برافو معالي وزير الصحة المصري

[se_ Elsyed]

زي ما بننتقد أداء أي فرد من أفراد الحكومة ونهاجمه للمصلحة العامة .. لابد في نفس الوقت أن نشيد باداء أي مسئول محترم وبيراعي ربنا في عمله وبيحاول يعمل حاجه كويسه ..

وزي ما أشدنا بالسيد وزير الصحة الدكتور حاتم الجبلي في زياراته أو نقول بالعامية - كبساته - على المرافق الطبية الحكومية المترهلة والتي دب فيها الفساد وأستشرى فيها العفن وأصبح الداخل إلىيها مفقود والخارج مولود .. فها نحن نشيد بها مره أخرى فيما فعله بالامس بمدينة الأقصر .. ونشد على يده ونشجعه .. وبإذن الله هاحاول أحصل على فاكس الوزارة أو البريد الإلكتروني للوزارة وأرجو من الإخوة الإيجابيين المحترمين إننا نراسلهم ونشد على يدهم ونشجعهم على مواصلة حملات ضرب الفساد الطبي .

الواحد ممكن يستحمل الفساد في أي قطاع ... لكن إلا القطاع الطبي ... لإن غلطه بسيطة زي اللي عملته الإنسانة التي لا دين لها ولا مله وهي طبيبة الإسكندرية التي حقنت كما قلنا 6 أطفال بحقنة واحده بدون أن تستبدلها .. بعقار الأنسولين فأصابتهم جميعاً بفيروس الكبد الوبائي سي وأصبحوا مهددين بالموت في أي لحظة إذا تفاقم المرض ووصل إلى درجة التليف الكبدي ...

تحية مرة أخرى لمعالي وزير الصحة وربنا يوفقه ويهدي امثاله إلى ما فيه الخير

وزير الصحة يركب سيارة أجرة ليقوم بثاني (كبسة ) على مستشفيات الصعيد 8/23/2007 10:12:00 AM

بالدكتور حاتم الجبلي وزير الصحة والسكان

الأقصر - فوجيء مرضي مستشفي الأقصر الدولي بالدكتور حاتم الجبلي وزير الصحة والسكان ينزل من سيارة أجرة الأقصر ويجلس بينهم ويناقش مايقدم لهم من خدمة ويطلع بنفسه على التقارير الطبية والتحاليل التي معهم والمدة التي مكثوها بالمستشفي حتي تمت مناظرتهم‏.‏

وقام الوزير بتشغيل بعض الأجهزة الطبية بنفسه للتأكد من سلامتها وصحة ودقة النتائج التي تقدمها خاصة أجهزة الأشعة وصدمات القلب الكهربائية‏.‏

وقرر الوزير خلال جولته بمستشفي الأقصر منح جميع العاملين بوحدة الأطفال المبتسرين وعددهم ‏11‏ من اطباء وهيئات تمريض مكافأة تعادل شهرا لما لمسه من خدمات متميزة من الوحدة‏ ودراسة تحويل هذه الوحدة الي مركز للأطفال المبتسرين علي مستوي المنطقة ودعمه بأعداد إضافية من الحضانات‏، حسبما ذكرت جريدة الأهرام.

وكانت المحطة الأولي لجولة الوزير المفاجئة بطائرة الأسعاف قد بدأت بزيارة الي محافظة أسيوط رافقه الدكتور ناصر رسمي مساعد الوزير للطب العلاجي دون أن يشعر به أي أحد من جميع قيادات الصحة أو الحكم المحلي وقرر خلالها نقل الصيدلانية بوحدة صحة أسرة السراقنة لعدم وجودها في مكان العمل والتحقيق معها‏.‏

وفي المستشفي الشامل بأسيوط لاحظ تهالك أقسام الأشعة ولا تؤدي إلي نتائج دقيقة وعلي الفور قرر تطويرها‏ وتزويدها بأحدث الأجهزة الطبية‏ كما قرر علاج المواطن نظيم صبحي شحاته المصاب بشلل رباعي علي نفقة الدولة واستخراج قرار العلاج فورا‏.‏

