رابطة عشاق مصر (أليكس لوفر)

[amrhoras]

لا عندنا بيملوها بصل مش عارف ليه وانا اكره البصل وكمان شكرا على العزومه لازمن يعنى كفيلي يعنى شغل وكمان عزايم والنبي افتكرى حاجه حلوه

بالنسبه لسؤالك عن حالنا دلوقتى برغم قساوة بعض الذكريات

لانه ممكن نكون فعلا شيفين ان قساوة الحاضر اكثر من قساوة الماضى

او ممكن اننا بنفتقد الاحساس انه مفيش هموم او فى ناس شالت عننا الهم ومش كنا حاسين اوى باللى بيجرى حولينا

او فعلا اوقات جميله صعب اوى اننا نعيدها من تانى وناس فقدناهم نتمنى انهم يرجعوا علشان كدى عم مدبولى قالها ارجع يزمان

شكرا

[Alex Lover]

هديه لكل الموجودين

الشتاء في الاسكندرية

تم تعديل 4 ديسمبر 2007 بواسطة Alex Lover

[amrhoras]

أليكس صور فوق الرائعه انا حسيت بالسقعه فعلا وشميت ريحة المطر والبحر سوا بجد والله

اينعم بكتأب يوم الغيوم جدا لكن بحب انظر اليه ساعات كثيره على فكره البحر من اشد اصدقائي انا اه لست من بلد ساحليه لكن هناك قنوات مائيه تتوسط محافظة الشرقية ديما اقعد فى النقابة انظر لها او فى اى كافتريا تانيه

او فى اى مكان اذهب كثيرا الى البحر اقعد اكلمه داخليا لان لو خارجيا هيقولو ايه المجنون ده :sad:

بس عارفه الجمال فى الغيوم ايه الرهبه بجد فكرتيني بحلم جميل اوى هو فيه رهبه واتكرر كتييير جدا معايا هو اينعم بعيد عن الموضوع الا ان منظر الغيوم جعلنى افتكر الحلم ده

شكرا وتحياتى لكى

يله منتظر بقى ذكرياتكم انا اتكلمت كتيير اوى فى الموضوع ده مش عارف خايف تطردونى بره :lol:

ربنا يستر

عمرو

[salemhegazy]

الحنين إلى الماضي والذكريات الجميلة الدافئة لها أثر فعال في مساعدة الإنسان بصفة عامة، والمرأة بصفة خاصة في مقاومة وعلاج الكثير من حالات القلق أو الحزن أو الشعور بالوحدة أو بعض حالات الاكتئاب التي أصبحت سائدة هذه الأيام بين النساء!!

إنها دراسة نفسية واجتماعية أعلن عنها الدكتور 'فرايد ديفينز' أستاذ علم النفس الأميركي ويرجع أخصائي علم النفس الأميركي هذه الظاهرة، إلى الرغبة في حياة أكثر بساطة وهدوءا عقب التغير الذي أصاب الحياة بصفة عامة.

أن الحنين إلى الماضي أصبح عنصرا من عناصر العلاج الحديث فهو يعمل علاقة تصالح للفرد بما حوله ويقدم له ما يجعله قادرا على التكيف مع إيقاع الحياة السريع.. ويمكن للإنسان أن يستفيد منه وهو ينظر إلى الأشياء القديمة التي أحبها وتذكره بالزمن الجميل

[salemhegazy]

إياك و الرضى عن نفسك فإنه يضطرك إلى الخمول، وإياك والعجب فإنه يورطك في الحمق، وإياك والغرور فإنه يظهر للناس كلهم نقائصك كلها ولا يخفيها إلا عليك...

من حق الحياة علينا أن نؤمن بالاستقامة قبل أن نبدأ العمل، فما أثمر كفاح زاملته الخطايا...

[salemhegazy]

اراكم غدا

جرس الفسحة ضرب

سلام لكل الموجودين

[ELSHAMY]

اخواتى....اخوانىى.....شكرا على كلماتكم المعبرة.

عاوز أى حد خبير (أو مش خبير) يقول لى ازاى أضع الصورة مع المداخلة.

