رابطة عشاق مصر (أليكس لوفر)

[nash]

عمرو...أنا شايفاة بيهني بعيد ميلاد دكتور حسام...ففرصه ارجب بأخينا المغترب الجديد الباش مهندس موجلي... علي ماعمرو يخلص وادخل وراة أهني أخونا العزيز ...

الطبري يا سيدي شقيقي الوحيد درس فيها المرحله الإعداديه..( عمار بن ياسر )

حقيقي حضرتك منورنا هنا في الرابطه الجميله..ونتمني تواجدك معنا بإستمرار

الأن وبقوة نستطيع أن نخطف الموضوع ونعمله لحسابنا...ماشاء الله كنت بدأت أحقد علي الإسكندرانيه ..اللي مأيد الفكرة ييجي شمال..واللي مش مأيده يقف في النص...

بمناسبه أجواء الأعياد الجميله والتي نعيشها هذه الأيام ... ما رأيكم كل واحد يحكي عن أغرب هديه وأحلي هديه تلقاها في عيد ميلاده؟

أنا شخصيا ...وفي ايام الجامعه..شقيقي العزيز أحضر أصدقاءة وانا أحضرت أصدقائي ...وعمل لي حفله في منتهي الجمال ....لكن الهديه ..والحقيقه كانت في علبه فاخرة لما فتحتها لقيت بداخلها يع يع يع

كوكوروتش....( صرصار ) <<<<<الترجمه لناطقي اللغه الألمانيه...زي عمرو كده...

احلي هديه الحقيقه كانت من جدي رحمه الله عليه وكانت ورق بنكنوت بقيمه 500 جنيه طبعا أوغمن عليه...ولما فوقت أوغمن علي جدي بسبب اللي عملته فيه...

يله بأة الدور عليكم...ماتتأخروش.. وتعملوا زيي..

[amrhoras]

كونيشوووووووا مدام ناش دو يو سبيك يابانيزززز

والله بحاوال افكرلك فى هيه اخدتها من حد مش لاقى

بس اجمل هديه اعطيتها لماما >>>>> انا

اجمل هديه رزيتكم بيها >>>>>>>>>برده انا

اجدع هديه منتظراها بنت الحلال اللى بتفكر اكيد فيا على انى فارس احلامها اكيد مامتها داعيه عليها >>>>>> انا والعياذو بالله من قولة انا

الله يكون فى عونكم انتو التلاته والله قلبي معاكم هههههه:lol

بس بجد اجمل هديه كانت تلت هدايا من تلت اشخاص احبهم

* بابا الله يرحمه لما جابلى دراجه كانت قرب العيد كدى

* امى ربنا بعطيها الصحه جابتلى اتارى فى الصف الخامس كان اياميها عامل زى الاى فون دلوقتى ههههههه

* مدرس العلوم فى الصف الثالث الاعدادى اعطانى مقلمه مليانه بسبب سؤال ذكاء

الهدايا الماديه :- دى كانت مسابقه عائليه ليلة العيد كان الكبار اللى هو بابا وعمامى عاملين مسايقه لينا كأطفال ايو الله كنت طفل نابغه هههه

وطلعت يوميها ب 250 جنيه حته واحده هههه واكتشفت انهم كانوا فى الاول والاخر محدش دفع حاجه بس اتحطولى فى دفتر توفير برده

=========

مين مدام ناش هنا ياهلا وغلا وينك عساكى طيبه ويشلونك عساه لا خلاف ولا مخالف ويشلون الشيبان الله حياك

عندك خصم 32يوم ومحومه من الراحه عن الرابطه وخالتو بتسلم عليكي وبتقولك هاتو الطبق بتاع الذكريات والاحلام وهو مليان ( مش عارف ليه مش بتدفعوا اللى عليبكو)

اه مدام ناش الجاره الامريكانننننننابه دى متجوزه؟ يابخت من وفق القمح المصرى مع التفاح الامريكي

تحياتى وحمد الله ع سلامتك Obrigadaبمعنى شكرا

عمرو

تم تعديل 11 ديسمبر 2007 بواسطة amrhoras

[mogly]

