مشورتكم يا اخوانى فى السعودية والخليج

[المكافح]

انا احبائى اعضاء هذا المنتدى الرائع الذى انتمى الية منذ فترة لا تتعدى شهور ولكنى اشعر معكم بأنى وسط اخوانى الذين لا اجدهم فى غربتى اخوكم محاسب اعمل بالسعودية منذ 4 سنوات بالتحديد فى مدينة الرياض انا عمرى 37 سنة وجئت الى السعودية وسنى كبير شوية وجئت الى هنا فى ظروف اضطرتنى الى ذلك فكنت اعمل فى شركة كبيرة فى مصر وكنت اعمل بها كرئيس حسابات وكان راتبها معقولا فى تلك الفترة وجئت على الشركة التى اعمل بها الان وقابلت صاحبها فى مصر واتفقت معة وعندما حضرت الى هنا كالعادة تغير كل شيىء علما باننى وجدت نفسى اعمل محاسبا ضمن افراد العمل وحتى الان وانا كذلك علما بأن راتبى لا يتجاوز 4000 ريال بعد الزيادات اللى كانت بالعافية وبعد طلوع روح ولابين لكم ذلك فإننى اول راتب تقاضيتة كان 3000 ريال ولا فية تأمين صحى ولا سيارة وبدل السكن بالعافية لما أخذتة والمشكلة دلوقتى يا جماعة اننى عاوز انزل مصر خلاص مش طايق القعدة فى البلد دى ولا الشركة دى لية يا جماعة لان قعدتى هنا زى قلتها اولادى معاية هنا ومدخلهم مدارس انترناشيونال على قدى كدة لانهم اصلا كانو فى مدارس لغات فى مصر وانتو عارفين مصاريف الانترناشيونال وعارفين المصاريف هنا كمان دة غير العلاج اللى مولع نار وعايشين حياة كئيبة ومش مبسوطين بالمرة وخايف لحسن ملاقيش مكان لية فى مصر دلوقتى خصوصا ان سنى كبر دلوقتى وغير كدة وكدة انا خبرتى بتقل فى البلد دى يعنى جاى من مصر رئيس حسابات الاقى نفسى محاسب

ومفيش اى جديد واللى مخلينى متأخر شوية فى اتخاذ قرارى اللى بنسمعة عن الاوضاع فى مصر وان الناس مش لاقية تاكل - علما انى من سكان القاهرة يعنى انتو عارفين ان الحياة فى القاهرة غير المدن الاخرى بمعنى انها اغلى شوية

اخوانى الاعزاء افيدونى برأيكم الذى اثق تماما انة سيكون مساعدالى فى اتخاذ قرارى الرجاء افيدونى بسرعة

[se_ Elsyed]

يا سيدي الفاضل كثير من الناس يفهمون الصورة بشكل خاطيء

ومش عشان بننتقد أوضاع لا تعجبنا في بلدنا وخصوصاً السياسية والإقتصادية يبقى مش معنى كده إن المصريين مش لاقيين ياكلوا وإن في مجاعات والناس بتموت في الشوارع

يا عزيزي مصر فيها على سبيل المثال كمية سيارات فارهة ومباني ومدن جديدة يمكن لا توجد في أي بلد عربي حتى البترولية منها وأظن الخليجيين اللي هجموا على مصر وعمالين يشتروا في عقارات ويبنوا في مدن فخمه مش هاييجوا يموتوا من الجوع عندنا .

لكن بإختصار وعشان نركز في موضوعك .. إحنا عشان عددنا كبير فبتلاقي في تفاوت في المستويات المعيشية ....

- نرجع لموضوعك

لو كنت تركت عملك المحترم في مصر وقبلت بالفتات في الخليج لمجرد إن يتقال عليك حاج في الخليج وراجع بالمروحة والفيديو كل اجازة ... يبقى إنت اللي غلطان ..

