كاتب كويتي: سعر المواطن المصري لا يتجاوز ثمن غسالة كوري

[zain]

هنا موضوع المقاله التى كتبها الصحفى الكويتي التى يهين فيها الشعب المصرى

http://www.masrawy.com/News/2007/Egypt/Pol...iti_writer.aspx

[aimen]

طيب وايه الغريب ؟ هو احنا لنا سعر اصلا ؟ والله انا شايف ان سعرنا غلى شوية ( 2000 جنية ) يعمى بدل ما كان الواحد من امثالى ( يعادل ربع حمار بقى الحمدلله يمكن نصف حمار ) ..اذا كنت مهان فى بلدك هل تتوقع ان يكرمكوك خارجها ..انا شايف فعلا ان الراجل مغلطش كثير ؟ انت بتشوف بتوع الشرطة مثلا بيتعاملوا مع الناس ازاى ؟ اعتقد ان الكتاب اتملى خلاص ...اعتقد ان سلك الأمن كله عاوز الحرق وربنا ينتقم منهم ...اللهم ارنا فيهم وفى المسئولين عظائم قدرتك وانتقم لنا منهم يارب

[se_ Elsyed]

لو سيبنا الموضوع الأصلي وهو إنتهاكات جهاز الشرطة في مصر .. ومسكنا في إن كويتي بيقول وسعودي بيتكلم .. يبقى مش هانخلص ....

بس الموضوع ذو شقين :

1- الكويتي ده مش من حقه يقول كده والأفضل إن كل واحد يخليه في حال بلده وفي حاله بدل ما تتحول الأمور إلى ردح وتفاخر بالأنساب والأموال ... لإن كلنا في الهم عرب وكل بلد فيها اللي مكفيها

2- علينا نحن المثقفين ان نُكون قوى ضغط لإصلاح أحوال الشرطة ولإعادة كرامة المواطن المصري البسيط اللي مش مسنود واللي من حقه يمشي مرفوع الراس في بلده من غير ما حد يتنطط عليه لمجرد إنه لابس بدله ميره أو شغال في جهاز له سلطة ونفوذ .

[aimen]

طيب رأيك نعمل ايه يا س.س ؟ اسمع ان هناك خدمة للإبلاغ عن انتهاكات رجال الشرطة ( والله يقال انها بدأت تجريبا فى المملكة هنا ) هل فى مصر حاجه زيها ؟ ازاى نكون وسيلة ضغط ؟

[se_ Elsyed]

لا يا أيمن ... الراجل ماعندوش حق ... أنا أسف لسببين :

1- الشعب المصري من اكثر الشعوب ديمقراطيةً في المنطقة ... لا جدال في ذلك ... ونحن وصحافتنا وإعلامنا بننتقد التخين في بلدنا من أول رئيس الجمهورية وعياله لحد أصغر موظف .... أما بقية الشعوب العربية فحتى النُكتة السياسية فلا يستطيع أن يقولها واحد منهم بينه وبينه نفسه .

2- لكن في نفس الوقت ... لما بننتقد أوضاعنا لازم يبقى عندنا مبدأ " أنا أدعي على إبني وأكره اللي يقول آمين " يعني لو حد من العرب أياً كان إتكلم في موضوع يخص بلدنا وانتقدنا وأنتقد أوضاعنا ... قوله حاسب يا حبيبي ... روح صلح حال بلدك .. ولما تبقى عندنا ديمقراطية وتنتقد أميرك أو سطانك أو ملك أو رئيسك وتعوموا كلكو في الديمقراطية والحرية .. إبقى تعالى إتكلم .

[ahmedarab]

انا متفق تماما مع راى الاستاذ سى السيد

لان مش من حق اى حد انة ينتقد اوضاع بلاد غير بلدة قبل ما يبص على بلدة الاول ..وبعدين دة مش بينتقد دة كدة بيشتم ؟؟؟؟؟

وبعدين فعلا لا جدال فى اننا من اكتر الشعوب ديمقراطية فى المنطقة

لان مفيش حد يقدر يعمل واحد على الف من اللى بيتعمل وبيتقال فى جرايد المعارضة والقنوات المستقلة واماكن كتير قوى

جايز فية ظغط وتعذيب وحجات كتير...لكن لو حد اتجراء وعمل اقل من اقل حاجة بتتقال او بتتعمل من المعارضة بكتيرر فى اى بلد خليجى مثلا ماحدش بيعرف عنة حاجة تانى ..دة لو اتجراء اصلا

[shawshank]

الشعب المصري من اكثر الشعوب ديمقراطيةً في المنطقة ... لا جدال في ذلك ...