صباح الخير عليكم يا مدامات و يا بهوات

نهاركم زى الفل، و الله الواحد بدأ ينزل الشغل و هو حاسس انه ح يقابل أصدقاؤه هناك بفضل وجودكم طبعا و دى يمكن تغير شوية المود اللى بأبقى عليه

و انا بالبس الصبح و نازل ، زى ماأكون رايح االمدرسة لأول مرة

وعلى فكرة خد دى يا عمرو علشان تستريح انا فى اول مرة اروح المدرسة كانت مش بعيدة كتير عن البيت يعنى مسافة 400 متر تقريبا و بابا أخدنى من ايدى و رحنا

على المدرسة و انا لابس المريله وشنطة طبعا جديدة و كلام جميل و دخلنى من الباب و كل شئ تحت السيطرة و باى باى/باى باى

المهم رجع البيت لاقانى هناك......... أوبس و كلاكيت تانى مرة أخدنى على المدرسة تانى و يتكرر السيناريو ثلاثة مرات يا سادة المهم ما أطولش عليكو.......قولوا لأ طول

كان مصادف عيد الأضحى قبلها بكام يوم و كان عندنا خروف و اندبح طبعا على العيد و العبد لله شاف الخروف و هوه بيدبح و شفت أداة الجريمة و هى الساطور و ما كان على ابويا فى المرة التالتة الا انه مد ايده جاب الساطور من المطبخ و قالى فاكر الخروف اللى كان عندنا اندبح ازاى ....قلت له و دى حاجة تتنسى قالى طب من الأخر بقى لو مارحتش المدرسة ح تحصله...........قلت له هوه الباب منين يا عم الحاج و طيران على المدرسة و لوحدى المرة دى و من يومها و انا بأطلع الأول على الفصل و الميسات كلهم بيحبونى و طبعا و الأهم بأشرب اللبن بالليلو ساعات بأغسل رجلى

اعتقد لما جيت أتجوز حصلت حاجة مشابهة برضه......... أبقى أحكيها بعدين

مدام ناش

أشكرك على الترحيب و أخوكى لو كان فى الطبرى خليه يسأل على موجلى انا كنت معروف جدا هناك

بالنسبة للهدايا بصراحة مش فاكر حاجة عليها القيمة إلا يمكن انا اهديت نفسى فى عيد ميلادى التمانين بيانو صغير بس الكلام ده كان من كام سنة و الذاكرة بقى ضعفت شوية

كل سنة و انتم طيبيين و يارب السنة الجاية على عرفات جميعا او لو مافيش نصيب يبقى الألب مش وحش

الى لقاء

[amrhoras]

الله الله على أيام المدرسه وحكاوي المدرسه وسواطير المدرسه :lol:

صباح الخير مسيو موجلى اتمنى قضاء وقت سعيد فى العمل وشكرا ياسيدى على الذكريات

صباح الخير مدام ناش Ketsha Hal? :sos:

صباح الخير يا مدام اليكس شكرا على الصور التى مازلت لا أراها :sad:

صباح شريف الى كل المصرييييييييييييييييين يارب كله يبقى معانا اليوم i*:

بطلو كسل وقوموا الجو برد وممتع يخليك تشتغل غصب كى تشعر بالدفء cld:

منتظر اليوم اجمل ذكريات من اجمل مواطنين

شكرا صباح الورد

عمرو حورس

[Alex Lover]

صباح الخير يا موجلي .. صباح الخير يا ناش.. صباح الخير يا احمد عرب .. صباح الخير يا سالم .. صباح الخير يا عمرو

اجمل حاجة ذكريات الاستاذ موجلي اللي بتتناسب مع اقتراب عيد الأضحى المبارك ...

انا افتكر اني مرة من المرات روحت المدرسة وكنت باصرخ من العياط علشان مش عايزة ادخل الفصل والميس بتاعتي كانت اسمها ميسز نادرة ... يا حرام جنت على نفسها بان مدت لي يدها علشان ادخل الفصل وكانت وقتها سنانس مشرشرة من كتر اكل الشوكولاته ومسكت ايدها وعضيتها عضه صرخت لما المدرسة كلها اتلمت وعلى بال ما طلعو ايدها من بين سناني كانت ايدها بتجيب دم

من ساعتها والبنات كانو خايفين مني مش عارفه ليه .. بيعملولي الف حساب

بالنسبة للهدايا بقى اجمل هدية كانت ومازالت (سيف ، اياد ، نادين ) ربنا يباركلي فيهم يارب

