نظيف : مصر ستصبح نمراً إقتصادياً سنة 2020

[se_ Elsyed]

اللي عاجبني في الموضوع ده .. الرقم المميز 2020 ... ممكن ينفع رقم عربية او نهاية رقم موبيل مميز ويتباع في المزاد واهو يجيب له قشين حلوين ...

إليكم الخبر الليي جاء في الأهرام بإقتضاب وبعدين ننظم عمليات التعليقات .. وكل واحد هاياخد حقه ويقول اللي في نفسه

أعلن الدكتور أحمد نظيف‏,‏ رئيس مجلس الوزراء‏,‏ أن مصر في طريقها إلي أن تصبح دولة متقدمة بحلول عام‏2020‏ ونمرا اقتصاديا لإفريقيا‏,‏ مع اكتمال برامج الإصلاح الاقتصادي‏,‏ والاندماج في الاقتصاد العالمي‏.‏

وقال نظيف ـ في لقاء مع شباب قادة المستقبل الإيطالي ـ إن تحقيق هذا الهدف ليس صعبا بعد أن نجحت مصر‏,‏ خلال الأعوام القليلة الماضية‏,‏ في تحقيق إنجازات اقتصادية ملموسة‏,‏ حيث وصل معدل النمو في العام إلي‏7%‏ وزاد حجم الاستثمارات الأجنبية إلي‏11‏ مليار دولار‏,‏ وكذلك عائدات قناة السويس‏,‏ وتحويلات المصريين في الخارج‏,‏ والسياحة‏.‏ وأكد نظيف ـ علي هامش أعمال منتدي أمبرزوتي الاقتصادي ـ أن الحكومة تسير بخطوات واسعة نحو تنفيذ مشروعات مياه الشرب والصرف الصحي‏,‏ وتحسين الخدمات التعليمية والصحية‏.‏

اللي غاظني في الموضوع إن إيطاليا برضوا عندها موضوع شباب المستقبل زي العيال بتوع جلال مبارك عندنا ... ومع ذلك محترمين ومتقدمين ...

ومع إحترامي لرئيس الوزراء الطويل أحمد نظيف .. إلا إني عايز أفكرة بمثل شعبي كانت بتقوله ستي الله يرحمها ويحسن إليها أيام ما كانت عايشه في الفلاحين .. ومعليش إ حنا ما كناش نعرف كلمة تيته وجدتي أو الجراند ما .... فكانت بتقول " قالك أبو فصاده بيعجن القشطة برجليه ... قالوا كان بن على عرقوبه "

يعني إذا كانت البلد إتباعت وخربت خراب مستعجل في 26 سنة من حكم مبارك ... وإحنا دلوقت في سنة 2007 يعني فاضل 13 سنة على 2020 ... إيه ؟ هما كانوا عايزين يخربوها الأول ويجيبوها عالمحارة وبعدين يجيبوا مقاول يشتري الأنقاض ويبنوا البلد من أول وجديد على نضافة وميه بيضا خلال الـ 13 سنة دول ؟

طب تيجوا نلعب لعبة ظريفة من إختراعي ؟

عايزين نحسب كل واحد هايبقى عنده كام سنة ساعتها ( النساء يمتنعون مش عايزين إحراج )

- هأبدا بكبير الفخايدة .... بالصلاتو عالنبي سنة 2020 هايبقى عنده 93 سنة ... اللهم زيد وبارك وأقصف عمرنا عشان هو يعيش يارب وكتر من فيتاميناته ومقوياته وصبغاته .

- إبن كبير الفخايدة الأخ جلال مبارك ... هايكون ساعتها عنده 60 سنة .. يعني قمة العطاء والحكمة والرجولة وأكل الزبادي وأنا قلقان قوي لإن بقى له 4 شهور أهو متجوز ومافيش أي أخبار عن حاجه جايه في السِكه ... لأ ما ينفعش كده .. أنا عايز سنة 2020 يكون عندنا ولي عهد حلو كده ومقطقط وعنده 13 سنة .. أهو يكون يادوب يقدر يحبي و يلعب بالشعب بتاعه ويبدأ مشوار الحُكم بقى خلينا نفرح بيه .

