تجاوزات جهاز الشرطة

[bashar7]

نشكوا اليك يا رب ، نشكوا اليك يا أرحم الراحمين

ذكر لي صديق يعمل اخوه سكرتير للنيابة في احد مراكز محافظة الغربية ، و قال لي انه في يوم فوجئوا بالعديد من المقبوض عليهم بتهمة حيازة سلاح و مخدرات و ان العلاقت بينهم و اوجه المقارنة بينهم متفاوتة و تبين بعد التحقيق ان الجميع ينكر و ان الجميع ليس لديه اي سوابق و لا تحيط حوله الشبهات ، المفاجئة كانت ان الرواية التي اتفق عليها كل منهم انه رأى ميكروباص به ركاب و عندما اشار اليه و ركب تبين ان به مخبرين و مجموعة من المقبوض عليهم بنفس الطريقة

و عندما سال صديقي اخيه لماذا فعلوا ذلك قال ان البيه ضابط المباحث عايز يعمل شوية محاضر عشان يبان انه بيشتغل و بدل ما يتعب نفسه و يدور و يقبض على اللي يستاهلوا خد ميكروباص هو و المخبرين و كل اللي يشاور له يقبض عليه و يديله تهمة بانجو او سلاح

و طبعا المحاضر مترتبة و الاعترافات جاهزة و الادلة موجودة في القسم و حتى وكيل النيابة اللي اقتنع ببراءتهم مقدرش يعمل حاجة غير انه افرج عنهم بضمان لكن هيبقى لهم قضية و ممكن ياخدوا حكم

[yasser6666]

اسمعوا أخر مصيبة سمعتها عن فساد جهاز (الشر دة)...كنت بكلم اهلي في مصر وبعدين بيحكولي انه في الشارع عندهم كان فيه فيديو كليب للمصارع الحرة بجوار احد الدكاكين علي ناصية الشارع فلما استفسرت قالوا لي اصل فيه دكان لبان صاحبه بيعرف ضابط شر دة ودايمأ الضابط بييجي يقعد عنده في المحل في الليل ولانه ضابط مرور دايمأ بيكون معاه سيارة بوكس فيها اتنين عساكر بينتظروه في السيارة لغاية مايخلص سهرته ...المهم اليوم ده العساكر وصلوه لمحل الالبان وقلهم يرجعولوه تاني والظاهر اتأخروا عليه في الرجوع لسبب ما فما ان رأهم جايين متأخرين (كعادته هو) حتي نادي عليهم وهاتك بالاقلام والشلاليت والبصق في وجوههم وكل مايحاولوا يهربوا منه أو حتي يبعدوا شوية اتقاء لشره ينده عليهم تاني ويأمرهم ان يضعوا ايديهم بجانبهم علشان يعرف يضرب صح وده طبعأ غير الرفس بالاقدام لدرجة ان عسكري منهم أخد رفسة ومن قوتها نزل لمنتصف الطريق وكاد يموت قتيلأ بسبب حادثة سيارة كادت تقتله واستمر هذا المسلسل لمدة خمستاشر دقيقة تقريبأ ولا يستطيع احد ان يتدخل بكلمة احسن بعدين ينوبه من الحب جانب وطبعأ حضرة الضابط لما لقي الناس بتتفرج من البلكونات والشبابيك قال يزود العيار حبيتين علشان الفرجة تبقي بمزاج وبرضه الناس تعرف انه شديد وراجل جامد (ماهو مافيش مقاومة بقي) ..........................

والله انا سمعت القصة دي كل اللي نزل عليا اني اقول (انتوا عايشين في غابة.. انتوا عايشين في غابة) .....

........................

سؤال ?مش برضه عسكري المرور ده يعتبر موظف في الداخلية وقبلها مش هو بني أدم ومواطن مصري والا احنا فعلأ في غابة?????

[stavro]

Yasser 6666,

عسكرى المرور بنى أدم، بس ده مش معناه إن الباشا مش

مسموح له إنه يعامله زى الحيوانات . دى حاجه و دى حاجه

تانيه خالص. و بعدين وزارة الداخليه بتضرب بيد من حديد

علي من تسول له نفسه التبجح و قله الادب وتعديب اى

فرد من افراد المزرعه. ولو سمحت لا تسأل مزرعه ايه ولا

تسألني من انا .

