الى الأخ طفشان و كل الطفشانين

[Farida]

و الله كل ما أقرأ مداخله للأخ طفشان اتسأل خسارتك فى الطفشان و كل ما أعرف ان واحد من المشاركين هو كمان طفشان بره مصر اقول حرام و الله ليه ما تحاولوش ترجعوا و تصلحوا احنا اللى قاعدين هنا مش قادرين لوحدنا ..... انا عارفه ان كل حاجه فى بلدى بتطفش الناجح لكن مين اللى حايصلحها اذا كلنا طفشنا .... انا مره باتكلم مع واحد عادى جدا و با سأله ليه ما بيشتكيش لما بتقابله مشكله قاللى يا مدام البلد مش بتاعتنا دى بتاعتهم .....عايزين بلدنا ترجع لنا تانى عايزين نصلحها و ما نسبهاش لهم يخربوها و يقعدوا على تلها ...

[ابو حلاوه]

عارفة يا اخت فريدة... انا بقي باوجة رسالة للي لسة ما طفشوش انهم يطفشوا

يطفشوا لان العالم واسع ... و لان الظروف بتاعتنا حاليا لا تسمح لاي انسان مجتهد و منتج انه يلاقي حقة و قيمتة في الظروف الصعبة الموجودة حاليا

مش معني كدة ان بره مصر جنة .. لا .. الحياة قاسية و صعبة .. لكن فيه ثمن للجهد و فيه ثمار للعمل ..

و المصري اللي بينجح بره .. مش بينجح بس ده بينجح مصر كلها معاه..

و يكفي ان مصري بيستطيع ان يثبت و جوده في موقع علشان الموقع ده يتفتح امام العديد من المصريين الاخرين

و المهندس اللي بيعاني من البطالة في مصر و الطبيب اللي مش لاقي ياكل .. لان لحاليح الحكومة مش كفاية للشاي و السكر

العالم امامهم ... و كل واحد من دول بيطلع بره مصر بيخلق عدة فرص .. فرصة لنفسة بره .. و فرصة لاخر في مصر .. و فرص لاخرين بعده برة مصر...

العالم الغربي محتاج لذوي الياقات البيضاء... بالذات اليومين الجايين دول

تعليم طبيب متخصص بيحتاج ل10 سنوات و مهندس 5 سنوات الخ

و الهرم السكاني مقلوب و احتياجات التنمية لا تنتظر .... و المحافظه علي مستوي المعيشة الحالي هدف اي دولة غربية ان لم يكن تحسينة

فرصتنا نحن المصريين موجودة و التعليم بتاعنا مش وحش و ان كان مش ممتاز .... و وجود مصريين في الشريحة العليا من الي طبقة متوسطة في دولة غربية قوة لمصر و اثراء للدولة الغربية

و اثراء لمصر

[فتوح]

المشكله يا اخت فريده اكبر من كده بكتير

الناس اللي في مصر مش عاوزين الناس اللي هاجرت ترجع مصر تاني او مش محتاجينهم زي ما بيقولوا، اني حاولت و مازلت احاول ان اعود الي مصر لكن مشكلتي كبيره ، حيث ان تخصصي نادر و من يعمله في مصر قله و طبعا الشغل الخصوصي بيتقسم. و هما مش عاوزين شريك حتي بعد ما قلت اني مش عاوز خصوصي و عاوز فقط شغلانه في مكان اقدر امارس فيه اللي اتعلمته و عاوز افيد الناس بيه، و ذهبت الي مدير احدي المؤسسات الكبري في مصر و التي تعمل في نفس المجال لطلب شغل فقال لي، هو حضرتك تعرف الوزيز؟ و لما قلت لا قال لي لازم واسطه من سياده الوزير لكي تحصل علي عمل كطبيب مبتدئ لمده عام غير قابل للتجديد، الموضوع صعب فعلا و ان كان عندك حل او كنت من قرايب سياده الوزير كلميهولي الله يخليكي

[yasser6666]

لكن مشكلتي كبيره ، حيث ان تخصصي نادر و من يعمله في مصر قله

لو سمحت لي يا اخ فتوح هو تخصصك في ايه بالضبط ؟؟

[amir]

يا ترى هل تساعد عودة الطفشانين فى أصلاح الاوضاع فى مصر ؟

لو أفترضنا شخص امضى عشرون عاما خارج مصر ، عمل فيهم بجهد لتكوين وضعه الاجتماعى و الوظيفى ، ثم فكر فى العوده ...فهل يستطيع الحصول على وظيفه تعادل ما وصل اليه سواء فى الحكومه أو القطاع الخاص أو فى سلك الجامعه ؟ ... وهل اذا فكر فى الأستثمار فى مشروع معين ـ بعد أن فقد جذوره ـ فى مصر .. هل سيكتب له النجاح ؟

معظم التجارب التى أعرفها شخصيا كانت الأجابه بالنفى للأسف .