- أونكل نظيف صاحب البؤ الحمضان ده .. هايكون بيلعب ساعتها يمكن في الثمانين خريفاً ... وأحلى أطقم سنان واحلى عكاكيز ... ولما نوصل 2020 ونفكرة ساعتها ونيجي جنب ودانه ونزعق ونقول " يا جدو نظيف إنت قلت سنة 2020 هانبقى نمر ... وأهو الساعة داخله على 5 وربع سنة 2021 وما بقيناش قطة بلدي ومريتانيا اللي هي موريتانيا بقت عندها حقالفيتو في مجلس الأمن وبقت اكبر مُصنع للسيارات في العالم بعد اليابان والصومال ... نعمل إيه فيك دلوقت ؟ نمد إيدنا عليك ولا ننفخ فيك نجيبلك ساكته قلبية ؟ " طبعاً الضرب ساعتها هايبقى حرام في واحد ميت .

- المعلم سين سين صاحب أكبر توكيل لمصانع شكاير الأسمنت الفاضية هايبقى عنده 50 سنة ويالله حُسن الختام ويكون ساعتها جايب له بلاي ستيشن ناين وقاعد يلعب ألعاب حرب المعيز أو سباقات سبيد 5 ... وبرضوا المعلم سين سين ما بيقطعش تذاكر .

- ولي العهد عُمر سين سين هايبقى شاب مراهق وعنده 20 سنة ... وساعتها هاكون شاحنه وقايل له " أمانة عليك يا عمور لو سبقتني وعشت يا ولدي لسنة 2020 ... خد بتار أبوك يا عمور من جبيلة النظايفة و أول ما تلمح حد منهم في النجع تنزل فيه ضرب من غير تفكير وتقوله : ده ذنب حسن الهلالي يا بتاع 2020 ... بالمناسبة أنا عارف بيت أونكل نظيف في 6 أكتوبر وهازرع هناك غيط دُره وألبد له فيه أنا وعيالي لحد سنة 2020 .

يا سيد نظيف يا بتاع المعدلات والحركات ... اللي عايز يبقى نمر عمره ما يبيع بلده ... وبمناسبة البيع وموسم الأوكازيونات الصيفي .. أحدث صيحة في عالم البيع هو بيع جامعة الإسكندرية وفتحنا المزاد بـ 12 مليار جنيه وهاتتنقل الجامعة لمقرها الجديد في أول طريق الإسكندرية الزراعي .... وبما إننا بنشجع سياسة البيع فالبلد عامله بيج أوفر .. يعني تشتري جامعة الإسكندرية يلفولك معاها مستشفى الشاطبي مجاناً .... يا بلاش .. هــأ حد جاي وقال أنا شيلت يا معلم سين سين وربنا يباركلك ؟

أقولكم خبر يجعل القلب يقطر دماً ؟

معظم المباني الجديدة بالجامعة مبنية في السبعينات ... تخيلوا لحد دلوقت ما فيش محضر رسمي بإستلام المشروع والمقاولين والحدادين ونجارين المُسلح واقعين في بعض والمباني قايلة للسقوط ؟

تخيلوا حجم الفساد المتوارث ؟

تخيلوا جامعة من ضمن افرع التعليم عندها " كلية الهندسة " بتعلم أبناءها الهندسة المعمارية في مباني ما فيش عليها إستلام رسمي ومسلوقه ومتلكلكه وكل واحد شارك في البناء أخد هبرته ومشي ؟

تخيلوا ؟

يا أونكل نظيف ياللي عايز تبقى نمر .... اللي عايز يبقى نمر ما بيبعش مصانع الأسمنت اللي بتكسب من الهوا إلى مستثمرين إيطاليين وفرنسيين ويرفعوا الأسعار في أقل من 3 سنوات إلى أكثر من 300 % ويتحكموا في مصير البلد ... ويرجع يقول من شهر إحنا هانضع حجر الأساس لـ 14 مصنع أسمنت جديدة .... وموت يا حمار وإبقى قابلني !!! إنت بتتكلم عن مصانع إنتاج من نوع خاص مش كشك سجاير هاتبنيه بين يوم وليلة .