وكمان احنا عايشين فى غابه، اى اسئله أخرى؟

ايام سودة راحت،وايام اسود جايه عليكم

[se_ Elsyed]

حكي لي أخي اللي لسه جاي من مصر ، أنه في منطقة قريبة من بيتنا حدث تصادم بين سيارتين ، اتضح أن الطرف المخطيء طبيب شاب حديث التخرج والسيارة الأخرى لمقدم شربه فما كان منه إلا أنه نزل يبستف فى الولد الطبيب الذي أعتذر له بأدب وتعهد بإصلاح سيارته مهما كانت التكاليف ولكن إزاي فقد تمادى الظابط فى سبه فالولد قاله بالحرف الواحد " أنت بتشتم علشان متحامي فى البدلة الرسمية " فقاله له الظابط أنا هاوريك ، وعلى مايبدو أن بيت الطبيب كان قريب حيث أن والدته جاءت مسرعة ومعها مبلغ مالي كبير جداً واعطته للظابط ليصلح سيارته وبالفعل أخذه ، وتاني يوم بالليل جاء زوار الفجر واخذوا الزبون إلى مكان غير معلوم لمدة 9 شهور .. واتضح أنه كان فى معتقل المغول وخرج الشاب مش نافع لا طبلة ولا طار ( مصطلح يعبر على أنه تعرض لتعذيب بشع وسحق لشخصيته أثناء هذه الفترة )

وسلم لي على قانون الطواريء.

[se_ Elsyed]

مررت بتجربة واقعية خلال زيارتي الأخيرة لمصر ، تذكرت فيها على الفور أختنا العزيزية كليو المشاغبة صاحبت أمتياز موضوع " فساد الشرطة "

فبإختصار فقد تم إتهام أحدى أصدقائي فى قضية ما وبدون الدخول فى التفاصيل أو مناقشة هل هو بريء أم مذنب .

فانا هنا لأعرض لكم صور بشعة شاهدتها رأي العين من معاملة غير أدمية للمتهمين - الذين لم تثبت عليهم التهم بعد - فى قسم الشرطة وظروف إحتجازهم الغير أنسانية وأنتشار الرشاوي فى الأقسام بين الكبير والصغير لدرجة إنك إن لم تدفع رشوى للموجودين هناك فإن المحبوس ممكن أن يموت جوعاً وضرباً ويذوق صنوف العذاب .... وامتد الفساد لأرى بعيني فساد الموجودين بالنيابة حيث أنهم يطلبون رشاوي بتبجح وحدث أمامي أن طلب سكرتير النيابة مبلغ كبير للتلاعب فى محضر أقوال المتهم أمام النيابة بكل بساطة لكي يضمن البراءة ، وأستشرت عدوى الفساد أيضاً لتصل إلى المحكمة ، فمن المعروف أن ليست كل الأحكام يتم النطق بها من على منصة القضاء فغالباً ما يجلس القاضي بحجرته ويصدر الأحكام بعد الاطلاع على أوراق القضية ويعطي حاجب المحكمة قائمة بالأحكام التي أتحدى أي شخص أن يعرف الحكم من خلاله إلا إذا دفع المعلوم .... ويا ويلك لو ظهرت براءة المتهم حيث تنفجر ماسورة الرشوى للأفراج عن المتهم ما بين الحكمة وقسم الشرطة وإن لم تدفع يتم إحتجاز ومرمطة المتهم إلى أن يتم الدفع غصباً وبالإكراه.

والسؤال هنا هو هل لا يعلم المسئولين الكبار عن هذا الفساد فى دولة تتشدق بنزاهة القضاء وعدالة المش عارف أيه ؟

والإجابة ببساطة بل هم يعلموا علم اليقين ولكنهم أيضا متورطون فى وحل الرشوى والفساد وبالتالي فاللي بيته من قزاز ما يقدرش يحدف الناس بالطوب.

[فــيــروز]

الفساد طايل كل شئ فى البلد

زى فرع اللبلاب اللى بيحيط بكل شئ لغاية ما يخنق اللى حواليه

ولا ارى اى سبب لاستبعاد انتشار الفساد بجهاز الشرطه

بالعكس السلطه تعطى اغراء كبير باساءة استغلالها الا من رحم ربى

واعتقد ان اول من ابتدع عبارة "انت مش عارف انا مين" كان شخص يعمل بالشرطه

واذا لم يكن هناك اى جهه رقابيه على هذا الجهاز الحيوى الخطير فطبيعى جدا ان ينتشر به الفساد حتى يزكم الانوف التى فقدت الاحساس من طول الحياه فى هذا الفساد

اللهم الا اذا بعثت التماسا تناشد و ترجو و تبوس الجدم و تبدى الندم لسيادة اللوا الوزير كى يتعطف و يتكرم و ينظر بعين الاب الى مشكلتك الى آخر كلام الشحاتين ده الذى لا يليق بدوله مفترض ان الجميع فيها متساوون امام القانون ..