وطالب الوزير بضرورة أن يتم التخطيط لإنشاء أقسام جديدة بالمستشفيات وفق الأصول العلمية والطبية بهدف راحة المريض بعيدا عن العشوائيات‏.‏

[محمد عبدالعزيز]

يا خوفى عليك يا حاتم يا جبلى

الريس كده يزعل منك... هو برضه عينك عشان تشوف مشاكل المواطنين الوحشين دول وتحل لهم مشاكلهم؟

عموماً شكلك كده خارج قريب من المغارة بتاعة الوزارة... عشان رئيس العصابة... قصدى رئيس الجمهورية تلاقيه دلوقتى عامل زى قوم لوط و بيقول "أخرجوهم من قريتكم إنهم أناس يتطهرون"

بس ولا يهمك يا دكتور... إذا خسرت كرسى الوزارة فانت كسبت احترام وحب المواطنين اللى هو أبقى من الوزارة... وربنا يجازيك خير على اللى بتعمله لصالح المواطنين.

[elneshawy]

السلام عليكم و رحمة الله و بركاته

بسم الله الرحمم الرحيم

وَقُلِ اعْمَلُواْ فَسَيَرَى اللّهُ عَمَلَكُمْ وَرَسُولُهُ وَالْمُؤْمِنُونَ ............... {105} سورة التوبة

حاجة تشرح القلب و تبعث بالطمأنية

بس يا خوفي ليعملوا فيك زي ما عملوا للسيد / كمال الجنزوري و يعملوا عليك حجر طبي بدل تحديد الإقامة

ربنا يبارك فيك و يعينك

و لو ده لا قدر الله حصل

مش تخاف ربنا قال :

..... وَمَن يَتَّقِ اللَّهَ يَجْعَل لَّهُ مَخْرَجًا {2} وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا {3}

إن شاء الله منصور و مجبور الخاطر كمان

ها نحن نشيد بها مره أخرى فيما فعله بالامس بمدينة الأقصر .. ونشد على يده ونشجعه .. وبإذن الله هاحاول أحصل على فاكس الوزارة أو البريد الإلكتروني للوزارة وأرجو من الإخوة الإيجابيين المحترمين إننا نراسلهم ونشد على يدهم ونشجعهم على مواصلة حملات ضرب الفساد الطبي .

توكل على الله و هات الفاكس و الإيملات و إن شاء الله هنشارك

و أنا هدور على الإيمل أو الفاكس

[Amenemhet]

احيي الاخ س س على هذا الموضوع ..... وبرافو معالى الوزير .... حقيقى برافو .... وربنا معاك ومع اللى زيك.

[mamdowh]

والله لو هو كويس ومالوش فى النفاق وبيعمل الكلام ده لوجه الله ...........................هيطلع من الوزارة

ولو هو بيعمل كده عشان قرب التغيير الوزارى .....................................................برضك هيطلع من الوزارة

ولو هو عمل كده عشان يرضى ضميره ..............................................................برضك هيطلع من الوزارة

ولو هو ناوى يطلع من الوزاره ..........................................................................برضك هيطلع من الوزارة

لازم كبش فدا ياجماعه انتو ايه نايميين

[Amenemhet]

لازم كبش فدا ياجماعه انتو ايه نايميين

معلش يا اخ ممدوح ...... مافهمتش ...... كبش فدا ....... لايه بالظبط ........ لو قصدك على مئات الاطفال اللى اصيبوا بالايدز بسبب حكومة واحد مخبول يحكم دوله من اغنى دول البترول ومش قادر يعمل مستشفى عدله ...... يبقى قصدك على ليبيا والقذافى ...... مش مصر او الحكومه.

عندنا مشاكل ...... اه ...... مشاكل وبلاوى ....... محدش يقبلها ...... بس الكمال لله يا آخى ...... ونحن علينا ان نسعى للكمال ..... خطوه وراء الاخرى ...... علينا ايضا ان نعى اننا لن نصل للكمال الذى ننشده ولكننا فقط نحاول ...... وعندما يخطو وزير او غفير خطوه ...... علينا ان نعترف بتلك الخطوه ونكافئه عليها ...... ليعلم هو وزملائه ان الله لايضيع آجر من احسن عملا ...... وكذلك نحن الشعب الذى فى رقاب حكامنا ...... لا ننسى من آحسن عملا.