طبعا لا جدال في ذلك ، بأمارة إن مبارك مسك الحكم من خلال انتخابات نزيهة شريفة عفيفة بين أكثر من مرشح طوال 26 سنة ، وبأمارة إن أعضاء البرلمان ممثلين فعلاً للشعب ، اللي برضه اختارهم في انتخابات نزيهة شريفة عفيفة ، وبأمارة استقلال القضاء التام عن السلطة التنفيذية ، وبأمارة تطبيق قانون الطوارئ 26 سنة ، وبأمارة سيطرة الأمن على كل شئ في مصر ... الخ

يبقى لما احنا من أكثر الشعوب ديمقراطية في المنطقة ، تبقى أقل الشعوب ديمقراطية وضعها ايه ؟ وهل إسرائيل (اللي برضه في المنطقة) أقل منا ديمقراطية؟

أنا شايف ان المقال - رغم ما فيه من جليطة - لم يجاف الحق أبدًا . فكل ما في المقال حقائق . وانت بتقول كل دولة تشوف اللي فيها ، ولما تبقى تعوم في الديمقراطية تبقى تتكلم . على الأقل فإن مواطني تلك الدول التي لم تعم بعد في الديمقراطية لا تستطيع السلطات في مصر احتجازهم في أي قسم شرطة ، ناهيك عن التعذيب . (رغم أن مصر من أكثر دول المنطقة ديمقراطية) . طب يا سيدي كفاية ديمقراطية وخلينا ذي بقية دول المنطقة اللي بيحظى مواطنوها بالكرامة ، رغم إنهم يا عيني غلبانين محرومين من الديمقراطية اللي مصر عايمة فيها .

ببساطة ، إن كان لديهم هم بعض من الكرامة ، فنحن ليس لدينا أي كرامة .

وانت بتتكلم عن أن يمشي المواطن مرفوع الرأس ، يمشي إزاي مرفوع الرأس وهو -لا مؤاخذة- متخوزق من سنين . كرامة المصري منزوعة من سنين . اتنزعت لما معرفش يختار اللي يحكمه ، واتنزعت لما معرفش يختار اللي يمثله في البرلمان ، واتنزعت لما معرفش ينفذ أحكام قضاء في صالحه لكن مش في صالح الحاكم ، واتنزعت لما سيطر الأمن على كل حياته . يبقى هيرفع راسه ازاي لما كل خير بلده منهوب من شلة معروفين بالاسم وهو قاعد لا حول له ولا قوة ، يعرفهم ولا يستطيع محاسبتهم . تبقى فين الكرامة ورفعة الرأس ؟

المسألة مش مسألة الشرطة وبس ، المسألة هي نظام كامل للدولة . النظام الحاكم مش هسيبك تضغط على الداخلية عشان يبطلوا تعذيب ، لأن بقاء النظام الحالي مرهون بالقمع والبطش والتعذيب . النظام لن يضحي بنفسه عشان يبقى للمواطن المصري كرامة ويرفع راسه .

تم تعديل 4 سبتمبر 2007 بواسطة shawshank

[سكندريه]

عرفين العامل الفلبيني !!!!!!!!!!

سفارته وبلده عملاله كرامه هنا في السعوديه أكتر مننا أحنا لما بيحصل واحد فيهم حاجه سفارته بتهد الدنيا وتقوم البلد ومتأعدهاش ؟؟؟

أما أحنا فبلدنا معملتلناش قيمه يبقى غرنا حيعملنا قيمه

؟؟؟؟؟؟؟؟؟؟؟ wst::

[aimen]

لا يا أيمن ... الراجل ماعندوش حق ... أنا أسف لسببين :

1- الشعب المصري من اكثر الشعوب ديمقراطيةً في المنطقة ... لا جدال في ذلك ... ونحن وصحافتنا وإعلامنا بننتقد التخين في بلدنا من أول رئيس الجمهورية وعياله لحد أصغر موظف .... أما بقية الشعوب العربية فحتى النُكتة السياسية فلا يستطيع أن يقولها واحد منهم بينه وبينه نفسه .