صباحكم سكر

اروح بقى اشرب الكوفي بتاعي

جودن مورخن

تم تعديل 11 ديسمبر 2007 بواسطة Alex Lover

[ahmedarab]

صباح الفل و الياسمين على حبيبنا المصريين

صباح الخير يا مدام اليكس ..صباح الخير يا عمووور ..صباح الخير استاذ موجلى ...صباح الخير يا مدام ناش ...صباح الخير يا استاذ مسالم

استاذ موجلى .... على كدة احنا قريبين من بعض ..وانا طبعا اعرف روكسى واعرف الطبرى ...بس فين المعلمين دى يا باشا ؟؟؟؟

مش عارف حكاية الهدايا دى ..... فى سنة تانية ابتدائى المدرسة اديتنى مقلمة هدايا ..لانى كنت طالب متفوق ..طبعا دة كان زمان

وفى نفس العام افتكر بابا جابلى هدية كانت عجابنى اوىىىى ...كان فى عيد ميلادى .....كانت بندقية كبيرة ومتصور بيها فى الصورة البندقية يمكن كانت اطول منى . بس انا كنت فرحان بيها اوىىى.

صباحك جميل .... فاصل ونواصل

تم تعديل 11 ديسمبر 2007 بواسطة ahmedarab

[mogly]

صباح الخير تانى

مدام ألكس كيب انتى ما كملتيش المسز نادرة حصل لها ايه بعد كده؟ ياترى كملت فى التدريس؟ قعدت فى مصر و ألا هاجرت؟ يعنى طمنينا الله يخليكى لأحسن انا قلبى واكلنى عليها جدا

صباح الفل يا عميرة و يا عرب ، ياترى انت فين و دفعة كام تانية ابتدائى؟ المعلمين دى يا سيدى هى كليه التربية بتاعة عين شمس المحطة اللى قبل روكسى على طول ده لو انت قاعد فى مدرجات الدرجة التالتة انا بقى كنت ساكن فى ضهر مدرسة الطبرى بين المحطة و بين شارع جسر السويس، عرفتنى؟

يا ألكس عندك حق العيال هما أجمل هدية من ربنا سبحانه و تعالى مافيش كلام ، الواحد بيحس قد ايه هو سعيد لما يلاقى ولاده حواليه فى ساعة صفا كده ، واحد راكب على ضهره و التانى بيلسعه على وشه بالألم و التانية حاطة ايديها فى عنيه......الله ، هى دى السعادة الحقيقية، ربنا يخليهم

يا رب و ما يحرمش حد من العيال ابدا ابدا ابدا

الى لقاء

[ahmedarab]

استاذ موجلى ،

ايوة عرفت مش دى المحطة اللى عندا محل ثرى واى بتاع السندوتشات ..

شوفت بقى انا عارف المنطقة ازاى

وعموما اهلا بيك وادينا زيدنا واحد قاهرى كمان ..... مية مية

سلام يا عزيزى

[amrhoras]

اجدع ناس مستر موجلى اينعم مش عارف المكان كويس بس مفيش مانع ندبسك فى عزومه كدى دونت وورى لا تقلق على كباية شاى كدى فى الخمسين بدون سكر

امتى بقى نرجع بلدنا انا بقالى كتييير هنا والله منزلتش ولا مره هتسألنى بقالك كام؟

اقولك بقالى هنا ياطويل العمر 19.5 ساعه و21يوم و 12شهر

لى أن اتخيلى المنظر الجميل وخاصة مع الاطفال واللعب معهم واسمحلى اعرفك على ابنتى الانسه ياره ربيعين من الزمان ونص دى بقى تعليمي انا وتربيتي اينعم بقالى سنه بحالها مشوفتهش بس مازالت تتذكر من اعطاها اصول واسرار الشقاوه على فكره هى مش بنتي بنت اختى بس اغلى من بنتى واول فرحتى بجد