وكما قال الاخوه لماذا لا نرسل للوزير ولرئيس الوزراء نشكره على ما فعل ....... مش يمكن يقعد فى الوزاره بفضل خطابك الالكترونى ?

ومش يمكن جوابك يا احد افراد شعب مصر يزيد حماسه ويقدم المزيد ..... ومش يمكن العدوى تمتد لوزراء آخرين فنرى ناس بتخرج بوظيفتها عن النطاق الذى عهدناه لمصلحة مصر.

من الاخر ....... الراجل عمل حركه جديده وغريبه على طريق مصلحة مصر ...... ما تييجى انا وانت نعمل برضه حركه جديده وغريبه عن الطبيعى بتاعنا <اقصد الفرجه وضرب الكفوف وسب الحكومه والعيش والعيشه واللى عايشينها> ...... نبعت ايميل ...... حيكلفك ايه ..... ولا حاجه ...... حيعمل ايه? ..... يمكن ولا حاجه برضه ويمكن كل حاجه........ خسران حاجه ?

عنوان البريد الالكترونى للشكاوى بوزارة الصحه

contact@mohp.gov.eg

عنوان البريد الالكترونى لمجلس رئاسة الوزراء

questions@cabinet.gov.eg

عنوان البريد الالكترونى لرئيس مجلس الشعب

Speaker@parliament.gov.eg

تم تعديل 24 أغسطس 2007 بواسطة Amenemhet

[Amenemhet]

الموضوع: شكر واجب

معالى السيد وزير الصحه ببلدنا الحبيب مصر

اكتب اليك لاشكرك بآسمى وبآسم كل من لمست نفوسهم خطوتك بزيارة مستشفى بالاقصر ....... اشكرك وباتمنى من ربنا انه يكتر من امثالك اللى خايفين على مصلحة بلدنا ....... يا سيدى ان ما فعلته وتفعله يقف حائطا دون تكرار مهزلة مثل مهزلة اطفال الايدز بليبيا ...... انت قدوه لكل مصرى فى تآدية عمله .............. اتوقع منك وادعوك للمزيد من اجل خير بلدنا الحبيب مصر ........ احترمك واقدرك ....... رفعت راسنا .

الاسم:

العنوان:

نسخه الى معالى السيد رئيس الوزراء

نسخه الى الدكتور فتحى سرور رئيس مجلس الشعب المصرى

______________________________________________________________________

هذه كانت رسالتى ...... لو كتبتوا شاركونا رسائلكم او قولوا انكو كتبتوا.

شكرا للاخ النشاوى على الفكره.

[محمد عبدالعزيز]

أنا أيضاً أرسلت رسالة للعناوين التى ذكرها الفاضل Amenemhet

أعتقد أنها خطوة إيجابية بالفعل إرسال شكر على هذا المجهود, فهو بمثابة الأمر بالمعروف والنهى عن المنكر

[elneshawy]

السلام عليكم ورحمة الله وبركاته

بسم الله الرحمن الرحيم

يقول الله سبحانه و تعالى :

وَقُلِ اعْمَلُواْ فَسَيَرَى اللّهُ عَمَلَكُمْ وَرَسُولُهُ وَالْمُؤْمِنُونَ ............... {105} سورة التوبة

صدق الله العظيم

شكر واجب

الأخ الفاضل /

معالى وزير الصحة . د / حاتم الجلبي

أتقدم بخالص شكري و احترامي لسيادتكم على اهتمامكم الجدي و الفعلي بوزارة الصحة كمباني و أجهزة و مرضى و ليس اهتمامكم بوزارة الصحة كمنصب و كرسي و واجهة اجتماعية . أحيي فيكم روحكم الخالصة للعمل و ضميركم الحي الذي يأبى النفاق و الفساد . لك مني خاصة و من كافة الشعب المصري خالص الدعاء ووافر الحب و الاحترام على إخلاصكم الواضح للجميع في عملكم من متابعة للمستشفيات و الاهتمام بتطوير القطاع الطبي و و أهم من هذا و ذاك الاهتمام بالمواطن المصري و خاصة ( الفرد المريض ) .