2- لكن في نفس الوقت ... لما بننتقد أوضاعنا لازم يبقى عندنا مبدأ " أنا أدعي على إبني وأكره اللي يقول آمين " يعني لو حد من العرب أياً كان إتكلم في موضوع يخص بلدنا وانتقدنا وأنتقد أوضاعنا ... قوله حاسب يا حبيبي ... روح صلح حال بلدك .. ولما تبقى عندنا ديمقراطية وتنتقد أميرك أو سطانك أو ملك أو رئيسك وتعوموا كلكو في الديمقراطية والحرية .. إبقى تعالى إتكلم .

عادى جدا ما تتكلم من هنا لبكره وانتقد وانا ان شاء الله حأصطادك ....انتقد من هنا لبكره ...المهم هل فيه حاجه بتتغير ؟ انا حاسس اننا احنا اللى بنحرق فى دمنا ...بس بصراحة يا س السيد ( جديدة قوى ..اكثر الشعوب ديمقراطية ...من امتى ؟؟؟ )

[MZohairy]

سي السيد يقصد يقول اننا بنقدر نتكلم و نشجب و نستنكر و بصوت عالي اللي مضايقنا من الحكومه

بصرف النظر عن عدم تحقيق ذلك لأي نفع

[shawshank]

سي السيد يقصد يقول اننا بنقدر نتكلم و نشجب و نستنكر و بصوت عالي اللي مضايقنا من الحكومه

بصرف النظر عن عدم تحقيق ذلك لأي نفع

وتلك ليست الديمقراطية . ولا في حرمان أي أحد من نشر رأيه في الآخر ، حتى لو كان هذا الآخر نظام دولة . خصوصًا إن كان هذا الرأي يستند إلى واقع قديم ظل سنوات ، بشهادة هذا الآخر .

تم تعديل 4 سبتمبر 2007 بواسطة shawshank

[شينكاوي]

www.saveegyptfront.org/news/?c=170&a=8280

اولا هذا الموضوع فور دمي من الصبح

اما هذا ...... الذي يدعي انه كاتب هو صديق للراقصات في مصر ويفخر بذلك وهو يعيش بمفرده وهو وابنه ومقضيها مسخرة وهو انسان زبالة وكل ما يكتب يعبر عنه

والله يلعن ابو لقمة العيش اللي تذل صاحبها

وانا الف مليون مرة قلت ان سلوكياتنا كمصريين مغتربين تحتاج الي المراجعة وبلاش بقه حد يقولي لقمة العيش الفقر والكلام اللي "بنوطي بيه رؤوسنا للكلاب من امثال هذا ...... " الذي يدعي ان الغسالة الكوري اغلي من المصري

اين هو حينما كانت بنات بلده تعلق عارية من العراقيين اكييد كان هارب بره

انا اسف علي التجاوز بالالفاظ لكن والله العظيم الواحد دمه اتحرق مما كتبه ذلك العلج

واخيرا اليكم هذه المنقولة للتلخيص :-

امتحان رجولة

بقلم : عماد رجب

وفي الهيجاء

ما كان امتحان رجولة

بل

كان الفرار

من صاغ عهر

واختفي

خلف الجدار

لا ساءهم قتل

ولا عجز

ولا حتي تمنوا الانتصار

بل كان كل الحزن

علي فتيات اسيا

عندما

ولوا الفرار

فتحولوا

في طائرات الغرب

الي

بانكوك القرار

كانوا كمن

خاف

جنكيز التتار

مترقبين

اخوة تحمي الديار

فهموا رجال همهم

مطي الصغار

وكروشهم تنموا علي

رقص الهنود

أو التتار

يا سائلا عنا

الكل يعرفنا

اصل الشهامة

لا نخاف الانكسار

والنخل دوما يرمها طفل

اذا ما كان جوعانا

فتعطيه الثمار

هذه الثمار هدية

من ارض مصر لهاشم

تطفي لهيب الجوع

ان عزت عليه بنات اسيا

او انتهت من ارضة

كل الصغار

» full story

[زعلان]

قرأت المقال واكتشفت ان الراجل مكنش بينتقد ولا حاجة د كان بيشتم و يقل ادبه على الشعب المصري عموما و قلة ادب من العيار الثقيل يعني شتيمة في سياق الكلام من التي يحاكم عليها قانونا ........ز بغض النظر عن صحة بعض ما قال او دوافعه فهل يحق له ان يتطاول على الناس بهذا الشكل البذيء والذي ينم عن انحطاط اخلاقه و انه اناسان عديم الاخلاق