[فتوح]

التحاليل الخاصه بزراعه الاعضاء

[بنت شعنونة]

:cry: :cry:

طب واللي لاقي نفسه تايه؟

يتصنف ايه؟؟:( :?

ولو كل واحد فيكوا حب يصنف نفسه من اي فئة..

بالأمانة ها تبقوا في ايه؟؟ وايه دليلكم؟؟ :roll: :roll: :? :? :oops:

[بنت شعنونة]

:cry: :cry:

دا ايييييييييييييه التخلف اللي انا فييييييييه داااااااااا

:roll: :roll: :roll: :roll:

لامؤاخذة.. لا مؤاخذة..

دي كانت رد في موضوع الأونطجية

سوررررري سووووووورييييي :roll: :oops: :cry: :cry:

اما هنا بقى

فنصيحة

اي طفشان

خليه مكانوا.....هنا بيطفشوهم اصلا..

لأنه المكان اللي فضي قعد فيه خمسة ستة... يبقى ما فيش مكان

:(

[wa7d]

قررت فى الثمانينات أن أرجع إلى مصر ، وكانت غلطة خسرت فيها الكثير . وبعد أن رأيت ما رأيت فى مصر رجعت إلى الغربة مرة أخرى . ومن واقع تجربتى الشخصية أأيد الأخ حلاوة فى دعوته إلى كل مصرى يجد فى نفسه القدرة على العمل بدون اللجوء للفهلوة أو الحداقة ، أقول له حاول أن تترك البلد فورا فإن مواهبك ليسي لها فائدة فى مصر :oops: :shock: وكل يوم تقضيه فى مصر تخسر فيه الكثير . وبهذه الطريقة نحفظ الجيد من أن يعلوه الصدأ أو يمشى مع الماشيين . وإذا تغيرت الأحوال وظهر بصيص أمل وكان النظام الجديد يريد أن تعتمد مصر على نفسها سيدعوا المصريين فى الخارج يأتوه سعيا .

أنا آسف وجودى فى الخارج وتجاربى فى بلدى جعلنى أفهم الآية (260) من سورة البقرة بطريقة مختلفة تماما ــ عندما سأل إبراهيم عليه السلام ربه وقال ربى أرنى كيف تحيى الموتى ، إنه كان يريد أن يعلمه سبحانه كيف يغير قومه الذى وصفهم بالموتى ـ والأرض التى لا تنتج هى أرض ميته واللّه يحيى الأرض بعد موتها ـ فقال له ربه أأتى بأربعة من الطير وصرهن إليك ـ أى ضمهم إليك ـ أعطهم رعاية وحب ، ثم إجعل على كل جبل جزء منهم ـ الواحد جزء من الأربعة ـ ثم إدعهم يأتوك سعيا . أرجوا ألا يتهمنى أحد بالكفر لأننى تجرأت وطبقت القرآن الكريم على وضعى الحالى ، ربما يكون مجرد شعور بالغربة .

[الطفشان]

الاخت فريدة

اشكرك على الاطراء

انا لم اكتسب كل ما اكتسبت من خبرة و اطلاع بسبب الخارج وحده

الاصل اتبنى في مصر، و لكن التربة المناسبة للنمو كانت في الخارج، طبعا مع السن و الخبرة و القراءة

و نرى هنا الكثير من الامعات السطحيين، فهذا ليس حكرا علينا

بخصوص الهجرة لا استطيع ان اصف "وصفة" عامة للجميع فاقول الكل يهاجر او الكل يظل في مصر

كل واحد و ظروفه

[EBN ELBLD]

سؤال لم اجد اجابه له

هل نحن كمغتربيين تغيرنا ؟ ام الناس فى مصر تغيرت

وهل تم التغيير للأسواء ام للأحسن ؟

هذا بغض النظر عن مستوانا الاكاديمى او الحرفى كمغتربيين

اريد العوده الى بلدى كى أُدفن بها لقد اشعتل الرأس شيباً وبلغت من الكبر عتيا

[disappointed]

:oops:  :oops: 

دا ايييييييييييييه التخلف اللي انا فييييييييه داااااااااا

:roll:  :roll:  :roll:  :roll: 

لامؤاخذة.. لا مؤاخذة..