ولو كنت إتفقت على مميزات معينة في مصر وجيت هنا إختلف الوضع وأُجبرت على العمل بوضع أقل ... دي بقى بالذات أنا بأتنرفز وأتشنج منها ويبقى لا تلومن إلا نفسك ... لإن من يقدم تنازلات في الأول فسيستمر في تقديم التنازلات بنجاح ساحق طوال فترة عمله .

يا عزيزي بما إنك كنت تعمل رئيس حسابات يبقى المفروض اللغة عندك مستواها جيد ... والعمل على الكمبيوتر أيضاً وخصوصاً البرامج المحاسبية المشهورة والمعروفة في هذا المجال تكون متمكن منه .

يبقى توكل على الله ولا تستمر في هذه المهزلة ... وثق في قدرة الله الرزاق عز وجل ... وثق في قدراتك العملية والعملية وقدم إستقالتك ولا تحمل نفسك وحالتك المعنوية أكثر مما تحمل

ومن يرزقك هنا هو القادر على أن يرزقك في أي مكان

ولو حطيت في بالك إنك نازل للجحيم وإنك هاتموت من الجوع إنت وولادك .. يبقى لن تتخلص من هذا الشعور وحتى وإنت بتبحث عن عمل هناك فسوف يظل هذا الشعور يتملكك

وأظن إن إنت مش شاب صغير في العشرينات في مقتبل العمر مطلوب منه شقة ويجهزها وعفش وغيره فخانقول له إستحمل لحد ما تقف على رجليك ... فأرجو إنك تكون في الـ 4 سنوات دول معك قرشين يساعدوك لحد ما تلاقي فرصة عمل ... وخلي بالك من الكلمة الجاية دي ... فرصة عمل مناسبة لخبراتك ... وكن دائماً كالأسود والصقور التي لا ترضى بالفتات ولا بالفرص المتدنية وما تقبلش بأي شغلانه ولاسلام .

وحظك حلو إن قانون العمل السعودي دلوقت أصبح لا يُفرق بين العقد محدد المدة والغير محدد المدة ... يعني تقدم إستقالتك في أي وقت تأخذ حقوقك حسب القانون وهو بإختصار لعدم تشعب الموضوع :

- في العقود محددة أو الغير محددة المدة لو كملت عامين متتالين في العمل و أقل من خمس سنوات تاخد ثُلث نهاية الخدمة .

- من 5 سنوات وأقل من 10 تاخد ثلثين

- من 10 فأكثر تاخد المكافأة كاملة

خلي بالك أنا أتحدث عن الإستقالة وليس نهاية عقدد في وقت نهايته المحدد

ولحد وقت قريب لو عقدك كان محدد المدة وأستقلت في أي وقت ما كنتش بتاخد ولا مليم ... ولكن القانون الجديد راعى الجانب الإنساني للعامل الذي قضى فترة طويلة يجدد في عقده بعقود محدده وجاء لإي أخر عقد ولم يستكلمه فأصبح يحصل على حقوق بأي شكل حسب كل حالة . وبالتاليلم يعد هناك فرق بين العقد المحدد والعقد غير المحدد

مع تحياتي ،،،،

[المكافح]

اخى العزيز العقارى الكبير سى السيد ( علشان تعرف بس انى متابع ردودك كويس ) انا لم اسافر الخليج علشان يتقالى يا حاج ولا علشان اروح ومعاية المروحة والفيديو بل على العكس انا كنت والحمد للة مش محتاج اى حاجة بيتى كامل من مجاميعة وعندى سيارة صغيرة على قدى انا وولادى بس قبل ما اسافر كنت دخلت شراكة على قطعة ارض فى الاسكان العائلى بالقاهرة الجديدة وكنت فاكر ان السفرية دى هى اللى هاقدر من خلالها اسدد اقساط الارض وبعد كدة البناء عليها لكن ما حدث هو اننى بالعافية ربنا وفقنى وقدرت اسدد اقساطها وواقع فى حوسة دلوقتى ودة كمان من ضمن الاسباب اللى مخليانى متأخر فى اتخاذ القرار