[عطاء بلا حدود]

وكاتب مصري اسمه عطاء بلا حدود يرد على يهود العرب بالعقل والمنطق وبالحساب

سعر المواطن الكويتي = صافي دخل الكويت من النفط الموزع على الشعب ÷ عدد افراد الشعب

وكلما انخفض سعر النفط انخفض سعر المواطن الكويتي

حتى يصل النفط عندهم الى الصفر وهو بالقريب ليس البعيد فحينئذ يساوي سعر المواطن الكويتي ابو كرش صفر

واللي من غير كرش يساوي صفرين wst::

حد كويتي ولا مصري ولا صومالي شايف غير المعادلة دي لتقييم سعر المواطن الكويتي ؟؟؟؟؟؟

فأي عقلية يتمتع بها الكويتين

وأي شهامة ورجولة يتمتع بها أبناء قوم لوط

وأي شهامة وروجولة يتمتع بها أتباع بوش الأنجاس

اعتقد انني لم اخطأ في شئ ولكن لكل شئ سعر ... ونفتخر ان سعرنا هو سعرالغسالة ان صح ... على الاقل لها منافع ولكن الكويتيين لا منفعة منهم ....

[shawshank]

كنت أتمنى أن يكون الرد الموضوعي شيئًا من قبيل :

"ايه الكلام ده ... الراجل جاب الكلام الفارغ ده منين ... ده كله كذب وافترا ومش صحيح ... عمرنا ما سمعنا عن حالة تعذيب واحدة في قسم شرطة ، بالعكس ده كل الظباط في منتهى الاحترام والأدب والالتزام ولا يمكن تحصل حاجة ذي دي في مصر أبدًا. وده من تجارب شخصية لي وللكثير من معارفي" .

وإن لم يكن الواقع كذلك ، نسكت ونعمل حتى يصير كذلك لنرد ساعتها بالرد عاليه . لا أن نفتش عن نقائص صاحب المقال وشعبه وننشرها .

تم تعديل 4 سبتمبر 2007 بواسطة shawshank

[se_ Elsyed]

ناس كتيرة مش شايفه إن إحنا كلنا في الهم عرب

وناس كتيرة مش قادرة تفرق بين إنك تعيش في دولة بتاخد فيها على دماغك ومش مسموح لك تقول آي وده حال كل الدول العربية ما عدا مصر اللي فيها أكثر من 500 جريدة تصدر بشكل يومي أو إسبوعي وبيقال فيها ما في الخمر ....

.. ودولة جنبها بتاخد فيها على دماغك برضوا بس عندك متنفسات ممكن تقول فيها اللي إنت عايزه وهي مصر .... وما حدش يحلم غن التغيير يأتي فجأة ..ز ولكن بداية التغيير بتبق بسلاح الكلمة وعدم السكوت على الظُلم .

وعفواً شاوشنك .. لماذا ذكرت بني صهيون هنا ؟ ... أنا لا أعترف بإسرائيل كدولة حتى وإن كان لها علم وسفراء و و و و ... وهذا ليس دفناً للرؤوس في الرمال ولكنها نظرتي لهم التي لن تتغير فهم مغتصبون وسيرحلوا آجلاً أم عاجلاً عن أرضنا إلى الجحيم بإذن الله .

[زهرة الجبل]

يا أخ سي السيد والله العظيم انا صعبان عليا نفسي

هل أنت مقتنع ان ما نحن فيه ديموقراطيه؟

منيييييييين يا حسره؟؟

الديموقراطيه هي انك تبدي رأيك وتستمع للرأي الآخر في إطار حوار وتواصل

لكن كوننا عندنا جرائد معارضه وكوننا بنقول ونشجب ونستنكر و ........و..........,و,,,,,,,, ده كله قلة حيله مش أكتر

إسمه صراخ وعويل في مدينة الطرش ... اصرخ براحتك لحد ما صوتك يروح ... المهم مش صراخك المهم النتيجه

في نتيجه؟أبداً يبقى فين الديموقراطيه

المشكله ان ده فعلا بيفتح المجال امام الحثاله امثال هذا النكره التافه لكلام زي كلامه