[yasser6666]

عمليات تعذيب واسعة بمقار أمن الدولة بالجيزة (2003-08-27 11:04)

اعتقلت مباحث أمن الدولة بالجيزة السيدة عمرو محمد ناصف فجر الخميس الماضى, وتم اقتياده إلى مقرها بشارع جابر جابر بن حيان بالدقى حيث تعرض لعمليات تعذيب شديدة على أيدى الضابط حسن يوسف حسن والشهير بحسن عبد الحميد. الذى قام بتجريده من ملابسه وصعقه بالكهرباء فى جميع أنحاء جسده بما فيها المناطق الحساسة الأكثر إيلاماً لإرغامه على الاعتراف بالانتماء للإخوان المسلمين وتقديم معلومات عن أسماء لا يعلم عنها شيئاً

يذكر أن نفس الضابط قام باستدعاء الداعية المعروف الطيب راغب السرجانى حيث مارس معه عمليات التعذيب وإرهاب قاسية قبل حوالى شهر حسبما نقلت صحيفة آفاق عربية.

http://news.masrawy.com/masrawynews/270820.../158707news.htm

[ولد مصرى]

دى أول مشاركه ليا هنا وأن أنشاء الله مش هتكون الأخيره

المهم الموقف ده حصلى شحصيا وهو فيه جنيبن واحد مضيئ وواحد زى الزفت

كنت شغال فى قاعة أفراح فى مدينة نصر وفى يوم مشئوم كان عندنا ظابط فىمباحث مدرية أمن القاهره وكائنه ملك مصر ألمحروسه

هتلى ده وجبلى ده وديلى ده وأمر وشخيط وكل حاجه

وفى أخر اليل طالبوه بحساب ألى خده بس

ماكان منه ألا ان سب الدين لينا وللمسحين وألاكثرمن كده سب الدين

لوزير الدخليه

المهم الناس الىشغلين أحتجو عليه وحصلت مشاده

كل ده يحصل والباشا يسكت ؟

ازاى اتصل بوزارة الداخليه فرد فرد والدنيا تقلبت فى دقائق

وأشى مباحث وأشىظباط واشى مبخرين كتير جداجدا

كل ده ليه بصراحه أنا مش عارف

المهم انامحاسب ماليش فى القصه دى خالص

كلنا أتلمينا بربطة المعلم ورحنا قسم مدينة نصر أول وأتحطينا فى التلاجه وده المكان النضيف وهو بالنسبه ليهم نضيف

وألباشا عملنا عشر محاضر أيوه الله عشرة تعدى وضرب و0000000

وطبعا مش بأسمه ولكن باسم أخوته والمؤمور طالع ظباط نازله

أنا قلت خلأص أحنا هنتعدم زى دنشواى

الجانب المضئ أنه أتخانق مع مع الظابط ألى كان بيعمل المحضر

عفوا المحاضر وأفشو على بعض و خلانا نعمل للباشا محضر

ورفض ان يخرج أخوه كمان وأصر ان يعرضنا الصبح كلنا على النيابه

وهو ده بس اللى هد الباشا وبعض طول مفوضات زى بتاعت اليهود

قرر أن يتنازل عن المحاضر بعض مرور خمس ساعات فى التلاجه

وما أدراكم ما التلاجه ويس خلاص

مع العلم مخدناش فلوس الحاجه

والسؤال هو الظابط كان لسه رائد لما يبقى لواء هيعمل أيه

[White heart]

ولد مصرى كتب:

دى أول مشاركه ليا هنا وأن أنشاء الله مش هتكون الأخيره

أنشاء الله يا رب ....

أهلا و سهلا يا "ولد مصرى" ...

نرحب بك عضو جديد بيننا.

وما أدراكم ما التلاجه

يا حول الله .... معلهش ..

طب احمد ربنا، غيرك حطوة فى "الميكرو ويف" !!!

و ما ادراك بالميكرو ويف!!! لأ و مع صحبة تجنن..

المهم مين هايعوضكو على البهدلة دى، و الحساب مين هايدفعة فى الأخر؟؟!!

