رابطة عشاق مصر (أليكس لوفر)

[mogly]

السيد هليوبوليس

أهلا بيك نورت ، انت فين فى الجنوب بقى؟ الجنوب قوى يعنى تحت ميونيخ ؟ انا كنت فى ألمانيا عدة مرات بس أطول مرة فيهم كانت حوالى 6 شهور و معظمها كانت فى

أشافنبورج و ماينأشاف و هومبرج كاسل فى الشمال وطبعا لفيت شوية فوق و تحت ، أخر مرة كنت هناك كان من 2005 و كنت راجع من أمريكا و قعدت 3 أيام بالضبط. انا بأحب ألمانيا كتير و سعيد بوجودك معانا و على فكرة انا تقريبا أحدث واحد هنا بس ساعات بأصحى الصبح بدرى و أجى أقعد على كرسى المديرة قبل ما تيجى

انا على فكرة كنت طبرى روكسى 82 بس لى أصحاب كتير طبرى الحجاز

مساء الخير يا ايها الأفاضل معلش الكلام أحدنا و نسيت أمسى بس أصلى و الله بأحب البلد دى جدا و لى فيها ذكريات كبيرة

نراكم على خير غدا ان شاء الله

موجلى

[Heliopolis]

شكرا لترحيبكم لي.انا ساكن في قريه صغيره في الغابه السوداء و للاسف العربي الوحيد فيها وعملي في شتوتجارت حيث تبعد 70 كم من منزلي.اخدت الثانويه سنه 1976 من طبري الحجاز وفاكر الناظر كان اسمه جاويش و بعدها جيت المانيا .سلامي للجميع

[Alex Lover]

:lol:

صباح الورد

[amrhoras]

صباح الورد يامصريين

صباح الابتسامات

صباح العصافير

احلى صباح مع صوت الاطفال جيل بكره هتقولوى مين هقلوكم اولادكم كلهم بلغوهم سلام عمو حورس بفكر افتح اذاعة مخصوص لهم

حبيبي الحلوبن عمو عمرو هيحكيلكم حكايه جميله :lol:

ايه رأيكم نرجع لحواديت زمان ووكل واحد يقول احلى حدوته لسه فاكرها :lol: سامعك يا ا/ الشامى بتقول حد يشيل الواد ده من هنا

بس اهوه مجرد اقتراح لاستعاده ذكريات زمن فات

تحياتى وصباح معطر

عمرو

[ahmedarab]

صباح الفل والياسمين على حبيبنا المصريين

يا عمور يا خويا مش باربى كيو ولا حاجة بس ثرى واى وومبى ذكريات زيها بالضبط زى ذكريات مدام اليكس عن الفول والفطير و الطعمية ...... الله ...جوعتينى ؟ :lol:

وهقولك يا مدام اليكس اول مرة نزلت مصر كان بعد حوالى سنة ونص ..والله يا جماعة من غير مبالغة اول ما طلعت من باب الطيارة وانالسة على اول سلمةمن الطيارة (مطار القاهرة) وخدت اول نفس حسيت ان روحى رجعتيلى وان الهواء رحتة حلوة فوىىى وخصوصا اننا كنا الصبح بدرى حوالى الساعة 6 الصبح وكنت فرحان وهطير من الفرحة وخصوصا انى كانت عاملة مفاجاة ومكنش حد فى البيت عارف انى نازل ..افتكر يومها اكلت كمية اكل ورق عنب وفول وطعمية وشربت حوالى 20 لتر عصير قصب

بس كانت اجازة جميلة واخيرا حسيت انى لسة بنى ادم وعايش بجد

.......... ربنا يقصر غربتنا جميعا يا رب

الكلام دة كان فى ابريل 2007 .... وبالمناسبة دى بقى يا ريت كل واحد فينا يقول هو متغرب من امتى ..وامتى كانت اخر اجازة فى مصر ؟

انا بس جيت اصبح عليكم

فاصــل ونواصل .....سلام مؤقت

[mogly]

صباح الفل

النهارده عندنا انترفيوهات مع بعض الشباب للعمل فى الشركة بس كنا بنتأكد من الأنجليزى بتاعهم عملنا لهم امتحان صغير و قدامى ورقة واحد فيهم أهى