وبعدين ما تقوليش ان هم عندهم الهم متلتل ومش قادرين يتكلموا

لا معلش بقى انا اقولك همومهم ايه

هم ايه لما يبقى كل مواطن له الحق في امتلاك قطعة ارض من البنك بالقروض وبنائها عن طريق البنك برضه بالقروض وبناء ايه بقى....مش مساكن شعبيه ولا وحدات الإسكان ... ده بيعمل البدع ويحول الفواتير عالبنك يعني بيوووت بيوت مش اي كلام وبعدين يروح يقول مش قادر اسد القرض فيعملوله إسقاط قروض والف مبروك عليك ارضك وبيتك

طيب آدي البيت

هموم ايه لما يبقى المواطن عنده خدمات محترمه وبيعلم اولاده بالمجان في مدارس محترمه وحط تحت محترمه دي تلاتين الف خط

وبيعالجهم في مستشفيات محترمه وبيعيشهم في اماكن محترمه

هم ايه لما يبقى بيتعامل في كل الاماكن بكل احترام وتقدير ومصالحه ماشيه حلاوه كده

هم ايه لما المطلقات هنا يبقى من حق كل مطلقه هنا بيت اللي هو مش شقه يعني بيت ده يبقى بيت وملحقاته من ملحق خدم وغيره ومع البيت راتب شهري محترم ودفع اجر الخادمه على الحكومه و معاش الاطفال لو كانت حاضنه وتعيش معززه مكرمه يمكن اكتر مما كانت في بيت زوجها؟

هم ايه لما .يكون الموظف الكويتي له علاوه ثابته على راتبه اذا تزوج وعلاوه ثابته مع كل طفل يرزق بيه

يعني مش العيال كترت والالتزامات والهموم والدخل ثابت

هم ايه لما.... ولا أقولك؟كفايه و اسكت بقى احسن انا تعبت

ومع ذلك فكل ده لا يعطي الحق لتافه مثل كاتب هذا المقال لكتابة ما كتب

ولا تستطيع وصف تجرأه على الكلام بهذا الشكل سوى بالسفاقه وقلة الأدب

لكن من ناحيه أخرى ..... يا ريت كنا نقدر نقول ان كلامه عن اوضاع المصريين في بلدهم فيه شئ من المبالغه حتى

الا المصيبه كله صح وكله حقيقي وكله بيحصل

تعرف هو يعاب على الكاتب ايه؟

يعاب عليه اسلوبه الساخر الشامت المهين في الكلام

يعني اسلوبه مش حقايقه ..

للأسف الشديد

مع ان المصريين هنا هم اللي معمرين البلد والله

تعرف؟

ممكن يكون صاحب العمل نفسه ميعرفش السما من العما

والموظف المصري هو اللي ممشي له شؤونه ومسير له العمل

ومنغيره الاولاني ده يغرق

انما تقول ايه بقى؟؟

طيب تعرف تقول لي مقال زي دي لو اتكتب في مصر عن الكويت

يعني جه واحد مصري كان مسطول وكتب كلمتين كده وعلى اعتبار ان المقال اتسمح له بطباعته وعلى اعتبار ان الجريده اتوزعت على ما جاء فيها

تعرف تقول لي كان هيحصل ايه؟ دي كانت هتقوم الدنيا ومتقعدش

بلااااش دي

خلي اتنين كوايته هم اللي جرالهم كده في مصر ؟ تعرف تقوللي كان ممكن يحصل ايه؟

اساساً بزمتك ودينك انت تتخيل إن حد يجرأ يعمل كده في اتنين كوايته موجودين في مصر؟

ليه بقى؟ لأنه رغم انه لا يستحق الإحترام إلا إنه بيحترم نفسه وحكومته بتحترمه

يا اخي المهم اننا نحترم نفسنا وحكوماتنا تعمل لنا سعر وتحترمنا علشان نقدر نفرض إحترامنا على الآخرين

وحسبنا الله ونعم الوكيل

تم تعديل 4 سبتمبر 2007 بواسطة زهرة الجبل

[Abofady]

نشرت جريدة المصرى اليوم الخبر التالى :

في الوقت نفسه، نشر كاتب كويتي، يدعي فؤاد الهاشم مقالا أمس الأول في صحيفة «الوطن»، بعنوان «لا تعايرني ولا أعايرك»، وتحدث فيه عن مضايقة الأمن المصري الضيوف والصحفيين الأجانب، وتعجب من هجوم الصحف المصرية القومية والمعارضة للكويت بعد تعذيب الشابين حسام وجمال، وقال إن الحكومة المصرية «تُسعر» المصري ويساوي هناك غسالة كورية،.