وزيادة على ذلك بص على اليميي جنبك للأخ أحمد عز .. وشوف العز اللي بقى فيه من إحتكار 70 % من تجارة الحديد في البلد واللي بيقف بالمرصاد لأي محاولة لفتح باب إستيراد الحديد الرخيص من تركيا أواوكرانيا عشان يهبر مليارات من الشعب الغلبان وأي طفل في مصر يعرف إن عز ما هو إلا ستارة شيفون لكبارات البلد وأولادهم .

يا أونكل نظيف يا بتاع ترويض النمرة ...... أيقظوا ا روح الإنتماء الأول في قلوب المصريين الاول قبل ما تفكروا في نهضة .... ولا ناويين تستوردوا ناس من بره هما اللي بينوا ويعمروا ...

وكفاية كده عشان أروح اشرب القهوة بتاعت الصبح عشان أعرف أفتح عيني ...

[الطيار المصرى]

نمر اقتصادي!!!!!!زي كوريا و اليابان و تايوان؟؟؟

النمر الاقتصادي ده يا عم نظيف....لازم يحقق لشعبه الرخاء الاقتصادي او علي الاقل الحياة الميسورة

مش اكتر من 20 مليون نسمة تحت خط الفقر.....

السؤال بقي...هل من الممكن الناس تصدق الكلام ده....ولا هو ضحك علي الدقون و خلاص....و لا هم بيمارسوا سياسة جوبلز وزير ثقافة هتلر ان الكدبة لازم تكون كبيرة عشان الناس تصدقها؟؟؟؟سؤال يطرح نفسه...

و الله يا عمنا سي السيد مفيش كلام بعد كلامك....و بالنسبة للعبة الممتعة بتاعت حضرتك...

فالعبد لله هيكون دكتور اسنان في الثلاثين من عمره طويل القامة و عريض المنكبين و مخيف الطلعة...الي جانب هيكون مالك لاكبر مزارع القصب المسوس في الجمهورية...ده لو ربنا ستر و ماكنتش لسعت و لا اتجننت من اللي بيحصل....

حسبي الله و نعم الوكيل

تحياتي...

الطيار المصري

[Handicraft]

رسالة اوجهها لدكتور نظيف.

"من فضلك ... دراسة الهندسة لا تجعلك صالحا لرئاسة حكومة تحمل هم شعب وآمال امة واحلام الضعفاء.

من فضلك ... اتق الله فينا فما تردده بالا وعى رقمى ولا ادراك مهنى يجعلك تنحدر سريعا

المسئول الذى لا يعلم من يدور من حوله فهو نائم ولا يستحق موقعه... والذى يعلم ويصطنع غير ذلك فهو نصاب ويستحق المحاكمة لأنه يخدع بلدا ... والذى يفعل ذلك ويصدق ما يردده ... فهو حشاش.

انما تقدم الغرب بالعلم والعمل ..... وفى بلد يزداد فيه معدل الأمية كل عام ... فلا نمر ولا قطه ولاحتى فار ... حتحصل.

انما تقدم الشرق بالحفاظ على هويته وقوميته وبالعلم والعمل والأخلاق .... واعتقد ان ما ذكرته يكاد يختفى من حياتنا

بلد لا تحافظ على ثرواتها ولا أبناءها ولا قوميتها ولا فضائلها ولا دينها ولا عرفها ولا اخلاقها ولا تاريخها ...... لا يوجد مستقبل لها"

واخيرا دولة الأفراد = هرم عبيط ينهار عند او زلزال او رياح قويه

ولعل امل دنقل يعبر اكثر منى عن ما يسشعر به الضعفاء فى تلك البلد المنكوبة لذلك اهديها لك

يوميات كهل:

--------------

"اعرف ان العالم فى قلبى مات

لكنى حين يكف المذياع وتنغلق الحجرات

انبش قلبى

اخرج هذا الجسد الشمعى واسجيه سرير الآلام

اسقيه شراب الرغبة

فلعل شعاع ينبض فى الأطراف الجامدة الصلبة

لكن ... يتفتت فى كفى

لا يبقى منه سوى ...

جمجمة وعظام

[قديم]

هذا الوعد من رئس الوزراء يذكرني بخبر ما اعرف مين مصدره بس المصدر حقيقي

يقول الخبر . ان العرب سوف يحتلون الكره الارضيه عام 3000 م وسيسيطرون على اقتصادياتها . ومنابع الطاقه .. والممرات المائيه. وسيسطون نفوذهم على كاااااااامل الكره الارضيه ..