[se_ Elsyed]

الأخ ولد مصري .... مرحباً بك فى المنتدى .. ومعليش أول مشاركة لك تبقى حكاية مأساوية لكن أقدر أقولك كفاره يا معلم ... وبالمناسبة دي أنا ألفت لك بيتين شعر عالماشي

يا معلم ولــد مصــري ليتلك فل وزياده

خــارج مــن التـــــــلاجة زايد النص وزيادة

طلبتوا من الباشا حساب المشاريب وزيادة

أهو خدكوا على القسم واخدتوا حقكم وزيادة

- من المعروف والشائع فى مصر بلطجة كثير من رجال الشرطة وتجبرهم على الناس البسطاء اللي بيسعوا على أرزاقهم من خلال أعمالهم البسيطة مثل سائقي التاكسي والميكروباص وبائعي الجرائد.

وعلى فكره مستحيل واحد زي الفاسق اللي أنت شوفته ده يعمل كده إلا إذا كان هناك فساد أكبر من الذين يعلوه فهو ما عملش حاجة جديدة .

[Falcon Egypt]

السلام عليكم

الاخوه الاعزاء. احنا بنضحك على هذه المواقف السيئة وكاْنها امور

عاديه مسلم بها مثلما نسمع عن استشهاد فلسطينى فما هو الجديد لكن يااخوانى

دى والله ماْساه كبرى .

هل سمعتم عن قضية لويما. شاب اسمر من هايتى عربيد سكير تم القبض عليه

بعد مشاكسات داخل ملهى ليلى وفى القسم ظل يشتم ويلعن فى الضباط حتى طلب دخول

دوره المياه وعندما دخل اخذ يلعن الضابط لانه يقف على الباب فما كان من الضابط

الا انه فقد اعصابه وامسك باحد ادوات التنظيف ودفعها فى موْخره المتهم( لويما(

اما ماحدث بعد ذلك فقد قامت الدنيا. اول شئ قامت المستشفى بعمل تقرير طبى

باثبات حالة الاعتداء . وعلى الفور قامت اداره الشئون الداخليه

للشرطه (Internal Affairs (IA

وهى مثل الشرطه العسكريه او الجهه التى تشرف على مخالفات رجال الشرطه

بسحب المسدس والبادج من الضابط واعتباره موقوفا عن العمل لحين محاكمته

ثم قامت المباحث الفيدراليه (FBI) بالدخول فى التحقيقات حيث اعتبرت ان هذه القضيه

لاتخص الولايه فقط وانما تخص الاتحاد الفيدرالى كله - امن دوله ياساده

وعقدت المحاكمه سريعا اما الحكم فكان كالاتى , الضابط الذى قام بالاعتداء احذ حكما

بالحبس مدى الحياه وحكم على ضابطين ايضا احدهما بثلاثه والاخر بسبعه اعوام كانا بالقرب

من الواقعه ولم يمنعا حدوثها فاعتبرتهم المحكمه مشاركين بالجريمه وايضا لادلائهما باقوال

كاذبه للمباحث الفيدراليه بغرض التغطيه على زميلهم. وطبعا لهم الحق فى الاستئناف لتقليل العقوبه,

والاكثر من ذلك انه قام محامى المتهم برفع قضيه للتعويض عن الاضرار النفسيه والمعنويه للمتهم

المسكين فحصل على مبلغ لااتذكره تماما ولكنه مسبوق بسته اصفار, لم يكن يحلم به ولم يكن باستطاعته

الحصول عليه لو عمل 24 ساعه فى اليوم فهو صايع بالعربى كده.

اعتقد انه طلب تعويضا مقداره 50 مليون اما المحكمه وافقت على 15 مليون

والسوْال هنا . ترى كم ضابطا فى مصر يستحق السجن مدى الحياه؟

نحن فى بلدنا لانحترم القانون ولو كان هناك

احترام للقانون لما حدث مثل هذا وما كان ضابط يقيد مواطنا

و يضرب فيه حتى الموت ثم تكون عقوبته سنه مع الايقاف. هذه مهزله

.وانا لم ادرس القانون لكنى اراها من وجهه نظرى قتل مع سبق الاصرار

والترصد.. اما المشكله هنا هى اننا من علم الامم الحضاره والمعروف انه اينما وجدت

الحضاره وجد القانون واينما وجد القانون وجدت الحضاره وبالتالى يعيب

علينا مانحن فيه. ولكن ماالحل؟ لقد جفت اقلام منظمات حقوق الانسان وقراْت احد التقارير التى

جعلتنى احس بالمراره والغثيان وارسلت المنظمة مئات الرسائل الموجهه الى المسئولين بمصر

وبقى الحال على ماهو. وسيظل هكذا لاننا ليست لدينا الرغبه والاستعداد والعزم للتغيير الا

اذا امسكت ماما امريكا العصا وبداْت تتحرك فى مجال حقوق الانسان , ساعتها سيكون هناك كلام اخر

وللاسف هنالك فقط سيكون الحل. .