هذا ما جناه المصرى من الكويتى الذى خرج من بلده فى زى النسوان لكى يهرب من رجال صدام واستقبلناهم فى بيوتنا كضيوف اعزاء،وبعد ان هيجنا العالم ضد صدام لتحرير الكويت ، ذهبنا لكى نحرر ارضهم وهم جالسون فى كباريهات شارع الهرم ، اليوم يعمل راجل علينا ويشبه المصرى بغسالة كورية .

الله يرحمك ياصدام ، ويا شماتة العراقيين فينا .

وانا اتسائل اخيرا هل الكويت ارض عراقية فعلا ويجب ان تعود الى العراق ؟ اى يجب ان يعود الفرع الى الاصل ، لان العراقيين طيبين ، امال دول ا******* ليه؟

ارجو الا تقع فى نفس الخطا الذى اغضبك وهو الحديث بلغه لا تليق بالمصرى حتى ان غضب.

وشكرا

الاداره

أحمد محمود

تم تعديل 4 سبتمبر 2007 بواسطة أحمد محمود
حذف تعبير غير لائق

[MZohairy]

وطني حبيبي الوطن الأكبر

يوم ورا يوم أمجاده بتكتر

وانتصاراته مليا حياته

وطني بيكبر و بيتحضر

وطني وطني

القاهره 1960

wst::

[أبو محمد]

يبدو أن الأخ zain كاتب الموضوع .. سجل خصيصا من الكويت حيث يقيم ليفتح الموضوع ..

أستطيع أن أتفهم ذلك إذا كان مصريا يريد أن يتحاور مع إخوانه المصريين حول ما آلمه عند قراءة المقال .. ولكن للأسف لم أر له أى مشاركة أخرى غير تلك التى فتح بها الموضوع ووضع رابط المقال "وآدى وش الضيف" .. كما أستطيع أيضا أن أتفهم إن كان الأخ زين كويتيا فربما كان من تلك الفئة من أبناء الشعب الكويتى الذين يتلذذون بتوجيه الإهانات إلى غيرهم .. نعم فالشعب الكويتى يضم رجالا محترمين أعرفهم وتعاملت معهم .. ويضم أيضا تلك الفئة الغير جديرة بالذكر

أقسم بالله إننى أثناء قراءة المقال أدركت أن كاتبه هو فؤاد الهاشم .. فهو كاتب فى جريدة الوطن الكويتية منذ أن كانت تحت سيطرة الأخوة الفلسطينيين .. وشتان بين ما كان يكتبه قبل غزو الكويت وبين ما يكتبه بعد رحيل معظم الفلسطينيين وانحسار سيطرتهم على أشياء كثيرة فى الكويت من بينها جريدة الوطن

كاتب هزيل .. أسلوبه الآن تحسن كثيرا .. إما بسبب طول الممارسة أو لأنه وجد شخصا آخر يكتب له غير ذلك الذى كان يكتب له أيام أن كنت أقيم فى الكويت .. فؤاد الهاشم هو "رداحة" الصحافة الكويتية .. ليتكم تطالعون إحدى تحفه عن الأخوة الفلسطينيين ولن أعلق عليها برغم معارضتى لكل من غضب لإعدام صدام (وليس لتوقيت إعدامه) وويكفى أن تراجعوا ردود بعض الفلسطينيين عليه

الآن أضم صوتى إلى الأخوة الأفاضل الذين استفزهم ذلك الغثاء ..

لا ينكر أحد أن هناك انتهاكات خطيرة لحقوق الإنسان المصرى تقوم بها الشرطة .. ولكن يستطيع فؤاد الهاشم وشاوشينك وزهرة الجبل إنكار وقوع تلك الانتهاكات فى الكويت ودول الخليج أو على الأقل التشكيك فى وقوعها .. ليس لأن تلك الانتهاكات غير موجودة .. ولكن لأن لا أحد هناك وبالذات من أولئك الصحفيين الذين يتمتعون بشجاعة فؤاد الهاشم فى التهجم على الجنسيات الأخرى (وخاصة العربية) يستطيع أن يتكلم عنها .. ولو حدث وتكلم ، فسرعان ما سيجد نفسه يستكشف ما وراء الشمس ..