بس حبيت اقولكم علي مصطلح يمكن مش عارفينه، الباشا مترجم خيارات استراتيجية ............. ستراتيجيك كوكمبرز ...... تخيلوا ، بس الحمد لله مش مصرى :lol:

طبعا ده لو وافقت على تعيينه " هى ويل قط ماى بريد"

ياللا اكمل و أرجع لكم تانى

سلام دلوقتى

موجلى

[amrhoras]

12 شهر

21 يوم

18 ساعه

40 دقيقه

6 ثوانى 9 11 12 14 16 18 ومازال العداد بيعد تك تك تك تك تك

==========================

مجال شغل حضرتك فين يا أ/موجلى؟

تم تعديل 12 ديسمبر 2007 بواسطة amrhoras

[Alex Lover]

صباح الفل

النهارده عندنا انترفيوهات مع بعض الشباب للعمل فى الشركة بس كنا بنتأكد من الأنجليزى بتاعهم عملنا لهم امتحان صغير و قدامى ورقة واحد فيهم أهى

بس حبيت اقولكم علي مصطلح يمكن مش عارفينه، الباشا مترجم خيارات استراتيجية ............. ستراتيجيك كوكمبرز ...... تخيلوا ، بس الحمد لله مش مصرى :lol:

طبعا ده لو وافقت على تعيينه " هى ويل قط ماى بريد"

ياللا اكمل و أرجع لكم تانى

سلام دلوقتى

موجلى

هو كاتبها ازاي بالانجليزي

Cocombor ????

هي صح معناها خيار ......... بس خيار اللي بيتحط في السلطه :lol: ههههههههههههههههاااااااااااي والله اضحكتني

الراجل حاب يتصرف ميسبش الورقة فاضيه .. حرام والله واحد زي ده يجي منه اهو بيحاول

======================================================================================================

انا بقالي في الغربة 5 سنين نزلت مصر خلالهم مرتين

======================================================================================================

عمرو والله انا هاسميك دينمو المحاورات ماشاء الله عليك ..

انا الحدوتة اللي بافتركها ووكنت باحب اسمعها كتير

ان كان فيه مرة حيوانات كتير عايشين مع بعض

وكانوا جعانين

فكروا يعملو اكله وقالوا هنقوم الصبح كلنا ناكلها سوا اوعو حد ياكلها لوحده

قام الحمار بالليل اكلها كلها ونام تاني

الصبح لما قاموا قالو نعرف منين مين اللي اكل الاكل بتاعنا

يالله نروح عند البحيرة واللي هينط من غير ما يقع يبقى برئ واللي هيقع هو اللي هيكون اكلها وهياخد جزاؤه

الدور على الفرخة

وقفت الفرخة عند البحيرة وقالت

(كاك كاك لو كنت كلته .. كاك كاك ولا شربته .. كاك كاك لاقع في البحيرة .. كاك كاك شهرين وليله ..) نطت موقعتش

جاء الخروف وقال

(ماء ماء لو كنت كلته .. ماء ماء ولا شربته .. ماء ماء لاقع في البحيرة .. ماء ماء شهرين وليله ..) نط موقعش

وهكذا حتى جاء دور الحمار وهو اللي وقع

طبعا كانت ماما بتقولي كل واحد بيقول ايه على امل اني اذهق وانام بس مفيش مفيده بافضل مفنجلة

======================================================================================================

موجلي عايزين نعرف الذكريات الحلوة بتاعة المانيا

======================================================================================================

[mogly]

أوووووه بوى،،، ليه كده يا أستاذة ألكس انا ضايقتك فى حاجة ، ذكريات ايه اللى انتى عاوزاها ؟

على اى حال ح أحاول أفتكر و طبعا فى الأول لازم تعدى على مقص الرقيب وقبل كده لازم أتأكد ان عمرو أكبر من 18 سنة :lol:

انا يا عميرة زى ماقلت لك باشتغل فى شركة كونستراكشن بناخد مشاريع على مستوى المنطقة و انا مدير السلامة ( الله يسلمك)

أصلا مهندس ميكانيكا إنتاج و معايا رخصة فى الأمن الصناعى من أمريكا بيسموها أوشا

و ماتحاولش تستدرجنى أكتر من كده لأحسن أقولك انا أكلت إيه أمبارح

آه، ألكس أكتبى المصطلح اللى بعتهوليك يمكن ينفعك و إذا كنت معجبة بالإجابة إدينى عنوان شركتك ابعت لك السى فى بتاع الراجل

و صباح ماما فضيلة يا عم عمرو

[amrhoras]

عمرو والله انا هاسميك دينمو المحاورات ماشاء الله عليك ..

