رابطة عشاق مصر (أليكس لوفر)

[mohsensamak]

صباح الخير يا جماعة

كنت غايب عنكم شوية بس كنت باتابع على قد ما أقدر

موضوع اسكندرية فى الشتا ده فكرنى بالعجمى فى السبعينات زى ما قلتلكم كان اول مرة اروح اسكندرية و كان فى شهر فبراير و تقريبا وقعت فى غرامها على طول

وانا عارف ان اسكندرية فى الشتاء بتعنى كتير لأبناءها مظبوط الكلام

و شجن بشجن بقى انا أفتكرت كمان أول يوم غربة أو خلونا نقول الليلة الأخيرة قبل الغربة الطويلة

أقصد ان كتير مننا كان بيسافر اثناء الدراسة على اوروبا و انا كنت واحد من دول كنت باسافر فى الصيف لكن لأنى عارف انى مسافر و راجع بعد تلت شهور كنت بابقى عادى خالص و مبسوط و من غير قلق

لكن ليلة ما كنت مسافر على أمريكا أول مرة كان فى 95 أقدر أقول انى شفت و حسيت و عشت القلق .......ثرى دى....... و اللى فاكره كويس انى كنت واقف على البحر فى الإسماعيلية لوحدى و بأسمع الراديو (انا من المستمعين الممتازين للراديو) و بالصدفة كانوا بيذيعوا أغنية لنجاة و بالصدفة كمان كانت الطير المسافر

و فجأة قلت لنفسى انا ح أعمل ايه لو سمعت الأغنية دى فى الغربة ياترى ح أستحمل و لقيت كمية مشاعر كتيرة جدا هجمت على ما أعرفش منين لكنى ما زلت أتذكرها كأنها امس

و عارفين كمان نفسى نتكلم عن ايه أول يوم او ايام فى الغربةكان احساسنا بيها ايه

لو ينفع ابقوا فكرونى احكى لكم عن يوم البيض و العجلة

عمرو حورس

أرجو ان امورك تكون اتفكت و مشى الحال و اعتقد ان كلام الأخت ناش هوه اسلم شئ و هو اللجوء لله سبحانه و تعالى و ان شاء الله من يتقى الله يجعل له مخرجا

و حاول ان تتقرب الى الله باعمالك الصالحة و ان شاء الله خير

محسن

[Alex Lover]

مين ده اللي منورنا ده(( داروين شخصيا )) مش مصدقه عنيا :blink:

بس شكلك كده بتجرجر رجلينا للمحكمة ولا ايه ياجماعه :ninja:

عموما كلنا سعداء بمشاركتك ... احكيلنا اكتر عن ذكرياتك بس ماتنساش تسيب دفتر الانذارات في البيت wst::

محسن ... حمد الله على السلامة افتقدناك الشويه دول بس راجع بذكريات جميله وفكرتني بالذرة المشوي على الكورنيش و الموج بيخطي الرصيف ايااااااااااااام

عمرو نداء مننا جميعا ايه الاخبار يارب تكون بخير طمنا عليك

تم تعديل 24 نوفمبر 2007 بواسطة Alex Lover

[مونتى]

اسف على التاخير بس انا متابع والله على قدر المستطاع لان مع مشروع فى مراحله الاخيرة

ولكن اسكندريه بالشتاء اثارت فى الشجون

اجمل جو فى الدنيا شتاء اسكندريه

المشى على البحر برفقه الاصدقاء والاحباب صوت البحر والمطر والهدوء اللذيذ والبال الخالى

قمه المتعه ............................عــــــــــــ :wub: ــــــــــاشق بلدى

[Alex Lover]

الكل متشوق لساع قصة البيض والعجلة .... :wub:

[mohsensamak]

صباح الفل جميعا

ده كان يوم من الأيام المشهودة ، كنت واصل أمريكا بقى لى 3 شهور تقريبا و كان مراتى لسه واصلة من أسبوع و كنت وقتها باشتغل فى مينى ماركت بينى و بينه حوالى 1.5 ميل و فى نفس الوقت ما كانش معايا رخصة سواقة لسه و لا عربية كمان و علشان كده كنت باستعمل عجلة

و الليله دى كنت شغال شفت بعد الضهر و و خلصت باليل الساعة 11 و ركبت العجلة و فرحان بقى مروح للعيال بعد يوم طويل

وفجأة و انا على الطريق لقيت حاجة جامدة خبطتنى فى رجلى و من قوة الخبطة سقطت على جانب الطريق و باحط ايدى على رجلى لقيت حاجة سايلة و مع الضلمة و الصدمة قلت ده دم و حد ضربنى بالنار ،، المهم قعدت دقيقتين كده لحد ما فقت شوية و ركزت و قمت مشيت لأقرب عمود نور فى الشارع و أتارى السائل ده كان بيض و الموضوع انه الحكاية دى كانت منتشرة ان شوية شباب يركبوا عربية و يمشوا باليل يحدفوا الناس بالبيض و يتسلوا بالضحك عليهم

