رابطة عشاق مصر (أليكس لوفر)

[mogly]

باشمهندس/ سالم انت شكلك كده كنت معايا فى السكشن و مش عاوز تقول، بالمناسبة انا كمان اشتغلت فى التصميم لمدة أربع سنين و قبلهم انا كنت فى مجال الفنادق فى الصيانة برضه حوالى 4 سنين و برضه اشتغلت تصنيع حوالى 3 سنين (كام دول؟) و دلوقتى انا فى الكونستراكشن زى ما قلت لك اعتقد النقلة الجاية ح ابيع فول و طعمية علشان ابقى عملت كل حاجة

ألكس كفاية ......حرام ...... الحديث عن الإذاعة بيثير فى الشجن لأنى مستمع إذاعة ممتاز أو هكذا كنت و كنت دخلت على الفنون و طلبت لو حد عنده مسلسلات لمحمد علوان مخرج الشرق الأوسط العبقرى لكن ماحدش عبرنى بس انا ح أدور عليهم تانى

آه و انا دلوقتى أفتكرت ...... من أجمل الهدايا اللى اتقدمت لى كان راديو ترانزستور صغير لما نجحت فى الإبتدائية و مش ح أقول لك فرحت بيه قد ايه

أشكرك يا د/شامى على تذكيرك لنا بالعمل الصالح فى العشر الأوائل و جزاك الله عنا خيرا

عميرة و الله بيقترح شئ جميل جدا و هو اننا نعمل راديو و كل واحد يمسكه يوم ..... ايه رأيكم فعلا نبدأ نستفيد من معارف بعض ، تعالوا نخللى كل واحد مننا يتكلم فى توبيك هوه عارفه كويس فى أى شئ و يعمل زى محاضرة أو بريزنتيشن و ممكن نناقشه فيه على مدار أسبوع مثلا و بعدين نخش فى موضوع تانى ............ايه رأيكم؟

موجلى

[Alex Lover]

فكرة جميلة ... ياللا ابدأ يا عمرو

[amrhoras]

خلاص نبدأ بيك يا أ/موجلى انتو بس سستموا الحكايه وربنا يعين

=========

عزيزى المستمع انت تسأل و....

الكمبيوتر يجيب برنامج يقدمه ابناء رابطة عشاق مصر اخراج ومنتاج ابناء مصر

ولكم التحيه

كان معكم عمرو بن حورس من امام الدمام

[Alex Lover]

احم احم

هات يا موجلي المايك .. انتو لسه هتعزموا على بعض :lol:

سيداتي انساتي ساداتي

معاكم من قلب الكويت مراسلتكم اليكس لوفر

هئهئهئهئ متستغربوش الاسم

اصل انا بحب اسكندرية اوي اوي اوي

المهم قابلنا في بلاد الغربة شباب كتير تعبان عايزين نقرب من واحد مهموم في الغربة ونساله

ياترى زعلان من ايه ::::

حد يجاوب بسرعة

[mogly]

أنا اقول لك يا ست المذيعة،،،،،،،

أنا زعلان لأنى حاسس أنى أتقلعت من أرضى!!!!!!!

زمان لما كان محمود المليجى بيبقى عاوز ينتقم من زكى رستم كان بيقلع له الزرع ، يعنى ببساطة بيشيل الزرع من أرضه علشان جذورة تطلع بره و يموت و هوه ده أقصى انتقام ممكن، انا كده، انا حاسس انى أتقلعت من أرضى و مت

مش عاوز ابقى متشائم بس هى دى الحقيقة انا ميت (البقاء لله فى موجلى يا جماعة) الموت مش حسى و بس الموت معنوى كمان و ده الأخطر و الأقوى، لكن فى النهاية ده التمن اللى بندفعه لما ناخد قراراتنا احنا مش شايفين كل حاجة صح؟ ربنا سبحانه و تعالى بس هوه اللى عالم بكل شئ، احنا دايما عندنا قصور فى تفكيرنا و أختياراتنا و ساعات بتصح لما ربنا بيوفقنا و ساعات بتبقى غلط لو مافيش توفيق و فى الحالة التانية فيه تمن لازم ندفعه و بندفعه. أنا بأحس انى عايش بس لما بأنزل مصر بأحس ان روحى رجعت لى و مش مجرد كلام بس و ألا شعارات ده احساس حقيقى و الله بأقعد فى مصر اسبوع اتنين أو شهر على الأكتر بأحس انى عايش، بأحس ان الشارع عارفنى و انا عارفه بأحس ان الشجر بيشبه على و عاوز يقول لى انت كنت فين حتى البيوت و السما و البحر كله كله انا منهم و هما منى مش غربا عن بعض. انا بقى لى 15 سنة بره مصر و لفيت حبتين، انا كنت عايش فى كندا قبل ما أجى على الخليج و و كل بلد كنت بأروحها كنت بأحاول اخلق اى نوع من العلاقة بينى و بين سماها و شجرها و ميتها لكن مافيش فايدة انا غريب عنهم زيهم زى ناس البلد مهما قربت منهم انت لسه غريب فى وسطهم و على فكرة اللى بيقول انا بأعرف انجليزى كويس و هوه عايش فى مصر او حتى اللى زينا عاش بره لفترة لأن اللغة كالتشر أكتر منها مفردات و الكالتشر دى مش بتييجى الا لما تتربى فى البلد دى من صغرك و تكبر معاهم بس طبعا فى الحالة دى انت ح تخسر كتير لأنك ما ينفعش تحتفظ بأتنين كالتشر جواك يا بطل