فالمذيع بيقول له ...والاوربين والامريكان وبيقت الدول الاخري .. تسكت لهم ..

فقال له .نعم ..

قال المذيع كيف .

قال لانهم سيرحلون الي المريخ . ..

مممكن تصبح مصر نمرا اقتصاديا لافريقيا .. ولكن حين لا يكون للنمر قيمه . في الغابه ..

ويصبح للفايروس الكلمه الكبري ..

[se_ Elsyed]

مممكن تصبح مصر نمرا اقتصاديا لافريقيا .. ولكن حين لا يكون للنمر قيمه . في الغابه ..

بس كلامنا يا قديم لا يُعطي معنى لليأس أو الإستحالة ..

ولكننا ننتقد الأوضاع الحالية اليت لا يُمكن أن نبني عليها نهضة ..

ولكن يظل هناك أمل ولا يوجد مستحيل ... وبعون الله في حالة وجود حاكم وبطانة صالحة تستطيع أي دولة أن تصبح ديناصوراً مش نمراً في خلال 10 سنوات خصوصاً عندما تتوفر لديها الموارد سواء بشرية أو طبيعية .

[قديم]

فعلا عزيزي سي السيد مصر مهيأه بما حباها الله من موارد اقتصاديه طبيعه وموقع استراتيجي عالمي .. و كثافه بشريه ... ووو

لو كان هذاالكلام منسوب للدكتور الجنزوري ..او في التسعيانات .. قد يكون الامر مقبول لكن......!!!!

لكن حين في مثل هذه الظروف الحاليه لمصــر ..لا اعتقد . فعام االــ2020 على الابواب يعني كلها 13 سنه ونخش على الموعد

احسبها كدا 3 سنوات سيبقي الوضع كما هو ..

بقي العشر سنوات.. .. فيها قولان. القول الاول .. ليس بالامكان اكثر من ما كان .....

والقول الثاني لو توافرت العزيمه . والانتخابات النزيهه .. وهذه الخطوه لن تتحقق الي بقوووووه وخبره ودكتاتور حاكم عادل نزيه

يعرف عن مهاتير محمد انه دكتاتور ولكنه دكتاتور عادل مخلص .. والدول العربيه ليست بحاجه الي ديمقراطيه حره بقدر ما هي بحاجه الي دكتاتور عادل . فقط .

مع اجمل الامنيات بنمر عربي مصري قادم

[المر]

يا نهار اسود هذا النضيف و ليس بنضيف يا اما مجنون يا اما بيتكلم مع مجانين . بعد 26 سنة من حكم الحزب الوطنى لمصر بيقول ان مصر هتكون نمر اقتصادى . من اى ناحية وبعد ايه بعد البلد ما اتباعت حته حته و لا بعد ما باعوا البنوك القومية لمتثمرين الله اعلم بجنسياتهم . ياعم نضيف الله يكرمك انزل الشارع و شوف طوابير العيش و شوف الشباب اللى ملا القهاوى بدون شغل . وبلاش تتكلم عن حلم مستحيل فى وجود الحرامية الكبار و غياب الانتماء للمواطن البسيط. وسلملى على النمر الاقتصادى!!!!!!!!!!!!!!!!!!!!!!!!!!!!!!!

(حكموكيك ما حكموكى برضه المصرى مصرى و المملوكى مملوكى )

[أسد]

الله يجازي شيطانه ...

ضحك الناس عليه ....

أكيد فيه خطأ في الترجمة .. من العربي للإنجليزي ومن الإنجليزي للإيطالي أو من الإيطالي للإنجليزي أو من الإيطالي للعربي أو من العربي للإيطالي .. أو أي حاجة ..

أو إن السبب لأن أحمد نظيف رجل طويل .. فالصوت كان جاي من فووووووووووق .. من بعيد.. وماوصلش واضح ...

إللي بيقول الكلام ده إذا كان قاله .. ولم يكن هناك خطأ في الترجمة .. فهو إما رجل ساذج .. أو عبيط .. أو بيستعبط .. أو بيسوق الهبل ...

