نصيحه لوجه الله ... ربوا العيال وسيبوها لأصحابها

[DARWEEN]

أخواتي وأخواني أعضاء المنتدى الكرام

يعلم الله أنكم جميعا أعزاء جدا على قلبي صغيركم وكبيركم

ومن منطلق هذه المعزه سأقص عليكم ماحدث لي في الأسبوع الأخير .....والتي توقفت فيه عن الكتابة وحتى الأطلاع على المداخلات في المنتدى

حين عصفت العواصف بمنتدانا الحبيب جلست أيام أترقب تطور الأحداث حتى أستقر الوضع على فتح باب السياسة مرة أخرى بقائمة ممنوعات ... وأقسم لكم جميعا أني ليلتها لم أنم وجلست أفكر وأفكر (من غير فيل أبيض ) وفجأتن لقيتها مسدوده زي الدومينو ....

كلام في البلد ممنوع ... كلام في الشارع ممنوع ... كلام في الجرايد ممنوع ... كلام في منتدى في الأنترنت ممنوع .... طيب بلاش نتكلم عن أسمه أيه وأهله .. وبلاش نتكلم عن الأحزاب واللي منها وبلاش وبلاش ... أمال نتكلم عن أيه ؟؟؟ عن الطقس ؟؟؟

قلت لنفسي يانهار أسود أمال أحنا عايشين ليه ؟؟؟ هي دي بلدنا ولا أحنا ضيوف تقال على أصحابها ...

المهم مش حاطول عليكم فجأتن ... وجع في الصدر .. أزمة تنفس ...

مستشفى ..طواريء ... أنعاش ... خير ياولاد ...

جلطه في القلب

وخد عندك ... قسطره وبالونه ودعامه ولولا ستر ربك كان المفروض خدت لقب مرحوم ..

وأنا في المستشفى حسبتها .... كان مين حيربي العيال ؟؟؟

وعنها وقلت شكرا جدا ... خلي البلد لأصحابها وبلاش أتثاقل عليهم أكتر من كده وخليني ضيف خفيف ..

الخلاصه انا جيت النهارده خصوصي علشان أنصحكم نصيحة أخ لأخواته .... ربوا العيال وسيبوها لأصحابها وبلاش رخامه وتقل دم بلدهم وهماأحرار فيها ...

اللهم بلغت اللهم فأشهد

السلام عليكم

[Taher Deyaa]

سلامتك يا دارون

[Mohammad Abouzied]

حمد الله على سلامتك يأخ دارون

المسألة مش مستاهله ابدا

نحن عدة افراد من سبعون مليون فرد

فلا تحمل نفسك اكبر من قدرتها

فقط قل الى عندك ودع الخلق للخالق علشان يرتاح ضميرك فقط

[freefreer]

الف لا بأس عليك أخى دارون .. و الف حمدالله على السلامة .. طبعا بحكم اتصالنا ببعض عرفت هذه الأخبار المزعجة قبل الآن .. و لم اشأ الكشف عنها بدون إذن من صاحبها ..

المهم أسوق هذه القصة لبعض الإخوة و الأخوات الذين اتخذوها فرصة للتندر او الصيد فى الماء العكر .. و كأنها فرصة للفكاهة أو لأكتساب الحظوة لدى السادة .. على حسابنا و حساب مصر ..

[Sharkiah]

ألف مليون حمدا على سلامتك يا أستاذ دارون

رسالتك دى تغلغلتنى ومست أعماق أعماقى ؛ والله سأدعو لك بعد كل صلاه ولو بإسمك المستعار الذى إستخدمته هنا

أنا عن نفسى وصلت لنفس قناعتك وقررت بصرامه عدم المشاركه فى أى نقاش فى قسم السياسه بعد التطورات الأخيره ـ لدرجه إنى كتبت مداخلتين فىمناسبتين مختلفتين ولكنى عندما همت بإرسالهما ألغيتهما قبل الإرسال ـ وها أنا أشارك هنا فقط لأقول لك مره ثانيه حمدا لله على السلامه وألبسك الله ثوب العافيه دائما وجعلها آخر الآلام بإذنه تعالى

فعلا معك كل الحق ؛ فلنتفرغ لمناقشات عن الأمثال الشعبيه والمسلسلات والكوره وشرعيه الزواج العرفى ـ ولكن شريطه ألا نتطرق أيضا للجانب السياسى من هذه الموضوعات

وما دام الشئ بالشئ يذكر ؛ فهناك أيضا أخوه أفاضل طال غيابهم عن المنتدى ونسأل الله ألا يكون قد أصابهم مكروه ؛ أذكر منهم على سبيل المثال طــه وأرابيسك وبايت

[dimage]

الف سلامة يأخ دارون

نصيحتك ، في محلها

يعني احنا حانتكلم ، ونزعج نفسنا لية

دة اذا كان بسلامتهم مثقفين البلد واحزاب الندامة والريادة مطنشين

خلينا نركز علي باب السياسة العالمية خصوصا بعد الخبر السقع اللي ظهر اليوم

قال اية حصلت في كينيا انتخابات نزيهة وفاز فيها حزب المعارضة ضد رئيس الجمهورية بنسبة 75 % ؟؟

حتي كينيا ياظلمة ؟؟

[تصحيح]

ألف سلامة للاستاذ الكبير دارون

استاذ / دارون :

أنا متأكد كلها كام يوم و غصب عنك من حبك لمصر حترجع ناني

البلد بلدنا

و الوجع وجعنا

رضينا و لا مرضيناش الوجع جوه القلب بينقح و يقول غصب .. عني قريب و لا بعيد .. بحبك يا مصر

و مش معقول نربي العيال و نؤدبهم و نعلمهم و نكبرهم و بعدين لما يكبرو يعيشوا عيشة العبيد .. حرام .. حرام

استاذنا دارون

تعلم أكثر مني أن الحرية تؤخذ و لا توهب

تعلم و تؤمن أكثر مني أن خالق العيال سبحانه هو وحده راعيهم

و علينا الا ننسي حديث أشرف الخلق صلي الله عليه و سلم

( أوصيكم بأهل مصر خيرا ففيها خير أجناد الأرض )

و لنحسب أننا جنود من أجل الخير لاهل مصر

و سلام للحبيب دارون و الاخوة الكرام

..