الموضوع فتح منى آسف و أرجو انكم ما تكونوش مليتم لكن للحديث بقية

موجلى

[salemhegazy]

زعلان علشان بعيد عن بلدى و اهلى

و بلدى و ان جارت على عزيزة و اهلى و ان ضنوا على كرام

[Heliopolis]

ليه كده يل موجلي قلبت عليا المواجع للاسف لازم اروح الشغل دلوقتي وللحديث بقيه سلام اخوك احمد

[salemhegazy]

اييه فين الايام دى

م/موجلى و كام سنة فى ال كونستراكشن؟

قول ما تخفشى كدة نعرف دفعة كام

ما تخفشى انا شكلى اقدم منك

[amrhoras]

اعتقد انى اجدد واحد فيكم هنا فى الغربه يعنى ويمكن فى السن كمان

بس شعرت بكل ما قاله م/موجلى يمكن بقالى فى الغربه 4 سنين غربه معنويه وسنه فعليه وبرده معنويه بجد بفتقد بيتي ساعات كتير اوى بفتقد الناس الطيبه 4 سنين كنت اقابل اهلى كل شهر كام يوم او كل كام شهر كام يوم حتى لما استقريت فى بلدى عشت لوحدى بحكم شغلى وبحكم البعد عن البيت

لكن اجمل حاجه بحس انى نجحت فيها انى احتويت اهل بيتي مش هقولكم راجل االبيت بس فعلا ان كانت ماما او اختى وبرده مع انى اصغر فرد فى الاسره الصغيره دى الا انهم ديما يرجعولى اكون معاهم بكل لحظه حتى وانا هنا معاهم فى كل لحظه وده اللى نجحت فيه بجد انا بعيد جسدا لكن روحى ديما معاهم يلاقونى اى وقت .

بصراحه اللى قرب المسافات النت برده جعلنا عايشين مع بعض صوت وصوره اه محتاجين اننا نشعر باننا موجودين مع بعض بس حاجه احسن من لاشيء

بس بفتقد ايام زمان مهما ان كان بعضها مش حلو لكن واقعنا دلوقتى اصعب بكتييير جدا . بشعر حاليا بمكن الشعور ده مش جديد انى فى زمان غير الزمان ولسه ببحث عنه بس المشكله الوقت عمال يمر وده بيرهب اى شخص ان الزمان يمر من غير مايشعر وياترى لو ملقتش الزمان ده حيكون مر كام سنه من عمرى ياترى هوصل ولا هيكون الوقت فات نفسي اقتل احساس الغربه داخلى بس مازلت ابحث عن الدواء

مش عارف عندى احساس ان الكلام ملخبط بس بحاول اطلعه وانا خير من يبوظ منه الكلام والنسيان عندى زهيمر :lol:

عموما للحديث بقيه وعوزين ننفذ فكره الاذاعه بجد

عمرو الدوام بدأ سورى لازم امشي

[Alex Lover]

ضيفنا الفاضل السيد موجلي

ابكيت فريق الاذاعة وتاثرت انا شخصيا وجميع المستمعين

بجد اثر فينا كلامك وكلنا اكيد حاسين بيه

لدرجة انك اثرت في عمرو وخليته يتكلم من قلبه بدون هزار لغاية اخر الموضوع

يمكن سؤالي اعزائي المستمعين كان سؤال حزين

طيب انا هاحاول اخرج بيكم من الجو وده ونستمع الى الاغنية اللي تختاروها

ما يطلبه المستمعون

اتفضلوا قولوا

عايزين تسمعوا ايه

[ahmedarab]

انا اقول والبنى يا ست المذيعة ....

اسمع اغنية كوكب تانى لمدحت صالح

[ELSHAMY]

مساء الخير ...اخوانى المستمعين .... أخواتى المستمعات.....