[متفـائــله]

انا بصراحه اول مره افتح صفحة الفساد دي تحاشيا لوجع القلب..لكن اهو حصل..و اتساءل هو ده معناه ان مفيش حد معانا هنا يا جماعه ظابط ولا اي حاجه كده في الشرطه يعلق علي الكلام الكبير ده!؟ طيب بلاش معانا, لو احنا فعلا متراقبين تفتكروا الكلام المكتوب ده يأثر في نفسية اي من الخوه المراقبين و اما يستقيل او علي الاقل يتقي الله في شغله!؟

لا حول ولا قوة الا بالله

[se_ Elsyed]

متفائلة كتبت

اتساءل هو ده معناه ان مفيش حد معانا هنا يا جماعه ظابط ولا اي حاجه كده في الشرطه يعلق علي الكلام الكبير ده!؟ طيب بلاش معانا, لو احنا فعلا متراقبين تفتكروا الكلام المكتوب ده يأثر في نفسية اي من الخوه المراقبين و اما يستقيل او علي الاقل يتقي الله في شغله!؟

لا حول ولا قوة الا بالله

والله أنت متفائلة وطيبة قوي يا أنستي العزيزة ، ليه هو ظابط الشرطة المتجبر أو المرتشي مش عارف أنه بيعمل حاجة غلط .. كذلك الموظف اللي شغال ليل نهار زي المنشار فى أخد الرشاوي مش عارف ده كمان ،

لكن المشكلة يا عزيزتي تكمن فى عدم وجود جهات رقابية تتبع معهم مبدأ الثواب والعقاب وبالتالي فقد تمادوا في هذا إلى أن طبع الله على قلوبهم وزين لهم الشيطان سوء عملهم وأصبح ما يفعلوه من منكرات جزء من حياتهم اليومية والذي لا يشعرون معه بأي وخز فى الضمير.

[Excellence]

هل سمعتم عن قضية لويما. شاب اسمر من هايتى عربيد سكير تم القبض عليه

بعد مشاكسات داخل ملهى ليلى وفى القسم ظل يشتم ويلعن فى الضباط حتى طلب دخول

دوره المياه وعندما دخل اخذ يلعن الضابط لانه يقف على الباب فما كان من الضابط

الا انه فقد اعصابه وامسك باحد ادوات التنظيف ودفعها فى موْخره المتهم( لويما(

اما ماحدث بعد ذلك فقد قامت الدنيا. اول شئ قامت المستشفى بعمل تقرير طبى

باثبات حالة الاعتداء . وعلى الفور قامت اداره الشئون الداخليه

للشرطه (Internal Affairs (IA

وهى مثل الشرطه العسكريه او الجهه التى تشرف على مخالفات رجال الشرطه

بسحب المسدس والبادج من الضابط واعتباره موقوفا عن العمل لحين محاكمته

ثم قامت المباحث الفيدراليه (FBI) بالدخول فى التحقيقات حيث اعتبرت ان هذه القضيه

لاتخص الولايه فقط وانما تخص الاتحاد الفيدرالى كله - امن دوله ياساده

وعقدت المحاكمه سريعا اما الحكم فكان كالاتى , الضابط الذى قام بالاعتداء احذ حكما

بالحبس مدى الحياه وحكم على ضابطين ايضا احدهما بثلاثه والاخر بسبعه اعوام كانا بالقرب

لدي تساؤل بسيط..

لو أن لويما. الشاب الاسمر من هايتى العربيد السكير كان إسمه محمد . من مصر أو السودان أو أي بلد عربي أو إسلامي و كان ماشي في حاله لا سكير ولا عربيد ..لا بيه ولا عليه و كافي خيره شره ولا شتم ولا لعن الضابط.. ثم حدث معه أضعاف ما حدث مع لوما ..