بتحترمنى جداااا بصراحه جدا مامى وبابى وتيته و وواد يعموووووور هههههههه بس ساعات بتحن وتقولى حالو عموره ربنا يخليها ويخليلكم اولادكم ويباركلكم فيهم ويرزق كل محتاج ويرزق يا احمد ياعرب يابني ويله همتكم معانا احنا بقى وشوفولبى عرووووسه صهباء شهقاء هيفاء معجرمه اليسياء هتقولوى ايه هقولكم الله اعلم هم اللى قالولوى كدى

ياريت كل واحد يوفى الدين اللى عليه ويعوضنا اللى فاته من الذكريات منتظرين

عقبال بس ما اكمل الشغل اللى ورايا سلامو عليكوا

عمرو

يارب حد من الشرقيه كمان وياحبذا بقى لو تكون من بنات بلدى :lol: :sos:

تم تعديل 11 ديسمبر 2007 بواسطة amrhoras

[Alex Lover]

انا شامه ريحة مؤامرة ومحاوله تنظيم شرقاوي قاهري مشترك

راحو فين الاسكندرانيه

تم تعديل 11 ديسمبر 2007 بواسطة Alex Lover

[salemhegazy]

الاخ م/موجلى و لا يهمك ها نغفر لك غلطة الاسم لاننا طلعنا مصلحة و احدة انا يا اخى مهندس ميكانيكا و اعمل بالجامعة بدولة الامارات و كمان قاهرى او بالادق جيزاوى من الجيزة فاهلا بيك و انت يا اخى من ايام سلامة حجازى؟؟؟!!

خللى الكفة تتعدل شوية امام الاسكندرانيه

صباح الخير عليكم جميعا

[ahmedarab]

لالالالالا يا فندم ولا مؤامرة ولا حاجة ..

احنا نقدر برضة .....دة انتوا الحكومة ؟؟!!!

وانة ومن موقعى هذا احب ان اشكر وبشدة كل الاسكندرنية اللى معانا !!

(اية يا جدعان هو حد فتن ولا اية ....خيـــــــــــــــــــــــــــــــانة)

[mogly]

يا جماعة احنا مش عاوزين نزعل حد و خصوصا بع الحادثة بتاعة الميس نادرة و انا بامناسبة دى اقترح اننا ننقل الرابطة بنها ، ايه راى الأستاذة ألكس؟

اب حميد ..... بالضبط كده عند ثرى واى بس الناحية التانية و على فكرة عمرى ما جربتها بس انا كنت مدمن ومبى و كنتاكى على الخليفة المأمون

سالم بك انا على فكرة عشت فى الجيزة فترة عند جنينة الحيوانات ، انا كنت بالضبط امام بيت الفيل من بره السور طبعا لأحسن دماغك تروح لبعيد

ده الشارع اللى فيه وكالة أمريكانا (طارق نور) بس الكلام ده كان بعد عبده الحامولى بشوية لما كانوا لسه بيحطوا الأساس بتاع جامعة فؤاد الأول فى أخر الشارع

صباح الطعامة يا مصريين

[amrhoras]

الله هنقلبوها بار بي كيو بقى ونسسي الذكريات وارتباطنا بالماضى وتطلعتنا للمستقبل :blink: فينك يا ا/داروين :P

كلكم زى اولادى على كدى فؤاد الاول والجامعه حورس يتكلم الان ايو دى الحقيقه انا جدو بقى كنت احب مرضعة حتشبسوت كمان دى الحقيقة المره اللى خفاها التاريخ عنكم يولادى واحفادى

على فكره انا اتصلت على ميسز نادره وقولتلها تطلع على حقوق الانسان لانها اصابة عمل ههههههه

مع انه ميبنش عليكي يا اليكس شكلك كنتى هاديه اوى :blink: عملتلك ايه مسز نادره دى اوعى تكون زي ماما عفاف اللى تشبه سيدة القلوب فى أليس فى بلاد العجائب (الكرتون ) لو حد فاكره :blush2:

كانت تديني الكف على ضهرى اصحى تانى يوم الله ي... ولا ابله عواطف ولا امال ولا صابر مدرس الرياضيات و ولا ا/محمد مصطفى مدرس العربي ولا ابله ناديه الدكر مدرسه الجغرافيا :blink:

هييييييه دنيا

رجعتونا الى العصر المظلم البائت فى حياتى

تم تعديل 11 ديسمبر 2007 بواسطة amrhoras

[ELSHAMY]

الأخوة والأخوات أعضاء الرابطة الحلوين...القدماء منهم والجداد....مرحبا بكم.