الأخت اليكس لوفر....حصلت مصادفة غريبة جدا.....أنا حاولت أبعت صورة مثل الصورة الأولى الموجودة فى مجموعة صورك الجميلة وفشلت....وبعدين لقيتك ارسلتى نفس الصورة.....قلت اللهم اجعله خير هو فيه عفربت اتسرب للرابطة ولا ايه ؟ ولا ده توارد خواطر عشان احنا اسكندرانية زى بعض......زى بعضه...حافترض انه مش عفريت.

أنا موافق على فكرة ان احنا فى يوم ما ...فى مكان ما ممكن نتجمع ولو بعد حين.....تأكدوا ان احنا حنقعد نكمل كلامنا اللى فتحناه كأننا كنا مع بعض قبلها بيوم...

.وبالمناسبة دى عاوز أدعوكم للتضحية من دخلكم بمبلغ بسيط اسبوعى لصلة الرحم...أمانة كل اللى ليه أم...أب ...أخ....أخت....ابن عم...ابن خال....انه يتصل كل اسبوع بواحد من هؤلاء حتى ولو كان الشخص الأخر مقاطعه....الرسول صلى الله عليه وسلم يقول "ليس الواصل بالمكافئ"....يعنى ليس من يصل رحمه هو الذي يكافئ و يصل من وصله فقط...بل الذى يصل من قطعه من باب أولى.

وربنا يجمعنا على خير.

[مسالم]

السلام عليكم .. تحياتي ليكم جميعاً ...

Alex-lover .. شكراً على ردك الجميل .. بس اللي مش قادر استوعبه .. إزاي عملتي فرحك في صالة الديسكوتيك .. دي صاله ضلمه خالص .. وكانت كراسيها سوداء او كحلي .. مع وجود كاربيت أو موكيت اسود أو كحلي .. بالاضافه الى عدم وجود اناره كي تري الطريق الى الاستيدج .. يعني الحكايه كلها زي ما بيقولوا في الافلام .. عباره عن كرسي في الكلوب .. ضلمه .. ومش عايز اقولك ايه اللي حصللي لما زرت هذه الصاله لأول مره .. بس الحمد الله اللي وقعت في حضنه كان راجل .. مش حاجه تانيه .. ربنا ستر ..

على العموم الف مبروك على الفرح ...

88888888888888888888888888888888888888888888888888888888888888888888888888888888888

الاخت العزيزه .. ناااش .. شكلك مش مستريحه للذكريات حاجتي .. لكن اؤكد لك انها حقيقيه ميه في الميه مع بعض التعديل في السيناريو .. لكن أصل النص حقييييقي ...

بمناسبة سؤالك ابناءك عن إمكانية ترك العمل ام لا وردهم الدبلوماسي .. (ماشاء الله ولادك باين عليهم حزب وطني من صغرهم) .. فكرني لمّا بروح البيت كل يوم للغدا .. وطبعاً الواحد بيحب يأيّل شويه بعد الغدا .. فيفاجأني ابني .. مش حتروح الشغل تاني يا بابا .. لأ يا احمد مش رايح دلوقتي .. ليه ياحبيبي .. لا مفيش بس كنت بفكرك .. طيب اصحيك امتى يابابا ... للدرجه دي يا حبيبي خايف على مصلحتي .. امشي ياله من قدامي .. انا عارف نواياكم .. عايزيني امشي علشان تتفرجوا على التلفزيون والبلاي استشن والذي منه .. طب ايه رأيك بقى اني مش رايح الشغل تاني انهارده .. واللي يحصل يحصل .. خلاص يابابا هدي نفسك .. انت عصبي ليه.!!. ..امشي ياله متعصبنيش زياده ..

88888888888888888888888888888888888888888888888888888888888888888888888888888888888

أخي العزيز عمرو ..