ينتقل الميكروفون الأن من الست ألكس كبيرة المذيعات....(لأن احنا بقينا بالليل وباين عليها نامت).... الى برنامج طبيب على الهاتف.... معكم طول الليل الدكتور شامى النباطشى وحيسعد باجابة كل اسئلتكم الطبية والصحية والمرضية والاشعاعية والهستوباثولوجية والملوخية والطعمية ...وووو... يعنى جاهزين من كافة شىء ويارب انفعكم بما تعلمت....

أنا شايف الأخ موجلى...وعمرو....وأحمد.....وأليكس....عندهم شوية أسئلة...اتفضلوا من غير كسوف...لا حرج فى العلم....والميزة ان ما حدش شايفكم

(على الفكرة الأتعاب يتم الأتفاق عليها حسب صعوبة السؤال)

على فكرة ده مش استغلال ...ده بس لأنى على ما أعتقد الدكتور الوحيد فى الرابطة

انا مستنظركم

و على ما تيجى الأسئلة اترككم مع أغنية عود لأحمد الحجار.....حد فاكرها ؟

[amrhoras]

د/ الششامى بما اننا سهرانين اليوم

احب اعرف اجمل حاجه سيادتك عملتها ومفتخر بيها ومازالت فى ذاكرتك؟

[ELSHAMY]

أخى الحبيب عمور

ايه السؤال المحرج ده ؟..... مش متوقع على الاطلاق وخصوصا وأحنا على الهوا....

الحمد لله كل واحد منا أكيد عنده مواقف يفخر بيها.... وأنا واحد من هؤلاء...لكن أنا أفضل ان احنا ما نتكلمش فيها لأن ده ممكن ينقص من أجرها اللى نحتسبه عند الله...والموقف الوحيد الى ممكن يكون مسموح فيه بالكلام هو اذا كان نية الواحد ان الناس تقتدى بيه.... و الأعمال بالنيات ...

دى نصيحة عامة لأن ساعات الواحد يقعد يحكى على حاجات ويكون مبسوط من نظرة الأعجاب فى عيون الناس ...وهو مش واخد باله ان الشيطان ضحك عليه و أحبط عمله...وفيه حديث طويل للرسول فى هذا المعنى...

ومع هذا فأنا أفخر أنى (بتوفيق الله) كان لى بعض الأراء الطبية التى أنقذت مريض من البتر مثلا....أو انقذت جنين من عملية أجهاض...أو ساهمت فى عدم تعرض أحد المرضى لأجراء عملية جراحية خطيرة ما كانش فى حاجة لها... وده من فضل الله و علمه اللى اتعلمته...

أنا مؤمن جدا ان مافيش فى مجال الطب مكان لأنصاف المتعلمين ...احنا بنتعامل مع أرواح البشر..... وممكن كلمة غير مسئولة تكلف مريض حياته....أو تخليه يعيش معذب....أو على أقل تقدير ما يعرفش ينام من القلق

وعلى العكس قد ايه ممكن مقابلة حلوة بوجه باسم لمريض بالسرطان ممكن تعطيه أمل فى حياته...وتجعل أيامه (الباقية )سعيدة.

وعشان ما تزعلش يا عمور...أنا من الحاجات اللى بافخر بيها...انى كنت بار بأمى وأبى (رحمهما الله).

وحاجة كمان...انى نجحت فى امتحان الدكتوراة من أول مرة (على فكرة دى فى عالم الطب تعتبر من عجائب الدنيا أو المستحيلات التلاتة)

فى انتظار اسئلة الأخوة المستمعين

[nash]

ماشاء الله عليك يا دكتور الشامي.....

ممكن نعرف تخصص حضرتك؟؟

مش فضول ولا حاجه لا سمح الله...بس إستغلال إن شاء الله....

[nash]

الباشم مهندس موجلي....

قلت مانشعر به جميعا..وافضت في الحديث...

الغريبه يا جماعه أننا الجنسيه الوحيده التي نعشق تراب الوطن حتي لو كان مش نظيف..

الوحيدين الذين نشتاق للهواء المليء بعادم السيارت والمشبع بالدخان الأسود الذي يغطي سماء مصر....

تخيلوا ..هنا في الغربه..قابلت وصادقت جنسيات عربيه أخري...الكثير منهم أستقر واستوطن هنا واشتري أملاك خاصه ولا يفكرون مجرد التفكير بالنزول حتي في أجازة لإوطانهم...

الجميل أنهم يعرفون عنا اننا الجنسيه الوحيده التي تنتقد مصر ليل نهار..ولكن لا نسمح للغريب بإنتقادها..ونعشق بلدنا حتي النخاع....