الدينامو هو صاحب الفكره والفضل يعود اليكي طبعا وصلتينا التيار اللى تسبب فى الشعله وكانت النتيجه زكريتا جميله تملا هذا الموضوع ومازال قابلا للزياده اضعاف مضعفه

حلوه اوى الحدوته

على فكره عندى حواديت كتيير من جدتى وماما وبابا الله يرحمه هههههههه كانو برده بيتحايلو عليا انى انما بس كنت فى الاخر اغطى اللى كان بيحكيلى الحدوته واقوم اكمل بقى مع نفسي اقعد العب للصبح او لغاية لما انام مطرح ماكون هههه مره قعدت العب تحت السرير وقاموا قالو الوله اتخطف :lol: وبعد ما الكل اتلم طلعت من تحت السرير وانا بددعك فى عنيا وقايم مش شايف ادامى ورايح اغسل وشي تخيلوا بقى وانا ماشي وسط ماما وبابا وعمامى واختى وكله قاعد مذهول كان فين ده وبيعمل ايه وكله سكت مره واحد

لانهم فعلا بصو تحت السرير بس كان كرتونتين كنت نايم بينهم فمكنتش باين

========

الحدوته بقى

كان فى مره ذات الرداء الاحمر بيتها فى قريه جميله وهى بنت جميله وديما تلبس احمر كان بابا وماما يحبوها اوى

وكان لها جده سكنه فى الغابه فكانت كل يوم تروح تجمع الفراوله من الغابه ثم تذهب الى جدتها

الى ان رآها التعلب المكار فقرر ان تكون غذائه اليوم

فراح جرى الى جدتها وحبسها فى الدولاب ولبس نفس لبسها

جت ذات الرداء الاحمر

جدتى ياجدتى افتحيلى الباب ياجدتى

الباب اتفتح

جدتي يا جدتى انتى فين ياجدتي

رد عليها بصوته الوحش انا هنا ياذات الرداء الاحمر

لقيت تغير فى الصوت

جدتى ياجدتى مال صوتك انهار طخين ياجدتي

قالها البرد يانتى

جدتي ياجدتى مال عنيكي احمروا كدى

قالها منمتش امبارح بالليل يابنتي

جدتي ياجدتى مال بقك (فمك) طالع كدى

قالها علشان اعرف اكلك

فكرت فكرت فكرت

قالتله ولازم تعط الميه على النار وتعرف تاكلنى قبل ماحد يجي

فكر التعلب وقال فكره برده

طيب جاب حله كبييير اوى وحطها على الحطب وولعه

وقالتله اول ما الميه تغلى حطنى فيها

الميه غليت والتعلب مشغفول

قالتله حط الملح علشان الطعم يبقى حلو

وراحت جيباله الملح

جه بحط الملح راحت زقاه فى الميه اتلسوع التعلب واتحرق

راحت ذات الرداء الاحمر فكت جدتها وجريت جابت العسكرى اللى قدر يمسك التعب بسهوله وهو عيان من الحروق

========= دى الحدوته على اد ما افتكرتها والله

=====================================

تصدق يا أ/موجلى انى صاحى ونفسي اسمع ابله فضيله انهارده انما مقولتليش اكلت ايه امبارح مش يمكن اقولك تعزمنى اليوم هههههه

تصدق نفسي اقولك اقبل الحاج بتاع الخيار ده ساعات بيكون شدة الاعصاب بيتضيع بس ده تبع احساسك ناحيته طبعا لو خايف يبقى هينجح وتاخد منه احلى شغل

صباحكم جميل

تم تعديل 12 ديسمبر 2007 بواسطة amrhoras

[Alex Lover]

أوووووه بوى،،، ليه كده يا أستاذة ألكس انا ضايقتك فى حاجة ، ذكريات ايه اللى انتى عاوزاها ؟

على اى حال ح أحاول أفتكر و طبعا فى الأول لازم تعدى على مقص الرقيب وقبل كده لازم أتأكد ان عمرو أكبر من 18 سنة :lol:

