على غرار برنامج الـ 10 مساءً .. عايز إيه من الحزب الوطني ؟

[se_ Elsyed]

قبل ما حد يضرب ولا يحدف بالطوب

إسمعوني للأخر ...

أنا مازلت على العهد وبأكره سيرة أسلاف الحزب الفاشي ودراويشه ومريديه ... لكن مضطرين يكون في حالة حوار ( ودي كمان متأسف عليها لكن القافية تحكم وماحدش يفتكر إني بقيت عمرو عبسلام بتاع حالة حوار الطرشان )

فتعالوا نتحاور ونشوف عايزين إيه من الحزب الحاكم - غصبٍ عننا طبعاً -

--------------

هابدأ بنفسي :

بسم الله الرحمن الرحيم ...

سيدي الرئيس الأب الحنين الحلو كبير المقام وكبير السن رئيس الحزب الوطني ورئيس الجمهورية وابو رئيسنا اللي جاي والقائد الأعلى للقوات المُسلحة وكفايه بقى عشان مش لاقي حته أكتب فيها الألقاب بتاعتك ...

أنا عايز من الحزب الوطني الحاكم ما هو آتي :

1- محاسبة أعضاءه وخصوصاً أعضاء لجنة السياسات والسادة الوزراء وسؤالهم سؤال واحد فقط : من أين لك هذا ؟

أنا عارف إن الناس هاتشيط دلوقتي وتقول : مين هايسأل مين ؟

يا سيدي هانفترض إن في لجنة محايده هاتتشكل زي لجان التحقيق في مراكز القوى أيام الزعيم الملهم ... وبالتالي هايبقة حقي وحقك ... الشريف اللي كون نفسه بنفسه هانضرب له تعظيم سلام ونبوسه من هنا ومن هنا ونقوله يتقطع لسان اللي يقول عليك كلمه بطاله يا شريف يابن الشريفة .. يا عفيف يابن العفيفة .... واللي مش شريف وشفط مليارات وفلوس الشعب نضربه 100 شوز في ميدان عام وليكن ميدان التحيرير عشان واسع شويه وياخد أكبر عدد من الأشواز القديمة ونرجع الفلوس دي للبلد ويكون جزاءه هو جزاء المفسدين في الأرض ونسجن اللي جابوه ويُبعد بعد كده عن البلد ( ده في واحد صاحبنا بتاع حديد أنا متخيل منظره وهو بياكل ضرب ما أكلوش حرامي بيسرق نفس الأشواز بتاعت الناس اللي بيصلوا في أحد الموالد اللي بيحضرها ملايين وعد بقى قول 100 ألف في جوز أشواز قديمه على الأقل يعني بتتكلم في 200 ألف شوز ) .

2- بأطلب من حضرتكم مره واحده فقط .... مش كتير على ربنا ... تسيبوا مكاتبكم الفاخرة وسياراتكم الفارهة وعيشتكم المفخفة ... وتعيشوا يوم واحد من حياة مواطن مصري بسيط مرتبه 250 ج وعنده عيلين .... ويا سلام لو - أنا اسف يعني - تاخد معاك المدام تعيش يوم هي كمان حياة ست مصرية بسيطة بتقوم الساعة 5 الصبح تاخد قفص العيش وتجاهد في طوابير الأفران عشان تشتري بـ 2 ج عيش يقضوها لها ولاولادها .... وبعد ما تخلص تنزل السوق تدور على أرخص انواع الخضار عشان تعمل عليه طبيخ بحلة الشوربة اللي باقية من 3 أيام من النص كيلو لحمه أم 42 ج اللي من هنا ومن هنا دبقوا ثمنه وقدموا عليه وقدروا يشوفوا اللحمه .