أشكرك مرة أخرى و ليست أخيرة على زيارتكم الأخيرة لمستشفي الأقصر الدولي . راجيا من الله دوم حرصكم على المصلحة العامة و متمنيا لسيادتكم كامل التوفيق .

مواطن مصري

قُلْ إِنِّيَ أَخَافُ إِنْ عَصَيْتُ رَبِّي عَذَابَ يَوْمٍ عَظِيمٍ )

( الَّذِينَ آمَنُواْ وَتَطْمَئِنُّ قُلُوبُهُم بِذِكْرِ اللّهِ أَلاَ بِذِكْرِ اللّهِ تَطْمَئِنُّ الْقُلُوبُ )

أحمـــ فتحي ـــــد

ده نص الرسالة مثلما ارسلتها.

و يااااااااااااااااااااارب نرسل رسايل أخرى لباقي الوزراء ( بس ياريت تكون رسايل شكر مش رسايل شكوى )

شكرا للاخ النشاوى على الفكره.

لا شكر على واجب

تم تعديل 24 أغسطس 2007 بواسطة elneshawy

[فولان بن علان]

قد يكون الوزير الدكتور حاتم الجبلي رجل نشيط وشريف وهمام ووطني مخلص

ولكن عن ماذا تنم تلك الكبسات المسرحية التي يقوم بها في صورة المخبر الخاص والتي تعجب الجمهور

هل يثق السيد الوزير في جهاز وزارته من وكلاء وزارة ومديرين مديريات الصحة ومديرين الطب العلاجي والوقائي

هل يقومون بواجبهم في الإشراف والرعاية والمراقبة

هل يطلع الوزير على التقارير المقدمة منهم إن كان هناك تقارير عن أحوال الخدمات الصحية والمستشفيات

والمراكز والوحدات الصحية

جميل أن يقوم الوزير بنفسه بالتفقد والتحري للتعرف على مجريات الأمور

ولكن أين خطط الوزارة وبرامجها وأين التطوير الممنهج القائم على الدراسات وليس القائم على الكبسات العشوائية

وما ذنب المواطنين الذين يعالجون في مستشفيات لم تشملها كبسات وزير الصحة

كم جهاز لا يعمل في مستشفيات وزارة الصحة

لماذا لا يطلب الوزير تقارير مفصلة عن تلك الأجهزة في عموم مستشفيات الوزارة ووضع خطة لتطويرها جميعا

ثم عن المكافآت والجزاءات التي يقوم الوزير بتوقيعها أثناء كبسته الميمونة لزوم إضفاء البهارات الإعلامية

أين القانون في ذلك بدون تحقيق ولا شئون قانونية بدل أسلوب فرامانات الباب العالي

المواطن الذي تصادف وجوده أثناء كبسة وزير الصحة يا سعده ويا هناه

ماذا عن ملايين المواطنين الذين لن يصادفهم الوزير في كبساته

لابد أن هناك آليات في الدول التي تحترم مواطنيها يمكن المواطن من الحصول على حقه في خدمة صحية آدمية

ولابد للوزير الهمام من وضع تلك الآليات ولا تتوقف فقط على كبساته

وطالب الوزير بضرورة أن يتم التخطيط لإنشاء أقسام جديدة بالمستشفيات وفق الأصول العلمية والطبية بهدف راحة المريض بعيدا عن العشوائيات‏.‏

لا أدري من هم الذين طالبهم الوزير وهل هذه المطالبة اكتشفها فجأة أثناء الكبسة

كل كبسة وأنتم طيبين

[محمد عبدالعزيز]

أتفق معك يا أخ فولان فيما تطالب به من خطة طويلة الأجل للتطوير وألا تكون العملية عشوائية.

ولكن أختلف معك فى التقليل من تأثير هذه الكبسات أو الزيارات.

أولاً هذه الزيارات مفاجأة ويتم فيها عقاب وثواب فورى دون الدخول فى تحقيقات وإجراءات روتينية ï»·نه ببساطة كل شئ على عينك يا تاجر, فالذى يعاقب يتم ضبطه متلبساً إما غير متواجد فى مكان عمله أو لا يؤديه كما هو مطلوب والذى يثاب يتم ذلك بناء على انضباطه فى العمل وإتقانه له وكل ذلك يحدث دون ترتيب مسبق, ففيم التحقيق والتدقيق, ولا هو روتين وبيروقراطية وخلاص.