انا يا عميرة زى ماقلت لك باشتغل فى شركة كونستراكشن بناخد مشاريع على مستوى المنطقة و انا مدير السلامة ( الله يسلمك)

أصلا مهندس ميكانيكا إنتاج و معايا رخصة فى الأمن الصناعى من أمريكا بيسموها أوشا

و ماتحاولش تستدرجنى أكتر من كده لأحسن أقولك انا أكلت إيه أمبارح

آه، ألكس أكتبى المصطلح اللى بعتهوليك يمكن ينفعك و إذا كنت معجبة بالإجابة إدينى عنوان شركتك ابعت لك السى فى بتاع الراجل

و صباح ماما فضيلة يا عم عمرو

لا مشس عايزاه احنا شركتنا مبتعينش باياعين خضار

[Alex Lover]

عمرو انا باحكي الحدوتة دي لاولادي دلوقتي ههههههههههههه

[ELSHAMY]

صباح الفل على الجميع.

عمور....أولا ما حدش يقدر يشيلك ياعم...أنا شخصيا ضهرى واجعنى وعامل عملية ديسك.

عاوز أقترح عليكم اقتراح وعاوز أعرف رأيكم....أنا بانصح نفسى أولا بحسن استغلال هذه العشرة أيام المباركة من ذى الحجة.... طبعا اللى يقدر يصوم ثوابه كبير....كمان كثرة الصدقات والأذكار و السنن.....

عذرا اذا خرجت عن موضوع الذكريات لكن اذا ماكنش الواحد منا ينصح أقرب الناس ليه و حبايبه من أمثالكم أمال يقول لمين ....ربنا يجمعنا جميعا على الخير.

[mogly]

عمرو على فكرة انا ساعات أفتح الراديو بتاع مصر على النت بس علشان أسمع عيلة مرزوق أفندى و ماما فضيلة و زى ما تكون كانت كالتشر عندنا

و خصوصا بقى صوت صفية المهندس الجميل (هى لسه عايشة ياترى؟)

كانت ماما لازم تفتح الراديو الصبح على الحاجتين دول لما بقت مرتبطة بشخصيتنا، يعنى الواحد حاسس انه بقى عامل زى ربات البيوت بالضبط

فكرتينى يا ألكس ببتاع الطرشى اللى راح يتجوز و لما سألوه بيشتغل ايه قالهم تاجر قطع خيار

بمناسبة الحواديت كان فيه زمان حدوتة بس مش فاكرها خالص اسمها الأمير طماطم (حد عارفها؟) و اهى برضه فى نفس السياق بتاع الخضار

صباح الخيارات (قصدى الخيرات)

موجلى

[amrhoras]

صباح الفل على الجميع.

عمور....أولا ما حدش يقدر يشيلك ياعم...أنا شخصيا ضهرى واجعنى وعامل عملية ديسك.

عاوز أقترح عليكم اقتراح وعاوز أعرف رأيكم....أنا بانصح نفسى أولا بحسن استغلال هذه العشرة أيام المباركة من ذى الحجة.... طبعا اللى يقدر يصوم ثوابه كبير....كمان كثرة الصدقات والأذكار و السنن.....

عذرا اذا خرجت عن موضوع الذكريات لكن اذا ماكنش الواحد منا ينصح أقرب الناس ليه و حبايبه من أمثالكم أمال يقول لمين ....ربنا يجمعنا جميعا على الخير.

وخرجت ليه عن سياق الموضوع ياباشا النصيحه ملهاش مكان او زمان معين انا احييييييك جدا ويله بقى قولولى على اكتر يوم صيام لن تنسوه تماما مهما عدى عليكم الزمان

وانا بضم صوتى اليك يا د/الشامى بجد

=======

مش عارف الاذاعه دلوقتى بقى شكلها ايه خصوصا كلمتين وبس خلاص انتهى اكيد

وكان فى همسة عتاب

و اخبار خفيفه

صفيه المهندس وعائلة مرزوق

تيجوا نعمل اذاعه صامته؟ بمعنى كل واحد يقدم برنامج وكل يوم يضيف اضافه له ويكون ركنه الخاص ايه رأيكم؟

تحياتى للجميع

عمرو

تم تعديل 12 ديسمبر 2007 بواسطة amrhoras

[ELSHAMY]