هذا لا يمنع أنني أتمنى أن يكون الكلام ده صحيح .. وأن يكون الرجل يعني ما يقوله ..

ولكن ....

بداية الألف ميل تبدأ بخطوة ...

صح ....

طيب هي فين الخطوة دي ...

ياريت نشوفها الأول ...

[justtrying]

يا ريت يا عم نضيف نحصل بجعة حتى مش نمر

عادي بءه ولا بءه فيه امل ولا حته فوزية

[مونتى]

wst:: على راى المثل ياعم نضيف ....... موت ياحمار

[زهرة الجبل]

يا جماعه بالراحه شويه عالراجل

مالكو قايمين فيه كلكو كده ليه

محصلش حاجه يعني .... الراجل كل اللي قاله ان مصر هتبقى سنة 2020 نمر اقتصادي

تعرفوا بقى انه هو الوحيد اللي فاهم وكوووولكو ظالمينه؟

الراجل بحكم انه مثقف وفاهم ومتنور و أطول واحد فيكو.... عارف ان النمر كان اصله قطه

يبقى اكيد قصده ان سنة 2020 كل حاجه هترجع لأصلها

الخوف بقى ليحققوا نظرية داروين راخره والحدق يفهم

ويقعد القرداتي الكبير يلعب القرود الصغيره ويلم الحصيله في الطاقيه ويسلسلهم تاني

والليل الليل .... اللي يا ميمون

تم تعديل 11 سبتمبر 2007 بواسطة زهرة الجبل

[أسد]

كان الوالي يملك حماراً يحبه جداً ... ويعتز به ..

فأعلن في البلد أنه يريد أن يعلم الحمار الكلام ...

وكان الشرط أن من سينجح سيحصل على مكافأة بيرة جداً ..

ومن سيفشل سيقطع رقبته ..

فبالطبع لم يتقدم أحد لتعليم الحمار ..

ولكن جحا ذهب وتقدم للوالي .. وقال له ..

أنا سأعلمه الكلام ... ولكن هذا الأمر سيستغرق بعض الوقت ..

فسأله .. كم ؟؟

فقال لهعشرين سنة يامولاي .. وسأجعل حمارك هذا ينطلق في الكلام كالبربند .. ويكون أفصح من أفصح شعراء العرب ...

فقال له الوالي ..

موافق ..

فما كان من جحا إلا أن بدأ يضع شروطه ...

أنه يريد عن كل أسبوع يقضيه في تعليم الحمار مائة دينار ذهبية .. فوافق الوالي ..

فأعاد جحا على الوالي تذكيره أن الأمر سيحتاج وقت . وألا يتعجل .. وذكره ألا يسأله عن الحمار قبل العشرون عاماً ...

فأكد الوالي تفهمه ...

وعاد جحا إلى داره بالمائة دينار الذهبية الأولى ,....

ولما سألته زوجته ... كيف هذا يا جحا ..

ألا تخشى أن يقطع الوالي رقبتك ..

فقال لها ...

لماذا القلق ..

دوووووول عشرييييييييييييييييييين سنة ...

يا أنا أموت ..

يا الوالي يموت ..

يا الحمار يموت ...

ولا تخافي ولا حاجة .. وشوفيلنا لقمة سخنة ناكلها ....

ونتقابل سنة 2020

[mesryforever]

صبح صبح يا عم الحاج

نمر إيه وقطه إيه فوقوا بقة الناس إللي في الخليج إللي كل حضارتهم لا تتجاوز الثلاثون عاماً بتضحك عليكوا إنتوا فاكرين الناس أغبيه لهذه الدرجه يا أخي روح نام ، في الوقت إللي الناس بتعمل فيه تكتلات إقتصادية ضخمه وبتحسب لكل شئ بدقة متناهية حتى الوقت بيحسبوه ويستغلوه بالنانو ثانية إحنا بنسمع لمهاترات رئيس وزراء الذي لايعرف شئ إلا إنه يسمع وينفذ كلام سيده وتاج راسه

البلد إنباعة حته حته وبعدين يجي يقول هنبقي نمر إقتصادي

دي بقة حاجه تقرف

[Ahmad Farahat]

أكيد النمر ده اسمه شريخان اللي قتله العيل ماوكلي في الكارتون المشهور

ولا النمر الهزء بتاع بينك بانتر

إنما نمر كده ملو هدومة وليه حس

ماظنش

[seeem]