ثانياً هذه الزيارات المفاجأة بالتأكيد سيكون لها مردود إيجابى على باقى المستشفيات ï»·ن كله الآن مترقب متى ستكون الزيارة القادمة وأين سيتوجه الوزير, فستجد الأغلبية تحاول بقدر الإمكان أن تنضبط حتى لا يزورها الوزير وهى فى حالة إهمال وتقصير, وهذا بالتأكيد مكسب كبير لباقى المواطنين.

ثالثاً هى خطوة جيدة تستحق التقدير, بالتأكيد ليست كل المطلوب ولكن أيضاً لا يجب أن نحمل الرجل أخطاء الوزارات الماضية, الذى يجب أن يسأل عن ذلك كله هو الرئيس ولا أحد غيره, لماذا يستبعد الكفاءات ويثبت أقدام المفسدين؟

أنا على اقتناع تام أنها ليست زيارات مسرحية, ونحن نعرف أن الوزراء إذا أرادوا زيارات مسرحية فسيتم لهم ذلك وليسوا فى حاجة أن يتعبوا نفسهم ويركبوا سيارة أجرة ويذهبوا فى وقت مبكر بدون أى ترتيبات, بالتأكيد إذا أراد الوزير زيارة مسرحية فلن يفعل ذلك.

تم تعديل 24 أغسطس 2007 بواسطة محمد عبدالعزيز

[فولان بن علان]

وأنا أتفق معك أخ محمد عبد العزيز أن الكبسات ستبث الرعب في نفوس العاملين في القطاع الصحي

وسيكون لها مردود في الانضباط من التوقيع في دفتر الحضور إلى التوقيع في دفتر الانصراف

ولكن أن يكون لها مردود على الخدمة الصحية المقدمة للمواطن فهذا ما أشك فيه كثيرا

فلن توفر دواء ولن تبدل جهاز خربان بآخر حديث إلا إذا جربه سيادة الوزير بنفسه

ما لم تكن المنظومة كلها منضبطة وصحيحة

وأولها لكي لا نضحك على أنفسنا ..مرتبات العاملين في القطاع الصحي

فاقد الشئ لا يعطيه ومن لا يستطيع الحياة بآدمية مصونة فلن يقدم خدمة آدمية لغيره

أما المطالبة بأن يكون الموظف والوزير سواء أمام القانون فهو حماية من التعسف وسوء استخدام السلطة

أليس هذا مطلبنا ...سيادة القانون

التحقيق القانوني هو المنوط به الكشف عن الإهمال

أما الملاحظة المتعجلة لسيادة الوزير فقد تخطأ وتعاقب من هو أكفأ لهفوة عارضة

ويخسر المواطنين وتختلط الأمور

الحكم على الكفاءة والإهمال تتطلب متابعة وهذا ما لا يستطيعه إلا المسئول المباشر

وليس المسئول البعيد الهابط عليهم بالتاكسي الأجرة

ولماذا لا تشمل جزاءات سيادة الوزير وكلاء الوزارة التابعة لهم تلك المستشفيات

أليس هذا عملهم الذي يقوم به الوزير ..إذا استطاع الوزير أن يقوم بأعمال وكلاء وزارته ومديرين الصحة

فليلغي تلك المناصب وليوفر على الدولة مرتباتهم

الوزير ليس مسئول عن مشاكل وزارة الصحة المتلتلة

ولكن إصلاح المنظومة أولى من استجلاب تصفيق الجمهور وهتافات الصحفيين

[mamdowh]

