عقد عمل محاسب في السعودية ( الرياض ) رايكم بليز

[عماد حمدي]

السلام عليكم ورحم الله وبركاتة

الي أعضاء المنتدي الكرام ,,

تحية طيبة

أنا كنت عايز أخد رايكم في عقد عمل جه لواحد صاحبي ويهمني أمرة أوي لاني أكتر من أخ

-- معلومات عن صديقي --

- خريج كلية تجارة - جامعة المنصورة - قسم المحاسبة - مايو 2007

- لدية شهادات في السويق والتجارة الالكترونية ومهارات البيع والمحاسبة الالكترونية والرخصة الدولية لقيادة الحاسب الالي ومهارات إدارة الاعمال والانجليزي تمام واستخدام الاكسيل والاكسيس تجارياً ( نفس الدورات بتاعتي بالظبط )

-- معلومات عن عقد العمل --

- تمت المقابلة الشخصية مع صديقي وقد نجح بفضل الله في الاختبار وكانت نصوص العقد كالتالي :-

مقدمة :- عمل محاسب في مؤسسة أحمد ابراهيم المطرودي ( لإستيراد قطع غيار السيارات وتصنيعها وصيانتها ) بالرياض

- المرتب 1500 ريال شهرياً قابل للزيادة حسب الكفاءة في العمل

- السكن علي حساب المؤسسة

- المأكل والمشرب علي حساب صديقي

- العلاج علي حساب المؤسسة

- مدة العقد عامان فقط

- الاجازات ( غير متذكر الان لكن غالبا ً بعد سنة تقريباً لية كام يوم كدة )

- بعد عامان لية تذكرة سفر علي حساب المؤسسة

ياريت سيادتكم توضحوا ليا الأتي :-

1- طبيعة وسمعة هذة المؤسسة في الترقي للمناصب الوظيفية

2- هل هيزيد المرتب دة ولات هيفضل كدة انا عارف انها تفرق من شركة لشركة بس انا بتكلم علي دي بالخصوص يقدر المترب يزيد قد اية وبعد قد اية انشاء الله لان صديقي يستحق أكثر من ذلك لان خبرتة كويسة في المجال دة .

3- هل العقد دا كويس خاصة ان صديقي حديث التخرج

4- صافي المرتب بعد الماكل والمشرب مع العلم انهم في حد الاعتدال

منتظر ردكم إنشاء الله

[زعلان]

1500 مبلغ بسيط جدا بس اذا قبلناه لنناقش باقي البنود 1_ الزيادة السنوية كام في المية فكلمة كفاءة الموظف كلمة مطاطة لا معنى لها لابد من زيادة سنوية ثابته بخلاف ما يقدرونه يعني على الاقل 10% (يعني لو 1500 يبقى يزيدة 150 ريال بس ولو 5% يبقى 75 ريال زيادة سنوية ) بس نرجع نقول ان الراتب المفروض يكون مش اقل من 2500

السكن ما هو نوع السكن سرير في غرفة غرفة في شقة غرفة بحمام بدون غرفة مجهزة استديو مجهز بحمام و مطبخ و مفروش شامل مصاريف الكهرباء و المياه و البلدية

المواصلات هل ستتكفل الشركة بايصاله من والى مقر عمله

العلاج يشمل ماذا وهل هو نظام تأمين صحي ام ان الركة متعاقدة مع مستشفى وهل يشمل الدواء وهل له حد اقصى لو لا قدر الله احتاج لعملية او ماشابه

عدد ساعات العمل

الاجازات الاسبوعية و نظام الاجزات الوطنية و الاجازة السنوية و نظام سعات العمل الزيادة

تذكرة السفر يجب ان تكون سنوية

[MZohairy]

متنساش يا زعلان انه معندوش خبره اطلاقا

غير ان الشركه انا مسمعتش عنها خالص يعني غالبا مش شركه كبيره

و بالتالي 1500 ريال غير السكن من شركه صغيره لمحاسب عديم الخبره ممكن تكون طبيعية

[se_ Elsyed]

متنساش يا زعلان انه معندوش خبره اطلاقا

غير ان الشركه انا مسمعتش عنها خالص يعني غالبا مش شركه كبيره

و بالتالي 1500 ريال غير السكن من شركه صغيره لمحاسب عديم الخبره ممكن تكون طبيعية

1500 طبيعية يا زهيري ؟

ده هو الإنتحار بعينه ...

