيث لا تعوق الميكانيزم الداخلي لصندوق الطرد,,, و بكده نكون وفّرنا كميه ميه قد اللي في الكيس البلاستيك مع كل استعمال لصندوق الطرد,, بس الموضوع مش محتاج أكتر من حملة توعيه و شرح بسيط و خلاص......

واحب استغل الفرصه دي و اعرض خدماتي في مجال السباكه,, الكشف ب 50 و التسليك ب 100 و التركيب ب 200,, و كفايانا كده غربه ونرجع نعمل المليون فبلدنا أحسن....

[mesryforever]

الأخ tahereyad

بصراحة أسلوبك رائع جداً في شرح الموضوع

وأشكرك على التوضيح

بس إذا كان على حملة التوعية بخصوص الكيس البلاستيك أعتقد إن مفيش أسهل نقل الموضوع في جميع المنتديات

بأسلوب " معين " ممكن نتفق عليه وكمان نرسله إلى إيميلات المسئولين في مصر المعنيين بهذا الموضوع لعمل حملات دعاية

لأن أكيد هيوفر مياه كتيره للبلد وللمحافظات إللي فيها الناس بيتخانقوا على شوية ميه ومش لاقيين .

مع تحياتي