احب أوضح حاجه للأخ امنمحات انا مش ضد الوزير المحترم وأحترم رأيك واحب أبعت له برقية شكر زى مانت عايز انا اللى أقصده ان مش انا والا انت والا غيرنا اللى ها يقيموا عمل وزير , العملية مش كده فى حاجات تانية يتم وضعها فى الاعتبار عند اختيار الوزراء مثل (الأمانة والتفانى فى العمل وإنكار الذات , إعطاء الحقوق , .......الخ) لو كل الصفات دى اجتمعت فى وزير هيطلع فى أول تغيير عارف ليه ................................................ الجهابزة وأصحاب القرار وما أكثرهم أول حاجه هايقولوها يا عم ده مابيسمعش الكلام وهايفضحنا قدام الشعب(راجل مش بيحب الحال المايل) ان فى مستشفيات مفيهاش دكاتره ولا ممرضات ولا أدويه ولا عيانين (ها يجوا يعملوا إيه الشافى هو الله), وبعدين ده بيكافئ اللى شغال يانهار اسود ده هايضيع ميزانية الوزارة فى المكافأت(مسرف) وكمان بيكشف الفساد مصيبه تانيه(وطنى) وبيعالج اللى مالوش علاج بره البلد (تبذير)..................................

كفايه كده وعموما لو فضل فى الوزارة بعد كل ده تبقى بركة دعا الوالدين

[Amenemhet]

كده افهمك يا استاذ ممدوح ........... بس انت مش شايف ان نظره صعبه شويه ....... ردى الوحيد هو سؤال ...... ايه اخرة النظره دى ........ ماهو احنا لو حسبنا كل حاجه كده حنموت واحنا واقفين محلك سر وبنمصمص شفايفنا ............ ما تسيبك من الحسابات دى ...... احنا فى دلوقتى واللى حصل ...... انا عملت اللى شفته صح وشفت الموقف يستدعيه ...... يحصل ايه بكره ....... ده مش شطرنج لازم تحسب كل خطوه قبل ما تخطيها ...... يحصل بكره زى ما يحصل ...... المهم انهارده الراجل عمل حاجه كويسه ...... حبيت اشكره عليها ...... وشكرا ليك اتساع عقلك لراى الاخر.

تم تعديل 25 أغسطس 2007 بواسطة Amenemhet

[mesryforever]

وأنا كمان بعت لهم رسائل تحيه وتقدير

يارب يحس بقية معالي الوزراء ويعملوا إللي عليهم

[Nonna]

معلش

بعد إذنكم يعني

حد سبق له زار مستشفى الدمرداش مستشفى حكومي تعليمي بجميع أقسامها ؟ :lol:

_يارب يديكم الصحة طبعا_

بلاش

حد شاف مستشفى ابو الريش أطفال؟ طب قصر عيني ؟ :lol:

مستشفى حكومي تعليمي برده

_و برده يارب مانشوفكم في اي حاجة وحشة_

لا اعتقد بتاتا ان حصلهم كبسة

قرديحي حتى !! wst::

اقعدوا بعافية :lol:

تم تعديل 28 يناير 2008 بواسطة Nonna

[se_ Elsyed]

أتفق معكي يا دكتورة نونا في إن مستشفياتنا الحكومية وصلت لحالة يُرسم لها - على رأي شويكار - أو بمعنى أصح وصلت إلى طريق اللاعوده ...

- عقلي الباطل بيقولي : بكرة نقعد عالحيطة ونسمع الزيطه ... وهانشوف لما تتخرجي السنة الجاية يا نونا هاتعملي إيه ؟ يا ترى هاتفتحي لك مستشفي إستثماري واللي يدخل عندك تبيعه اللي وراه واللي قدامه مقابل حقنة فولتارين مهدئه ؟ ولا هاتشتغلي في مستشفي حكومي ونلاقي ماسكه عصاية مقشة للمرضى وبتجري وراهم في الطرقات وخلف الشبابيك زي ما بتقول الست فيروز

- هل تعلمين سعادتك بإن المستشفيات الحكومية معظمها بيطردوا المرضى قبل فترة الأعياد عشان الدكاترة اللي هم ملائكة الرحمة يعيدوا براحتهم من غير وجع دماغ ؟

- هل تعلمين سعادتك إن في مستشفيات حكومية - شفتها بعيني وما صدقتش - الدكاترة فيها بيضربوا المرضى ... آه والله العظيم يعني ممكن دكتور تلاقيه بيضرب عيان بالبوكس أو يلطشه قلم من أقلام مخبرين اقسام الشرطة .... مش قسوة لا سمح الله .. لكن ده بس عشان العيان يقول آه ه ه ه ه ه ه ه بضمير ؟