المهم روحت و انا تقريبا منهار نفسيا و لمل حكيت لمراتى الموضوع هى كمان انهارت و بدأنا نفكر جديا اننا نرجع و نسيب البلد دى لأن مافيش حاجة تستاهل اننا نستحمل الإهانة و قلة القيمة فى المجتمع الغريب ده و تقريبا مانمتش اليوم ده و دلوقتى بعد 12 سنة انا فاكر تقريبا كل ثانية عدت على ازاى و فكرت فيها فى ايه

و لكن طبعا الذكرى دلوقتى لما بتيجى على بالى ما لهاش نفس تأثير وقتها و لكن احيانا يمكن أضحك و أقول الحمد لله و طبيعى ان الواحد يواجه صعوبات من النوع عند تغيير مكانه و هى أحسن للإنسان لأنها بتقويه الى حد كبير

وتوتة توتة فرغت الحدوتة

و الى لقاء آخر

سلام،،،، محسن

[Alex Lover]

:wub:

يعني كانت البيضة هتبقى سبب في سفرك ... الحمد لله انها كانت حاجه فكاهية مش رصاصة زي ما كنت فاكر ...

انا افتكر اول يوم ليا في الغربة (في الكويت ) جيت لجوزي زيارة مش اقامه بس كنت عارفه اني على الاقل هاقعد 6 شهور ... اول يوم كنت مبسوطه جدا اني جيت انا وابني وشاف باباه اللي مكنش شافه قبل كده ... وصلنا الفجر .. وكنت مستغربه الحياة كلها واكتر حاجه لفتت نظري اول ما نزلت الشارع تاني يوم هي الشباب اللي عامل شعره بالمكنسه ( اقصد سبايكي ) و في ساعتها افتكرت الشباب في مصر وان اغلبهم رجاله بالفطرة وانهم شقيانين ودعيت لكل شاب لسه شايف نفسه راجل ...

المهم الليله التانية قعدت بعد المغرب لقيت الدنيا كلها ساكته هس هس طبعا مفيش حاجه اسمها ننزل نتمشى افتكرت كورنيش الاسكندرية والتمشيه والهيصة لغاية الصبح .. وافتكرت ان الميعاد ده تقريبا مكنتش بابقى قاعده في البيت وافتكرت اخواتي وبكيت ونمت قمت حلمت بالغزو العراقي وانه بيتكرر وان اخواتي بيدوروا علينا ,.,واننا بنجري وطيارات ماليه السماء وانا خايفه والحلم ده بيراودني لغايه دلوقتي ولمده خمس سنوات والنتيجة اللي وصلتلها ان الحلم ده تعبير عن عدم الشعور بالأمان خارج الوطن ... ربنا يستر

وتوته توته خلصت الحدوته على رأي محسن .

[mohsensamak]

هل فيه حد حاسس بالأمان فى دول الخليج يا جماعة؟

احنا كلنا كده يا ألكس ، أنا باشبهه دول الخليج بشركة كبيرة علاقتنا فيها علاقة موظف بعمله أول ما تنتهى خدمته هو بره لأنه بإختصار مش فى وطنه.و مافيش أى علاقة بتربطه بالبلد غير عمله و بس

بصراحة لازم ندى لدول الهجرة الأجنبية الكريديت ان المهاجرين بيحسوا فى البلاد دى باحساس الوطن و مع الوقت بيتولد نوع من الإنتماء بغض النظر عن الخلافات السياسية،،، دى حاجة تانية.

[Alex Lover]

عندك حق ... انا عمري ما حسيت في البلد دي بالأمان .. مش عارفه ليه حاسه اني لو غلطت محدش هيرجمني ولو حد غلط في حقي محدش هينصفني .. طبعا الحمد لله احنا بعيد عن القلق ده بس بصفه عامه انت بتمشي في بلدك كده براحتك وكانك في بيتك ... هنا لا دايما حاسه بالغربه ومش بانسى اني بالغربه

ايه يا جماعه فين الباقيين انتم بردانين ولا ايه :lol: يالله تعالو قولولنا رايكم

[Alex Lover]

اسف على التاخير بس انا متابع والله على قدر المستطاع لان مع مشروع فى مراحله الاخيرة

ولكن اسكندريه بالشتاء اثارت فى الشجون

اجمل جو فى الدنيا شتاء اسكندريه

المشى على البحر برفقه الاصدقاء والاحباب صوت البحر والمطر والهدوء اللذيذ والبال الخالى

قمه المتعه ............................عــــــــــــ :lol: ــــــــــاشق بلدى

ربنا معا يا مونتي وينجحك انت ومشروعك يارب ........... احلى حاجه البال الخالي

انا خلاص نسيت البال الخالي وبقى بالي مشغول بالذكريات اللي مش بتفارقني ...

[مونتى]

امان ايه ياعم الحاج !!!!!!!!!!!!!!!!