أولاً أنا متأكد إن مكتب التسفير في مصر لازم يشيله حاجه .. يعني مش هايدفع أقل من 5 آلاف جنيه وهو لسه على فيض الكريم في مصر

يعني على ما ييجي هنا وبعد مصاريفه والذي منه ويا سلام بقى لو كان بيدخن سجاير ... ممكن يتبقى له حاجه بتاع 500 ريال يعني 750 ج ... ولا قدر اله لو حصل له ظروف او لحد من عائلته ف مصر وأضطر يصرف ... يبقى اللي هاتبنيه النمله في سنة .. هاياخده الجمل في خُفه ..

المبلغ ده لا تجرؤ مؤسسة في السعودية إنها تعرضه على لا مؤخذه هندي اللي إحنا بنقول عليهم أقل رواتب ... ولو فرضنا قبل الهندي يبقى لا مؤخذه مؤهله بالكتير قوي دبلوم تجاره ويادوب بيدخل بيانات محاسبية وما سمعش قبل كده عن حاجه إسمها قيود او ميزانية او تسويات

وعيب قوي إن واحد بالمؤهلات دي والمهارات دي حتى ولو كان حديث التخرج إنه يقبل مرتب هزيل مثل هذا ... ومعذرةً حتى لو قبله غيره وممكن يكون زميل من زمايله بيحسبها على اساسا الريال أبو جنيه ونص وإنه هايصرف هنا 200 ريال قول 400 لو بحبح إيده بالكتير قوي في الشهر وأوفر الباقي - ده في اضغاث الاحلام طبعاً - .. يبقى ذنبه على جنبه .. وهاييجي هنا في النار وفي الزمن ده ويشوف اللي عمره ما شافه ..

إنت عارف ... المرتب ده كان ممكن يقبله زمان ... يعني قول من 5 سنين ... أما دلوقت ... فقول على الدنيا السلام ... لإن في حاجة إسمها توطين الوظائف أي إحلال ابناء الوطن بدلاً من الاجانب لحل مشكلة البطالة ... وكمان غلو المعيشة ... وكمان اللي عمره ما هايسمع عنه إلا من إنسان صادق ومجرب وهو صعوبة تغيير المهنة وما يترتب عليها من بلاوي سودا .. وصعوبة إستخراج رخصة قيادة وصعوبة عمل تأشيرة لزوجته لو كان متزوج .. وده كله بسبب المهنة الغير مناسبة .... هاتقولي يعني إيه ؟

يعني هل صديقك لو قبل الوظيفة دي .. فهل هو على علم بالمهنة اللي في التأشيرة إيه ؟

لأ طبعاً وأنا عارف كده

أولاً مهنة محاسب دي متسعودة وممنوعة على الأجانب ...

ثانياً معظم المهن المفتوحة دلوقت تتعلق بالحاسب الألي وعلومه ... على سبيل المثال : مهندس حاسب آلي ، محلل نظم وتخيل إن مهنة مبرمج كمبيوتر إتسعودت وبقت ممنوعة للاجانب ...والمهن اللي مسموحه لازم تتوافق مع الهادة الدراسية يعني من الأخر لازم يكون معاه بكالوريوس هندسة قسم حاسب آلي .

إذن لو قبل بقى المهنة اللي وأنا سايب إيدي دلوقت عارف إنها مهنة عامل عادي أو عامل شحن وتفريغ ... يبقى هاييجي يتظبط هنا ويشوف أيام سودا

وزي ما قال أخونا زعلان ... لو المؤسسة إتنططت وإتمطعت ووعدته بزيادة سنوية قدرهاً 10 % ... تفتكر بعد 5 سنين يوصل كام ؟

وأتحدى وأنا أهو وإنت أهو .... إن المؤسسة تعطي له وعد كتابي بنسبة الزيادة السنوية ...

كل الكلام بيبقى كلام ليل ومليان زبدة وعلى البر وإنت لسه في مصر ... ويادوب ساعتين تلاته وكل ده يتلحس وييجي هنا يلاقي الوش البلاستيك .. وإذا ما كانش عاجبك يا حبيبي الطيارة اللي جابتك لسه مستنيه في المطار ...

خلي صاحبك يا عم عماد يا حمدي يفضل في مصر ويستحمل ويتمرمط شويه ده لسه ما عندوش 21 سنة .. ولما يكتسب خبرة هايقعد رجل على رجل ويضع شروطه .