انا حبيت اضيف المعلومة دى بس علشان تبقى الصورة واضحة فى رأيكم معاية

وعموما انا شاكر للاخ العزيز سى السيد على ردة السريع على سؤالى ولك الشكر

[شينكاوي]

انا عمرى 37 سنة وجئت الى السعودية وسنى كبير شوية وجئت الى هنا فى ظروف اضطرتنى الى ذلك فكنت اعمل فى شركة كبيرة فى مصر وكنت اعمل بها كرئيس حسابات وكان راتبها معقولا فى تلك الفترة

اولا يا عزيزي ليه نبرة اليأس اللي في كلامك ويعني ايه 37 سنة ليست نهاية الحياة .... انا عندي 26 سنة وممكن تكون انت انشط مني الاف المرات

ثانيا حينما تخرج من بلدك توقع ان مستواك الوظيفي يكون اقل شوية ولكن بخبرتك اكيد ستصل الي مكان افضل ان شاء الله ... بس بلاش يأس ولا تنقل هذا الشعور لاولادك

لان هذا يضغطهم نفسيا ومن الممكن ان تخسرهم فحاول ان تسري عنهم بدلا من ان تصيبهم انت بالاحباط..

وثالثا: من المعروف ان كلما زاد سنك وخبرتك في المحاسبة يكون عليك الطلب كبير فاصبر شوية وفكر في قرارك كويس واحسبها صح وخصوصا وانت عندك اسرة.

وبعدبن انا مثلا بعد كا اتخرجت من تجارة انجليزي جيت الكويت بعدها بكام شهر واشتغلت في بنك كصراف عادي واستحملت الغربة والمشاكل اللي حصلتلي بس علشان

الخبرة وربنا كرمني وانا مساعد مدير فرع دلوقتي وعندي عروض من بنوك تانية ولاحمد لله الحال شوية بشوية بيتعدل ... الخلاصة العملية محتاجة صبر وانا يمكن واجهتني

مشاكل خلتني كتبت استقالتي 3 مرات وترفض والحمد لله صبرت وربك بيعدلها من عنده... يعني كلنا واجهتنا لحظات يأس وكره للمكان اللي بتشتغل فيه لكن ربك له ارادة

وصلي صلاة استخارة وربنا يعدلها لك ولا تيأس من رحمة ربك ...... واخيرا مصر الرواتب فيها ارتفعت بس المشكلة بالواسطة وممكن تدفع فلوس علشان تشتغل

[Amenemhet]

بس المشكلة بالواسطة وممكن تدفع فلوس علشان تشتغل

الاخ شينكاوى .... احييك على ما كتبت .... انت تعبت وربنا معاك.

اختلف معك فقط فى الجمله الاخيره اللى كتبتها .... طول عمرنا بنسمع عن موضوع الواسطه .... بس انا بختلف معاك لان تجربتى الشخصيه ورتنى غير كده .... باختصار لو انت مالك شركه حتستآمن عليها واحد عنده خبر ه ولا واحد معندوش ??? المعادله بسيطه ....

الاخ المكافح .... واضح انك زى اغلب الاخوه والاخوات الافاضل هنا بالفعل مكافح .... بص يا عزيزى..... انا اول ما قريت كلامك اتنرفزت والدم ضرب فى عروقى وحسيت دماغى وودانى سخنين .... وقررت ان ارد عليك وآقولك خد مراتك وعيالك وانزل حالا .... ما تستناش دقيقه.

ولكن رجعت وفكرت طب وبعدين .... انا مش عايزك تقعد فى البيت بدون عمل يوم واحد .... العبها صح يا عزيزى ..... يا ريتك كنت فكرت فى الموضوع ده من بداية الصيف .... لكن دلوقت مدارس العيال حتزنقك شويه .... انزل مصر ......... اجازه............. وحاول ترستق المدام والولاد ... من كافة النواحى .... ارمى سيرتك الذاتيه لشركات التوظيف .... خلال فترة اجازتك تابع الاهرام وبالذات اهرام الجمعه .... لو ربنا وفقك اثناء اجازتك خير وبركه ..... حاول انها تكون اجازه طويله شويه .... محصلش نصيب ... خلى اخوك او المدام يبعتولك الاعلانات التى تظهر اول باول .... عن طريق الاسكانر وبالايميل .