هل ستقوم الدنيا أيضا ؟

هل سيكون هناك أصلا أي رد فعل ؟ أم سيكون الحكم عليه هو بالسجن ..

[Cleo]

** لى صديق يمتلك محطة بنزين و قد أقسم لى أ، الظباط (من ذوى الرتب) يأتونه كل حين لكى يبيعه بدفتر البونات الذى تصرفه لهم وزارة الداخلية من أحل تزويد "سيارات الشرطة" و ليس سيارات "ظباط الشرطة" كدة عينى عينك

** لى صديق أخر صيدلى حكى لنا مرة كيف أن ظباط الشرطة (لواءات) يصرفون كل شهر أدوية التأمين الصحى الذى توفره لهم وزارة الداخلية "استخسار" ثم يبيعونه للصيدلات..!!!! فلما اكتشفت وزارة الداخلية ذلك أخذت تختم علب الدواء التى تصرف من خلال التأمين للظباط حتى لا يتمكنوا من بيعها.. فما كان منهم إلا أنهم قاموا ببيعها "قسرا" للصيادلة و على الصيدلى إما أن يبيعها فى الخفاء أو "بالشريط" أو أن يبلها و يشرب ميتها...!!!!!!

و كله من جيبى و جيب حضرتك و الضرايب اللى قد كدة اللى بيتلهفها الحكومة..!!!

[kokowawa1979]

الظاهر فساد جهاز الشرطة طال كل شيئ وآخرها ما نشر اليوم بجريدة المساء - فبدلا من أن تكون عين الشرطة ساهرة لمنع دخول الأطعمة الفاسدة سبقت الشرطة الجميع في هذا المجال وأصبح بحق حاميها حراميها !!!

وإليكم الوصلة :

http://www.algomhuria.net.eg/almessa/today...ts/detail01.asp

[Falcon Egypt]

السلام عليكم

الاستاذ اكسلانس كتب:

            لدي تساؤل بسيط.. 

لو أن لويما. الشاب الاسمر من هايتى العربيد السكير كان إسمه محمد . من 

مصر أو السودان أو أي بلد عربي أو إسلامي و كان ماشي في حاله لا سكير 

ولا عربيد ..لا بيه ولا عليه و كافي خيره شره ولا شتم ولا لعن الضابط.. ثم 

حدث معه أضعاف ما حدث مع لوما .. 

هل ستقوم الدنيا أيضا ؟ 

هل سيكون هناك أصلا أي رد فعل ؟ أم سيكون الحكم عليه هو بالسجن ..                   

شوف يااخى. لاشك انه بعد احداث سبتمبر انقلبت الموازين . ولكن ليس دفاعا عن

الامريكان (كشعب), تخيل لو انه فى مصرقام بعض الافارقة وليكن الاحباش مثلا

وقد فتحت لهم مصر ابوابها فى كرم وحسن ضيافة يعملون ويدرسون بها ثم قامت

مجموعة منهم بمحاوله نسف ابو الهول او معبد ابو سمبل او الاستاد اثناء مباراه

الاهلى والزمالك ولاقدر الله نجحت عمليتهم ومات الالوف او ضاع رمز تاريحى لن

يعوض, ماذا سيفعل المصريون مع كل اسمر يمشى فى الشارع. اقل شئ كفته

بلاش دى. ماذا ستفعل مباحث امن الدوله مع الافارقه الموجودين بمصر للقبض على

الجناه. سيتم وضعهم فى الميكرويف كما اقترح اخونا وايت هارت هذا المصطلح اما

الامريكان فقد افاقتهم الصدمه وبداْوا بمراجعة الاوراق, وكل دوله لها كل الحق فى

ان تضمن امن وسلامه مواطنيها وبكافه الطرق.