سامع سيرة نمر. مش شايف غير معزة عرجاء

[ahmedarab]

يا جماعة الراجل قال نمرا لافريقيا

ومن الواضح ان النمور الافريقية فى نظر السيد الطويل دكتور نظيف ليها معطيات خاصة

يعنى مثلا نمر باع كل حاجة ..نمر شعبه قرب يموت من الجوع دة لو كان لسة ما متش فعلا

نمر بيشحت من الدول الكبرى ومش عارف يكفى شعبة اكل بس ..نمر معندوش نظام فى اى حاجة فى بلدة

نمر ولا عندة نظام تعليم ناجح ولا مياة شرب نظيفة وقال اية بيقولك معدل نمو 7% .....ربنا يرحمنا من الفشر

من الاخر كدة دة هيكون نمر الفهلوة

تم تعديل 11 سبتمبر 2007 بواسطة ahmedarab

[Folana]

السلام عليكم ورحمة الله ...

الاستاذ نظيف قال :

إن تحقيق هذا الهدف ليس صعبا بعد أن نجحت مصر‏,

بيقول ان تحقيق الهدف ليس صعبا ..ماقالش لم يعد صعبا...هناك فرق يا جماعة.....وبعدين ماهو ماحدش دخل نيته برضه ...الله..مش يمكن بيتكلم عن الحكومة باعتبارها مصر....وهى اللى حتصبح نمر اقتصادى........واحنا زى ما احنا ماتخافوش مافيش تغيير .. :unsure:

أخى الفاضل اسد كتب :

بداية الألف ميل تبدأ بخطوة ...

صح ....

طيب هي فين الخطوة دي ...

تمام كده والله...بمناسبة الخطوات والنمور والالف ميل وأحلام نظيف الوردية....أنا قطعت اربعة ساعات وتصف اليوم فى الطريق مابين الشيخ زايد الى مصر الجديدة.....

اه والله...كل الشوارع مقفولة....المحور والدائرى والهرم وطريق قليوب ..كله......وكل الناس بتشتم وتزعق فى الحكومة والوزارة والنمر والغابة ...وكل حاجة....

بس كنت باقول لنفسى برضه ان المشوار بدأ بخطوة ..وان شاء الله الحق اروح مصر الجديدة قبل مدفع الافطار اول يوم رمضان....

هو السيد رئيس الوز راء بيتكلم عن ايه بقى؟....

[القارئ]

لقد ردو ا مصر للخلف وجعلو اأها قرود ممسوخة ليس لهم مخالب ولاأسنان فأصبحت مضحكة العالم اليموقراطى الذى يتحدثون عنه وأصبح القرود مستأسدين على أنفسهم فقط والعين ماتطلعش عن الحاجب وسلامات يارابسو

[se_ Elsyed]

وعندك واحد نمر وصلحو

أيووووووووووووووه جاي

خدو بقى حتت الجاتوه دي عالصبح

" ميناء دمياط الجديد أكبر من ميناء سنغاورة اللي مكسره الدنيا وتعتبر مزرعة نمور في جنوب شرق أسيا أكبر منه مره ونص .... لحد هنا وحلو والعبرة مش بحجم الميناء ولا بالبامبوطية اللي شغالين فيه ... اللي مش حلو بقى في حق النمور المضروبة اللي هو إحنا يعني .. إن ميناء دمياط حاطط خطه لإستيعاب 700 ألف حاوية ( كونتينر ) خلال الـ 4 سنوات القادمة .... في حين إن ميناء سنغافورة اللي كلها أساساً قد شُبرا بيخدم الأن بالمستريح 7 مليون كونتينر سنوياً "

صباحو كذب يا عم نظيف

---------------

حتت جاتوه تاني من عندي .. بمناسبة طريق المحور .. يعني سُكان 6 أكتوبر يعني شقاوة الشيخ زايد وأنا وإنت ...