[مصرى]

سلامتك يا داروين يا صديقى انشلله عدوينك واللى ما يتسماش اللى فى بالى .. قول يارب ..

صحيح والله .. ده أحنا ما حصلناش كينيا .. يحيا دانييل أراب موى

لكن احنا مالنا .. بالحاجات دى .. أقترح بعض الموضوعات التى يمكن أن يدور النقاش حولها فى العشرين سنة القادمة

- هل المنيكير ينقض الوضوء أم لا ..

- حكم الشرع فى زواج الانس من الجان ..

- عذاب القبر .. هل يبدأ قبل الدفن ولا بعد الدفن ..

- هل برنامج حسين الامام الأحلى ولا برنامج الكاميرا الخفية ..

- ما هو الفريق المرشح لبطولة الدورى الأهلى ولا الزمالك ولا الاسماعيلى ..

- ايه رأيكم فى عمرو دياب ..

وطبعا كلها قضايا حياتية شائكة وحيوية وتحتاج الى مناقشات واسعة ومستفيضة يمكنها أن تستغرق 20 عام بالتمام والكمال .. وربنا يعطيكم العافية ..

[ragab2]

ألف

سلامة ياعمنا العزيز داروين

ماتزعلش نفسك

ماحدش واخد منها حاجة وانتبه لصحتك

تحياتى

[molham]

الف سلامة يا استاذ دارون

[ابو حلاوه]

يا نهار أبيض ..كل ده حصل وأنا مش عارف... ده انت الوحيد اللي ادتني صوتك ضده ... :cool: و اخد بالك معايا .

المهم الف سلامة عليك يا داروين و الف عافية

[Hassan]

الف لا بأس يا استاذ داروين.

وقول الحمد لله قضى اخف من قضى.

الف سلامة يا عزيزى.

[الأفوكاتو]

عزيزى الأخ داروين,

تمنياتى لك بكمال الشفاء, و نطلب من الله أن يلطف بعباده.

كلنا يا عزيزى أصبنا بإحباط, لكن الحياة لن تتوقف,

ألف سلامة.

[الصاوى]

حمدا لله على السلامة يا عزيزى داروين

اطمئن ولا تشغل بالك يا أخى ربنا كبير وهو يمهل ولايهمل

نسأل الله العافية لنا ولكم ولكافة المسلمين

[الطفشان]

الاخ داروين

الف حمد الله على السلامة

كل دة علامة غيرة شديدة على بلدك و حب مفرط لها و ارادة الاحسن لها دائما، بالرغم من وجودك في الخارج

انا مش حابطل

و غيري مش حيبطل

و كلها كام اسبوع نقاهة و نشوفك معانا تاني

و الي الجميع اقول:

"خلينا نربي العيال" و "هي بلد ابويا" و غيرهم هم اللي وصلونا للي احنا فيه، و لو استمرينا في هذا المنطق فاحفادنا حيتخانقوا على حتة رصيف يناموا عليه و صندوق زبالة ياكلوا منه

[مصرى]

معاك كل الحق .. مصر بلدنا رغما عن أنف التخين .. ولا يمكن أن نسمح لأى أحد أن يجعلنا نعيش ضيوف فى وطننا .. الشعب هو صاحب السيادة وسيأتى يوم قريب ان شاء الله ينحنى فيه المكابرون لارادة هذا الشعب

[disappointed]

عزيزى الفاضل داروين

ألف ألف ألف سلامه عليك

أزعجتنى هذه الأخبار , والحمد لله على سلامتك

قلبك حدييييييييد يا راجل

وياجبل ما يهزّك ريح

خلليك وسطنا....لأنك بتوحشنا

:inlove:

[Khiber]

أخى دارون

ألف سلامه عليك ربك يمهل ولايهمل والأيام دول وبقاء الحال من المستحال علي كل فرد على أرض مصر الطيبه أن يفعل قدر مايستطيع ولا ينظر للنتائج وبكره تفرج إنشاء الله وربك كبير

[Sherief AbdelWahab]

ألف سلامة عليك يا أستاذ داروين...

هون عليك ...دا قدرنا...

الأستاذ مصري لخص كل الكلام...

والكلام ليكي يا جارة...يا صحيفة "حرية تكفي لألف صحيفة"!

خلص الكلام

[فتوح]

الاخ العزيز داروين، اسال الله العظيم رب العرش العظيم ان يشفيك،اسال الله العظيم رب العرش العظيم ان يشفيك،اسال الله العظيم رب العرش العظيم ان يشفيك،اسال الله العظيم رب العرش العظيم ان يشفيك،اسال الله العظيم رب العرش العظيم ان يشفيك،اسال الله العظيم رب العرش العظيم ان يشفيك،اسال الله العظيم رب العرش العظيم ان يشفيك،

و لايهمك البلد هيجيلها يوم تكون فيه كويسه باذن الله، ان مكانش علي ايدينا هيكون علي ايدين ولادنا اللي لازم يعلمهم ان المصري لازم يحب كل المصريين و يكون في عونهم دائما، عسي ان يكون هذا الحب معديا و ينتشر في كل المصريين بنا فيهم ولاه الامور فيكونوا عند ذلك احرص علي مصلحه البلد، اللهم امين