بمناسبة موضوع الكبده ده .. عايز اقولك ان الكبده الاسكندراني (لم يكن بها بصل نوهائي) اللي كنت باكلها عند الله يمسيه بكل خير ويرحمه إن كان مات .. عم حوده اللي كان واقف بعربيته على أول شارع القطاعي مع شارع محرم بيك .. يا سلام ذكريات والله .. انا عموماً مابحبش الكبده .. لكن الراجل ده خلاني أغير رأيي .. كنت اروح له الساعه السادسه مساءاً ومش حقولك على الزحمه .. وكان عم حوده له شكل خاص .. مميز يعني .. راجل بلغ من العمر ارذله .. يعني تقدر تقول كده انه تجاوز الخمسين بكثير .. عيناه بارزتان الى الخارج بخيث انه لو نظر اليك .. يقع في نفسك شئ من الــ ... ناعستان .. يعني نصف النني الاسود يختبئ تحت ظلال الزيزفون .. قصدي تحت ظلال جفنه .. يلبس طاقيه بيضاء كالتي كان يرتديها جدي الله يرحمه في ايامه الاخيره .. وقد طوّق نفسه بمريله بيضاء أو كانت كذلك فبها من البقع الحمراء مالا يمكن معه معرفة لونها الحقيقي .. وتحت المريله كان يرتدي بلوفر صوف خفيف وقد شمر اكمامه .. كانت العروق تنفر من يداه وقد انهكهما العمل الشاق كل ليله وذلك بتقطيع الكبده وتشفيتها .. كانت يداه تميل الى اللون الاحمر الباهت .. تأثراً بدم الكبده أو بدمه هو شخصياً .. لست أدري ولكن كانت عيوني من الوسع بمكان على حركة يداه مع السكين الكبير .. وكنت استمتع أيما استمتاع وانا اشاهد مراحل انتاج السندويتش .. بداية من وضع قطعة الكبده البلدي الكبيره على (لوح) الخشب و البدء بتشفيتها .. ما شاء الله .. استقرت قطعة الكبده في مكانها واستل عم حوده السكين .. بسم الله .. ها قد بدأت العمليه الجراحيه بفصل اللحم عن الجلد .. واو ... يداه الكبيرتان في السن ترتعشان من فرط الالم الذي يعانيه وهو يقطع الكبده سلايز .. يعني ترنشات صغيره ... يوووه .. يعني قطع صغيره .. منتهى الالم والحزن معاً ولم لا وقد قطعت السكينه احدى اصابعه .. الم اقل لكم انه كان يتألم .. ولكن سرعان ما أفاق واستجمع شجاعته وداس على الالم بلف اصبع يده بخرقه من القماش (او الفانله القديمه) التي كان يستخدمها في مسح ما تبقى من جلد على قطعة الخشب .. الله اكبر .. برافو يا عم حوده .. وكانت قطع الكبده صغيره من حيث الكم والكيف .. وهذا ما جعلني احب الكبده .. ثم يمسك عم حوده الكبده المنهاره ليلقي بها في الحجيم .. حله متوسطه .. سوداء .. لم يكن لونها ولكن ما فعل بها الدهر ..زيت مغلي سينس مورنينج .. تحول الى اللون البني الداكن .. من فرط الغليان .. وياله من زيت .. انه زيت الشلجم .. زيت التموين يا كرام .. فتتلوى الكبده من فرط الالم .. ولم لا وقد القى عليها بقطع الفلفل الخضراء المشطشطه .. المولّعه .. فزادها الماً .. وبعد تقليب بالكبشه الالومنيوم يميناً ويساراً .. إذا بعم حوده وقد أحضر رغيم الفينو (بتاع زمان) وشطره الى نصفين .. والقى في كل نصف ما تيسر من قطع الكبده المتأففه.. وعصر عليها ليمون ... واووو .. اتفضل ياباشا .. شكراً ياعم حوده .. الله ما هذا المذاق .. ولا احلا يا عم حوده ... اتفضل ادي الربع جنيه اهو ... صدق اللي قال عليك .. دكتوراه في الكبده ...

ودي كانت نهاية قصتي مع كبده عم حوده .. بس لحد دلوقتي شايفه قدامي وانا بحكيلكم .. مش عارف آكل كبده من ساعتها..

تصبحوا على خير ...