لو انا مكانك حيكون قرارى النهائى هو العوده ... ولكن تانى العبها صح وبهدؤ .... انا عارف ان تكلفة النزول لمصر مش سهلة بس حتكون مقبوله لو انت لوحدك والاسره هنا.

هديه منى ليك خش على الموقع ده وحتلاقى طن وظايف مستنيه ناس محترمه زيك.

http://www.amcham.org.eg/hr/recruitment/recruitment.asp

صدقنى الموقع ده هايل جدا وعن تجربه شخصيه ..... حاول تقدم فى وظايف من الان بحيث انك لما تنزل تكون مرتب انترفيوهات .... صعب ان حد يتصل بيك وانت كاتب رقم تليفون السعوديه .... حط رقم تليفون وعنوان اخوك مثلا فى مصر واكتب فى السى فى كفر CV Cover ما يوضح انك مقيم بالسعوديه ولكنك متواجد بمصر لفترة شهرين مثلا. متخافش ... مرتبات مصر زى الفل ... ورب هنا .... رب هناك..

ما تسيبش وظيفه الا على وظيفه .... رجاءا.

بالتوفيق يا اخى انشاءالله.

[Amenemhet]

معلش حاجه اخيره ..... مكاتب المحاسبه فى البلد بتتنشق على ناس محترمه عندها خبره ومش لاقيين .... بس مرتباتها مش قد التعب <ده بعكس شركات القطاع الخاص تماما> .... فلو معندكش مانع .... ده حل سريع جدا جدا جدا .

تم تعديل 22 أغسطس 2007 بواسطة Amenemhet

[elneshawy]

السلام عليكم ورحمة الله و بركاته

أخى المكافح ... خليك مكافح ... و كمل كفاح

يقول الله عز وجل :

بسم الله الرحمن الرحيم

يَا أَيُّهَا الَّذِينَ آمَنُواْ اسْتَعِينُواْ بِالصَّبْرِ وَالصَّلاَةِ إِنَّ اللّهَ مَعَ الصَّابِرِينَ {153}

صدق الله العظيم سورة البقرة

بسم الله الرحمن الرحيم

وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ {155} الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّـا إِلَيْهِ رَاجِعونَ {156} أُولَـئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَـئِكَ هُمُ الْمُهْتَدُونَ {157}

صدق الله العظيم سورة البقرة

أخى الفاضل :

أولا : عليك بالصبر

ثانيا : الدعاء

ثالثا : التوكل على الله

رابعا : بلاش تأخد نهائي نهائيا لأنك هتندم لو رجعت مصر و عن تجربة خد أجازة سواء كبيرة او صغيرة لمصر و شوف الوضع هناك عامل إزايا و دور على شغل و تابع إعلانات الأهرام و أهرام الجمعة خصوصا زي ما قال الأخ Amenemhet .

خامسا : غير جو و خلي بالك طويل

سادسا : كان بيقولوا لنا و احنا داخلين الجيش حب الجيش يكرهك . تكره الجيش يحبك

فبرده حب الشركة ؟؟؟؟؟؟ يمكن ربنا يصلح الحال

أحمد النشاوي

[Amenemhet]

معلش استفتسار .... ياترى فكرت تدور على حاجه افضل فى السعوديه ???????

سيبك من الرياض .... فكر فى جده والخبر !!!!

انا عارف انك زهقان ولكن هذا بديل عملى لا يجب اغفاله.