كان بامريكا الالوف من الشباب الذى اتى لتكوين وبناء نفسه وكان هناك ايضا الشباب

المستهتر والمسئ لبلادنا من سرقه لكروت الائتمان واللعب القذر فى بوليصه التاْمين

وفى كل مجال وكان هناك الكثيرين ممن

يعيشون بدون اقامات اوحتى مسجلين لدى الحكومه ولاتدرى عنهم شيئا وكانت

العمليه اخر سهبله ثم قبضت الحكومه يدها وتغيتر اسلوبها فى التعامل مع امور

الاقامه والزياره والهجره . وتواجه الحكومه الان نداءات متشدده وهجوم من

عناصر قانونيه واجتماعيه واخرها احد اساتذه القانون وقام بتاْليف كتاب عن

انتكاسه الدستورفى الخروج عن بنوده الاساسيه حتى ان وزير العدل رد عليه

باْن الدوله فى وضع حرج وان الامر يستلزم حودث بعض التجاوزات, وعندما ساْل

وزير العدل الموْلف عن سبب انحيازه للشباب الشرق اوسطى والدفاع عنهم رد عليه

انه يخشى ان تمتد التجاوزات التى تعارض بنود الدستور الى الموطن الامريكى العادى

فهى تبداْ فى العاده مع الاجانب اكثر فئات المجتمع عرضه للتجارب ثم تشمل تدريجيا

فئات الشعب الاصلى وقد تعلم ذلك من خلال احداث التاريخ.

واتذكر انه فى رمضان الماضى كنت معزوما على الافطار عند صديق لى بولايه نيوجرسى

وقبل الافطار نزلت كى احضر شئيا من السياره فلم اجدها, فذهبت الى مقر الشرطه للابلاغ

عن سرقه السياره واثناء عمل المحضر قلت للضابط انا من مصر ولابد من ان اوْمن نفسى

لربما يضع احد فى السياره قنبله او مصيبه واردت ان ابلغكم بمجرد سرقتها فامتدح الضابط هذه المبادره

وقال لى ان هذا هو الصح. اما كبيرهم فكان على مقربه وسمعنى فاْخذنى فى ركن وساْلنى اذا

ماكانت هناك ايه مضايقه من ايه احد لكونى مسلم وشرق اوسطى ولما جاوبت بالنفى قال

لى انه لايجب حدوث ذلك واذا حدث ايه مضايقه فيجب ان اقابله. يعنى الامريكان شعب طيب

ولا تخلط بين الشعب والسياسيين فالمظاهرات المناهضه لحرب العراق لم تتوقف حتى اخر لحظه

فى حين انها كانت تتم فى داخل الاستاد بمصر وتم السماح بالقليل منها من بند منعا للاحراج

وبعد احداث سبتمبر مباشره كنت القى محاضره للطلبه فى ظروف

صعبه جدا وكانت شوارع مدينه نيويورك الجنوبيه ملانه بالشرطه و رجال الحرس الوطنى

فساْلتنى احدى طالبات الدراسات العليا وكانت هذه اول مره ادرس لهم فانا يادوب مخلص دراسه

ووجدت طلبه منهم فى سن والدى الله يرحمه فكنت مشدودا وقالت لى: ماذا استفاد الاسلام

من تحطيم مبنى التجاره العالمى؟

فقلت لها وماذا استفادت المسيحيه من تحطيم المبنى الفيدرالى فى اوكلاهوما سيتى . ان الاسلام برئ

من تحطيم مبنى التجاره العالمى تماما مثلما المسيحيه فهى بريئه من تحطيم مبنى اوكلاهوما سيتى.

كانت هذه اول مواجهه صادفتها ولم تكن مضايقه لى الا انه طريقه السوْال اغاظتنى حينما ركزت

على كلمه الاسلام واعتباره انه المسئول .

عموما فانه بالتاْكيد يوجد تجاوزات فى امريكا ولم تعد راعيه حقوق الانسان بعد احداث سبتمبر

لكن الفرق بيننا وبينهم انك تستطيع ان تاخد حقك اذا اساء لك شرطى امريكى وهناك محامين متخصصين فى

هذه القضايا اما فى بلدنا ...حاول ان تشتكى ضابطا عاملك معامله غير ادميه ...وقلى على النتيجه

على فكره اخى الاصغر كان فى فتره ما وكيلا للنيابه وكان فى زياره الى وكيل نيابه زميل له فى الاسكندريه

فدخل عليه شاب بعد ان اصر على الدخول وعندما ساْله عن سبب حضوره للمكتب. كشف الشاب عن

ظهره وكان به الكثير من الالتهابات الدمويه وقال ان ضابط المباحث ضربه وانه يريد ان يبلغ عن حاله

التعذيب لان هذا حقه فما كان من السيد وكيل النيابه الا انه قام بضربه جوز اقلام وطرده من المكتب

وعندما ساْله اخى عن هذا السلوك قال له: ده عيل حرامى كان بيشتغل فى

الجمرك وطردوه ده ابن كلب وجاى يدوشنا. ياعم ماتشغلش دماغك , سيبك منه

ولاتعليق سوى عذرا على الاطاله.