انا اليوم الوحيد والمقرب وبعد سويعات بسيطه تبقى ابن .............. ولابلاش

هم دول الخليجيين طول مافى مصلحه جايه من وراك انت الحبيب الاولى واول ما المصلحه تنتهى شوف المر والذل والهوان ومش عاجبك مع السلامه

شكرا اليكس وارجو التوفيق للجميع

عاشق بلدى :lol:

[مسالم]

السلام عليكم أهل المحاورات .. أهل الذكريات ..

بمناسبة موضوع امريكا .. اتذكر عندما طلبت دعوه للزياره من خالي الذي يعيش في امريكا ويعمل بها منذ اكثر من 25 سنه .. تحديداً في كاليفورنيا .. وقد فعل وارسل لي الدعوه .. وكنت وقتها في الصف الثاني الكليجي .. يعني في سنة ثانيه كليه .. وقد جاءت الدعوه ونحن على مشارف الامتحانات النهائيه لهذا العام .. وكما تعلمون أو لا تعلمون . فقد كان السفر الى امريكا حلم الاحلام وامل الكثير من الشباب امثالي .. فقد كانت امريكا في ذاك الوقت تعيش قمة ازدهارها في عصر ريجان ونانسي... فما كان مني إلا ان تركت المذاكره وتفرغت للهزار مع الزملاء والتريقه عليهم .. والاستهزاء بما يدرسونه .. وكيف لا وانا ذاهب الى ارض الاحلام .. وسوف اكون يوما من الايام عالماً او ادنى من ذلك بقليل .. وكيف لا وانا ذاهب الى الحريه المطلقه .. والانفتاح اللامقفول .. حقيقي كانت سعادتي لا توصف وانا بغيظ زمايلي وحبايبي .. من رفقاء الدرب والكفاح الدراسي الطويل ... ولا اخفي عليكم فقد لمع نجمي بين اصدقائي .. وكانوا لماّ أهّل عليهم من بعيد .. يقولوا " الواد ابو استك منه فيه اهو .. الواد ابو استك منه فيه اهو .." ... آآه ذكريات ...

المهم دخلت الامتحانات وانا غير مبالي بالنتيجه .. فأنا ذاهب بلا رجعه .. وما الداعي لأن اجهد نفسي في مذاكره انا عارف اصلاً اني مش راجعلها تاني .. لكن طبعاً حضرت الامتحانات النهائيه .. ثم قمت باستخراج اول جواز سفر لي .. واو .. اول بلد اسافر لها .. امريكا .. واو ..

ذهبت السفاره .. وطبعاً أخذت التأشيره .. واصحابي كانوا ميتين من الغيظ والفرح في نفس الوقت .. ثم توجهت الى خطوط طيران الTWA .. وقمت بشراء تذكره قيمتها حوالي 680 جنيه تقريبا .. مش فاكر بالظبط .. ثم حضرت شنطة هدومي وكانت خفيفه جداً ولا احمل بها الكثير .. طب هاشيل ليه ..مانا رايح اجيب من هناك .. مش كده برضه ..

وقبل ان انسى كان لازم اغير دولارات من البنك .. حيث لم يكن هناك سوق سودا على ما اعتقد .. وغيرت كام يا محترمين .. 60 دولار امريكي .. هذا كان المبلغ المصرح بيه على الباسبور..

ودعّت اهلي .. عياط واحضان وفرحه من الاهل .. همام رايح امريكا ياجدعان .. قصدي مسالم ..

ياريت يا خويا اول ما تترستأ كده تبعتلي على طول .. انت شايف البلد مخنوقه ازاي .. ده كان طارق اخويا .. طبعاً يا خويا .. مش انت غتت بس حبيبي والله .. ده انا ..

طلعت الطياره وكانت حتعمل ترانزيت في ايطاليا ثم تتجه الى نيويورك .. وفي الطياره جلست جنب واحد ايطالي .. بس بيتكلم انجليزي مكسر .. هايل .. كده احنى زي بعض .. ويلكم .. وت زرونيم .. :lol: .. المهم كلمه من هنا واخرى من هناك .. وجاءت المضيفه ومعاها العصير .. كان صاحبنا الايطالي قاعد جنب الشباك والعبد لله قاعد على الشارع .. تشرب ايه .. اشرب عصير .. مانا عارفه انه عصير .. عصير ايه يا افندي .. اي حاجه .. يعني ايه حدد من فضلك .. طيب ماتزقيش .. عصير برتقال .. هو ده اللي احنا عارفينه .. وانت يا خواجه .. يس مام اسير تماتم من فدلك .. اوكي اتفضل .. وطبعا من كرم المصريين انهم يخدموا اللي حواليهم .. رحت انا بجدعنتي شايل كاس العصير ومديه للخواجه .. فيها حاجه دي ... للاسف فيها .. الست المضيفه ماعجبهاش الموضوع ده .. ازاي يا افندي تشيله كاس العصير .. المفروض هّو يشيله .. ما فيش فرق بينكم .. طب ياخالتي دي شهامه انتو ماتعرفوهاش .. سيب الكاس يافندي على الصينيه .. هوّ هايشيله .. خلاص ياجماعه سلوا الا النبي .. انا راخ نشيل الاسير بتاأي.. ده كان الخواجه ...