أسف يا باشا وأسف يا مدام لكن إعتبروها تجربة أورينتال تمروا بها يمكن تحسوا بينا وبالغلب اللي الأغلبية عايشاه .... وبرضوا ماحدش يقولي طب وليه الستات دول بيتعبوا نفسهم وما بيرحوش كارفور او هايبر ون او على الأقل مترو وهناك كل حاجه متوفرة ولا طابور ولا دياولو وفي كمان هوم ديليفري والماتريال دي بتوصلهم تو دور ؟ مش عايز أبطح نفسي وأصورلكو قتيل هنا

2- عايز منكو تبطلوا تصريحات وردية ولو سنة واحدة وتشتغلوا فقط ... وتبطلوا كمان مؤتمرات وإنتخابات على مستوى القمة والقاع والسفح والتبة وجميع المرتفعات لإن أي قرارات أو حركات او خلافه لا تنعكس على تحسين أحوال الشعب .. تبقى كالحرث في الماء ويبقى إنتو اللي بتسفيدوا منها فقط للوصول على حساب جثث الشعب ...

نكمل بعدين

وانا شايف واحد دلوقت بيكشف راسه وبيدعي من ربنا وبيطلب طلب واحد من الحزب الحاكم ويقولهم " عايزكو تنزاحوا من على قفانا وتروحوا في ستين " وأنا بأقوله عيب مش كده .. خلينا ناخدهم على قد عقلهم ونتحاور ولو ما استجابوش يبقى نكشف راسنا كلنا .... بالنسبة للرجالة يعني .. ونعمل كمان قسم للمحجبات عشان يكشفوا راسهم براحتهم وماحدش مننا يشوفهم ... وندعي كلنا ربنا يخلصنا من الظالمين الفاسدين النهابين .

[شينكاوي]

se_ Elsyed رد اليوم, 12:44 PM

فتعالوا نتحاور ونشوف عايزين إيه من الحزب الحاكم - غصبٍ عننا طبعاً

زعلت قوي منك يا سي سي انت عارف اننا نفتح معاهم حوار وننقل لهم احنا عاوزين منهم ايه ده يعني اننا لسه عندنا امل فيهم يخي بخ بخ بخ .....................

انا لي منهم طلب واحد بس يسيبوا مصر في حالها يمشوا يشوفولهم بلد تاني يسرقوها لاني البلد ما بقاش فيها حاجة تتسرق ويشوفوا سويسرا وملايينهم اللي هناك استغفر الله ملياراتهم اللي هناك :lol: .

وعندي ليك يا كبير خبر لو صحيح هتبقي مصيبة ... اتاكد واقولكم لانه موضوع رشوة كبير قوي من عينة 5 مليون لواحد من بتوع الحزن الوطني بدرجة محافظ هههههه قال محافظ قال ده مش محافظ ده مقضيها رشاوي

(يا رب يا كبيرة تموتي ... ايوة يا كبيرة تموتي .......) كتكوت

وبالمناسبة اسمحلي في استعارة دي منك

:rolleyes:

خد شم دي

[الطيار المصرى]

كده يا سيد سي السيد.....علي رغم من الموافقة علي المطالب الحكيمة الي عرضتها سيادتكم في استفاضة و رقي....

لكن هل هما منتظرين يسمعوا مننا المطالب ديلوقتي.....بقالنا 27 سن بنتكلم من وقت ما البيه بتاع مش هجدد ابدا قاعد و احنا بنعرض مطالبنا و ناقص نسجلها علي اسطوانة عشان كل شوية يسمعوها.....

خلاص الناس دي انتهت صلاحيتها مابقوش بيسمعوا ....دول محتاجين يروحوا في ستين داهية و نجيب مين يستجيب لمطالبنا...

و نضيف برده مطلب...

4-تخفيف اعباء البيروقراطية و الروتين البغيض الذي يجعل المواطن يطلع مستخرج من شهادة الميلاد عشان يشتري دمغة...او الروتين الذي يجعل الموظف في المصلحة التي توجد في عين شمس يطلب من المواطن امضاء المدير الذي يوجد في السيدة زينب

5-و ادارة القطاع العام علي نفس منوال القطاع الخاص عشان ما نلاقيش موظف يروح يفطر في ساعتين و يتكلم مع ومايله ساعتين و ينام الساعتين الباقيين و الناس ملطوعة برة من غير ما يخلصلهم مصالحهم و كل ما حد يكلمه يقوله يا فتاح يا عليم يا رزاق يا كريم انت مش شايفني بعمل كذا....و في اخر الشهر يقبض مرتبه و يترقي في حركات الترقية..