[impossible]

فساد الشرطة

ما قبل الشرطة

اليومين دول بقت كل الامور منتظمة وعلى خير ما يرااام

الطالب وهو لسة داخل الكلية (شرطة حربية فنية عسكرية معهد الامنااااء................)

معدوش بيسبوة لاى ظابط صغير يستغلة وياخد منة مبلغ عشان يلتحق بكلية الهناااااااا

بقى فية تسعيرة

تخيلو التسعيرة كاام للراس

كلية حربية؟؟؟؟

كلية شرطة؟؟؟؟

حتى معهد الامناء؟؟؟؟

اخويا كان نفسة يدخل فنية طلعوة غير لائق نهاءياا

دخل علوم واتخرج وحب يدخل حربية

بابا طيب وعنانياتة قال ومالو ندفع ولو لغاية 500 جنية

مش هقولكو دفع كام هخليها مفاجاة بعد ما عرفت التسعيرة

هى الدفعة كااام لما ياخدو الفلوس دى من كل واحد بيودو الفلوس دى فين

بيقدرو ينامو او يمسكو الفلوس دى باديهم ازااااى

[kokowawa1979]

impossible كتبت :

تخيلو التسعيرة كاام للراس  

كلية حربية؟؟؟؟  

كلية شرطة؟؟؟؟

شوفي ياأخت مستحيل أولا حلوة حكاية الراس دي

ثانيا : مكتب كمال الشاذلي في الباجور الذي يديره أولاد أعمامه التسعيرة كالآتي :

كلية الشرطة 30000 ( ثلاثون ألف جنيه ) بالتمام والكمال منها 10000 مقدم والباقي بعد حلق الراس يعني دخول الكلية وحلاقة الشعر أول مرة !!!!

وكيل النيابة 40000 ( أربعون ألف جنيه ) 20000 مقدم والباقي بعد أداء اليمين القانونية

الكليه الحربية ودي علشان مافيهاش هبر فالتسعيرة 10000 جنيه فقط

لكن شهادة لله مكتب كمال الشاذلي يعيد المبالغ المقدم في حالة عدم التحاق الطالب بالكلية المطلوبة يعني إذا اكتشفوا في لجنة كشف الهيئة إنه عنده شلل أطفال أو عينه الاتنين شمال أو انه لسانه مقطوع عدا ذلك فهو مقبول مقبول ياولدي

لكن حزري فزري مين شريك كمال الشاذلي ( باتكلم جد صحيح ) !!!!

[متفـائــله]

والله أنت متفائلة وطيبة قوي يا أنستي العزيزة ، ليه هو ظابط الشرطة المتجبر أو المرتشي مش عارف أنه بيعمل حاجة غلط .. كذلك الموظف اللي شغال ليل نهار زي المنشار فى أخد الرشاوي مش عارف ده كمان ، 

لكن المشكلة يا عزيزتي تكمن فى عدم وجود جهات رقابية تتبع معهم مبدأ الثواب والعقاب وبالتالي فقد تمادوا في هذا إلى أن طبع الله على قلوبهم وزين لهم الشيطان سوء عملهم وأصبح ما يفعلوه من منكرات جزء من حياتهم اليومية والذي لا يشعرون معه بأي وخز فى الضمير""

انا مش طيبه اوي يعني!(وش مكسوف) بس فعلا عندي امل ان الكلام بتاعنا هنا ممكن يغير اي من اخوانا اياهم لو صادف و قرأه ..و ربنا الهادي!

اخ اسد - تعيش و تاخد غيرها في منطقه غيرها!! يعني لوماكنتش حتي دفعت العشره جنيه دول, كان حيحصل ايه اكتر من المخالفه يعني!؟ انما المشكله ان احنا دايما بنسكت و نستحمل!! 

كنت مره مع واحد قريبي و رايحين ندغدي في شارع سوريا..و ده شارع محترم و بتاع ناس كبرات..المهم قريبي ده كان حالق شعره علي الموضه (زلبطه) فاعطي احياء بانه ظابط و كان السايس واقف علي الرصيف التاني من ركنتنا..فجه قريبي زعق بصوت عالي كانه فعلا ظابط و قال للسايس انزل مالقيش العربيه اللي قدامي دي هنا!!! انا صعقت لوهله و انفجرت في الضحك..بس بصراحه مش فاكره اذا كانت العربيه لسه موجوده ولا لا لما نزلنا!! لكن ده يعطي الانطباع المؤسف لما فيه بلدنا (وش حزين)