اشهد ان لا الاه الا الله .. ايه ده من اولها كده .. بس بصراحه كان عندها حق .. لا .. مضيفه شخصيه بزحيح .. المهم انا خاصمت الخواجه لحد ما نزلت .. مانا مش ناقص احراج اكتر من كده .. دي الله يهديها فرجت عليّ الفرنجه ..

وبعد ان انهينا اجراءات الترانزيت في ايطاليا .. نزلنا بحمد الله في مطار نيويورك ... وااااووو .. ايه يا جدعان الحلاوه دي .. ماشاء الله .. المطار عباره عن مدينه .. بالمقارنه بمطار مصر آنذاك .. يعني ساعدتك تنزل من الطياره على المطار عدل .. لكن عندنا لازم الاول يتصلوا بعم محمد السواق من على القهوه علشان ييجي ياخد الزباين من على سلم الطياره ... المهم نزلت المطار .. وكان عندي ساعيتن فقط للخروج من المطار الدولي .. كيندي .. الى المطار المحلي حيث انني سوف اغير الطياره بأخرى ذاهبه الى مدينة سانت لويست في وسط امريكا .. وللذين ذهبوا الى مطار كيندي بنيويورك يعرفوا ان الحكايه مش سهله .. في ذلك الوقت .. وانا ماشي اتأمل في المطار .. لقيت واحد بيخبط على كتفي وبيبتسم ويقول .. انا من مسئول الجمارك في المطار .. هات الباسبور .. ياباش خواجه .. مسئول الجمارك ايه .. طب فين الدكه اللي حضرتك لازم تقف وراها .. طب فين ياراجل التكشييره الرهيبه بتاعتكم .. طب فين النظره المليئه بالشك والريبه في كل من يأتي من خارج الوطن ... مش معقول ياراجل .. بابتسامته المعهوده اجاب .. لا صدقني انا مسئول الجمارك هات الباسبور .. اتفضل .. جاي امريكا ليه يامسالم .. اصل خالي باعتلي دعوه للزياره .. اوكي .. طيب معاك كام دولار .. رحت حاطط ايدي في جيبي .. ومطلع الدولارات .. 60 دولار ياباشا .. ششش حط الفلوس في جيبك بسرعه .. مين قالك طلع الفلوس .. بعدين حد يسرقك .. انت قلتلي معاك كام ياخويا :lol: .. ستون دولار والله ياباشا .. وانت ناوي تعيش كام دقيقه بال60 دولار دي يادلعدي (بس بالانجليزي) .. آآآآه فهمت .. لا ماتقلقش انا خالي هو اللي حيصرف عليّ .. طب خد .. طاخ .. ده كان ختم الدخول .. طبعاً .. هوّ كان يقدر يعمل حاجه غير كده .. دا الاستك عامل شغل رهيب ..

وبعدها توجهنا الى الطائره الاخرى .. وحمدت ربنا اني كنت عارف شوية انجليزي .. علشان كل شئ مكتوب .. يعني مفيش داعي تسأل اللي جنبك... وطلعنا الطياره .. وكل اللي انا فاكره اني نزلت في مطار سانت لويست .. علشان آخد طياره تانيه الى مدينة سان دييجو بكاليفورنيا .. لكن اللي حصل ان مفيش طيران كفاية للعدد الموجود .. هو ده اللي انا فهمته ساعتها .. وكان معايا تليفون خالي .. واتصلت عليه .. اتاريه مش تليفون خالي ولكن تليفون خدمة الاتصالات .. يعني اتصل عليهم .. يس ماي اي هيلب يو ... ايوه انا عايز اكلم خالي في سان دييجو ... كام النمره .. 0000000 .. اوكي لحضة واحده .. الو .. يس .. مستر خال مسالم .. ايوه .. مستر مسالم عايز يكلمك موافق اور نوت .. موافق طبعا .. انا كل الحوار ده سامعه .. بس ماكنتش ساكت .. ياخال .. انا مسالم .. ياخال .. وشرحت لخالي الوضع الراهن .. ثم وبعد ساعات الحمد لله وجدوا طياره .. وطلعنا عليها عند منتصف الليل ...

الموضوع طوّل وباين عليكم زهقتم ... بس كان نفسي اقولكم ايه اللي حصل لمسالم في بلاد العم سام ..!!

هوّ عمرو راح فين .. !!

تم تعديل 25 نوفمبر 2007 بواسطة مسالم

[مسالم]

صباح الخير .. انتوا فين ياشباب .. إظاهر انكم زهقتم فعلاً .. طب ايه رأيكم إني حكمللكم الحكايه بتاعتي في بلاد العم سام ..