[رمضان]

انا طبعا ضد انه يوافق على راتب بالشكل ده يعني ايه 1500 ريال دول ولا شيء ممكن يصرفهم كلهم اساسا وبالنسبة لحكاية الزيادة دي انسى يا عمرو واذا وفر شيء هيصرفه في تجديد الاقامة والمصاريف اللي بتطلع من تحت الارض ومن غير حساب وكمان المعيشة اصبحت غالية في الخليج والاسعار كل يوم في ارتفاع

[زعلان]

انا اتفق مع س س بس يا ريت تقولنا يا سي السيد هو المفروض يقبل بكم على اقل تقدير كمرتب+ مميزات

[se_ Elsyed]

بص يا عم زعلان

في مثل صعيدي بيقول :lol:

no gain ... without pain

يعني أي مكاسب لابد أن يقابلها تضحيات ...

لكن لما الموضوع يتقلب تضحيات في مقابل تضحيات برضوا ... يبقى قلته أحسن ...

أنا ممكن أقول إن الراجل ده يقبل بهذا الراتب الهزيل لو كان جاي يشتغل في شركة كبيرة ومعروفة زي أواركل ... مايكروسوفت ... بن لادن ... عبد اللطيف جميل ... أو أي إسم من الأسماء الكبيرة اللي الواحد يدفع فلوس عشان يشتغل عندهم لو كان ما عندوش خبره على اساس إنه بيضحي من أجل إكتساب الخبرة ...

لكن مع إحترامي لهذه الشركة فهي كده كبيرها محل قطع غيار سيارات لإن مستحيل شركة كبيرة ومحترمة يبقى عندها salary scale لوظيفة محاسب حتى لو حديث التخرج بهذا الراتب الضعيف ...

أما لو كان من الامر بُد وهايرمي نفسه في النار ... يبقى لازام الرمية تستاهل .. يعني يقبل على الأقل بـ 2500راتب اساسي وسكن متوفر ومواصلات وتذكرة سنوية واجازة 30 يوم وبدل إتصال موبيل وتأمين صحي طبعاً ....

ومرة أخرى ومليون ... والله العظيم اللي بيرخص نفسه وبيقبل بالفتات لازم يندم في الأخر .... واللي بيعزز نفسه حتى لو كان حديث التخرج ولا لسه ما تخرجش حتى ، بيُجبر الناس على إحترامه وتقديره وبيشعروا إنه مش رِميه او واحد ضاربه السلك ...

لكن من يسمع ومين يتعظ ده بالعكس ممكن ناس تزعل مننا ويقولوا إنتوا بتتكلموا كده عشان إيديكو في الميه الباردة ..

وفي الأخر كل واحد عقله في راسه يعرف خلاصه

[MZohairy]

متنساش يا زعلان انه معندوش خبره اطلاقا

غير ان الشركه انا مسمعتش عنها خالص يعني غالبا مش شركه كبيره

و بالتالي 1500 ريال غير السكن من شركه صغيره لمحاسب عديم الخبره ممكن تكون طبيعية

1500 طبيعية يا زهيري ؟

يا سيسو

في دكاتره مصريين بييجوا على 1500 ريال مع توفير سكن عزاب

واعرف اكتر من حاله

واللي رماهم على المر اللي امر منه :lol:

بس انا قصدت بكلمة طبيعيه هو ان الشركه الصغيره لما تيجي تدي محاسب عديم الخبره حيبقى ده السعر الطبيعي لهذه الحاله

انما لا جدال على ان الراتب ضعيف جدا طبعا

ولكن هناك من يحلم به

سيه لا في مسيو bnd5::

[عماد حمدي]

انا والله رايكم بجد مقتنع بية مليون المية بس بصراحة مش رضيت اقول لصاحبي كدة علشان ميقولشي أني بحقد علية او كدة , وحاولت اني المح لية بكدة بس مقدرتش لانه زي اخويا اوي

فعلاً المرتب ضعيف جدا ً جدا ً

في حاجة حصلت النهاردة الشركة اتصلت بية وقالت لية يجيلها علشان التعاقد وكدة صاحبي راح لقي التاشيرة لازم يكون نجار مسلح ياعني لازم يغير بطاقتة الي نجار مسلح علشان يسافر .. مش عارف بقا اية الكلام دة عادي ولا اية الظروف ..

