من يقف وراء اشاعة مرض الريئس مبارك

[المر]

فى الفترة الاخيرة ظهرت اشاعة حول غياب الريئس مبارك و ان السبب وراء هذا الغياب هو ان الريئس يمر بحالة صحية خطيرة و السؤال هو من الذى يقف وراء هذه الاشاعة هل هم الاخوان ام اسرائيل ام اجهزة الامن المصرى كى يعفوا ردة فعل الشعب المصرى تجاه مثل هذه المواضيع؟ :

[se_ Elsyed]

ولا واحد من دول

ليه بقى : الإخوان ... إيه مصلحتهم في إشاعة زي دي ؟

إسرائيل : دول ناس بركه وبيدعوا له آناء الليل وأطراف النهار لإن عمرهم ما هايلاقوا رئيس حبوب ومهادن ومهاود ومسماح زي مبارك .. دول بيتهيألي لو طالوا يدوروا له في السبع بحور عن إكسير الحياه هايعملوها .

الأمن المصري : برضوا ليه ... هي ناقصة بلبلة وإشاعات عشان يفتحوا على أنفسهم باب جهنم ؟

إنما في إعتقاي إن مصدر الإشاعة هو حالة الخنقة السياسة والإقتصادية اللي بيعيشها الشعب المصري ... والراجل من كتر ما كبس على نفسنا لإكثر من ربع قرن فبقينا زي اللي مش قادر يحقق هدف مُعين في الحقيقة .. فبقى يحلم احلام اليقظة وهو صاحي ويقعد بقى يهيس ويتخيل الحاجات دي .. واهو اللي ما حققوش وهو صاحي .. بيحلم به وهو نايم ...

بالإضافة إلى حالة عدم الشفافية التي نعيشها وخصوصاً فيما يتعلق بصحة الفرعون الإله أو تحركاته أو حياته او ثرواته - أسف على كلمة ثرواته فما تحتويه الأرض والانهار التي تجري في مصر هي ملك للفرعون الإله وولاده الفراعين الصغيرين ربنا يخلي -

يعني تلاقي في أمريكا او في فرنسا والدول المتقدمة إن الرئيس موظف لدى الدولة وزيه زي سيد أفندي كاتب الأرشيف في ديوان عام محافظة واشنطن دي سي ... وممكن ياخد أجازة عارضة وإعتيادية وأجازة حمل ورضاعة كمان وكل تحركاته معروفه ... فتسمع يقولك مثلاً : الرئيس النهاردة خد الكلب بتاعه وراح منتجع كامب ديفيد يضرب له يمين هناك يعمل فيهم دماغ عشان يرجع مبسوط ويعرف يحكم .... ده الحاج ساركوزي معزوم عند واحد صاحبه خواجة ملياردير وعنده مركب نضيفة وراحوا قبرص يصطادوا بط بكيني وسمك رنجا ..

إنما إحنا ... الرئيس لا يمرض ولا يكل ولا يمل ولا يفل ... ويسهر على راحة الشعب وطول اليوم عمال يضرب في سجاير وقهوة سادة محروقة عشان ما ينامش يا حبة عيني ... أنا ماليش دعوة الدستور هو اللي بيقول كده " إن الرئيس من أهم وظائفة إنه يشتغل في الشيفت بتاع بالليل عشان يسهر على راحة الشعب " وكمان الريس نفسه قال لعماد الدين أديب إن بقى له 25 سنة ما أخدش يم اجازة .... تصوروا ؟ آه والله قال كده ... بيتعب يا عيني عشاننا وإحنا ما بيتمرش فينا النعمه وعمالين نقول كاني وماني ودكان الزلاباني

اللهم صلي عالنبي ... 25 سنة محوش رصيد أجازاته .. فلو قلنا قانون العمل والعمال المصري بيقول إن " الرئيس الذي يقضي في العمل إثنا عشر شهر عمل يستحق 30 يوم إجازة مدفوعة الأجر ويجوز التعويض المادي عنها " يعني بنتكلم في 25 شهر ونقول مرتبه الأساسي 2400 ج ... يبقى ممكن محوش له دلوقت ييجي 60.000 ج .... يعني يادوب يشتري بهم عربية ماتريكس عالزيرو .. وقول عشان هو الريس فغبور هايعمله ديسكونت حلو .. نقول هاياخدها بـ 55 والخمسة الباقيين ممكن يركب للعربية كاسيت سي دي وفرش جلد ويجيب غطا قماش عشان العيال ما تجرحش البودي لما يركن العربية قدام قصر القبه ...

يا راجل بلا هم ....

[kokowawa1979]

أمس في برنامج العاشرة مساءا - أظهرت منى الشاذلي صورة مقالة ابراهيم عيسى وكانت بعنوان : الإله لايمرض . وهذه المقالة أعتقد كانت سبب إحالة إبراهيم عيسى للتحقيق - والحكومة على رأي عمرو أديب حينما تريد شد مقبس أي شخص يعني تخليها له ضلمة فده سهل بالنسبة لها !!