تم تعديل 4 ديسمبر 2007 بواسطة مسالم

[Alex Lover]

اعطني الناي وغني ... wst::

صباح الورد

انا لسه مافطرتش لسه هابدأ اشرب القهوة بس ريقي جري ومش عارفه اجيبه ... نفسي حالا في سندوتش كبدة اسكندراني مشطشط ... مولع وفي عيش فينو والله الواحد نسي كلمة فينو دي وبقى اسمه هنا (صمون) المهم فكرتني يا مسالم بسندوتش الكبدة الاسكندراني مانساش لما كنت اروح انا وصحابي شارع صفيه زغلول في ظهر المطعم اليوناني مش فاكره اسمه ايه ... عند خروب امال ... فيه واحد ممتاز بيعمل كبده اسمه الفلاح وعلى فكرة ده مشهور جدا حتى لما نزلت مصر لقيت خلفاؤه اولاد الفلاح الظاهر اتوفى

وفعلا كنا نشتري السندوتش بربع جنيه عمار يا مصر ويحدفلك نص ليمونه اعصرها براحتك ... ونخلص من هنا ونروح نحبس بكوباية خروب من عند خروب امال .. يااااااااااه كانت ايام والله ..

بس يا مسالم انا لو كنت مكانك مكنتش اكلت من الكبده ام صباع دي :lol:

بمناسبة الفرح .... انا مكنتش عامله الفرح كله هناك هناك احنا حجزناها وبعد كتب الكتاب روحنا احنا والاصدقاء نكمل السهرة هناك وكان يوم اثنين ... مش عارفه بقى تقريبا يوم الاثنين بيبقى مفيش حد .... ولا ايه المهم روحنا لقينا الصاله فاااااااااااضيه خالص وعملولنا زفه واحنا مكناش طلبنا زفه وبعد العشاء جابولنا تورته وكلام من ده وكانو الاستاف مبسوطين جدا ومكنش فيه حد غيرنا وبالفعل هي صاله ضلمه خالص بس احنا نورناها وهيصنا لما قولنا يا بس

==========================================================================

الاستاذ سالم .. احيانا اشعر ان الذكربات تسبب لي الم نفسي اكثر من كونها علاج وخاذة انها ذكريات لا يمكن ان تعود واختفى مكانها .. مثل أمي رحمها الله ودفئها عندما اغرق في الذريات الجميلة اشعر فجأة بخيبة الأمل وان هذا الوقت لن يعود وحتى صاحبته لن تعود واشعر فجأة برعشه في قلبي مؤلمة .

ومع ذلك نستمتع ونبحث عن الذكريات وما يذكرنا مثل بحثك عن اغنية قديمة كنت تسمعها زمان وله ذكريات معينة وتظل تبحث ويكون عندك الاستعداد لدفع اي مبلغ مقابل الحصول عليها وعندما تجدها .. لا تسمعها في اي وقت ولا وسط الناس تظل محتفظ بها حتى تنفرد بنفسك وتغمض عينيك وتعلى الصوت وتسمعها ويسري في جسدك قشعريرة وتجد نفسك وقد انتقلت بروحك الى نفس المكان وتسمع صوت الايام الماضية وتتمنى ان لا يزعجك احد وتغرق في الدموع وتبكي وتبكي ... ارايت نبحث عن البكاء ولكنه غسيل للروح وتهدئة للنفس من ضغط الهموم ... جميلة الذكريات سواء حلوة او مره ... مهما كانت فهي جميلة جدا ولكنها غامضه حتى الأن

============================================================================

الاخ الفاضل الشامي

باختيار اي صورة من على اي موقع ..