دي كانت رد في موضوع الأونطجية

سوررررري سووووووورييييي :roll:  :oops:  :oops:  :oops: 

:(

:lol: :cry: :) :)

نصحى مع بعض شويّه بقى

مش كده

:) :D :D

[وحداني]

الاخ ابن البلد

احنا فعلا اتغيرنا، حاجات كويسه و اخري مش كويسه

احنا بقينا باردين

ما نستحملش الزحمه و تعطيل الحال بدون سبب كما في المصالح الحكوميه

لم نعد حشريين و مانحبش حد يتدخل لنا في حاجه

اتعودنا الا نشارك الاخرين افراحنا و احزاننا لانها لا تهمهم، ده اللي جه في بالي دلوقتي و اكيد فيه حاجات تانيه كتير

[الطفشان]

هل نحن كمغتربيين تغيرنا ؟ ام الناس فى مصر تغيرت

وهل تم التغيير للأسواء ام للأحسن ؟

في رأيي الاثنين اتغيروا

احنا اتعودتنا على النظام و النظافة و الصدق و الامانة

و في مصر ارى الناس تغيرت للاسوأ، لانهم يا اما يجاروا الجو، يا اما يتاكلوا

اريد العوده الى بلدى كى أُدفن بها  لقد اشعتل الرأس شيباً وبلغت من الكبر عتيا

ما تفرقش الواحد فين يموت و فين يندفن

كلها ارض الله، و المهم الاعمال بالخواتيم

[EBN ELBLD]

ما تفرقش الواحد فين يموت و فين يندفن

بس يا طفشان يا خويا الاسبوع اللى فات توفى احد المصريين هنا تعرف كام واحد كان فى الجنازه؟ 3 افراد !!!!!!

وماحدش فينا يعرفه او له اى علاقه به

أيه رأيك؟

[ابو حلاوه]

لحظة السفر و الاغتراب لاول مرة .. لحظة مرعبة ... لحظة ترك المطار و الواحد عارف انه هيغيب سنين و سنين لحظة ما اعتقدش ان اي واحد فينا نسيها و هيفضل شايلها معاه في ذكرياته

و لحظة وصولة الارض الغريبة و الانطباعات الغريبة و المقارنات التي لا تنتهي الخ... فاكر اول عربية و اول تليفزيون و اول و اول و اول الخ

كنت دائما بافتكر فلاح كفر الهنادوة

بعد سنين دي بقت حياتي... اتغيرت و غيرت ناس حوالي و عقرب الساعات مر و انا تطورت .... و كل ما باشوف اللي سبتهم ورايا في مصر .. ما باندمش علي القرار اللي خدته .. و مش معني كدة ان انا في وضع احسن اطلاقا.... انا فقط خدت القرار اللي يناسبني

و اللي يناسب ظروفي

و الرجوع النهائي فكرة مش باستبعدها مطلقا.. ليه لا ؟

ممكن بس في حالة واحدة بس لو هارجع مصر .. امص قصب و اصطاد سمك و اكتب في محاورات المصريين .. يعني بعد لما اكون خلاص مش محتاج اكسب فلوس ... ثاني ... و لما اكون متاكد ان لما احب اسيب مصر ثاني الف فرصة هتتفتح لي برة.........

مصر بلدي و انا باعشقها و باعشق ترابها ....

لكن حبها في الظروف دي من الافضل انه يكون من بعيد لبعيد ....

[وحداني]

ايه يا عم ابو حلاوه يعني لازم تقول الكلمتين دول،،، حرام عليك الواحد مش ناقص

[الطفشان]

ما تفرقش الواحد فين يموت و فين يندفن

بس يا طفشان يا خويا الاسبوع اللى فات توفى احد المصريين هنا تعرف كام واحد كان فى الجنازه؟ 3 افراد !!!!!!

وماحدش فينا يعرفه او له اى علاقه به

أيه رأيك؟

ايه المشكلة؟

الموضوع مش مظاهر

اللي مات فقد افضى الى ما قدم

يعني عمله هو اللي حينفعه او يضره

تفرق ايه لو رئيس جمهورية ظلم و سجب و عذب و تكبر و عمل البدع

او رجل اعمال جمع فلوسه من حرام

او رجل دين افتى للحكومة باللي هي عايزاة في كل صغيرة او كبيرة

او فنانة فتنت الناس بتمثيلها او سيرتها

تفرق ايه لو ماتوا من غير توبة و صلى عليهم اكبر شيخ في البلد و ييجي مليون واحد مشوا في الجنازة و صلوا عليه؟

حينفعهم بايه؟

او افرض واحد مات غرقان في البحر من غير جنازة

او واحد مات في انفجار او حريقة او غير كدة؟

يضرهم بايه دة؟ و لا حاجة

احنا مش زي الاديان التانية اللي لازم فيها رجل دين يصلي على الميت و الا ما يدخلش الملكوت، لانها من اسرار الكهنوت

ماعندناش الكلام دة

الموت اتي لا محالة لكل شخص، و ازاي ييجي و امتى، دي بتاعة ربنا

تعددت الاسباب و الموت واحد

العمل هو المحك