على الأقل نحن هنا نرى ونسمع عن الانتهاكات .. ونسمع ونرى جزاء من تثبت عليه تلك الانتهاكات .. تتذكرون ذلك الضابط الذى أحيل إلى التقاعد لتعديه على مواطن فى طريقه إلى شرم الشيخ .. ونسمع عن الضابط الذى تجرى محاكمته الآن لانتهاكه عرض مواطن حتى وإن كان له تاريخ إجرامى

إذن يطلب الأستاذ فؤاد الهاشم من الصحفيين المصريين السكوت على تعذيب اثنين من المواطنين المصريين وربما يريد من المصريين تقديم آيات الشكر والعرفان .. هو يرى أن تعذيب هذين المصريين لا يستوجب انتقادا لأنه تربى وتعود على السكوت وكتم الأنفاس عندما تتجاوز الشرطة الكويتية ، كما تربى وتعود على فتح الجاعورة على آخرها عندما تتجاوز أى شرطة فى أى بلد خارج الكويت .. أذكر أن مدرسا كويتيا اعتدى جنسيا على تلميذ عنده وعندما أبلغ والده الطبيب عن المدرس لاقى الأمرين وتم فصله من عمله .. وعاد الوالد بإبنه إلى مصر .. ولسوء حظ المدرس أن عم التلميذ كان ضابطا فى المطار .. فوضع إسم المدرس على قائمة انتظار (قطاع خاص) وأعطاها لزملائه فى المطار .. وحدث بالفعل أن المدرس ساقه حظه التعس إلى مطار القاهرة أثناء عودته من رحلة "وناسة" .. فتم عمل اللازم نحوه (قطاع خاص برضه) .. وعندما حدث هذا الانتهاك لحقوق مواطن كويتى خرج الصحفيون الشجعان فى الكويت ومن ضمنهم فؤاد الهاشم بالهجوم على مصر وشعب مصر ونظام مصر .. وحدثت أزمة ديبلوماسية استدعت بيانا من الدكتور عصمت عبد المجيد مشابه للبيان الذى أصدرته الحكومة الكويتية يصف الحادث على أنه حادث فردى لا يؤثر على أواصر العروبة والأخوة ......

لماذا لم يستنكر فؤاد الهاشم ما فعله هو ورفاقه الشجعان عندما "فرشوا الملايات" لكل ما هو مصرى بسبب انتهاك حقوق مواطن كويتى ارتكب الفحشاء مع صبى مصرى ؟ أم أنه ورفاقه قد تعودوا على أن الكويتى دائما على حق ؟؟ ..

لا أدرى إن كان الأخوة زين وزهرة الجبل اللذان يكتبان من الكويت قد سمعا عن سؤال المقيم عند استخراجه رخصة القيادة فى الكويت عن أولوية المرور فى الدوار ؟ .. هى نكتة بالطبع ومن المؤكد أن مصريا قد أطلقها .. تقول النكتة إنه إذا أجاب المقيم بأن أولوية المرور فى الدوار للقادم من اليسار فإنه يرسب لأن الإجابة الصحيحة المتوقعة من أى مقيم هى أن أولوية المرور فى الدوار للكويتى .. نكتة تلخص كيف ينظرون إلى المقيمين (وليس المصريين فقط) .. طبعا الأمر يختلف عندما يتعلق الأمر بأحد المقيمين من الأمريكان أو الأوربيين .. فهم الأسياد هناك ولو كره الشجعان من أمثال فؤاد الهاشم

إحتقارى لفؤاد الهاشم لا ينسحب على كل الكويتيين .. فأنا عرفت ولا زلت أعرف منهم رجالا بحق .. ولكن للأسف أصواتهم خفيضة بخلاف الناعقين الرداحين من أمثال فؤاد الهاشم الذى لا أريد أن أنزلق إلى مستواه وأرد على كل كلمة جاءت فى مقاله .. وسأطبق المثل المصرى الذى اتخذه عنوانا لمقاله ولم يفهمه فراح يحقر من شأن المصرى (والكورى بالمرة) دون أن يوجه نقدا موضوعيا إلى زملائه (أو معلميه) من الصحفيين المصريين الذين استنكروا تعذيب الشابين المصريين