بتقف على الصورة وتدوس كليك يمين

تضغط على Properetis

بتاخد عنوان الصورة URL تاخد منه Copy

بتيجي هنا تكتب رد .. وبتقف بالماوس مكان ما انت عايز تحط الصورة وبعدين تضغط على الأيقونه اللي فوق دي وانت بتتب الرد بيكون فيه ايقونه (اضافه صورة ) لما تفتح لك شباك كده صغير بتضيف الرابط اللي كنت واخد منه كوبي وبتدوس اوكي بتلاقيها نزلت لك لوحدها في الصفحة مكان ما انت عايز .. وعلى فكرة هي هتنزل لك على هيئة كتابه ولما تعتمد الرد هتلاقيها بقيت الصورة اللي انت عايزها

فهمت مني اي حاجة :unsure:

=====================================================

[amrhoras]

عمتم صباحا ايها المصريون

كيف احوالكم ؟ ويشلونكم ؟ عساكم بخير ؟ عساه لا خلاف ولامخالف؟ الله يحيكم

بعد الدخله الخليجي بالبلدى صباحكم ورد وفل وياسمين

اخى مسالم انت جوعتنى يراجل وشوقتنى اروح لعم حوده لدفء الذكريات رجعتنى لعم شحته بتاع الكبده وعم عثمان بتاع الطعميه اجمل ساندويتشات من عندهم والاتنين جيران وصحاب مامن مره اروح لهم اشترى اى حاجه لو كان عنده امم يقولوى هات يا عم عمرو عاوز ايه اتمنى لو اعود يوما اروح بس اسلم عليهم واكل من عندهم وارجع لذاكرتى اياااام زمااااان اللى اصبح بعيد اوى كل يوم يبعد بس صوره وصوته وحنينه مازالو داخلى اراهم فى كل مكان عند اى موقف كأنها افلام سينيمائيه تعاد وتتكرر كلما حدث لى موقف معين او سمعت شيء معين

**********-------********------********------*******------*******

تم التعديل بمعرفتى

... عمرو

تم تعديل 5 ديسمبر 2007 بواسطة amrhoras

[mohsensamak]

صباح الخير يا جماعة

أليكس بس عاوز اقول لك الصور دى بجد و ألا ملعوب فيها بالفوتو شوب، على اى الأحوال هى رائعة و تنفع تابلوهات

ولو الصور حقيقية تزيد أسكندرية روعة على روعتها ،،، أنا الحقيقة مش فاكر انى عمرى شفت غيوم بالشكل ده فى مصر خالص

علما بانى من عشاق الغيوم و المطرة و جو الشتا اللى احنا محرومين منه هنا و على فكرة فيه دراسه جديدة بتقول ان على

العكس من اللى كنا فاهمينه ان الغيوم بتسبب الإكتئاب أتضح إن الشمس هى اللى بتسبب إكتئاب أكتر.

يا جماعة انا بس عاوز أأكد إننا مش كلنا إسكندرانية و أنا مثلا مش إسكندرانى أنا قاهرى/ إسماعلاوى

بس مافيش مانع انى بأعشق اسكندرية و إن كان ماليش فيها ذكريات كبيرة.

صباح الفل عليكم جميعا

محسن سمك

[ELSHAMY]

صباخ الفل على الجميع

الأخت اليكس لوفر : أكيد فهمتك وشكرا لك.... لكن حضرتك ببتكلمى على الصور اللى يكون مصدرها موقع معين على النت وهذه بيكون لها URL فماذا عن الصور اللى انا محتفظ بيها فى my documents ؟..... (حلوة فماذا دى صح) لأنها مش بيكون لها عنوان لما افتح ال properties بتاعتها......

لما ترجعى من الشغل ابقى افيدينا أفادك الله.

أخواننا محبى الكبدة أم صوابع...أحب أؤكد من وجهة نظر طبية بحتة أن الصوابع دى عبارة عن بروتينات (اذا كانت مشفية) ودى لا ضرر منها بعد الغلى فى زيت الفرامل بتاع عم جودة.....

وأحب أؤكد بشدة ان الكبدة الاسكندرانى من غير بصل..... وأكلها بالبصل باطل.....باطل....باطل...زى جواز عتريس من فؤادة.

صباحكم جميل

[amrhoras]

أخواننا محبى الكبدة أم صوابع...أحب أؤكد من وجهة نظر طبية بحتة أن الصوابع دى عبارة عن بروتينات (اذا كانت مشفية) ودى لا ضرر منها بعد الغلى فى زيت الفرامل بتاع عم جودة.....