انت فين يا عمرو .. أنا خايف لحسن تكون في مكتب الكفيل .. وهاتك اسئله .. مين مسالم .. مين Alex lover .. كنت بتقولهم ايه عني .. ربنا يطمننا عليك ...

انتي فين يا Alex Lover ... يا nash ... يا سمك .. يا مونتي .. يا مصري

[mohsensamak]

مسالم صباح شريف

انا لسه صاحى من النوم القصة بتاعتك كان لها مفعول السحر ، ياللا كمل بقى خش على سان دييجو زووو و السى لاين و ليجو لاند سمعنا

الشباب كلهم ننا هووو لحد دلوقى و ألا شغل أول الأسبوع

على أى حال نراكم لاحقا

محسن

[Alex Lover]

انا موجوووووووووووووده اهو .. بالعكس انا قرات حكايتك امبارج بالليل وسط صخب الاولاد وكنت مصممة اني اكملها بس مكنتش قادره اتحصل على الكي بورد علشان اسجل استمرارية متابعة

لا طبعا مازهقناش بالعكس الناس كلها متابعه ومستنين باقي الحكايه بجد انت سردك ممتع وفي انتظر باقي القصة وباقي الاعضاء اللي ما حكولناش على اول يوم غربه وذكرياته

في انتظاركم جميعا

[مسالم]

شكراً على انكم موجودين .. انا حسيت اني بتكلم مع نفسي ...

المهم نرجع لموضوعنا .. قصدي ذكرياتي .. وصلت الى مطار سان دييجو وكان في استقبالي خالى ومرات خالي الامريكانيه وصديق خالي .. شخصيه مهمه جداً في عالم الزراعه بمصر .. سلامات .. ايش لونك .. اخبارك .. كيف الصحه .. كيف الرحله .. كله تمام ..

روحنا البيت .. ماشاء الله بيت على ربوه .. يعني ممكن تشوف البلد كلها من هناك .. قابلت اولاده .. اوكي .. تصبحوا على خير ..

تاني يوم الصبح .. اتكلم معايا خالي .. ها.. قولنا بقى ايه الخطه اللي انت حتعملها في امريكا .. تحديدا في الثلاث شهور بتوع الصيف .. طبعاً انا ضربت اخماس في اسداس .. خطة ايه اللي بيتكلم عليها الرجل ده .. هو احنا بتوع خطط .. ياعم انا جاي انحرف .. الراجل ده مش واخد باله والا ايه .. (مش انحرف بالضبط .. يعني اعيش الحريه اللي سمعت عنها في امريكا .. حرية الفكر والحياه ليس إلا ).. طب وبعدين دا انا جاي وف نيتي عدم العودة .. مش عايز ارجع تاني .. دا كنت بكلم نفسي ..

والله يا خالو انا خطتي اني اقعد سنه في امريكا .. بتقول ايه :lol: .. طيب ليه ماقلتليش وانا كنت بعتللك دعوه بسنه .. وبعدين دي مش خطه .. طيب والكليه بتاعتك حتعمل فيها ايه .. (بيني وبين نفسي ... كلية ايه ياخالو .. بقولك مش راجع) ..

اتعكننت ورحت قايل لخالي .. انا بدخن .. راح باصصلي :unsure: .. ومسك نفسه على الاخر .. وقالي .. اوكي .. لكن مش ممكن طبعاً تدخن سجاير داخل البيت .. وده لأنه ثبت علمياً ان دخان السجاير بيتصاعد الى الاعلى ثم يلزق على الدهان أي على الجدران وبالتالي تظل رائحة السجاير موجوده باستمرار .. وهذا يؤثر سلباً على جميع ساكني المنزل وبالتالي فإن الصحـ.... خلاص ياخالو ..فهمت اوكي .. إذا كنت عاوز تدخن ممكن تخرج في الجنينه او خارج المنزل حيث الهواء الطلق .. (يانهار ابيض ده كله علشان ادخن سيجاره .. تعالى شوف اللي بيحصل عندنا في مصر .. دي البلد عباره عن نفس دخان ووقع فيه شوية بشر) .. ودي كانت تاني صدمه عملتها لخالي .. طيب مش مشكله .. احنا بقينا بالليل .. يالا حنسهر فين انهارده ... آآه .. شوف يامسالم هنا لازم الناس تنام بدري علشان تصحى بدري وتشوف شغلها .. يعني لو الواحد سهر لبعد الساعه عشره مساءاً ده معناه انه مش حيقدر يتابع شغله الصبح كويس .. والمنظمة العالميه للصحه بتقـ .... اوكي يا خالو فهمت .. حاجه جميله جدا انا جاي امريكا علشان انام .. هايل ..

طيب ممكن اتفرج على التلفزيون شويه .. طبعاً جو اهيد go ahead.. طبعاً انا قاعد اقلب المحطات يمين وشمال علشان الاقي اي محطه فيها تمثيليه او فيلم مش لاقي .. اتاري ان خالي مش مشترك في اي محطات افلام زي art او خلافه .. طب تصبحوا على خير .. اختصاراً لكل 45 يوم اللي قعدتهم عند خالي .. كان كل حاجه عنده منظمة وحسب القوانين والاحصاءات .. نسيت اقولكم انه كان بيشتغل استاذ دكتور علم نفس واجتماع في الجامعه.. شوف انت بقى ...