طلعت السادات كان سهل صيده بعبارات مايعة !!

وبالتالي ابراهيم عيسى سهل اصياده من كلماته الحماسية ضد العائلة المالكة - فقد قال ماقاله مالك في الخمر في عائلة الرئيس لكن كان التحدث عن إن الإله لايمرض - لكن الريس ممكن يمرض هي دي بقى القشة اللي قضمت ظهر البعير !!

وتوقعوا من المحامي العام لنيابة أمن الدولة أن يلفق القضية فهو أكبر ملفقاتي للقضايا على مستوى العالم وقضاياه كلها مبنية على نية المحال إليه !! ولنا في عصام العريان دلائل على مدى سقوط المحامي العام لنيابة أمن الدولة ورقه في مستنقع الفساد حيث أنه يقوم بحبس الناس لمجرد الاجتماع !!! وتلبيس قضية تعكير الصفو العام وإطلاق إشاعات على صحة الرئيس دي هاتكون قضية إبراهيم عيسى !!!

بالمناسبة بقى : في نشرة الجزيرة الاقتصادية الساعة 12,30 بتوقيت القاهرة اليوم - جاء فيها إن صندوق النقد الدولي - طلب تعهد من الحكومة المصرية إنها سوف تقوم بتنفيذ المطلوب منها في حالة غياب مبارك !!

وهذا ماجاء حرفيا في أول خبر للنشرة الاقتصادية !!

فلماذا طلب صندوق النقد ذلك من الحكومة المصرية !!!!

[عطاء بلا حدود]

الشعب كله ورا الاشاعة

لان الشعب لما صدق

بيتمنى اليوم ده ييجي

اتعلق باي بصيص امل

[القارئ]

ايه ياجماعة حسنى بخير ربنا يخليه كمان وكمان علشان لسه الحرامية اللى إحنا عارفنهم مخلصوش على كل موارد الشعب الغلبان ولسه الشعب عنده نفس ليه مايمصمصوش العظمة لأخرها ربنا يخليه ونغنى لمصر وحكام مصر ومش مهم الناس دول مقدور عليهم إتخلقو علشان يتحكمو بالحديد والنار واللى مش عاجبه أهلا به فى المعتقل وياريت يسيبه أهله لا كان غيرك أشطر كل رئس وإنتم طيبين

[الطيار المصرى]

اسهل تكذيب لتلك الاشاعة هو ان يقوم سيادته بالظهور في التلفيزيون و يورينا منظره و يكدب الاشاعة و يقول انه بخير و مستمر في مهامه المتثلة في تخريب البلد.....

لكن من يوم ما الاشاعة انتشرت وهو لا حس و لاخبر و لا حتي تكذيب في الجرايد....يا تري في ايه؟؟؟

الموضوع فيه شك....و زي ما قلتم الشعب خلاص فاض بيه مستني سيادته يموت عشان يكسر وراه مصنع قلل و يرتاح من الخلقة اللي بيشوفوها كل يوم بقالهم 27 سنة...ده احنا لو كنا مسجونين كنا خرجنا حسن سير و سلوك...

و ادينا منتظرين اخرة الحكاية دي ايه...

تحياتي....

الطيار المصري

[عطاء بلا حدود]

بالفعل هو رئيس مكروه مكروه مكروه مكروه مكروه

ده انا هعمل فرح يوم ما يموت

لكن الاعلام هيصور للاسف ان في حزن

لكن الشعب هيكون فرحاااااااااااااااااااااااااااااااااااااااااااااااااااااااااااااااااااااااااااااااااااااااااان

تم تعديل 6 سبتمبر 2007 بواسطة se_ Elsyed

[amrhoras]

ينهار أبيض كلكم عوزين عمو سونسن يموت اخص عليكم اومال لمؤاخذه لما يموت مين يسند الحراميه بتوع البلد من بعده؟

مين يهس كل كلمة حق من بعده؟

مين يخنق شعب مصر من بعده؟

مين يحطم شبابنا ويغلى علينا المعيشة من بعده؟

مين يبهدل المواطن المصرى بره بلده وجواها من بعده؟

صحيح ملكمش فيه نصيب اخص اخص اخص

عموما انا سمعت خبر من كذا مصدر وانا بكلم اصحابي من أماكن كتيير وميعرفوش بعض ان الاشاعة دى انه مات وحطينه على الاجهزة عقبال مايمسكو الخليفة بتاعه

بس ياسيدى كله محصل بعضه اللى جاى زى اللى راح ونسمع عبد الحيم من تانى وهو بيقول ظلموه

الكل بيحسب موته هو الحل المشكلة فمين اللى حيمسك الحكم

ما اقولكم ايه احنا اخوان و اخوات فى بعض ماتمتخبونى ينوبكم ثواب ولكيم عليا اتعب العب اكتر واكتر هههههه كدى وكدى عشان انجح ف الانتخابات

شكرا ولا تعلق

[mesryforever]

بسبع ترواح

يا جماعه دي طلعت إشاعه مش هو قابل الملك عبد الله ملك الأردن يوم الثلاثاء في الأسكندرية ولا إيه

اللهم ولي علينا من يخافك ويخشاك ياكريم

[se_ Elsyed]

وتوقعوا من المحامي العام لنيابة أمن الدولة أن يلفق القضية فهو أكبر ملفقاتي للقضايا على مستوى العالم وقضاياه كلها مبنية على نية المحال إليه !!