وأحب أؤكد بشدة ان الكبدة الاسكندرانى من غير بصل..... وأكلها بالبصل باطل.....باطل....باطل...زى جواز عتريس من فؤادة.

صباحكم جميل

بس فؤاده كانت بتحب عتريس لغاية لما جده عتريس الكبير جه وكاله (قال له) ياولدى ادبح اليمامه

قاله مكدرش (مقدرش) حرام

الجد : طلع المنديل ودبح الحمامه ونثر الدم على وجه عتريس

ونزلنا بتتر ياعيني ياعيني ياعيني على الولد

وطنط فؤاده قاعده ف شباك الدار ماسكه حصان حلاوة المولد بتاع عتريس وبتفكر فيه

يعنى مقصود كلامى ان فيها بصل او بيعملوها ببصل ولا حرج انت معاك عربيه؟ قابلنى عند مدخل الشرقيه ونروح سوا الى الزعيم وشوف الكبده اللى عنده الاسكندرانى

بيقولو الجمل طلع النخله ادى الجمل وادى النخله والميه تصدق الغطاس

نسيت استنانى لما ارجع الى اهل مصر الاول معادنا بعد نقطين يمكن يومين سبوعين شهرين سنتين وممكن اتأخر شويه ويبقوا قرنين بس مش هتأخر انا جاى اهوه

صباحك ورد :unsure:

تم تعديل 5 ديسمبر 2007 بواسطة amrhoras

[Alex Lover]

استاذ محسن .. الصور دي بالفعل حقيقية

وانا شوفت المنظر ده اكتر من مرة .. بس فعلا جميله مش كده ؟؟؟؟؟؟؟ :unsure:

عمرو و مسالم سكوووووووووووووووووت :lol: ... كفايه خناق على الكبدة و علشان نريحك يا عمرو ... بالفعل فيه كبده بالبصل ولكن مش اسكندراني wst:: للاسف.... مش عارفه جنسها ايه ولكن اكيد مش اسكندراني

حد يا جماعة يفيد الدكتور ... ويقوله يحمل الصور ازاي على الموقع انتي فين يا ناااااااااش .. بجد انا عملتها قبل كده مرة بس مش فاكره خالص اعتقد فيه موقع تحمل عليه الصورة من على جهازك وبالتالي هتبقى موجوده على الانترنت تعمل بقى الاجراءات اللي قلتلك عليها قبل كده / واحتمال تلاقي في المنتدى تحميل للصور برجاء من الاخوة الخبراء الافادة

وشوقتنا للصور

تم تعديل 5 ديسمبر 2007 بواسطة Alex Lover

[amrhoras]

طبعا طبعا علشان مش سألتونى من البدايه

وعلشان كدى انتم معاقبين ومش هقولكم

هو انا لوحدى اللى اختفى من عنده مكان تحميل الصور ولا فى ايه :unsure:

انتو معندتوش بتحكوا ليه عن ذكريات زمن فات ليه ؟ منتظركم

يامسهل خلاص بالنسبه للكبده طلعت من غير بصل استسلم

ارجعوا بقى للموضوع الاساسي لانى مفتقد الذكريات الحلوه اليوم بجد

ولا هتستخسروا فيا ؟

تحياتى

[ELSHAMY]

الأخوة الأعزاء .....

رسالة تهديد....

اذا ما حدش حيقولى ازاى انقل الصور حاضطر أسفا انى أشرحها لكم كتابة..... يعنى حاحتاج حوالى 10 مجلدات كتابة ....

أخى الحبيب عمرو.... خد لك حبة ذكريات...المرة دى مش على الكبدة لكن على الطعمية (الفلافل بلغة الاسكندرانية)...فاكر من كام سنة نزلت اجازة وكانت مسيطرة على بشدة فكرة الاستمتاع بركوب الترام رايح جاى والفرجة على كل شىء...كل مبنى...كل شجرة...كل محل... واتاريها حاجة ممتعة جدا انك تتخلص من العربية شوية.... واتارى الدنيا شكلها حاجة تانية والواحد قاعد جنب شباك الترام ...فاتح بقه...ومبتسم...وعينيه بتاكل كل المناظر اللى شايفها.... يعنى انا متأكد ان لو حد من الركاب أخد باله منى حيقول عليا سايح من كرواتيا (مثلا)...