و اخيرا عقاب كل موظف يردد تعبير.....فوت علينا بكرة

تحياتي

الطيار المصري

[shawshank]

أنا مازلت على العهد وبأكره سيرة أسلاف الحزب الفاشي ودراويشه ومريديه ... لكن مضطرين يكون في حالة حوار

أخي الحبيب/ سي السيد

أهو أنا بصراحة قلقان من مشاركاتك في الفترة الأخيرة ... من أول "الشعب المصري من أكثر الشعوب ديمقراطية في المنطقة" مرورًا بموضوع "شائعات موت الرئيس وزعزعة استقرار البلد" وموضوع "شكاوى لوزارة الداخلية" وانتهاء بهذا الموضوع ... ايه الحكاية ؟!

[nash]

لو سمحت سيادة الرئيس..( بابا ) حسني

هل صحيح ماسمعته في الأجازة ...أن نجلكم الكريم ( السيد جمال) قد أشتري ديون مصر؟؟

أريد أجابه كلها شفافيه وصدق وأمانه

[se_ Elsyed]

أنا مازلت على العهد وبأكره سيرة أسلاف الحزب الفاشي ودراويشه ومريديه ... لكن مضطرين يكون في حالة حوار

أخي الحبيب/ سي السيد

أهو أنا بصراحة قلقان من مشاركاتك في الفترة الأخيرة ... من أول "الشعب المصري من أكثر الشعوب ديمقراطية في المنطقة" مرورًا بموضوع "شائعات موت الرئيس وزعزعة استقرار البلد" وموضوع "شكاوى لوزارة الداخلية" وانتهاء بهذا الموضوع ... ايه الحكاية ؟!

ليه ؟!!!!

خايف عليه أكون صبأت وأعتنقت الفكر الجديد :rolleyes:

حاشا لله ... لست أنا ... والله العظيم لو بيفرقوا فلوس في الحزب الوطني ما هاكون واحد من اللي بيقفوا على الأبواب يستنوا الإحسان .

لكن وجهة نظري إن بدل ما إحنا عمالين نهاجم نهاجم ... خلينا في مره نهادن ونتكلم بالمنطق ..

يعني ما بيقاش كله ضرب ضرب

وزي ما بنتكلم على المشاكل ... خلينا برضوا نطرح ونناقش الحلول ...

هــــــــــــــا عايز إيه إجيبهولك معايا من الحزب الوطني ؟

--------------------

لو سمحت سيادة الرئيس..( بابا ) حسني

هل صحيح ماسمعته في الأجازة ...أن نجلكم الكريم ( السيد جمال) قد أشتري ديون مصر؟؟

أريد أجابه كلها شفافيه وصدق وأمانه

يا حاجه ناش ..

إحنا بنتكلم عن طلبات ... وسؤالك أو أستفسارك ده هايخلوهم يبعتوا لك كمبياله او وصل أمانه من الديون دي عشان تسددسها بصفتك مواطنه مصريه لابد ان تشارك الشعب همومه ...

هو صحيح أشترى ديون مصر ؟ يعمل بها إيه ؟ إوعى نصحى بكره نلاقيه حاجز على البلد وبينزلها في المزاد

[shawshank]

تعرف يا سي السيد

أنا معنديش مانع إن الحزب الوطني يستمر في أن يكون الحزب الحاكم ، ولا حتى عندي مانع إن جمال مبارك يبقى رئيس الجمهورية ، بشرط إنه يكون فيه إصلاح .

أنا كمواطن هيهمني إيه غير إني أحيا حياة آدمية ، متوفر لي فيها الحد الأدني المطلوب لتلك الحياة . ساعتها مفيش ناس كتير هتفكر مين الرئيس أو جه ازاي أو فيه ديمقراطية واللا لأ . ولو مبارك ونظامه عنده بعد نظر كان خد الطريق ده للبقاء في السلطة وبشكل سلمي والناس ساعتها هتتمنى إنه يفضل علطلول . كان خد طريق الإصلاح والبحث عن رخاء البلد .