كل االي انا فاكره كويس في ال45 يوم دول اني رحت اتفرج على ماتش مصر وايطاليا في دورة الالعاب الاوليمبيه في لوس انجليس .. وياريتني مارحت ..طبعاً عارفين الفضيحه اللي حصلت في الماتش ده..

بعد هذه الايام ال45 كان خالي قدر يأثر علي تماماً ويقنعني اني لازم ارجع الى ارض الوطن حتى اكمل الكليه بتاعتي وبعدين ارجع امريكا مره اخرى .. اوكيه انا اقتنعت .. حاجه جميله جداًً والله زي مابقولكم كده بدون اي ضغط... مش بقولكم دكتوراه في علم النفس ...

بعد كده ذهبت الى خالي الاخر في بلدة سان هوزيه .. برضه في كاليفورنيا .. بس خالي ده كان حاجة تانيه خالص .. صايع بزحيح ..

مش بالظبط كده بس كان عايز يوريني انه مقطع السمكه وديلها .. اوكي .. ماختلفناش .. بالاحضان وخلافه .. ومراته برضه امريكانيه..

خطتك ايه بقى يابطل .. يوووه انت تاني .. هو انا اخلص من واحد تطلعلي انت .. ( المهم ان الاثنين كانوا على اتصال شبه يومي .. وكانوا عايزين يقولي بصريح العباره انك ماتنفعش تستنى في امريكا لان ده غير قانوني وغلط.. بس كل واحد على طريقته) ..

تاني يوم كان الويك اند .. خالي قاللي عندنا بكنك انهارده .. بكنك يعني فسحه في الهواء الطلق .. والله ياخالو اوكي .. يالا بينا .. قابلنا جنسيات عربيه مختلفه ولعبنا ماتش كوره انما اخوكم بدع فيه والله .. وبعد الماتش خدني خالي يعرفّني على اصحابه .. مسالم ابن اختي وجاي زياره قصيره .. زيارة صيف يعني .. والله اهلا وسهلاً طبعا انت مش حتسيبه ينزل مصر وحتخليه يقعد معاك ... (ودي كانت اول صدمه ليّ) .. انتي بتقولي ايه يامدام .. يقعد ازاي.. ده غير قانوني والجوازات ممكن تبهدله .. انتم مش فاهمين حاجه .. خالي اتعصب جدا على اصحابه بدون سبب .. وانا حسيت ان الموضوع فيه إنّ ... مشينا وطبعا خالي طول الطريق عايز يقنعني ان الناس دي مش فاهمه حاجه ودول ولاد ستين في سبعين ووووو .... انا سكت تماماً .. تاني يوم لقيت خالي بيقولي يال بينا نروح لمحامي خبير في الجوازات والهجره .. قلت حلو جميل .. ابتدى الحلم يتحقق اهو ...

معلش حكمل بعدين .. اصل عندي ظرف طارق الان .. (طبعا مش طارق اخويا) ..

تم تعديل 26 نوفمبر 2007 بواسطة مسالم

[DARWEEN]

سبحان الله .... اوجه شبه كتير جدا مع اول سفر ليا يا مسالم

كمل وانا حاقول بعدك

بس باسجل متابعه

[مسالم]

السلام عليكم ...

عدنا .. أعتذر اليكم في التأخير .. اصل انا كنت مشغول في المستشفى ...

المهم رحت انا وخالي لمكتب المحامي .. قابلنا السيكورتيره .. اهلا وسهلا .. معاكم ميعاد مع المحامي .. ايوه يا مزمازيه .. اتفضلوا .. خمس دقايق .. المحامي هناك اهو ( بتشاور على الشباك) بيصلح سيارته .. أصل الفانوس الامامي اتكسر منه .. اهلاً وسهلاً ..