عاماً اللي فهمتة منكم ان أقل شيء 2500 ريال مرتب شهري طيب تمام اوي كدة .. بعد ما الواحد يصرف وكدة ممكن تقولوا الباقي يكون كام .؟؟؟؟؟؟

مرة تانية بشكر كل اللي تعبم نفسهم وردوا عليا لان فعلاً أمرة يهمني أوي

جزاكم الله كل خير

[se_ Elsyed]

بالصلاتو عالنبي ... لا سحر ولا شعوذة

بص أنا قلت إيه في الأول

وكمان اللي عمره ما هايسمع عنه إلا من إنسان صادق ومجرب وهو صعوبة تغيير المهنة وما يترتب عليها من بلاوي سودا .. وصعوبة إستخراج رخصة قيادة وصعوبة عمل تأشيرة لزوجته لو كان متزوج .. وده كله بسبب المهنة الغير مناسبة

إذن لو قبل بقى المهنة اللي وأنا سايب إيدي دلوقت عارف إنها مهنة عامل عادي أو عامل شحن وتفريغ ... يبقى هاييجي يتظبط هنا ويشوف أيام سودا

وإنت جيت يا عماد أضفت نقطة

راح لقي التاشيرة لازم يكون نجار مسلح ياعني لازم يغير بطاقتة الي نجار مسلح علشان يسافر

[زعلان]

لو قبل بحكاية نجار مسلح ده يبقى يستاهل كل الي يجرى له

سي السيد هو في ناس استغلالية و معندهاش ضمير للدرجادي ( اقصد اصحاب الشركات ده دول عايزين حد يشتغل بالسخرة بلقمته ونومته)

[se_ Elsyed]

لو قبل بحكاية نجار مسلح ده يبقى يستاهل كل الي يجرى له

سي السيد هو في ناس استغلالية و معندهاش ضمير للدرجادي ( اقصد اصحاب الشركات ده دول عايزين حد يشتغل بالسخرة بلقمته ونومته)

بص يا عم زعلان

العملية عرض وطلب ...

لو واحد صاحب عمل مجنون وبيعرض مرتب وقدره ريال واحد فقط لا غير لوظيفة طبيب مثلاً ... راح واحد اجن منه قِبل ... يبقى خلاص يا دار ما دخلك شر .

وأختلف معاك هي ليست إنعدام ضمير ولا حاجه

لإن كل دول الخليج معطيه أولويه لتعيين أبناء البلد ... ومزنقه قوي على إصدار التأشيرات الجديدة للاجانب ..

فبالتالي اللي محتاج محاسب ولا مندوب مبيعات بيبقى مضطر يجيبه على مُسمى تاشيرة متوفره عنده وهي في الحقيقة غير طبيعة عمل الموظف ..

والأجنبي الجديد ما بيباش عارف يعني إيه نجار مُسلح ولا حداد مسلح حتى

لكن إنعدام الضمير بقى بييجي من تزويد الموظف بمعلومات غير صحيحة ... كسهولة تغيير المهنة ... او إن المهنة دي مش هاتأثر عليه في حاجه ويعمل له البحر طحينه .. إلخ .. وده خطأ وعيب وعدم أمانة طبعاً

وزي ما قلنا إن لو الواحد سأل وإطقس من بلده وعرف الصعوبات دي .. وصمم ييجي ... يبقى مش من حقه إنه يفتح بؤه ويقول تلت التلاته كام أو يشتكي حتى .

[زعلان]

بص يا سي السيد انا اسمع عن موضوع التوطين وعارفه بس الي سمعته من اشخاص حصل معهم هذا الموضوع انهم بيحطولهم مهن اعلى لم تطالها يد التوطين ......... وده انا شفته بنفسي يعني شفت اقامتهم مكتوب فيها ايه و انا عارف هو خريج ايه يعني اداري بيحطوه مهندس

[المكافح]

يا عم عماد حمدى اوعى تخللى صاحبك ييجى البلد دى على الراتب دة ياعم الحاج عم تجربة شخصية اللى بيتنازل فى الاول ويقول يبقى ربنا يسهلها بعد كدة بيفضل يتنازل على طول ولغاية لما يروح خالى الوفاض زيى كدة

نصيحة اخوية الراتب دة لا هاينفعة النهردة ولا بكرة ولا حتى كان ينفعة امبارح متطلبات المعيشة فى السعودية بقت اغلى من الاول نظرا لغلو الاسعار واللى موجود معانا هنا فى السعودية وخصوصا الرياض عارف الموضوع دة

اوعى ييجى يا عمدة بالراتب دة ...... اوعى ....... ماشى

[عماد حمدي]

جزاكم الله كل خير ... وبشكر اللي قام بالرد .. بجد انا نفسي استفدت كتير من الحوار الشيق دة ... فعلاً انا قولت لصحابي وهخلية يقرا الحوار دة بنفسة علشان يكون علي علم تام ...