أنا بستغرب من تجربة الصين ، وقبلها الاتحاد السوفيتي ، اللي فيها المعادلة الصعبة : دكتاتورية + قوة اقتصادية . يعني التفوق الاقتصادي غير مرهون دائمًا بالديمقراطية . فيا ريت يا سيدي يفضل الحزب الوطني في الحكم وييجي جمال مبارك ، لكن يكون فيه إصلاح حقيقي . لكن دي أحلام يقظة لا أظن لها أي أساس على أرض الواقع للأسف .

تم تعديل 5 سبتمبر 2007 بواسطة shawshank

[شينكاوي]

يا عزيزي سي سي شفت ايه اللي حصلك لما جبت بس سيرة ان الحزب الوطني ممكن بس نوجه له رساله

اشرب بقه علشان عندك امل ..... ايوة امل

وبرده خد شم دي :rolleyes:

shawshank رد اليوم, 05:11 PM

أنا بستغرب من تجربة الصين ، وقبلها الاتحاد السوفيتي ، اللي فيها المعادلة الصعبة : دكتاتورية + قوة اقتصادية . يعني التفوق الاقتصادي غير مرهون دائمًا بالديمقراطية . فيا ريت يا سيدي يفضل الحزب الوطني في الحكم وييجي جمال مبارك ، لكن يكون فيه إصلاح حقيقي . لكن دي أحلام يقظة لا أظن لها أي أساس على أرض الواقع للأسف

النظام المصري يطبق نظرية جوع شعبك فقط لا غير لكنها قلبت عليهم

نرجع لقول كتكوت الحكيم ( يارب يا كبيرة تموتي...........ايوة تموتي)

[Ahmad Farahat]

أستاذ س.س إنت عارفني كويس وعشرة مع بعض في باب الرياضة وأنا وانت حارقين دم الزملكاوية بقالنا أهو داخلين على سنة

وعشان العيش والملح اللي بينا هسألك شوية أسألة وياريت تحكم فيها ضميرك الصاحي

1 -ممكن الحداية تحدف كتاكيت؟

2_ممكن تنفخ في قربه مقطوعة؟

3-ممكن الكلب يبطل هز ديله؟

4-ممكن السما تمطر دهب؟

5-ممكن إبليس يخش الجنه؟

6-ممكن تبقى زملكاوي؟

7- ممكن أبو الهول ينطق؟

لو أي حاجة من دول ممكن وجاوبت عليها بنعم

يبقى فيه أمل في الحزب الوطني

وسلملي على الديمقراطية

بالمناسبة أنا كمان بدأت أتوجس منك خيفة

شكلك مش مظبوط اليومين دول وعايش الحالة بتاعة عمرو عبد السميع

أرسين

رئيس التحرير

[المر]

بابا العزيز حسنى ( ابو أخويا و حبيبى جيمى )

احنا الحمد لله كويسين و مرتاحيين و مش ناقصنا حاجة خالص . العيشة زى الفل و المرتبات مرتفعة جدا و الموصلات فاضيه و السكن

على قفا مين يشيل ( مع اعتذارى للقفا) و الوظائف بالهبل و الجنان و احنا اللى شعب طلباته كتيره و شعب غلس و دمه تقيل الله يكون

فى عونك يا ابو جمال . الللى احنا عاوينه من سعادتك انك تمشي يا اخى و كفاية 25 سنة ده مؤبد يا اخى و اعطى فرصة لجيمى .