(انا) ياصباح البخل .. شكل الاحداث اليوم ده مش هيعجبني .. (السكرتيره بتنادي) يا متر .. انت ياسطى ياسوااااااااق .. قصدي يامحامي .. عند ميعاد مع الشباب .. اتفضل .. أخلا وسخلاً .. اتفضلوا .. ايه طلباتكم .. طبعاً خالي شرح للسيد المحامي الموقف .. ابن اختي جاي من مصر ومش عايز يرجع .. ايه رأيك .. المحامي أشعل الغليون بتاعه .. ياسلام ياسيدي الريحه ايه .. ماقلكوش .. ولا انتن شراب شميت ريحته وانا في معسكر التدريب (الجيش) .. المهم المحامي سألني .. انت معاك باسبور سليم .. ايوه يا متر .. وعايز تقعد في امريكا .. عنيّه برقت وقلت ياريت .. طيب لازم تعمل اللي حقولك عليه .. وهنا انطلق خالي كالسهم في البريه .. ستوب Stop كلمني انا يا متر علشان مسالم .. مابيعرفش انجليزي كويس .. ايه ده مين الاخ .. مين اللي قالك كده .. خالي بقى .. حبيبي يعني .. طيب سكت انا ومفتحتوش نهائي لكن فتحت وداني كويس .. لقيت خالي بيقوله ان الراجل ده حيبقى غير قانوني ومش حينفع يقعد هنا ووراه كليه في مصر .. وخللي بالك ياخواجه ان انا اللي دافع الفيزيتا 80دولار في الساعه .. طبعاً المحامي بصله وفهم تماماً ما يرمي اليه .. وبعدها بصللي وقاللي .. مش راخ تنفع تقعد هنا في الاستات عشان لو البوليس مسكك راخ يعمل فيك كده .. وراح مطلّع من جيبه كوين 10 سنت .. وعمل طظ (عارفين الطظ) يعني الكوين طار فوق ونزل على الارض .. انا قلت ملك .. ملك ايه وكتابه ايه يا خبيبي .. بكولك البوليس هيعمل معاك طظ بره الاستات .. راح خالي قاللي سفت مش قلتلك ماينفعش .. والننننننننبي .. مش انت اللي غمزته .. يالا بينا من هنا .. وطار الامل الثاني ..

راح خالي قاللي يالا بينا على سان فرانسيسكو نتفسح شويه .. قلتله احسن برضه .. لحسن انا اتخنقت .. ركبنا السياره وطول ماحنا ماشيين على الطريق يقوللي نفس الكلام اللي كان بيقوله خالى الكبير .. بس بأسلوبه هوّ .. صوت عالي والفاظ خارجه .. وأمثله ريحيتها وحشه وخلافه .. بعد ساعتين وصلنا سان فرانسيسكو .. اوووه المدينه ياشباب مختلفه تماماً عن باقي المدن اللي انا شفتها .. والترام بتاع اسكندريه هناك .. ياسطى .. كرموز .. الله بلد جميله جداً .. منتهى الانحراف .. ببص من شباك السياره لقيت واحد عمامل زي كباره .. عارفين كباره .. مبهدل بينام في الشارع .. ريحته تشمها عن بعد .. شعره كالغجري المنكوش .. انا بصراحه حصللي تشوك .. صدمه يعني .. ازاي ده موجود في ارميكا .. سبحان الله .. وببص على اخر الرصيف لقيت اوفيسر .. ضابط شرطه رايح في اتجاه كباره .. حلو الضرب هيشتغل .. ضابط الشرطه بص لكباره بصه ماعجبتوش (كباره) .. بس لقيت كباره نازل في الظابط تهزيئ .. مش عاجبك شكللي .. شايفني حرامي .. سوري يا كباره .. لأ انت قليل الادب ازاي تبصلي البصه دي .. خلاص يا كباره .. المهم ربنا ستر ونجا الضاااابط من ايدين كباره ... (سؤال غبي : ممكن الكلام ده يحصل عندنا) ..

اوكي يا خالو هنتفسح فين انهارده .. احنا رايحين للقنصليه المصريه .. نعم .. ليه .. علشان نقولهم الحكايه ونسألهم نعمل ايه .. يا سنه سوخه ياولاد .. هو انا بقيت حكايه جامده للدرجه دي .. فيه ايه يا خالو انا نسيت ..صدقني .. انا عايز اتفسح بقى .. على الاقل الحق اي حاجه من ريحة الحبايب .. لا لا خلينا نشوف رأيهم أيه ..

وصلنا القنصليه .. خالي دخل على لشباب .. السلام عليكم .. اهللللاً يا استاذ خاله .. ازيك ياراجل انت فين اخبارك ايه .. ده انت جمايلك مغرقانا .. :lol: .. (الكلام ده لخالي) .. قعدت .. اعرفكم على ابن اختي .. مسالم .. لسه جاي من مصر .. هههه .. جاي بفيزة 3 شهور وعايز يقعد سنه .. تصدقوا .. ههههه .. حاجه غريبه .. الناس بصولي وانا الحقيقه لقيت نفسي بكش ونازل تحت الكرسي .. واحد منهم قاللي ورييني باسبورك .. اتفضل ياباشا .. انت مسالم .. اه والمصحف .. والراجل ده خالك .. اقسم بالله العظيم على ان احافظ على الوطن واحمي اراضيه .. قصدي ايوه خالي .. قفل الباسبور وادهولي .. وقاللي .. روح يابني اقعد في امريكا ولا يهمك .. ممكن تقعد بضمان خالك ومحدش يقدر يعمللك حاجه ... الله اكبر ظهر الحق .. ولكنننن ... انتفض خالي من مقعده وارتفع صوته وكشر عن انيابه .. وهمهم بكلمات لم سمعها الا هو ولكن فهمناها جميعاً .. واعطاهم فاصل من الردح كوكتيل .. يعني انجليزي على عربي .. ودي كانت نهاية النهاية .. لم يجد خالي مكاناً اخر يمكن ان يقنعني به بالعوده الى ارض الوطن .. فكرت اهرب وكل ما فعله الخال الاكبر قد دمره تماماً الخال الاصغر .. واصبحت مقتنع الف الميه إن خلاني الاثنين بيحبوني جداً .. وماعندهمش اي استعداد يكرهوني ويخلوني معاهم في امريكا ..