- هل تعلمين إن كثير من المستشفيات الحكومية العنابر بتاعتها شبابكها من غير قزاز ؟ دي بالذات بقى مش محتاجه كبسة من الوزير .. ولكن محتاجه نيافته يعدي جنب مستشفى الحُسين الجامعي أو السيد جلال أو الدمرداش أو المطرية التعليمي المعروف بمستشفى ماما سوزان بتاعت المكتبات اللي هي مرات الريس ... ويبص من بره بس على غرف إقامة المرضى ... يعني بالصلاتو عالحبيب ديتها شوية برد زي بتوع الأيام اللي فاتوا والعيانين يفيصوا منهم لنفسهم وبكده تبقى عملية نضيفه 100 %

- هل تعلمين إن حالة النظافة في كثير من المستشفيات الحكومية يعتمدوا فيها على ستات كبار في السن وولا بيهشوا ولا بينشوا وإن القطط الضالة والفئران الضالة الي تتعايش فس حالة سِلم غريبة تملأ جنبات تلك الغُرف ... وشوفت بعيني برضو ما حدش قال لي قطط داخل العنابر تكاد تأكل المرضى ...

ما هو الأمر ما يسلمش لو حد معرفه عيان وحظه إنه بيتعالج على حساب الحكومة اللي بتلهف مننا ضرايب قد كده .. فبيدخل مستشفى حكومي وخصوصاً مستشفيات التأمين الصحي عشان يتعالج فالواحد بيعمل الواجب ويزوره ويشوف عجب العُجاب .

- واخيراً عشان نفسي غمت عليه ... موضوع دورات المياه - التواليتات يعني - في المستشفيات الحكومية ومستشفيات التأمين الصحي يتألف عنها مراجع ومجلدات مدعمه بالصور أقل مُجلد ممكن يوصل إلى 1000 صفحة ؟ فينك يا عم الأفوكاتو

وعشان أقفل حتة المداخلة اللي في إيدي دي إن فعلاً بدل سعادة الوزير ما يبص بره .. طب ما يبص جوه الاول ... قصدي يعني ينزل على رجوله ويعدي على المستشفيات دي بتاعت القاهرة ويشنق الناس المسئولين عن إدارتها ...

[Nonna]

لا كدة أنا متأكدة ان حضرتك مريت على مستشفيات القاهرة الكبرى تمام

عقبال السيد الوزير اللي أكيد أكيد عااارف

معلش حضرتك شفت حلل المحشي و الفرشة اللي ع البسطة و في الممرات

في مستشفى الباطنة

!!!!!

حضرتك شفت القطط في مستشفى النسا

ولما تسأل القطط ده هنا ليه بالكيمة ده؟!!

تفاجأ بالرد

انهم بيخلصوهم من حواشي ما بعد الولادات

القطط بتاكل الحاجات اللي بتتبقى بعد الولادة

اصل هيرموها فين!!!

إقتباس

- عقلي الباطل بيقولي : بكرة نقعد عالحيطة ونسمع الزيطه ... وهانشوف لما تتخرجي السنة الجاية يا نونا هاتعملي إيه ؟ يا ترى هاتفتحي لك مستشفي إستثماري واللي يدخل عندك تبيعه اللي وراه واللي قدامه مقابل حقنة فولتارين مهدئه ؟ ولا هاتشتغلي في مستشفي حكومي ونلاقي ماسكه عصاية مقشة للمرضى وبتجري وراهم في الطرقات وخلف الشبابيك زي ما بتقول الست فيروز

أحسب على الله ان شاء الله انى مش ناوية على كدة خااااااااالص

أتمنى انى أقدر أفيد فعلا

و أعتقد ان في كتير ليهم نفس الهدف و التفكير

بس المشكلة مش فينا بقدر ماهي مشكلة في مكسرين المقدايف

سيبتك بعافية

[nash]

طيب عندي اقتراح

لو حد صور الصور دي..ونزلها وبعتها لبابا حسني..أو نزلها في أي مدونه مصريه...تفتكروا ممكن تعمل مفعول؟؟؟

[Nonna]

هتعمل طبعا

ابتسم يا أستاذي الفاضل انت في مصر

بلد الطين

و العجيــــــــــــن

!!!!