مدام ألكس....عمور...موجلى...heliopolis

أنا كمان كنت دايما أفتكر أمى الله يرحمها وهى بتلبسنا علشان نروح المدرسة الأبتدائية (مدرسة صلاح سالم) فى الابراهيمية طريق الحرية...وكانت عارفة ميعاد نزولنا اللى لازم يكون مع أغنية (بالسلامة يا حبيبى بالسلامة.... بالسلامة تروح وترجع بالسلامة...تيجى زى الفرحة..تيجى بابتسامة...) حد فاكرها ؟

...وطبعا أمى كانت بتحب تغنى لى الأغنية دى علشان أنا البكرى......وكانت علاقتنا أنا وهى مضرب الأمثال فى الأسرة كلها من حيث العمق ...والدفء....والتفاهم.....ادعو لها لو سمحتم بالمغفرة.

وعندى كمان أقتراح ....ايه رأيكم كل واحد يفتكر درس أو موقف اتعلمه من أبوه أو أمه ...او أى قدوة فى حياته ويكون مؤثر فيه الى الأن.....

اللى عرفته وبقيت متأكد منه ان الناس دى كانوا دايما....أو أغلب الوقت...صح جدا....وبعد الواحد ما أصبح عنده أولاد....بقى يقدر عبقرية هؤلاء فى ادارة شئون الأسرة..... والوصول بيها لبر الأمان.....

الله يرحم الجميع..... والصدقة الجارية لا تضيع بعد الرحيل....

ايه الحزن اللى أنا فيه ده ؟

[ELSHAMY]

مدام ألكس....عمور...موجلى...heliopolis

أنا كمان كنت دايما أفتكر أمى الله يرحمها وهى بتلبسنا علشان نروح المدرسة الأبتدائية (مدرسة صلاح سالم) فى الابراهيمية طريق الحرية...وكانت عارفة ميعاد نزولنا اللى لازم يكون مع أغنية (بالسلامة يا حبيبى بالسلامة.... بالسلامة تروح وترجع بالسلامة...تيجى زى الفرحة..تيجى بابتسامة...) حد فاكرها ؟

...وطبعا أمى كانت بتحب تغنى لى الأغنية دى علشان أنا البكرى......وكانت علاقتنا أنا وهى مضرب الأمثال فى الأسرة كلها من حيث العمق ...والدفء....والتفاهم.....ادعو لها لو سمحتم بالمغفرة.

وعندى كمان أقتراح ....ايه رأيكم كل واحد يفتكر درس أو موقف اتعلمه من أبوه أو أمه ...او أى قدوة فى حياته ويكون مؤثر فيه الى الأن.....

اللى عرفته وبقيت متأكد منه ان الناس دى كانوا دايما....أو أغلب الوقت...صح جدا....وبع الواحد ما أصبح عنده أولاد....بقى يقدر عبقرية هؤلاء فى ادارة شئون الأسرة..... والوصول بيها لبر الأمان.....

الله يرحم الجميع..... والصدقة الجارية لا تضيع بعد الرحيل....

ايه الحزن اللى أنا فيه ده ؟

[salemhegazy]

السلام عليكم جميعا و كل عام و انتم بخير نفعنا الله بهذة الايام المباركة

الاخ م/مجلى شوف موش باقول لك احنا مصلحة و احدة انا كمان تخصصى هندسة انتاج لكن انا خبرتى فى التصنيع و التصميم الميكانيكى

و دوختونا من متابعة الحواديت الجميلة دى

[salemhegazy]

اخبار الخروف ايه فى الغربة ؟؟؟

صدق من قال الغربة كربة

[Alex Lover]

بالسلامة يا حبيبي بالسلامة

بالسلامة تروح وترجع بالسلامة

تيجي زي الفرجة ترجع بابتسامة

بالسلااااامة

يا حبيبي

يا حبيبي بالسلااامة

طبعا فاكراها ياسلااااااااام ورالله رجعتنا لحاجات

طيب فاكرين

(( ماشي في نور الله ماشي

ماشي في نور الله ماااشي

ماااااااشي في نور الله ادعي واقول يارب

مااااااااااااااشي في نور الله ادعي واقول يارب

برضه الصبح واحنا رايحين المدرسة

ربنا يرحم ابويا وامي

اتعلمت من امي الضحك مهما كان في القلب هموم ومهما زعلت اضحك لانه الضحك دواء الروح