أعذرونى الكمبيوتر فى المستشفى كان بعافية شوية بقاله يومين ويا دوب خرج من العناية المركزة....قلت ألحق أصبح قبل ما تجيلو نكسة تانية.

والله وحشتونى...بس مش معقول أسيبكم يومين الأقى هجوم قاهرى...جيزاوى...شرقاوى...على الأسكندرانية الغلابة (هما مش غلابة ولا حاجة ده بس لزوم الدفاع)....... ولكن يكفينا فخرا ان الريس الكبير (عشان دماغكم ما تروحش بعيد قصدى أليكس ) من قلعة قايتباى بالأسكندرية...واعتقد انها بحكمتها تستطيع احتواء الجميع....زى ما مصر أمنا كلنا قدرت تحتوينا.

خالص ترحيبى بالأخ موجلى والى لقاء قريب.

[Heliopolis]

صباح الخير من جنوب الماني

دي اول مره اشترك فيها هنا انا عايش هنا من سنه 1977 وعندي صعوبه في الكتابه بالعربي . انا من مصر الجديده روكسي واخدت الاعداديه طبري المعلمين والثانويه من طبري الحجاز.انا بحبكم كلكم لاني بحب مصر جدا وبزورها مرتين في السنه علشان اشوف والدي و اخواتي تحياتي لكم جميعا و الي لقاء قريب ان شاء الله

[mohsensamak]

يا جماعة اسمحولى انا بس قلت أمر عليكم سريعا علشان أسلم و أقول لكم اشوفكم بخير

و أشكركم على الوقت الجميل اللى قضيته بينكم و أكيد كل ما يبقى عندى فرصة مش ح أتردد

انى أمر عليكو و لو بكلمتين

تمنياتى لكم جميعا بالتوفيق فى كل أعمالكم

محسن

[amrhoras]

دمت فى رعاية الله يا سيد / محسن

واسعدنى فعلا التعرف عليك من خلال مداخلاتك وذكرياتك ربنا يسعد ايامك انشا الله وبالتوفيق

اخوك عمرو يافندم

مصر امانه فى ايديك ياسيد محسن

[Alex Lover]

Hiliopolis

مرحبا بك معنا يارب تقضي معانا اوقات حلوة ولو عندك مشكلة بالعربي اكتب بالانجليزي واحنا هنفهم ...

عمرو ... مسز نادرة دي كانت زي القمر والله .. هي كملت معايا السنه كلها بس كانت بتتجنبني خالص .. والله انا مش هاكدب واقول كنت بنت هاديه ومؤدبة .. ده لو حد حب يفتح باب الفصل كان ياخد اذني :blush2:

دكتور شامي حمداالله على السلامة يا فندم مخصوم منك يومين

محسن يارب تروح وترجع بالسلامة وسلام كبير لمصر ومتنساش الرابطة وشوية صور كده حلوة مش مهم مناظر ، صورلنا الناس اللي في الشارع -- وحشتني مصر

=====================================الأن====================================

اول مرة تنزل فيها اجازة لمصر بعد اول سنة غربة او سنتين او تلاتة

انا افتكر اني قعدت في الكويت سنتين وبعدين نزلت اجازة كنت متشوقه لريحة الارض و نسيم الصباح وعيون المصريين اللي بتضحك ولو فوقها مليون هم على هم

افتكر اني بقيت ماشيه في الشارع باضحك لكل الناس كل الناس لدرجة ان اكيد الناس قالو مين المجنونة دي .

اول ما وصلنا القاهرة وكنا مسافرين بالعربية قلت لجوزي عايزة اسمع اذاعة الشرق الاوسط ... ووقفنا في القاهرة عند اول واحد واقف بعربية فول ... واشترينا كل واحد نصين فول

وزود البصل والليمون ولفهم لينا في ورقة جرنال ... وزود الشطة في سندوتشات المدام واديها .. كنت نفسي انزل من العربية امشي على رجلي ، وصلت بيت اختي الساعة 12

الظهر لقيتها مجهزالي الفطير واجبنة والفول والفلافل

نستكمل بعد الفاصل :blink:

[ELSHAMY]

مساء الورد