ويبقي أنا كدة عملت اللي عليا وهوة حر القرار في الأول والأخر في إيدة ؟؟

جزاكم الله كل خير

[بحرالاسلام]

بسم الله الرحمن الرحيم

والصلاه والسلام على سيدنا ونبينا محمد صلى الله عليه وسلم

طب ياجماعه انا كنت عايز اسألكم انا برضه محاسب حديث التخرج بس واخد دوره أنجليزى وكمبيوتر وخدت دوره محاسبه وخدت عليها شهاده خبره سنتين

وأتدربت فى بنك فيصل لمده 6 أشهر وبشتغل محاسب فى شركه دلوقتى وأتقدمت لشركه تسفير ايه أقل مبلغ ممكن أوافق عليه

[vipwithyou]

من 2000 الى 2500 ريال

[عمرو طمان]

انا يمكن ردى متأخر شوية بس على ما قريت الموضوع واقول لكل اللى انتقدوا المرتب وحجم المؤسسة او الشركة اللى الاخ هايشتغل فيها انا كلام للى هايقرا الموضوع او اى حد عاوز يسافر ومش لاقى حد ينصحه

سيبكم من كل الكلام ده واسمعو من واحد مجرب وعايش التجربية الصح مش التجارب الغلط بتاعتهم دى انت يابنى لو فعلا ناوى تكافح وتكسر كل القيود اللى قدامك ... لو ناوى تبنى مستقبل كويس ... لو ناوى تخلص من مصر ومن الشغل القهرى والمزل اللى فى مصر ... لو ناوى تكون انسان صبور وتبدأ من الصفر يبقى لازم توافق وتسافر والايام دول وماحدش بيفضل على حاله انا مثلا بقالى 10 شهور بس مسافر انا محاسب وسافرت على مهنة عامل زراعى ودى من 3 مهن ملعونين هنا ومابيتغيروش وكمان سافرت زيك على 1500 ريال ومش هاقولك ماكنتش شغال فى مصر لأ كنت شغال وفى اكبر شركة غزل ونسيج فى مدينة العبور بس الظلم والقهر اللى كنت بشوفه هو اللى خلانى وافقت على العرض ده وصممت انى بخبرتى واسلوبى اغير وضعى والحمد لله دلوقتى المهنة اتغيرت الى محاسب عام والمرتب بقى 2000 من اول شهر جيت فيه وهايزيد بعد انتهار اول سنة وبعمل دلوقتى استقدام لزوجتى وابنتى والحمد لله طالما الواحد عنده مبدأ وقواعد ماشى بيهم يبقى مافيش مستحيل الواحد فى اول حياته لازم بالبلدى كده يتمرمط ولا انت عاوز تسمع كلامهم وتستنى بقى الفرصة اللى الله اعلم هاتيجى ولا لأ ولو جت هاتكون بعد كام سنة وربنا قال (وعسى ان تكرهوا شيئا وهو خير لكم وعسى ان تحبوا شيئا وهو شر لكم ) انت تسافر وتتكل على الله وهنا ربنا يسهلهالك وانا اعرف ناس كتير جدا منهم قرايبى واصدقائى وناس عرفتهم هنا كل دول اللى حالته اتعدلت زى كده وبقى ماشى فى خط مستقيم وتحسن مستمر واللى كان بعد الشغل بتطلع يدور على شغل تانى واللى خد تأشيرة معاه وهوا نازل بمرتب اعلى وصدقنى هنا احسن من مصر مليون مرة فى كل حاجة وموضوع غلو الاسعار ده ماتقلقش منه لانه طبيعى ومصر يعنى هيا اللى كانت مصاريفها رخيصة ماهى كلها مصاريف من غير دخل كمان

[se_ Elsyed]

يا أخ عمرو أنت تتحدث عن حالتك الفردية أنت .., ومع ذلك حكمت على تجاربنا إنها

سيبكم من كل الكلام ده واسمعو من واحد مجرب وعايش التجربية الصح مش التجارب الغلط بتاعتهم دى

يا سبحان الله !!!!

مع إن بقى لك 10 شهور في السعودية ..... وبيننا ومنهم اللي ردوا بقى لهم 10 سنين هنا ... يعني كلامهم لابد أن يُعتد به ..