اللى يضحك فى الموضوع انى اكتشفت بمجرد ما ركبت الترام انى ما اعرفش التذكرة بكام.... يادى الحوسة...والكمسارى قرب منى ..قلت أحترم نفسى رحت مطلع له خمسة جنيه...فنظر الى كأنى أحد سكان المريخ.... وابتسم بسخرية وقال : شوف لنا فكة والنبى يا سعادة الباشا....طبعا صاحبت هذه الجملة نظرة من شعرى حتى جزمتى....قمت حطيت ايدى فى جيبى وطلعت كل اللى معايا...راح مختار منهم ربع جنيه.... والله عمار يامصر...ربع جنيه يا عالم اتمتع بيه كل المتعة دى...يا بلاش.

حد يسألنى يا كابتن لطيف و ايه دخل الطعميه فى الموضوع...أقولك...و أنا معدى بالترام على محطة بولكلى اذ هبت عليا رياح مشبعة بروائح الطعمية اللى تخلى دماغك تلف....وانا طبعا راجل محروم (من الطعمية بس الحمد لله)...واذ بى تنهار كل مقاومتى وانزل من الترام و أنا ماشى مناخيرى لقدام متتبعا مصدر الالهام حتى وصلت لمحل ابو ربيع...وفين يوجعك يا أستاذ...ورجعت ماشى للبيت (فى حى الوزارة... محملا بالكنز و دخلت عليهم وكأنى جايب الديب من ديله....حيث لاقت فعلتى استحسان الجميع...

[مسالم]

التعليق على الصور اتركه لكم ..

انا عن نفسي لحقت الترام أبو دورين .. القديم .. كان جدي الله يرحمه ويحسن اليه .. بيحبني جداً .. وكان لمّا ييجي من البلد ومعاه السَبت .. بفتح السين .. وطبعاً السبت ده كان مليان بخيرات الريف .. يعني الوز والفطير المشلتت ..والجبنه الفلاحي وخلافه .. كنت افرح قوي واجري اخده بالحضن .. كان الله يرحمه بيعشق اسكندريه ... وكان اول حاجه يعملها بعد مايستريح من السفر .. ياخدني وعى محطة الرمل .. على الترام ابو دورين .. ويطلع على الدور الاول .. وييجي الباشا الكمسري .. تذاكر .. اتفضل .. كان الكمسري راجل شخصيه .. وكان لابس بدلة العمل بتاعته .. على ما اظن كان لونها ازرق .. ونقعد انا وجدي نتفرج على اسكندريه من اول الخط الى آخره .. ثم نرجع في نفس الترام .. بدون نزول .. كانت متعه ولا احسن .. متعة التأمل في جمال الطبيعه .. لم أفهم المهنى آنذاك ,, لكنني الان اعلم تماماً لماذا كان جدي يستمتع بجمال اسكندريه .. فهمت الان .. معني الحنين الى منشأي .. عندما اعود اليها بجسدي يسبقه قلبي .. وافتح العنان لصدري .. لهواكي يا اسكندريه ..

ومع اختلافي مع الباشمهندس المطرب "كاظم اللي مش عارف ينام ".. لكني .. احببت ان اقتبس اغنيته .. لمعشوقتي ومنشأ مولدي ... زيديني عشقاً زيديني ..

تم تعديل 5 ديسمبر 2007 بواسطة مسالم

[Alex Lover]

عمرو .. ايه اخبار الطعمية معاك

الدكتور الشامي مكدبش خبر وراح جابلك طعمية من ابو ربيع وااااااااااااااو .. سخنة ، انتو عارفين انا مش باحب سندوتشات الطعمية الجاهزة بالسلطة والطحينة .. انا بحب اشتري من ابو ربيع او من محمد احمد الطعمية واشتري العيش الفينو من اي خباز واعمل سندوتشات طعمية ساده او محشية بدون اضافات ، مع كوباية شاي وياسلام لو فيه مخلل لفت بيتي .. جوعتوني

الصور جميله اوي يا مسالم وخصوصا صورة التذكرة ههههههههههههههههه بس انا فاكره انها كانت ارخص من كده .. :blink:

انا اديلكم دلوقتي شوية ذكريات في العضل ...