تخيل بقى إن محامي عادي ماشي في الشارع هو صاحب الدعوة ؟

زي القضية اللي كانت مرفوعه من أهالي بولاق الدكرور العام الماضي ضد إبراهيم عيسى بتهمة إهانة الرئيس .... تخيل

عاش أهل بولاق الشرفاء الحلوين حبايب الرئيس .

بس عندي لك حته ... والله ما بأطلعها الا للحبايب يا كوكو

خد العنوان لارئيسي ده من الجمهورية

ثلاث تهم تواجه عيسي أمام أمن الدولة

مندوب السفارة الأمريكية تواجد مع جميلة و"كفاية" و"حقوق الإنسان"

كده بقى إبراهيم عيسى بقى عميل وبيمبريالي وبابور جوازي متسلق وبيقبض من السفارة الأمريكية بالين الأمريكي .

ده بالإضافة إلى تورطه في قضية أيمن نور لإن .. جميلة دي هي المذيعة والإعلامية جميلة إسماعيل زوجة أيمن نور ...

تهمة متستفة وجاهزة ومنتظرة الأكل يا معلم .

[رمضان]

يا جماعة سبب الكلام ده كله هو تصريح السفير الامريكي بالقاهرة الذي قال ان واشنطن قلقة بشأن صحة الرئيس مبارك وبعدين نفوا الكلام ده وقالوا ان الترجمة كانت خاطئة

تم تعديل 6 سبتمبر 2007 بواسطة رمضان

[se_ Elsyed]

يحزُنني جداً وجود بعض الألفاظ الخارجة والتي يعاقب عليها القنون في مثل هذه الموضوعات

ويحزُنني أيضاً أن نردد كلمات لا تصدر إلا من ناس فاضية قاعدين على القهاوية كلها همها القيل والقال وسمعت أن ..

مثل إختفاء الرئيس منذ إطلاق الإشاعة .. او إنه مات ومعلقين له أجهزة وإن الي بيظهر ده هو بديل له !!!!!!!!!!!!!!!

عيب يا جماعة

إذا كنا ننتقد الرئيس فلابد أن يكون نقدنا موضوعي ..

وللأمانة وللي ما يعرفش ولا بيتفرج على التليفزيون في برامج على الهواء ..

الرئيس اليومين دول في حالة نشاط وقبل إطلاق الإشاعة زار القرية الذكية وبعدها بأيام قليلة برج العرب ... ثم مدينة سوهاج الجديدة ورجع إلى رئيس التين بالإسكندرية ليقابل عدة رؤساء وملوك دول ....

قبل أن نتمنى رحيله علينا الفكير فذ نظام يحكمنا وعلينا التفكير أكثر في " مستقبل مصر بعد مبارك "

[mohamedez]

بالله عليكوا

واحد عنده 80 سنة ، لازم يبقى صحته على قده بقلكوا 80 سنة معقولة هيبقى زى واحد عنده 60 سنة

ربنا يرحمنا الناس كلها بتطلع معاش الا الرئيس

[زعلان]

عجيب مر الدول العربية مصيرها مرهون برؤسائها .......... يعني لو مات الرئيس ولأنه النظام فاسد و لا توجد دولة بالمعنى المعروف تضيع البلد ولأن الرئيس بيفضل رئيس لحد ما يقطع النفس ايا كان طريقة قطع النفس .......... لا يوجد اسوء مما يعيشه المصريون الان وسواء عاش الرئيس او مات الرئيس الفرق لن يكون كبيرا لأن الفساد هو الحاكم الشرعي للبلاد .........

بكره يعملها مبارك النمس و يرشح نفسه في انتخبات الرئاسة الجاية ومش بعيد يجيله عقد عمل في ليبيا

[salemhegazy]

يا اخونا ابراهيم عيسى بيتحاكم علشان سبب و احد ان السيدة الاولى قالت اللى اصدر الاشاعة لا بد يتحاسب فلازم ينفذوا كلامها هؤلاء المرتعشين ما دام قالت يبقى لازم فيه قضية و تحقيق انهم اذلاء يعبدون البشر

لك الله يا مصر و حسبنا الله و نعم الوكيل

[عطاء بلا حدود]

في راي بيقول

ان الخبر ده وراه رئاسة الجمهورية

عشان لما الراجل يموت بجد ويختفي فترة عقبال ميظبطو جيمي او الحرامي اللي بعده

محدش يفتح بوقه

ولو حد فتح بوقه هتبقة اشاعة زي اللي فاتت

ده راي برده