حسبنااااااا الله ونعمممممممممممممممم الوكيل

مواطن بيحبك موووووووووووووووووووت

تم تعديل 6 سبتمبر 2007 بواسطة se_ Elsyed

[شينكاوي]

المر رد اليوم, 06:21 PM

فى عونك يا ابو جمال . الللى احنا عاوينه من سعادتك انك تغور يا اخى و كفاية 25 سنة ده مؤبد يا اخى و اعطى فرصة لجيمى

الله ينور عليك هو ده احنا اللي عاوزينه من سوسو وجيمي انه يغور ايوة يغور

وبلاش افكار سي سي المريبة في الحوار دي مع الحزن الوطني

اللي انا خايف منه ان سي سي يكون ظبطوه بفيلا في المارينا ولا سيارة شبح من غبور ولا حتة ارض في الشرم

يا خوفي يا سي سي لتكون بتجر رجلنا كلنا علشان نشجع الحزب الوطني :lol:

وبرده شم دول :rolleyes: :lol:

[Sherief AbdelWahab]

أن يفصل بين العمل السياسي والتنفيذي ، بين السياسة والبيروقراطية،و أن يرفع عصاه الغليظة عن قطاعات كثيرة في هذا البلد ، وألا يدخل نفسه في تحالفات غبية مع قوى قومية ومذهبية قد تؤدي بالدولة إلى مرحلة الملوخية.. صعبة دية؟

خلص الكلام

[se_ Elsyed]

اللي انا خايف منه ان سي سي يكون ظبطوه بفيلا في المارينا ولا سيارة شبح من غبور ولا حتة ارض في الشرم

هذا إتهام صريح لا أقبله البته

يابني غبور واخد توكيل هيونداي ... يبقى إزاي ظبطوني بشبح من عنده ؟

إيه شبح وشدوها ربكوا لها موتور وبودي هيونداي ؟ :happy:

[شينكاوي]

اللي انا خايف منه ان سي سي يكون ظبطوه بفيلا في المارينا ولا سيارة شبح من غبور ولا حتة ارض في الشرم

هذا إتهام صريح لا أقبله البته

يابني غبور واخد توكيل هيونداي ... يبقى إزاي ظبطوني بشبح من عنده ؟

إيه شبح وشدوها ربكوا لها موتور وبودي هيونداي ؟ :lol:

ههههه هههه كنت حاسس انك هتهرشها

بس يعني هي دي انت اللي مستصعبها قوي زي ما خدوا توكيل BMW من ابوالفتوح يخدوا لك توكيل المرسيدس

ويدوه لغبورهم علشان يعملك احلي بورش مش شبح بس يا معلم .

وخد شم دول :happy: :lol: wst:: :lol:

وبعدين قولنا ايه التغير الجامد في المواقف ده يا سي سي ولا العمليه فيها كان

[se_ Elsyed]

لا تغير ولا حاجه ... إنتو محسسني إني بقيت عميل وداسوس ..

هو الواحد لما يدعو للحوار او توصيل مطالبنا بشكل هادف وصريح للمسئولين يبقى إتغير ؟

ولا لما نستخدم حقنا في الشكوى عن طريق آليات حديثة كالخطوط الساخنة أو المواقع الإلكترونية الحكومية أو الكتابة للصحف سواء المستقلة أو الحكومية يبقى أتغيرت ؟

يا أعزائي الأفاضل دعونا نُجرب مره المثل اللي بيقول " العيار اللي ما يصيبش ... يدوش "

زي ما حاصل اليومين دول في الحملة الشعواء النارية على تجاوزات رجال الشرطة واللي أنا متأكد مليون الميه إنهم هايملوا نفسهم وهايعرفوا إن خلاص الناس وعيت وعرفت وما بقتش تسكت على الظلم ...

[abaomar]

السلام عليكم

الاخ العزيز سى السيد

انا مفترض فيك حسن النيه جدا و لابعد الحدود رغم انى (و سامحنى على كده ) شكيت انك جالك عقد حلو فى فرع الحزب الوطنى فى الخليج :happy:

لكن اعرف عنك من خلال مشاركاتك انك ذكى و لماح و ذو فطنه ( برم يعنى بضم الباء )

عمرك سمعت عن حرامى تاب ؟ :lol:

[se_ Elsyed]

عمرك سمعت عن حرامى تاب ؟ :lol:

أيوه سمعت وشُفت يابو عمر

لما الحرامي ده يحس إن العين عليه .. وإن مصدر السُلطات " اللي هو إحنا الشعب " يعني بقوا مثقفين ومفتحين ولا يقبلوا الظلم ....