في بداية وضع تصور طريق المحور الذي يربط وسط القاهرة بمدينة 6 اكتوبر و و و اللي كانت جديدة ساعتها واللي منها ممكن تطلع عالفيوم والإسكندرية والواحات ... وضع أساتذة الهندسة المتخصصين خطة طويلة الأجل بجانب طبعاً تصميم حارات السيارات وكان هذا التصور بيقول إنهم في الجزيرة اللي في نصف الطريق هايعملوا حساب إنشاء قطار سريع زي قطارات الطلقة اللي في اليابان - مع الإعتذار لليابان - ده في المستقبل مع زيادة الضغط عالطريق يقوم المسئولين بتوع النمور يقولوا إيه ؟- أصلهم سلسال بيستخدموا نفس العقول المتحجرة اللي بيستلموها عهدة من الدولة - .... قطار وطلقة إيه يا عم ؟!!!!!!! ده أنت هاتعمل طريق في الصحرا وحلني يابا على ما تتعمر .....

وطبعاً كلنا عارفين النتيجة .... فبعد سنوات قليلة أصبحت سيرة - فقط سيرة - طريق المحور تُصيب من يستخدمونه بحالة أرتكاريا وهرش مستمر مع قيء وأسهال شديد .. من مدى المُعاناة التي يعانونها يومياً في هذا الطريق ...

---------------

الزتونة بقى او خلاصة الموضوع : إننا كمصريين بيصعب علينا حال بلدنا وهي تمتلك من الخيرات ما لا يوجد في أي مكان بالعالم ( جو معتدل طوال العام لا حر قيظ ولا برد زمهرير ... أنهار ومياه عذبة على قفا من يشيل ... بدل البحر إتنين على كل الألوان إشي أحمر وإشي أبيض على تركواز .... أيدي عاملة تهد الجبال ..... موارد طبيعية مش بطالة وبترول معقول وغاز بنصدرة لمخازن أنابيب تل أبيب وإحنا محرومين منه ... قناة سويس كل يوم أقرا إنها بتلعب لوحدها في ا9ساحة وبتعمل أرقام قياسية وبابوري رايح وبابوري جاي ومراكب تسد عين الشمس ) ومع ذلك الشعب مُبتلى بحكومات ديكتاتورية ظالمة وزي ما يكونوا كلهم جايين من جبال المطاريد وكل همهم نهب البلد ....

في حين إن دول .. لأ يا ربي مش دول دي مُدن عدد سكانها ما يجيش قد حمولة مترو الأنفاق بتاعنا .. ومساحتها زي مساحة منطقة من مناطق إدارة القاهرة التعليمية ... وخلينا نقول دُبي مثلاً .. نجد إن حكامها لديهم عقول تزن ثقلها ذهباً ... وما حدش يقدر يقول إن الحكام بتوعها عايشين حياة الزهد والتقشف .. لأ بالعكس .. نفع وإستنفع ... يعمل لنفسه ولبلدة .... تخيلوا مثال صغنن قدد كدهوووووووو وهو إن فندق برج العرب الوحيد اللي في العالم الحائز على درجة 7 نجوم أستغرق بناءه 3 سنوات فقط ... ماشي كانوا بيشتغلوا ليل نهار عديها المرة دي يا حاج .... لكن تخيلوا - بمناسبة الجو المعتدل والحركات دي - إن لما بنوا الهيكل الخارجي وجم يشطبوا من الداخل لقوا إن العمال هايموتوا جوه من الرطوبة التي تصل درجتها إلى 100 % في الهواء بتاع ربنا فعملوا نظام تبريد في أعلى البرج وتحديداً في بهو الفندق الأعلى في العالم والذي يبلغ إرتفاعه 180 متر .. يعني تبقى قاعد في اللوبي وشايف إرتفاع 180 متر فوقك ... نظام التبريد ده قعد 6 شهور على ما خلى الجو يطاق في الداخل وبرد المسائل شوية وكان كل يوم بيبرد درجة حرارة واحده فقط مع غنه شغال بأقصى طاقة ...

لهفي عليكي يا مصر

كفاية بقى أحسن أنا شايف النمر بيبرق لي وعايز ياكلني هم هم

-------------------------------

[عبده بيه]

الموضوع اصابني بالهلع

وازاي يخرج الكلام عن رئيس وزراء ده مش رئيس بلدية

والله حرام ده فعلا نقل وراثة هدر لاموال شعب قول ما تقوله ده كلام ليس بمسئول