تم تعديل 23 أغسطس 2007 بواسطة Amenemhet

[زعلان]

زي ما قال لك الجميع ابدأ في تحضير سي في كويس ومرتب و تكون عارف انت بتدور على ايه يعني على خبرتك مش اقل من مدير حسابات و الراتب مش اقل من 12 الف ريال لو في السعودية + الميزات الاخرى مثل السكن و العلاج و تذاكر الطيران السنوية و مدارس الاطفال (طفلين) ...... خلي بالك انك ممكن تلاقي بسرعة وممكن تاخد وقت ومع كل انترفيو و مقابلة حتكتسب خبرة في نوع الاسئلة و طريقة تقديم نفسك يعني ما طحبتش من اول مرة لأنك لازم تكون خبرة في تسويق نفسك جيدا و ما تحولش تشتكي من الشركة الي ان فيها لمن تقابلهم في مقابلة العمل لأن ده غلط و خليك واثق من نفسك و ما تحسسهمش انك محتاج تنقل و لازم تكون محضر اجابة لسبب انك عايز تغير وضيفتك زي انك كملت اربع سنوات مع الشركة وده الخامسة وانك حابب تطور من نفسك و تغير جو العمل وان خمس سنوات كفاية في شركة واحدة وانك بتدور على مرتب وميزات افضل من الي بتتقدملك ( ما تقلش انك بتاخد اربعة ) وربنا يوفقك

[شينكاوي]

اخي الفاضل المكافح اعتقد ان الاخ AMENEMHET قدم لك نصيحة مفيدة جدا وهي موضوع الاجازة خدلك اجازة ودور علي شغل واسعي والله مع الصابرين

وبخصوص موضوع الواسطة مش عارف انا كتبت كده لاني خبرتي قليلة بمصر وده اللي انا كنت عارفه من 3 سنين قبل ما اسافر ويمكن وان شاء الله يكون الحال اتغير دلوقتي

ربنا يوفقك يا رب ويفرج عنك الكرب .........امين وانصحك بالتقرب الي الله اكثر لانه هو الملجأ,,,,,,,,,,,,,,,,,,,,,,,,,,,,,,,,,, اخوك شنك

[ahmedarab]

اخى المكافح ..ادعو الله ان يفرج همك وانا انصحك فعلا بالتقرب من الله اكتر واكثر كما قال شنك

وبخصوص القرار فلو ممكن تستمر فى السعودية يبقى مفيش افضل من اللى قالة الاخ العزيز زعلان .

اما لو انت اتخنقت خالص ومش قادر تستمر فانصحك اولا بالاجازة والترتيب للحصول على وظيفة فى مصر اولا قبل الرجوع النهائى وكمان ممكن تبتدى بانك تخلى الاسرة تستقر فى مصر وانت فى الاجازة دى وبعدين لما تظبط فرصة عمل مناسبة فى مصر ترجع.

اما بخصوص كلام العزيز شينكاوى عن الوسايط فاحب اقولة انها مستمـــــــــــــــــــــــــــــــــــــــــــــــــــــرة حتى الان بس بتكون فى قطاعات معينة وفى الشركات الكبيرة يعنى مش الشركات القطاع الخاص الصغيرة او المتوسطة لان زى ما قال Amenemhet مش هاكون صاحب شركة وابدى اللى مش مناسب ليا عن المناسب

بس مثلا فى قطاعات البنوك والبترول والجهات الحكومية وحجات تانية كتيررر ممكن تدفع عشان تتعين او تشتغل بعقد وكل برغوت على قد دمة ؟؟!!!!!

بالحق اية الصور المخيفة دى يا شينكاوى امال راح فين القرش الضاحك ؟؟؟؟؟؟

تم تعديل 25 أغسطس 2007 بواسطة ahmedarab

[mohamedez]

الحقيقة انت اكيد زعلان ومضايق علشان حاسس انك الغربة مش مفيدة ليك لانك بتاخد مرتب قليل نسبيا ومش بتقدر تحوش منه

لكن نصيحة منى انت وراك مشئوليات قبل ما تفكر او تقدم على خطوة جديدة فى حياتك المهنية لازم تحسبها كويس يعنى ما تقولش انا راجع مصر وانت لسه ما فيش شغل ليك فى مصر