تصوروا عند عودتي من الأجازة أبقي علي الاقل شهر حتي أعتاد علي جو البلد العام...ثم أقوم بالإضراب عن الخروج لإكثر من شهرين..وحتي النظر من النافذه لا أنظر منها

موضوع حبنا لمصر موضوع معجون بالعشق لها

[ELSHAMY]

الأخت ناش.....أنا تخصصى فى الأشعة التشخيصية.....

والحقيقة ان هذا التحصص بالذات بيجبر الطبيب انه يكون على علم ببقية التخصصات حتى يكون قادر على تشخيص معظم الأمراض فى كل التخصصات

عذرا للجميع.....نسيت أقول لكم انى فعلا فحور بمعرفتكم جميعا

[mogly]

ليه كده يل موجلي قلبت عليا المواجع للاسف لازم اروح الشغل دلوقتي وللحديث بقيه سلام اخوك احمد

أبو حميد العزيز

آسف و الله بس ألكس هى السبب سألت السؤال و انا لسه طالع من موضوع الإستراتيجك كوكمبرز و مضغوط على أخرى و هى راحت ملبسانى السؤال فى وشى لقيت نفسى بافضفض، انا حاسس بيك و الله لأنى فى نفس الظروف و أوعى تفتكر ان عندنا أفضل حالا (و ده رايى الشخصى أرجو انه مايزعلش حد) الغربة غربة طالما انت بره بلدك اللى اتربيت فيها، المشكلة ان الحالة دى بتبدى بعد فترة من الغربة و بتزيد مع الأيام ، لكن "وات كان وى دو ماين فرويند"

الباشم مهندس موجلي....

قلت مانشعر به جميعا..وافضت في الحديث...

الأخت ناش

أولا دى فرصة سعيدة أول مرة نتقابل فى الرابطة

انا بأعتذر عن الإفاضة فى الحديث إذا كان قصدك انى أحتفظت بالميكرفون أكثر من اللازم لكن خدى بالك ماحدش طلبه منى :lol:

بس فيه حاجة لازم أعترف بيها انا عن نفسى و هى ان الزمن بالنسبة لى توقف عند سنة 92 و دى السنة اللى هاجرت فيها على كندا و كذلك صورة مصر بالنسبة لى توقفت عند نفس النقطة مش عارف دى حاجة كويسة و ألا وحشة بس هوه ده اللى حصل و انا اعتقادى دلوقتى انى إذا حاولت استقر فى مصر ممكن اقابل صعوبات مالهاش حصر و خصوصا إذا كنت مازلت فى سن العمل مش فى المعاش يعنى انا مش نفس الشخص بتاع 15 سنة فاتوا و مصر مش هى مصر بتاعة 92 و لكن فى النهاية زى ماقالت ناش بنحبها مهما حصل و مهما كانت لدرجة انك ممكن تلاقى واحد من القاهرة يقول لك انا مشتاق مش قادر نفسى اشم عبير السحابة السودا

د/ شامى انت كده جبته لنفسك يا باشا استعد بقى لأبو بلاش، و مش عارف أنزل أغنية عود رغم انها معايا على الفلاش و دى طبعا ما تتنسيش

مهندس سالم انا يا سيدى الفاضل دفعة 82 ثانوى و 87 جامعة ، ها مين يكسب؟

مساء الخير على الجميع نفر نفر

موجلى

[nash]

أنا شايفه عمرو واقف مستني المايك....

بس أستني يا عمرو لحظه..حبيت أوضح للباش مهندس موجلي..أن المايك ممكن يفضل معاه شويه كمان...

لو كلمتنا عن أنواع الإحباطات التي صادفتك أولا .....حتي تصل إلي مرحله الرضا عن النفس...مع أن هذه المرحله صعب جدا الوصول إليها.....

عمرو ممكن تاخد المايك بعد إجابه موجلي إن شاء الله

[amrhoras]

ليه كدى احباطات ايه يامدام ناش :lol: بلاش تفتحى السيره دى هتخليني ارد بدال أ/موجلى واكتبلكم بدال الصفحه كتاب

حمد الله على سلامتك على فكره محتاجنلك جدا فى فكرة الاذاعة الصامته انشا الله ننزل بموضوع جامد جدااااااا :winner: يلاقى نجاح يكسر السيراميك ويطير الورد اللى عليه

انذار ليكي لتأخيرك المتكرر

==================================================

أ/ موجلى ثانويه عامه 82 ماشا الله

انا بقى دفعة 82 بيبهات مين يقول هات :lol: متنكروش انى فاتحة خير عليكوا فى نفس السنه اعتلى عمنا وريس الكل كرسي العرش بس هو ناكر الجميل نسي ان فترة رئاسته من عمرى :sad:

ياريت تقولنا قصة سفرك من البدايه وازاى فكرت وايه دوافعك وهل انت ندمت ولا لقيت نفسك ؟

شكرا

عمرو