وحكمت على كل الشغل في مصر إنه مُذل ومقرف وكإننا بنعيش في جونتانمو وكإنك قضيت عمرك في مصر ولم تشاهد تجربة واحده ناجحة ؟!!!!!

وبعدين رجعت ونصحت الراجل إنه ييجي ... مع إن إنت جاي على تأشيرة بيقال عليها حُرة ... يعني مش شرط تشتغل عند كفيلك ... ومع ذلك أعطيت لنفس الحق إنك تنصحه يقبل بالراتب الضعيف اللي لو إتنطط في السنتين تلاتة الجايين مش هايزيد أكتر من 20 % على راتبه اللي جاي عليه .... يبقى فين التدرج وفين الفرص التانية ؟ !!!!!

وبالله عليك أنا منتظر منط تقول لنا غيرت مهنة إزاي وإتكلفت قد إيه وعملت إستقدام إزاي ؟ لإن دي هاتفرق كتير جداً في الحكم على تجربتك

[HDarwish]

زمان قبل ما اسافر واحد نصحني وللأسف ما أخدتش بنصحيته .. قاللي يابني الغربة لها ثمن وثمنها غالي قوي شوف وفكر شوية لو هتجيب الثمن ده يبقى من قلبي بقولك سافر وما تترددشي لكن لو مش جايبه الثمن ده يبقى إنت كده خسران وأحسن لك ما تسافرش

الغربة لها ثمن وثمنها بُُعدك عن ناسك وأهلك واصحابك وكل حاجة حلوة في حياتك

اللي مع مرور الزمن هتلاقيك بتفقد كل حاجة حلوة في حياتك

نصيحة تانية قالهالي واحد تاني وبرضه ما عملتش بها وهي إن نجاح الغربة نجاح الفاشل بمعنى إن اللي ما نجحشي في بلده بيدور على النجاح ده بره بلده

أنا عارف مهما قلت ومهما نصحت ما حدش هيسمع للنصيحة لإن دايما الإنسان بيحاول يحلي المجهول ويتخيله على مزاجه وده سببه بغضه وكرهه للواقع اللي هو فيه وعمره ما بيتصور إن ممكن الخيال ده أسوأ من الواقع

اسف إني طولت عليكم بس كان لازم من المقدمة دي

أخي العزيز عماد حمدي من واجب الإخوة و(أولاد الحتة) لإني من المنصورة برضه نصيحة أخوية

صاحبك لسه يادوب في اول الطريق خليه يستحمل شويه على الاقل سنتين ثلاثة ياخدهم كخبره في البلد وبعد كده فعلا هيحط رجل على رجل ويطلب الراتب اللي هوه عايزه صدقني البهدلة داخل مصر أهون كثير من البهدلة كثير خارج مصر وبتفرق كثير مع الواحد وده عن تجارب واقعية

يعني ليا أكثر من صديق ومن المنصورة برضه ومن نفس الكلية ونفس الجامعة وسافروا في توقيتات مختلفة

يعني صديقي الأول إتصل عليا من مصر وقاللي هييجي على موظف أمن وبعد كده هيحول بعد سنة وكده يعني وبرغم كل نصايحي ومكالماتي المتعددة له ومحاولة إقناعه إلا انه صمم وجيه على الوظيفة دي مش عايز ادخل في تفاصيل واقولك على المهانة والذل اللي شافهم واللي كانوا هيخلوه فعلا يرجع تاني بس قال يصبر وما اكدبش عليك فعلا الشركة دي اعطته التحويل بعد سنة ولكن بدفع فلوس كثيرة تزيد عن اللي حوشه طول السنة بس لإنه ما فيش معاه خبرة طبعا مالقاش شغل إلا انه يشتغل في مطعم وطلع من حفرة نزل في دحديرة على راي المثل وطبعا حياته كلها ندم وياريتني كنت سمعت كلامك من الأول يا حسن والوقتي بينصح الناس بنفس نصيحتي

صديقي الثاني صبر وقعد في مصر واشتغل محاسب في كهربة طلخا وأخد خبرة تعالى اتفرج عليه الوقتي ما شاء الله اول ما جيه اشتغل على 250 دينار وما عجبوش عرضت عليه شركة تانية شغل وطلب 350 ووافقوا عليه ليه لإنه اخذ خبرة واستحمل شوية في مصر قبل ما ييجي

طولت كثير

بس يارب أكون افدتك ولو بالقليل

تمنياتي بالتوفيق لك وللجميع

وتحياتي إليك وتنويهي لإخلاصك وحبك لصديقك