ورجعت الى ارض الوطن وكلي خيبة امل .. لسببين .. الاول اني نجحت في الكليه (شئ لا يصدقه عقل) .. والثاني ان اصحابي كل ما يشوفوني يقلعوا جزمهم .. مش عارف ليه .. حاجه غريبه ..

للأسف الشديد .. اكتشفت ان الشراب كان صيني .. مضروب يعني .. علشان كده الاستك ماكانش منه فيه ...

والسلام عليكم ورحمة الله .. الى ذكرى جديده .. إن شاء الله ..

منتظر ذكرياتك يا داروين باشا ..

تم تعديل 28 نوفمبر 2007 بواسطة مسالم

[مونتى]

انتي فين يا Alex Lover ... يا nash ... يا سمك .. يا مونتي .. يا مصري

احنا هنا ياعم مسالم

بس والله مشغول جدا بالعمل ومش فاضى طوال اليوم غير ساعه فقط للغداء بس انا متابع والوقت ضيق فلا استطيع المداخله

بس متابع!!!!!!!!!!!!!!!!!!!!!!!!!!!

عاشق بلدى :lol:

[khatabmohammed]

أيه ياسكندرانية مفيش غيركم ولا أيه ما المنصورة برده حلوه قوى والله حنيت للقعده مع الصحاب منذ الطفولة وشندوتش الجحش ولا كيلو لحمه موضوعك كويس قوى يابنت لأسكندري اللى لم أدهب اليها سوى مرتين لشغل فقط

[amrhoras]

صباح الخير على اجدعها ناس فيكي يامصر

من اهل اسكندريه لصعيد مصر سمعتوا الاخبار ؟

وكالات الانباء مبطلتش رغى

الرأى العام فى الشارع يتكلم

فى كل مكان فى العالم يتكلمون

مظاهرات قامت

اجتماعات مجلس الامن

الكنيست والكونجرس و مجلسي الشعب والشورع عملوا اجتماعات مغلقه

هتسألوا ليه في ايه الحرب قامت!!!!!

حد حصله حاجه؟

هقولكم لا ولا اى حاجه هو خبر واحد بس

ياترى ايه هو

سمعت فى الاخبار بيقولو انه اسبوع مضى على اختفائي واليوم قررت الظهور مره اخرى واوعدكم اكون دائم الحضور واكبس على مواضعكم كلها طبعا خبر رخم على الصبح زى ده لازم حاجه حلوه وهدايا طبعا وانا انسان متواضع رقم حسابى فى البنك 0000000 لو عوزين تحطوا هديه حطوا ثمنها احسن والعاقبه ف المسرات وهنيالك يافاعل الخير والثواب

صباح الخير يا اهلى (بمعنى العائله وليس الاهلى الكروى) ياناسي (بمعنى ناس ولست ناسيا شيا) يا احبابي واخواتى وحشتونى كلكم جدا جدا جدا صباح جميل مشرق

والف شكرا على اهمتامكم بيا حسيت انى فعلا مش لوحدى والله اسبوع مضى بسلام لكن مابقي من العمر انشا الله اكون معكم وعبلى فكره انا متابع كل اللى قولتوه عن طريق الايميل واللهى

الاخت الجميله اليكس لوفر شكرا خاص لكى :sad:

الاخ مسالم شكرا خاص لك :sad:

الاخ موانتى شكرا جدااا لك :wub:

الاخت ناش الف مليون شكر لكى md2:

أ/داروين الف شكر على المكالمه الجميله منك وشكر تانى على اهتمامك md2:

اخى مسالم ماذكرته للأسف ليس بالجديد فعلا وعلينا ان نثبت انفسنا بأنفسنا ربنا يوفقك ويديم عليك الصحه بس مش كنت تقول انك مدخن على فكره كل ده علشان متصلتش بيا كنت هبعتك على جماعه اصدقائي فى تكساس هيييييه زكريات فكرتنى بالذى مضى ليت الزمان يعود يومـــا فكرتني بالاخت جيسيكا سرفانتس وماماتها وبباها والواد ايريك الصغير اخوها والاخت كاسي اختها وابنا الكلاس بتاعها كلمتهم واحد واحد حتى روح اسأل فى الولايه عن حورس بس يقولوك مش الواد عمرو اللى كان هيبقى كاوبوى متفرعن علينا ونص الولايه بتكلمه :blink:

وللحديث بقيه تحياتى حورس كاوبوى :blink:

تم تعديل 28 نوفمبر 2007 بواسطة amrhoras