لو ترجع بالذاكرة كده وإنت صغير :happy: أيام أبو خالد ... كان في ظلم وظلم كبير كمان ... لكن الي كان بيفتح بؤه ما كانش بيلاقي نفسه إلا وهو بين أيدي حمزه البسيوني وزبانية عبد الناصر اللي بإذن الله زمانم في جهنم وبئس المصير ..

دخلنا على ايام السادات - مش الفيلم - والراجل كان متخبطط وماكنش عارف يفتح الباب ولا يقفله وكان نظام البلد عبارة عن سلطة خضار يختلط فيها الحابل بالنابل الشيوعي مع الرأسمالي الإنفتاحي مع الإنغلاقي ,

وصلنا بسلامة الله مع العصر المبارك .. وأكمل مسيرة السادات وده خلال الثمانينات وما حسناش إن في تغيير وإن البلد محلك سر والحال مش باين له راس من رجلين ...

جت التسعينات فبقت رياح التغيير أقوى من اي نظام في العالم وبقى في إنترنت وبقى في مئات الصحف والمجلات المعارضة في مصر

فالحكومة بقت عامله زي الفلاح اللي غرق غيطه .. وكل ما تسد ثقب من ثقوب التنفيث دي يطلع لها 100 غيره ....

وبقى في منظمات المجتمع المدني وحقوق الإنسان المستقلة مش بتاعت بطرس غالي ..

وحركات سياسية محدودة .. أينعم بتعمل على أستحياء وبنوبها من الحب جانب من بطش الحكومة وبهدلتها مثل ما يحدث مع الإخوان المسلمين أو رؤساء تحرير الصحف المستقلة اللي كل شويه يتشدوا او أي حد يفتح بؤه ويقول لأ زي أيمن نور وطلعت السادات واخوه أنور وغيرهم وغيرهم

يبقى دعونا نحن كأصحاب البلد نُنمي هذا المناخ ونحسنه ..

هما بيقولوا يابو عمر إننا لسه جهله .. وأسمع شخص قميء ( مراتي سمعتني وأنا بأقول الكلمة دي إمبارح ... فبتقولي يعني إيه قميء ؟ ما علينا الظاهر حالتي بقت صعبه شويتين اليومين دول ) هذا الشخص هو لواء سابق في الشرطة وعضو مجلس شعب حالي ومش بس كده ده رئيس لجنة الأمن القومي والدفاع مش عارف إيه في المجلس ا ... بيصف ما يحدث على الساحة الأن بإنه نتيجة إستخدام خاطيء للحرية وإن الشعب المصري 60 % منه أميين وبينساقوا وراء التهييج الإعلامي للصحف المستقلة اللي هدفها تعطيل حركة التنمية وإن سبب تأخر وجود مناخ ديمقراطي سليم او تنمية إقتصادية هي الصحف والأصوات المعارضة دي

بالمناسبة الجملة الاخرانية سمعتها من الأستاذ المبجل الكبير رئيس تحرير الأهرام الجريدة الأولى في الوطن العربي السيد / أسامه سرايا اللي عايزنا نغني ونقول إن الحياة بقى لونها بمبي وإننا بناكل مربى وقشطة طول اليوم وإن المعارضة او المواقع الإلكترونية أو الصحف المستقلة بذكرها حقائق موجوده بالبلد فهي كده بتبلبل الرأي العام وبتشوشر على المناخ الديمقراطي ... او زي ما قال " مكرم محمد أحمد " إن السبب الرئيسي والأول في تخلفنا الساسي هم " الأخوان المسلمين " والله قال كده بعضمة لسانه يابو عمر ..

يبقى إحنا كأغلبية مثقفة لو سيبنا الناس اللي في وش المدفع دول يشتغلوا لوحدهم .. يبقى صراحة لا نستحق الديمقراطية وننتظر بقى حد ينزل من السماء ببراشوت يغير البلد أو نحلم إن الرئيس مات وإن في واحد جه جديد لابس أبيض في أبيض وماسك في إيده جنيهات ودولارات وعمال يوزع علينا وإحنا نايمين على جنوبنا ونتكأ على أرائكنا .