انت تعمل اللى عليك تدور على كل مواقع التوظيف وتحط السيرة الذاتية بتاعتك واول ما تلاقى وظيفة فى مصر كويسة وبمرتب يقدر يعشيك ارجع

وممكن تلاقى وظيفة احسن بضعف راتبك فى السعودية او فى الامارات

نصيحتى ليك احسبها كويس وتوكل على الله وان شاء الله ربنا يكرمك

[المكافح]

جزيل الشكر لكل السادة الافاضل الذين قاموا بإعطائى المشورة والتى اثق انها فعلا من قلوبهم لانى فعلا اثق ان كل اعضاء هذا المنتدى هم اخوة لى بل اكثر من ذلك وانا فى انتظار اى رد او فكرة اخرى تفيدنى او تفيد من هم فى مثل حالتى وشكرا لكم على تواصلكم مرة اخرى

[MZohairy]

زي ما قال لك الجميع ابدأ في تحضير سي في كويس ومرتب و تكون عارف انت بتدور على ايه يعني على خبرتك مش اقل من مدير حسابات و الراتب مش اقل من 12 الف ريال لو في السعودية + الميزات الاخرى مثل السكن و العلاج و تذاكر الطيران السنوية و مدارس الاطفال (طفلين) ...... خلي بالك انك ممكن تلاقي بسرعة وممكن تاخد وقت ومع كل انترفيو و مقابلة حتكتسب خبرة في نوع الاسئلة و طريقة تقديم نفسك يعني ما طحبتش من اول مرة لأنك لازم تكون خبرة في تسويق نفسك جيدا و ما تحولش تشتكي من الشركة الي ان فيها لمن تقابلهم في مقابلة العمل لأن ده غلط و خليك واثق من نفسك و ما تحسسهمش انك محتاج تنقل و لازم تكون محضر اجابة لسبب انك عايز تغير وضيفتك زي انك كملت اربع سنوات مع الشركة وده الخامسة وانك حابب تطور من نفسك و تغير جو العمل وان خمس سنوات كفاية في شركة واحدة وانك بتدور على مرتب وميزات افضل من الي بتتقدملك ( ما تقلش انك بتاخد اربعة ) وربنا يوفقك

الحاج ساد جابلك الخلاصه

لو الراجل كفيلك ده ممكن ينقلك كفاله يبقى متضحيش بالسعوديه لأنك ممكن بالتكتيك السليم و شوية وقت و توفيق ربنا طبعا قبل كل حاجه ممكن تضاعف راتبك 3 مرات على الأقل

اولا تفتح النت وتعمل سيرش على مواقع التوظيف بالسعوديه

ثانيا تعمل سي في كويسه بالانجليزي و لو تحب اساعدك ابعتهالي على الخاص بعد ما تعملها و اعدلك عليها لو محتاجه

ثالثا ترمي السي في في كل مواقع التوظيف و تتابعها كل يومين تلاته

تشتري جرنال الشرق الأوسط و الآراب نيوز و الرياض كل سبت و اتنين واربعاء بيكون فيهم اعلانات بالهبل

شوية صبر حيجيلك انترفيوهات كتير ان شاء الله

خد بالك

الانتر فيو لازم تروحها و انت مطقم

يعني بدله و كرافات و بارفان و شياكه على الآخر

و تكون مكون فكره عن نشاط الشركه عشان غالبا الي حيقابلك حيسألك على حاجات ذات علاقه بنشاط الشركه (مقاولات- عقار- صناعي- تجاري....)

و طبعا تكون مذاكر السيفي كويس جدا عشان ميسألكش فيها و متعرفش ترد عليه

ومتكونش خايف ولا مرتبك و كله حيبقى تمام و يمكن تشغلنا معاك يا عم... :unsure:

بالتوفيق ان شاء الله

[Amenemhet]

بعد اذنك تابعنا بآخبارك لنطمئن عليك ولتكون رسائلك دليل لاى شخص يقع بنفس الموقف.

تحياتى. gt:

تم تعديل 26 أغسطس 2007 بواسطة Amenemhet