حكومة ريان يافجل.........

[mnman]

شعب المحروسة الطيب اصبح لايبالي بتصريحات الحكومة. ماهو كل يوم والتاني عشرات التصريحات في الصحف و التلفزيون.. ادي وزير التعمير يصرح ان الصحرة عمرانة باهلها من البدو الرحل.. ووزير الاسكان يصرح ان المساكن مرترتة بس المصريين مالهمش نفس يسكونوا .. ووزير التموين يصرح ان الزيت والسكر متوافر بسعر الدعم بس المصريين بيحبوا الفشخرة و بيسبوة وبيشترو من السوبرماركت... ووزير التعليم يصرح ان سنة رابعة حتتلغي و حيضم طلبة الاعدادية علي طلبة سنة خمسة علشان هما شهادة ومفيش حد احسن من حد.. ووزير الاعلام يصرح ان اعلامنا اعلام الريادة و برامجنا مفيش احسن منها وان مصر هي صوت العرب... ووزير الزراعة يصرح ان محصول القطن اكلتة الدودة علشان الفلاحين اهملوا و مأجروش بودي جاردز لحماية المحصول...ووزير البيئة يصرح ان السحابة السوداء ظاهرة كيمو فيزيقية تحدث عند حرق قش الرز و مصر من رواد مكافحة السحابة السوداء... ووزير الصحة يصرح ان البلهارسيا اختفت من مصر و ان المستشفيات الحكومي علي اعلي درجة من التجهيزات ....ووزير الخارجية يشجب و يشجب ... ووزير المواصلات يصرح ان قطارات الصعيد ادمية 100% وان بعض دول اوربا قررت استيراد عدد من هذة القطارات علشان زحمة المصيف... و غيرة وغيرة وغيرة حتي اصبحنا محاصرين بألاف التصريحات والتي لا اساس لها من الصحة.. و الغريب في الامر ان حكومتنا الرشيدة مبتفكرش تشوف ردود فعل الشارع لان من الاخر مبيهمهاش و المصريين الظاهر اصبح عندهم مناعة ضد تصريحات الحكومة فلا احد يعترض وان كان فيكون بابتسامة مريرة تعبر عن مدي حسرتة باستخفاف الحكومة بعقلة.. و اعتقد لو الحكومة اصدرت قرار فحواة ريان يافجل ما اعترض الشعب الغلبان...

والان ظهر النت و اصبح هناك مجموعة من الرواد للمنتديات وذلك للنقاش و ابداء الرئ و كلي امل وعشم ان ينتهي كل نقاش بحل لمشكلة وليس بملل الرواد....

مصري حتي النخاع.....

[Cleo]

النهاردة قريت تصريح فى الأهرام أن الحكومة مش هاتزود أسعار الكهربا.....

عايزين الحق؟؟؟؟؟؟

اتشائمت قوىىىىىىىىىى

[Faro]

المعلم محمود المليجي حاول التقرب إلى بائعة الفجل - تحية كاريوكا - الجميلة بسؤالها ... مافيش أعرض من كده - ورق الفجل - يــــــــــا جميل ... فكان الرد ... أفـــــاك يــــاحلو :oops:

من منهم يمثل الحكومة و من يمثل الشعب ؟؟

[Sherief AbdelWahab]

حرام عليك يا منمان...نسيت وزير الملابس الغذائية...عفوا التنمية الإدارية...بتاع "قلوبنا معكم"...اللي ح يعمل نقلة نوعية بتصريحاته عن تشغيل مليون شاب...اللي ح تدمر أزمة البطالة من النخاع بدليل أن عدد العاطلين مليون وشوية طبقا لتسعيرة الحكومة...وهي تصريحات تتضاءل أمامها تصريحات محمد هنيدي في مسلسل مع وائل نور يحذر فيها من ضم شهر 7 و شهر 8 إلى شهر 1!!!

خلص الكلام