فاكرين رحلات المدرسو والمقالب اللي مفيش حد فينا مجربهاش ، من صحابه من اخواته ...؟؟؟

افتكر انا وانا كنت في الصف الثاني الاعدادي ، المدرسة كانت عامله رحلة الى الأقصر واسوان ... وكنت اول مرة افكر اروح وبعد الحاح من المدرسين علشان يفنعو اهلي اني اروح وبعد محاولات مستميته واقناعهم اني هاكون في مساكن الطالبات والرحلة كلها اسبوع والناظرة رايحه معايا المهم روحت وقبل ما اروح كان اسوأ مقلب اخدته في حياتي عندما نصحنني اخويا الكبير الماكر اني لازم اخد معايا ملابس تقيله لان الجو بيكون تلج .. ونزلت الججواكت الصوف .. والبلوفرات وعبيت الشنطة .. اللي زاد وغطى انه قالي القطر بيكون تلج :rolleyes: لازم تاخدي معاكي بطانية تتغطي بيها ده الطريق طويل وشيلي ي بنتي البطانية على قلبك ههههههه حطيتها في شنطة لوحدها واوصل القطر الاقي القطر المكيف والجو جميل ويمكن حر كمان والبطانية مش لاقيه اللي يشيلها ... نوصل الاقصر واسوان وانا بالتايير الصوف والكل لابس الكات والقصير والنص كم .. وانا مش طايقة روحي من الحر ومش عارفه اعمل ايه ؟؟؟؟ وعدت الرحلة على خير ماعدا شوية صدمات من الحر ولكن كل المدرسين كانوا بيقولولي اني اكتر واحده محترمة وبالبس بكم غير الباقييين وكانت ايام

طبعا المقالب اكتر واكتر خلينا نسمع من الباقيين اجمل الرحلات ايام المدرسة

[ELSHAMY]

الأخت اليكس لوفر..... رجعتى لى أيام الرحلات.

طبعا بمجرد الأعلان عى قيام رحلة.... يتم حشد كل الامكانيات لانتزاع الموافقة من الأسرة... ومن ثم انتزاع رسوم الرحلة (نص جنيه أو جنيه بالكتير).... وتقعد أمى الله يرحمها تحضر فى الساندوتشات (اللى بتكون اتعجنت على ما ييجى ميعاد أكلها تانى يوم)...ونبات بنحلم بيوم غير عادى...حتى ان الواحد بيصحى على طول من النوم أول ما يسمع جملة (انت مش رايح الرحلة ولا ايه)...

وجرى على المدرسة ...وأخيرا ييجى الأتوبيس بتاع شركة على ما أذكر اسمها (السبعينى للرحلات)..وكان دايما يتأخر مش عارف ليه يمكن لزيادة التشويق.... ويحشرونا فى الأوتوبيس...وتبدأ الأغانى و الأناشيد....بيكون معظمها للسواق يمكن عشان يودينا بسرعة... من أمثلة (سواقنا عاوز سيجارة وعربيته زى الطيارة) مع عدم علمنا اليقين بأنه مدخن ومع علمنا اليقين بأن عربيته زى السلحفاة ...نوع من النفاق المبكر...

وغالبا بتكون الرحلة للمنتزه أو رشيد وأدفينا....واتذكر كمان اننا كنا نركب مركب فى رحلة رشيد لحد ما نوصل لمكان فيه جبل رمل كبير ونطلع فوق ونبدأ فى النزول السريع اللى غالبا ما ينتهى بشقلباظات فى الرملة....ذكريات

[amrhoras]

انا موجود

بس عندى مشكله والنبي اللى عنده اى خبره فى الكمبيوتر يروحع على موضوعى الشغل كله اتمسح

عوضى عليك يارب